| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၂. ဥဒယသုတ္တဝဏ္ဏနာ
2. Udayasuttavaṇṇanā
၁၉၈. ဒုတိယေ ဩဒနေန ပူရေသီတိ အတ္တနော အတ္ထာယ သမ္ပာဒိတေန သူပဗ္ယဉ္ဇနေန ဩဒနေန ပူရေတ္ဝာ အဒာသိ။ ဘဂဝာ ကိရ ပစ္စူသသမယေ လောကံ ဩလောကေန္တောဝ တံ ဗ္ရာဟ္မဏံ ဒိသ္ဝာ, ပာတောဝ သရီရပဋိဇဂ္ဂနံ ကတ္ဝာ, ဂန္ဓကုဋိံ ပဝိသိတ္ဝာ, ဒ္ဝာရံ ပိဓာယ, နိသိန္နော တသ္သ ဘောဇနံ ဥပသံဟရိယမာနံ ဒိသ္ဝာ, ဧကကောဝ ပတ္တံ အံသကူဋေ လဂ္ဂေတ္ဝာ, ဂန္ဓကုဋိတော နိက္ခမ္မ, နဂရဒ္ဝာရေ ပတ္တံ နီဟရိတ္ဝာ, အန္တောနဂရံ ပဝိသိတ္ဝာ, ပဋိပာဋိယာ ဂစ္ဆန္တော ဗ္ရာဟ္မဏသ္သ ဒ္ဝာရကောဋ္ဌကေ အဋ္ဌာသိ။ ဗ္ရာဟ္မဏော ဘဂဝန္တံ ဒိသ္ဝာ, အတ္တနော သဇ္ဇိတံ ဘောဇနံ အဒာသိ။ တံ သန္ဓာယေတံ ဝုတ္တံ။ ဒုတိယမ္ပီတိ ဒုတိယဒိဝသေပိ။ တတိယမ္ပီတိ တတိယဒိဝသေပိ။ တာနိ ကိရ တီဏိ ဒိဝသာနိ နိရန္တရံ ဗ္ရာဟ္မဏသ္သ ဃရဒ္ဝာရံ ဂစ္ဆန္တသ္သ ဘဂဝတော အန္တရာ အညော ကောစိ ဥဋ္ဌာယ ပတ္တံ ဂဟေတုံ သမတ္ထော နာမ နာဟောသိ, မဟာဇနော ဩလောကေန္တောဝ အဋ္ဌာသိ။
198. Dutiye odanena pūresīti attano atthāya sampāditena sūpabyañjanena odanena pūretvā adāsi. Bhagavā kira paccūsasamaye lokaṃ olokentova taṃ brāhmaṇaṃ disvā, pātova sarīrapaṭijagganaṃ katvā, gandhakuṭiṃ pavisitvā, dvāraṃ pidhāya, nisinno tassa bhojanaṃ upasaṃhariyamānaṃ disvā, ekakova pattaṃ aṃsakūṭe laggetvā, gandhakuṭito nikkhamma, nagaradvāre pattaṃ nīharitvā, antonagaraṃ pavisitvā, paṭipāṭiyā gacchanto brāhmaṇassa dvārakoṭṭhake aṭṭhāsi. Brāhmaṇo bhagavantaṃ disvā, attano sajjitaṃ bhojanaṃ adāsi. Taṃ sandhāyetaṃ vuttaṃ. Dutiyampīti dutiyadivasepi. Tatiyampīti tatiyadivasepi. Tāni kira tīṇi divasāni nirantaraṃ brāhmaṇassa gharadvāraṃ gacchantassa bhagavato antarā añño koci uṭṭhāya pattaṃ gahetuṃ samattho nāma nāhosi, mahājano olokentova aṭṭhāsi.
