| Library / Tipiṭaka / ਤਿਪਿਟਕ • Tipiṭaka / ਚੂਲ਼ਨਿਦ੍ਦੇਸ-ਅਟ੍ਠਕਥਾ • Cūḷaniddesa-aṭṭhakathā |
੧੩. ਉਦਯਮਾਣવਸੁਤ੍ਤਨਿਦ੍ਦੇਸવਣ੍ਣਨਾ
13. Udayamāṇavasuttaniddesavaṇṇanā
੭੪. ਤੇਰਸਮੇ ਉਦਯਸੁਤ੍ਤੇ – ਅਞ੍ਞਾવਿਮੋਕ੍ਖਨ੍ਤਿ ਪਞ੍ਞਾਨੁਭਾવਨਿਜ੍ਝਾਨਂ ਤਂ વਿਮੋਕ੍ਖਂ ਪੁਚ੍ਛਤਿ।
74. Terasame udayasutte – aññāvimokkhanti paññānubhāvanijjhānaṃ taṃ vimokkhaṃ pucchati.
ਪਠਮੇਨਪਿ ਝਾਨੇਨ ਝਾਯੀਤਿ વਿਤਕ੍ਕવਿਚਾਰਪੀਤਿਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤੇਨ ਪਞ੍ਚਙ੍ਗਿਕੇਨ ਪਠਮਜ੍ਝਾਨੇਨ ਝਾਯਤੀਤਿ ਝਾਯੀ। ਦੁਤਿਯੇਨਾਤਿ ਪੀਤਿਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤੇਨ। ਤਤਿਯੇਨਾਤਿ ਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤੇਨ। ਚਤੁਤ੍ਥੇਨਾਤਿ ਉਪੇਕ੍ਖਾਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤੇਨ। ਸવਿਤਕ੍ਕਸવਿਚਾਰੇਨਪਿ ਝਾਨੇਨ ਝਾਯੀਤਿ ਚਤੁਕ੍ਕਨਯਪਞ੍ਚਕਨਯੇਸੁ ਪਠਮਜ੍ਝਾਨੇਨ ਸવਿਤਕ੍ਕਸવਿਚਾਰੇਨਪਿ ਝਾਨੇਨ ਝਾਯਤੀਤਿ ਝਾਯੀ। ਅવਿਤਕ੍ਕવਿਚਾਰਮਤ੍ਤੇਨਾਤਿ ਪਞ੍ਚਕਨਯੇ ਦੁਤਿਯੇਨ ਝਾਨੇਨ। ਅવਿਤਕ੍ਕਅવਿਚਾਰੇਨਾਤਿ ਦੁਤਿਯਤਤਿਯਾਦਿਅવਸੇਸਝਾਨੇਨ। ਸਪ੍ਪੀਤਿਕੇਨਾਤਿ ਪੀਤਿਸਮ੍ਪਯੁਤ੍ਤੇਨ ਦੁਕਤਿਕਝਾਨੇਨ। ਨਿਪ੍ਪੀਤਿਕੇਨਾਤਿ ਪੀਤਿવਿਰਹਿਤੇਨ ਤਦવਸੇਸਝਾਨੇਨ। ਸਾਤਸਹਗਤੇਨਾਤਿ ਸੁਖਸਹਗਤੇਨ ਤਿਕਚਤੁਕ੍ਕਝਾਨੇਨ। ਉਪੇਕ੍ਖਾਸਹਗਤੇਨਾਤਿ ਚਤੁਕ੍ਕਪਞ੍ਚਕੇਨ। ਸੁਞ੍ਞਤੇਨਪੀਤਿ ਸੁਞ੍ਞਤવਿਮੋਕ੍ਖਸਮ੍ਪਯੁਤ੍ਤੇਨ। ਅਨਿਮਿਤ੍ਤੇਨਪੀਤਿ ਅਨਿਚ੍ਚਨਿਮਿਤ੍ਤਂ ਧੁવਨਿਮਿਤ੍ਤਂ ਅਨਿਮਿਤ੍ਤਞ੍ਚ ਉਗ੍ਘਾਟੇਤ੍વਾ ਪਟਿਲਦ੍ਧੇਨ ਅਨਿਮਿਤ੍ਤੇਨਪਿ ਝਾਨੇਨ ਝਾਯਤੀਤਿ ਝਾਯੀ। ਅਪ੍ਪਣਿਹਿਤੇਨਪੀਤਿ ਮਗ੍ਗਾਗਮਨવਸੇਨ ਪਣਿਧਿਂ ਸੋਧੇਤ੍વਾ ਪਰਿਯਾਦਿਯਿਤ੍વਾ ਫਲਸਮਾਪਤ੍ਤਿવਸੇਨ ਅਪ੍ਪਣਿਹਿਤੇਨਪਿ। ਲੋਕਿਯੇਨਪੀਤਿ ਲੋਕਿਯੇਨ ਪਠਮਦੁਤਿਯਤਤਿਯਚਤੁਤ੍ਥੇਨ।
