| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
உத்³தே³ஸப⁴த்தகதா²
Uddesabhattakathā
அயங் நயோ ஏவங் வேதி³தப்³போ³தி யோஜனா. ரஞ்ஞா வா பஹிதேதி ஸம்ப³ந்தோ⁴. ஸசே அத்தீ²தி ஸசே டி²திகா அத்தி². உத்³தே³ஸகேனாதி ப⁴த்துத்³தே³ஸகேன . ந அதிக்காமேதப்³ப³ந்தி உத்³தே³ஸப⁴த்தங் ந அதிக்காமேதப்³ப³ங். தே பனாதி பிண்ட³பாதிகா பன. டி²திகங் ட²பெத்வாதி டி²திகங் டி²தட்டா²னே ட²பெத்வா முஞ்சித்வாதி அத்தோ². தேஸந்தி மஹாதே²ரானங். யோஜனந்தரிகவிஹாரதோபீதி யோஜனேன ப்³யவதா⁴னே டி²தவிஹாரதோபி. டி²தட்டா²னதோதி டி²திகாய டி²தட்டா²னதோ. அஸம்பத்தானம்பீதி ப⁴த்துத்³தே³ஸட்டா²னங் அஸம்பத்தானம்பி. வட்³டி⁴தா நாம ஸீமாதி உபசாரஸீமா வட்³டி⁴தா நாம. ஸங்க⁴னவகஸ்ஸ தி³ன்னேபீதி யாவ து³தியபா⁴கோ³ ந தா³தப்³போ³, தாவ ஸங்க⁴னவகஸ்ஸ தி³ன்னேபி. வஸ்ஸக்³கே³னாதி க³ணியதீதி க³ங், வஸ்ஸமேவ க³ங் வஸ்ஸக்³க³ங், தேன வஸ்ஸக்³கே³ன, வஸ்ஸக³ணனாயாதி வுத்தங் ஹோதி. யதி³ ‘‘வஸ்ஸக்³கே⁴னா’’தி சதுத்த²க்க²ரேன பாடோ² ப⁴வெய்ய, ஏவங் ஸதி வஸ்ஸபரிச்சே²தே³னாதி அத்தோ² த³ட்ட²ப்³போ³, அயமேவ யுத்ததரோ.
Ayaṃ nayo evaṃ veditabboti yojanā. Raññā vā pahiteti sambandho. Sace atthīti sace ṭhitikā atthi. Uddesakenāti bhattuddesakena . Na atikkāmetabbanti uddesabhattaṃ na atikkāmetabbaṃ. Te panāti piṇḍapātikā pana. Ṭhitikaṃ ṭhapetvāti ṭhitikaṃ ṭhitaṭṭhāne ṭhapetvā muñcitvāti attho. Tesanti mahātherānaṃ. Yojanantarikavihāratopīti yojanena byavadhāne ṭhitavihāratopi. Ṭhitaṭṭhānatoti ṭhitikāya ṭhitaṭṭhānato. Asampattānampīti bhattuddesaṭṭhānaṃ asampattānampi. Vaḍḍhitā nāma sīmāti upacārasīmā vaḍḍhitā nāma. Saṅghanavakassa dinnepīti yāva dutiyabhāgo na dātabbo, tāva saṅghanavakassa dinnepi. Vassaggenāti gaṇiyatīti gaṃ, vassameva gaṃ vassaggaṃ, tena vassaggena, vassagaṇanāyāti vuttaṃ hoti. Yadi ‘‘vassagghenā’’ti catutthakkharena pāṭho bhaveyya, evaṃ sati vassaparicchedenāti attho daṭṭhabbo, ayameva yuttataro.
ஏகஸ்மிங் விஹாரேதி ஏகிஸ்ஸங் விஹாரஸீமாயங். தஸ்மிங்யேவ ப⁴த்துத்³தே³ஸட்டா²னேதி எத்த² ஏவஸத்³தே³ன அஞ்ஞஸ்மிங் டா²னே கா³ஹணங் படிக்கி²பதி. ஏகோதி ஏகோ தா³யகோ. தேனாதி பஹிதபி⁴க்கு²னா. ஸோ அத்தோ²தி ஸோ ஹேது. தங்தி³வஸந்தி தஸ்மிங் பஹிததி³வஸே. பமுஸ்ஸதீதி ஸதிபவாஸேன முஸ்ஸதி. போ⁴ஜனஸாலாயாதி ப⁴த்துத்³தே³ஸட்டா²னஸங்கா²தாய போ⁴ஜனஸாலாய. யா பகதிட்டி²திகாதி யோஜனா. ‘‘ஏகாப³த்³தா⁴ ஹொந்தீ’’தி வுத்தவசனஸ்ஸ அத்த²ங் த³ஸ்ஸெந்தோ ஆஹ ‘‘அஞ்ஞமஞ்ஞங் த்³வாத³ஸஹத்த²ந்தரங் அவிஜஹித்வா’’தி. நவங் டி²திகந்தி ப⁴த்துத்³தே³ஸட்டா²னே ட²பிதபகதிட்டி²திகதோ அஞ்ஞங் நவங் டி²திகங். ஹீதி ஸச்சங், யஸ்மா வா. ஏதந்தி உத்³தே³ஸப⁴த்தங். ‘‘ஸ்வே’’தி நியாமெத்வா வுத்தத்தா து³தியதி³வஸே ந லப்³ப⁴தி.
