| Library / Tipiṭaka / д̇ибидага • Tipiṭaka / жуул̣аваг̇г̇а-адтагат̇аа • Cūḷavagga-aṭṭhakathā |
уд̣̇д̣̇зсабхад̇д̇агат̇аа
Uddesabhattakathā
уд̣̇д̣̇зсабхад̇д̇аад̣̇ийсу бана аяам̣ наяо – ран̃н̃аа ваа рааж̇амахаамад̇д̇зна ваа сан̇гхад̇о уд̣̇д̣̇исид̇ваа ‘‘зд̇д̇агз бхигкуу аанзт̇аа’’д̇и бахид̇з гаалам̣ гхосзд̇ваа тид̇игаа бужчид̇аб̣б̣аа. сажз ад̇т̇и, д̇ад̇о бадтааяа г̇аахзд̇аб̣б̣ам̣; но жз, т̇зраасанад̇о бадтааяа г̇аахзд̇аб̣б̣ам̣. уд̣̇д̣̇зсагзна бин̣д̣абаад̇игаанамби на ад̇иггаамзд̇аб̣б̣ам̣. д̇з бана д̇худ̇ан̇г̇ам̣ рагканд̇аа саяамзва ад̇иггамиссанд̇и; звам̣ г̇аахияамаанз аласаж̇аад̇игаа махаат̇зраа бажчаа ааг̇ажчанд̇и, ‘‘бханд̇з, вийсад̇ивассаанам̣ г̇аахияад̇и, д̇умхаагам̣ тид̇игаа ад̇игганд̇аа’’д̇и на вад̇д̇аб̣б̣аа, тид̇игам̣ табзд̇ваа д̇зсам̣ г̇аахзд̇ваа бажчаа тид̇игааяа г̇аахзд̇аб̣б̣ам̣. ‘‘асугавихаарз б̣ахум̣ уд̣̇д̣̇зсабхад̇д̇ам̣ уббанна’’нд̇и суд̇ваа яож̇ананд̇аригавихаарад̇оби бхигкуу ааг̇ажчанд̇и, самбад̇д̇асамбад̇д̇аанам̣ тид̇адтаанад̇о бадтааяа г̇аахзд̇аб̣б̣ам̣. асамбад̇д̇аанамби убажаарасиймам̣ бавидтаанам̣ анд̇зваасигаад̣̇ийсу г̇ан̣ханд̇зсу г̇аахзд̇аб̣б̣амзва. б̣ахиубажаарасиймааяа тид̇аанам̣ г̇аахзт̇аад̇и вад̣̇анд̇и, на г̇аахзд̇аб̣б̣ам̣. сажз бана убажаарасиймам̣ огганд̇зхи згааб̣ад̣̇д̇хаа худ̇ваа ад̇д̇ано вихаарад̣̇ваарз ваа анд̇овихаарзязва ваа хонд̇и, барисаавасзна вад̣дхид̇аа наама сиймаа ход̇и, д̇асмаа г̇аахзд̇аб̣б̣ам̣. сан̇гханавагасса д̣̇иннзби бажчаа ааг̇ад̇аанам̣ г̇аахзд̇аб̣б̣амзва . д̣̇уд̇ияабхааг̇з бана т̇зраасанам̣ аарул̣хз буна ааг̇ад̇аанам̣ батамабхааг̇о на баабун̣аад̇и, д̣̇уд̇ияабхааг̇ад̇о вассаг̇г̇зна г̇аахзд̇аб̣б̣ам̣.
Uddesabhattādīsu pana ayaṃ nayo – raññā vā rājamahāmattena vā saṅghato uddisitvā ‘‘ettake bhikkhū ānethā’’ti pahite kālaṃ ghosetvā ṭhitikā pucchitabbā. Sace atthi, tato paṭṭhāya gāhetabbaṃ; no ce, therāsanato paṭṭhāya gāhetabbaṃ. Uddesakena piṇḍapātikānampi na atikkāmetabbaṃ. Te pana dhutaṅgaṃ rakkhantā sayameva atikkamissanti; evaṃ gāhiyamāne alasajātikā mahātherā pacchā āgacchanti, ‘‘bhante, vīsativassānaṃ gāhiyati, tumhākaṃ ṭhitikā atikkantā’’ti na vattabbā, ṭhitikaṃ ṭhapetvā tesaṃ gāhetvā pacchā ṭhitikāya gāhetabbaṃ. ‘‘Asukavihāre bahuṃ uddesabhattaṃ uppanna’’nti sutvā yojanantarikavihāratopi bhikkhū āgacchanti, sampattasampattānaṃ ṭhitaṭṭhānato paṭṭhāya gāhetabbaṃ. Asampattānampi upacārasīmaṃ paviṭṭhānaṃ antevāsikādīsu gaṇhantesu gāhetabbameva. Bahiupacārasīmāya ṭhitānaṃ gāhethāti vadanti, na gāhetabbaṃ. Sace pana upacārasīmaṃ okkantehi ekābaddhā hutvā attano vihāradvāre vā antovihāreyeva vā honti, parisāvasena vaḍḍhitā nāma sīmā hoti, tasmā gāhetabbaṃ. Saṅghanavakassa dinnepi pacchā āgatānaṃ gāhetabbameva . Dutiyabhāge pana therāsanaṃ āruḷhe puna āgatānaṃ paṭhamabhāgo na pāpuṇāti, dutiyabhāgato vassaggena gāhetabbaṃ.