Paṭhamenapi jhānena jhāyīti vitakkavicārapītisukhacittekaggatāsampayuttena pañcaṅgikena paṭhamajjhānena jhāyatīti jhāyī. Dutiyenāti pītisukhacittekaggatāsampayuttena. Tatiyenāti sukhacittekaggatāsampayuttena. Catutthenāti upekkhācittekaggatāsampayuttena. Savitakkasavicārenapi jhānena jhāyīti catukkanayapañcakanayesu paṭhamajjhānena savitakkasavicārenapi jhānena jhāyatīti jhāyī. Avitakkavicāramattenāti pañcakanaye dutiyena jhānena. Avitakkaavicārenāti dutiyatatiyādiavasesajhānena. Sappītikenāti pītisampayuttena dukatikajhānena. Nippītikenāti pītivirahitena tadavasesajhānena. Sātasahagatenāti sukhasahagatena tikacatukkajhānena. Upekkhāsahagatenāti catukkapañcakena. Suññatenapīti suññatavimokkhasampayuttena. Animittenapīti aniccanimittaṃ dhuvanimittaṃ animittañca ugghāṭetvā paṭiladdhena animittenapi jhānena jhāyatīti jhāyī. Appaṇihitenapīti maggāgamanavasena paṇidhiṃ sodhetvā pariyādiyitvā phalasamāpattivasena appaṇihitenapi. Lokiyenapīti lokiyena paṭhamadutiyatatiyacatutthena.
ਲੋਕੁਤ੍ਤਰੇਨਪੀਤਿ ਤੇਨੇવ ਲੋਕੁਤ੍ਤਰਸਮ੍ਪਯੁਤ੍ਤੇਨ। ਝਾਨਰਤੋਤਿ ਝਾਨੇਸੁ ਅਭਿਰਤੋ। ਏਕਤ੍ਤਮਨੁਯੁਤ੍ਤੋਤਿ ਏਕਤ੍ਤਂ ਏਕੀਭਾવਂ ਅਨੁਯੁਤ੍ਤੋ ਪਯੁਤ੍ਤੋ। ਸਦਤ੍ਥਗਰੁਕੋਤਿ ਸਕਤ੍ਥਗਰੁਕੋ, ਕ-ਕਾਰਸ੍ਸਾਯਂ ਦ-ਕਾਰੋ ਕਤੋ। ਸਦਤ੍ਥੋਤਿ ਚ ਅਰਹਤ੍ਤਂ વੇਦਿਤਬ੍ਬਂ। ਤਞ੍ਹਿ ਅਤ੍ਤੂਪਨਿਬਦ੍ਧਟ੍ਠੇਨ ਅਤ੍ਤਾਨਂ ਅવਿਜਹਨਟ੍ਠੇਨ ਅਤ੍ਤਨੋ ਪਰਮਤ੍ਥਟ੍ਠੇਨ ਚ ਅਤ੍ਤਨੋ ਅਤ੍ਥਤ੍ਤਾ ਸਕਤ੍ਥੋਤਿ વੁਚ੍ਚਤਿ। ਫਲਸਮਾਪਤ੍ਤਿਸਮਾਪਜ੍ਜਨવਸੇਨ ਸਕਤ੍ਥਗਰੁਕੋ, ‘‘ਨਿਬ੍ਬਾਨਗਰੁਕੋ’’ਤਿ ਏਕੇ। ਅਰਜੋਤਿ ਨਿਕ੍ਕਿਲੇਸੋ। વਿਰਜੋਤਿ વਿਗਤਕਿਲੇਸੋ। ਨਿਰਜੋਤਿ ਅਪਨੀਤਕਿਲੇਸੋ , ‘‘વਿਤਰਜੋ’’ਤਿਪਿ ਪਾਠੋ, ਸੋਯੇવਤ੍ਥੋ। ਰਜਾਪਗਤੋਤਿ ਕਿਲੇਸੇਹਿ ਦੂਰੀਭੂਤੋ। ਰਜવਿਪ੍ਪਹੀਨੋਤਿ ਕਿਲੇਸਪ੍ਪਹੀਨੋ। ਰਜવਿਪ੍ਪਯੁਤ੍ਤੋਤਿ ਕਿਲੇਸੇਹਿ ਮੁਤ੍ਤੋ।