Ekasmiṃ vihāreti ekissaṃ vihārasīmāyaṃ. Tasmiṃyeva bhattuddesaṭṭhāneti ettha evasaddena aññasmiṃ ṭhāne gāhaṇaṃ paṭikkhipati. Ekoti eko dāyako. Tenāti pahitabhikkhunā. So atthoti so hetu. Taṃdivasanti tasmiṃ pahitadivase. Pamussatīti satipavāsena mussati. Bhojanasālāyāti bhattuddesaṭṭhānasaṅkhātāya bhojanasālāya. Yā pakatiṭṭhitikāti yojanā. ‘‘Ekābaddhā hontī’’ti vuttavacanassa atthaṃ dassento āha ‘‘aññamaññaṃ dvādasahatthantaraṃ avijahitvā’’ti. Navaṃ ṭhitikanti bhattuddesaṭṭhāne ṭhapitapakatiṭṭhitikato aññaṃ navaṃ ṭhitikaṃ. Hīti saccaṃ, yasmā vā. Etanti uddesabhattaṃ. ‘‘Sve’’ti niyāmetvā vuttattā dutiyadivase na labbhati.
கோசீதி தா³யகோ. ஸகவிஹாரே டீ²திகாவஸேனேவ கா³ஹேதப்³ப³ந்தி யங் விஹாரங் க³ச்ச²ந்தி, தத்த² அபவிட்ட²த்தா ஸகவிஹாரே டி²திகாவஸேனேவ கா³ஹேதப்³ப³ங். தி³ன்னங் பன ப⁴த்தங் கா³ஹேதப்³ப³ந்தி ஸம்ப³ந்தோ⁴. ஸம்பத்தானந்தி தி³ன்னட்டா²னங் ஸம்பத்தானங். தத்தா²தி தி³ன்னட்டா²னங், ஸம்பத்தானங்யேவாதி ஸம்ப³ந்தோ⁴. தஸ்ஸ விஹாரஸ்ஸாதி பவிட்ட²விஹாரஸ்ஸ. தஸ்மிங் தஸ்மிங் டா²னேதி கா³மத்³வாரவீதி²சதுக்கஸங்கா²தே தஸ்மிங் தஸ்மிங் டா²னே. அந்தோஉபசாரக³தானந்தி எத்த² அந்தோஉபசாரோ நாம த்³வாத³ஸஹத்த²ப்³ப⁴ந்தரங்.
Kocīti dāyako. Sakavihāre ṭhītikāvaseneva gāhetabbanti yaṃ vihāraṃ gacchanti, tattha apaviṭṭhattā sakavihāre ṭhitikāvaseneva gāhetabbaṃ. Dinnaṃ pana bhattaṃ gāhetabbanti sambandho. Sampattānanti dinnaṭṭhānaṃ sampattānaṃ. Tatthāti dinnaṭṭhānaṃ, sampattānaṃyevāti sambandho. Tassa vihārassāti paviṭṭhavihārassa. Tasmiṃ tasmiṃ ṭhāneti gāmadvāravīthicatukkasaṅkhāte tasmiṃ tasmiṃ ṭhāne. Antoupacāragatānanti ettha antoupacāro nāma dvādasahatthabbhantaraṃ.
கா³மத்³வாரூபசார வீதி²சதுக்கூபசார க⁴ரூபசாரேஸு தீஸு க⁴ரூபசாரஸ்ஸ விஸேஸங் த³ஸ்ஸெந்தோ ஆஹ ‘‘க⁴ரூபசாரோ செத்தா²’’திஆதி³. எத்தா²தி தீஸு உபசாரேஸு. க⁴ரூபசாரோ வேதி³தப்³போ³தி ஸம்ப³ந்தோ⁴. ஏகோ உபசாரோ எத்தா²தி ஏகூபசாரங் க⁴ரங். இமேஸந்தி சதுன்னங் க⁴ரானங். தத்தா²தி சதூஸு க⁴ரேஸு. ஏககுலஸ்ஸ யங் க⁴ரந்தி ஸம்ப³ந்தோ⁴. ஏகவளஞ்ஜந்தி ஏகத்³வாரேன ஸமானபரிபோ⁴க³ங். தத்தா²தி ஏகூபசாரே.
