| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
উদ্দেসভত্তকথা
Uddesabhattakathā
অযং নযো এৰং ৰেদিতব্বোতি যোজনা। রঞ্ঞা ৰা পহিতেতি সম্বন্ধো। সচে অত্থীতি সচে ঠিতিকা অত্থি। উদ্দেসকেনাতি ভত্তুদ্দেসকেন । ন অতিক্কামেতব্বন্তি উদ্দেসভত্তং ন অতিক্কামেতব্বং। তে পনাতি পিণ্ডপাতিকা পন। ঠিতিকং ঠপেত্ৰাতি ঠিতিকং ঠিতট্ঠানে ঠপেত্ৰা মুঞ্চিত্ৰাতি অত্থো। তেসন্তি মহাথেরানং। যোজনন্তরিকৰিহারতোপীতি যোজনেন ব্যৰধানে ঠিতৰিহারতোপি। ঠিতট্ঠানতোতি ঠিতিকায ঠিতট্ঠানতো। অসম্পত্তানম্পীতি ভত্তুদ্দেসট্ঠানং অসম্পত্তানম্পি। ৰড্ঢিতা নাম সীমাতি উপচারসীমা ৰড্ঢিতা নাম। সঙ্ঘনৰকস্স দিন্নেপীতি যাৰ দুতিযভাগো ন দাতব্বো, তাৰ সঙ্ঘনৰকস্স দিন্নেপি। ৰস্সগ্গেনাতি গণিযতীতি গং, ৰস্সমেৰ গং ৰস্সগ্গং, তেন ৰস্সগ্গেন, ৰস্সগণনাযাতি ৰুত্তং হোতি। যদি ‘‘ৰস্সগ্ঘেনা’’তি চতুত্থক্খরেন পাঠো ভৰেয্য, এৰং সতি ৰস্সপরিচ্ছেদেনাতি অত্থো দট্ঠব্বো, অযমেৰ যুত্ততরো।
Ayaṃ nayo evaṃ veditabboti yojanā. Raññā vā pahiteti sambandho. Sace atthīti sace ṭhitikā atthi. Uddesakenāti bhattuddesakena . Na atikkāmetabbanti uddesabhattaṃ na atikkāmetabbaṃ. Te panāti piṇḍapātikā pana. Ṭhitikaṃ ṭhapetvāti ṭhitikaṃ ṭhitaṭṭhāne ṭhapetvā muñcitvāti attho. Tesanti mahātherānaṃ. Yojanantarikavihāratopīti yojanena byavadhāne ṭhitavihāratopi. Ṭhitaṭṭhānatoti ṭhitikāya ṭhitaṭṭhānato. Asampattānampīti bhattuddesaṭṭhānaṃ asampattānampi. Vaḍḍhitā nāma sīmāti upacārasīmā vaḍḍhitā nāma. Saṅghanavakassa dinnepīti yāva dutiyabhāgo na dātabbo, tāva saṅghanavakassa dinnepi. Vassaggenāti gaṇiyatīti gaṃ, vassameva gaṃ vassaggaṃ, tena vassaggena, vassagaṇanāyāti vuttaṃ hoti. Yadi ‘‘vassagghenā’’ti catutthakkharena pāṭho bhaveyya, evaṃ sati vassaparicchedenāti attho daṭṭhabbo, ayameva yuttataro.
