| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
10. உதா³யிஸுத்தங்
10. Udāyisuttaṃ
211. ஏகங் ஸமயங் ப⁴க³வா ஸும்பே⁴ஸு விஹரதி ஸேதகங் நாம ஸும்பா⁴னங் நிக³மோ. அத² கோ² ஆயஸ்மா உதா³யீ யேன ப⁴க³வா தேனுபஸங்கமி…பே॰… ஏகமந்தங் நிஸின்னோ கோ² ஆயஸ்மா உதா³யீ ப⁴க³வந்தங் ஏதத³வோச –
211. Ekaṃ samayaṃ bhagavā sumbhesu viharati setakaṃ nāma sumbhānaṃ nigamo. Atha kho āyasmā udāyī yena bhagavā tenupasaṅkami…pe… ekamantaṃ nisinno kho āyasmā udāyī bhagavantaṃ etadavoca –
‘‘அச்ச²ரியங், ப⁴ந்தே, அப்³பு⁴தங், ப⁴ந்தே! யாவ ப³ஹுகதஞ்ச மே, ப⁴ந்தே, ப⁴க³வதி பேமஞ்ச கா³ரவோ ச ஹிரீ ச ஒத்தப்பஞ்ச. அஹஞ்ஹி, ப⁴ந்தே, புப்³பே³ அகா³ரிகபூ⁴தோ ஸமானோ அப³ஹுகதோ அஹோஸிங் த⁴ம்மேன 1 அப³ஹுகதோ ஸங்கே⁴ன. ஸோ க்²வாஹங் ப⁴க³வதி பேமஞ்ச கா³ரவஞ்ச ஹிரிஞ்ச ஒத்தப்பஞ்ச ஸம்பஸ்ஸமானோ அகா³ரஸ்மா அனகா³ரியங் பப்³ப³ஜிதோ. தஸ்ஸ மே ப⁴க³வா த⁴ம்மங் தே³ஸேஸி – ‘இதி ரூபங், இதி ரூபஸ்ஸ ஸமுத³யோ, இதி ரூபஸ்ஸ அத்த²ங்க³மோ; இதி வேத³னா…பே॰… இதி ஸஞ்ஞா… இதி ஸங்கா²ரா… இதி விஞ்ஞாணங், இதி விஞ்ஞாணஸ்ஸ ஸமுத³யோ, இதி விஞ்ஞாணஸ்ஸ அத்த²ங்க³மோ’தி.
‘‘Acchariyaṃ, bhante, abbhutaṃ, bhante! Yāva bahukatañca me, bhante, bhagavati pemañca gāravo ca hirī ca ottappañca. Ahañhi, bhante, pubbe agārikabhūto samāno abahukato ahosiṃ dhammena 2 abahukato saṅghena. So khvāhaṃ bhagavati pemañca gāravañca hiriñca ottappañca sampassamāno agārasmā anagāriyaṃ pabbajito. Tassa me bhagavā dhammaṃ desesi – ‘iti rūpaṃ, iti rūpassa samudayo, iti rūpassa atthaṅgamo; iti vedanā…pe… iti saññā… iti saṅkhārā… iti viññāṇaṃ, iti viññāṇassa samudayo, iti viññāṇassa atthaṅgamo’ti.
‘‘ஸோ க்²வாஹங், ப⁴ந்தே, ஸுஞ்ஞாகா³ரக³தோ இமேஸங் பஞ்சுபாதா³னக்க²ந்தா⁴னங் உக்குஜ்ஜாவகுஜ்ஜங் ஸம்பரிவத்தெந்தோ ‘இத³ங் து³க்க²’ந்தி யதா²பூ⁴தங் அப்³ப⁴ஞ்ஞாஸிங், ‘அயங் து³க்க²ஸமுத³யோ’தி யதா²பூ⁴தங் அப்³ப⁴ஞ்ஞாஸிங், ‘அயங் து³க்க²னிரோதோ⁴’தி யதா²பூ⁴தங் அப்³ப⁴ஞ்ஞாஸிங், ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் அப்³ப⁴ஞ்ஞாஸிங். த⁴ம்மோ ச மே, ப⁴ந்தே, அபி⁴ஸமிதோ, மக்³கோ³ ச மே படிலத்³தோ⁴; யோ மே பா⁴விதோ ப³ஹுலீகதோ ததா² ததா² விஹரந்தங் தத²த்தாய உபனெஸ்ஸதி யதா²ஹங் – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானிஸ்ஸாமி.