Gāmadvārūpacāra vīthicatukkūpacāra gharūpacāresu tīsu gharūpacārassa visesaṃ dassento āha ‘‘gharūpacāro cetthā’’tiādi. Etthāti tīsu upacāresu. Gharūpacāro veditabboti sambandho. Eko upacāro etthāti ekūpacāraṃ gharaṃ. Imesanti catunnaṃ gharānaṃ. Tatthāti catūsu gharesu. Ekakulassa yaṃ gharanti sambandho. Ekavaḷañjanti ekadvārena samānaparibhogaṃ. Tatthāti ekūpacāre.
யங் பன ஏகங் க⁴ரங் கதந்தி ஸம்ப³ந்தோ⁴. ஸுக²விஹாரத்தா²யாதி கலஹங் விச்சி²ந்தி³த்வா ஸுக²விஹாரத்தா²ய. தஸ்மிங் தஸ்மிங் டா²னேதி பி⁴த்தியா பரிச்சி²ன்னே தஸ்மிங் தஸ்மிங் டா²னே.
Yaṃ pana ekaṃ gharaṃ katanti sambandho. Sukhavihāratthāyāti kalahaṃ vicchinditvā sukhavihāratthāya. Tasmiṃ tasmiṃ ṭhāneti bhittiyā paricchinne tasmiṃ tasmiṃ ṭhāne.
யஸ்மிங் பன க⁴ரே நிஸீதா³பெந்தீதி ஸம்ப³ந்தோ⁴. யம்பி நிவேஸனந்தி யோஜனா.
Yasmiṃ pana ghare nisīdāpentīti sambandho. Yampi nivesananti yojanā.
யோ பன உத்³தே³ஸலாபோ⁴ உப்பஜ்ஜதி, ஸோ பாபுணாதீதி யோஜனா. கிஞ்சாபி தி³ஸ்ஸந்தி, ததா²பீதி யோஜனா.
Yo pana uddesalābho uppajjati, so pāpuṇātīti yojanā. Kiñcāpi dissanti, tathāpīti yojanā.
யோ பனாதி பி⁴க்கு² பன, லப⁴தீதி ஸம்ப³ந்தோ⁴. அஞ்ஞஸ்மிந்தி அத்தனா அஞ்ஞஸ்மிங். தேனாதி உத்³தே³ஸப⁴த்தங் லப⁴ந்தேன பி⁴க்கு²னா.
Yo panāti bhikkhu pana, labhatīti sambandho. Aññasminti attanā aññasmiṃ. Tenāti uddesabhattaṃ labhantena bhikkhunā.
காலங் படிமானெந்தேஸூதி போ⁴ஜனகாலங் படிமானெந்தேஸு பி⁴க்கூ²ஸு, நிஸின்னேஸூதி ஸம்ப³ந்தோ⁴. கோசி மனுஸ்ஸோ வத³தீதி ஸம்ப³ந்தோ⁴. ஸங்கு⁴த்³தே³ஸபத்தங் தே³த² இதி வாதி யோஜனா. ‘‘ஏஸேவ நயோ’’தி இமினா பத்தஸ்ஸ டா²னே பி⁴க்கு²ங் பக்கி²பித்வா வுத்தே அதிதி³ஸதி.
Kālaṃ paṭimānentesūti bhojanakālaṃ paṭimānentesu bhikkhūsu, nisinnesūti sambandho. Koci manusso vadatīti sambandho. Saṅghuddesapattaṃ detha iti vāti yojanā. ‘‘Eseva nayo’’ti iminā pattassa ṭhāne bhikkhuṃ pakkhipitvā vutte atidisati.
எத்தா²தி உத்³தே³ஸப⁴த்தே, ஏவங்வசனே வா. பேஸலோதி பியஸீலோ. தேனாதி உத்³தே³ஸகேன. கிந்தி ஜானாதீதி ஆஹ ‘‘த³ஸவஸ்ஸேன லத்³த⁴’’ந்தி. தஸ்ஸாதி உத்³தே³ஸகஸ்ஸ, வசனந்தி ஸம்ப³ந்தோ⁴. அப்பஸத்³தா³தி ஸணிகஸத்³தா³. ‘‘அபஸத்³தா³’’திபி பாடோ², நிஸ்ஸத்³தா³தி அத்தோ². ஸப்³ப³னவகஸ்ஸாதி ஸப்³பே³ஸங் பி⁴க்கூ²னங் நவகஸ்ஸ. சா²யாயபி புச்சி²யமானாயாதி அனாத³ரே பு⁴ம்மவசனங், ஸாமிவசனங் வா. ந லப⁴தீதி பாபுணாபிதத்தா ந லப⁴தி. நிஸின்னஸ்ஸாபி நித்³தா³யந்தஸ்ஸாபீதி அனாத³ரே ஸாமிவசனங், பி⁴க்கு²ஸ்ஸ நிஸின்னஸ்ஸாபி நித்³தா³யந்தஸ்ஸாபீதி அத்தோ². ஹீதி ஸச்சங். ஏதங் பா⁴ஜனீயப⁴ண்ட³ங் நாமாதி யோஜனா. தத்தா²தி ‘‘ஸம்பத்தஸ்ஸேவ பாபுணாதீ’’தி வசனே. உபசாரேனாதி த்³வாத³ஸஹத்தூ²பசாரேன. தஸ்மிந்தி அந்தோபரிக்கே²பே.
