អង្គុត្តរ និកាយ ៥។១៥៩

១៦។ សទ្ធម្មវគ្គ

ឧទាយីសុត្ត

ឯវំ មេ សុតំ—ឯកំ សមយំ ភគវា កោសម្ពិយំ វិហរតិ ឃោសិតារាមេ។ តេន ខោ បន សមយេន អាយស្មា ឧទាយី មហតិយា គិហិបរិសាយ បរិវុតោ ធម្មំ ទេសេន្តោ និសិន្នោ ហោតិ។ អទ្ទសា ខោ អាយស្មា អានន្ទោ អាយស្មន្តំ ឧទាយិំ មហតិយា គិហិបរិសាយ បរិវុតំ ធម្មំ ទេសេន្តំ និសិន្នំ។ ទិស្វា យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ។ ឯកមន្តំ និសិន្នោ ខោ អាយស្មា អានន្ទោ ភគវន្តំ ឯតទវោច:

“អាយស្មា, ភន្តេ, ឧទាយី មហតិយា គិហិបរិសាយ បរិវុតោ ធម្មំ ទេសេតី”តិ។

“ន ខោ, អានន្ទ, សុករំ បរេសំ ធម្មំ ទេសេតុំ។ បរេសំ, អានន្ទ, ធម្មំ ទេសេន្តេន បញ្ច ធម្មេ អជ្ឈត្តំ ឧបដ្ឋាបេត្វា បរេសំ ធម្មោ ទេសេតព្ពោ។ កតមេ បញ្ច?

‘អនុបុព្ពិំ កថំ កថេស្សាមីៜតិ បរេសំ ធម្មោ ទេសេតព្ពោ;

‘បរិយាយទស្សាវី កថំ កថេស្សាមីៜតិ បរេសំ ធម្មោ ទេសេតព្ពោ;

‘អនុទ្ទយតំ បដិច្ច កថំ កថេស្សាមីៜតិ បរេសំ ធម្មោ ទេសេតព្ពោ;

‘ន អាមិសន្តរោ កថំ កថេស្សាមីៜតិ បរេសំ ធម្មោ ទេសេតព្ពោ;

‘អត្តានញ្ច បរញ្ច អនុបហច្ច កថំ កថេស្សាមីៜតិ បរេសំ ធម្មោ ទេសេតព្ពោ។

ន ខោ, អានន្ទ, សុករំ បរេសំ ធម្មំ ទេសេតុំ។ បរេសំ, អានន្ទ, ធម្មំ ទេសេន្តេន ឥមេ បញ្ច ធម្មេ អជ្ឈត្តំ ឧបដ្ឋាបេត្វា បរេសំ ធម្មោ ទេសេតព្ពោ”តិ។

នវមំ។