Lokuttarenapīti teneva lokuttarasampayuttena. Jhānaratoti jhānesu abhirato. Ekattamanuyuttoti ekattaṃ ekībhāvaṃ anuyutto payutto. Sadatthagarukoti sakatthagaruko, ka-kārassāyaṃ da-kāro kato. Sadatthoti ca arahattaṃ veditabbaṃ. Tañhi attūpanibaddhaṭṭhena attānaṃ avijahanaṭṭhena attano paramatthaṭṭhena ca attano atthattā sakatthoti vuccati. Phalasamāpattisamāpajjanavasena sakatthagaruko, ‘‘nibbānagaruko’’ti eke. Arajoti nikkileso. Virajoti vigatakileso. Nirajoti apanītakileso , ‘‘vitarajo’’tipi pāṭho, soyevattho. Rajāpagatoti kilesehi dūrībhūto. Rajavippahīnoti kilesappahīno. Rajavippayuttoti kilesehi mutto.
ਪਾਸਾਣਕੇ ਚੇਤਿਯੇਤਿ ਪਾਸਾਣਪਿਟ੍ਠੇ ਪਾਰਾਯਨਸੁਤ੍ਤਨ੍ਤਦੇਸਿਤਟ੍ਠਾਨੇ। ਸਬ੍ਬੋਸ੍ਸੁਕ੍ਕਪਟਿਪ੍ਪਸ੍ਸਦ੍ਧਤ੍ਤਾਤਿ ਸਬ੍ਬੇਸਂ ਕਿਲੇਸਉਸ੍ਸੁਕ੍ਕਾਨਂ ਪਟਿਪ੍ਪਸ੍ਸਦ੍ਧਤ੍ਤਾ, ਨਾਸਿਤਤ੍ਤਾ ਆਸੀਨੋ।
Pāsāṇake cetiyeti pāsāṇapiṭṭhe pārāyanasuttantadesitaṭṭhāne. Sabbossukkapaṭippassaddhattāti sabbesaṃ kilesaussukkānaṃ paṭippassaddhattā, nāsitattā āsīno.
ਕਿਚ੍ਚਾਕਿਚ੍ਚਨ੍ਤਿ ‘‘ਇਦਂ ਕਤ੍ਤਬ੍ਬਂ, ਇਦਂ ਨ ਕਤ੍ਤਬ੍ਬ’’ਨ੍ਤਿ ਏવਂ ਮਨਸਾ ਚਿਨ੍ਤੇਤਬ੍ਬਂ। ਕਰਣੀਯਾਕਰਣੀਯਨ੍ਤਿ ਕਾਯਦ੍વਾਰੇਨ ਅવਸ੍ਸਂ ਇਦਂ ਕਰਣੀਯਂ, ਇਦਂ ਨ ਕਰਣੀਯਨ੍ਤਿ ਏવਂ ਕਰਣੀਯਾਕਰਣੀਯਂ। ਪਹੀਨਨ੍ਤਿ વਿਸ੍ਸਟ੍ਠਂ। વਸਿਪ੍ਪਤ੍ਤੋਤਿ ਪਗੁਣਭਾવਪ੍ਪਤ੍ਤੋ।
Kiccākiccanti ‘‘idaṃ kattabbaṃ, idaṃ na kattabba’’nti evaṃ manasā cintetabbaṃ. Karaṇīyākaraṇīyanti kāyadvārena avassaṃ idaṃ karaṇīyaṃ, idaṃ na karaṇīyanti evaṃ karaṇīyākaraṇīyaṃ. Pahīnanti vissaṭṭhaṃ. Vasippattoti paguṇabhāvappatto.