Etthāti uddesabhatte, evaṃvacane vā. Pesaloti piyasīlo. Tenāti uddesakena. Kinti jānātīti āha ‘‘dasavassena laddha’’nti. Tassāti uddesakassa, vacananti sambandho. Appasaddāti saṇikasaddā. ‘‘Apasaddā’’tipi pāṭho, nissaddāti attho. Sabbanavakassāti sabbesaṃ bhikkhūnaṃ navakassa. Chāyāyapi pucchiyamānāyāti anādare bhummavacanaṃ, sāmivacanaṃ vā. Na labhatīti pāpuṇāpitattā na labhati. Nisinnassāpi niddāyantassāpīti anādare sāmivacanaṃ, bhikkhussa nisinnassāpi niddāyantassāpīti attho. Hīti saccaṃ. Etaṃ bhājanīyabhaṇḍaṃ nāmāti yojanā. Tatthāti ‘‘sampattasseva pāpuṇātī’’ti vacane. Upacārenāti dvādasahatthūpacārena. Tasminti antoparikkhepe.
கோசி உபாஸகோ பஹிணாதீதி ஸம்ப³ந்தோ⁴. பணீதபோ⁴ஜனானந்தி பணீதபோ⁴ஜனேஹி. உத³கஸ்ஸாதி உத³கேன, பூரெத்வாதி ஸம்ப³ந்தோ⁴. ஆக³தா மனுஸ்ஸாதி ஸம்ப³ந்தோ⁴. யேனாதி பி⁴க்கு²னா. யந்தி வத்து². திசீவரபரிவாரந்தி திசீவரேன பரிவாரிதங், திசீவரபரிவாரவந்தங் வா உத்³தே³ஸப⁴த்தந்தி அத்தோ². ஹி ஸச்சங் அஸ்ஸ பி⁴க்கு²ஸ்ஸ புஞ்ஞவிஸேஸோ ஈதி³ஸோதி யோஜனா. நனு உத³கங்பிஸ்ஸ புஞ்ஞவிஸேஸங், கஸ்மா அஞ்ஞங் உத்³தே³ஸப⁴த்தங் லப⁴தீதி ஆஹ ‘‘உத³கங் பனா’’திஆதி³.
Koci upāsako pahiṇātīti sambandho. Paṇītabhojanānanti paṇītabhojanehi. Udakassāti udakena, pūretvāti sambandho. Āgatā manussāti sambandho. Yenāti bhikkhunā. Yanti vatthu. Ticīvaraparivāranti ticīvarena parivāritaṃ, ticīvaraparivāravantaṃ vā uddesabhattanti attho. Hi saccaṃ assa bhikkhussa puññaviseso īdisoti yojanā. Nanu udakaṃpissa puññavisesaṃ, kasmā aññaṃ uddesabhattaṃ labhatīti āha ‘‘udakaṃ panā’’tiādi.
க³ஹெத்வா ஆக³தா தே மனுஸ்ஸாதி யோஜனா. தேஸந்தி மஹாதே²ராதீ³னங். த³ஹரஸாமணேரேஹீதி த³ஹரேஹி ஸாமணேரேஹி, லத்³தே⁴ஸூதி ஸம்ப³ந்தோ⁴.
Gahetvā āgatā te manussāti yojanā. Tesanti mahātherādīnaṃ. Daharasāmaṇerehīti daharehi sāmaṇerehi, laddhesūti sambandho.
தத்தா²தி உத்³தே³ஸப⁴த்தே. புரதோதி மஹாதே²ரானங் புரதோ. பத்தேதி ஸங்கு⁴த்³தே³ஸபத்தே, அகா³ஹிதேயேவாதி ஸம்ப³ந்தோ⁴. ஆஹடம்பி உத்³தே³ஸப⁴த்தந்தி ஸம்ப³ந்தோ⁴.
Tatthāti uddesabhatte. Puratoti mahātherānaṃ purato. Patteti saṅghuddesapatte, agāhiteyevāti sambandho. Āhaṭampi uddesabhattanti sambandho.
