| Library / Tipiṭaka / திபிடக • Tipiṭaka / சூளவக்³க³-அட்ட²கதா² • Cūḷavagga-aṭṭhakathā |
உத்³தே³ஸப⁴த்தகதா²
Uddesabhattakathā
உத்³தே³ஸப⁴த்தாதீ³ஸு பன அயங் நயோ – ரஞ்ஞா வா ராஜமஹாமத்தேன வா ஸங்க⁴தோ உத்³தி³ஸித்வா ‘‘எத்தகே பி⁴க்கூ² ஆனேதா²’’தி பஹிதே காலங் கோ⁴ஸெத்வா டி²திகா புச்சி²தப்³பா³. ஸசே அத்தி², ததோ பட்டா²ய கா³ஹேதப்³ப³ங்; நோ சே, தே²ராஸனதோ பட்டா²ய கா³ஹேதப்³ப³ங். உத்³தே³ஸகேன பிண்ட³பாதிகானம்பி ந அதிக்காமேதப்³ப³ங். தே பன து⁴தங்க³ங் ரக்க²ந்தா ஸயமேவ அதிக்கமிஸ்ஸந்தி; ஏவங் கா³ஹியமானே அலஸஜாதிகா மஹாதே²ரா பச்சா² ஆக³ச்ச²ந்தி, ‘‘ப⁴ந்தே, வீஸதிவஸ்ஸானங் கா³ஹியதி, தும்ஹாகங் டி²திகா அதிக்கந்தா’’தி ந வத்தப்³பா³, டி²திகங் ட²பெத்வா தேஸங் கா³ஹெத்வா பச்சா² டி²திகாய கா³ஹேதப்³ப³ங். ‘‘அஸுகவிஹாரே ப³ஹுங் உத்³தே³ஸப⁴த்தங் உப்பன்ன’’ந்தி ஸுத்வா யோஜனந்தரிகவிஹாரதோபி பி⁴க்கூ² ஆக³ச்ச²ந்தி, ஸம்பத்தஸம்பத்தானங் டி²தட்டா²னதோ பட்டா²ய கா³ஹேதப்³ப³ங். அஸம்பத்தானம்பி உபசாரஸீமங் பவிட்டா²னங் அந்தேவாஸிகாதீ³ஸு க³ண்ஹந்தேஸு கா³ஹேதப்³ப³மேவ. ப³ஹிஉபசாரஸீமாய டி²தானங் கா³ஹேதா²தி வத³ந்தி, ந கா³ஹேதப்³ப³ங். ஸசே பன உபசாரஸீமங் ஓக்கந்தேஹி ஏகாப³த்³தா⁴ ஹுத்வா அத்தனோ விஹாரத்³வாரே வா அந்தோவிஹாரேயேவ வா ஹொந்தி, பரிஸாவஸேன வட்³டி⁴தா நாம ஸீமா ஹோதி, தஸ்மா கா³ஹேதப்³ப³ங். ஸங்க⁴னவகஸ்ஸ தி³ன்னேபி பச்சா² ஆக³தானங் கா³ஹேதப்³ப³மேவ . து³தியபா⁴கே³ பன தே²ராஸனங் ஆருள்ஹே புன ஆக³தானங் பட²மபா⁴கோ³ ந பாபுணாதி, து³தியபா⁴க³தோ வஸ்ஸக்³கே³ன கா³ஹேதப்³ப³ங்.
Uddesabhattādīsu pana ayaṃ nayo – raññā vā rājamahāmattena vā saṅghato uddisitvā ‘‘ettake bhikkhū ānethā’’ti pahite kālaṃ ghosetvā ṭhitikā pucchitabbā. Sace atthi, tato paṭṭhāya gāhetabbaṃ; no ce, therāsanato paṭṭhāya gāhetabbaṃ. Uddesakena piṇḍapātikānampi na atikkāmetabbaṃ. Te pana dhutaṅgaṃ rakkhantā sayameva atikkamissanti; evaṃ gāhiyamāne alasajātikā mahātherā pacchā āgacchanti, ‘‘bhante, vīsativassānaṃ gāhiyati, tumhākaṃ ṭhitikā atikkantā’’ti na vattabbā, ṭhitikaṃ ṭhapetvā tesaṃ gāhetvā pacchā ṭhitikāya gāhetabbaṃ. ‘‘Asukavihāre bahuṃ uddesabhattaṃ uppanna’’nti sutvā yojanantarikavihāratopi bhikkhū āgacchanti, sampattasampattānaṃ ṭhitaṭṭhānato paṭṭhāya gāhetabbaṃ. Asampattānampi upacārasīmaṃ paviṭṭhānaṃ antevāsikādīsu gaṇhantesu gāhetabbameva. Bahiupacārasīmāya ṭhitānaṃ gāhethāti vadanti, na gāhetabbaṃ. Sace pana upacārasīmaṃ okkantehi ekābaddhā hutvā attano vihāradvāre vā antovihāreyeva vā honti, parisāvasena vaḍḍhitā nāma sīmā hoti, tasmā gāhetabbaṃ. Saṅghanavakassa dinnepi pacchā āgatānaṃ gāhetabbameva . Dutiyabhāge pana therāsanaṃ āruḷhe puna āgatānaṃ paṭhamabhāgo na pāpuṇāti, dutiyabhāgato vassaggena gāhetabbaṃ.
ஏகஸ்மிங் விஹாரே ஏகங் ப⁴த்துத்³தே³ஸட்டா²னங் பரிச்சி²ந்தி³த்வா கா³வுதப்பமாணாயபி உபசாரஸீமாய யத்த² கத்த²சி ஆரோசிதங் உத்³தே³ஸப⁴த்தங், தஸ்மிங்யேவ ப⁴த்துத்³தே³ஸட்டா²னே கா³ஹேதப்³ப³ங். ஏகோ ஏகஸ்ஸ பி⁴க்கு²னோ பஹிணாதி ‘‘ஸ்வேபி ஸங்க⁴தோ உத்³தி³ஸித்வா த³ஸ பி⁴க்கூ² பஹிணதா²’’தி, தேன ஸோ அத்தோ² ப⁴த்துத்³தே³ஸகஸ்ஸ ஆரோசேதப்³போ³. ஸசே தங் தி³வஸங் பமுஸ்ஸதி, து³தியதி³வஸே பாதோவ ஆரோசேதப்³போ³. அத² பமுஸ்ஸித்வாவ பிண்டா³ய பவிஸந்தோ ஸரதி, யாவ உபசாரஸீமங் நாதிக்கமதி, தாவ யா போ⁴ஜனஸாலாய பகதிட்டி²திகா, தஸ்ஸாயேவ வஸேன கா³ஹேதப்³ப³ங். ஸசேபி உபசாரஸீமங் அதிக்கந்தா பி⁴க்கூ² ச உபசாரஸீமட்ட²கேஹி ஏகாப³த்³தா⁴ ஹொந்தி, அஞ்ஞமஞ்ஞங் த்³வாத³ஸஹத்த²ந்தரங் அவிஜஹித்வா க³ச்ச²ந்தி, பகதிட்டி²திகாய வஸேன கா³ஹேதப்³ப³ங். பி⁴க்கூ²னங் பன தாதி³ஸே ஏகாப³த்³தே⁴ அஸதி ப³ஹிஉபசாரஸீமாய யஸ்மிங் டா²னே ஸரதி, தத்த² நவங் டி²திகங் கத்வா கா³ஹேதப்³ப³ங். அந்தோகா³மே ஆஸனஸாலாய ஸரந்தேன ஆஸனஸாலாய டி²திகாய கா³ஹேதப்³ப³ங். யத்த² கத்த²சி ஸரித்வா கா³ஹேதப்³ப³மேவ, அகா³ஹேதுங் ந வட்டதி. ந ஹி ஏதங் து³தியதி³வஸே லப்³ப⁴தீதி.
