| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
4. උදපානදායකත්‌ථෙරඅපදානවණ්‌ණනා
4. Udapānadāyakattheraapadānavaṇṇanā
විපස්‌සිනො භගවතොතිආදිකං ආයස්‌මතො උදපානදායකත්‌ථෙරස්‌ස අපදානං. අයම්‌පි ථෙරො පුරිමමුනිවරෙසු කතාධිකාරො අනෙකෙසු භවෙසු කතපුඤ්‌ඤසඤ්‌චයො විපස්‌සිස්‌ස භගවතො කාලෙ කුලගෙහෙ නිබ්‌බත්‌තො වුද්‌ධිප්‌පත්‌තො ‘‘පානීයදානං මයා දාතබ්‌බං, තඤ්‌ච නිරන්‌තරං කත්‌වා පවත්‌තෙතුං වට්‌ටතී’’ති චින්‌තෙත්‌වා එකං කූපං ඛනාපෙත්‌වා උදකසම්‌පත්‌තකාලෙ ඉට්‌ඨකාහි චිනාපෙත්‌වා ථිරං කත්‌වා තත්‌ථ උට්‌ඨිතෙන උදකෙන පුණ්‌ණං තං උදපානං විපස්‌සිස්‌ස භගවතො නිය්‍යාදෙසි. භගවා පානීයදානානිසංසදීපකං අනුමොදනං අකාසි . සො තෙන පුඤ්‌ඤෙන දෙවමනුස්‌සෙසු සංසරන්‌තො නිබ්‌බත්‌තනිබ්‌බත්‌තට්‌ඨානෙ පොක්‌ඛරණීඋදපානපානීයාදිසම්‌පන්‌නො සුඛමනුභවිත්‌වා ඉමස්‌මිං බුද්‌ධුප්‌පාදෙ එකස්‌මිං කුලෙ නිබ්‌බත්‌තො වුද්‌ධිමන්‌වාය සද්‌ධො පසන්‌නො පබ්‌බජිත්‌වා නචිරස්‌සෙව අරහා අහොසි.
Vipassino bhagavatotiādikaṃ āyasmato udapānadāyakattherassa apadānaṃ. Ayampi thero purimamunivaresu katādhikāro anekesu bhavesu katapuññasañcayo vipassissa bhagavato kāle kulagehe nibbatto vuddhippatto ‘‘pānīyadānaṃ mayā dātabbaṃ, tañca nirantaraṃ katvā pavattetuṃ vaṭṭatī’’ti cintetvā ekaṃ kūpaṃ khanāpetvā udakasampattakāle iṭṭhakāhi cināpetvā thiraṃ katvā tattha uṭṭhitena udakena puṇṇaṃ taṃ udapānaṃ vipassissa bhagavato niyyādesi. Bhagavā pānīyadānānisaṃsadīpakaṃ anumodanaṃ akāsi . So tena puññena devamanussesu saṃsaranto nibbattanibbattaṭṭhāne pokkharaṇīudapānapānīyādisampanno sukhamanubhavitvā imasmiṃ buddhuppāde ekasmiṃ kule nibbatto vuddhimanvāya saddho pasanno pabbajitvā nacirasseva arahā ahosi.
18. සො අපරභාගෙ අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො විපස්‌සිනො භගවතොතිආදිමාහ. තත්‌ථ උදපානො කතො මයාති උදකං පිවන්‌ති එත්‌ථාති උදපානො, කූපපොක්‌ඛරණීතළාකානමෙතං අධිවචනං. සො උදපානො කූපො විපස්‌සිස්‌ස භගවතො අත්‌ථාය කතො ඛනිතොති අත්‌ථො. සෙසං උත්‌තානත්‌ථමෙවාති.
18. So aparabhāge attano pubbakammaṃ saritvā somanassajāto pubbacaritāpadānaṃ pakāsento vipassino bhagavatotiādimāha. Tattha udapāno kato mayāti udakaṃ pivanti etthāti udapāno, kūpapokkharaṇītaḷākānametaṃ adhivacanaṃ. So udapāno kūpo vipassissa bhagavato atthāya kato khanitoti attho. Sesaṃ uttānatthamevāti.
උදපානදායකත්‌ථෙරඅපදානවණ්‌ණනා සමත්‌තා.
Udapānadāyakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 4. උදපානදායකත්‌ථෙරඅපදානං • 4. Udapānadāyakattheraapadānaṃ