একস্মিং ৰিহারেতি একিস্সং ৰিহারসীমাযং। তস্মিংযেৰ ভত্তুদ্দেসট্ঠানেতি এত্থ এৰসদ্দেন অঞ্ঞস্মিং ঠানে গাহণং পটিক্খিপতি। একোতি একো দাযকো। তেনাতি পহিতভিক্খুনা। সো অত্থোতি সো হেতু। তংদিৰসন্তি তস্মিং পহিতদিৰসে। পমুস্সতীতি সতিপৰাসেন মুস্সতি। ভোজনসালাযাতি ভত্তুদ্দেসট্ঠানসঙ্খাতায ভোজনসালায। যা পকতিট্ঠিতিকাতি যোজনা। ‘‘একাবদ্ধা হোন্তী’’তি ৰুত্তৰচনস্স অত্থং দস্সেন্তো আহ ‘‘অঞ্ঞমঞ্ঞং দ্ৰাদসহত্থন্তরং অৰিজহিত্ৰা’’তি। নৰং ঠিতিকন্তি ভত্তুদ্দেসট্ঠানে ঠপিতপকতিট্ঠিতিকতো অঞ্ঞং নৰং ঠিতিকং। হীতি সচ্চং, যস্মা ৰা। এতন্তি উদ্দেসভত্তং। ‘‘স্ৰে’’তি নিযামেত্ৰা ৰুত্তত্তা দুতিযদিৰসে ন লব্ভতি।
Ekasmiṃ vihāreti ekissaṃ vihārasīmāyaṃ. Tasmiṃyeva bhattuddesaṭṭhāneti ettha evasaddena aññasmiṃ ṭhāne gāhaṇaṃ paṭikkhipati. Ekoti eko dāyako. Tenāti pahitabhikkhunā. So atthoti so hetu. Taṃdivasanti tasmiṃ pahitadivase. Pamussatīti satipavāsena mussati. Bhojanasālāyāti bhattuddesaṭṭhānasaṅkhātāya bhojanasālāya. Yā pakatiṭṭhitikāti yojanā. ‘‘Ekābaddhā hontī’’ti vuttavacanassa atthaṃ dassento āha ‘‘aññamaññaṃ dvādasahatthantaraṃ avijahitvā’’ti. Navaṃ ṭhitikanti bhattuddesaṭṭhāne ṭhapitapakatiṭṭhitikato aññaṃ navaṃ ṭhitikaṃ. Hīti saccaṃ, yasmā vā. Etanti uddesabhattaṃ. ‘‘Sve’’ti niyāmetvā vuttattā dutiyadivase na labbhati.
কোচীতি দাযকো। সকৰিহারে ঠীতিকাৰসেনেৰ গাহেতব্বন্তি যং ৰিহারং গচ্ছন্তি, তত্থ অপৰিট্ঠত্তা সকৰিহারে ঠিতিকাৰসেনেৰ গাহেতব্বং। দিন্নং পন ভত্তং গাহেতব্বন্তি সম্বন্ধো। সম্পত্তানন্তি দিন্নট্ঠানং সম্পত্তানং। তত্থাতি দিন্নট্ঠানং, সম্পত্তানংযেৰাতি সম্বন্ধো। তস্স ৰিহারস্সাতি পৰিট্ঠৰিহারস্স। তস্মিং তস্মিং ঠানেতি গামদ্ৰারৰীথিচতুক্কসঙ্খাতে তস্মিং তস্মিং ঠানে। অন্তোউপচারগতানন্তি এত্থ অন্তোউপচারো নাম দ্ৰাদসহত্থব্ভন্তরং।
Kocīti dāyako. Sakavihāre ṭhītikāvaseneva gāhetabbanti yaṃ vihāraṃ gacchanti, tattha apaviṭṭhattā sakavihāre ṭhitikāvaseneva gāhetabbaṃ. Dinnaṃ pana bhattaṃ gāhetabbanti sambandho. Sampattānanti dinnaṭṭhānaṃ sampattānaṃ. Tatthāti dinnaṭṭhānaṃ, sampattānaṃyevāti sambandho. Tassa vihārassāti paviṭṭhavihārassa. Tasmiṃ tasmiṃ ṭhāneti gāmadvāravīthicatukkasaṅkhāte tasmiṃ tasmiṃ ṭhāne. Antoupacāragatānanti ettha antoupacāro nāma dvādasahatthabbhantaraṃ.