ஏகோ வத³தீதி ஸம்ப³ந்தோ⁴. ஸோதி மனுஸ்ஸோ, ப⁴ணதீதி ஸம்ப³ந்தோ⁴. யதா² தே ருச்சதி, ததா² வத்வா ஆஹராதி யோஜனா. விஸ்ஸட்ட²தூ³தோ நாமாதி அத்தனோ ருசிங் விஸ்ஸஜ்ஜித்வா தஸ்ஸ ருசியா விஸ்ஸட்டோ² தூ³தோ நாம. படிபாடிபத்தங் வாதி ஸங்க⁴தோ படிபாடியா லத்³த⁴ங் பத்தங் வா, இத³ங் நிமந்தனப⁴த்தங் ஸந்தா⁴ய வுத்தங். யங் இச்ச²தீதி விஸ்ஸட்ட²தூ³தோ யங் இச்ச²தி. ஸோதி பா³லோ, ந வத்தப்³போ³தி ஸம்ப³ந்தோ⁴. புச்சா²ஸபா⁴கே³ன வதெ³ய்யாதி ஸம்ப³ந்தோ⁴. ததோதி வத³னகாரணா.
Eko vadatīti sambandho. Soti manusso, bhaṇatīti sambandho. Yathā te ruccati, tathā vatvā āharāti yojanā. Vissaṭṭhadūto nāmāti attano ruciṃ vissajjitvā tassa ruciyā vissaṭṭho dūto nāma. Paṭipāṭipattaṃ vāti saṅghato paṭipāṭiyā laddhaṃ pattaṃ vā, idaṃ nimantanabhattaṃ sandhāya vuttaṃ. Yaṃ icchatīti vissaṭṭhadūto yaṃ icchati. Soti bālo, na vattabboti sambandho. Pucchāsabhāgena vadeyyāti sambandho. Tatoti vadanakāraṇā.
கூடட்டி²திகா நாமாதி அஞ்ஞேஹி உத்³தே³ஸப⁴த்தேஹி மிஸ்ஸெத்வா உஜுகட்டி²திகாய பவத்தித்வா கூடேன பவத்தா டி²திகா நாம ஹோதி. தமேவத்த²ங் வித்தா²ரெந்தோ ஆஹ ‘‘ரஞ்ஞோ வா ஹீ’’திஆதி³. ஏகசாரிகப⁴த்தானீதி பதி ஏகங் கத்வா சரிதப்³பா³னி ப⁴க்கி²தப்³பா³னீதி ஏகசாரிகானி, அஞ்ஞேஹி உத்³தே³ஸப⁴த்தேஹி அமிஸ்ஸெத்வா பதி ஏகங் கத்வா ப⁴க்கி²தப்³பா³னீதி வுத்தங் ஹோதி, தானியேவ ப⁴த்தானி ஏகசாரிகப⁴த்தானி. ஏகச்சே பி⁴க்கூ² க³தாதி ஸம்ப³ந்தோ⁴. தேஸூதி ஏகச்சேஸு பி⁴க்கூ²ஸு. தங்க²ணங்யேவாதி தஸ்மிங் நிஸின்னக்க²ணேயேவ. புன தங்க²ணங்யேவாதி தஸ்மிங் கா³ஹணக்க²ணேயேவ. ‘‘பணீதப⁴த்த’’ந்தி வுத்தே ‘‘கதிவஸ்ஸதோ பட்டா²யா’’தி வத³ந்தி, ‘‘எத்தகவஸ்ஸதோ நாமா’’தி வுத்தேதி யோஜனா. கா³ஹிதேதி டி²திகங் அஜானந்தேஹி ஆக³ந்துகேஹி பத்தே கா³ஹிதே. ஆக³தேஹிபி டி²திகங் ஜானநகபி⁴க்கூ²ஹீதி ஸம்ப³ந்தோ⁴. ஏஸேவ நயோ பரதோபி. பி⁴க்கூ²யேவ ஆக³ச்ச²ந்தூதி பத்தங் அக்³க³ஹெத்வா பி⁴க்கூ²யேவ ஆக³ச்ச²ந்தூதி அதி⁴ப்பாயோ.