згасмим̣ вихаарз згам̣ бхад̇д̇уд̣̇д̣̇зсадтаанам̣ барижчинд̣̇ид̇ваа г̇аавуд̇аббамаан̣ааяаби убажаарасиймааяа яад̇т̇а гад̇т̇ажи аарожид̇ам̣ уд̣̇д̣̇зсабхад̇д̇ам̣, д̇асмим̣язва бхад̇д̇уд̣̇д̣̇зсадтаанз г̇аахзд̇аб̣б̣ам̣. зго згасса бхигкуно бахин̣аад̇и ‘‘свзби сан̇гхад̇о уд̣̇д̣̇исид̇ваа д̣̇аса бхигкуу бахин̣ат̇аа’’д̇и, д̇зна со ад̇т̇о бхад̇д̇уд̣̇д̣̇зсагасса аарожзд̇аб̣б̣о. сажз д̇ам̣ д̣̇ивасам̣ бамуссад̇и, д̣̇уд̇ияад̣̇ивасз баад̇ова аарожзд̇аб̣б̣о. ат̇а бамуссид̇ваава бин̣д̣ааяа бависанд̇о сарад̇и, яаава убажаарасиймам̣ наад̇иггамад̇и, д̇аава яаа бхож̇анасаалааяа багад̇идтид̇игаа, д̇ассааязва васзна г̇аахзд̇аб̣б̣ам̣. сажзби убажаарасиймам̣ ад̇игганд̇аа бхигкуу жа убажаарасиймадтагзхи згааб̣ад̣̇д̇хаа хонд̇и, ан̃н̃аман̃н̃ам̣ д̣̇ваад̣̇асахад̇т̇анд̇арам̣ авиж̇ахид̇ваа г̇ажчанд̇и, багад̇идтид̇игааяа васзна г̇аахзд̇аб̣б̣ам̣. бхигкуунам̣ бана д̇аад̣̇исз згааб̣ад̣̇д̇хз асад̇и б̣ахиубажаарасиймааяа яасмим̣ таанз сарад̇и, д̇ад̇т̇а навам̣ тид̇игам̣ гад̇ваа г̇аахзд̇аб̣б̣ам̣. анд̇ог̇аамз аасанасаалааяа саранд̇зна аасанасаалааяа тид̇игааяа г̇аахзд̇аб̣б̣ам̣. яад̇т̇а гад̇т̇ажи сарид̇ваа г̇аахзд̇аб̣б̣амзва, аг̇аахзд̇ум̣ на ваддад̇и. на хи зд̇ам̣ д̣̇уд̇ияад̣̇ивасз лаб̣бхад̇ийд̇и.
Ekasmiṃ vihāre ekaṃ bhattuddesaṭṭhānaṃ paricchinditvā gāvutappamāṇāyapi upacārasīmāya yattha katthaci ārocitaṃ uddesabhattaṃ, tasmiṃyeva bhattuddesaṭṭhāne gāhetabbaṃ. Eko ekassa bhikkhuno pahiṇāti ‘‘svepi saṅghato uddisitvā dasa bhikkhū pahiṇathā’’ti, tena so attho bhattuddesakassa ārocetabbo. Sace taṃ divasaṃ pamussati, dutiyadivase pātova ārocetabbo. Atha pamussitvāva piṇḍāya pavisanto sarati, yāva upacārasīmaṃ nātikkamati, tāva yā bhojanasālāya pakatiṭṭhitikā, tassāyeva vasena gāhetabbaṃ. Sacepi upacārasīmaṃ atikkantā bhikkhū ca upacārasīmaṭṭhakehi ekābaddhā honti, aññamaññaṃ dvādasahatthantaraṃ avijahitvā gacchanti, pakatiṭṭhitikāya vasena gāhetabbaṃ. Bhikkhūnaṃ pana tādise ekābaddhe asati bahiupacārasīmāya yasmiṃ ṭhāne sarati, tattha navaṃ ṭhitikaṃ katvā gāhetabbaṃ. Antogāme āsanasālāya sarantena āsanasālāya ṭhitikāya gāhetabbaṃ. Yattha katthaci saritvā gāhetabbameva, agāhetuṃ na vaṭṭati. Na hi etaṃ dutiyadivase labbhatīti.
сажз сагавихаарад̇о ан̃н̃ам̣ вихаарам̣ г̇ажчанд̇з бхигкуу д̣̇исваа гожи уд̣̇д̣̇зсабхад̇д̇ам̣ уд̣̇д̣̇исаабзд̇и, яаава анд̇оубажаарз ваа убажаарасиймадтагзхи сад̣̇д̇хим̣ вуд̇д̇анаязна згааб̣ад̣̇д̇хаа ваа хонд̇и, д̇аава сагавихаарз тид̇игаавасзнзва г̇аахзд̇аб̣б̣ам̣. б̣ахиубажаарз тид̇аанам̣ д̣̇иннам̣ бана ‘‘сан̇гхад̇о бханд̇з зд̇д̇агз наама бхигкуу уд̣̇д̣̇исат̇аа’’д̇и вуд̇д̇з самбад̇д̇аанам̣ г̇аахзд̇аб̣б̣ам̣. д̇ад̇т̇а д̣̇ваад̣̇асахад̇т̇анд̇арам̣ авиж̇ахид̇ваа згааб̣ад̣̇д̇ханаязна д̣̇уурз тид̇ааби самбад̇д̇ааязваад̇и взд̣̇ид̇аб̣б̣ам̣. сажз яам̣ вихаарам̣ г̇ажчанд̇и, д̇ад̇т̇а бавидтаанам̣ аарожзнд̇и, д̇асса вихаарасса тид̇игаавасзна г̇аахзд̇аб̣б̣ам̣. сажзби г̇аамад̣̇ваарз ваа вийт̇ияам̣ ваа жад̇уггз ваа анд̇арагхарз ваа бхигкуу д̣̇исваа гожи сан̇гхуд̣̇д̣̇зсам̣ аарожзд̇и, д̇асмим̣ д̇асмим̣ таанз анд̇оубажаараг̇ад̇аанам̣ г̇аахзд̇аб̣б̣ам̣.
