| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
៩. ឧទាយីសុត្តវណ្ណនា
9. Udāyīsuttavaṇṇanā
១៥៩. នវមេ អនុបុព្ពិំ កថំ កថេស្សាមីតិ ទានានន្តរំ សីលំ, សីលានន្តរំ សគ្គន្តិ ឯវំ ទេសនានុបុព្ពិំ កថំ វា, យំ យំ សុត្តបទំ វា គាថាបទំ វា និក្ខិត្តំ ហោតិ, តស្ស តស្ស អនុរូបកថំ កថេស្សាមីតិ ចិត្តំ ឧបដ្ឋបេត្វា បរេសំ ធម្មោ ទេសេតព្ពោ។ បរិយាយទស្សាវីតិ តស្ស តស្ស អត្ថស្ស តំ តំ ការណំ ទស្សេន្តោ។ ការណញ្ហិ ឥធ បរិយាយោតិ វុត្តំ។ អនុទ្ទយតំ បដិច្ចាតិ ‘‘មហាសម្ពាធប្បត្តេ សត្តេ សម្ពាធតោ មោចេស្សាមី’’តិ អនុកម្បំ អាគម្ម។ ន អាមិសន្តរោតិ ន អាមិសហេតុកោ, អត្តនោ ចតុបច្ចយលាភំ អនាសីសន្តោតិ អត្ថោ។ អត្តានញ្ច បរញ្ច អនុបហច្ចាតិ អត្តុក្កំសនបរវម្ភនាទិវសេន អត្តានញ្ច បរញ្ច គុណុបឃាតេន អនុបហន្ត្វា។
159. Navame anupubbiṃ kathaṃ kathessāmīti dānānantaraṃ sīlaṃ, sīlānantaraṃ sagganti evaṃ desanānupubbiṃ kathaṃ vā, yaṃ yaṃ suttapadaṃ vā gāthāpadaṃ vā nikkhittaṃ hoti, tassa tassa anurūpakathaṃ kathessāmīti cittaṃ upaṭṭhapetvā paresaṃ dhammo desetabbo. Pariyāyadassāvīti tassa tassa atthassa taṃ taṃ kāraṇaṃ dassento. Kāraṇañhi idha pariyāyoti vuttaṃ. Anuddayataṃ paṭiccāti ‘‘mahāsambādhappatte satte sambādhato mocessāmī’’ti anukampaṃ āgamma. Na āmisantaroti na āmisahetuko, attano catupaccayalābhaṃ anāsīsantoti attho. Attānañca parañca anupahaccāti attukkaṃsanaparavambhanādivasena attānañca parañca guṇupaghātena anupahantvā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៩. ឧទាយីសុត្តំ • 9. Udāyīsuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / (១៦) ១. សទ្ធម្មវគ្គោ • (16) 1. Saddhammavaggo