Ekasmiṃ vihāre ekaṃ bhattuddesaṭṭhānaṃ paricchinditvā gāvutappamāṇāyapi upacārasīmāya yattha katthaci ārocitaṃ uddesabhattaṃ, tasmiṃyeva bhattuddesaṭṭhāne gāhetabbaṃ. Eko ekassa bhikkhuno pahiṇāti ‘‘svepi saṅghato uddisitvā dasa bhikkhū pahiṇathā’’ti, tena so attho bhattuddesakassa ārocetabbo. Sace taṃ divasaṃ pamussati, dutiyadivase pātova ārocetabbo. Atha pamussitvāva piṇḍāya pavisanto sarati, yāva upacārasīmaṃ nātikkamati, tāva yā bhojanasālāya pakatiṭṭhitikā, tassāyeva vasena gāhetabbaṃ. Sacepi upacārasīmaṃ atikkantā bhikkhū ca upacārasīmaṭṭhakehi ekābaddhā honti, aññamaññaṃ dvādasahatthantaraṃ avijahitvā gacchanti, pakatiṭṭhitikāya vasena gāhetabbaṃ. Bhikkhūnaṃ pana tādise ekābaddhe asati bahiupacārasīmāya yasmiṃ ṭhāne sarati, tattha navaṃ ṭhitikaṃ katvā gāhetabbaṃ. Antogāme āsanasālāya sarantena āsanasālāya ṭhitikāya gāhetabbaṃ. Yattha katthaci saritvā gāhetabbameva, agāhetuṃ na vaṭṭati. Na hi etaṃ dutiyadivase labbhatīti.
ஸசே ஸகவிஹாரதோ அஞ்ஞங் விஹாரங் க³ச்ச²ந்தே பி⁴க்கூ² தி³ஸ்வா கோசி உத்³தே³ஸப⁴த்தங் உத்³தி³ஸாபேதி, யாவ அந்தோஉபசாரே வா உபசாரஸீமட்ட²கேஹி ஸத்³தி⁴ங் வுத்தனயேன ஏகாப³த்³தா⁴ வா ஹொந்தி, தாவ ஸகவிஹாரே டி²திகாவஸேனேவ கா³ஹேதப்³ப³ங். ப³ஹிஉபசாரே டி²தானங் தி³ன்னங் பன ‘‘ஸங்க⁴தோ ப⁴ந்தே எத்தகே நாம பி⁴க்கூ² உத்³தி³ஸதா²’’தி வுத்தே ஸம்பத்தானங் கா³ஹேதப்³ப³ங். தத்த² த்³வாத³ஸஹத்த²ந்தரங் அவிஜஹித்வா ஏகாப³த்³த⁴னயேன தூ³ரே டி²தாபி ஸம்பத்தாயேவாதி வேதி³தப்³ப³ங். ஸசே யங் விஹாரங் க³ச்ச²ந்தி, தத்த² பவிட்டா²னங் ஆரோசெந்தி, தஸ்ஸ விஹாரஸ்ஸ டி²திகாவஸேன கா³ஹேதப்³ப³ங். ஸசேபி கா³மத்³வாரே வா வீதி²யங் வா சதுக்கே வா அந்தரக⁴ரே வா பி⁴க்கூ² தி³ஸ்வா கோசி ஸங்கு⁴த்³தே³ஸங் ஆரோசேதி, தஸ்மிங் தஸ்மிங் டா²னே அந்தோஉபசாரக³தானங் கா³ஹேதப்³ப³ங்.
Sace sakavihārato aññaṃ vihāraṃ gacchante bhikkhū disvā koci uddesabhattaṃ uddisāpeti, yāva antoupacāre vā upacārasīmaṭṭhakehi saddhiṃ vuttanayena ekābaddhā vā honti, tāva sakavihāre ṭhitikāvaseneva gāhetabbaṃ. Bahiupacāre ṭhitānaṃ dinnaṃ pana ‘‘saṅghato bhante ettake nāma bhikkhū uddisathā’’ti vutte sampattānaṃ gāhetabbaṃ. Tattha dvādasahatthantaraṃ avijahitvā ekābaddhanayena dūre ṭhitāpi sampattāyevāti veditabbaṃ. Sace yaṃ vihāraṃ gacchanti, tattha paviṭṭhānaṃ ārocenti, tassa vihārassa ṭhitikāvasena gāhetabbaṃ. Sacepi gāmadvāre vā vīthiyaṃ vā catukke vā antaraghare vā bhikkhū disvā koci saṅghuddesaṃ āroceti, tasmiṃ tasmiṃ ṭhāne antoupacāragatānaṃ gāhetabbaṃ.
க⁴ரூபசாரோ செத்த² ‘‘ஏகங் க⁴ரங் ஏகூபசாரங், ஏகங் க⁴ரங் நானூபசாரங், நானாக⁴ரங் ஏகூபசாரங், நானாக⁴ரங் நானூபசார’’ந்தி இமேஸங் வஸேன வேதி³தப்³போ³. தத்த² யங் ஏககுலஸ்ஸ க⁴ரங் ஏகவளஞ்ஜங் ஹோதி, தங் ஸுப்பபாதபரிச்சே²த³ஸ்ஸ அந்தோ ஏகூபசாரங் நாம. தத்து²ப்பன்னோ உத்³தே³ஸலாபோ⁴ தஸ்மிங் உபசாரே பி⁴க்கா²சாரவத்தேனபி டி²தானங் ஸப்³பே³ஸங் பாபுணாதி, ஏதங் ‘‘ஏகங் க⁴ரங் ஏகூபசாரங்’’ நாம.
Gharūpacāro cettha ‘‘ekaṃ gharaṃ ekūpacāraṃ, ekaṃ gharaṃ nānūpacāraṃ, nānāgharaṃ ekūpacāraṃ, nānāgharaṃ nānūpacāra’’nti imesaṃ vasena veditabbo. Tattha yaṃ ekakulassa gharaṃ ekavaḷañjaṃ hoti, taṃ suppapātaparicchedassa anto ekūpacāraṃ nāma. Tatthuppanno uddesalābho tasmiṃ upacāre bhikkhācāravattenapi ṭhitānaṃ sabbesaṃ pāpuṇāti, etaṃ ‘‘ekaṃ gharaṃ ekūpacāraṃ’’ nāma.
யங் பன ஏகங் க⁴ரங் த்³வின்னங் ப⁴ரியானங் ஸுக²விஹாரத்தா²ய மஜ்ஜே² பி⁴த்திங் உட்டா²பெத்வா நானாத்³வாரவளஞ்ஜங் கதங், தத்து²ப்பன்னோ உத்³தே³ஸலாபோ⁴ பி⁴த்திஅந்தரிகஸ்ஸ ந பாபுணாதி, தஸ்மிங் தஸ்மிங் டா²னே நிஸின்னஸ்ஸேவ பாபுணாதி, ஏதங் ‘‘ஏகங் க⁴ரங் நானூபசாரங்’’ நாம.
Yaṃ pana ekaṃ gharaṃ dvinnaṃ bhariyānaṃ sukhavihāratthāya majjhe bhittiṃ uṭṭhāpetvā nānādvāravaḷañjaṃ kataṃ, tatthuppanno uddesalābho bhittiantarikassa na pāpuṇāti, tasmiṃ tasmiṃ ṭhāne nisinnasseva pāpuṇāti, etaṃ ‘‘ekaṃ gharaṃ nānūpacāraṃ’’ nāma.
யஸ்மிங் பன க⁴ரே ப³ஹூ பி⁴க்கூ² நிமந்தெத்வா அந்தோகே³ஹதோ பட்டா²ய ஏகாப³த்³தே⁴ கத்வா படிவிஸ்ஸகக⁴ரானிபி பூரெத்வா நிஸீதா³பெந்தி, தத்து²ப்பன்னோ உத்³தே³ஸலாபோ⁴ ஸப்³பே³ஸங் பாபுணாதி. யம்பி நானாகுலஸ்ஸ நிவேஸனங் மஜ்ஜே² பி⁴த்திங் அகத்வா ஏகத்³வாரேனேவ வளஞ்ஜந்தி, தத்ராபி ஏஸேவ நயோ. ஏதங் ‘‘நானாக⁴ரங் ஏகூபசாரங்’’ நாம.
