| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. උදයසුත්‌තං
2. Udayasuttaṃ
198. සාවත්‌ථිනිදානං. අථ ඛො භගවා පුබ්‌බණ්‌හසමයං නිවාසෙත්‌වා පත්‌තචීවරමාදාය යෙන උදයස්‌ස බ්‍රාහ්‌මණස්‌ස නිවෙසනං තෙනුපසඞ්‌කමි. අථ ඛො උදයො බ්‍රාහ්‌මණො භගවතො පත්‌තං ඔදනෙන පූරෙසි. දුතියම්‌පි ඛො භගවා පුබ්‌බණ්‌හසමයං නිවාසෙත්‌වා පත්‌තචීවරමාදාය යෙන උදයස්‌ස බ්‍රාහ්‌මණස්‌ස නිවෙසනං තෙනුපසඞ්‌කමි…පෙ.… තතියම්‌පි ඛො උදයො බ්‍රාහ්‌මණො භගවතො පත්‌තං ඔදනෙන පූරෙත්‌වා භගවන්‌තං එතදවොච – ‘‘පකට්‌ඨකොයං සමණො ගොතමො පුනප්‌පුනං ආගච්‌ඡතී’’ති.
198. Sāvatthinidānaṃ. Atha kho bhagavā pubbaṇhasamayaṃ nivāsetvā pattacīvaramādāya yena udayassa brāhmaṇassa nivesanaṃ tenupasaṅkami. Atha kho udayo brāhmaṇo bhagavato pattaṃ odanena pūresi. Dutiyampi kho bhagavā pubbaṇhasamayaṃ nivāsetvā pattacīvaramādāya yena udayassa brāhmaṇassa nivesanaṃ tenupasaṅkami…pe… tatiyampi kho udayo brāhmaṇo bhagavato pattaṃ odanena pūretvā bhagavantaṃ etadavoca – ‘‘pakaṭṭhakoyaṃ samaṇo gotamo punappunaṃ āgacchatī’’ti.
‘‘පුනප්‌පුනඤ්‌චෙව වපන්‌ති බීජං, පුනප්‌පුනං වස්‌සති දෙවරාජා;
‘‘Punappunañceva vapanti bījaṃ, punappunaṃ vassati devarājā;
පුනප්‌පුනං ඛෙත්‌තං කසන්‌ති කස්‌සකා, පුනප්‌පුනං ධඤ්‌ඤමුපෙති රට්‌ඨං.
Punappunaṃ khettaṃ kasanti kassakā, punappunaṃ dhaññamupeti raṭṭhaṃ.
‘‘පුනප්‌පුනං යාචකා යාචයන්‌ති, පුනප්‌පුනං දානපතී දදන්‌ති;
‘‘Punappunaṃ yācakā yācayanti, punappunaṃ dānapatī dadanti;
පුනප්‌පුනං දානපතී දදිත්‌වා, පුනප්‌පුනං සග්‌ගමුපෙන්‌ති ඨානං.
Punappunaṃ dānapatī daditvā, punappunaṃ saggamupenti ṭhānaṃ.
‘‘පුනප්‌පුනං ඛීරනිකා දුහන්‌ති, පුනප්‌පුනං වච්‌ඡො උපෙති මාතරං;
‘‘Punappunaṃ khīranikā duhanti, punappunaṃ vaccho upeti mātaraṃ;
පුනප්‌පුනං කිලමති ඵන්‌දති ච, පුනප්‌පුනං ගබ්‌භමුපෙති මන්‌දො.
Punappunaṃ kilamati phandati ca, punappunaṃ gabbhamupeti mando.
‘‘පුනප්‌පුනං ජායති මීයති ච, පුනප්‌පුනං සිවථිකං 1 හරන්‌ති;
‘‘Punappunaṃ jāyati mīyati ca, punappunaṃ sivathikaṃ 2 haranti;
මග්‌ගඤ්‌ච ලද්‌ධා අපුනබ්‌භවාය, න පුනප්‌පුනං ජායති භූරිපඤ්‌ඤො’’ති 3.
Maggañca laddhā apunabbhavāya, na punappunaṃ jāyati bhūripañño’’ti 4.
එවං වුත්‌තෙ, උදයො බ්‍රාහ්‌මණො භගවන්‌තං එතදවොච – ‘‘අභික්‌කන්‌තං, භො ගොතම…පෙ.… උපාසකං මං භවං ගොතමො ධාරෙතු අජ්‌ජතග්‌ගෙ පාණුපෙතං සරණං ගත’’න්‌ති.
Evaṃ vutte, udayo brāhmaṇo bhagavantaṃ etadavoca – ‘‘abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2. උදයසුත්‌තවණ්‌ණනා • 2. Udayasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2. උදයසුත්‌තවණ්‌ණනා • 2. Udayasuttavaṇṇanā
