| Library / Tipiṭaka / திபிடக • Tipiṭaka / சூளனித்³தே³ஸ-அட்ட²கதா² • Cūḷaniddesa-aṭṭhakathā |
13. உத³யமாணவஸுத்தனித்³தே³ஸவண்ணனா
13. Udayamāṇavasuttaniddesavaṇṇanā
74. தேரஸமே உத³யஸுத்தே – அஞ்ஞாவிமொக்க²ந்தி பஞ்ஞானுபா⁴வனிஜ்ஜா²னங் தங் விமொக்க²ங் புச்ச²தி.
74. Terasame udayasutte – aññāvimokkhanti paññānubhāvanijjhānaṃ taṃ vimokkhaṃ pucchati.
பட²மேனபி ஜா²னேன ஜா²யீதி விதக்கவிசாரபீதிஸுக²சித்தேகக்³க³தாஸம்பயுத்தேன பஞ்சங்கி³கேன பட²மஜ்ஜா²னேன ஜா²யதீதி ஜா²யீ. து³தியேனாதி பீதிஸுக²சித்தேகக்³க³தாஸம்பயுத்தேன. ததியேனாதி ஸுக²சித்தேகக்³க³தாஸம்பயுத்தேன. சதுத்தே²னாதி உபெக்கா²சித்தேகக்³க³தாஸம்பயுத்தேன. ஸவிதக்கஸவிசாரேனபி ஜா²னேன ஜா²யீதி சதுக்கனயபஞ்சகனயேஸு பட²மஜ்ஜா²னேன ஸவிதக்கஸவிசாரேனபி ஜா²னேன ஜா²யதீதி ஜா²யீ. அவிதக்கவிசாரமத்தேனாதி பஞ்சகனயே து³தியேன ஜா²னேன. அவிதக்கஅவிசாரேனாதி து³தியததியாதி³அவஸேஸஜா²னேன. ஸப்பீதிகேனாதி பீதிஸம்பயுத்தேன து³கதிகஜா²னேன. நிப்பீதிகேனாதி பீதிவிரஹிதேன தத³வஸேஸஜா²னேன. ஸாதஸஹக³தேனாதி ஸுக²ஸஹக³தேன திகசதுக்கஜா²னேன. உபெக்கா²ஸஹக³தேனாதி சதுக்கபஞ்சகேன. ஸுஞ்ஞதேனபீதி ஸுஞ்ஞதவிமொக்க²ஸம்பயுத்தேன. அனிமித்தேனபீதி அனிச்சனிமித்தங் து⁴வனிமித்தங் அனிமித்தஞ்ச உக்³கா⁴டெத்வா படிலத்³தே⁴ன அனிமித்தேனபி ஜா²னேன ஜா²யதீதி ஜா²யீ. அப்பணிஹிதேனபீதி மக்³கா³க³மனவஸேன பணிதி⁴ங் ஸோதெ⁴த்வா பரியாதி³யித்வா ப²லஸமாபத்திவஸேன அப்பணிஹிதேனபி. லோகியேனபீதி லோகியேன பட²மது³தியததியசதுத்தே²ன.
Paṭhamenapi jhānena jhāyīti vitakkavicārapītisukhacittekaggatāsampayuttena pañcaṅgikena paṭhamajjhānena jhāyatīti jhāyī. Dutiyenāti pītisukhacittekaggatāsampayuttena. Tatiyenāti sukhacittekaggatāsampayuttena. Catutthenāti upekkhācittekaggatāsampayuttena. Savitakkasavicārenapi jhānena jhāyīti catukkanayapañcakanayesu paṭhamajjhānena savitakkasavicārenapi jhānena jhāyatīti jhāyī. Avitakkavicāramattenāti pañcakanaye dutiyena jhānena. Avitakkaavicārenāti dutiyatatiyādiavasesajhānena. Sappītikenāti pītisampayuttena dukatikajhānena. Nippītikenāti pītivirahitena tadavasesajhānena. Sātasahagatenāti sukhasahagatena tikacatukkajhānena. Upekkhāsahagatenāti catukkapañcakena. Suññatenapīti suññatavimokkhasampayuttena. Animittenapīti aniccanimittaṃ dhuvanimittaṃ animittañca ugghāṭetvā paṭiladdhena animittenapi jhānena jhāyatīti jhāyī. Appaṇihitenapīti maggāgamanavasena paṇidhiṃ sodhetvā pariyādiyitvā phalasamāpattivasena appaṇihitenapi. Lokiyenapīti lokiyena paṭhamadutiyatatiyacatutthena.
