| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৭. উদাযীসুত্তং
7. Udāyīsuttaṃ
২৩৪. একং সমযং আযস্মা চ আনন্দো আযস্মা চ উদাযী কোসম্বিযং ৰিহরন্তি ঘোসিতারামে। অথ খো আযস্মা উদাযী সাযন্হসমযং পটিসল্লানা ৰুট্ঠিতো যেনাযস্মা আনন্দো তেনুপসঙ্কমি; উপসঙ্কমিত্ৰা আযস্মতা আনন্দেন সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো আযস্মা উদাযী আযস্মন্তং আনন্দং এতদৰোচ –
234. Ekaṃ samayaṃ āyasmā ca ānando āyasmā ca udāyī kosambiyaṃ viharanti ghositārāme. Atha kho āyasmā udāyī sāyanhasamayaṃ paṭisallānā vuṭṭhito yenāyasmā ānando tenupasaṅkami; upasaṅkamitvā āyasmatā ānandena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā udāyī āyasmantaṃ ānandaṃ etadavoca –
‘‘যথেৰ নু খো, আৰুসো আনন্দ, অযং কাযো ভগৰতা অনেকপরিযাযেন অক্খাতো ৰিৰটো পকাসিতো – ‘ইতিপাযং কাযো অনত্তা’তি, সক্কা এৰমেৰ ৰিঞ্ঞাণং পিদং আচিক্খিতুং দেসেতুং পঞ্ঞপেতুং পট্ঠপেতুং ৰিৰরিতুং ৰিভজিতুং উত্তানীকাতুং – ‘ইতিপিদং ৰিঞ্ঞাণং অনত্তা’’’তি?
‘‘Yatheva nu kho, āvuso ānanda, ayaṃ kāyo bhagavatā anekapariyāyena akkhāto vivaṭo pakāsito – ‘itipāyaṃ kāyo anattā’ti, sakkā evameva viññāṇaṃ pidaṃ ācikkhituṃ desetuṃ paññapetuṃ paṭṭhapetuṃ vivarituṃ vibhajituṃ uttānīkātuṃ – ‘itipidaṃ viññāṇaṃ anattā’’’ti?
‘‘যথেৰ খো, আৰুসো উদাযী, অযং কাযো ভগৰতা অনেকপরিযাযেন অক্খাতো ৰিৰটো পকাসিতো – ‘ইতিপাযং কাযো অনত্তা’তি, সক্কা এৰমেৰ ৰিঞ্ঞাণং পিদং আচিক্খিতুং দেসেতুং পঞ্ঞপেতুং পট্ঠপেতুং ৰিৰরিতুং ৰিভজিতুং উত্তানীকাতুং – ‘ইতিপিদং ৰিঞ্ঞাণং অনত্তা’’’তি।
‘‘Yatheva kho, āvuso udāyī, ayaṃ kāyo bhagavatā anekapariyāyena akkhāto vivaṭo pakāsito – ‘itipāyaṃ kāyo anattā’ti, sakkā evameva viññāṇaṃ pidaṃ ācikkhituṃ desetuṃ paññapetuṃ paṭṭhapetuṃ vivarituṃ vibhajituṃ uttānīkātuṃ – ‘itipidaṃ viññāṇaṃ anattā’’’ti.
‘‘চক্খুঞ্চ, আৰুসো, পটিচ্চ রূপে চ উপ্পজ্জতি চক্খুৰিঞ্ঞাণ’’ন্তি? ‘‘এৰমাৰুসো’’তি । ‘‘যো চাৰুসো, হেতু, যো চ পচ্চযো চক্খুৰিঞ্ঞাণস্স উপ্পাদায, সো চ হেতু, সো চ পচ্চযো সব্বেন সব্বং সব্বথা সব্বং অপরিসেসং নিরুজ্ঝেয্য। অপি নু খো চক্খুৰিঞ্ঞাণং পঞ্ঞাযেথা’’তি? ‘‘নো হেতং, আৰুসো’’। ‘‘ইমিনাপি খো এতং, আৰুসো, পরিযাযেন ভগৰতা অক্খাতং ৰিৰটং পকাসিতং – ‘ইতিপিদং ৰিঞ্ঞাণং অনত্তা’’’তি…পে॰…।
‘‘Cakkhuñca, āvuso, paṭicca rūpe ca uppajjati cakkhuviññāṇa’’nti? ‘‘Evamāvuso’’ti . ‘‘Yo cāvuso, hetu, yo ca paccayo cakkhuviññāṇassa uppādāya, so ca hetu, so ca paccayo sabbena sabbaṃ sabbathā sabbaṃ aparisesaṃ nirujjheyya. Api nu kho cakkhuviññāṇaṃ paññāyethā’’ti? ‘‘No hetaṃ, āvuso’’. ‘‘Imināpi kho etaṃ, āvuso, pariyāyena bhagavatā akkhātaṃ vivaṭaṃ pakāsitaṃ – ‘itipidaṃ viññāṇaṃ anattā’’’ti…pe….