Yasmiṃ pana ghare bahū bhikkhū nimantetvā antogehato paṭṭhāya ekābaddhe katvā paṭivissakagharānipi pūretvā nisīdāpenti, tatthuppanno uddesalābho sabbesaṃ pāpuṇāti. Yampi nānākulassa nivesanaṃ majjhe bhittiṃ akatvā ekadvāreneva vaḷañjanti, tatrāpi eseva nayo. Etaṃ ‘‘nānāgharaṃ ekūpacāraṃ’’ nāma.
யோ பன நானானிவேஸனேஸு நிஸின்னானங் பி⁴க்கூ²னங் உத்³தே³ஸலாபோ⁴ உப்பஜ்ஜதி, கிஞ்சாபி பி⁴த்திச்சி²த்³தே³ன பி⁴க்கூ² தி³ஸ்ஸந்தி, தஸ்மிங் தஸ்மிங் நிவேஸனே நிஸின்னானங்யேவ பாபுணாதி, ஏதங் ‘‘நானாக⁴ரங் நானூபசாரங்’’ நாம.
Yo pana nānānivesanesu nisinnānaṃ bhikkhūnaṃ uddesalābho uppajjati, kiñcāpi bhitticchiddena bhikkhū dissanti, tasmiṃ tasmiṃ nivesane nisinnānaṃyeva pāpuṇāti, etaṃ ‘‘nānāgharaṃ nānūpacāraṃ’’ nāma.
யோ பன கா³மத்³வாரவீதி²சதுக்கேஸு அஞ்ஞதரஸ்மிங் டா²னே உத்³தே³ஸப⁴த்தங் லபி⁴த்வா அஞ்ஞஸ்மிங் பி⁴க்கு²ஸ்மிங் அஸதி அத்தனோவ பாபுணாபெத்வா து³தியதி³வஸேபி தஸ்மிங்யேவ டா²னே அஞ்ஞங் லப⁴தி, தேன யங் அஞ்ஞங் நவகங் வா வுட்³ட⁴ங் வா பி⁴க்கு²ங் பஸ்ஸதி, தஸ்ஸ கா³ஹேதப்³ப³ங். ஸசே கோசி நத்தி², அத்தனோவ பாபெத்வா பு⁴ஞ்ஜிதப்³ப³ங்.
Yo pana gāmadvāravīthicatukkesu aññatarasmiṃ ṭhāne uddesabhattaṃ labhitvā aññasmiṃ bhikkhusmiṃ asati attanova pāpuṇāpetvā dutiyadivasepi tasmiṃyeva ṭhāne aññaṃ labhati, tena yaṃ aññaṃ navakaṃ vā vuḍḍhaṃ vā bhikkhuṃ passati, tassa gāhetabbaṃ. Sace koci natthi, attanova pāpetvā bhuñjitabbaṃ.
ஸசே ஆஸனஸாலாய நிஸீதி³த்வா காலங் படிமானெந்தேஸு பி⁴க்கூ²ஸு கோசி ஆக³ந்த்வா ‘‘ஸங்கு⁴த்³தே³ஸபத்தங் தே³த², உத்³தே³ஸபத்தங் தே³த², ஸங்க⁴தோ உத்³தி³ஸித்வா பத்தங் தே³த², ஸங்கி⁴கங் பத்தங் தே³தா²’’தி வா வத³தி, உத்³தே³ஸபத்தங் டி²திகாய கா³ஹெத்வா தா³தப்³ப³ங். ‘‘ஸங்கு⁴த்³தே³ஸபி⁴க்கு²ங் தே³த², ஸங்க⁴தோ உத்³தி³ஸித்வா பி⁴க்கு²ங் தே³த², ஸங்கி⁴கங் பி⁴க்கு²ங் தே³தா²’’தி வுத்தேபி ஏஸேவ நயோ.
Sace āsanasālāya nisīditvā kālaṃ paṭimānentesu bhikkhūsu koci āgantvā ‘‘saṅghuddesapattaṃ detha, uddesapattaṃ detha, saṅghato uddisitvā pattaṃ detha, saṅghikaṃ pattaṃ dethā’’ti vā vadati, uddesapattaṃ ṭhitikāya gāhetvā dātabbaṃ. ‘‘Saṅghuddesabhikkhuṃ detha, saṅghato uddisitvā bhikkhuṃ detha, saṅghikaṃ bhikkhuṃ dethā’’ti vuttepi eseva nayo.
உத்³தே³ஸகோ பனெத்த² பேஸலோ லஜ்ஜீ மேதா⁴வீ இச்சி²தப்³போ³, தேன திக்க²த்துங் டி²திகங் புச்சி²த்வா ஸசே கோசி டி²திகங் ஜானந்தோ நத்தி², தே²ராஸனதோ கா³ஹேதப்³ப³ங். ஸசே பன ‘‘அஹங் ஜானாமி, த³ஸவஸ்ஸேன லத்³த⁴’’ந்தி கோசி ப⁴ணதி, ‘‘அத்தா²வுஸோ, த³ஸவஸ்ஸா பி⁴க்கூ²’’தி புச்சி²தப்³ப³ங். ஸசே தஸ்ஸ ஸுத்வா ‘‘த³ஸவஸ்ஸம்ஹ த³ஸவஸ்ஸம்ஹா’’தி ப³ஹூ ஆக³ச்ச²ந்தி, ‘‘துய்ஹங் பாபுணாதி, துய்ஹங் பாபுணாதீ’’தி அவத்வா ‘‘ஸப்³பே³ அப்பஸத்³தா³ ஹோதா²’’தி வத்வா படிபாடியா ட²பேதப்³பா³. ட²பெத்வா ‘‘கதி இச்ச²தா²’’தி உபாஸகோ புச்சி²தப்³போ³. ‘‘எத்தகே நாம, ப⁴ந்தே, பி⁴க்கூ²’’தி வுத்தே ‘‘துய்ஹங் பாபுணாதி, துய்ஹங் பாபுணாதீ’’தி அவத்வா ஸப்³ப³னவகஸ்ஸ வஸ்ஸக்³க³ஞ்ச உது ச தி³வஸபா⁴கோ³ ச சா²யா ச புச்சி²தப்³பா³. ஸசே சா²யாயபி புச்சி²யமானாய அஞ்ஞோ வுட்³ட⁴தரோ ஆக³ச்ச²தி, தஸ்ஸ தா³தப்³ப³ங். அத² சா²யங் புச்சி²த்வா ‘‘துய்ஹங் பாபுணாதீ’’தி வுத்தே வுட்³ட⁴தரோ ஆக³ச்ச²தி, ந லப⁴தி. கதா²பபஞ்சேன ஹி நிஸின்னஸ்ஸாபி நித்³தா³யந்தஸ்ஸாபி கா³ஹிதங் ஸுக்³கா³ஹிதங், அதிக்கந்தங் ஸுஅதிக்கந்தங், பா⁴ஜனீயப⁴ண்ட³ஞ்ஹி நாமேதங் ஸம்பத்தஸ்ஸேவ பாபுணாதி, தத்த² ஸம்பத்தபா⁴வோ உபசாரேன பரிச்சி²ந்தி³தப்³போ³. ஆஸனஸாலாய ச அந்தோபரிக்கே²போ உபசாரோ, தஸ்மிங் டி²தஸ்ஸ லாபோ⁴ பாபுணாதீதி.
