| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
9. உதா³யீஸுத்தவண்ணனா
9. Udāyīsuttavaṇṇanā
29. நவமே உதா³யிந்தி லாளுதா³யித்தே²ரங். ஸுணோமஹங், ஆவுஸோதி, ஆவுஸோ, நாஹங் ப³தி⁴ரோ, ஸுணாமி ப⁴க³வதோ வசனங், பஞ்ஹங் பன உபபரிக்கா²மீதி. அதி⁴சித்தந்தி ஸமாதி⁴விபஸ்ஸனாசித்தங். இத³ங், ப⁴ந்தே, அனுஸ்ஸதிட்டா²னந்தி இத³ங் ஜா²னத்தயஸங்கா²தங் அனுஸ்ஸதிகாரணங். தி³ட்ட²த⁴ம்மஸுக²விஹாராய ஸங்வத்ததீதி இமஸ்மிங்யேவ அத்தபா⁴வே ஸுக²விஹாரத்தா²ய பவத்ததி. ஆலோகஸஞ்ஞந்தி ஆலோகனிமித்தே உப்பன்னஸஞ்ஞங். தி³வா ஸஞ்ஞங் அதி⁴ட்டா²தீதி தி³வாதி ஸஞ்ஞங் ட²பேதி . யதா² தி³வா ததா² ரத்திந்தி யதா²னேன தி³வா ஆலோகஸஞ்ஞா மனஸிகதா, ரத்திம்பி ததே²வ தங் மனஸி கரோதி. யதா² ரத்திங் ததா² தி³வாதி யதா² வானேன ரத்திங் ஆலோகஸஞ்ஞா மனஸிகதா, தி³வாபி தங் ததே²வ மனஸி கரோதி. விவடேனாதி பாகடேன. அபரியோனத்³தே⁴னாதி நீவரணேஹி அனோனத்³தே⁴ன. ஸப்பபா⁴ஸங் சித்தங் பா⁴வேதீதி தி³ப்³ப³சக்கு²ஞாணத்தா²ய ஸஹோபா⁴ஸகங் சித்தங் ப்³ரூஹேதி வட்³டே⁴தி. யங் பன ‘‘ஆலோகஸஞ்ஞங் மனஸி கரோதீ’’தி வுத்தங், தங் தி²னமித்³த⁴வினோத³னாலோகஸஞ்ஞங் ஸந்தா⁴ய வுத்தங், ந தி³ப்³ப³சக்கு²ஞாணாலோகந்தி வேதி³தப்³ப³ங். ஞாணத³ஸ்ஸனப்படிலாபா⁴யாதி தி³ப்³ப³சக்கு²ஸங்கா²தஸ்ஸ ஞாணத³ஸ்ஸனஸ்ஸ படிலாபா⁴ய.
29. Navame udāyinti lāḷudāyittheraṃ. Suṇomahaṃ, āvusoti, āvuso, nāhaṃ badhiro, suṇāmi bhagavato vacanaṃ, pañhaṃ pana upaparikkhāmīti. Adhicittanti samādhivipassanācittaṃ. Idaṃ, bhante, anussatiṭṭhānanti idaṃ jhānattayasaṅkhātaṃ anussatikāraṇaṃ. Diṭṭhadhammasukhavihārāya saṃvattatīti imasmiṃyeva attabhāve sukhavihāratthāya pavattati. Ālokasaññanti ālokanimitte uppannasaññaṃ. Divā saññaṃ adhiṭṭhātīti divāti saññaṃ ṭhapeti . Yathā divā tathā rattinti yathānena divā ālokasaññā manasikatā, rattimpi tatheva taṃ manasi karoti. Yathā rattiṃ tathā divāti yathā vānena rattiṃ ālokasaññā manasikatā, divāpi taṃ tatheva manasi karoti. Vivaṭenāti pākaṭena. Apariyonaddhenāti nīvaraṇehi anonaddhena. Sappabhāsaṃ cittaṃ bhāvetīti dibbacakkhuñāṇatthāya sahobhāsakaṃ cittaṃ brūheti vaḍḍheti. Yaṃ pana ‘‘ālokasaññaṃ manasi karotī’’ti vuttaṃ, taṃ thinamiddhavinodanālokasaññaṃ sandhāya vuttaṃ, na dibbacakkhuñāṇālokanti veditabbaṃ. Ñāṇadassanappaṭilābhāyāti dibbacakkhusaṅkhātassa ñāṇadassanassa paṭilābhāya.