੭੫. ਅਥ ਭਗવਾ ਯਸ੍ਮਾ ਉਦਯੋ ਚਤੁਤ੍ਥਜ੍ਝਾਨਲਾਭੀ, ਤਸ੍ਮਾਸ੍ਸ ਪਟਿਲਦ੍ਧਝਾਨવਸੇਨ ਨਾਨਪ੍ਪਕਾਰਤੋ ਅਞ੍ਞਾવਿਮੋਕ੍ਖਂ ਦਸ੍ਸੇਨ੍ਤੋ ਉਪਰੂਪਰਿਗਾਥਮਾਹ। ਤਤ੍ਥ ਪਹਾਨਂ ਕਾਮਚ੍ਛਨ੍ਦਾਨਨ੍ਤਿ ਯਦਿਦਂ ਪਠਮਂ ਝਾਨਂ ਨਿਬ੍ਬਤ੍ਤੇਨ੍ਤਸ੍ਸ ਕਾਮਚ੍ਛਨ੍ਦਪਹਾਨਂ, ਤਮ੍ਪਿ ਅਞ੍ਞਾવਿਮੋਕ੍ਖਨ੍ਤਿ ਪਬ੍ਰੂਮਿ। ਏવਂ ਸਬ੍ਬਪਦਾਨਿ ਯੋਜੇਤਬ੍ਬਾਨਿ।
75. Atha bhagavā yasmā udayo catutthajjhānalābhī, tasmāssa paṭiladdhajhānavasena nānappakārato aññāvimokkhaṃ dassento uparūparigāthamāha. Tattha pahānaṃ kāmacchandānanti yadidaṃ paṭhamaṃ jhānaṃ nibbattentassa kāmacchandapahānaṃ, tampi aññāvimokkhanti pabrūmi. Evaṃ sabbapadāni yojetabbāni.
ਯਾ ਚਿਤ੍ਤਸ੍ਸ ਅਕਲ੍ਯਤਾਤਿ ਚਿਤ੍ਤਸ੍ਸ ਗਿਲਾਨਭਾવੋ। ਗਿਲਾਨੋ ਹਿ ਅਕਲ੍ਲਕੋਤਿ વੁਚ੍ਚਤਿ। વਿਨਯੇਪਿ વੁਤ੍ਤਂ – ‘‘ਨਾਹਂ, ਭਨ੍ਤੇ, ਅਕਲ੍ਲਕੋ’’ਤਿ (ਪਾਰਾ॰ ੧੫੧)। ਅਕਮ੍ਮਞ੍ਞਤਾਤਿ ਚਿਤ੍ਤਗੇਲਞ੍ਞਸਙ੍ਖਾਤੋવ ਅਕਮ੍ਮਞ੍ਞਤਾਕਾਰੋ। ਓਲੀਯਨਾਤਿ ਓਲੀਯਨਾਕਾਰੋ। ਇਰਿਯਾਪਥਿਕਚਿਤ੍ਤਞ੍ਹਿ ਇਰਿਯਾਪਥਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤਂ ਰੁਕ੍ਖੇ વਗ੍ਗੁਲਿ વਿਯ ਖੀਲੇ ਲਗ੍ਗਿਤਫਾਣਿਤવਾਰਕੋ વਿਯ ਚ ਓਲੀਯਤਿ, ਤਸ੍ਸ ਤਂ ਆਕਾਰਂ ਸਨ੍ਧਾਯ ‘‘ਓਲੀਯਨਾ’’ਤਿ વੁਤ੍ਤਂ। ਦੁਤਿਯਪਦਂ ਉਪਸਗ੍ਗવਸੇਨ વਡ੍ਢਿਤਂ। ਲੀਨਾਤਿ ਅવਿਪ੍ਫਾਰਿਕਤਾਯ ਪਟਿਕੁਟਿਤਂ। ਇਤਰੇ ਦ੍વੇ ਆਕਾਰਭਾવਨਿਦ੍ਦੇਸਾ। ਥਿਨਨ੍ਤਿ ਸਪ੍ਪਿਪਿਣ੍ਡੋ વਿਯ ਅવਿਪ੍ਫਾਰਿਕਤਾਯ ਘਨਭਾવੇਨ ਠਿਤਂ। ਥਿਯਨਾਤਿ ਆਕਾਰਨਿਦ੍ਦੇਸੋ। ਥਿਯਿਤਭਾવੋ ਥਿਯਿਤਤ੍ਤਂ, ਅવਿਪ੍ਫਾਰવਸੇਨੇવ ਥਦ੍ਧਤਾਤਿ ਅਤ੍ਥੋ (ਧ॰ ਸ॰ ਅਟ੍ਠ॰ ੧੧੬੨)।