Kūṭaṭṭhitikānāmāti aññehi uddesabhattehi missetvā ujukaṭṭhitikāya pavattitvā kūṭena pavattā ṭhitikā nāma hoti. Tamevatthaṃ vitthārento āha ‘‘rañño vā hī’’tiādi. Ekacārikabhattānīti pati ekaṃ katvā caritabbāni bhakkhitabbānīti ekacārikāni, aññehi uddesabhattehi amissetvā pati ekaṃ katvā bhakkhitabbānīti vuttaṃ hoti, tāniyeva bhattāni ekacārikabhattāni. Ekacce bhikkhū gatāti sambandho. Tesūti ekaccesu bhikkhūsu. Taṅkhaṇaṃyevāti tasmiṃ nisinnakkhaṇeyeva. Puna taṅkhaṇaṃyevāti tasmiṃ gāhaṇakkhaṇeyeva. ‘‘Paṇītabhatta’’nti vutte ‘‘kativassato paṭṭhāyā’’ti vadanti, ‘‘ettakavassato nāmā’’ti vutteti yojanā. Gāhiteti ṭhitikaṃ ajānantehi āgantukehi patte gāhite. Āgatehipi ṭhitikaṃ jānanakabhikkhūhīti sambandho. Eseva nayo paratopi. Bhikkhūyeva āgacchantūti pattaṃ aggahetvā bhikkhūyeva āgacchantūti adhippāyo.
நேதி டி²திகங் அஜானந்தே ஆக³ந்துகே. ராஜா போ⁴ஜெத்வாதி ராஜா அத்தனோ கே³ஹே போ⁴ஜெத்வா. நேஸந்தி ஆக³ந்துகானங், பத்தேபீதி ஸம்ப³ந்தோ⁴. யங் ஆஹடந்தி யங் ப⁴த்தங் அபு⁴ஞ்ஜித்வா ஆஹடங். தங் ந கா³ஹேதப்³ப³ந்தி தங் ப⁴த்தங் டி²திகாய ந கா³ஹேதப்³ப³ங் தோ²கத்தா. நேஸந்தி ஆக³ந்துகானங். கீ³வா ஹோதீதி இணங் ஹோதி. இணங் நாம படிதா³தப்³ப³ஸபா⁴வோ ஹோதி, தஸ்மா படிதா³தப்³ப³ந்தி அதி⁴ப்பாயோ. எத்தா²தி டி²திகங் அஜானித்வா பு⁴த்தட்டா²னே. தாவ நிஸீதி³தப்³ப³ந்தி தாவ ஆக³மெத்வா நிஸீதி³தப்³ப³ங். பத்தட்டா²னேன கா³ஹணம்பி கீ³வாஸதி³ஸோதி புரிமதே²ரஸ்ஸ மதி ப⁴வெய்ய. ஏவஞ்ஹி ஸதி த்³வின்னங் தே²ரானங் வாதோ³ ஸதி³ஸோயேவ.
Neti ṭhitikaṃ ajānante āgantuke. Rājā bhojetvāti rājā attano gehe bhojetvā. Nesanti āgantukānaṃ, pattepīti sambandho. Yaṃ āhaṭanti yaṃ bhattaṃ abhuñjitvā āhaṭaṃ. Taṃ na gāhetabbanti taṃ bhattaṃ ṭhitikāya na gāhetabbaṃ thokattā. Nesanti āgantukānaṃ. Gīvā hotīti iṇaṃ hoti. Iṇaṃ nāma paṭidātabbasabhāvo hoti, tasmā paṭidātabbanti adhippāyo. Etthāti ṭhitikaṃ ajānitvā bhuttaṭṭhāne. Tāva nisīditabbanti tāva āgametvā nisīditabbaṃ. Pattaṭṭhānena gāhaṇampi gīvāsadisoti purimatherassa mati bhaveyya. Evañhi sati dvinnaṃ therānaṃ vādo sadisoyeva.
ஏகோ பிண்ட³பாதோதி ஸம்ப³ந்தோ⁴. ததா²ரூபோதி திசீவரபரிவாரோ ஸதக்³க⁴னகோ. அயந்தி பிண்ட³பாதோ. இதி வுத்தங் அட்ட²கதா²ஸு.
Eko piṇḍapātoti sambandho. Tathārūpoti ticīvaraparivāro satagghanako. Ayanti piṇḍapāto. Iti vuttaṃ aṭṭhakathāsu.
ஏகோ பி⁴க்கூ²தி ஸம்ப³ந்தோ⁴. அந்தராப⁴ட்ட²கோதி உத்³தே³ஸப⁴த்தஸ்ஸ அந்தரே வேமஜ்ஜே² ப⁴ஸ்ஸதி க³லதீதி அந்தராப⁴ட்ட²கோ. பரிபுண்ணவஸ்ஸோ யோ பன ஸாமணேரோதி யோஜனா. தஸ்ஸ உபஸம்பஜ்ஜிதஸாமணேரஸ்ஸ டி²திகா அதிக்கந்தாதி ஸம்ப³ந்தோ⁴. ஸோதி உத்³தே³ஸப⁴த்தபத்தோ பி⁴க்கு². ஸமீபேதி அத்தனோ ஸமீபே. தஞ்சே தெ²ய்யாய ஹரந்தீதி தங் பத்தங் பத்தஹாரகா தெ²ய்யாய ஹரந்தி சே. கீ³வா ஹோதீதி பத்ததா³பகஸ்ஸ கீ³வா ஹோதி. ஸோ பி⁴க்கூ²தி ஸமீபே நிஸின்னோ ஸோ பி⁴க்கு². அஸ்ஸாதி பத்ததா³பகஸ்ஸ. ‘‘அய’’ந்தி பொத்த²கேஸு பாடோ² அத்தி², ஸோ ந ஸுந்த³ரோ. ததோதி உத்³தே³ஸப⁴த்தக⁴ரதோ. ‘‘ஸுஹடோ’’தி வசனஸ்ஸ அத்த²ங் த³ஸ்ஸெந்தோ ஆஹ ‘‘ப⁴த்தஸ்ஸ தி³ன்னத்தா கீ³வா ந ஹோதீ’’தி.