இமமேவ காயந்திஆதீ³ஸு யங் வத்தப்³ப³ங் ஸியா, தங் ஸப்³ப³ங் ஸப்³பா³காரேன வித்தா²ரதோ விஸுத்³தி⁴மக்³கே³ காயக³தாஸதிகம்மட்டா²னே வுத்தங். காமராக³ப்பஹானாயாதி பஞ்சகாமகு³ணிகஸ்ஸ ராக³ஸ்ஸ பஹானத்தா²ய. ஸெய்யதா²பி பஸ்ஸெய்யாதி யதா² பஸ்ஸெய்ய. ஸரீரந்தி மதஸரீரங். ஸிவதி²காய ச²ட்³டி³தந்தி ஸுஸானே அபவித்³த⁴ங். ஏகாஹங் மதஸ்ஸ அஸ்ஸாதி ஏகாஹமதங். த்³வீஹங் மதஸ்ஸ அஸ்ஸாதி த்³வீஹமதங். தீஹங் மதஸ்ஸ அஸ்ஸாதி தீஹமதங். ப⁴ஸ்தா விய வாயுனா உத்³த⁴ங் ஜீவிதபரியாதா³னா யதா²னுக்கமங் ஸமுக்³க³தேன ஸூனபா⁴வேன து⁴மாதத்தா உத்³து⁴மாதங், உத்³து⁴மாதமேவ உத்³து⁴மாதகங். படிகூலத்தா வா குச்சி²தங் உத்³து⁴மாதந்தி உத்³து⁴மாதகங். வினீலங் வுச்சதி விபரிபி⁴ன்னவண்ணங், வினீலமேவ வினீலகங். படிகூலத்தா வா குச்சி²தங் வினீலந்தி வினீலகங். மங்ஸுஸ்ஸத³ட்டா²னேஸு ரத்தவண்ணஸ்ஸ புப்³ப³ஸன்னிசயட்டா²னேஸு ஸேதவண்ணஸ்ஸ யேபு⁴ய்யேன ச நீலவண்ணஸ்ஸ நீலட்டா²னே நீலஸாடகபாருதஸ்ஸேவ ச²வஸரீரஸ்ஸேதங் அதி⁴வசனங். பரிபி⁴ன்னட்டா²னேஹி நவஹி வா வணமுகே²ஹி விஸ்ஸந்த³மானங் புப்³ப³ங் விபுப்³ப³ங், விபுப்³ப³மேவ விபுப்³ப³கங். படிகூலத்தா வா குச்சி²தங் விபுப்³ப³ந்தி விபுப்³ப³கங். விபுப்³ப³கங் ஜாதங் ததா²பா⁴வங் க³தந்தி விபுப்³ப³கஜாதங்.
