| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৬. উদযব্বযঞাণনিদ্দেসো
6. Udayabbayañāṇaniddeso
৪৯. কথং পচ্চুপ্পন্নানং ধম্মানং ৰিপরিণামানুপস্সনে পঞ্ঞা উদযব্বযানুপস্সনে ঞাণং? জাতং রূপং পচ্চুপ্পন্নং, তস্স নিব্বত্তিলক্খণং উদযো, ৰিপরিণামলক্খণং ৰযো, অনুপস্সনা ঞাণং। জাতা ৰেদনা…পে॰… জাতা সঞ্ঞা… জাতা সঙ্খারা… জাতং ৰিঞ্ঞাণং… জাতং চক্খু…পে॰… জাতো ভৰো পচ্চুপ্পন্নো, তস্স নিব্বত্তিলক্খণং উদযো, ৰিপরিণামলক্খণং ৰযো, অনুপস্সনা ঞাণং।
49. Kathaṃ paccuppannānaṃ dhammānaṃ vipariṇāmānupassane paññā udayabbayānupassane ñāṇaṃ? Jātaṃ rūpaṃ paccuppannaṃ, tassa nibbattilakkhaṇaṃ udayo, vipariṇāmalakkhaṇaṃ vayo, anupassanā ñāṇaṃ. Jātā vedanā…pe… jātā saññā… jātā saṅkhārā… jātaṃ viññāṇaṃ… jātaṃ cakkhu…pe… jāto bhavo paccuppanno, tassa nibbattilakkhaṇaṃ udayo, vipariṇāmalakkhaṇaṃ vayo, anupassanā ñāṇaṃ.
৫০. পঞ্চন্নং খন্ধানং উদযং পস্সন্তো কতি লক্খণানি পস্সতি, ৰযং পস্সন্তো কতি লক্খণানি পস্সতি, উদযব্বযং পস্সন্তো কতি লক্খণানি পস্সতি? পঞ্চন্নং খন্ধানং উদযং পস্সন্তো পঞ্চৰীসতি লক্খণানি পস্সতি, ৰযং পস্সন্তো পঞ্চৰীসতি লক্খণানি পস্সতি ; উদযব্বযং পস্সন্তো পঞ্ঞাস লক্খণানি পস্সতি।
50. Pañcannaṃ khandhānaṃ udayaṃ passanto kati lakkhaṇāni passati, vayaṃ passanto kati lakkhaṇāni passati, udayabbayaṃ passanto kati lakkhaṇāni passati? Pañcannaṃ khandhānaṃ udayaṃ passanto pañcavīsati lakkhaṇāni passati, vayaṃ passanto pañcavīsati lakkhaṇāni passati ; udayabbayaṃ passanto paññāsa lakkhaṇāni passati.
রূপক্খন্ধস্স উদযং পস্সন্তো কতি লক্খণানি পস্সতি, ৰযং পস্সন্তো কতি লক্খণানি পস্সতি, উদযব্বযং পস্সন্তো কতি লক্খণানি পস্সতি? ৰেদনাক্খন্ধস্স…পে॰… সঞ্ঞাক্খন্ধস্স…পে॰… সঙ্খারক্খন্ধস্স…পে॰… ৰিঞ্ঞাণক্খন্ধস্স উদযং পস্সন্তো কতি লক্খণানি পস্সতি, ৰযং পস্সন্তো কতি লক্খণানি পস্সতি, উদযব্বযং পস্সন্তো কতি লক্খণানি পস্সতি? রূপক্খন্ধস্স উদযং পস্সন্তো পঞ্চ লক্খণানি পস্সতি, ৰযং পস্সন্তো পঞ্চ লক্খণানি পস্সতি; উদযব্বযং পস্সন্তো দস লক্খণানি পস্সতি। ৰেদনাক্খন্ধস্স…পে॰… সঞ্ঞাক্খন্ধস্স… সঙ্খারক্খন্ধস্স… ৰিঞ্ঞাণক্খন্ধস্স উদযং পস্সন্তো পঞ্চ লক্খণানি পস্সতি, ৰযং পস্সন্তো পঞ্চ লক্খণানি পস্সতি; উদযব্বযং পস্সন্তো দস লক্খণানি পস্সতি।
