| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
9. උදායීසුත්‌තං
9. Udāyīsuttaṃ
159. එවං මෙ සුතං – එකං සමයං භගවා කොසම්‌බියං විහරති ඝොසිතාරාමෙ. තෙන ඛො පන සමයෙන ආයස්‌මා උදායී මහතියා ගිහිපරිසාය පරිවුතො ධම්‌මං දෙසෙන්‌තො නිසින්‌නො හොති. අද්‌දසා ඛො ආයස්‌මා ආනන්‌දො ආයස්‌මන්‌තං උදායිං මහතියා ගිහිපරිසාය පරිවුතං ධම්‌මං දෙසෙන්‌තං නිසින්‌නං. දිස්‌වා යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො ආයස්‌මා ආනන්‌දො භගවන්‌තං එතදවොච – ‘‘ආයස්‌මා, භන්‌තෙ, උදායී මහතියා ගිහිපරිසාය පරිවුතො ධම්‌මං දෙසෙතී’’ති 1.
159. Evaṃ me sutaṃ – ekaṃ samayaṃ bhagavā kosambiyaṃ viharati ghositārāme. Tena kho pana samayena āyasmā udāyī mahatiyā gihiparisāya parivuto dhammaṃ desento nisinno hoti. Addasā kho āyasmā ānando āyasmantaṃ udāyiṃ mahatiyā gihiparisāya parivutaṃ dhammaṃ desentaṃ nisinnaṃ. Disvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘āyasmā, bhante, udāyī mahatiyā gihiparisāya parivuto dhammaṃ desetī’’ti 2.
‘‘න ඛො, ආනන්‌ද , සුකරං පරෙසං ධම්‌මං දෙසෙතුං. පරෙසං, ආනන්‌ද, ධම්‌මං දෙසෙන්‌තෙන පඤ්‌ච ධම්‌මෙ අජ්‌ඣත්‌තං උපට්‌ඨාපෙත්‌වා පරෙසං ධම්‌මො දෙසෙතබ්‌බො. කතමෙ පඤ්‌ච? ‘අනුපුබ්‌බිං කථං 3 කථෙස්‌සාමී’ති පරෙසං ධම්‌මො දෙසෙතබ්‌බො; ‘පරියායදස්‌සාවී කථං කථෙස්‌සාමී’ති පරෙසං ධම්‌මො දෙසෙතබ්‌බො; ‘අනුද්‌දයතං පටිච්‌ච කථං කථෙස්‌සාමී’ති පරෙසං ධම්‌මො දෙසෙතබ්‌බො; ‘න ආමිසන්‌තරො කථං කථෙස්‌සාමී’ති පරෙසං ධම්‌මො දෙසෙතබ්‌බො; ‘අත්‌තානඤ්‌ච පරඤ්‌ච අනුපහච්‌ච කථං කථෙස්‌සාමී’ති පරෙසං ධම්‌මො දෙසෙතබ්‌බො. න ඛො, ආනන්‌ද, සුකරං පරෙසං ධම්‌මං දෙසෙතුං. පරෙසං, ආනන්‌ද, ධම්‌මං දෙසෙන්‌තෙන ඉමෙ පඤ්‌ච ධම්‌මෙ අජ්‌ඣත්‌තං උපට්‌ඨාපෙත්‌වා පරෙසං ධම්‌මො දෙසෙතබ්‌බො’’ති. නවමං.
‘‘Na kho, ānanda , sukaraṃ paresaṃ dhammaṃ desetuṃ. Paresaṃ, ānanda, dhammaṃ desentena pañca dhamme ajjhattaṃ upaṭṭhāpetvā paresaṃ dhammo desetabbo. Katame pañca? ‘Anupubbiṃ kathaṃ 4 kathessāmī’ti paresaṃ dhammo desetabbo; ‘pariyāyadassāvī kathaṃ kathessāmī’ti paresaṃ dhammo desetabbo; ‘anuddayataṃ paṭicca kathaṃ kathessāmī’ti paresaṃ dhammo desetabbo; ‘na āmisantaro kathaṃ kathessāmī’ti paresaṃ dhammo desetabbo; ‘attānañca parañca anupahacca kathaṃ kathessāmī’ti paresaṃ dhammo desetabbo. Na kho, ānanda, sukaraṃ paresaṃ dhammaṃ desetuṃ. Paresaṃ, ānanda, dhammaṃ desentena ime pañca dhamme ajjhattaṃ upaṭṭhāpetvā paresaṃ dhammo desetabbo’’ti. Navamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 9. උදායීසුත්‌තවණ්‌ණනා • 9. Udāyīsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / (16) 1. සද්‌ධම්‌මවග්‌ගො • (16) 1. Saddhammavaggo