Imameva kāyantiādīsu yaṃ vattabbaṃ siyā, taṃ sabbaṃ sabbākārena vitthārato visuddhimagge kāyagatāsatikammaṭṭhāne vuttaṃ. Kāmarāgappahānāyāti pañcakāmaguṇikassa rāgassa pahānatthāya. Seyyathāpi passeyyāti yathā passeyya. Sarīranti matasarīraṃ. Sivathikāya chaḍḍitanti susāne apaviddhaṃ. Ekāhaṃ matassa assāti ekāhamataṃ. Dvīhaṃ matassa assāti dvīhamataṃ. Tīhaṃ matassa assāti tīhamataṃ. Bhastā viya vāyunā uddhaṃ jīvitapariyādānā yathānukkamaṃ samuggatena sūnabhāvena dhumātattā uddhumātaṃ, uddhumātameva uddhumātakaṃ. Paṭikūlattā vā kucchitaṃ uddhumātanti uddhumātakaṃ. Vinīlaṃ vuccati viparibhinnavaṇṇaṃ, vinīlameva vinīlakaṃ. Paṭikūlattā vā kucchitaṃ vinīlanti vinīlakaṃ. Maṃsussadaṭṭhānesu rattavaṇṇassa pubbasannicayaṭṭhānesu setavaṇṇassa yebhuyyena ca nīlavaṇṇassa nīlaṭṭhāne nīlasāṭakapārutasseva chavasarīrassetaṃ adhivacanaṃ. Paribhinnaṭṭhānehi navahi vā vaṇamukhehi vissandamānaṃ pubbaṃ vipubbaṃ, vipubbameva vipubbakaṃ. Paṭikūlattā vā kucchitaṃ vipubbanti vipubbakaṃ. Vipubbakaṃ jātaṃ tathābhāvaṃ gatanti vipubbakajātaṃ.
ஸோ இமமேவ காயந்தி ஸோ பி⁴க்கு² இமங் அத்தனோ காயங் தேன காயேன ஸத்³தி⁴ங் ஞாணேன உபஸங்ஹரதி உபனேதி. கத²ங்? அயம்பி கோ² காயோ ஏவங்த⁴ம்மோ ஏவங்பா⁴வீ ஏவங்அனதீதோதி. இத³ங் வுத்தங் ஹோதி – ஆயு உஸ்மா விஞ்ஞாணந்தி இமேஸங் திண்ணங் த⁴ம்மானங் அத்தி²தாய அயங் காயோ டா²னக³மனாதி³க²மோ ஹோதி, இமேஸங் பன விக³மா அயம்பி ஏவங்த⁴ம்மோ ஏவங்பூதிகஸபா⁴வோயேவாதி. ஏவங்பா⁴வீதி ஏவமேவங் உத்³து⁴மாதாதி³பே⁴தோ³ ப⁴விஸ்ஸதி. ஏவங் அனதீதோதி ஏவங் உத்³து⁴மாதாதி³பா⁴வங் அனதிக்கந்தோ.
Soimameva kāyanti so bhikkhu imaṃ attano kāyaṃ tena kāyena saddhiṃ ñāṇena upasaṃharati upaneti. Kathaṃ? Ayampi kho kāyo evaṃdhammo evaṃbhāvī evaṃanatītoti. Idaṃ vuttaṃ hoti – āyu usmā viññāṇanti imesaṃ tiṇṇaṃ dhammānaṃ atthitāya ayaṃ kāyo ṭhānagamanādikhamo hoti, imesaṃ pana vigamā ayampi evaṃdhammo evaṃpūtikasabhāvoyevāti. Evaṃbhāvīti evamevaṃ uddhumātādibhedo bhavissati. Evaṃ anatītoti evaṃ uddhumātādibhāvaṃ anatikkanto.