Rūpakkhandhassa udayaṃ passanto kati lakkhaṇāni passati, vayaṃ passanto kati lakkhaṇāni passati, udayabbayaṃ passanto kati lakkhaṇāni passati? Vedanākkhandhassa…pe… saññākkhandhassa…pe… saṅkhārakkhandhassa…pe… viññāṇakkhandhassa udayaṃ passanto kati lakkhaṇāni passati, vayaṃ passanto kati lakkhaṇāni passati, udayabbayaṃ passanto kati lakkhaṇāni passati? Rūpakkhandhassa udayaṃ passanto pañca lakkhaṇāni passati, vayaṃ passanto pañca lakkhaṇāni passati; udayabbayaṃ passanto dasa lakkhaṇāni passati. Vedanākkhandhassa…pe… saññākkhandhassa… saṅkhārakkhandhassa… viññāṇakkhandhassa udayaṃ passanto pañca lakkhaṇāni passati, vayaṃ passanto pañca lakkhaṇāni passati; udayabbayaṃ passanto dasa lakkhaṇāni passati.
রূপক্খন্ধস্স উদযং পস্সন্তো কতমানি পঞ্চ লক্খণানি পস্সতি? অৰিজ্জাসমুদযা রূপসমুদযোতি – পচ্চযসমুদযট্ঠেন রূপক্খন্ধস্স উদযং পস্সতি। তণ্হাসমুদযা রূপসমুদযোতি – পচ্চযসমুদযট্ঠেন রূপক্খন্ধস্স উদযং পস্সতি। কম্মসমুদযা রূপসমুদযোতি – পচ্চযসমুদযট্ঠেন রূপক্খন্ধস্স উদযং পস্সতি। আহারসমুদযা রূপসমুদযোতি – পচ্চযসমুদযট্ঠেন রূপক্খন্ধস্স উদযং পস্সতি। নিব্বত্তিলক্খণং পস্সন্তোপি রূপক্খন্ধস্স উদযং পস্সতি। রূপক্খন্ধস্স উদযং পস্সন্তো ইমানি পঞ্চ লক্খণানি পস্সতি।
Rūpakkhandhassa udayaṃ passanto katamāni pañca lakkhaṇāni passati? Avijjāsamudayā rūpasamudayoti – paccayasamudayaṭṭhena rūpakkhandhassa udayaṃ passati. Taṇhāsamudayā rūpasamudayoti – paccayasamudayaṭṭhena rūpakkhandhassa udayaṃ passati. Kammasamudayā rūpasamudayoti – paccayasamudayaṭṭhena rūpakkhandhassa udayaṃ passati. Āhārasamudayā rūpasamudayoti – paccayasamudayaṭṭhena rūpakkhandhassa udayaṃ passati. Nibbattilakkhaṇaṃ passantopi rūpakkhandhassa udayaṃ passati. Rūpakkhandhassa udayaṃ passanto imāni pañca lakkhaṇāni passati.