லோகுத்தரேனபீதி தேனேவ லோகுத்தரஸம்பயுத்தேன. ஜா²னரதோதி ஜா²னேஸு அபி⁴ரதோ. ஏகத்தமனுயுத்தோதி ஏகத்தங் ஏகீபா⁴வங் அனுயுத்தோ பயுத்தோ. ஸத³த்த²க³ருகோதி ஸகத்த²க³ருகோ, க-காரஸ்ஸாயங் த³-காரோ கதோ. ஸத³த்தோ²தி ச அரஹத்தங் வேதி³தப்³ப³ங். தஞ்ஹி அத்தூபனிப³த்³த⁴ட்டே²ன அத்தானங் அவிஜஹனட்டே²ன அத்தனோ பரமத்த²ட்டே²ன ச அத்தனோ அத்த²த்தா ஸகத்தோ²தி வுச்சதி. ப²லஸமாபத்திஸமாபஜ்ஜனவஸேன ஸகத்த²க³ருகோ, ‘‘நிப்³பா³னக³ருகோ’’தி ஏகே. அரஜோதி நிக்கிலேஸோ. விரஜோதி விக³தகிலேஸோ. நிரஜோதி அபனீதகிலேஸோ , ‘‘விதரஜோ’’திபி பாடோ², ஸோயேவத்தோ². ரஜாபக³தோதி கிலேஸேஹி தூ³ரீபூ⁴தோ. ரஜவிப்பஹீனோதி கிலேஸப்பஹீனோ. ரஜவிப்பயுத்தோதி கிலேஸேஹி முத்தோ.
Lokuttarenapīti teneva lokuttarasampayuttena. Jhānaratoti jhānesu abhirato. Ekattamanuyuttoti ekattaṃ ekībhāvaṃ anuyutto payutto. Sadatthagarukoti sakatthagaruko, ka-kārassāyaṃ da-kāro kato. Sadatthoti ca arahattaṃ veditabbaṃ. Tañhi attūpanibaddhaṭṭhena attānaṃ avijahanaṭṭhena attano paramatthaṭṭhena ca attano atthattā sakatthoti vuccati. Phalasamāpattisamāpajjanavasena sakatthagaruko, ‘‘nibbānagaruko’’ti eke. Arajoti nikkileso. Virajoti vigatakileso. Nirajoti apanītakileso , ‘‘vitarajo’’tipi pāṭho, soyevattho. Rajāpagatoti kilesehi dūrībhūto. Rajavippahīnoti kilesappahīno. Rajavippayuttoti kilesehi mutto.
பாஸாணகே சேதியேதி பாஸாணபிட்டே² பாராயனஸுத்தந்ததே³ஸிதட்டா²னே. ஸப்³பொ³ஸ்ஸுக்கபடிப்பஸ்ஸத்³த⁴த்தாதி ஸப்³பே³ஸங் கிலேஸஉஸ்ஸுக்கானங் படிப்பஸ்ஸத்³த⁴த்தா, நாஸிதத்தா ஆஸீனோ.
Pāsāṇake cetiyeti pāsāṇapiṭṭhe pārāyanasuttantadesitaṭṭhāne. Sabbossukkapaṭippassaddhattāti sabbesaṃ kilesaussukkānaṃ paṭippassaddhattā, nāsitattā āsīno.
கிச்சாகிச்சந்தி ‘‘இத³ங் கத்தப்³ப³ங், இத³ங் ந கத்தப்³ப³’’ந்தி ஏவங் மனஸா சிந்தேதப்³ப³ங். கரணீயாகரணீயந்தி காயத்³வாரேன அவஸ்ஸங் இத³ங் கரணீயங், இத³ங் ந கரணீயந்தி ஏவங் கரணீயாகரணீயங். பஹீனந்தி விஸ்ஸட்ட²ங். வஸிப்பத்தோதி பகு³ணபா⁴வப்பத்தோ.