Yā cittassa akalyatāti cittassa gilānabhāvo. Gilāno hi akallakoti vuccati. Vinayepi vuttaṃ – ‘‘nāhaṃ, bhante, akallako’’ti (pārā. 151). Akammaññatāti cittagelaññasaṅkhātova akammaññatākāro. Olīyanāti olīyanākāro. Iriyāpathikacittañhi iriyāpathaṃ sandhāretuṃ asakkontaṃ rukkhe vagguli viya khīle laggitaphāṇitavārako viya ca olīyati, tassa taṃ ākāraṃ sandhāya ‘‘olīyanā’’ti vuttaṃ. Dutiyapadaṃ upasaggavasena vaḍḍhitaṃ. Līnāti avipphārikatāya paṭikuṭitaṃ. Itare dve ākārabhāvaniddesā. Thinanti sappipiṇḍo viya avipphārikatāya ghanabhāvena ṭhitaṃ. Thiyanāti ākāraniddeso. Thiyitabhāvo thiyitattaṃ, avipphāravaseneva thaddhatāti attho (dha. sa. aṭṭha. 1162).
੭੬. ਉਪੇਕ੍ਖਾਸਤਿਸਂਸੁਦ੍ਧਨ੍ਤਿ ਚਤੁਤ੍ਥਜ੍ਝਾਨਉਪੇਕ੍ਖਾਸਤੀਹਿ ਸਂਸੁਦ੍ਧਂ। ਧਮ੍ਮਤਕ੍ਕਪੁਰੇਜવਨ੍ਤਿ ਇਮਿਨਾ ਤਸ੍ਮਿਂ ਚਤੁਤ੍ਥਜ੍ਝਾਨવਿਮੋਕ੍ਖੇ ਠਤ੍વਾ ਝਾਨਙ੍ਗਾਨਿ વਿਪਸ੍ਸਿਤ੍વਾ ਅਧਿਗਤਂ ਅਰਹਤ੍ਤવਿਮੋਕ੍ਖਂ વਦਤਿ। ਅਰਹਤ੍ਤવਿਮੋਕ੍ਖਸ੍ਸ ਹਿ ਮਗ੍ਗਸਮ੍ਪਯੁਤ੍ਤਸਮ੍ਮਾਸਙ੍ਕਪ੍ਪਾਦਿਭੇਦੋ ਧਮ੍ਮਤਕ੍ਕੋ ਪੁਰੇਜવੋ ਹੋਤਿ। ਤੇਨਾਹ ‘‘ਧਮ੍ਮਤਕ੍ਕਪੁਰੇਜવ’’ਨ੍ਤਿ। ਅવਿਜ੍ਜਾਯ ਪਭੇਦਨਨ੍ਤਿ ਏਤਮੇવ ਚ ਅਞ੍ਞਾવਿਮੋਕ੍ਖਂ ਅવਿਜ੍ਜਾਪਭੇਦਨਸਙ੍ਖਾਤਂ ਨਿਬ੍ਬਾਨਂ ਨਿਸ੍ਸਾਯ ਜਾਤਤ੍ਤਾ ਕਾਰਣੋਪਚਾਰੇਨ ‘‘ਅવਿਜ੍ਜਾਯ ਪਭੇਦਨ’’ਨ੍ਤਿ ਬ੍ਰੂਮੀਤਿ।
76.Upekkhāsatisaṃsuddhanti catutthajjhānaupekkhāsatīhi saṃsuddhaṃ. Dhammatakkapurejavanti iminā tasmiṃ catutthajjhānavimokkhe ṭhatvā jhānaṅgāni vipassitvā adhigataṃ arahattavimokkhaṃ vadati. Arahattavimokkhassa hi maggasampayuttasammāsaṅkappādibhedo dhammatakko purejavo hoti. Tenāha ‘‘dhammatakkapurejava’’nti. Avijjāya pabhedananti etameva ca aññāvimokkhaṃ avijjāpabhedanasaṅkhātaṃ nibbānaṃ nissāya jātattā kāraṇopacārena ‘‘avijjāya pabhedana’’nti brūmīti.