ဧတဒဝောစာတိ ဗ္ရာဟ္မဏော တီဏိ ဒိဝသာနိ ပတ္တံ ပူရေတ္ဝာ ဒေန္တောပိ န သဒ္ဓာယ အဒာသိ, ‘‘ဃရဒ္ဝာရံ အာဂန္တ္ဝာ ဌိတသ္သ ပဗ္ဗဇိတသ္သ ဘိက္ခာမတ္တမ္ပိ အဒတ္ဝာ ဘုဉ္ဇတီ’’တိ ဥပာရမ္ဘဘယေန အဒာသိ။ ဒဒန္တော စ ဒ္ဝေ ဒိဝသာနိ ဒတ္ဝာ ကိဉ္စိ အဝတ္ဝာဝ နိဝတ္တော။ ဘဂဝာပိ ကိဉ္စိ အဝတ္ဝာဝ ပက္ကန္တော။ တတိယဒိဝသေ ပန အဓိဝာသေတုံ အသက္ကောန္တော ဧတံ ‘‘ပကဋ္ဌကော’’တိအာဒိဝစနံ အဝောစ။ ဘဂဝာပိ ဧတံ ဝစနံ နိစ္ဆာရာပနတ္ထမေဝ ယာဝ တတိယမဂမာသိ။ တတ္ထ ပကဋ္ဌကောတိ ရသဂိဒ္ဓော။
Etadavocāti brāhmaṇo tīṇi divasāni pattaṃ pūretvā dentopi na saddhāya adāsi, ‘‘gharadvāraṃ āgantvā ṭhitassa pabbajitassa bhikkhāmattampi adatvā bhuñjatī’’ti upārambhabhayena adāsi. Dadanto ca dve divasāni datvā kiñci avatvāva nivatto. Bhagavāpi kiñci avatvāva pakkanto. Tatiyadivase pana adhivāsetuṃ asakkonto etaṃ ‘‘pakaṭṭhako’’tiādivacanaṃ avoca. Bhagavāpi etaṃ vacanaṃ nicchārāpanatthameva yāva tatiyamagamāsi. Tattha pakaṭṭhakoti rasagiddho.
ပုနပ္ပုနံ စေဝ ဝပန္တိ ဗီဇန္တိ သတ္ထာ ဗ္ရာဟ္မဏသ္သ ဝစနံ သုတ္ဝာ, ‘‘ဗ္ရာဟ္မဏ, တ္ဝံ တီဏိ ဒိဝသာနိ ပိဏ္ဍပာတံ ဒတ္ဝာ ဩသက္ကသိ, ပုနပ္ပုနံ ကာတဗ္ဗာ နာမ လောကသ္မိံ သောဠသ ဓမ္မာ’’တိ ဝတ္ဝာ တေ ဓမ္မေ ဒသ္သေတုံ ဣမံ ဒေသနံ အာရဘိ။ တတ္ထ ပုနပ္ပုနံ စေဝ ဝပန္တီတိ ဧကသ္မိံ သသ္သဝာရေ ဝုတ္တံ ‘‘အလမေတ္တာဝတာ’’တိ အနောသက္ကိတ္ဝာ အပရာပရေသုပိ သသ္သဝာရေသု စ ဝပန္တိယေဝ။ ပုနပ္ပုနံ ဝသ္သတီတိ န ဧကဒိဝသံ ဝသ္သိတ္ဝာ တိဋ္ဌတိ, ပုနပ္ပုနဒိဝသေသုပိ ပုနပ္ပုနသံဝစ္ဆရေသုပိ ဝသ္သတိယေဝ, ဧဝံ ဇနပဒာ ဣဒ္ဓာ ဟောန္တိ။ ဧတေနုပာယေန သဗ္ဗတ္ထ နယော ဝေဒိတဗ္ဗော။
Punappunaṃ ceva vapanti bījanti satthā brāhmaṇassa vacanaṃ sutvā, ‘‘brāhmaṇa, tvaṃ tīṇi divasāni piṇḍapātaṃ datvā osakkasi, punappunaṃ kātabbā nāma lokasmiṃ soḷasa dhammā’’ti vatvā te dhamme dassetuṃ imaṃ desanaṃ ārabhi. Tattha punappunaṃ ceva vapantīti ekasmiṃ sassavāre vuttaṃ ‘‘alamettāvatā’’ti anosakkitvā aparāparesupi sassavāresu ca vapantiyeva. Punappunaṃ vassatīti na ekadivasaṃ vassitvā tiṭṭhati, punappunadivasesupi punappunasaṃvaccharesupi vassatiyeva, evaṃ janapadā iddhā honti. Etenupāyena sabbattha nayo veditabbo.