গামদ্ৰারূপচার ৰীথিচতুক্কূপচার ঘরূপচারেসু তীসু ঘরূপচারস্স ৰিসেসং দস্সেন্তো আহ ‘‘ঘরূপচারো চেত্থা’’তিআদি। এত্থাতি তীসু উপচারেসু। ঘরূপচারো ৰেদিতব্বোতি সম্বন্ধো। একো উপচারো এত্থাতি একূপচারং ঘরং। ইমেসন্তি চতুন্নং ঘরানং। তত্থাতি চতূসু ঘরেসু। এককুলস্স যং ঘরন্তি সম্বন্ধো। একৰল়ঞ্জন্তি একদ্ৰারেন সমানপরিভোগং। তত্থাতি একূপচারে।
Gāmadvārūpacāra vīthicatukkūpacāra gharūpacāresu tīsu gharūpacārassa visesaṃ dassento āha ‘‘gharūpacāro cetthā’’tiādi. Etthāti tīsu upacāresu. Gharūpacāro veditabboti sambandho. Eko upacāro etthāti ekūpacāraṃ gharaṃ. Imesanti catunnaṃ gharānaṃ. Tatthāti catūsu gharesu. Ekakulassa yaṃ gharanti sambandho. Ekavaḷañjanti ekadvārena samānaparibhogaṃ. Tatthāti ekūpacāre.
যং পন একং ঘরং কতন্তি সম্বন্ধো। সুখৰিহারত্থাযাতি কলহং ৰিচ্ছিন্দিত্ৰা সুখৰিহারত্থায। তস্মিং তস্মিং ঠানেতি ভিত্তিযা পরিচ্ছিন্নে তস্মিং তস্মিং ঠানে।
Yaṃ pana ekaṃ gharaṃ katanti sambandho. Sukhavihāratthāyāti kalahaṃ vicchinditvā sukhavihāratthāya. Tasmiṃ tasmiṃ ṭhāneti bhittiyā paricchinne tasmiṃ tasmiṃ ṭhāne.
যস্মিং পন ঘরে নিসীদাপেন্তীতি সম্বন্ধো। যম্পি নিৰেসনন্তি যোজনা।
Yasmiṃ pana ghare nisīdāpentīti sambandho. Yampi nivesananti yojanā.
যো পন উদ্দেসলাভো উপ্পজ্জতি, সো পাপুণাতীতি যোজনা। কিঞ্চাপি দিস্সন্তি, তথাপীতি যোজনা।
Yo pana uddesalābho uppajjati, so pāpuṇātīti yojanā. Kiñcāpi dissanti, tathāpīti yojanā.
যো পনাতি ভিক্খু পন, লভতীতি সম্বন্ধো। অঞ্ঞস্মিন্তি অত্তনা অঞ্ঞস্মিং। তেনাতি উদ্দেসভত্তং লভন্তেন ভিক্খুনা।
Yo panāti bhikkhu pana, labhatīti sambandho. Aññasminti attanā aññasmiṃ. Tenāti uddesabhattaṃ labhantena bhikkhunā.
কালং পটিমানেন্তেসূতি ভোজনকালং পটিমানেন্তেসু ভিক্খূসু, নিসিন্নেসূতি সম্বন্ধো। কোচি মনুস্সো ৰদতীতি সম্বন্ধো। সঙ্ঘুদ্দেসপত্তং দেথ ইতি ৰাতি যোজনা। ‘‘এসেৰ নযো’’তি ইমিনা পত্তস্স ঠানে ভিক্খুং পক্খিপিত্ৰা ৰুত্তে অতিদিসতি।
Kālaṃ paṭimānentesūti bhojanakālaṃ paṭimānentesu bhikkhūsu, nisinnesūti sambandho. Koci manusso vadatīti sambandho. Saṅghuddesapattaṃ detha iti vāti yojanā. ‘‘Eseva nayo’’ti iminā pattassa ṭhāne bhikkhuṃ pakkhipitvā vutte atidisati.
