| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
২. উদযসুত্তৰণ্ণনা
2. Udayasuttavaṇṇanā
১৯৮. দুতিযে ওদনেন পূরেসীতি অত্তনো অত্থায সম্পাদিতেন সূপব্যঞ্জনেন ওদনেন পূরেত্ৰা অদাসি। ভগৰা কির পচ্চূসসমযে লোকং ওলোকেন্তোৰ তং ব্রাহ্মণং দিস্ৰা, পাতোৰ সরীরপটিজগ্গনং কত্ৰা, গন্ধকুটিং পৰিসিত্ৰা, দ্ৰারং পিধায, নিসিন্নো তস্স ভোজনং উপসংহরিযমানং দিস্ৰা, এককোৰ পত্তং অংসকূটে লগ্গেত্ৰা, গন্ধকুটিতো নিক্খম্ম, নগরদ্ৰারে পত্তং নীহরিত্ৰা, অন্তোনগরং পৰিসিত্ৰা, পটিপাটিযা গচ্ছন্তো ব্রাহ্মণস্স দ্ৰারকোট্ঠকে অট্ঠাসি। ব্রাহ্মণো ভগৰন্তং দিস্ৰা, অত্তনো সজ্জিতং ভোজনং অদাসি। তং সন্ধাযেতং ৰুত্তং। দুতিযম্পীতি দুতিযদিৰসেপি। ততিযম্পীতি ততিযদিৰসেপি। তানি কির তীণি দিৰসানি নিরন্তরং ব্রাহ্মণস্স ঘরদ্ৰারং গচ্ছন্তস্স ভগৰতো অন্তরা অঞ্ঞো কোচি উট্ঠায পত্তং গহেতুং সমত্থো নাম নাহোসি, মহাজনো ওলোকেন্তোৰ অট্ঠাসি।
198. Dutiye odanena pūresīti attano atthāya sampāditena sūpabyañjanena odanena pūretvā adāsi. Bhagavā kira paccūsasamaye lokaṃ olokentova taṃ brāhmaṇaṃ disvā, pātova sarīrapaṭijagganaṃ katvā, gandhakuṭiṃ pavisitvā, dvāraṃ pidhāya, nisinno tassa bhojanaṃ upasaṃhariyamānaṃ disvā, ekakova pattaṃ aṃsakūṭe laggetvā, gandhakuṭito nikkhamma, nagaradvāre pattaṃ nīharitvā, antonagaraṃ pavisitvā, paṭipāṭiyā gacchanto brāhmaṇassa dvārakoṭṭhake aṭṭhāsi. Brāhmaṇo bhagavantaṃ disvā, attano sajjitaṃ bhojanaṃ adāsi. Taṃ sandhāyetaṃ vuttaṃ. Dutiyampīti dutiyadivasepi. Tatiyampīti tatiyadivasepi. Tāni kira tīṇi divasāni nirantaraṃ brāhmaṇassa gharadvāraṃ gacchantassa bhagavato antarā añño koci uṭṭhāya pattaṃ gahetuṃ samattho nāma nāhosi, mahājano olokentova aṭṭhāsi.
এতদৰোচাতি ব্রাহ্মণো তীণি দিৰসানি পত্তং পূরেত্ৰা দেন্তোপি ন সদ্ধায অদাসি, ‘‘ঘরদ্ৰারং আগন্ত্ৰা ঠিতস্স পব্বজিতস্স ভিক্খামত্তম্পি অদত্ৰা ভুঞ্জতী’’তি উপারম্ভভযেন অদাসি। দদন্তো চ দ্ৰে দিৰসানি দত্ৰা কিঞ্চি অৰত্ৰাৰ নিৰত্তো। ভগৰাপি কিঞ্চি অৰত্ৰাৰ পক্কন্তো। ততিযদিৰসে পন অধিৰাসেতুং অসক্কোন্তো এতং ‘‘পকট্ঠকো’’তিআদিৰচনং অৰোচ। ভগৰাপি এতং ৰচনং নিচ্ছারাপনত্থমেৰ যাৰ ততিযমগমাসি। তত্থ পকট্ঠকোতি রসগিদ্ধো।
Etadavocāti brāhmaṇo tīṇi divasāni pattaṃ pūretvā dentopi na saddhāya adāsi, ‘‘gharadvāraṃ āgantvā ṭhitassa pabbajitassa bhikkhāmattampi adatvā bhuñjatī’’ti upārambhabhayena adāsi. Dadanto ca dve divasāni datvā kiñci avatvāva nivatto. Bhagavāpi kiñci avatvāva pakkanto. Tatiyadivase pana adhivāsetuṃ asakkonto etaṃ ‘‘pakaṭṭhako’’tiādivacanaṃ avoca. Bhagavāpi etaṃ vacanaṃ nicchārāpanatthameva yāva tatiyamagamāsi. Tattha pakaṭṭhakoti rasagiddho.
