| Library / Tipiṭaka / ติปิฎก • Tipiṭaka / สุตฺตนิปาตปาฬิ • Suttanipātapāḷi |
๑๓. อุทยมาณวปุจฺฉา
13. Udayamāṇavapucchā
๑๑๑๑.
1111.
‘‘ฌายิํ วิรชมาสีนํ, (อิจฺจายสฺมา อุทโย) กตกิจฺจํ อนาสวํ;
‘‘Jhāyiṃ virajamāsīnaṃ, (iccāyasmā udayo) katakiccaṃ anāsavaṃ;
ปารคุํ สพฺพธมฺมานํ, อตฺถิ ปเญฺหน อาคมํ;
Pāraguṃ sabbadhammānaṃ, atthi pañhena āgamaṃ;
อญฺญาวิโมกฺขํ ปพฺรูหิ, อวิชฺชาย ปเภทนํ’’ฯ
Aññāvimokkhaṃ pabrūhi, avijjāya pabhedanaṃ’’.
๑๑๑๒.
1112.
‘‘ปหานํ กามจฺฉนฺทานํ, (อุทยาติ ภควา) โทมนสฺสาน จูภยํ;
‘‘Pahānaṃ kāmacchandānaṃ, (udayāti bhagavā) domanassāna cūbhayaṃ;
ถินสฺส จ ปนูทนํ, กุกฺกุจฺจานํ นิวารณํฯ
Thinassa ca panūdanaṃ, kukkuccānaṃ nivāraṇaṃ.
๑๑๑๓.
1113.
‘‘อุเปกฺขาสติสํสุทฺธํ, ธมฺมตกฺกปุเรชวํ;
‘‘Upekkhāsatisaṃsuddhaṃ, dhammatakkapurejavaṃ;
อญฺญาวิโมกฺขํ ปพฺรูมิ, อวิชฺชาย ปเภทนํ’’ฯ
Aññāvimokkhaṃ pabrūmi, avijjāya pabhedanaṃ’’.
๑๑๑๔.
1114.
‘‘กิํสุ สํโยชโน โลโก, กิํสุ ตสฺส วิจารณํ;
‘‘Kiṃsu saṃyojano loko, kiṃsu tassa vicāraṇaṃ;
กิสฺสสฺส วิปฺปหาเนน, นิพฺพานํ อิติ วุจฺจติ’’ฯ
Kissassa vippahānena, nibbānaṃ iti vuccati’’.
๑๑๑๕.
1115.
‘‘นนฺทิสํโยชโน โลโก, วิตกฺกสฺส วิจารณํ;
‘‘Nandisaṃyojano loko, vitakkassa vicāraṇaṃ;
ตณฺหาย วิปฺปหาเนน, นิพฺพานํ อิติ วุจฺจติ’’ฯ
Taṇhāya vippahānena, nibbānaṃ iti vuccati’’.
๑๑๑๖.
1116.
‘‘กถํ สตสฺส จรโต, วิญฺญาณํ อุปรุชฺฌติ;
‘‘Kathaṃ satassa carato, viññāṇaṃ uparujjhati;
ภควนฺตํ ปุฎฺฐุมาคมฺม, ตํ สุโณม วโจ ตว’’ฯ
Bhagavantaṃ puṭṭhumāgamma, taṃ suṇoma vaco tava’’.
๑๑๑๗.
1117.
‘‘อชฺฌตฺตญฺจ พหิทฺธา จ, เวทนํ นาภินนฺทโต;
‘‘Ajjhattañca bahiddhā ca, vedanaṃ nābhinandato;
เอวํ สตสฺส จรโต, วิญฺญาณํ อุปรุชฺฌตี’’ติฯ
Evaṃ satassa carato, viññāṇaṃ uparujjhatī’’ti.
อุทยมาณวปุจฺฉา เตรสมา นิฎฺฐิตาฯ
Udayamāṇavapucchā terasamā niṭṭhitā.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / สุตฺตนิปาต-อฎฺฐกถา • Suttanipāta-aṭṭhakathā / ๑๓. อุทยสุตฺตวณฺณนา • 13. Udayasuttavaṇṇanā