Uddesako panettha pesalo lajjī medhāvī icchitabbo, tena tikkhattuṃ ṭhitikaṃ pucchitvā sace koci ṭhitikaṃ jānanto natthi, therāsanato gāhetabbaṃ. Sace pana ‘‘ahaṃ jānāmi, dasavassena laddha’’nti koci bhaṇati, ‘‘atthāvuso, dasavassā bhikkhū’’ti pucchitabbaṃ. Sace tassa sutvā ‘‘dasavassamha dasavassamhā’’ti bahū āgacchanti, ‘‘tuyhaṃ pāpuṇāti, tuyhaṃ pāpuṇātī’’ti avatvā ‘‘sabbe appasaddā hothā’’ti vatvā paṭipāṭiyā ṭhapetabbā. Ṭhapetvā ‘‘kati icchathā’’ti upāsako pucchitabbo. ‘‘Ettake nāma, bhante, bhikkhū’’ti vutte ‘‘tuyhaṃ pāpuṇāti, tuyhaṃ pāpuṇātī’’ti avatvā sabbanavakassa vassaggañca utu ca divasabhāgo ca chāyā ca pucchitabbā. Sace chāyāyapi pucchiyamānāya añño vuḍḍhataro āgacchati, tassa dātabbaṃ. Atha chāyaṃ pucchitvā ‘‘tuyhaṃ pāpuṇātī’’ti vutte vuḍḍhataro āgacchati, na labhati. Kathāpapañcena hi nisinnassāpi niddāyantassāpi gāhitaṃ suggāhitaṃ, atikkantaṃ suatikkantaṃ, bhājanīyabhaṇḍañhi nāmetaṃ sampattasseva pāpuṇāti, tattha sampattabhāvo upacārena paricchinditabbo. Āsanasālāya ca antoparikkhepo upacāro, tasmiṃ ṭhitassa lābho pāpuṇātīti.
கோசி ஆஸனஸாலதோ அட்ட² உத்³தே³ஸபத்தே ஆஹராபெத்வா ஸத்த பத்தே பணீதபோ⁴ஜனானங் ஏகங் உத³கஸ்ஸ பூரெத்வா ஆஸனஸாலாயங் பஹிணாதி, க³ஹெத்வா ஆக³தா கிஞ்சி அவத்வா பி⁴க்கூ²னங் ஹத்தே²ஸு பதிட்டா²பெத்வா பக்கமந்தி. யேன யங் லத்³த⁴ங், தஸ்ஸேவ தங் ஹோதி. யேன பன உத³கங் லத்³த⁴ங், தஸ்ஸ அதிக்கந்தம்பி டி²திகங் ட²பெத்வா அஞ்ஞங் உத்³தே³ஸப⁴த்தங் கா³ஹேதப்³ப³ங். தஞ்ச லூக²ங் வா லப⁴து பணீதங் வா திசீவரபரிவாரங் வா, தஸ்ஸேவேதங். ஈதி³ஸோ ஹிஸ்ஸ புஞ்ஞவிஸேஸோ. உத³கங் பன யஸ்மா ஆமிஸங் ந ஹோதி, தஸ்மா அஞ்ஞங் உத்³தே³ஸப⁴த்தங் லப்³ப⁴தி.
Koci āsanasālato aṭṭha uddesapatte āharāpetvā satta patte paṇītabhojanānaṃ ekaṃ udakassa pūretvā āsanasālāyaṃ pahiṇāti, gahetvā āgatā kiñci avatvā bhikkhūnaṃ hatthesu patiṭṭhāpetvā pakkamanti. Yena yaṃ laddhaṃ, tasseva taṃ hoti. Yena pana udakaṃ laddhaṃ, tassa atikkantampi ṭhitikaṃ ṭhapetvā aññaṃ uddesabhattaṃ gāhetabbaṃ. Tañca lūkhaṃ vā labhatu paṇītaṃ vā ticīvaraparivāraṃ vā, tassevetaṃ. Īdiso hissa puññaviseso. Udakaṃ pana yasmā āmisaṃ na hoti, tasmā aññaṃ uddesabhattaṃ labbhati.
ஸசே பன தே க³ஹெத்வா ஆக³தா ‘‘இத³ங் கிர ப⁴ந்தே ஸப்³ப³ங் பா⁴ஜெத்வா பு⁴ஞ்ஜதா²’’தி வத்வா க³ச்ச²ந்தி, ஸப்³பே³ஹி பா⁴ஜெத்வா பு⁴ஞ்ஜித்வா உத³கங் பாதப்³ப³ங். ஸங்க⁴தோ உத்³தி³ஸித்வா ‘‘அட்ட² மஹாதே²ரே தே³த², மஜ்ஜி²மே தே³த², நவகே தே³த², பரிபுண்ணவஸ்ஸஸாமணேரே தே³த², மஜ்ஜி²மபா⁴ணகாத³யோ தே³த², மய்ஹங் ஞாதிபி⁴க்கூ² தே³தா²’’தி வத³ந்தஸ்ஸ பன ‘‘உபாஸக, த்வங் ஏவங் வத³ஸி, டி²திகாய பன தேஸங் ந பாபுணாதீ’’தி வத்வா டி²திகாவஸேனேவ தா³தப்³பா³. த³ஹரஸாமணேரேஹி பன உத்³தே³ஸப⁴த்தேஸு லத்³தே⁴ஸு ஸசே தா³யகானங் க⁴ரே மங்க³லங் ஹோதி, ‘‘தும்ஹாகங் ஆசரியுபஜ்ஜா²யே பேஸேதா²’’தி வத்தப்³ப³ங்.
Sace pana te gahetvā āgatā ‘‘idaṃ kira bhante sabbaṃ bhājetvā bhuñjathā’’ti vatvā gacchanti, sabbehi bhājetvā bhuñjitvā udakaṃ pātabbaṃ. Saṅghato uddisitvā ‘‘aṭṭha mahāthere detha, majjhime detha, navake detha, paripuṇṇavassasāmaṇere detha, majjhimabhāṇakādayo detha, mayhaṃ ñātibhikkhū dethā’’ti vadantassa pana ‘‘upāsaka, tvaṃ evaṃ vadasi, ṭhitikāya pana tesaṃ na pāpuṇātī’’ti vatvā ṭhitikāvaseneva dātabbā. Daharasāmaṇerehi pana uddesabhattesu laddhesu sace dāyakānaṃ ghare maṅgalaṃ hoti, ‘‘tumhākaṃ ācariyupajjhāye pesethā’’ti vattabbaṃ.
யஸ்மிங் பன உத்³தே³ஸப⁴த்தே பட²மபா⁴கோ³ ஸாமணேரானங் பாபுணாதி, அனுபா⁴கோ³ மஹாதே²ரானங், ந தத்த² ஸாமணேரா ‘‘மயங் பட²மபா⁴க³ங் லபி⁴ம்ஹா’’தி புரதோ க³ந்துங் லப⁴ந்தி, யதா²படிபாடியா ஏவ க³ந்தப்³ப³ங். ‘‘ஸங்க⁴தோ உத்³தி³ஸித்வா ‘தும்ஹே ஏதா²’தி வுத்தே ‘மய்ஹங் அஞ்ஞதா³பி ஜானிஸ்ஸஸி, டி²திகா பன ஏவங் க³ச்ச²தீ’’’தி டி²திகாவஸேனேவ கா³ஹேதப்³ப³ங். அத² ‘‘ஸங்கு⁴த்³தே³ஸபத்தங் தே³தா²’’தி வத்வா அகா³ஹிதேயேவ பத்தே யஸ்ஸ கஸ்ஸசி பத்தங் க³ஹெத்வா பூரெத்வா ஆஹரதி, ஆஹடம்பி டி²திகாய ஏவ கா³ஹேதப்³ப³ங்.
Yasmiṃ pana uddesabhatte paṭhamabhāgo sāmaṇerānaṃ pāpuṇāti, anubhāgo mahātherānaṃ, na tattha sāmaṇerā ‘‘mayaṃ paṭhamabhāgaṃ labhimhā’’ti purato gantuṃ labhanti, yathāpaṭipāṭiyā eva gantabbaṃ. ‘‘Saṅghato uddisitvā ‘tumhe ethā’ti vutte ‘mayhaṃ aññadāpi jānissasi, ṭhitikā pana evaṃ gacchatī’’’ti ṭhitikāvaseneva gāhetabbaṃ. Atha ‘‘saṅghuddesapattaṃ dethā’’ti vatvā agāhiteyeva patte yassa kassaci pattaṃ gahetvā pūretvā āharati, āhaṭampi ṭhitikāya eva gāhetabbaṃ.
