| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. উদাযিসুত্তং
10. Udāyisuttaṃ
২১১. একং সমযং ভগৰা সুম্ভেসু ৰিহরতি সেতকং নাম সুম্ভানং নিগমো। অথ খো আযস্মা উদাযী যেন ভগৰা তেনুপসঙ্কমি…পে॰… একমন্তং নিসিন্নো খো আযস্মা উদাযী ভগৰন্তং এতদৰোচ –
211. Ekaṃ samayaṃ bhagavā sumbhesu viharati setakaṃ nāma sumbhānaṃ nigamo. Atha kho āyasmā udāyī yena bhagavā tenupasaṅkami…pe… ekamantaṃ nisinno kho āyasmā udāyī bhagavantaṃ etadavoca –
‘‘অচ্ছরিযং, ভন্তে, অব্ভুতং, ভন্তে! যাৰ বহুকতঞ্চ মে, ভন্তে, ভগৰতি পেমঞ্চ গারৰো চ হিরী চ ওত্তপ্পঞ্চ। অহঞ্হি, ভন্তে, পুব্বে অগারিকভূতো সমানো অবহুকতো অহোসিং ধম্মেন 1 অবহুকতো সঙ্ঘেন। সো খ্ৰাহং ভগৰতি পেমঞ্চ গারৰঞ্চ হিরিঞ্চ ওত্তপ্পঞ্চ সম্পস্সমানো অগারস্মা অনগারিযং পব্বজিতো। তস্স মে ভগৰা ধম্মং দেসেসি – ‘ইতি রূপং, ইতি রূপস্স সমুদযো, ইতি রূপস্স অত্থঙ্গমো; ইতি ৰেদনা…পে॰… ইতি সঞ্ঞা… ইতি সঙ্খারা… ইতি ৰিঞ্ঞাণং, ইতি ৰিঞ্ঞাণস্স সমুদযো, ইতি ৰিঞ্ঞাণস্স অত্থঙ্গমো’তি।
‘‘Acchariyaṃ, bhante, abbhutaṃ, bhante! Yāva bahukatañca me, bhante, bhagavati pemañca gāravo ca hirī ca ottappañca. Ahañhi, bhante, pubbe agārikabhūto samāno abahukato ahosiṃ dhammena 2 abahukato saṅghena. So khvāhaṃ bhagavati pemañca gāravañca hiriñca ottappañca sampassamāno agārasmā anagāriyaṃ pabbajito. Tassa me bhagavā dhammaṃ desesi – ‘iti rūpaṃ, iti rūpassa samudayo, iti rūpassa atthaṅgamo; iti vedanā…pe… iti saññā… iti saṅkhārā… iti viññāṇaṃ, iti viññāṇassa samudayo, iti viññāṇassa atthaṅgamo’ti.
‘‘সো খ্ৰাহং, ভন্তে, সুঞ্ঞাগারগতো ইমেসং পঞ্চুপাদানক্খন্ধানং উক্কুজ্জাৰকুজ্জং সম্পরিৰত্তেন্তো ‘ইদং দুক্খ’ন্তি যথাভূতং অব্ভঞ্ঞাসিং, ‘অযং দুক্খসমুদযো’তি যথাভূতং অব্ভঞ্ঞাসিং, ‘অযং দুক্খনিরোধো’তি যথাভূতং অব্ভঞ্ঞাসিং, ‘অযং দুক্খনিরোধগামিনী পটিপদা’তি যথাভূতং অব্ভঞ্ঞাসিং। ধম্মো চ মে, ভন্তে, অভিসমিতো, মগ্গো চ মে পটিলদ্ধো; যো মে ভাৰিতো বহুলীকতো তথা তথা ৰিহরন্তং তথত্তায উপনেস্সতি যথাহং – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানিস্সামি।
‘‘So khvāhaṃ, bhante, suññāgāragato imesaṃ pañcupādānakkhandhānaṃ ukkujjāvakujjaṃ samparivattento ‘idaṃ dukkha’nti yathābhūtaṃ abbhaññāsiṃ, ‘ayaṃ dukkhasamudayo’ti yathābhūtaṃ abbhaññāsiṃ, ‘ayaṃ dukkhanirodho’ti yathābhūtaṃ abbhaññāsiṃ, ‘ayaṃ dukkhanirodhagāminī paṭipadā’ti yathābhūtaṃ abbhaññāsiṃ. Dhammo ca me, bhante, abhisamito, maggo ca me paṭiladdho; yo me bhāvito bahulīkato tathā tathā viharantaṃ tathattāya upanessati yathāhaṃ – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānissāmi.
‘‘সতিসম্বোজ্ঝঙ্গো মে, ভন্তে, পটিলদ্ধো, যো মে ভাৰিতো বহুলীকতো তথা তথা ৰিহরন্তং তথত্তায উপনেস্সতি যথাহং – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানিস্সামি…পে॰… উপেক্খাসম্বোজ্ঝঙ্গো মে, ভন্তে, পটিলদ্ধো, যো মে ভাৰিতো বহুলীকতো তথা তথা ৰিহরন্তং তথত্তায উপনেস্সতি যথাহং – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানিস্সামি। অযং খো মে, ভন্তে, মগ্গো পটিলদ্ধো, যো মে ভাৰিতো বহুলীকতো তথা তথা ৰিহরন্তং তথত্তায উপনেস্সতি যথাহং – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানিস্সামী’’তি।
‘‘Satisambojjhaṅgo me, bhante, paṭiladdho, yo me bhāvito bahulīkato tathā tathā viharantaṃ tathattāya upanessati yathāhaṃ – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānissāmi…pe… upekkhāsambojjhaṅgo me, bhante, paṭiladdho, yo me bhāvito bahulīkato tathā tathā viharantaṃ tathattāya upanessati yathāhaṃ – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānissāmi. Ayaṃ kho me, bhante, maggo paṭiladdho, yo me bhāvito bahulīkato tathā tathā viharantaṃ tathattāya upanessati yathāhaṃ – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānissāmī’’ti.
‘‘সাধু সাধু, উদাযি! এসো হি তে, উদাযি, মগ্গো পটিলদ্ধো, যো তে ভাৰিতো বহুলীকতো তথা তথা ৰিহরন্তং তথত্তায উপনেস্সতি যথা ত্ৰং – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানিস্সসী’’তি। দসমং।
‘‘Sādhu sādhu, udāyi! Eso hi te, udāyi, maggo paṭiladdho, yo te bhāvito bahulīkato tathā tathā viharantaṃ tathattāya upanessati yathā tvaṃ – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānissasī’’ti. Dasamaṃ.
উদাযিৰগ্গো ততিযো।
Udāyivaggo tatiyo.
তস্সুদ্দানং –
Tassuddānaṃ –
বোধায দেসনা ঠানা, অযোনিসো চাপরিহানী।
Bodhāya desanā ṭhānā, ayoniso cāparihānī;
খযো নিরোধো নিব্বেধো, একধম্মো উদাযিনাতি॥
Khayo nirodho nibbedho, ekadhammo udāyināti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. উদাযিসুত্তৰণ্ণনা • 10. Udāyisuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১০. উদাযিসুত্তৰণ্ণনা • 10. Udāyisuttavaṇṇanā