ਯਾ ਚਤੁਤ੍ਥੇ ਝਾਨੇ ਉਪੇਕ੍ਖਾਤਿ ਏਤ੍ਥ ਉਪਪਤ੍ਤਿਤੋ ਇਕ੍ਖਤੀਤਿ ਉਪੇਕ੍ਖਾ, ਸਮਂ ਪਸ੍ਸਤਿ ਅਪਕ੍ਖਪਤਿਤਾ ਹੁਤ੍વਾ ਪਸ੍ਸਤੀਤਿ ਅਤ੍ਥੋ। ਉਪੇਕ੍ਖਨਾਤਿ ਆਕਾਰਨਿਦ੍ਦੇਸੋ। ਅਜ੍ਝੁਪੇਕ੍ਖਨਾਤਿ ਉਪਸਗ੍ਗવਸੇਨ ਪਦਂ વਡ੍ਢਿਤਂ। ਚਿਤ੍ਤਸਮਤਾਤਿ ਚਿਤ੍ਤਸ੍ਸੇਕਗ੍ਗਭਾવੋ। ਚਿਤ੍ਤਪ੍ਪਸ੍ਸਦ੍ਧਤਾਤਿ ਚਿਤ੍ਤਸ੍ਸ ਊਨਾਤਿਰਿਤ੍ਤવਜ੍ਜਿਤਭਾવੋ। ਮਜ੍ਝਤ੍ਤਤਾਤਿ ਚਿਤ੍ਤਸ੍ਸ ਮਜ੍ਝੇ ਠਿਤਭਾવੋ।
Yā catutthe jhāne upekkhāti ettha upapattito ikkhatīti upekkhā, samaṃ passati apakkhapatitā hutvā passatīti attho. Upekkhanāti ākāraniddeso. Ajjhupekkhanāti upasaggavasena padaṃ vaḍḍhitaṃ. Cittasamatāti cittassekaggabhāvo. Cittappassaddhatāti cittassa ūnātirittavajjitabhāvo. Majjhattatāti cittassa majjhe ṭhitabhāvo.
੭੭. ਏવਂ ਅવਿਜ੍ਜਾਪਭੇਦવਚਨੇਨ વੁਤ੍ਤਂ ਨਿਬ੍ਬਾਨਂ ਸੁਤ੍વਾ ‘‘ਤਂ ਕਿਸ੍ਸ વਿਪ੍ਪਹਾਨੇਨ વੁਚ੍ਚਤੀ’’ਤਿ ਪੁਚ੍ਛਨ੍ਤੋ ‘‘ਕਿਂਸੁ ਸਂਯੋਜਨੋ’’ਤਿ ਗਾਥਮਾਹ। ਤਤ੍ਥ ਕਿਂਸੁ ਸਂਯੋਜਨੋਤਿ ਕਿਂਸਂਯੋਜਨੋ। વਿਚਾਰਣਨ੍ਤਿ વਿਚਾਰਣਕਾਰਣਂ। ਕਿਸ੍ਸਸ੍ਸ વਿਪ੍ਪਹਾਨੇਨਾਤਿ ਕਿਂਨਾਮਕਸ੍ਸ ਅਸ੍ਸ ਧਮ੍ਮਸ੍ਸ વਿਪ੍ਪਹਾਨੇਨ।
77. Evaṃ avijjāpabhedavacanena vuttaṃ nibbānaṃ sutvā ‘‘taṃ kissa vippahānena vuccatī’’ti pucchanto ‘‘kiṃsu saṃyojano’’ti gāthamāha. Tattha kiṃsu saṃyojanoti kiṃsaṃyojano. Vicāraṇanti vicāraṇakāraṇaṃ. Kissassa vippahānenāti kiṃnāmakassa assa dhammassa vippahānena.