ஏகோ ‘‘ஸங்கு⁴த்³தே³ஸபத்தங் ஆஹரா’’தி பேஸிதோ ‘‘ப⁴ந்தே, ஏகங் பத்தங் தே³த², நிமந்தனப⁴த்தங் ஆஹரிஸ்ஸாமீ’’தி வத³தி, ஸோ சே உத்³தே³ஸப⁴த்தக⁴ரதோ அயங் ஆக³தோதி ஞத்வா பி⁴க்கூ²ஹி ‘‘நனு த்வங் அஸுகக⁴ரதோ ஆக³தோ’’தி வுத்தோ ‘‘ஆம, ப⁴ந்தே, ந நிமந்தனப⁴த்தங், உத்³தே³ஸப⁴த்த’’ந்தி ப⁴ணதி, டி²திகாய க³ஹேதப்³ப³ங். யோ பன ‘‘ஏகங் பத்தங் ஆஹரா’’தி வுத்தோ ‘‘‘கி’ந்தி வத்வா ஆஹராமீ’’தி வத்வா ‘‘யதா² தே ருச்சதீ’’தி வுத்தோ ஆக³ச்ச²தி, அயங் விஸ்ஸட்ட²தூ³தோ நாம. உத்³தே³ஸபத்தங் வா படிபாடிபத்தங் வா புக்³க³லிகபத்தங் வா யங் இச்ச²தி, தங் தஸ்ஸ தா³தப்³ப³ங். ஏகோ பா³லோ அப்³யத்தோ ‘‘உத்³தே³ஸபத்தங் ஆஹரா’’தி பேஸிதோ வத்துங் ந ஜானாதி, துண்ஹீபூ⁴தோ திட்ட²தி, ஸோ ‘‘கஸ்ஸ ஸந்திகங் ஆக³தோஸீ’’தி வா ‘‘கஸ்ஸ பத்தங் ஹரிஸ்ஸஸீ’’தி வா ந வத்தப்³போ³. ஏவஞ்ஹி வுத்தோ புச்சா²ஸபா⁴கே³ன ‘‘தும்ஹாகங் ஸந்திகங் ஆக³தொம்ஹீ’’தி ‘‘தும்ஹாகங் பத்தங் ஹரிஸ்ஸாமீ’’தி வா வதெ³ய்ய, ததோ தங் பி⁴க்கு²ங் அஞ்ஞே பி⁴க்கூ² ஜிகு³ச்ச²ந்தா ந ஓலோகெய்யுங். ‘‘குஹிங் க³ச்ச²ஸி, கிங் கரொந்தோ ஆஹிண்ட³ஸீ’’தி பன வத்தப்³போ³. தஸ்ஸ ‘‘உத்³தே³ஸபத்தத்தா²ய ஆக³தொம்ஹீ’’தி வத³ந்தஸ்ஸ கா³ஹெத்வா பத்தோ தா³தப்³போ³.
Eko ‘‘saṅghuddesapattaṃ āharā’’ti pesito ‘‘bhante, ekaṃ pattaṃ detha, nimantanabhattaṃ āharissāmī’’ti vadati, so ce uddesabhattagharato ayaṃ āgatoti ñatvā bhikkhūhi ‘‘nanu tvaṃ asukagharato āgato’’ti vutto ‘‘āma, bhante, na nimantanabhattaṃ, uddesabhatta’’nti bhaṇati, ṭhitikāya gahetabbaṃ. Yo pana ‘‘ekaṃ pattaṃ āharā’’ti vutto ‘‘‘ki’nti vatvā āharāmī’’ti vatvā ‘‘yathā te ruccatī’’ti vutto āgacchati, ayaṃ vissaṭṭhadūto nāma. Uddesapattaṃ vā paṭipāṭipattaṃ vā puggalikapattaṃ vā yaṃ icchati, taṃ tassa dātabbaṃ. Eko bālo abyatto ‘‘uddesapattaṃ āharā’’ti pesito vattuṃ na jānāti, tuṇhībhūto tiṭṭhati, so ‘‘kassa santikaṃ āgatosī’’ti vā ‘‘kassa pattaṃ harissasī’’ti vā na vattabbo. Evañhi vutto pucchāsabhāgena ‘‘tumhākaṃ santikaṃ āgatomhī’’ti ‘‘tumhākaṃ pattaṃ harissāmī’’ti vā vadeyya, tato taṃ bhikkhuṃ aññe bhikkhū jigucchantā na olokeyyuṃ. ‘‘Kuhiṃ gacchasi, kiṃ karonto āhiṇḍasī’’ti pana vattabbo. Tassa ‘‘uddesapattatthāya āgatomhī’’ti vadantassa gāhetvā patto dātabbo.
ஏகா கூடட்டி²திகா நாம ஹோதி. ரஞ்ஞோ வா ஹி ராஜமஹாமத்தஸ்ஸ வா கே³ஹே அதிபணீதானி அட்ட² உத்³தே³ஸப⁴த்தானி நிச்சங் தி³ய்யந்தி, தானி ஏகசாரிகப⁴த்தானி கத்வா பி⁴க்கூ² விஸுங் டி²திகாய பரிபு⁴ஞ்ஜந்தி. ஏகச்சே பி⁴க்கூ² ‘‘ஸ்வே தா³னி அம்ஹாகங் பாபுணிஸ்ஸந்தீ’’தி அத்தனோ டி²திகங் ஸல்லக்கெ²த்வா க³தா, தேஸு அனாக³தேஸுயேவ அஞ்ஞே ஆக³ந்துகா பி⁴க்கூ² ஆக³ந்த்வா ஆஸனஸாலாய நிஸீத³ந்தி; தங்க²ணஞ்ஞேவ ராஜபுரிஸா ஆக³ந்த்வா ‘‘பணீதப⁴த்தபத்தே தே³தா²’’தி வத³ந்தி. ஆக³ந்துகா டி²திகங் அஜானந்தா கா³ஹெந்தி. தங்க²ணஞ்ஞேவ ச டி²திகங் ஜானநகபி⁴க்கூ² ஆக³ந்த்வா ‘‘கிங் கா³ஹேதா²’’தி வத³ந்தி. ‘‘ராஜகே³ஹே பணீதப⁴த்த’’ந்தி. ‘‘கதிவஸ்ஸதோ பட்டா²யா’’தி? ‘‘எத்தகவஸ்ஸதோ நாமா’’தி. ‘‘மா கா³ஹேதா²’’தி நிவாரெத்வா டி²திகாய கா³ஹேதப்³ப³ங். கா³ஹிதே ஆக³தேஹிபி பத்ததா³னகாலே ஆக³தேஹிபி தி³ன்னகாலே ஆக³தேஹிபி ராஜகே³ஹதோ பத்தே பூரெத்வா ஆஹடகாலே ஆக³தேஹிபி ராஜா ‘‘அஜ்ஜ பி⁴க்கூ²யேவ ஆக³ச்ச²ந்தூ’’தி பேஸெத்வா பி⁴க்கூ²னங்யேவ ஹத்தே² பிண்ட³பாதங் தே³தி; ஏவங் தி³ன்னபிண்ட³பாதங் க³ஹெத்வா ஆக³தகாலே ஆக³தேஹிபி டி²திகங் ஜானநகபி⁴க்கூ²ஹி ‘‘மா பு⁴ஞ்ஜித்தா²’’தி வாரெத்வா டி²திகாயமேவ கா³ஹேதப்³ப³ங்.