Eko bhikkhūti sambandho. Antarābhaṭṭhakoti uddesabhattassa antare vemajjhe bhassati galatīti antarābhaṭṭhako. Paripuṇṇavasso yo pana sāmaṇeroti yojanā. Tassa upasampajjitasāmaṇerassa ṭhitikā atikkantāti sambandho. Soti uddesabhattapatto bhikkhu. Samīpeti attano samīpe. Tañce theyyāya harantīti taṃ pattaṃ pattahārakā theyyāya haranti ce. Gīvā hotīti pattadāpakassa gīvā hoti. So bhikkhūti samīpe nisinno so bhikkhu. Assāti pattadāpakassa. ‘‘Aya’’nti potthakesu pāṭho atthi, so na sundaro. Tatoti uddesabhattagharato. ‘‘Suhaṭo’’ti vacanassa atthaṃ dassento āha ‘‘bhattassa dinnattā gīvā na hotī’’ti.
ஸாதி³யனகோதி உத்³தே³ஸப⁴த்தஸாதி³யனகோ, ஹோதீதி ஸம்ப³ந்தோ⁴. த³ஸஹிபி பத்தேஹி ப⁴த்தங் ஆஹராபெத்வாதி யோஜனா. பி⁴க்கு²த³த்தியங் நாமாதி பி⁴க்கு²னா த³த்தியங் நாம. ஸோ பி⁴க்கூ²தி ஸாதி³யனகோ ஸோ பி⁴க்கு². தே பி⁴க்கூ²தி பிண்ட³பாதிகே தே பி⁴க்கூ². ஏத² ப⁴ந்தே மய்ஹங் ஸஹாயா ஹோத² இதி வத்வாதி ஸம்ப³ந்தோ⁴. தஸ்ஸாதி உபாஸகஸ்ஸ. தத்தா²தி உபாஸகஸ்ஸ க⁴ரே. தஸ்ஸேவாதி ஸாதி³யனகஸ்ஸேவ. இதரேதி நவபிண்ட³பாதிகா. நேஸந்தி த³ஸன்னங் பி⁴க்கூ²னங். தஸ்ஸ பி⁴க்கு²னோதி ஸாதி³யனகஸ்ஸ பி⁴க்கு²னோ. பு⁴த்தாவீனந்தி பு⁴த்தவந்தானங்.
Sādiyanakoti uddesabhattasādiyanako, hotīti sambandho. Dasahipi pattehi bhattaṃ āharāpetvāti yojanā. Bhikkhudattiyaṃ nāmāti bhikkhunā dattiyaṃ nāma. So bhikkhūti sādiyanako so bhikkhu. Te bhikkhūti piṇḍapātike te bhikkhū. Etha bhante mayhaṃ sahāyā hotha iti vatvāti sambandho. Tassāti upāsakassa. Tatthāti upāsakassa ghare. Tassevāti sādiyanakasseva. Itareti navapiṇḍapātikā. Nesanti dasannaṃ bhikkhūnaṃ. Tassa bhikkhunoti sādiyanakassa bhikkhuno. Bhuttāvīnanti bhuttavantānaṃ.
தேதி நவபிண்ட³பாதிகா, வுத்தா க³ச்ச²ந்தீதி ஸம்ப³ந்தோ⁴. தத்தா²தி உபாஸகஸ்ஸ க⁴ரே. தத்ராதி த³ஸஸு பி⁴க்கூ²ஸு. மது⁴ரேன ஸரேன அனுமோத³னங் கரொந்தஸ்ஸ ஏகஸ்ஸ த⁴ம்மகத²ங் ஸுத்வாதி யோஜனா. அகதபா⁴கோ³ நாமாதி புப்³பே³ ந கரியித்தா²தி அகதோ, ஸோயேவ பா⁴கோ³ கொட்டா²ஸோதி அகதபா⁴கோ³, ஆக³ந்துகபா⁴கோ³ நாமாதி அத்தோ².