Sace sakavihārato aññaṃ vihāraṃ gacchante bhikkhū disvā koci uddesabhattaṃ uddisāpeti, yāva antoupacāre vā upacārasīmaṭṭhakehi saddhiṃ vuttanayena ekābaddhā vā honti, tāva sakavihāre ṭhitikāvaseneva gāhetabbaṃ. Bahiupacāre ṭhitānaṃ dinnaṃ pana ‘‘saṅghato bhante ettake nāma bhikkhū uddisathā’’ti vutte sampattānaṃ gāhetabbaṃ. Tattha dvādasahatthantaraṃ avijahitvā ekābaddhanayena dūre ṭhitāpi sampattāyevāti veditabbaṃ. Sace yaṃ vihāraṃ gacchanti, tattha paviṭṭhānaṃ ārocenti, tassa vihārassa ṭhitikāvasena gāhetabbaṃ. Sacepi gāmadvāre vā vīthiyaṃ vā catukke vā antaraghare vā bhikkhū disvā koci saṅghuddesaṃ āroceti, tasmiṃ tasmiṃ ṭhāne antoupacāragatānaṃ gāhetabbaṃ.
гхаруубажааро жзд̇т̇а ‘‘згам̣ гхарам̣ згуубажаарам̣, згам̣ гхарам̣ наануубажаарам̣, наанаагхарам̣ згуубажаарам̣, наанаагхарам̣ наануубажаара’’нд̇и имзсам̣ васзна взд̣̇ид̇аб̣б̣о. д̇ад̇т̇а яам̣ згагуласса гхарам̣ згавал̣ан̃ж̇ам̣ ход̇и, д̇ам̣ суббабаад̇абарижчзд̣̇асса анд̇о згуубажаарам̣ наама. д̇ад̇т̇уббанно уд̣̇д̣̇зсалаабхо д̇асмим̣ убажаарз бхигкаажааравад̇д̇знаби тид̇аанам̣ саб̣б̣зсам̣ баабун̣аад̇и, зд̇ам̣ ‘‘згам̣ гхарам̣ згуубажаарам̣’’ наама.
Gharūpacāro cettha ‘‘ekaṃ gharaṃ ekūpacāraṃ, ekaṃ gharaṃ nānūpacāraṃ, nānāgharaṃ ekūpacāraṃ, nānāgharaṃ nānūpacāra’’nti imesaṃ vasena veditabbo. Tattha yaṃ ekakulassa gharaṃ ekavaḷañjaṃ hoti, taṃ suppapātaparicchedassa anto ekūpacāraṃ nāma. Tatthuppanno uddesalābho tasmiṃ upacāre bhikkhācāravattenapi ṭhitānaṃ sabbesaṃ pāpuṇāti, etaṃ ‘‘ekaṃ gharaṃ ekūpacāraṃ’’ nāma.
яам̣ бана згам̣ гхарам̣ д̣̇виннам̣ бхарияаанам̣ сукавихаарад̇т̇ааяа маж̇жхз бхид̇д̇им̣ удтаабзд̇ваа наанаад̣̇вааравал̣ан̃ж̇ам̣ гад̇ам̣, д̇ад̇т̇уббанно уд̣̇д̣̇зсалаабхо бхид̇д̇ианд̇аригасса на баабун̣аад̇и, д̇асмим̣ д̇асмим̣ таанз нисиннассзва баабун̣аад̇и, зд̇ам̣ ‘‘згам̣ гхарам̣ наануубажаарам̣’’ наама.
Yaṃ pana ekaṃ gharaṃ dvinnaṃ bhariyānaṃ sukhavihāratthāya majjhe bhittiṃ uṭṭhāpetvā nānādvāravaḷañjaṃ kataṃ, tatthuppanno uddesalābho bhittiantarikassa na pāpuṇāti, tasmiṃ tasmiṃ ṭhāne nisinnasseva pāpuṇāti, etaṃ ‘‘ekaṃ gharaṃ nānūpacāraṃ’’ nāma.
яасмим̣ бана гхарз б̣ахуу бхигкуу ниманд̇зд̇ваа анд̇ог̇зхад̇о бадтааяа згааб̣ад̣̇д̇хз гад̇ваа бадивиссагагхарааниби буурзд̇ваа нисийд̣̇аабзнд̇и, д̇ад̇т̇уббанно уд̣̇д̣̇зсалаабхо саб̣б̣зсам̣ баабун̣аад̇и. яамби наанаагуласса нивзсанам̣ маж̇жхз бхид̇д̇им̣ агад̇ваа згад̣̇ваарзнзва вал̣ан̃ж̇анд̇и, д̇ад̇рааби зсзва наяо. зд̇ам̣ ‘‘наанаагхарам̣ згуубажаарам̣’’ наама.
Yasmiṃ pana ghare bahū bhikkhū nimantetvā antogehato paṭṭhāya ekābaddhe katvā paṭivissakagharānipi pūretvā nisīdāpenti, tatthuppanno uddesalābho sabbesaṃ pāpuṇāti. Yampi nānākulassa nivesanaṃ majjhe bhittiṃ akatvā ekadvāreneva vaḷañjanti, tatrāpi eseva nayo. Etaṃ ‘‘nānāgharaṃ ekūpacāraṃ’’ nāma.