Ekā kūṭaṭṭhitikā nāma hoti. Rañño vā hi rājamahāmattassa vā gehe atipaṇītāni aṭṭha uddesabhattāni niccaṃ diyyanti, tāni ekacārikabhattāni katvā bhikkhū visuṃ ṭhitikāya paribhuñjanti. Ekacce bhikkhū ‘‘sve dāni amhākaṃ pāpuṇissantī’’ti attano ṭhitikaṃ sallakkhetvā gatā, tesu anāgatesuyeva aññe āgantukā bhikkhū āgantvā āsanasālāya nisīdanti; taṅkhaṇaññeva rājapurisā āgantvā ‘‘paṇītabhattapatte dethā’’ti vadanti. Āgantukā ṭhitikaṃ ajānantā gāhenti. Taṅkhaṇaññeva ca ṭhitikaṃ jānanakabhikkhū āgantvā ‘‘kiṃ gāhethā’’ti vadanti. ‘‘Rājagehe paṇītabhatta’’nti. ‘‘Kativassato paṭṭhāyā’’ti? ‘‘Ettakavassato nāmā’’ti. ‘‘Mā gāhethā’’ti nivāretvā ṭhitikāya gāhetabbaṃ. Gāhite āgatehipi pattadānakāle āgatehipi dinnakāle āgatehipi rājagehato patte pūretvā āhaṭakāle āgatehipi rājā ‘‘ajja bhikkhūyeva āgacchantū’’ti pesetvā bhikkhūnaṃyeva hatthe piṇḍapātaṃ deti; evaṃ dinnapiṇḍapātaṃ gahetvā āgatakāle āgatehipi ṭhitikaṃ jānanakabhikkhūhi ‘‘mā bhuñjitthā’’ti vāretvā ṭhitikāyameva gāhetabbaṃ.
அத² நே ராஜா போ⁴ஜெத்வா பத்தேபி நேஸங் பூரெத்வா தே³தி, யங் ஆஹடங் தங் டி²திகாய கா³ஹேதப்³ப³ங். ஸசே பன ‘‘மா துச்ச²ஹத்தா² க³ச்ச²ந்தூ’’தி தோ²கமேவ பத்தேஸு பக்கி²த்தங் ஹோதி, தங் ந கா³ஹேதப்³ப³ங். அத² பு⁴ஞ்ஜித்வா துச்ச²பத்தாவ ஆக³ச்ச²ந்தி, யங் தேஹி பு⁴த்தங், தங் நேஸங் கீ³வா ஹோதீதி மஹாஸுமத்தே²ரோ ஆஹ. மஹாபது³மத்தே²ரோ பனாஹ – ‘‘கீ³வாகிச்சங் எத்த² நத்தி², டி²திகங் பன அஜானந்தேஹி யாவ ஜானநகா ஆக³ச்ச²ந்தி, தாவ நிஸீதி³தப்³ப³ங் ஸியா; ஏவங் ஸந்தேபி பு⁴த்தங் ஸுபு⁴த்தங், இதா³னி பத்தட்டா²னேன கா³ஹேதப்³ப³’’ந்தி.
Atha ne rājā bhojetvā pattepi nesaṃ pūretvā deti, yaṃ āhaṭaṃ taṃ ṭhitikāya gāhetabbaṃ. Sace pana ‘‘mā tucchahatthā gacchantū’’ti thokameva pattesu pakkhittaṃ hoti, taṃ na gāhetabbaṃ. Atha bhuñjitvā tucchapattāva āgacchanti, yaṃ tehi bhuttaṃ, taṃ nesaṃ gīvā hotīti mahāsumatthero āha. Mahāpadumatthero panāha – ‘‘gīvākiccaṃ ettha natthi, ṭhitikaṃ pana ajānantehi yāva jānanakā āgacchanti, tāva nisīditabbaṃ siyā; evaṃ santepi bhuttaṃ subhuttaṃ, idāni pattaṭṭhānena gāhetabba’’nti.
ஏகோ திசீவரபரிவாரோ ஸதக்³க⁴னகோ பிண்ட³பாதோ அவஸ்ஸிகஸ்ஸ பி⁴க்கு²னோ பத்தோ, விஹாரே ச ‘‘ஏவரூபோ பிண்ட³பாதோ அவஸ்ஸிகஸ்ஸ பத்தோ’’தி லிகி²த்வா ட²பேஸுங். அத² ஸட்டி²வஸ்ஸச்சயேன அஞ்ஞோ ததா²ரூபோ பிண்ட³பாதோ உப்பன்னோ, அயங் கிங் அவஸ்ஸிகட்டி²திகாய கா³ஹேதப்³போ³, உதா³ஹு ஸட்டி²வஸ்ஸிகட்டி²திகாயாதி. ஸட்டி²வஸ்ஸிகட்டி²திகாயாதி வுத்தங், அயஞ்ஹி பி⁴க்கு² டி²திகங் க³ஹெத்வாயேவ வட்³டி⁴தோதி.
Eko ticīvaraparivāro satagghanako piṇḍapāto avassikassa bhikkhuno patto, vihāre ca ‘‘evarūpo piṇḍapāto avassikassa patto’’ti likhitvā ṭhapesuṃ. Atha saṭṭhivassaccayena añño tathārūpo piṇḍapāto uppanno, ayaṃ kiṃ avassikaṭṭhitikāya gāhetabbo, udāhu saṭṭhivassikaṭṭhitikāyāti. Saṭṭhivassikaṭṭhitikāyāti vuttaṃ, ayañhi bhikkhu ṭhitikaṃ gahetvāyeva vaḍḍhitoti.
ஏகோ உத்³தே³ஸப⁴த்தங் பு⁴ஞ்ஜித்வா ஸாமணேரோ ஜாதோ, புன தங் ப⁴த்தங் ஸாமணேரட்டி²திகாய பத்தங் க³ண்ஹிதுங் லப⁴தி. அயங் கிர அந்தராப⁴ட்ட²கோ நாம. யோ பன பரிபுண்ணவஸ்ஸோ ஸாமணேரோ ‘‘ஸ்வே உத்³தே³ஸப⁴த்தங் லபி⁴ஸ்ஸதீ’’தி அஜ்ஜேவ உபஸம்பஜ்ஜதி, அதிக்கந்தா தஸ்ஸ டி²திகா. ஏகஸ்ஸ பி⁴க்கு²னோ உத்³தே³ஸப⁴த்தங் பத்தங், பத்தோ சஸ்ஸ ந துச்சோ² ஹோதி, ஸோ அஞ்ஞஸ்ஸ ஸமீபே நிஸின்னஸ்ஸ பத்தங் தா³பேதி, தஞ்சே தெ²ய்யாய ஹரந்தி, கீ³வா ஹோதி . ஸசே பன ஸோ பி⁴க்கு² ‘‘மய்ஹங் பத்தங் த³ம்மீ’’தி ஸயமேவ தே³தி, அஸ்ஸ கீ³வா ந ஹோதி. அதா²பி தேன ப⁴த்தேன அனத்தி²கோ ஹுத்வா ‘‘அலங் மய்ஹங், தவேதங் ப⁴த்தங் த³ம்மி, பத்தங் பேஸெத்வா ஆஹராபேஹீ’’தி அஞ்ஞங் வத³தி, யங் ததோ ஆஹரீயதி ஸப்³ப³ங் பத்தஸாமிகஸ்ஸ ஹோதி. பத்தஞ்சே தெ²ய்யாய ஹரந்தி, ஸுஹடோ; ப⁴த்தஸ்ஸ தி³ன்னத்தா கீ³வா ந ஹோதி.