Teti navapiṇḍapātikā, vuttā gacchantīti sambandho. Tatthāti upāsakassa ghare. Tatrāti dasasu bhikkhūsu. Madhurena sarena anumodanaṃ karontassa ekassa dhammakathaṃ sutvāti yojanā. Akatabhāgo nāmāti pubbe na kariyitthāti akato, soyeva bhāgo koṭṭhāsoti akatabhāgo, āgantukabhāgo nāmāti attho.
ஏகோ உபாஸகோ தே³தீதி ஸம்ப³ந்தோ⁴. இமந்தி கா²த³னீயபோ⁴ஜனீயங். பத்தஸாமிகஸ்ஸ தா³தப்³ப³ந்தி யோஜனா. ட²பெத்வாதி பகதியா ட²பெத்வா. ‘‘ஸப்³போ³ ஸங்கோ⁴ பு⁴ஞ்ஜதூ’’தி வத்வா ச கிஞ்சி அவத்வா ச க³தேபி பட²மமேவ ‘‘ஸப்³ப³ங் ஸங்கி⁴கங் பத்தங் தே³தா²’’தி வுத்தத்தா பா⁴ஜெத்வா பரிபு⁴ஞ்ஜிதப்³ப³ங்.
Eko upāsako detīti sambandho. Imanti khādanīyabhojanīyaṃ. Pattasāmikassa dātabbanti yojanā. Ṭhapetvāti pakatiyā ṭhapetvā. ‘‘Sabbo saṅgho bhuñjatū’’ti vatvā ca kiñci avatvā ca gatepi paṭhamameva ‘‘sabbaṃ saṅghikaṃ pattaṃ dethā’’ti vuttattā bhājetvā paribhuñjitabbaṃ.
பாதியா ஆஹரித்வாதி ஸம்ப³ந்தோ⁴. ஏகேகங் ஆலோபந்தி ஏகேகஸ்ஸ பி⁴க்கு²ஸ்ஸ ஏகேகங் ஆலோபங். அச்ச²தீதி வஸதி. கஸ்ஸ தேதி கஸ்ஸ அத்தா²ய தயா, ஆனீதந்தி யோஜனா. ‘‘ஏகேன பி⁴க்கு²னா’’தி பத³ங் ‘‘கா³ஹேதப்³ப³’’ந்தி பதே³ காரிதகம்மங், ‘‘ப⁴த்த’’ந்தி தா⁴துகம்மங் தப்³ப³பச்சயோ வத³தி.
Pātiyā āharitvāti sambandho. Ekekaṃ ālopanti ekekassa bhikkhussa ekekaṃ ālopaṃ. Acchatīti vasati. Kassa teti kassa atthāya tayā, ānītanti yojanā. ‘‘Ekena bhikkhunā’’ti padaṃ ‘‘gāhetabba’’nti pade kāritakammaṃ, ‘‘bhatta’’nti dhātukammaṃ tabbapaccayo vadati.
கிங் ஆஹரீயதீதி அவத்வாதி கிங் வத்து² தயா ஆஹரீதீதி உபாஸகங் அபுச்சி²த்வா. ‘‘கிங் ஆஹரிஸ்ஸஸீ’’திபி பாடோ², கிங் வத்து²ங் த்வங் ஆஹரிஸ்ஸஸீதி அத்தோ². ஸபரிவாராய யாகு³யா ச மஹக்³கா⁴னங் ப²லானஞ்ச பணீதானங் க²ஜ்ஜகானஞ்ச ததா² ஆவேணிகா டி²திகா காதப்³பா³தி யோஜனா . ஏகா ஏவ டி²திகாதி ஸமானா ஏவ டி²திகா. ததா² பா²ணிதஸ்ஸாதி எத்த² ததா²ஸத்³தே³ன ‘‘ஏகா ஏவ டி²திகா வட்டதீ’’தி பத³ங் அதிதி³ஸதி.
Kiṃ āharīyatīti avatvāti kiṃ vatthu tayā āharītīti upāsakaṃ apucchitvā. ‘‘Kiṃ āharissasī’’tipi pāṭho, kiṃ vatthuṃ tvaṃ āharissasīti attho. Saparivārāya yāguyā ca mahagghānaṃ phalānañca paṇītānaṃ khajjakānañca tathā āveṇikā ṭhitikā kātabbāti yojanā . Ekā eva ṭhitikāti samānā eva ṭhitikā. Tathā phāṇitassāti ettha tathāsaddena ‘‘ekā eva ṭhitikā vaṭṭatī’’ti padaṃ atidisati.
இதி உத்³தே³ஸப⁴த்தகதா²ய யோஜனா ஸமத்தா.
Iti uddesabhattakathāya yojanā samattā.