ယာစကာတိ ဣမသ္မိံ ပဒေ သတ္ထာ ဒေသနာကုသလတာယ အတ္တာနမ္ပိ ပက္ခိပိတ္ဝာ ဒသ္သေတိ။ ခီရနိကာတိ ခီရကာရကာ ဂောဒောဟကာ။ န ဟိ တေ ဧကဝာရမေဝ ထနံ အဉ္ဆန္တိ, ပုနပ္ပုနံ အဉ္ဆန္တာ ဓေနုံ ဒုဟန္တီတိ အတ္ထော။ ကိလမတိ ဖန္ဒတိ စာတိ အယံ သတ္တော တေန ဣရိယာပထေန ကိလမတိ စေဝ ဖန္ဒတိ စ။ ဂဗ္ဘန္တိ သောဏသိင္ဂာလာဒီနမ္ပိ တိရစ္ဆာနဂတာနံ ကုစ္ဆိံ။ သိဝထိကန္တိ သုသာနံ, မတံ မတံ သတ္တံ တတ္ထ ပုနပ္ပုနံ ဟရန္တီတိ အတ္ထော။ မဂ္ဂဉ္စ လဒ္ဓာ အပုနဗ္ဘဝာယာတိ အပုနဗ္ဘဝာယ မဂ္ဂော နာမ နိဗ္ဗာနံ, တံ လဘိတ္ဝာတိ အတ္ထော။
Yācakāti imasmiṃ pade satthā desanākusalatāya attānampi pakkhipitvā dasseti. Khīranikāti khīrakārakā godohakā. Na hi te ekavārameva thanaṃ añchanti, punappunaṃ añchantā dhenuṃ duhantīti attho. Kilamati phandati cāti ayaṃ satto tena iriyāpathena kilamati ceva phandati ca. Gabbhanti soṇasiṅgālādīnampi tiracchānagatānaṃ kucchiṃ. Sivathikanti susānaṃ, mataṃ mataṃ sattaṃ tattha punappunaṃ harantīti attho. Maggañca laddhā apunabbhavāyāti apunabbhavāya maggo nāma nibbānaṃ, taṃ labhitvāti attho.
ဧဝံ ဝုတ္တေတိ ဧဝံ ဘဂဝတာ အန္တရဝီထိယံ ဌတ္ဝာဝ သောဠသ ပုနပ္ပုနဓမ္မေ ဒေသေန္တေန ဝုတ္တေ။ ဧတဒဝောစာတိ ဒေသနာပရိယောသာနေ ပသန္နော သဒ္ဓိံ ပုတ္တဒာရမိတ္တဉာတိဝဂ္ဂေန ဘဂဝတော ပာဒေ ဝန္ဒိတ္ဝာ ဧတံ ‘‘အဘိက္ကန္တံ ဘော’’တိအာဒိဝစနံ အဝောစ။ ဒုတိယံ။
Evaṃ vutteti evaṃ bhagavatā antaravīthiyaṃ ṭhatvāva soḷasa punappunadhamme desentena vutte. Etadavocāti desanāpariyosāne pasanno saddhiṃ puttadāramittañātivaggena bhagavato pāde vanditvā etaṃ ‘‘abhikkantaṃ bho’’tiādivacanaṃ avoca. Dutiyaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၂. ဥဒယသုတ္တံ • 2. Udayasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂. ဥဒယသုတ္တဝဏ္ဏနာ • 2. Udayasuttavaṇṇanā