‘‘জিৰ্হঞ্চাৰুসো, পটিচ্চ রসে চ উপ্পজ্জতি জিৰ্হাৰিঞ্ঞাণ’’ন্তি? ‘‘এৰমাৰুসো’’তি। ‘‘যো চাৰুসো, হেতু যো চ পচ্চযো জিৰ্হাৰিঞ্ঞাণস্স উপ্পাদায, সো চ হেতু, সো চ পচ্চযো সব্বেন সব্বং সব্বথা সব্বং অপরিসেসং নিরুজ্ঝেয্য, অপি নু খো জিৰ্হাৰিঞ্ঞাণং পঞ্ঞাযেথা’’তি? ‘‘নো হেতং, আৰুসো’’। ‘‘ইমিনাপি খো এতং, আৰুসো, পরিযাযেন ভগৰতা অক্খাতং ৰিৰটং পকাসিতং – ‘ইতিপিদং ৰিঞ্ঞাণং অনত্তা’’’তি…পে॰…।
‘‘Jivhañcāvuso, paṭicca rase ca uppajjati jivhāviññāṇa’’nti? ‘‘Evamāvuso’’ti. ‘‘Yo cāvuso, hetu yo ca paccayo jivhāviññāṇassa uppādāya, so ca hetu, so ca paccayo sabbena sabbaṃ sabbathā sabbaṃ aparisesaṃ nirujjheyya, api nu kho jivhāviññāṇaṃ paññāyethā’’ti? ‘‘No hetaṃ, āvuso’’. ‘‘Imināpi kho etaṃ, āvuso, pariyāyena bhagavatā akkhātaṃ vivaṭaṃ pakāsitaṃ – ‘itipidaṃ viññāṇaṃ anattā’’’ti…pe….
‘‘মনঞ্চাৰুসো, পটিচ্চ ধম্মে চ উপ্পজ্জতি মনোৰিঞ্ঞাণ’’ন্তি? ‘‘এৰমাৰুসো’’তি। ‘‘যো চাৰুসো, হেতু, যো চ পচ্চযো মনোৰিঞ্ঞাণস্স উপ্পাদায, সো চ হেতু, সো চ পচ্চযো সব্বেন সব্বং সব্বথা সব্বং অপরিসেসং নিরুজ্ঝেয্য, অপি নু খো মনোৰিঞ্ঞাণং পঞ্ঞাযেথা’’তি? ‘‘নো হেতং, আৰুসো’’। ‘‘ইমিনাপি খো এতং, আৰুসো, পরিযাযেন ভগৰতা অক্খাতং ৰিৰটং পকাসিতং – ‘ইতিপিদং ৰিঞ্ঞাণং অনত্তা’’’তি।
‘‘Manañcāvuso, paṭicca dhamme ca uppajjati manoviññāṇa’’nti? ‘‘Evamāvuso’’ti. ‘‘Yo cāvuso, hetu, yo ca paccayo manoviññāṇassa uppādāya, so ca hetu, so ca paccayo sabbena sabbaṃ sabbathā sabbaṃ aparisesaṃ nirujjheyya, api nu kho manoviññāṇaṃ paññāyethā’’ti? ‘‘No hetaṃ, āvuso’’. ‘‘Imināpi kho etaṃ, āvuso, pariyāyena bhagavatā akkhātaṃ vivaṭaṃ pakāsitaṃ – ‘itipidaṃ viññāṇaṃ anattā’’’ti.
‘‘সেয্যথাপি, আৰুসো, পুরিসো সারত্থিকো সারগৰেসী সারপরিযেসনং চরমানো তিণ্হং কুঠারিং আদায ৰনং পৰিসেয্য। সো তত্থ পস্সেয্য মহন্তং কদলিক্খন্ধং উজুং নৰং অকুক্কুকজাতং 1। তমেনং মূলে ছিন্দেয্য ; মূলে ছেত্ৰা অগ্গে ছিন্দেয্য; অগ্গে ছেত্ৰা পত্তৰট্টিং ৰিনিব্ভুজেয্য 2। সো তত্থ ফেগ্গুম্পি নাধিগচ্ছেয্য, কুতো সারং! এৰমেৰ খো, আৰুসো, ভিক্খু ছসু ফস্সাযতনেসু নেৰত্তানং ন অত্তনিযং সমনুপস্সতি। সো এৰং অসমনুপস্সন্তো 3 ন কিঞ্চি লোকে উপাদিযতি। অনুপাদিযং ন পরিতস্সতি। অপরিতস্সং পচ্চত্তঞ্ঞেৰ পরিনিব্বাযতি। ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি। সত্তমং।
‘‘Seyyathāpi, āvuso, puriso sāratthiko sāragavesī sārapariyesanaṃ caramāno tiṇhaṃ kuṭhāriṃ ādāya vanaṃ paviseyya. So tattha passeyya mahantaṃ kadalikkhandhaṃ ujuṃ navaṃ akukkukajātaṃ 4. Tamenaṃ mūle chindeyya ; mūle chetvā agge chindeyya; agge chetvā pattavaṭṭiṃ vinibbhujeyya 5. So tattha pheggumpi nādhigaccheyya, kuto sāraṃ! Evameva kho, āvuso, bhikkhu chasu phassāyatanesu nevattānaṃ na attaniyaṃ samanupassati. So evaṃ asamanupassanto 6 na kiñci loke upādiyati. Anupādiyaṃ na paritassati. Aparitassaṃ paccattaññeva parinibbāyati. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānātī’’ti. Sattamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৭. উদাযীসুত্তৰণ্ণনা • 7. Udāyīsuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৭. উদাযীসুত্তৰণ্ণনা • 7. Udāyīsuttavaṇṇanā