‘‘So khvāhaṃ, bhante, suññāgāragato imesaṃ pañcupādānakkhandhānaṃ ukkujjāvakujjaṃ samparivattento ‘idaṃ dukkha’nti yathābhūtaṃ abbhaññāsiṃ, ‘ayaṃ dukkhasamudayo’ti yathābhūtaṃ abbhaññāsiṃ, ‘ayaṃ dukkhanirodho’ti yathābhūtaṃ abbhaññāsiṃ, ‘ayaṃ dukkhanirodhagāminī paṭipadā’ti yathābhūtaṃ abbhaññāsiṃ. Dhammo ca me, bhante, abhisamito, maggo ca me paṭiladdho; yo me bhāvito bahulīkato tathā tathā viharantaṃ tathattāya upanessati yathāhaṃ – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānissāmi.
‘‘ஸதிஸம்பொ³ஜ்ஜ²ங்கோ³ மே, ப⁴ந்தே, படிலத்³தோ⁴, யோ மே பா⁴விதோ ப³ஹுலீகதோ ததா² ததா² விஹரந்தங் தத²த்தாய உபனெஸ்ஸதி யதா²ஹங் – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானிஸ்ஸாமி…பே॰… உபெக்கா²ஸம்பொ³ஜ்ஜ²ங்கோ³ மே, ப⁴ந்தே, படிலத்³தோ⁴, யோ மே பா⁴விதோ ப³ஹுலீகதோ ததா² ததா² விஹரந்தங் தத²த்தாய உபனெஸ்ஸதி யதா²ஹங் – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானிஸ்ஸாமி. அயங் கோ² மே, ப⁴ந்தே, மக்³கோ³ படிலத்³தோ⁴, யோ மே பா⁴விதோ ப³ஹுலீகதோ ததா² ததா² விஹரந்தங் தத²த்தாய உபனெஸ்ஸதி யதா²ஹங் – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானிஸ்ஸாமீ’’தி.
‘‘Satisambojjhaṅgo me, bhante, paṭiladdho, yo me bhāvito bahulīkato tathā tathā viharantaṃ tathattāya upanessati yathāhaṃ – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānissāmi…pe… upekkhāsambojjhaṅgo me, bhante, paṭiladdho, yo me bhāvito bahulīkato tathā tathā viharantaṃ tathattāya upanessati yathāhaṃ – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānissāmi. Ayaṃ kho me, bhante, maggo paṭiladdho, yo me bhāvito bahulīkato tathā tathā viharantaṃ tathattāya upanessati yathāhaṃ – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānissāmī’’ti.
‘‘ஸாது⁴ ஸாது⁴, உதா³யி! ஏஸோ ஹி தே, உதா³யி, மக்³கோ³ படிலத்³தோ⁴, யோ தே பா⁴விதோ ப³ஹுலீகதோ ததா² ததா² விஹரந்தங் தத²த்தாய உபனெஸ்ஸதி யதா² த்வங் – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானிஸ்ஸஸீ’’தி. த³ஸமங்.
‘‘Sādhu sādhu, udāyi! Eso hi te, udāyi, maggo paṭiladdho, yo te bhāvito bahulīkato tathā tathā viharantaṃ tathattāya upanessati yathā tvaṃ – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānissasī’’ti. Dasamaṃ.
உதா³யிவக்³கோ³ ததியோ.
Udāyivaggo tatiyo.
தஸ்ஸுத்³தா³னங் –
Tassuddānaṃ –
போ³தா⁴ய தே³ஸனா டா²னா, அயோனிஸோ சாபரிஹானீ;
Bodhāya desanā ṭhānā, ayoniso cāparihānī;
க²யோ நிரோதோ⁴ நிப்³பே³தோ⁴, ஏகத⁴ம்மோ உதா³யினாதி.
Khayo nirodho nibbedho, ekadhammo udāyināti.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. உதா³யிஸுத்தவண்ணனா • 10. Udāyisuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. உதா³யிஸுத்தவண்ணனா • 10. Udāyisuttavaṇṇanā