Eko uddesabhattaṃ bhuñjitvā sāmaṇero jāto, puna taṃ bhattaṃ sāmaṇeraṭṭhitikāya pattaṃ gaṇhituṃ labhati. Ayaṃ kira antarābhaṭṭhako nāma. Yo pana paripuṇṇavasso sāmaṇero ‘‘sve uddesabhattaṃ labhissatī’’ti ajjeva upasampajjati, atikkantā tassa ṭhitikā. Ekassa bhikkhuno uddesabhattaṃ pattaṃ, patto cassa na tuccho hoti, so aññassa samīpe nisinnassa pattaṃ dāpeti, tañce theyyāya haranti, gīvā hoti . Sace pana so bhikkhu ‘‘mayhaṃ pattaṃ dammī’’ti sayameva deti, assa gīvā na hoti. Athāpi tena bhattena anatthiko hutvā ‘‘alaṃ mayhaṃ, tavetaṃ bhattaṃ dammi, pattaṃ pesetvā āharāpehī’’ti aññaṃ vadati, yaṃ tato āharīyati sabbaṃ pattasāmikassa hoti. Pattañce theyyāya haranti, suhaṭo; bhattassa dinnattā gīvā na hoti.
விஹாரே த³ஸ பி⁴க்கூ² ஹொந்தி, தேஸு நவ பிண்ட³பாதிகா, ஏகோ ஸாதி³யனகோ. ‘‘த³ஸ உத்³தே³ஸபத்தே தே³தா²’’தி வுத்தே பிண்ட³பாதிகா க³ஹேதுங் ந இச்ச²ந்தி. இதரோ பி⁴க்கு² ‘‘ஸப்³பா³னி மய்ஹங் பாபுணந்தீ’’தி க³ண்ஹாதி, டி²திகா ந ஹோதி. ஏகேகங் சே பாபெத்வா க³ண்ஹாதி, டி²திகா திட்ட²தி. ஏவங் கா³ஹெத்வா த³ஸஹிபி பத்தேஹி ஆஹராபெத்வா ‘‘ப⁴ந்தே, மய்ஹங் ஸங்க³ஹங் கரோதா²’’தி நவ பத்தே பிண்ட³பாதிகானங் தே³தி, பி⁴க்கு²த³த்தியங் நாமேதங், க³ண்ஹிதுங் வட்டதி.
Vihāre dasa bhikkhū honti, tesu nava piṇḍapātikā, eko sādiyanako. ‘‘Dasa uddesapatte dethā’’ti vutte piṇḍapātikā gahetuṃ na icchanti. Itaro bhikkhu ‘‘sabbāni mayhaṃ pāpuṇantī’’ti gaṇhāti, ṭhitikā na hoti. Ekekaṃ ce pāpetvā gaṇhāti, ṭhitikā tiṭṭhati. Evaṃ gāhetvā dasahipi pattehi āharāpetvā ‘‘bhante, mayhaṃ saṅgahaṃ karothā’’ti nava patte piṇḍapātikānaṃ deti, bhikkhudattiyaṃ nāmetaṃ, gaṇhituṃ vaṭṭati.
ஸசே ஸோ உபாஸகோ ‘‘ப⁴ந்தே, க⁴ரங் ஆக³ந்தப்³ப³’’ந்தி வத³தி, ஸோ ச பி⁴க்கு² தே பி⁴க்கூ² ‘‘ஏத², ப⁴ந்தே, மய்ஹங் ஸஹாயா ஹோதா²’’தி தஸ்ஸ க⁴ரங் க³ச்ச²தி. யங் தத்த² லப⁴தி, ஸப்³ப³ங் தஸ்ஸேவ ஹோதி. இதரே தேன தி³ன்னங் லப⁴ந்தி. அத² நேஸங் க⁴ரேயேவ நிஸீதா³பெத்வா த³க்கி²ணோத³கங் த³த்வா யாகு³க²ஜ்ஜகாதீ³னி தெ³ந்தி, ‘‘ப⁴ந்தே, யங் மனுஸ்ஸா தெ³ந்தி, தங் க³ண்ஹதா²’’தி தஸ்ஸ பி⁴க்கு²னோ வசனேனேவ இதரேஸங் வட்டதி. பு⁴த்தாவீனங் பத்தே பூரெத்வா க³ண்ஹித்வா க³மனத்தா²ய தெ³ந்தி, ஸப்³ப³ங் தஸ்ஸேவ பி⁴க்கு²னோ ஹோதி, தேன தி³ன்னங் இதரேஸங் வட்டதி.
Sace so upāsako ‘‘bhante, gharaṃ āgantabba’’nti vadati, so ca bhikkhu te bhikkhū ‘‘etha, bhante, mayhaṃ sahāyā hothā’’ti tassa gharaṃ gacchati. Yaṃ tattha labhati, sabbaṃ tasseva hoti. Itare tena dinnaṃ labhanti. Atha nesaṃ ghareyeva nisīdāpetvā dakkhiṇodakaṃ datvā yāgukhajjakādīni denti, ‘‘bhante, yaṃ manussā denti, taṃ gaṇhathā’’ti tassa bhikkhuno vacaneneva itaresaṃ vaṭṭati. Bhuttāvīnaṃ patte pūretvā gaṇhitvā gamanatthāya denti, sabbaṃ tasseva bhikkhuno hoti, tena dinnaṃ itaresaṃ vaṭṭati.
யதி³ பன தே விஹாரேயேவ தேன பி⁴க்கு²னா ‘‘ப⁴ந்தே, மய்ஹங் பி⁴க்க²ங் க³ண்ஹத², மனுஸ்ஸானஞ்ச வசனங் காதுங் வட்டதீ’’தி வுத்தா க³ச்ச²ந்தி, யங் தத்த² பு⁴ஞ்ஜந்தி சேவ நீஹரந்தி ச, ஸப்³ப³ங் தங் தஸ்ஸேவ ஸந்தகங். அதா²பி ‘‘மய்ஹங் பி⁴க்க²ங் க³ண்ஹதா²’’தி அவுத்தா ‘‘மனுஸ்ஸானங் வசனங் காதுங் வட்டதீ’’தி க³ச்ச²ந்தி, தத்ர சே ஏகஸ்ஸ மது⁴ரேன ஸரேன அனுமோத³னங் கரொந்தஸ்ஸ ஸுத்வா தே²ரானஞ்ச உபஸமே பஸீதி³த்வா ப³ஹுங் ஸமணபரிக்கா²ரங் தெ³ந்தி, அயங் தே²ரேஸு பஸாதே³ன உப்பன்னோ ‘‘அகதபா⁴கோ³’’ நாம, தஸ்மா ஸப்³பே³ஸங் பாபுணாதி.
Yadi pana te vihāreyeva tena bhikkhunā ‘‘bhante, mayhaṃ bhikkhaṃ gaṇhatha, manussānañca vacanaṃ kātuṃ vaṭṭatī’’ti vuttā gacchanti, yaṃ tattha bhuñjanti ceva nīharanti ca, sabbaṃ taṃ tasseva santakaṃ. Athāpi ‘‘mayhaṃ bhikkhaṃ gaṇhathā’’ti avuttā ‘‘manussānaṃ vacanaṃ kātuṃ vaṭṭatī’’ti gacchanti, tatra ce ekassa madhurena sarena anumodanaṃ karontassa sutvā therānañca upasame pasīditvā bahuṃ samaṇaparikkhāraṃ denti, ayaṃ theresu pasādena uppanno ‘‘akatabhāgo’’ nāma, tasmā sabbesaṃ pāpuṇāti.
ஏகோ ஸங்க⁴தோ உத்³தி³ஸாபெத்வா டி²திகாய கா³ஹிதங் பத்தங் ஹரித்வா பணீதஸ்ஸ கா²த³னீயபோ⁴ஜனீயஸ்ஸ பூரெத்வா ஆஹரித்வா ‘‘இமங், ப⁴ந்தே, ஸப்³போ³ ஸங்கோ⁴ பரிபு⁴ஞ்ஜதூ’’தி தே³தி, ஸப்³பே³ஹி பா⁴ஜெத்வா பரிபு⁴ஞ்ஜிதப்³ப³ங். பத்தஸாமிகஸ்ஸ பன அதிக்கந்தம்பி டி²திகங் ட²பெத்வா அஞ்ஞங் உத்³தே³ஸப⁴த்தங் தா³தப்³ப³ங். அத² ‘‘பட²மங்யேவ ஸப்³ப³ங் ஸங்கி⁴கங் பத்தங் தே³தா²’’தி வத³தி, ஏகஸ்ஸ லஜ்ஜிபி⁴க்கு²னோ ஸந்தகோ பத்தோ தா³தப்³போ³. ஆஹரித்வா ச ‘‘ஸப்³போ³ ஸங்கோ⁴ பரிபு⁴ஞ்ஜதூ’’தி வுத்தே பா⁴ஜெத்வா பரிபு⁴ஞ்ஜிதப்³ப³ங்.