পুনপ্পুনং চেৰ ৰপন্তি বীজন্তি সত্থা ব্রাহ্মণস্স ৰচনং সুত্ৰা, ‘‘ব্রাহ্মণ, ত্ৰং তীণি দিৰসানি পিণ্ডপাতং দত্ৰা ওসক্কসি, পুনপ্পুনং কাতব্বা নাম লোকস্মিং সোল়স ধম্মা’’তি ৰত্ৰা তে ধম্মে দস্সেতুং ইমং দেসনং আরভি। তত্থ পুনপ্পুনং চেৰ ৰপন্তীতি একস্মিং সস্সৰারে ৰুত্তং ‘‘অলমেত্তাৰতা’’তি অনোসক্কিত্ৰা অপরাপরেসুপি সস্সৰারেসু চ ৰপন্তিযেৰ। পুনপ্পুনং ৰস্সতীতি ন একদিৰসং ৰস্সিত্ৰা তিট্ঠতি, পুনপ্পুনদিৰসেসুপি পুনপ্পুনসংৰচ্ছরেসুপি ৰস্সতিযেৰ, এৰং জনপদা ইদ্ধা হোন্তি। এতেনুপাযেন সব্বত্থ নযো ৰেদিতব্বো।
Punappunaṃ ceva vapanti bījanti satthā brāhmaṇassa vacanaṃ sutvā, ‘‘brāhmaṇa, tvaṃ tīṇi divasāni piṇḍapātaṃ datvā osakkasi, punappunaṃ kātabbā nāma lokasmiṃ soḷasa dhammā’’ti vatvā te dhamme dassetuṃ imaṃ desanaṃ ārabhi. Tattha punappunaṃ ceva vapantīti ekasmiṃ sassavāre vuttaṃ ‘‘alamettāvatā’’ti anosakkitvā aparāparesupi sassavāresu ca vapantiyeva. Punappunaṃ vassatīti na ekadivasaṃ vassitvā tiṭṭhati, punappunadivasesupi punappunasaṃvaccharesupi vassatiyeva, evaṃ janapadā iddhā honti. Etenupāyena sabbattha nayo veditabbo.
যাচকাতি ইমস্মিং পদে সত্থা দেসনাকুসলতায অত্তানম্পি পক্খিপিত্ৰা দস্সেতি। খীরনিকাতি খীরকারকা গোদোহকা। ন হি তে একৰারমেৰ থনং অঞ্ছন্তি, পুনপ্পুনং অঞ্ছন্তা ধেনুং দুহন্তীতি অত্থো। কিলমতি ফন্দতি চাতি অযং সত্তো তেন ইরিযাপথেন কিলমতি চেৰ ফন্দতি চ। গব্ভন্তি সোণসিঙ্গালাদীনম্পি তিরচ্ছানগতানং কুচ্ছিং। সিৰথিকন্তি সুসানং, মতং মতং সত্তং তত্থ পুনপ্পুনং হরন্তীতি অত্থো। মগ্গঞ্চ লদ্ধা অপুনব্ভৰাযাতি অপুনব্ভৰায মগ্গো নাম নিব্বানং, তং লভিত্ৰাতি অত্থো।
Yācakāti imasmiṃ pade satthā desanākusalatāya attānampi pakkhipitvā dasseti. Khīranikāti khīrakārakā godohakā. Na hi te ekavārameva thanaṃ añchanti, punappunaṃ añchantā dhenuṃ duhantīti attho. Kilamati phandati cāti ayaṃ satto tena iriyāpathena kilamati ceva phandati ca. Gabbhanti soṇasiṅgālādīnampi tiracchānagatānaṃ kucchiṃ. Sivathikanti susānaṃ, mataṃ mataṃ sattaṃ tattha punappunaṃ harantīti attho. Maggañca laddhā apunabbhavāyāti apunabbhavāya maggo nāma nibbānaṃ, taṃ labhitvāti attho.
এৰং ৰুত্তেতি এৰং ভগৰতা অন্তরৰীথিযং ঠত্ৰাৰ সোল়স পুনপ্পুনধম্মে দেসেন্তেন ৰুত্তে। এতদৰোচাতি দেসনাপরিযোসানে পসন্নো সদ্ধিং পুত্তদারমিত্তঞাতিৰগ্গেন ভগৰতো পাদে ৰন্দিত্ৰা এতং ‘‘অভিক্কন্তং ভো’’তিআদিৰচনং অৰোচ। দুতিযং।
Evaṃ vutteti evaṃ bhagavatā antaravīthiyaṃ ṭhatvāva soḷasa punappunadhamme desentena vutte. Etadavocāti desanāpariyosāne pasanno saddhiṃ puttadāramittañātivaggena bhagavato pāde vanditvā etaṃ ‘‘abhikkantaṃ bho’’tiādivacanaṃ avoca. Dutiyaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ২. উদযসুত্তং • 2. Udayasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২. উদযসুত্তৰণ্ণনা • 2. Udayasuttavaṇṇanā