ৰযং পস্সন্তো কতমানি পঞ্চ লক্খণানি পস্সতি? অৰিজ্জানিরোধা রূপনিরোধোতি – পচ্চযনিরোধট্ঠেন রূপক্খন্ধস্স ৰযং পস্সতি। তণ্হানিরোধা রূপনিরোধোতি – পচ্চযনিরোধট্ঠেন রূপক্খন্ধস্স ৰযং পস্সতি। কম্মনিরোধা রূপনিরোধোতি – পচ্চযনিরোধট্ঠেন রূপক্খন্ধস্স ৰযং পস্সতি। আহারনিরোধা রূপনিরোধোতি – পচ্চযনিরোধট্ঠেন রূপক্খন্ধস্স ৰযং পস্সতি । ৰিপরিণামলক্খণং পস্সন্তোপি রূপক্খন্ধস্স ৰযং পস্সতি। রূপক্খন্ধস্স ৰযং পস্সন্তো ইমানি পঞ্চ লক্খণানি পস্সতি। উদযব্বযং পস্সন্তো ইমানি দস লক্খণানি পস্সতি।
Vayaṃ passanto katamāni pañca lakkhaṇāni passati? Avijjānirodhā rūpanirodhoti – paccayanirodhaṭṭhena rūpakkhandhassa vayaṃ passati. Taṇhānirodhā rūpanirodhoti – paccayanirodhaṭṭhena rūpakkhandhassa vayaṃ passati. Kammanirodhā rūpanirodhoti – paccayanirodhaṭṭhena rūpakkhandhassa vayaṃ passati. Āhāranirodhā rūpanirodhoti – paccayanirodhaṭṭhena rūpakkhandhassa vayaṃ passati . Vipariṇāmalakkhaṇaṃ passantopi rūpakkhandhassa vayaṃ passati. Rūpakkhandhassa vayaṃ passanto imāni pañca lakkhaṇāni passati. Udayabbayaṃ passanto imāni dasa lakkhaṇāni passati.
ৰেদনাক্খন্ধস্স উদযং পস্সন্তো কতমানি পঞ্চ লক্খণানি পস্সতি? অৰিজ্জাসমুদযা ৰেদনাসমুদযোতি – পচ্চযসমুদযট্ঠেন ৰেদনাক্খন্ধস্স উদযং পস্সতি। তণ্হাসমুদযা ৰেদনাসমুদযোতি – পচ্চযসমুদযট্ঠেন ৰেদনাক্খন্ধস্স উদযং পস্সতি। কম্মসমুদযা ৰেদনাসমুদযোতি – পচ্চযসমুদযট্ঠেন ৰেদনাক্খন্ধস্স উদযং পস্সতি। ফস্সসমুদযা ৰেদনাসমুদযোতি – পচ্চযসমুদযট্ঠেন ৰেদনাক্খন্ধস্স উদযং পস্সতি। নিব্বত্তিলক্খণং পস্সন্তোপি ৰেদনাক্খন্ধস্স উদযং পস্সতি। ৰেদনাক্খন্ধস্স উদযং পস্সন্তো ইমানি পঞ্চ লক্খণানি পস্সতি।
Vedanākkhandhassa udayaṃ passanto katamāni pañca lakkhaṇāni passati? Avijjāsamudayā vedanāsamudayoti – paccayasamudayaṭṭhena vedanākkhandhassa udayaṃ passati. Taṇhāsamudayā vedanāsamudayoti – paccayasamudayaṭṭhena vedanākkhandhassa udayaṃ passati. Kammasamudayā vedanāsamudayoti – paccayasamudayaṭṭhena vedanākkhandhassa udayaṃ passati. Phassasamudayā vedanāsamudayoti – paccayasamudayaṭṭhena vedanākkhandhassa udayaṃ passati. Nibbattilakkhaṇaṃ passantopi vedanākkhandhassa udayaṃ passati. Vedanākkhandhassa udayaṃ passanto imāni pañca lakkhaṇāni passati.
