| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
9. உதா³யீஸுத்தவண்ணனா
9. Udāyīsuttavaṇṇanā
29. நவமே தி³ட்ட²த⁴ம்மோ வுச்சதி பச்சக்கோ² அத்தபா⁴வோதி ஆஹ ‘‘இமஸ்மிங்யேவ அத்தபா⁴வே’’தி. ஸுக²விஹாரத்தா²யாதி நிக்கிலேஸதாய நிராமிஸேன ஸுகே²ன விஹாரத்தா²ய. ஆலோகஸஞ்ஞங் மனஸி கரோதீதி ஸூரியசந்த³பஜ்ஜோதமணிஉக்காவிஜ்ஜுஆதீ³னங் ஆலோகோ தி³வா ரத்திஞ்ச உபலத்³தோ⁴, யதா²லத்³த⁴வஸேனேவ ஆலோகங் மனஸி கரோதி, சித்தே ட²பேதி. ததா² ச நங் மனஸி கரோதி, யதா²ஸ்ஸ ஸுபா⁴விதாலோககஸிணஸ்ஸ விய கஸிணாலோகோ யதி²ச்ச²கங் யாவதி³ச்ச²கஞ்ச ஸோ ஆலோகோ ரத்தியங் உபதிட்ட²தி. யேன தத்த² தி³வாஸஞ்ஞங் ட²பேதி, தி³வாரிவ விக³ததி²னமித்³தோ⁴ ஹோதி. தேனாஹ ‘‘யதா² தி³வா ததா² ரத்தி’’ந்தி. தி³வாதி ஸஞ்ஞங் ட²பேதீதி வுத்தனயேன மனஸி கத்வா தி³வாரிவ ஸஞ்ஞங் உப்பாதே³தி. யதா²னேன தி³வா…பே॰… ததே²வ தங் மனஸி கரோதீதி யதா²னேன தி³வா உபலத்³தோ⁴ ஸூரியாலோகோ, ஏவங் ரத்திம்பி தி³வா தி³ட்டா²காரேனேவ தங் ஆலோகங் மனஸி கரோதி. யதா² சனேன ரத்திங்…பே॰… மனஸி கரோதீதி யதா² ரத்தியங் சந்தா³லோகோ உபலத்³தோ⁴, ஏவங் தி³வாபி ரத்திங் தி³ட்டா²காரேனேவ தங் ஆலோகங் மனஸி கரோதி, சித்தே ட²பேதி. விவடேனாதி தி²னமித்³தே⁴ன அபிஹிதத்தா விவடேன. அனோனத்³தே⁴னாதி அஸஞ்சா²தி³தேன. ஸஹோபா⁴ஸகந்தி ஸஞ்ஞாணோபா⁴ஸங். தி³ப்³ப³சக்கு²ஞாணங் ரூபக³தஸ்ஸ தி³ப்³ப³ஸ்ஸ இதரஸ்ஸ ச த³ஸ்ஸனட்டே²ன இத⁴ ஞாணத³ஸ்ஸனந்தி அதி⁴ப்பேதந்தி ஆஹ ‘‘தி³ப்³ப³சக்கு²ஸங்கா²தஸ்ஸா’’திஆதி³.
29. Navame diṭṭhadhammo vuccati paccakkho attabhāvoti āha ‘‘imasmiṃyeva attabhāve’’ti. Sukhavihāratthāyāti nikkilesatāya nirāmisena sukhena vihāratthāya. Ālokasaññaṃ manasi karotīti sūriyacandapajjotamaṇiukkāvijjuādīnaṃ āloko divā rattiñca upaladdho, yathāladdhavaseneva ālokaṃ manasi karoti, citte ṭhapeti. Tathā ca naṃ manasi karoti, yathāssa subhāvitālokakasiṇassa viya kasiṇāloko yathicchakaṃ yāvadicchakañca so āloko rattiyaṃ upatiṭṭhati. Yena tattha divāsaññaṃ ṭhapeti, divāriva vigatathinamiddho hoti. Tenāha ‘‘yathā divā tathā ratti’’nti. Divāti saññaṃ ṭhapetīti vuttanayena manasi katvā divāriva saññaṃ uppādeti. Yathānena divā…pe… tatheva taṃ manasi karotīti yathānena divā upaladdho sūriyāloko, evaṃ rattimpi divā diṭṭhākāreneva taṃ ālokaṃ manasi karoti. Yathā canena rattiṃ…pe… manasi karotīti yathā rattiyaṃ candāloko upaladdho, evaṃ divāpi rattiṃ diṭṭhākāreneva taṃ ālokaṃ manasi karoti, citte ṭhapeti. Vivaṭenāti thinamiddhena apihitattā vivaṭena. Anonaddhenāti asañchāditena. Sahobhāsakanti saññāṇobhāsaṃ. Dibbacakkhuñāṇaṃ rūpagatassa dibbassa itarassa ca dassanaṭṭhena idha ñāṇadassananti adhippetanti āha ‘‘dibbacakkhusaṅkhātassā’’tiādi.