এত্থাতি উদ্দেসভত্তে, এৰংৰচনে ৰা। পেসলোতি পিযসীলো। তেনাতি উদ্দেসকেন। কিন্তি জানাতীতি আহ ‘‘দসৰস্সেন লদ্ধ’’ন্তি। তস্সাতি উদ্দেসকস্স, ৰচনন্তি সম্বন্ধো। অপ্পসদ্দাতি সণিকসদ্দা। ‘‘অপসদ্দা’’তিপি পাঠো, নিস্সদ্দাতি অত্থো। সব্বনৰকস্সাতি সব্বেসং ভিক্খূনং নৰকস্স। ছাযাযপি পুচ্ছিযমানাযাতি অনাদরে ভুম্মৰচনং, সামিৰচনং ৰা। ন লভতীতি পাপুণাপিতত্তা ন লভতি। নিসিন্নস্সাপি নিদ্দাযন্তস্সাপীতি অনাদরে সামিৰচনং, ভিক্খুস্স নিসিন্নস্সাপি নিদ্দাযন্তস্সাপীতি অত্থো। হীতি সচ্চং। এতং ভাজনীযভণ্ডং নামাতি যোজনা। তত্থাতি ‘‘সম্পত্তস্সেৰ পাপুণাতী’’তি ৰচনে। উপচারেনাতি দ্ৰাদসহত্থূপচারেন। তস্মিন্তি অন্তোপরিক্খেপে।
Etthāti uddesabhatte, evaṃvacane vā. Pesaloti piyasīlo. Tenāti uddesakena. Kinti jānātīti āha ‘‘dasavassena laddha’’nti. Tassāti uddesakassa, vacananti sambandho. Appasaddāti saṇikasaddā. ‘‘Apasaddā’’tipi pāṭho, nissaddāti attho. Sabbanavakassāti sabbesaṃ bhikkhūnaṃ navakassa. Chāyāyapi pucchiyamānāyāti anādare bhummavacanaṃ, sāmivacanaṃ vā. Na labhatīti pāpuṇāpitattā na labhati. Nisinnassāpi niddāyantassāpīti anādare sāmivacanaṃ, bhikkhussa nisinnassāpi niddāyantassāpīti attho. Hīti saccaṃ. Etaṃ bhājanīyabhaṇḍaṃ nāmāti yojanā. Tatthāti ‘‘sampattasseva pāpuṇātī’’ti vacane. Upacārenāti dvādasahatthūpacārena. Tasminti antoparikkhepe.
কোচি উপাসকো পহিণাতীতি সম্বন্ধো। পণীতভোজনানন্তি পণীতভোজনেহি। উদকস্সাতি উদকেন, পূরেত্ৰাতি সম্বন্ধো। আগতা মনুস্সাতি সম্বন্ধো। যেনাতি ভিক্খুনা। যন্তি ৰত্থু। তিচীৰরপরিৰারন্তি তিচীৰরেন পরিৰারিতং, তিচীৰরপরিৰারৰন্তং ৰা উদ্দেসভত্তন্তি অত্থো। হি সচ্চং অস্স ভিক্খুস্স পুঞ্ঞৰিসেসো ঈদিসোতি যোজনা। ননু উদকংপিস্স পুঞ্ঞৰিসেসং, কস্মা অঞ্ঞং উদ্দেসভত্তং লভতীতি আহ ‘‘উদকং পনা’’তিআদি।
Koci upāsako pahiṇātīti sambandho. Paṇītabhojanānanti paṇītabhojanehi. Udakassāti udakena, pūretvāti sambandho. Āgatā manussāti sambandho. Yenāti bhikkhunā. Yanti vatthu. Ticīvaraparivāranti ticīvarena parivāritaṃ, ticīvaraparivāravantaṃ vā uddesabhattanti attho. Hi saccaṃ assa bhikkhussa puññaviseso īdisoti yojanā. Nanu udakaṃpissa puññavisesaṃ, kasmā aññaṃ uddesabhattaṃ labhatīti āha ‘‘udakaṃ panā’’tiādi.
গহেত্ৰা আগতা তে মনুস্সাতি যোজনা। তেসন্তি মহাথেরাদীনং। দহরসামণেরেহীতি দহরেহি সামণেরেহি, লদ্ধেসূতি সম্বন্ধো।
Gahetvā āgatā te manussāti yojanā. Tesanti mahātherādīnaṃ. Daharasāmaṇerehīti daharehi sāmaṇerehi, laddhesūti sambandho.
তত্থাতি উদ্দেসভত্তে। পুরতোতি মহাথেরানং পুরতো। পত্তেতি সঙ্ঘুদ্দেসপত্তে, অগাহিতেযেৰাতি সম্বন্ধো। আহটম্পি উদ্দেসভত্তন্তি সম্বন্ধো।
Tatthāti uddesabhatte. Puratoti mahātherānaṃ purato. Patteti saṅghuddesapatte, agāhiteyevāti sambandho. Āhaṭampi uddesabhattanti sambandho.