க²ஜ்ஜமானந்தி உத³ராதீ³ஸு நிஸீதி³த்வா உத³ரமங்ஸஒட்ட²மங்ஸஅக்கி²கமங்ஸாதீ³னி லுஞ்சித்வா லுஞ்சித்வா கா²தி³யமானங். ஸமங்ஸலோஹிதந்தி ஸேஸாவஸேஸமங்ஸலோஹிதயுத்தங். நிம்மங்ஸலோஹிதமக்கி²தந்தி மங்ஸே கீ²ணேபி லோஹிதங் ந ஸுஸ்ஸதி, தங் ஸந்தா⁴ய வுத்தங் – ‘‘நிம்மங்ஸலோஹிதமக்கி²த’’ந்தி. அஞ்ஞேனாதி அஞ்ஞேன தி³ஸாபா⁴கே³ன. ஹத்த²ட்டி²கந்தி சதுஸட்டி²பே⁴த³ம்பி ஹத்த²ட்டி²கங் பாடியேக்கங் பாடியேக்கங் விப்பகிண்ணங். பாத³ட்டி²காதீ³ஸுபி ஏஸேவ நயோ. தேரோவஸ்ஸிகானீதி அதிக்கந்தஸங்வச்ச²ரானி. பூதீனீதி அப்³போ⁴காஸே டி²தானி வாதாதபவுட்டி²ஸம்ப²ஸ்ஸேன தேரோவஸ்ஸிகானேவ பூதீனி ஹொந்தி, அந்தோபூ⁴மிக³தானி பன சிரதரங் திட்ட²ந்தி. சுண்ணகஜாதானீதி சுண்ணவிசுண்ணங் ஹுத்வா விப்பகிண்ணானி. ஸப்³ப³த்த² ஸோ இமமேவாதி வுத்தனயேன க²ஜ்ஜமானாதீ³னங் வஸேன யோஜனா காதப்³பா³. அஸ்மிமானஸமுக்³கா⁴தாயாதி அஸ்மீதி பவத்தஸ்ஸ நவவித⁴ஸ்ஸ மானஸ்ஸ ஸமுக்³கா⁴தத்தா²ய. அனேகதா⁴துபடிவேதா⁴யாதி அனேகதா⁴தூனங் படிவிஜ்ஜ²னத்தா²ய. ஸதோவ அபி⁴க்கமதீதி க³ச்ச²ந்தோ ஸதிபஞ்ஞாஹி ஸமன்னாக³தோவ க³ச்ச²தி. ஸதோவ படிக்கமதீதி படினிவத்தந்தோபி ஸதிபஞ்ஞாஹி ஸமன்னாக³தோவ நிவத்ததி. ஸேஸபதே³ஸுபி ஏஸேவ நயோ. ஸதிஸம்பஜஞ்ஞாயாதி ஸதியா ச ஞாணஸ்ஸ ச அத்தா²ய. இதி இமஸ்மிங் ஸுத்தே ஸதிஞாணானி மிஸ்ஸகானி கதி²தானீதி.
Khajjamānanti udarādīsu nisīditvā udaramaṃsaoṭṭhamaṃsaakkhikamaṃsādīni luñcitvā luñcitvā khādiyamānaṃ. Samaṃsalohitanti sesāvasesamaṃsalohitayuttaṃ. Nimmaṃsalohitamakkhitanti maṃse khīṇepi lohitaṃ na sussati, taṃ sandhāya vuttaṃ – ‘‘nimmaṃsalohitamakkhita’’nti. Aññenāti aññena disābhāgena. Hatthaṭṭhikanti catusaṭṭhibhedampi hatthaṭṭhikaṃ pāṭiyekkaṃ pāṭiyekkaṃ vippakiṇṇaṃ. Pādaṭṭhikādīsupi eseva nayo. Terovassikānīti atikkantasaṃvaccharāni. Pūtīnīti abbhokāse ṭhitāni vātātapavuṭṭhisamphassena terovassikāneva pūtīni honti, antobhūmigatāni pana cirataraṃ tiṭṭhanti. Cuṇṇakajātānīti cuṇṇavicuṇṇaṃ hutvā vippakiṇṇāni. Sabbattha so imamevāti vuttanayena khajjamānādīnaṃ vasena yojanā kātabbā. Asmimānasamugghātāyāti asmīti pavattassa navavidhassa mānassa samugghātatthāya. Anekadhātupaṭivedhāyāti anekadhātūnaṃ paṭivijjhanatthāya. Satova abhikkamatīti gacchanto satipaññāhi samannāgatova gacchati. Satova paṭikkamatīti paṭinivattantopi satipaññāhi samannāgatova nivattati. Sesapadesupi eseva nayo. Satisampajaññāyāti satiyā ca ñāṇassa ca atthāya. Iti imasmiṃ sutte satiñāṇāni missakāni kathitānīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. உதா³யீஸுத்தங் • 9. Udāyīsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9. உதா³யீஸுத்தவண்ணனா • 9. Udāyīsuttavaṇṇanā