Kiccākiccanti ‘‘idaṃ kattabbaṃ, idaṃ na kattabba’’nti evaṃ manasā cintetabbaṃ. Karaṇīyākaraṇīyanti kāyadvārena avassaṃ idaṃ karaṇīyaṃ, idaṃ na karaṇīyanti evaṃ karaṇīyākaraṇīyaṃ. Pahīnanti vissaṭṭhaṃ. Vasippattoti paguṇabhāvappatto.
75. அத² ப⁴க³வா யஸ்மா உத³யோ சதுத்த²ஜ்ஜா²னலாபீ⁴, தஸ்மாஸ்ஸ படிலத்³த⁴ஜா²னவஸேன நானப்பகாரதோ அஞ்ஞாவிமொக்க²ங் த³ஸ்ஸெந்தோ உபரூபரிகா³த²மாஹ. தத்த² பஹானங் காமச்ச²ந்தா³னந்தி யதி³த³ங் பட²மங் ஜா²னங் நிப்³ப³த்தெந்தஸ்ஸ காமச்ச²ந்த³பஹானங், தம்பி அஞ்ஞாவிமொக்க²ந்தி பப்³ரூமி. ஏவங் ஸப்³ப³பதா³னி யோஜேதப்³பா³னி.
75. Atha bhagavā yasmā udayo catutthajjhānalābhī, tasmāssa paṭiladdhajhānavasena nānappakārato aññāvimokkhaṃ dassento uparūparigāthamāha. Tattha pahānaṃ kāmacchandānanti yadidaṃ paṭhamaṃ jhānaṃ nibbattentassa kāmacchandapahānaṃ, tampi aññāvimokkhanti pabrūmi. Evaṃ sabbapadāni yojetabbāni.
யா சித்தஸ்ஸ அகல்யதாதி சித்தஸ்ஸ கி³லானபா⁴வோ. கி³லானோ ஹி அகல்லகோதி வுச்சதி. வினயேபி வுத்தங் – ‘‘நாஹங், ப⁴ந்தே, அகல்லகோ’’தி (பாரா॰ 151). அகம்மஞ்ஞதாதி சித்தகே³லஞ்ஞஸங்கா²தோவ அகம்மஞ்ஞதாகாரோ. ஓலீயனாதி ஓலீயனாகாரோ. இரியாபதி²கசித்தஞ்ஹி இரியாபத²ங் ஸந்தா⁴ரேதுங் அஸக்கொந்தங் ருக்கே² வக்³கு³லி விய கீ²லே லக்³கி³தபா²ணிதவாரகோ விய ச ஓலீயதி, தஸ்ஸ தங் ஆகாரங் ஸந்தா⁴ய ‘‘ஓலீயனா’’தி வுத்தங். து³தியபத³ங் உபஸக்³க³வஸேன வட்³டி⁴தங். லீனாதி அவிப்பா²ரிகதாய படிகுடிதங். இதரே த்³வே ஆகாரபா⁴வனித்³தே³ஸா. தி²னந்தி ஸப்பிபிண்டோ³ விய அவிப்பா²ரிகதாய க⁴னபா⁴வேன டி²தங். தி²யனாதி ஆகாரனித்³தே³ஸோ. தி²யிதபா⁴வோ தி²யிதத்தங், அவிப்பா²ரவஸேனேவ த²த்³த⁴தாதி அத்தோ² (த⁴॰ ஸ॰ அட்ட²॰ 1162).