একো ৰদতীতি সম্বন্ধো। সোতি মনুস্সো, ভণতীতি সম্বন্ধো। যথা তে রুচ্চতি, তথা ৰত্ৰা আহরাতি যোজনা। ৰিস্সট্ঠদূতো নামাতি অত্তনো রুচিং ৰিস্সজ্জিত্ৰা তস্স রুচিযা ৰিস্সট্ঠো দূতো নাম। পটিপাটিপত্তং ৰাতি সঙ্ঘতো পটিপাটিযা লদ্ধং পত্তং ৰা, ইদং নিমন্তনভত্তং সন্ধায ৰুত্তং। যং ইচ্ছতীতি ৰিস্সট্ঠদূতো যং ইচ্ছতি। সোতি বালো, ন ৰত্তব্বোতি সম্বন্ধো। পুচ্ছাসভাগেন ৰদেয্যাতি সম্বন্ধো। ততোতি ৰদনকারণা।
Eko vadatīti sambandho. Soti manusso, bhaṇatīti sambandho. Yathā te ruccati, tathā vatvā āharāti yojanā. Vissaṭṭhadūto nāmāti attano ruciṃ vissajjitvā tassa ruciyā vissaṭṭho dūto nāma. Paṭipāṭipattaṃ vāti saṅghato paṭipāṭiyā laddhaṃ pattaṃ vā, idaṃ nimantanabhattaṃ sandhāya vuttaṃ. Yaṃ icchatīti vissaṭṭhadūto yaṃ icchati. Soti bālo, na vattabboti sambandho. Pucchāsabhāgena vadeyyāti sambandho. Tatoti vadanakāraṇā.
কূটট্ঠিতিকা নামাতি অঞ্ঞেহি উদ্দেসভত্তেহি মিস্সেত্ৰা উজুকট্ঠিতিকায পৰত্তিত্ৰা কূটেন পৰত্তা ঠিতিকা নাম হোতি। তমেৰত্থং ৰিত্থারেন্তো আহ ‘‘রঞ্ঞো ৰা হী’’তিআদি। একচারিকভত্তানীতি পতি একং কত্ৰা চরিতব্বানি ভক্খিতব্বানীতি একচারিকানি, অঞ্ঞেহি উদ্দেসভত্তেহি অমিস্সেত্ৰা পতি একং কত্ৰা ভক্খিতব্বানীতি ৰুত্তং হোতি, তানিযেৰ ভত্তানি একচারিকভত্তানি। একচ্চে ভিক্খূ গতাতি সম্বন্ধো। তেসূতি একচ্চেসু ভিক্খূসু। তঙ্খণংযেৰাতি তস্মিং নিসিন্নক্খণেযেৰ। পুন তঙ্খণংযেৰাতি তস্মিং গাহণক্খণেযেৰ। ‘‘পণীতভত্ত’’ন্তি ৰুত্তে ‘‘কতিৰস্সতো পট্ঠাযা’’তি ৰদন্তি, ‘‘এত্তকৰস্সতো নামা’’তি ৰুত্তেতি যোজনা। গাহিতেতি ঠিতিকং অজানন্তেহি আগন্তুকেহি পত্তে গাহিতে। আগতেহিপি ঠিতিকং জাননকভিক্খূহীতি সম্বন্ধো। এসেৰ নযো পরতোপি। ভিক্খূযেৰ আগচ্ছন্তূতি পত্তং অগ্গহেত্ৰা ভিক্খূযেৰ আগচ্ছন্তূতি অধিপ্পাযো।
Kūṭaṭṭhitikānāmāti aññehi uddesabhattehi missetvā ujukaṭṭhitikāya pavattitvā kūṭena pavattā ṭhitikā nāma hoti. Tamevatthaṃ vitthārento āha ‘‘rañño vā hī’’tiādi. Ekacārikabhattānīti pati ekaṃ katvā caritabbāni bhakkhitabbānīti ekacārikāni, aññehi uddesabhattehi amissetvā pati ekaṃ katvā bhakkhitabbānīti vuttaṃ hoti, tāniyeva bhattāni ekacārikabhattāni. Ekacce bhikkhū gatāti sambandho. Tesūti ekaccesu bhikkhūsu. Taṅkhaṇaṃyevāti tasmiṃ nisinnakkhaṇeyeva. Puna taṅkhaṇaṃyevāti tasmiṃ gāhaṇakkhaṇeyeva. ‘‘Paṇītabhatta’’nti vutte ‘‘kativassato paṭṭhāyā’’ti vadanti, ‘‘ettakavassato nāmā’’ti vutteti yojanā. Gāhiteti ṭhitikaṃ ajānantehi āgantukehi patte gāhite. Āgatehipi ṭhitikaṃ jānanakabhikkhūhīti sambandho. Eseva nayo paratopi. Bhikkhūyeva āgacchantūti pattaṃ aggahetvā bhikkhūyeva āgacchantūti adhippāyo.
