| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. උදායිසුත්‌තං
10. Udāyisuttaṃ
211. එකං සමයං භගවා සුම්‌භෙසු විහරති සෙතකං නාම සුම්‌භානං නිගමො. අථ ඛො ආයස්‌මා උදායී යෙන භගවා තෙනුපසඞ්‌කමි…පෙ.… එකමන්‌තං නිසින්‌නො ඛො ආයස්‌මා උදායී භගවන්‌තං එතදවොච –
211. Ekaṃ samayaṃ bhagavā sumbhesu viharati setakaṃ nāma sumbhānaṃ nigamo. Atha kho āyasmā udāyī yena bhagavā tenupasaṅkami…pe… ekamantaṃ nisinno kho āyasmā udāyī bhagavantaṃ etadavoca –
‘‘අච්‌ඡරියං, භන්‌තෙ, අබ්‌භුතං, භන්‌තෙ! යාව බහුකතඤ්‌ච මෙ, භන්‌තෙ, භගවති පෙමඤ්‌ච ගාරවො ච හිරී ච ඔත්‌තප්‌පඤ්‌ච. අහඤ්‌හි, භන්‌තෙ, පුබ්‌බෙ අගාරිකභූතො සමානො අබහුකතො අහොසිං ධම්‌මෙන 1 අබහුකතො සඞ්‌ඝෙන. සො ඛ්‌වාහං භගවති පෙමඤ්‌ච ගාරවඤ්‌ච හිරිඤ්‌ච ඔත්‌තප්‌පඤ්‌ච සම්‌පස්‌සමානො අගාරස්‌මා අනගාරියං පබ්‌බජිතො. තස්‌ස මෙ භගවා ධම්‌මං දෙසෙසි – ‘ඉති රූපං, ඉති රූපස්‌ස සමුදයො, ඉති රූපස්‌ස අත්‌ථඞ්‌ගමො; ඉති වෙදනා…පෙ.… ඉති සඤ්‌ඤා… ඉති සඞ්‌ඛාරා… ඉති විඤ්‌ඤාණං, ඉති විඤ්‌ඤාණස්‌ස සමුදයො, ඉති විඤ්‌ඤාණස්‌ස අත්‌ථඞ්‌ගමො’ති.
‘‘Acchariyaṃ, bhante, abbhutaṃ, bhante! Yāva bahukatañca me, bhante, bhagavati pemañca gāravo ca hirī ca ottappañca. Ahañhi, bhante, pubbe agārikabhūto samāno abahukato ahosiṃ dhammena 2 abahukato saṅghena. So khvāhaṃ bhagavati pemañca gāravañca hiriñca ottappañca sampassamāno agārasmā anagāriyaṃ pabbajito. Tassa me bhagavā dhammaṃ desesi – ‘iti rūpaṃ, iti rūpassa samudayo, iti rūpassa atthaṅgamo; iti vedanā…pe… iti saññā… iti saṅkhārā… iti viññāṇaṃ, iti viññāṇassa samudayo, iti viññāṇassa atthaṅgamo’ti.
‘‘සො ඛ්‌වාහං, භන්‌තෙ, සුඤ්‌ඤාගාරගතො ඉමෙසං පඤ්‌චුපාදානක්‌ඛන්‌ධානං උක්‌කුජ්‌ජාවකුජ්‌ජං සම්‌පරිවත්‌තෙන්‌තො ‘ඉදං දුක්‌ඛ’න්‌ති යථාභූතං අබ්‌භඤ්‌ඤාසිං, ‘අයං දුක්‌ඛසමුදයො’ති යථාභූතං අබ්‌භඤ්‌ඤාසිං, ‘අයං දුක්‌ඛනිරොධො’ති යථාභූතං අබ්‌භඤ්‌ඤාසිං, ‘අයං දුක්‌ඛනිරොධගාමිනී පටිපදා’ති යථාභූතං අබ්‌භඤ්‌ඤාසිං. ධම්‌මො ච මෙ, භන්‌තෙ, අභිසමිතො, මග්‌ගො ච මෙ පටිලද්‌ධො; යො මෙ භාවිතො බහුලීකතො තථා තථා විහරන්‌තං තථත්‌තාය උපනෙස්‌සති යථාහං – ‘ඛීණා ජාති, වුසිතං බ්‍රහ්‌මචරියං, කතං කරණීයං, නාපරං ඉත්‌ථත්‌තායා’ති පජානිස්‌සාමි.