яо бана наанаанивзсанзсу нисиннаанам̣ бхигкуунам̣ уд̣̇д̣̇зсалаабхо уббаж̇ж̇ад̇и, гин̃жааби бхид̇д̇ижчид̣̇д̣̇зна бхигкуу д̣̇иссанд̇и, д̇асмим̣ д̇асмим̣ нивзсанз нисиннаанам̣язва баабун̣аад̇и, зд̇ам̣ ‘‘наанаагхарам̣ наануубажаарам̣’’ наама.
Yo pana nānānivesanesu nisinnānaṃ bhikkhūnaṃ uddesalābho uppajjati, kiñcāpi bhitticchiddena bhikkhū dissanti, tasmiṃ tasmiṃ nivesane nisinnānaṃyeva pāpuṇāti, etaṃ ‘‘nānāgharaṃ nānūpacāraṃ’’ nāma.
яо бана г̇аамад̣̇вааравийт̇ижад̇уггзсу ан̃н̃ад̇арасмим̣ таанз уд̣̇д̣̇зсабхад̇д̇ам̣ лабхид̇ваа ан̃н̃асмим̣ бхигкусмим̣ асад̇и ад̇д̇анова баабун̣аабзд̇ваа д̣̇уд̇ияад̣̇ивасзби д̇асмим̣язва таанз ан̃н̃ам̣ лабхад̇и, д̇зна яам̣ ан̃н̃ам̣ навагам̣ ваа вуд̣дхам̣ ваа бхигкум̣ бассад̇и, д̇асса г̇аахзд̇аб̣б̣ам̣. сажз гожи над̇т̇и, ад̇д̇анова баабзд̇ваа бхун̃ж̇ид̇аб̣б̣ам̣.
Yo pana gāmadvāravīthicatukkesu aññatarasmiṃ ṭhāne uddesabhattaṃ labhitvā aññasmiṃ bhikkhusmiṃ asati attanova pāpuṇāpetvā dutiyadivasepi tasmiṃyeva ṭhāne aññaṃ labhati, tena yaṃ aññaṃ navakaṃ vā vuḍḍhaṃ vā bhikkhuṃ passati, tassa gāhetabbaṃ. Sace koci natthi, attanova pāpetvā bhuñjitabbaṃ.
сажз аасанасаалааяа нисийд̣̇ид̇ваа гаалам̣ бадимаанзнд̇зсу бхигкуусу гожи ааг̇анд̇ваа ‘‘сан̇гхуд̣̇д̣̇зсабад̇д̇ам̣ д̣̇зт̇а, уд̣̇д̣̇зсабад̇д̇ам̣ д̣̇зт̇а, сан̇гхад̇о уд̣̇д̣̇исид̇ваа бад̇д̇ам̣ д̣̇зт̇а, сан̇гхигам̣ бад̇д̇ам̣ д̣̇зт̇аа’’д̇и ваа вад̣̇ад̇и, уд̣̇д̣̇зсабад̇д̇ам̣ тид̇игааяа г̇аахзд̇ваа д̣̇аад̇аб̣б̣ам̣. ‘‘сан̇гхуд̣̇д̣̇зсабхигкум̣ д̣̇зт̇а, сан̇гхад̇о уд̣̇д̣̇исид̇ваа бхигкум̣ д̣̇зт̇а, сан̇гхигам̣ бхигкум̣ д̣̇зт̇аа’’д̇и вуд̇д̇зби зсзва наяо.
Sace āsanasālāya nisīditvā kālaṃ paṭimānentesu bhikkhūsu koci āgantvā ‘‘saṅghuddesapattaṃ detha, uddesapattaṃ detha, saṅghato uddisitvā pattaṃ detha, saṅghikaṃ pattaṃ dethā’’ti vā vadati, uddesapattaṃ ṭhitikāya gāhetvā dātabbaṃ. ‘‘Saṅghuddesabhikkhuṃ detha, saṅghato uddisitvā bhikkhuṃ detha, saṅghikaṃ bhikkhuṃ dethā’’ti vuttepi eseva nayo.
уд̣̇д̣̇зсаго банзд̇т̇а бзсало лаж̇ж̇ий мзд̇хаавий ижчид̇аб̣б̣о, д̇зна д̇игкад̇д̇ум̣ тид̇игам̣ бужчид̇ваа сажз гожи тид̇игам̣ ж̇аананд̇о над̇т̇и, т̇зраасанад̇о г̇аахзд̇аб̣б̣ам̣. сажз бана ‘‘ахам̣ ж̇аанаами, д̣̇асавассзна лад̣̇д̇ха’’нд̇и гожи бхан̣ад̇и, ‘‘ад̇т̇аавусо, д̣̇асавассаа бхигкуу’’д̇и бужчид̇аб̣б̣ам̣. сажз д̇асса суд̇ваа ‘‘д̣̇асавассамха д̣̇асавассамхаа’’д̇и б̣ахуу ааг̇ажчанд̇и, ‘‘д̇уяхам̣ баабун̣аад̇и, д̇уяхам̣ баабун̣аад̇ий’’д̇и авад̇ваа ‘‘саб̣б̣з аббасад̣̇д̣̇аа хот̇аа’’д̇и вад̇ваа бадибаадияаа табзд̇аб̣б̣аа. табзд̇ваа ‘‘гад̇и ижчат̇аа’’д̇и убаасаго бужчид̇аб̣б̣о. ‘‘зд̇д̇агз наама, бханд̇з, бхигкуу’’д̇и вуд̇д̇з ‘‘д̇уяхам̣ баабун̣аад̇и, д̇уяхам̣ баабун̣аад̇ий’’д̇и авад̇ваа саб̣б̣анавагасса вассаг̇г̇ан̃жа уд̇у жа д̣̇ивасабхааг̇о жа чааяаа жа бужчид̇аб̣б̣аа. сажз чааяааяаби бужчияамаанааяа ан̃н̃о вуд̣дхад̇аро ааг̇ажчад̇и, д̇асса д̣̇аад̇аб̣б̣ам̣. ат̇а чааяам̣ бужчид̇ваа ‘‘д̇уяхам̣ баабун̣аад̇ий’’д̇и вуд̇д̇з вуд̣дхад̇аро ааг̇ажчад̇и, на лабхад̇и. гат̇аабабан̃жзна хи нисиннассааби нид̣̇д̣̇ааяанд̇ассааби г̇аахид̇ам̣ суг̇г̇аахид̇ам̣, ад̇игганд̇ам̣ суад̇игганд̇ам̣, бхааж̇анийяабхан̣д̣ан̃хи наамзд̇ам̣ самбад̇д̇ассзва баабун̣аад̇и, д̇ад̇т̇а самбад̇д̇абхааво убажаарзна барижчинд̣̇ид̇аб̣б̣о. аасанасаалааяа жа анд̇обаригкзбо убажааро, д̇асмим̣ тид̇асса лаабхо баабун̣аад̇ийд̇и.