ৰযং পস্সন্তো কতমানি পঞ্চ লক্খণানি পস্সতি? অৰিজ্জানিরোধা ৰেদনানিরোধোতি – পচ্চযনিরোধট্ঠেন ৰেদনাক্খন্ধস্স ৰযং পস্সতি। তণ্হানিরোধা ৰেদনানিরোধোতি – পচ্চযনিরোধট্ঠেন ৰেদনাক্খন্ধস্স ৰযং পস্সতি। কম্মনিরোধা ৰেদনানিরোধোতি – পচ্চযনিরোধট্ঠেন ৰেদনাক্খন্ধস্স ৰযং পস্সতি। ফস্সনিরোধা ৰেদনানিরোধোতি – পচ্চযনিরোধট্ঠেন ৰেদনাক্খন্ধস্স ৰযং পস্সতি। ৰিপরিণামলক্খণং পস্সন্তোপি ৰেদনাক্খন্ধস্স ৰযং পস্সতি। ৰেদনাক্খন্ধস্স ৰযং পস্সন্তো ইমানি পঞ্চ লক্খণানি পস্সতি। উদযব্বযং পস্সন্তো ইমানি দস লক্খণানি পস্সতি।
Vayaṃ passanto katamāni pañca lakkhaṇāni passati? Avijjānirodhā vedanānirodhoti – paccayanirodhaṭṭhena vedanākkhandhassa vayaṃ passati. Taṇhānirodhā vedanānirodhoti – paccayanirodhaṭṭhena vedanākkhandhassa vayaṃ passati. Kammanirodhā vedanānirodhoti – paccayanirodhaṭṭhena vedanākkhandhassa vayaṃ passati. Phassanirodhā vedanānirodhoti – paccayanirodhaṭṭhena vedanākkhandhassa vayaṃ passati. Vipariṇāmalakkhaṇaṃ passantopi vedanākkhandhassa vayaṃ passati. Vedanākkhandhassa vayaṃ passanto imāni pañca lakkhaṇāni passati. Udayabbayaṃ passanto imāni dasa lakkhaṇāni passati.
সঞ্ঞাক্খন্ধস্স…পে॰… সঙ্খারক্খন্ধস্স…পে॰… ৰিঞ্ঞাণক্খন্ধস্স উদযং পস্সন্তো কতমানি পঞ্চ লক্খণানি পস্সতি? অৰিজ্জাসমুদযা ৰিঞ্ঞাণসমুদযোতি – পচ্চযসমুদযট্ঠেন ৰিঞ্ঞাণক্খন্ধস্স উদযং পস্সতি। তণ্হাসমুদযা ৰিঞ্ঞাণসমুদযোতিপচ্চযসমুদযট্ঠেন ৰিঞ্ঞাণক্খন্ধস্স উদযং পস্সতি। কম্মসমুদযা ৰিঞ্ঞাণসমুদযোতি – পচ্চযসমুদযট্ঠেন ৰিঞ্ঞাণক্খন্ধস্স উদযং পস্সতি। নামরূপসমুদযা ৰিঞ্ঞাণসমুদযোতি – পচ্চযসমুদযট্ঠেন ৰিঞ্ঞাণক্খন্ধস্স উদযং পস্সতি। নিব্বত্তিলক্খণং পস্সন্তোপি ৰিঞ্ঞাণক্খন্ধস্স উদযং পস্সতি। ৰিঞ্ঞাণক্খন্ধস্স উদযং পস্সন্তো ইমানি পঞ্চ লক্খণানি পস্সতি।
Saññākkhandhassa…pe… saṅkhārakkhandhassa…pe… viññāṇakkhandhassa udayaṃ passanto katamāni pañca lakkhaṇāni passati? Avijjāsamudayā viññāṇasamudayoti – paccayasamudayaṭṭhena viññāṇakkhandhassa udayaṃ passati. Taṇhāsamudayā viññāṇasamudayotipaccayasamudayaṭṭhena viññāṇakkhandhassa udayaṃ passati. Kammasamudayā viññāṇasamudayoti – paccayasamudayaṭṭhena viññāṇakkhandhassa udayaṃ passati. Nāmarūpasamudayā viññāṇasamudayoti – paccayasamudayaṭṭhena viññāṇakkhandhassa udayaṃ passati. Nibbattilakkhaṇaṃ passantopi viññāṇakkhandhassa udayaṃ passati. Viññāṇakkhandhassa udayaṃ passanto imāni pañca lakkhaṇāni passati.