Yā cittassa akalyatāti cittassa gilānabhāvo. Gilāno hi akallakoti vuccati. Vinayepi vuttaṃ – ‘‘nāhaṃ, bhante, akallako’’ti (pārā. 151). Akammaññatāti cittagelaññasaṅkhātova akammaññatākāro. Olīyanāti olīyanākāro. Iriyāpathikacittañhi iriyāpathaṃ sandhāretuṃ asakkontaṃ rukkhe vagguli viya khīle laggitaphāṇitavārako viya ca olīyati, tassa taṃ ākāraṃ sandhāya ‘‘olīyanā’’ti vuttaṃ. Dutiyapadaṃ upasaggavasena vaḍḍhitaṃ. Līnāti avipphārikatāya paṭikuṭitaṃ. Itare dve ākārabhāvaniddesā. Thinanti sappipiṇḍo viya avipphārikatāya ghanabhāvena ṭhitaṃ. Thiyanāti ākāraniddeso. Thiyitabhāvo thiyitattaṃ, avipphāravaseneva thaddhatāti attho (dha. sa. aṭṭha. 1162).
76. உபெக்கா²ஸதிஸங்ஸுத்³த⁴ந்தி சதுத்த²ஜ்ஜா²னஉபெக்கா²ஸதீஹி ஸங்ஸுத்³த⁴ங். த⁴ம்மதக்கபுரேஜவந்தி இமினா தஸ்மிங் சதுத்த²ஜ்ஜா²னவிமொக்கே² ட²த்வா ஜா²னங்கா³னி விபஸ்ஸித்வா அதி⁴க³தங் அரஹத்தவிமொக்க²ங் வத³தி. அரஹத்தவிமொக்க²ஸ்ஸ ஹி மக்³க³ஸம்பயுத்தஸம்மாஸங்கப்பாதி³பே⁴தோ³ த⁴ம்மதக்கோ புரேஜவோ ஹோதி. தேனாஹ ‘‘த⁴ம்மதக்கபுரேஜவ’’ந்தி. அவிஜ்ஜாய பபே⁴த³னந்தி ஏதமேவ ச அஞ்ஞாவிமொக்க²ங் அவிஜ்ஜாபபே⁴த³னஸங்கா²தங் நிப்³பா³னங் நிஸ்ஸாய ஜாதத்தா காரணோபசாரேன ‘‘அவிஜ்ஜாய பபே⁴த³ன’’ந்தி ப்³ரூமீதி.
76.Upekkhāsatisaṃsuddhanti catutthajjhānaupekkhāsatīhi saṃsuddhaṃ. Dhammatakkapurejavanti iminā tasmiṃ catutthajjhānavimokkhe ṭhatvā jhānaṅgāni vipassitvā adhigataṃ arahattavimokkhaṃ vadati. Arahattavimokkhassa hi maggasampayuttasammāsaṅkappādibhedo dhammatakko purejavo hoti. Tenāha ‘‘dhammatakkapurejava’’nti. Avijjāya pabhedananti etameva ca aññāvimokkhaṃ avijjāpabhedanasaṅkhātaṃ nibbānaṃ nissāya jātattā kāraṇopacārena ‘‘avijjāya pabhedana’’nti brūmīti.
யா சதுத்தே² ஜா²னே உபெக்கா²தி எத்த² உபபத்திதோ இக்க²தீதி உபெக்கா², ஸமங் பஸ்ஸதி அபக்க²பதிதா ஹுத்வா பஸ்ஸதீதி அத்தோ². உபெக்க²னாதி ஆகாரனித்³தே³ஸோ. அஜ்ஜு²பெக்க²னாதி உபஸக்³க³வஸேன பத³ங் வட்³டி⁴தங். சித்தஸமதாதி சித்தஸ்ஸேகக்³க³பா⁴வோ. சித்தப்பஸ்ஸத்³த⁴தாதி சித்தஸ்ஸ ஊனாதிரித்தவஜ்ஜிதபா⁴வோ. மஜ்ஜ²த்ததாதி சித்தஸ்ஸ மஜ்ஜே² டி²தபா⁴வோ.
Yā catutthe jhāne upekkhāti ettha upapattito ikkhatīti upekkhā, samaṃ passati apakkhapatitā hutvā passatīti attho. Upekkhanāti ākāraniddeso. Ajjhupekkhanāti upasaggavasena padaṃ vaḍḍhitaṃ. Cittasamatāti cittassekaggabhāvo. Cittappassaddhatāti cittassa ūnātirittavajjitabhāvo. Majjhattatāti cittassa majjhe ṭhitabhāvo.