உத்³த⁴ங் ஜீவிதபரியாதா³னாதி ஜீவிதக்க²யதோ உபரி மரணதோ பரங். ஸமுக்³க³தேனாதி உட்டி²தேன. து⁴மாதத்தாதி உத்³த⁴ங் உத்³த⁴ங் து⁴மாதத்தா ஸூனத்தா . ஸேதரத்தேஹி விபரிபி⁴ன்னங் விமிஸ்ஸிதங் நீலங், புரிமவண்ணவிபரிணாமபூ⁴தங் வா நீலங் வினீலங், வினீலமேவ வினீலகந்தி க-காரேன பத³வட்³ட⁴னமாஹ அனத்த²ந்தரதோ யதா² ‘‘பீதகங் லோஹிதக’’ந்தி. படிகூலத்தாதி ஜிகு³ச்ச²னீயத்தா. குச்சி²தங் வினீலங் வினீலகந்தி குச்ச²னத்தோ² வா அயங் க-காரோதி த³ஸ்ஸேதுங் வுத்தங் யதா² ‘‘பாபகோ கித்திஸத்³தோ³ அப்³பு⁴க்³க³ச்ச²தீ’’தி (தீ³॰ நி॰ 3.316; அ॰ நி॰ 5.213). பரிபி⁴ன்னட்டா²னேஹி காகத⁴ங்காதீ³ஹி . விஸ்ஸந்த³மானங் புப்³ப³ந்தி விஸ்ஸவந்தபுப்³ப³ங், தஹங் தஹங் பக்³க⁴ரந்தபுப்³ப³ந்தி அத்தோ². ததா²பா⁴வந்தி விஸ்ஸந்த³மானபுப்³ப³தங்.
Uddhaṃ jīvitapariyādānāti jīvitakkhayato upari maraṇato paraṃ. Samuggatenāti uṭṭhitena. Dhumātattāti uddhaṃ uddhaṃ dhumātattā sūnattā . Setarattehi viparibhinnaṃ vimissitaṃ nīlaṃ, purimavaṇṇavipariṇāmabhūtaṃ vā nīlaṃ vinīlaṃ, vinīlameva vinīlakanti ka-kārena padavaḍḍhanamāha anatthantarato yathā ‘‘pītakaṃ lohitaka’’nti. Paṭikūlattāti jigucchanīyattā. Kucchitaṃ vinīlaṃ vinīlakanti kucchanattho vā ayaṃ ka-kāroti dassetuṃ vuttaṃ yathā ‘‘pāpako kittisaddo abbhuggacchatī’’ti (dī. ni. 3.316; a. ni. 5.213). Paribhinnaṭṭhānehi kākadhaṅkādīhi . Vissandamānaṃ pubbanti vissavantapubbaṃ, tahaṃ tahaṃ paggharantapubbanti attho. Tathābhāvanti vissandamānapubbataṃ.
ஸோ பி⁴க்கூ²தி யோ ‘‘பஸ்ஸெய்ய ஸரீரங் ஸீவதி²காய ச²ட்³டி³த’’ந்தி வுத்தோ, ஸோ பி⁴க்கு². உபஸங்ஹரதி ஸதி³ஸதங். அயம்பி கோ²திஆதி³ உபஸங்ஹரணாகாரத³ஸ்ஸனங். ஆயூதி ரூபஜீவிதிந்த்³ரியங். அரூபஜீவிதிந்த்³ரியங் பனெத்த² விஞ்ஞாணக³திகமேவ. உஸ்மாதி கம்மஜதேஜோ. ஏவங்பூதிகஸபா⁴வோதி ஏவங் அதிவிய பூதிஸபா⁴வோ ஆயுஆதி³விக³மே வியாதி அதி⁴ப்பாயோ. ஏதி³ஸோ ப⁴விஸ்ஸதீதி ஏவங்பா⁴வீதி ஆஹ ‘‘ஏவமேவங் உத்³து⁴மாதாதி³பே⁴தோ³ ப⁴விஸ்ஸதீ’’தி.