নেতি ঠিতিকং অজানন্তে আগন্তুকে। রাজা ভোজেত্ৰাতি রাজা অত্তনো গেহে ভোজেত্ৰা। নেসন্তি আগন্তুকানং, পত্তেপীতি সম্বন্ধো। যং আহটন্তি যং ভত্তং অভুঞ্জিত্ৰা আহটং। তং ন গাহেতব্বন্তি তং ভত্তং ঠিতিকায ন গাহেতব্বং থোকত্তা। নেসন্তি আগন্তুকানং। গীৰা হোতীতি ইণং হোতি। ইণং নাম পটিদাতব্বসভাৰো হোতি, তস্মা পটিদাতব্বন্তি অধিপ্পাযো। এত্থাতি ঠিতিকং অজানিত্ৰা ভুত্তট্ঠানে। তাৰ নিসীদিতব্বন্তি তাৰ আগমেত্ৰা নিসীদিতব্বং। পত্তট্ঠানেন গাহণম্পি গীৰাসদিসোতি পুরিমথেরস্স মতি ভৰেয্য। এৰঞ্হি সতি দ্ৰিন্নং থেরানং ৰাদো সদিসোযেৰ।
Neti ṭhitikaṃ ajānante āgantuke. Rājā bhojetvāti rājā attano gehe bhojetvā. Nesanti āgantukānaṃ, pattepīti sambandho. Yaṃ āhaṭanti yaṃ bhattaṃ abhuñjitvā āhaṭaṃ. Taṃ na gāhetabbanti taṃ bhattaṃ ṭhitikāya na gāhetabbaṃ thokattā. Nesanti āgantukānaṃ. Gīvā hotīti iṇaṃ hoti. Iṇaṃ nāma paṭidātabbasabhāvo hoti, tasmā paṭidātabbanti adhippāyo. Etthāti ṭhitikaṃ ajānitvā bhuttaṭṭhāne. Tāva nisīditabbanti tāva āgametvā nisīditabbaṃ. Pattaṭṭhānena gāhaṇampi gīvāsadisoti purimatherassa mati bhaveyya. Evañhi sati dvinnaṃ therānaṃ vādo sadisoyeva.
একো পিণ্ডপাতোতি সম্বন্ধো। তথারূপোতি তিচীৰরপরিৰারো সতগ্ঘনকো। অযন্তি পিণ্ডপাতো। ইতি ৰুত্তং অট্ঠকথাসু।
Eko piṇḍapātoti sambandho. Tathārūpoti ticīvaraparivāro satagghanako. Ayanti piṇḍapāto. Iti vuttaṃ aṭṭhakathāsu.