77. ஏவங் அவிஜ்ஜாபபே⁴த³வசனேன வுத்தங் நிப்³பா³னங் ஸுத்வா ‘‘தங் கிஸ்ஸ விப்பஹானேன வுச்சதீ’’தி புச்ச²ந்தோ ‘‘கிங்ஸு ஸங்யோஜனோ’’தி கா³த²மாஹ. தத்த² கிங்ஸு ஸங்யோஜனோதி கிங்ஸங்யோஜனோ. விசாரணந்தி விசாரணகாரணங். கிஸ்ஸஸ்ஸ விப்பஹானேனாதி கிங்னாமகஸ்ஸ அஸ்ஸ த⁴ம்மஸ்ஸ விப்பஹானேன.
77. Evaṃ avijjāpabhedavacanena vuttaṃ nibbānaṃ sutvā ‘‘taṃ kissa vippahānena vuccatī’’ti pucchanto ‘‘kiṃsu saṃyojano’’ti gāthamāha. Tattha kiṃsu saṃyojanoti kiṃsaṃyojano. Vicāraṇanti vicāraṇakāraṇaṃ. Kissassa vippahānenāti kiṃnāmakassa assa dhammassa vippahānena.
78. அத²ஸ்ஸ ப⁴க³வா தமத்த²ங் ப்³யாகரொந்தோ ‘‘நந்தி³ஸங்யோஜனோ’’தி கா³த²மாஹ. தத்த² விதக்கஸ்ஸாதி காமவிதக்காதி³கோ விதக்கோ அஸ்ஸ.
78. Athassa bhagavā tamatthaṃ byākaronto ‘‘nandisaṃyojano’’ti gāthamāha. Tattha vitakkassāti kāmavitakkādiko vitakko assa.
79. இதா³னி தஸ்ஸ நிப்³பா³னஸ்ஸ மக்³க³ங் புச்ச²ந்தோ ‘‘கத²ங் ஸதஸ்ஸா’’தி கா³த²மாஹ. தத்த² விஞ்ஞாணந்தி அபி⁴ஸங்கா²ரவிஞ்ஞாணங்.
79. Idāni tassa nibbānassa maggaṃ pucchanto ‘‘kathaṃ satassā’’ti gāthamāha. Tattha viññāṇanti abhisaṅkhāraviññāṇaṃ.
80.
80.
அத²ஸ்ஸ மக்³க³ங் கதெ²ந்தோ ப⁴க³வா ‘‘அஜ்ஜ²த்தஞ்சா’’தி கா³த²மாஹ. தத்த² ஏவங் ஸதஸ்ஸாதி ஏவங் ஸதஸ்ஸ ஸம்பஜானஸ்ஸ. ஸேஸங் ஸப்³ப³த்த² பாகடமேவ.
Athassa maggaṃ kathento bhagavā ‘‘ajjhattañcā’’ti gāthamāha. Tattha evaṃ satassāti evaṃ satassa sampajānassa. Sesaṃ sabbattha pākaṭameva.
ஏவங் ப⁴க³வா இத³ம்பி ஸுத்தங் அரஹத்தனிகூடேனேவ தே³ஸேஸி, தே³ஸனாபரியோஸானே ச புப்³ப³ஸதி³ஸோவ த⁴ம்மாபி⁴ஸமயோ அஹோஸீதி.
Evaṃ bhagavā idampi suttaṃ arahattanikūṭeneva desesi, desanāpariyosāne ca pubbasadisova dhammābhisamayo ahosīti.
ஸத்³த⁴ம்மப்பஜ்ஜோதிகாய சூளனித்³தே³ஸ-அட்ட²கதா²ய
Saddhammappajjotikāya cūḷaniddesa-aṭṭhakathāya
உத³யமாணவஸுத்தனித்³தே³ஸவண்ணனா நிட்டி²தா.
Udayamāṇavasuttaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / சூளனித்³தே³ஸபாளி • Cūḷaniddesapāḷi
13. உத³யமாணவபுச்சா² • 13. Udayamāṇavapucchā
13. உத³யமாணவபுச்சா²னித்³தே³ஸோ • 13. Udayamāṇavapucchāniddeso