ৰযং পস্সন্তো কতমানি পঞ্চ লক্খণানি পস্সতি? অৰিজ্জানিরোধা ৰিঞ্ঞাণনিরোধোতি – পচ্চযনিরোধট্ঠেন ৰিঞ্ঞাণক্খন্ধস্স ৰযং পস্সতি। তণ্হানিরোধা ৰিঞ্ঞাণনিরোধোতি – পচ্চযনিরোধট্ঠেন ৰিঞ্ঞাণক্খন্ধস্স ৰযং পস্সতি। কম্মনিরোধা ৰিঞ্ঞাণনিরোধোতি – পচ্চযনিরোধট্ঠেন ৰিঞ্ঞাণক্খন্ধস্স ৰযং পস্সতি। নামরূপনিরোধা ৰিঞ্ঞাণনিরোধোতি – পচ্চযনিরোধট্ঠেন ৰিঞ্ঞাণক্খন্ধস্স ৰযং পস্সতি। ৰিপরিণামলক্খণং পস্সন্তোপি ৰিঞ্ঞাণক্খন্ধস্স ৰযং পস্সতি। ৰিঞ্ঞাণক্খন্ধস্স ৰযং পস্সন্তো ইমানি পঞ্চ লক্খণানি পস্সতি। উদযব্বযং পস্সন্তো ইমানি দস লক্খণানি পস্সতি।
Vayaṃ passanto katamāni pañca lakkhaṇāni passati? Avijjānirodhā viññāṇanirodhoti – paccayanirodhaṭṭhena viññāṇakkhandhassa vayaṃ passati. Taṇhānirodhā viññāṇanirodhoti – paccayanirodhaṭṭhena viññāṇakkhandhassa vayaṃ passati. Kammanirodhā viññāṇanirodhoti – paccayanirodhaṭṭhena viññāṇakkhandhassa vayaṃ passati. Nāmarūpanirodhā viññāṇanirodhoti – paccayanirodhaṭṭhena viññāṇakkhandhassa vayaṃ passati. Vipariṇāmalakkhaṇaṃ passantopi viññāṇakkhandhassa vayaṃ passati. Viññāṇakkhandhassa vayaṃ passanto imāni pañca lakkhaṇāni passati. Udayabbayaṃ passanto imāni dasa lakkhaṇāni passati.
পঞ্চন্নং খন্ধানং উদযং পস্সন্তো ইমানি পঞ্চৰীসতি লক্খণানি পস্সতি, ৰযং পস্সন্তো ইমানি পঞ্চৰীসতি লক্খণানি পস্সতি, উদযব্বযং পস্সন্তো ইমানি পঞ্ঞাস লক্খণানি পস্সতি। তং ঞাতট্ঠেন ঞাণং, পজাননট্ঠেন পঞ্ঞা। তেন ৰুচ্চতি – ‘‘পচ্চুপ্পন্নানং ধম্মানং ৰিপরিণামানুপস্সনে পঞ্ঞা উদযব্বযানুপস্সনে ঞাণং’’। রূপক্খন্ধো 1 আহারসমুদযো । ৰেদনা, সঞ্ঞা, সঙ্খারা – তযো 2 খন্ধা ফস্সসমুদযা। ৰিঞ্ঞাণক্খন্ধো নামরূপসমুদযো।
Pañcannaṃ khandhānaṃ udayaṃ passanto imāni pañcavīsati lakkhaṇāni passati, vayaṃ passanto imāni pañcavīsati lakkhaṇāni passati, udayabbayaṃ passanto imāni paññāsa lakkhaṇāni passati. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘paccuppannānaṃ dhammānaṃ vipariṇāmānupassane paññā udayabbayānupassane ñāṇaṃ’’. Rūpakkhandho 3 āhārasamudayo . Vedanā, saññā, saṅkhārā – tayo 4 khandhā phassasamudayā. Viññāṇakkhandho nāmarūpasamudayo.
উদযব্বযঞাণনিদ্দেসো ছট্ঠো।
Udayabbayañāṇaniddeso chaṭṭho.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ৬. উদযব্বযঞাণনিদ্দেসৰণ্ণনা • 6. Udayabbayañāṇaniddesavaṇṇanā
