| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
২. উদযসুত্তং
2. Udayasuttaṃ
১৯৮. সাৰত্থিনিদানং। অথ খো ভগৰা পুব্বণ্হসমযং নিৰাসেত্ৰা পত্তচীৰরমাদায যেন উদযস্স ব্রাহ্মণস্স নিৰেসনং তেনুপসঙ্কমি। অথ খো উদযো ব্রাহ্মণো ভগৰতো পত্তং ওদনেন পূরেসি। দুতিযম্পি খো ভগৰা পুব্বণ্হসমযং নিৰাসেত্ৰা পত্তচীৰরমাদায যেন উদযস্স ব্রাহ্মণস্স নিৰেসনং তেনুপসঙ্কমি…পে॰… ততিযম্পি খো উদযো ব্রাহ্মণো ভগৰতো পত্তং ওদনেন পূরেত্ৰা ভগৰন্তং এতদৰোচ – ‘‘পকট্ঠকোযং সমণো গোতমো পুনপ্পুনং আগচ্ছতী’’তি।
198. Sāvatthinidānaṃ. Atha kho bhagavā pubbaṇhasamayaṃ nivāsetvā pattacīvaramādāya yena udayassa brāhmaṇassa nivesanaṃ tenupasaṅkami. Atha kho udayo brāhmaṇo bhagavato pattaṃ odanena pūresi. Dutiyampi kho bhagavā pubbaṇhasamayaṃ nivāsetvā pattacīvaramādāya yena udayassa brāhmaṇassa nivesanaṃ tenupasaṅkami…pe… tatiyampi kho udayo brāhmaṇo bhagavato pattaṃ odanena pūretvā bhagavantaṃ etadavoca – ‘‘pakaṭṭhakoyaṃ samaṇo gotamo punappunaṃ āgacchatī’’ti.
‘‘পুনপ্পুনঞ্চেৰ ৰপন্তি বীজং, পুনপ্পুনং ৰস্সতি দেৰরাজা।
‘‘Punappunañceva vapanti bījaṃ, punappunaṃ vassati devarājā;
পুনপ্পুনং খেত্তং কসন্তি কস্সকা, পুনপ্পুনং ধঞ্ঞমুপেতি রট্ঠং॥
Punappunaṃ khettaṃ kasanti kassakā, punappunaṃ dhaññamupeti raṭṭhaṃ.
‘‘পুনপ্পুনং যাচকা যাচযন্তি, পুনপ্পুনং দানপতী দদন্তি।
‘‘Punappunaṃ yācakā yācayanti, punappunaṃ dānapatī dadanti;
পুনপ্পুনং দানপতী দদিত্ৰা, পুনপ্পুনং সগ্গমুপেন্তি ঠানং॥
Punappunaṃ dānapatī daditvā, punappunaṃ saggamupenti ṭhānaṃ.
‘‘পুনপ্পুনং খীরনিকা দুহন্তি, পুনপ্পুনং ৰচ্ছো উপেতি মাতরং।
‘‘Punappunaṃ khīranikā duhanti, punappunaṃ vaccho upeti mātaraṃ;
পুনপ্পুনং কিলমতি ফন্দতি চ, পুনপ্পুনং গব্ভমুপেতি মন্দো॥
Punappunaṃ kilamati phandati ca, punappunaṃ gabbhamupeti mando.
‘‘পুনপ্পুনং জাযতি মীযতি চ, পুনপ্পুনং সিৰথিকং 1 হরন্তি।
‘‘Punappunaṃ jāyati mīyati ca, punappunaṃ sivathikaṃ 2 haranti;
মগ্গঞ্চ লদ্ধা অপুনব্ভৰায, ন পুনপ্পুনং জাযতি ভূরিপঞ্ঞো’’তি 3॥
Maggañca laddhā apunabbhavāya, na punappunaṃ jāyati bhūripañño’’ti 4.
এৰং ৰুত্তে, উদযো ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম…পে॰… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি।
Evaṃ vutte, udayo brāhmaṇo bhagavantaṃ etadavoca – ‘‘abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. উদযসুত্তৰণ্ণনা • 2. Udayasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২. উদযসুত্তৰণ্ণনা • 2. Udayasuttavaṇṇanā