‘‘So khvāhaṃ, bhante, suññāgāragato imesaṃ pañcupādānakkhandhānaṃ ukkujjāvakujjaṃ samparivattento ‘idaṃ dukkha’nti yathābhūtaṃ abbhaññāsiṃ, ‘ayaṃ dukkhasamudayo’ti yathābhūtaṃ abbhaññāsiṃ, ‘ayaṃ dukkhanirodho’ti yathābhūtaṃ abbhaññāsiṃ, ‘ayaṃ dukkhanirodhagāminī paṭipadā’ti yathābhūtaṃ abbhaññāsiṃ. Dhammo ca me, bhante, abhisamito, maggo ca me paṭiladdho; yo me bhāvito bahulīkato tathā tathā viharantaṃ tathattāya upanessati yathāhaṃ – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānissāmi.
‘‘සතිසම්‌බොජ්‌ඣඞ්‌ගො මෙ, භන්‌තෙ, පටිලද්‌ධො, යො මෙ භාවිතො බහුලීකතො තථා තථා විහරන්‌තං තථත්‌තාය උපනෙස්‌සති යථාහං – ‘ඛීණා ජාති, වුසිතං බ්‍රහ්‌මචරියං, කතං කරණීයං, නාපරං ඉත්‌ථත්‌තායා’ති පජානිස්‌සාමි…පෙ.… උපෙක්‌ඛාසම්‌බොජ්‌ඣඞ්‌ගො මෙ, භන්‌තෙ, පටිලද්‌ධො, යො මෙ භාවිතො බහුලීකතො තථා තථා විහරන්‌තං තථත්‌තාය උපනෙස්‌සති යථාහං – ‘ඛීණා ජාති, වුසිතං බ්‍රහ්‌මචරියං, කතං කරණීයං, නාපරං ඉත්‌ථත්‌තායා’ති පජානිස්‌සාමි. අයං ඛො මෙ, භන්‌තෙ, මග්‌ගො පටිලද්‌ධො, යො මෙ භාවිතො බහුලීකතො තථා තථා විහරන්‌තං තථත්‌තාය උපනෙස්‌සති යථාහං – ‘ඛීණා ජාති, වුසිතං බ්‍රහ්‌මචරියං, කතං කරණීයං, නාපරං ඉත්‌ථත්‌තායා’ති පජානිස්‌සාමී’’ති.
‘‘Satisambojjhaṅgo me, bhante, paṭiladdho, yo me bhāvito bahulīkato tathā tathā viharantaṃ tathattāya upanessati yathāhaṃ – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānissāmi…pe… upekkhāsambojjhaṅgo me, bhante, paṭiladdho, yo me bhāvito bahulīkato tathā tathā viharantaṃ tathattāya upanessati yathāhaṃ – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānissāmi. Ayaṃ kho me, bhante, maggo paṭiladdho, yo me bhāvito bahulīkato tathā tathā viharantaṃ tathattāya upanessati yathāhaṃ – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānissāmī’’ti.
‘‘සාධු සාධු, උදායි! එසො හි තෙ, උදායි, මග්‌ගො පටිලද්‌ධො, යො තෙ භාවිතො බහුලීකතො තථා තථා විහරන්‌තං තථත්‌තාය උපනෙස්‌සති යථා ත්‌වං – ‘ඛීණා ජාති, වුසිතං බ්‍රහ්‌මචරියං, කතං කරණීයං, නාපරං ඉත්‌ථත්‌තායා’ති පජානිස්‌සසී’’ති. දසමං.
‘‘Sādhu sādhu, udāyi! Eso hi te, udāyi, maggo paṭiladdho, yo te bhāvito bahulīkato tathā tathā viharantaṃ tathattāya upanessati yathā tvaṃ – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānissasī’’ti. Dasamaṃ.
උදායිවග්‌ගො තතියො.
Udāyivaggo tatiyo.
තස්‌සුද්‌දානං –
Tassuddānaṃ –
බොධාය දෙසනා ඨානා, අයොනිසො චාපරිහානී;
Bodhāya desanā ṭhānā, ayoniso cāparihānī;
ඛයො නිරොධො නිබ්‌බෙධො, එකධම්‌මො උදායිනාති.
Khayo nirodho nibbedho, ekadhammo udāyināti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 10. උදායිසුත්‌තවණ්‌ණනා • 10. Udāyisuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 10. උදායිසුත්‌තවණ්‌ණනා • 10. Udāyisuttavaṇṇanā