So bhikkhūti yo ‘‘passeyya sarīraṃ sīvathikāya chaḍḍita’’nti vutto, so bhikkhu. Upasaṃharati sadisataṃ. Ayampi khotiādi upasaṃharaṇākāradassanaṃ. Āyūti rūpajīvitindriyaṃ. Arūpajīvitindriyaṃ panettha viññāṇagatikameva. Usmāti kammajatejo. Evaṃpūtikasabhāvoti evaṃ ativiya pūtisabhāvo āyuādivigame viyāti adhippāyo. Ediso bhavissatīti evaṃbhāvīti āha ‘‘evamevaṃ uddhumātādibhedo bhavissatī’’ti.
லுஞ்சித்வா லுஞ்சித்வாதி உப்பாடெத்வா உப்பாடெத்வா. ஸேஸாவஸேஸமங்ஸலோஹிதயுத்தந்தி ஸப்³ப³ஸோ அக்கா²தி³தத்தா தஹங் தஹங் ஸேஸேன அப்பாவஸேஸேன மங்ஸலோஹிதேன யுத்தங். அஞ்ஞேன ஹத்த²ட்டி²கந்தி அவிஸேஸேன ஹத்த²ட்டி²கானங் விப்பகிண்ணதா ஜோதிதாதி அனவஸேஸதோ தேஸங் விப்பகிண்ணதங் த³ஸ்ஸெந்தோ ‘‘சதுஸட்டி²பே⁴த³ம்பீ’’திஆதி³மாஹ. தேரோவஸ்ஸிகானீதி திரோவஸ்ஸக³தானி. தானி பன ஸங்வச்ச²ரங் வீதிவத்தானி ஹொந்தீதி ஆஹ ‘‘அதிக்கந்தஸங்வச்ச²ரானீ’’தி. புராணதாய க⁴னபா⁴வவிக³மேன விசுண்ணதா இத⁴ பூதிபா⁴வோ. ஸோ யதா² ஹோதி, தங் த³ஸ்ஸெந்தோ ‘‘அப்³போ⁴காஸே’’திஆதி³மாஹ. அனேகதா⁴தூனந்தி சக்கு²தா⁴துஆதீ³னங், காமதா⁴துஆதீ³னங் வா. ஸதியா ச ஞாணஸ்ஸ ச அத்தா²யாதி ‘‘அபி⁴க்கந்தே படிக்கந்தே ஸம்பஜானகாரீ ஹோதீ’’திஆதி³னா (தீ³॰ நி॰ 1.214; 2.376; ம॰ நி॰ 1.109) வுத்தாய ஸத்தட்டா²னிகாய ஸதியா சேவ தங்ஸம்பயுத்தஞாணஸ்ஸ ச அத்தா²ய.
Luñcitvā luñcitvāti uppāṭetvā uppāṭetvā. Sesāvasesamaṃsalohitayuttanti sabbaso akkhāditattā tahaṃ tahaṃ sesena appāvasesena maṃsalohitena yuttaṃ. Aññena hatthaṭṭhikanti avisesena hatthaṭṭhikānaṃ vippakiṇṇatā jotitāti anavasesato tesaṃ vippakiṇṇataṃ dassento ‘‘catusaṭṭhibhedampī’’tiādimāha. Terovassikānīti tirovassagatāni. Tāni pana saṃvaccharaṃ vītivattāni hontīti āha ‘‘atikkantasaṃvaccharānī’’ti. Purāṇatāya ghanabhāvavigamena vicuṇṇatā idha pūtibhāvo. So yathā hoti, taṃ dassento ‘‘abbhokāse’’tiādimāha. Anekadhātūnanti cakkhudhātuādīnaṃ, kāmadhātuādīnaṃ vā. Satiyā ca ñāṇassa ca atthāyāti ‘‘abhikkante paṭikkante sampajānakārī hotī’’tiādinā (dī. ni. 1.214; 2.376; ma. ni. 1.109) vuttāya sattaṭṭhānikāya satiyā ceva taṃsampayuttañāṇassa ca atthāya.
உதா³யீஸுத்தவண்ணனா நிட்டி²தா.
Udāyīsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. உதா³யீஸுத்தங் • 9. Udāyīsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. உதா³யீஸுத்தவண்ணனா • 9. Udāyīsuttavaṇṇanā