Eko saṅghato uddisāpetvā ṭhitikāya gāhitaṃ pattaṃ haritvā paṇītassa khādanīyabhojanīyassa pūretvā āharitvā ‘‘imaṃ, bhante, sabbo saṅgho paribhuñjatū’’ti deti, sabbehi bhājetvā paribhuñjitabbaṃ. Pattasāmikassa pana atikkantampi ṭhitikaṃ ṭhapetvā aññaṃ uddesabhattaṃ dātabbaṃ. Atha ‘‘paṭhamaṃyeva sabbaṃ saṅghikaṃ pattaṃ dethā’’ti vadati, ekassa lajjibhikkhuno santako patto dātabbo. Āharitvā ca ‘‘sabbo saṅgho paribhuñjatū’’ti vutte bhājetvā paribhuñjitabbaṃ.
ஏகோ பாதியா ப⁴த்தங் ஆஹரித்வா ‘‘ஸங்கு⁴த்³தே³ஸங் த³ம்மீ’’தி வத³தி, ஏகேகங் ஆலோபங் அத³த்வா டி²திகாய ஏகஸ்ஸ யாபனமத்தங் கத்வா தா³தப்³ப³ங். அத² ஸோ ப⁴த்தங் ஆஹரித்வா கிஞ்சி வத்துங் அஜானந்தோ துண்ஹீபூ⁴தோ அச்ச²தி, ‘‘கஸ்ஸ தே ஆனீதங், கஸ்ஸ தா³துகாமோஸீ’’தி ந வத்தப்³ப³ங். புச்சா²ஸபா⁴கே³ன ஹி ‘‘தும்ஹாகங் ஆனீதங், தும்ஹாகங் தா³துகாமொம்ஹீ’’தி வதெ³ய்ய, ததோ தங் பி⁴க்கு²ங் அஞ்ஞே பி⁴க்கூ² ஜிகு³ச்ச²ந்தா கீ³வங் பரிவத்தெத்வா ஓலோகேதப்³ப³ம்பி ந மஞ்ஞெய்யுங். ஸசே பன ‘‘குஹிங் யாஸி, கிங் கரொந்தோ ஆஹிண்ட³ஸீ’’தி வுத்தே ‘‘உத்³தே³ஸப⁴த்தங் க³ஹெத்வா ஆக³தொம்ஹீ’’தி வத³தி, ஏகேன லஜ்ஜிபி⁴க்கு²னா டி²திகாய கா³ஹேதப்³ப³ங். ஸசே ஆப⁴தங் ப³ஹு ஹோதி, ஸப்³பே³ஸங் பஹோதி, டி²திகாகிச்சங் நத்தி², தே²ராஸனதோ பட்டா²ய பத்தங் பூரெத்வா தா³தப்³ப³ங்.
Eko pātiyā bhattaṃ āharitvā ‘‘saṅghuddesaṃ dammī’’ti vadati, ekekaṃ ālopaṃ adatvā ṭhitikāya ekassa yāpanamattaṃ katvā dātabbaṃ. Atha so bhattaṃ āharitvā kiñci vattuṃ ajānanto tuṇhībhūto acchati, ‘‘kassa te ānītaṃ, kassa dātukāmosī’’ti na vattabbaṃ. Pucchāsabhāgena hi ‘‘tumhākaṃ ānītaṃ, tumhākaṃ dātukāmomhī’’ti vadeyya, tato taṃ bhikkhuṃ aññe bhikkhū jigucchantā gīvaṃ parivattetvā oloketabbampi na maññeyyuṃ. Sace pana ‘‘kuhiṃ yāsi, kiṃ karonto āhiṇḍasī’’ti vutte ‘‘uddesabhattaṃ gahetvā āgatomhī’’ti vadati, ekena lajjibhikkhunā ṭhitikāya gāhetabbaṃ. Sace ābhataṃ bahu hoti, sabbesaṃ pahoti, ṭhitikākiccaṃ natthi, therāsanato paṭṭhāya pattaṃ pūretvā dātabbaṃ.
‘‘ஸங்கு⁴த்³தே³ஸபத்தங் தே³தா²’’தி வுத்தே ‘‘கிங் ஆஹரிஸ்ஸஸீ’’தி அவத்வா பகதிட்டி²திகாய ஏவ கா³ஹேதப்³ப³ங். யோ பன பாயாஸோ வா ரஸபிண்ட³பாதோ வா நிச்சங் லப்³ப⁴தி; ஏவரூபானங் பணீதபோ⁴ஜனானங் ஆவேணிகா டி²திகா காதப்³பா³, ததா² ஸபரிவாராய யாகு³யா மஹக்³கா⁴னங் ப²லானங் பணீதானஞ்ச க²ஜ்ஜகானங். பகதிப⁴த்தயாகு³ப²லக²ஜ்ஜகானங் பன ஏகாவ டி²திகா காதப்³பா³. ‘‘ஸப்பிங் ஆஹரிஸ்ஸாமீ’’தி வுத்தே ஸப்³ப³ஸப்பீனங் ஏகாவ டி²திகா வட்டதி, ததா² ஸப்³ப³தேலானங். ‘‘மது⁴ங் ஆஹரிஸ்ஸாமீ’’தி வுத்தே பன மது⁴னோ ஏகாவ டி²திகா வட்டதி, ததா² பா²ணிதஸ்ஸ லட்டி²மது⁴காதீ³னஞ்ச பே⁴ஸஜ்ஜானங். ஸசே பன க³ந்த⁴மாலங் ஸங்கு⁴த்³தே³ஸங் தெ³ந்தி, பிண்ட³பாதிகஸ்ஸ வட்டதி, ந வட்டதீதி. ஆமிஸஸ்ஸேவ படிக்கி²த்தத்தா வட்டதி, ஸங்க⁴ங் உத்³தி³ஸ்ஸ தி³ன்னத்தா பன ந க³ஹேதப்³ப³ந்தி வத³ந்தி.
‘‘Saṅghuddesapattaṃ dethā’’ti vutte ‘‘kiṃ āharissasī’’ti avatvā pakatiṭṭhitikāya eva gāhetabbaṃ. Yo pana pāyāso vā rasapiṇḍapāto vā niccaṃ labbhati; evarūpānaṃ paṇītabhojanānaṃ āveṇikā ṭhitikā kātabbā, tathā saparivārāya yāguyā mahagghānaṃ phalānaṃ paṇītānañca khajjakānaṃ. Pakatibhattayāguphalakhajjakānaṃ pana ekāva ṭhitikā kātabbā. ‘‘Sappiṃ āharissāmī’’ti vutte sabbasappīnaṃ ekāva ṭhitikā vaṭṭati, tathā sabbatelānaṃ. ‘‘Madhuṃ āharissāmī’’ti vutte pana madhuno ekāva ṭhitikā vaṭṭati, tathā phāṇitassa laṭṭhimadhukādīnañca bhesajjānaṃ. Sace pana gandhamālaṃ saṅghuddesaṃ denti, piṇḍapātikassa vaṭṭati, na vaṭṭatīti. Āmisasseva paṭikkhittattā vaṭṭati, saṅghaṃ uddissa dinnattā pana na gahetabbanti vadanti.
உத்³தே³ஸப⁴த்தகதா² நிட்டி²தா.
Uddesabhattakathā niṭṭhitā.