੭੮. ਅਥਸ੍ਸ ਭਗવਾ ਤਮਤ੍ਥਂ ਬ੍ਯਾਕਰੋਨ੍ਤੋ ‘‘ਨਨ੍ਦਿਸਂਯੋਜਨੋ’’ਤਿ ਗਾਥਮਾਹ। ਤਤ੍ਥ વਿਤਕ੍ਕਸ੍ਸਾਤਿ ਕਾਮવਿਤਕ੍ਕਾਦਿਕੋ વਿਤਕ੍ਕੋ ਅਸ੍ਸ।
78. Athassa bhagavā tamatthaṃ byākaronto ‘‘nandisaṃyojano’’ti gāthamāha. Tattha vitakkassāti kāmavitakkādiko vitakko assa.
੭੯. ਇਦਾਨਿ ਤਸ੍ਸ ਨਿਬ੍ਬਾਨਸ੍ਸ ਮਗ੍ਗਂ ਪੁਚ੍ਛਨ੍ਤੋ ‘‘ਕਥਂ ਸਤਸ੍ਸਾ’’ਤਿ ਗਾਥਮਾਹ। ਤਤ੍ਥ વਿਞ੍ਞਾਣਨ੍ਤਿ ਅਭਿਸਙ੍ਖਾਰવਿਞ੍ਞਾਣਂ।
79. Idāni tassa nibbānassa maggaṃ pucchanto ‘‘kathaṃ satassā’’ti gāthamāha. Tattha viññāṇanti abhisaṅkhāraviññāṇaṃ.
੮੦.
80.
ਅਥਸ੍ਸ ਮਗ੍ਗਂ ਕਥੇਨ੍ਤੋ ਭਗવਾ ‘‘ਅਜ੍ਝਤ੍ਤਞ੍ਚਾ’’ਤਿ ਗਾਥਮਾਹ। ਤਤ੍ਥ ਏવਂ ਸਤਸ੍ਸਾਤਿ ਏવਂ ਸਤਸ੍ਸ ਸਮ੍ਪਜਾਨਸ੍ਸ। ਸੇਸਂ ਸਬ੍ਬਤ੍ਥ ਪਾਕਟਮੇવ।
Athassa maggaṃ kathento bhagavā ‘‘ajjhattañcā’’ti gāthamāha. Tattha evaṃ satassāti evaṃ satassa sampajānassa. Sesaṃ sabbattha pākaṭameva.
ਏવਂ ਭਗવਾ ਇਦਮ੍ਪਿ ਸੁਤ੍ਤਂ ਅਰਹਤ੍ਤਨਿਕੂਟੇਨੇવ ਦੇਸੇਸਿ, ਦੇਸਨਾਪਰਿਯੋਸਾਨੇ ਚ ਪੁਬ੍ਬਸਦਿਸੋવ ਧਮ੍ਮਾਭਿਸਮਯੋ ਅਹੋਸੀਤਿ।
Evaṃ bhagavā idampi suttaṃ arahattanikūṭeneva desesi, desanāpariyosāne ca pubbasadisova dhammābhisamayo ahosīti.
ਸਦ੍ਧਮ੍ਮਪ੍ਪਜ੍ਜੋਤਿਕਾਯ ਚੂਲ਼ਨਿਦ੍ਦੇਸ-ਅਟ੍ਠਕਥਾਯ
Saddhammappajjotikāya cūḷaniddesa-aṭṭhakathāya
ਉਦਯਮਾਣવਸੁਤ੍ਤਨਿਦ੍ਦੇਸવਣ੍ਣਨਾ ਨਿਟ੍ਠਿਤਾ।
Udayamāṇavasuttaniddesavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਚੂਲ਼ਨਿਦ੍ਦੇਸਪਾਲ਼ਿ • Cūḷaniddesapāḷi
੧੩. ਉਦਯਮਾਣવਪੁਚ੍ਛਾ • 13. Udayamāṇavapucchā
੧੩. ਉਦਯਮਾਣવਪੁਚ੍ਛਾਨਿਦ੍ਦੇਸੋ • 13. Udayamāṇavapucchāniddeso