একো ভিক্খূতি সম্বন্ধো। অন্তরাভট্ঠকোতি উদ্দেসভত্তস্স অন্তরে ৰেমজ্ঝে ভস্সতি গলতীতি অন্তরাভট্ঠকো। পরিপুণ্ণৰস্সো যো পন সামণেরোতি যোজনা। তস্স উপসম্পজ্জিতসামণেরস্স ঠিতিকা অতিক্কন্তাতি সম্বন্ধো। সোতি উদ্দেসভত্তপত্তো ভিক্খু। সমীপেতি অত্তনো সমীপে। তঞ্চে থেয্যায হরন্তীতি তং পত্তং পত্তহারকা থেয্যায হরন্তি চে। গীৰা হোতীতি পত্তদাপকস্স গীৰা হোতি। সো ভিক্খূতি সমীপে নিসিন্নো সো ভিক্খু। অস্সাতি পত্তদাপকস্স। ‘‘অয’’ন্তি পোত্থকেসু পাঠো অত্থি, সো ন সুন্দরো। ততোতি উদ্দেসভত্তঘরতো। ‘‘সুহটো’’তি ৰচনস্স অত্থং দস্সেন্তো আহ ‘‘ভত্তস্স দিন্নত্তা গীৰা ন হোতী’’তি।
Eko bhikkhūti sambandho. Antarābhaṭṭhakoti uddesabhattassa antare vemajjhe bhassati galatīti antarābhaṭṭhako. Paripuṇṇavasso yo pana sāmaṇeroti yojanā. Tassa upasampajjitasāmaṇerassa ṭhitikā atikkantāti sambandho. Soti uddesabhattapatto bhikkhu. Samīpeti attano samīpe. Tañce theyyāya harantīti taṃ pattaṃ pattahārakā theyyāya haranti ce. Gīvā hotīti pattadāpakassa gīvā hoti. So bhikkhūti samīpe nisinno so bhikkhu. Assāti pattadāpakassa. ‘‘Aya’’nti potthakesu pāṭho atthi, so na sundaro. Tatoti uddesabhattagharato. ‘‘Suhaṭo’’ti vacanassa atthaṃ dassento āha ‘‘bhattassa dinnattā gīvā na hotī’’ti.
সাদিযনকোতি উদ্দেসভত্তসাদিযনকো, হোতীতি সম্বন্ধো। দসহিপি পত্তেহি ভত্তং আহরাপেত্ৰাতি যোজনা। ভিক্খুদত্তিযং নামাতি ভিক্খুনা দত্তিযং নাম। সো ভিক্খূতি সাদিযনকো সো ভিক্খু। তে ভিক্খূতি পিণ্ডপাতিকে তে ভিক্খূ। এথ ভন্তে ময্হং সহাযা হোথ ইতি ৰত্ৰাতি সম্বন্ধো। তস্সাতি উপাসকস্স। তত্থাতি উপাসকস্স ঘরে। তস্সেৰাতি সাদিযনকস্সেৰ। ইতরেতি নৰপিণ্ডপাতিকা। নেসন্তি দসন্নং ভিক্খূনং। তস্স ভিক্খুনোতি সাদিযনকস্স ভিক্খুনো। ভুত্তাৰীনন্তি ভুত্তৰন্তানং।
Sādiyanakoti uddesabhattasādiyanako, hotīti sambandho. Dasahipi pattehi bhattaṃ āharāpetvāti yojanā. Bhikkhudattiyaṃ nāmāti bhikkhunā dattiyaṃ nāma. So bhikkhūti sādiyanako so bhikkhu. Te bhikkhūti piṇḍapātike te bhikkhū. Etha bhante mayhaṃ sahāyā hotha iti vatvāti sambandho. Tassāti upāsakassa. Tatthāti upāsakassa ghare. Tassevāti sādiyanakasseva. Itareti navapiṇḍapātikā. Nesanti dasannaṃ bhikkhūnaṃ. Tassa bhikkhunoti sādiyanakassa bhikkhuno. Bhuttāvīnanti bhuttavantānaṃ.
তেতি নৰপিণ্ডপাতিকা, ৰুত্তা গচ্ছন্তীতি সম্বন্ধো। তত্থাতি উপাসকস্স ঘরে। তত্রাতি দসসু ভিক্খূসু। মধুরেন সরেন অনুমোদনং করোন্তস্স একস্স ধম্মকথং সুত্ৰাতি যোজনা। অকতভাগো নামাতি পুব্বে ন করিযিত্থাতি অকতো, সোযেৰ ভাগো কোট্ঠাসোতি অকতভাগো, আগন্তুকভাগো নামাতি অত্থো।
Teti navapiṇḍapātikā, vuttā gacchantīti sambandho. Tatthāti upāsakassa ghare. Tatrāti dasasu bhikkhūsu. Madhurena sarena anumodanaṃ karontassa ekassa dhammakathaṃ sutvāti yojanā. Akatabhāgo nāmāti pubbe na kariyitthāti akato, soyeva bhāgo koṭṭhāsoti akatabhāgo, āgantukabhāgo nāmāti attho.
