| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
13. உத³யஸுத்தவண்ணனா
13. Udayasuttavaṇṇanā
1112-3. ஜா²யிந்தி உத³யஸுத்தங். தத்த² அஞ்ஞாவிமொக்க²ந்தி பஞ்ஞானுபா⁴வனிஜ்ஜா²தங் விமொக்க²ங் புச்ச²தி. அத² ப⁴க³வா யஸ்மா உத³யோ சதுத்த²ஜ்ஜா²னலாபீ⁴, தஸ்மாஸ்ஸ படிலத்³த⁴ஜ்ஜா²னவஸேன நானப்பகாரதோ அஞ்ஞாவிமொக்க²ங் த³ஸ்ஸெந்தோ கா³தா²த்³வயமாஹ. தத்த² பஹானங் காமச்ச²ந்தா³னந்தி யமித³ங் பட²மஜ்ஜா²னங் நிப்³ப³த்தெந்தஸ்ஸ காமச்ச²ந்த³ப்பஹானங், தம்பி அஞ்ஞாவிமொக்க²ங் பப்³ரூமி. ஏவங் ஸப்³ப³பதா³னி யோஜேதப்³பா³னி.
1112-3.Jhāyinti udayasuttaṃ. Tattha aññāvimokkhanti paññānubhāvanijjhātaṃ vimokkhaṃ pucchati. Atha bhagavā yasmā udayo catutthajjhānalābhī, tasmāssa paṭiladdhajjhānavasena nānappakārato aññāvimokkhaṃ dassento gāthādvayamāha. Tattha pahānaṃ kāmacchandānanti yamidaṃ paṭhamajjhānaṃ nibbattentassa kāmacchandappahānaṃ, tampi aññāvimokkhaṃ pabrūmi. Evaṃ sabbapadāni yojetabbāni.
1114. உபெக்கா²ஸதிஸங்ஸுத்³த⁴ந்தி சதுத்த²ஜ்ஜா²னஉபெக்கா²ஸதீஹி ஸங்ஸுத்³த⁴ங். த⁴ம்மதக்கபுரேஜவந்தி இமினா தஸ்மிங் சதுத்த²ஜ்ஜா²னவிமொக்கே² ட²த்வா ஜா²னங்கா³னி விபஸ்ஸித்வா அதி⁴க³தங் அரஹத்தவிமொக்க²ங் வத³தி. அரஹத்தவிமொக்க²ஸ்ஸ ஹி மக்³க³ஸம்பயுத்தஸம்மாஸங்கப்பாதி³பே⁴தோ³ த⁴ம்மதக்கோ புரேஜவோ ஹோதி. தேனாஹ – ‘‘த⁴ம்மதக்கபுரேஜவ’’ந்தி. அவிஜ்ஜாய பபே⁴த³னந்தி ஏதமேவ ச அஞ்ஞாவிமொக்க²ங் அவிஜ்ஜாபபே⁴த³னஸங்கா²தங் நிப்³பா³னங் நிஸ்ஸாய ஜாதத்தா காரணோபசாரேன ‘‘அவிஜ்ஜாய பபே⁴த³ன’’ந்தி பப்³ரூமீதி.
1114.Upekkhāsatisaṃsuddhanti catutthajjhānaupekkhāsatīhi saṃsuddhaṃ. Dhammatakkapurejavanti iminā tasmiṃ catutthajjhānavimokkhe ṭhatvā jhānaṅgāni vipassitvā adhigataṃ arahattavimokkhaṃ vadati. Arahattavimokkhassa hi maggasampayuttasammāsaṅkappādibhedo dhammatakko purejavo hoti. Tenāha – ‘‘dhammatakkapurejava’’nti. Avijjāya pabhedananti etameva ca aññāvimokkhaṃ avijjāpabhedanasaṅkhātaṃ nibbānaṃ nissāya jātattā kāraṇopacārena ‘‘avijjāya pabhedana’’nti pabrūmīti.
1115-6. ஏவங் அவிஜ்ஜாபபே⁴த³னவசனேன வுத்தங் நிப்³பா³னங் ஸுத்வா ‘‘தங் கிஸ்ஸ விப்பஹானேன வுச்சதீ’’தி புச்ச²ந்தோ ‘‘கிங்ஸு ஸங்யோஜனோ’’தி கா³த²மாஹ. தத்த² கிங்ஸு ஸங்யோஜனோதி கிங் ஸங்யோஜனோ. விசாரணந்தி விசரணகாரணங். கிஸ்ஸஸ்ஸ விப்பஹானேனாதி கிங் நாமகஸ்ஸ அஸ்ஸ த⁴ம்மஸ்ஸ விப்பஹானேன. அத²ஸ்ஸ ப⁴க³வா தமத்த²ங் ப்³யாகரொந்தோ ‘‘நந்தி³ஸங்யோஜனோ’’தி கா³த²மாஹ. தத்த² விதக்கஸ்ஸாதி காமவிதக்காதி³கோ விதக்கோ அஸ்ஸ.
1115-6. Evaṃ avijjāpabhedanavacanena vuttaṃ nibbānaṃ sutvā ‘‘taṃ kissa vippahānena vuccatī’’ti pucchanto ‘‘kiṃsu saṃyojano’’ti gāthamāha. Tattha kiṃsu saṃyojanoti kiṃ saṃyojano. Vicāraṇanti vicaraṇakāraṇaṃ. Kissassa vippahānenāti kiṃ nāmakassa assa dhammassa vippahānena. Athassa bhagavā tamatthaṃ byākaronto ‘‘nandisaṃyojano’’ti gāthamāha. Tattha vitakkassāti kāmavitakkādiko vitakko assa.
1117-8. இதா³னி தஸ்ஸ நிப்³பா³னஸ்ஸ மக்³க³ங் புச்ச²ந்தோ ‘‘கத²ங் ஸதஸ்ஸா’’தி கா³த²மாஹ. தத்த² விஞ்ஞாணந்தி அபி⁴ஸங்கா²ரவிஞ்ஞாணங். அத²ஸ்ஸ மக்³க³ங் கதெ²ந்தோ ப⁴க³வா ‘‘அஜ்ஜ²த்தஞ்சா’’தி கா³த²மாஹ. தத்த² ஏவங் ஸதஸ்ஸாதி ஏவங் ஸதஸ்ஸ ஸம்பஜானஸ்ஸ. ஸேஸங் ஸப்³ப³த்த² பாகடமேவ.
1117-8. Idāni tassa nibbānassa maggaṃ pucchanto ‘‘kathaṃ satassā’’ti gāthamāha. Tattha viññāṇanti abhisaṅkhāraviññāṇaṃ. Athassa maggaṃ kathento bhagavā ‘‘ajjhattañcā’’ti gāthamāha. Tattha evaṃ satassāti evaṃ satassa sampajānassa. Sesaṃ sabbattha pākaṭameva.
ஏவங் ப⁴க³வா இமம்பி ஸுத்தங் அரஹத்தனிகூடேனேவ தே³ஸேஸி. தே³ஸனாபரியோஸானே ச புப்³ப³ஸதி³ஸோ ஏவ த⁴ம்மாபி⁴ஸமயோ அஹோஸீதி.
Evaṃ bhagavā imampi suttaṃ arahattanikūṭeneva desesi. Desanāpariyosāne ca pubbasadiso eva dhammābhisamayo ahosīti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய உத³யஸுத்தவண்ணனா நிட்டி²தா.
Suttanipāta-aṭṭhakathāya udayasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 13. உத³யமாணவபுச்சா² • 13. Udayamāṇavapucchā