একো উপাসকো দেতীতি সম্বন্ধো। ইমন্তি খাদনীযভোজনীযং। পত্তসামিকস্স দাতব্বন্তি যোজনা। ঠপেত্ৰাতি পকতিযা ঠপেত্ৰা। ‘‘সব্বো সঙ্ঘো ভুঞ্জতূ’’তি ৰত্ৰা চ কিঞ্চি অৰত্ৰা চ গতেপি পঠমমেৰ ‘‘সব্বং সঙ্ঘিকং পত্তং দেথা’’তি ৰুত্তত্তা ভাজেত্ৰা পরিভুঞ্জিতব্বং।
Eko upāsako detīti sambandho. Imanti khādanīyabhojanīyaṃ. Pattasāmikassa dātabbanti yojanā. Ṭhapetvāti pakatiyā ṭhapetvā. ‘‘Sabbo saṅgho bhuñjatū’’ti vatvā ca kiñci avatvā ca gatepi paṭhamameva ‘‘sabbaṃ saṅghikaṃ pattaṃ dethā’’ti vuttattā bhājetvā paribhuñjitabbaṃ.
পাতিযা আহরিত্ৰাতি সম্বন্ধো। একেকং আলোপন্তি একেকস্স ভিক্খুস্স একেকং আলোপং। অচ্ছতীতি ৰসতি। কস্স তেতি কস্স অত্থায তযা, আনীতন্তি যোজনা। ‘‘একেন ভিক্খুনা’’তি পদং ‘‘গাহেতব্ব’’ন্তি পদে কারিতকম্মং, ‘‘ভত্ত’’ন্তি ধাতুকম্মং তব্বপচ্চযো ৰদতি।
Pātiyā āharitvāti sambandho. Ekekaṃ ālopanti ekekassa bhikkhussa ekekaṃ ālopaṃ. Acchatīti vasati. Kassa teti kassa atthāya tayā, ānītanti yojanā. ‘‘Ekena bhikkhunā’’ti padaṃ ‘‘gāhetabba’’nti pade kāritakammaṃ, ‘‘bhatta’’nti dhātukammaṃ tabbapaccayo vadati.
কিং আহরীযতীতি অৰত্ৰাতি কিং ৰত্থু তযা আহরীতীতি উপাসকং অপুচ্ছিত্ৰা। ‘‘কিং আহরিস্সসী’’তিপি পাঠো, কিং ৰত্থুং ত্ৰং আহরিস্সসীতি অত্থো। সপরিৰারায যাগুযা চ মহগ্ঘানং ফলানঞ্চ পণীতানং খজ্জকানঞ্চ তথা আৰেণিকা ঠিতিকা কাতব্বাতি যোজনা । একা এৰ ঠিতিকাতি সমানা এৰ ঠিতিকা। তথা ফাণিতস্সাতি এত্থ তথাসদ্দেন ‘‘একা এৰ ঠিতিকা ৰট্টতী’’তি পদং অতিদিসতি।
Kiṃ āharīyatīti avatvāti kiṃ vatthu tayā āharītīti upāsakaṃ apucchitvā. ‘‘Kiṃ āharissasī’’tipi pāṭho, kiṃ vatthuṃ tvaṃ āharissasīti attho. Saparivārāya yāguyā ca mahagghānaṃ phalānañca paṇītānaṃ khajjakānañca tathā āveṇikā ṭhitikā kātabbāti yojanā . Ekā eva ṭhitikāti samānā eva ṭhitikā. Tathā phāṇitassāti ettha tathāsaddena ‘‘ekā eva ṭhitikā vaṭṭatī’’ti padaṃ atidisati.
ইতি উদ্দেসভত্তকথায যোজনা সমত্তা।
Iti uddesabhattakathāya yojanā samattā.