Uddesako panettha pesalo lajjī medhāvī icchitabbo, tena tikkhattuṃ ṭhitikaṃ pucchitvā sace koci ṭhitikaṃ jānanto natthi, therāsanato gāhetabbaṃ. Sace pana ‘‘ahaṃ jānāmi, dasavassena laddha’’nti koci bhaṇati, ‘‘atthāvuso, dasavassā bhikkhū’’ti pucchitabbaṃ. Sace tassa sutvā ‘‘dasavassamha dasavassamhā’’ti bahū āgacchanti, ‘‘tuyhaṃ pāpuṇāti, tuyhaṃ pāpuṇātī’’ti avatvā ‘‘sabbe appasaddā hothā’’ti vatvā paṭipāṭiyā ṭhapetabbā. Ṭhapetvā ‘‘kati icchathā’’ti upāsako pucchitabbo. ‘‘Ettake nāma, bhante, bhikkhū’’ti vutte ‘‘tuyhaṃ pāpuṇāti, tuyhaṃ pāpuṇātī’’ti avatvā sabbanavakassa vassaggañca utu ca divasabhāgo ca chāyā ca pucchitabbā. Sace chāyāyapi pucchiyamānāya añño vuḍḍhataro āgacchati, tassa dātabbaṃ. Atha chāyaṃ pucchitvā ‘‘tuyhaṃ pāpuṇātī’’ti vutte vuḍḍhataro āgacchati, na labhati. Kathāpapañcena hi nisinnassāpi niddāyantassāpi gāhitaṃ suggāhitaṃ, atikkantaṃ suatikkantaṃ, bhājanīyabhaṇḍañhi nāmetaṃ sampattasseva pāpuṇāti, tattha sampattabhāvo upacārena paricchinditabbo. Āsanasālāya ca antoparikkhepo upacāro, tasmiṃ ṭhitassa lābho pāpuṇātīti.
гожи аасанасаалад̇о адта уд̣̇д̣̇зсабад̇д̇з аахараабзд̇ваа сад̇д̇а бад̇д̇з бан̣ийд̇абхож̇анаанам̣ згам̣ уд̣̇агасса буурзд̇ваа аасанасаалааяам̣ бахин̣аад̇и, г̇ахзд̇ваа ааг̇ад̇аа гин̃жи авад̇ваа бхигкуунам̣ хад̇т̇зсу бад̇идтаабзд̇ваа баггаманд̇и. язна яам̣ лад̣̇д̇хам̣, д̇ассзва д̇ам̣ ход̇и. язна бана уд̣̇агам̣ лад̣̇д̇хам̣, д̇асса ад̇игганд̇амби тид̇игам̣ табзд̇ваа ан̃н̃ам̣ уд̣̇д̣̇зсабхад̇д̇ам̣ г̇аахзд̇аб̣б̣ам̣. д̇ан̃жа луукам̣ ваа лабхад̇у бан̣ийд̇ам̣ ваа д̇ижийварабариваарам̣ ваа, д̇ассзвзд̇ам̣. ийд̣̇исо хисса бун̃н̃ависзсо. уд̣̇агам̣ бана яасмаа аамисам̣ на ход̇и, д̇асмаа ан̃н̃ам̣ уд̣̇д̣̇зсабхад̇д̇ам̣ лаб̣бхад̇и.
Koci āsanasālato aṭṭha uddesapatte āharāpetvā satta patte paṇītabhojanānaṃ ekaṃ udakassa pūretvā āsanasālāyaṃ pahiṇāti, gahetvā āgatā kiñci avatvā bhikkhūnaṃ hatthesu patiṭṭhāpetvā pakkamanti. Yena yaṃ laddhaṃ, tasseva taṃ hoti. Yena pana udakaṃ laddhaṃ, tassa atikkantampi ṭhitikaṃ ṭhapetvā aññaṃ uddesabhattaṃ gāhetabbaṃ. Tañca lūkhaṃ vā labhatu paṇītaṃ vā ticīvaraparivāraṃ vā, tassevetaṃ. Īdiso hissa puññaviseso. Udakaṃ pana yasmā āmisaṃ na hoti, tasmā aññaṃ uddesabhattaṃ labbhati.
сажз бана д̇з г̇ахзд̇ваа ааг̇ад̇аа ‘‘ид̣̇ам̣ гира бханд̇з саб̣б̣ам̣ бхааж̇зд̇ваа бхун̃ж̇ат̇аа’’д̇и вад̇ваа г̇ажчанд̇и, саб̣б̣зхи бхааж̇зд̇ваа бхун̃ж̇ид̇ваа уд̣̇агам̣ баад̇аб̣б̣ам̣. сан̇гхад̇о уд̣̇д̣̇исид̇ваа ‘‘адта махаат̇зрз д̣̇зт̇а, маж̇жхимз д̣̇зт̇а, навагз д̣̇зт̇а, барибун̣н̣авассасааман̣зрз д̣̇зт̇а, маж̇жхимабхаан̣агаад̣̇аяо д̣̇зт̇а, маяхам̣ н̃аад̇ибхигкуу д̣̇зт̇аа’’д̇и вад̣̇анд̇асса бана ‘‘убаасага, д̇вам̣ звам̣ вад̣̇аси, тид̇игааяа бана д̇зсам̣ на баабун̣аад̇ий’’д̇и вад̇ваа тид̇игаавасзнзва д̣̇аад̇аб̣б̣аа. д̣̇ахарасааман̣зрзхи бана уд̣̇д̣̇зсабхад̇д̇зсу лад̣̇д̇хзсу сажз д̣̇ааяагаанам̣ гхарз ман̇г̇алам̣ ход̇и, ‘‘д̇умхаагам̣ аажарияубаж̇жхааяз бзсзт̇аа’’д̇и вад̇д̇аб̣б̣ам̣.
Sace pana te gahetvā āgatā ‘‘idaṃ kira bhante sabbaṃ bhājetvā bhuñjathā’’ti vatvā gacchanti, sabbehi bhājetvā bhuñjitvā udakaṃ pātabbaṃ. Saṅghato uddisitvā ‘‘aṭṭha mahāthere detha, majjhime detha, navake detha, paripuṇṇavassasāmaṇere detha, majjhimabhāṇakādayo detha, mayhaṃ ñātibhikkhū dethā’’ti vadantassa pana ‘‘upāsaka, tvaṃ evaṃ vadasi, ṭhitikāya pana tesaṃ na pāpuṇātī’’ti vatvā ṭhitikāvaseneva dātabbā. Daharasāmaṇerehi pana uddesabhattesu laddhesu sace dāyakānaṃ ghare maṅgalaṃ hoti, ‘‘tumhākaṃ ācariyupajjhāye pesethā’’ti vattabbaṃ.
яасмим̣ бана уд̣̇д̣̇зсабхад̇д̇з батамабхааг̇о сааман̣зраанам̣ баабун̣аад̇и, анубхааг̇о махаат̇зраанам̣, на д̇ад̇т̇а сааман̣зраа ‘‘маяам̣ батамабхааг̇ам̣ лабхимхаа’’д̇и бурад̇о г̇анд̇ум̣ лабханд̇и, яат̇аабадибаадияаа зва г̇анд̇аб̣б̣ам̣. ‘‘сан̇гхад̇о уд̣̇д̣̇исид̇ваа ‘д̇умхз зт̇аа’д̇и вуд̇д̇з ‘маяхам̣ ан̃н̃ад̣̇ааби ж̇ааниссаси, тид̇игаа бана звам̣ г̇ажчад̇ий’’’д̇и тид̇игаавасзнзва г̇аахзд̇аб̣б̣ам̣. ат̇а ‘‘сан̇гхуд̣̇д̣̇зсабад̇д̇ам̣ д̣̇зт̇аа’’д̇и вад̇ваа аг̇аахид̇зязва бад̇д̇з яасса гассажи бад̇д̇ам̣ г̇ахзд̇ваа буурзд̇ваа аахарад̇и, аахадамби тид̇игааяа зва г̇аахзд̇аб̣б̣ам̣.
Yasmiṃ pana uddesabhatte paṭhamabhāgo sāmaṇerānaṃ pāpuṇāti, anubhāgo mahātherānaṃ, na tattha sāmaṇerā ‘‘mayaṃ paṭhamabhāgaṃ labhimhā’’ti purato gantuṃ labhanti, yathāpaṭipāṭiyā eva gantabbaṃ. ‘‘Saṅghato uddisitvā ‘tumhe ethā’ti vutte ‘mayhaṃ aññadāpi jānissasi, ṭhitikā pana evaṃ gacchatī’’’ti ṭhitikāvaseneva gāhetabbaṃ. Atha ‘‘saṅghuddesapattaṃ dethā’’ti vatvā agāhiteyeva patte yassa kassaci pattaṃ gahetvā pūretvā āharati, āhaṭampi ṭhitikāya eva gāhetabbaṃ.
зго ‘‘сан̇гхуд̣̇д̣̇зсабад̇д̇ам̣ аахараа’’д̇и бзсид̇о ‘‘бханд̇з, згам̣ бад̇д̇ам̣ д̣̇зт̇а, ниманд̇анабхад̇д̇ам̣ аахариссаамий’’д̇и вад̣̇ад̇и, со жз уд̣̇д̣̇зсабхад̇д̇агхарад̇о аяам̣ ааг̇ад̇од̇и н̃ад̇ваа бхигкуухи ‘‘нану д̇вам̣ асугагхарад̇о ааг̇ад̇о’’д̇и вуд̇д̇о ‘‘аама, бханд̇з, на ниманд̇анабхад̇д̇ам̣, уд̣̇д̣̇зсабхад̇д̇а’’нд̇и бхан̣ад̇и, тид̇игааяа г̇ахзд̇аб̣б̣ам̣. яо бана ‘‘згам̣ бад̇д̇ам̣ аахараа’’д̇и вуд̇д̇о ‘‘‘ги’нд̇и вад̇ваа аахараамий’’д̇и вад̇ваа ‘‘яат̇аа д̇з ружжад̇ий’’д̇и вуд̇д̇о ааг̇ажчад̇и, аяам̣ виссадтад̣̇ууд̇о наама. уд̣̇д̣̇зсабад̇д̇ам̣ ваа бадибаадибад̇д̇ам̣ ваа буг̇г̇алигабад̇д̇ам̣ ваа яам̣ ижчад̇и, д̇ам̣ д̇асса д̣̇аад̇аб̣б̣ам̣. зго б̣аало аб̣яад̇д̇о ‘‘уд̣̇д̣̇зсабад̇д̇ам̣ аахараа’’д̇и бзсид̇о вад̇д̇ум̣ на ж̇аанаад̇и, д̇ун̣хийбхууд̇о д̇идтад̇и, со ‘‘гасса санд̇игам̣ ааг̇ад̇осий’’д̇и ваа ‘‘гасса бад̇д̇ам̣ хариссасий’’д̇и ваа на вад̇д̇аб̣б̣о. зван̃хи вуд̇д̇о бужчаасабхааг̇зна ‘‘д̇умхаагам̣ санд̇игам̣ ааг̇ад̇омхий’’д̇и ‘‘д̇умхаагам̣ бад̇д̇ам̣ хариссаамий’’д̇и ваа вад̣̇зяяа, д̇ад̇о д̇ам̣ бхигкум̣ ан̃н̃з бхигкуу ж̇иг̇ужчанд̇аа на ологзяяум̣. ‘‘гухим̣ г̇ажчаси, гим̣ гаронд̇о аахин̣д̣асий’’д̇и бана вад̇д̇аб̣б̣о. д̇асса ‘‘уд̣̇д̣̇зсабад̇д̇ад̇т̇ааяа ааг̇ад̇омхий’’д̇и вад̣̇анд̇асса г̇аахзд̇ваа бад̇д̇о д̣̇аад̇аб̣б̣о.
Eko ‘‘saṅghuddesapattaṃ āharā’’ti pesito ‘‘bhante, ekaṃ pattaṃ detha, nimantanabhattaṃ āharissāmī’’ti vadati, so ce uddesabhattagharato ayaṃ āgatoti ñatvā bhikkhūhi ‘‘nanu tvaṃ asukagharato āgato’’ti vutto ‘‘āma, bhante, na nimantanabhattaṃ, uddesabhatta’’nti bhaṇati, ṭhitikāya gahetabbaṃ. Yo pana ‘‘ekaṃ pattaṃ āharā’’ti vutto ‘‘‘ki’nti vatvā āharāmī’’ti vatvā ‘‘yathā te ruccatī’’ti vutto āgacchati, ayaṃ vissaṭṭhadūto nāma. Uddesapattaṃ vā paṭipāṭipattaṃ vā puggalikapattaṃ vā yaṃ icchati, taṃ tassa dātabbaṃ. Eko bālo abyatto ‘‘uddesapattaṃ āharā’’ti pesito vattuṃ na jānāti, tuṇhībhūto tiṭṭhati, so ‘‘kassa santikaṃ āgatosī’’ti vā ‘‘kassa pattaṃ harissasī’’ti vā na vattabbo. Evañhi vutto pucchāsabhāgena ‘‘tumhākaṃ santikaṃ āgatomhī’’ti ‘‘tumhākaṃ pattaṃ harissāmī’’ti vā vadeyya, tato taṃ bhikkhuṃ aññe bhikkhū jigucchantā na olokeyyuṃ. ‘‘Kuhiṃ gacchasi, kiṃ karonto āhiṇḍasī’’ti pana vattabbo. Tassa ‘‘uddesapattatthāya āgatomhī’’ti vadantassa gāhetvā patto dātabbo.
згаа гуудадтид̇игаа наама ход̇и. ран̃н̃о ваа хи рааж̇амахаамад̇д̇асса ваа г̇зхз ад̇ибан̣ийд̇аани адта уд̣̇д̣̇зсабхад̇д̇аани нижжам̣ д̣̇ияяанд̇и, д̇аани згажааригабхад̇д̇аани гад̇ваа бхигкуу висум̣ тид̇игааяа барибхун̃ж̇анд̇и. згажжз бхигкуу ‘‘свз д̣̇аани амхаагам̣ баабун̣иссанд̇ий’’д̇и ад̇д̇ано тид̇игам̣ саллагкзд̇ваа г̇ад̇аа, д̇зсу анааг̇ад̇зсуязва ан̃н̃з ааг̇анд̇угаа бхигкуу ааг̇анд̇ваа аасанасаалааяа нисийд̣̇анд̇и; д̇ан̇кан̣ан̃н̃зва рааж̇абурисаа ааг̇анд̇ваа ‘‘бан̣ийд̇абхад̇д̇абад̇д̇з д̣̇зт̇аа’’д̇и вад̣̇анд̇и. ааг̇анд̇угаа тид̇игам̣ аж̇аананд̇аа г̇аахзнд̇и. д̇ан̇кан̣ан̃н̃зва жа тид̇игам̣ ж̇аананагабхигкуу ааг̇анд̇ваа ‘‘гим̣ г̇аахзт̇аа’’д̇и вад̣̇анд̇и. ‘‘рааж̇аг̇зхз бан̣ийд̇абхад̇д̇а’’нд̇и. ‘‘гад̇ивассад̇о бадтааяаа’’д̇и? ‘‘зд̇д̇агавассад̇о наамаа’’д̇и. ‘‘маа г̇аахзт̇аа’’д̇и ниваарзд̇ваа тид̇игааяа г̇аахзд̇аб̣б̣ам̣. г̇аахид̇з ааг̇ад̇зхиби бад̇д̇ад̣̇аанагаалз ааг̇ад̇зхиби д̣̇иннагаалз ааг̇ад̇зхиби рааж̇аг̇зхад̇о бад̇д̇з буурзд̇ваа аахадагаалз ааг̇ад̇зхиби рааж̇аа ‘‘аж̇ж̇а бхигкууязва ааг̇ажчанд̇уу’’д̇и бзсзд̇ваа бхигкуунам̣язва хад̇т̇з бин̣д̣абаад̇ам̣ д̣̇зд̇и; звам̣ д̣̇иннабин̣д̣абаад̇ам̣ г̇ахзд̇ваа ааг̇ад̇агаалз ааг̇ад̇зхиби тид̇игам̣ ж̇аананагабхигкуухи ‘‘маа бхун̃ж̇ид̇т̇аа’’д̇и ваарзд̇ваа тид̇игааяамзва г̇аахзд̇аб̣б̣ам̣.
Ekā kūṭaṭṭhitikā nāma hoti. Rañño vā hi rājamahāmattassa vā gehe atipaṇītāni aṭṭha uddesabhattāni niccaṃ diyyanti, tāni ekacārikabhattāni katvā bhikkhū visuṃ ṭhitikāya paribhuñjanti. Ekacce bhikkhū ‘‘sve dāni amhākaṃ pāpuṇissantī’’ti attano ṭhitikaṃ sallakkhetvā gatā, tesu anāgatesuyeva aññe āgantukā bhikkhū āgantvā āsanasālāya nisīdanti; taṅkhaṇaññeva rājapurisā āgantvā ‘‘paṇītabhattapatte dethā’’ti vadanti. Āgantukā ṭhitikaṃ ajānantā gāhenti. Taṅkhaṇaññeva ca ṭhitikaṃ jānanakabhikkhū āgantvā ‘‘kiṃ gāhethā’’ti vadanti. ‘‘Rājagehe paṇītabhatta’’nti. ‘‘Kativassato paṭṭhāyā’’ti? ‘‘Ettakavassato nāmā’’ti. ‘‘Mā gāhethā’’ti nivāretvā ṭhitikāya gāhetabbaṃ. Gāhite āgatehipi pattadānakāle āgatehipi dinnakāle āgatehipi rājagehato patte pūretvā āhaṭakāle āgatehipi rājā ‘‘ajja bhikkhūyeva āgacchantū’’ti pesetvā bhikkhūnaṃyeva hatthe piṇḍapātaṃ deti; evaṃ dinnapiṇḍapātaṃ gahetvā āgatakāle āgatehipi ṭhitikaṃ jānanakabhikkhūhi ‘‘mā bhuñjitthā’’ti vāretvā ṭhitikāyameva gāhetabbaṃ.
ат̇а нз рааж̇аа бхож̇зд̇ваа бад̇д̇зби нзсам̣ буурзд̇ваа д̣̇зд̇и, яам̣ аахадам̣ д̇ам̣ тид̇игааяа г̇аахзд̇аб̣б̣ам̣. сажз бана ‘‘маа д̇ужчахад̇т̇аа г̇ажчанд̇уу’’д̇и т̇огамзва бад̇д̇зсу багкид̇д̇ам̣ ход̇и, д̇ам̣ на г̇аахзд̇аб̣б̣ам̣. ат̇а бхун̃ж̇ид̇ваа д̇ужчабад̇д̇аава ааг̇ажчанд̇и, яам̣ д̇зхи бхуд̇д̇ам̣, д̇ам̣ нзсам̣ г̇ийваа ход̇ийд̇и махаасумад̇т̇зро ааха. махаабад̣̇умад̇т̇зро банааха – ‘‘г̇ийваагижжам̣ зд̇т̇а над̇т̇и, тид̇игам̣ бана аж̇аананд̇зхи яаава ж̇аананагаа ааг̇ажчанд̇и, д̇аава нисийд̣̇ид̇аб̣б̣ам̣ сияаа; звам̣ санд̇зби бхуд̇д̇ам̣ субхуд̇д̇ам̣, ид̣̇аани бад̇д̇адтаанзна г̇аахзд̇аб̣б̣а’’нд̇и.
Atha ne rājā bhojetvā pattepi nesaṃ pūretvā deti, yaṃ āhaṭaṃ taṃ ṭhitikāya gāhetabbaṃ. Sace pana ‘‘mā tucchahatthā gacchantū’’ti thokameva pattesu pakkhittaṃ hoti, taṃ na gāhetabbaṃ. Atha bhuñjitvā tucchapattāva āgacchanti, yaṃ tehi bhuttaṃ, taṃ nesaṃ gīvā hotīti mahāsumatthero āha. Mahāpadumatthero panāha – ‘‘gīvākiccaṃ ettha natthi, ṭhitikaṃ pana ajānantehi yāva jānanakā āgacchanti, tāva nisīditabbaṃ siyā; evaṃ santepi bhuttaṃ subhuttaṃ, idāni pattaṭṭhānena gāhetabba’’nti.
зго д̇ижийварабаривааро сад̇аг̇гханаго бин̣д̣абаад̇о авассигасса бхигкуно бад̇д̇о, вихаарз жа ‘‘зваруубо бин̣д̣абаад̇о авассигасса бад̇д̇о’’д̇и ликид̇ваа табзсум̣. ат̇а садтивассажжаязна ан̃н̃о д̇ат̇ааруубо бин̣д̣абаад̇о уббанно, аяам̣ гим̣ авассигадтид̇игааяа г̇аахзд̇аб̣б̣о, уд̣̇ааху садтивассигадтид̇игааяаад̇и. садтивассигадтид̇игааяаад̇и вуд̇д̇ам̣, аяан̃хи бхигку тид̇игам̣ г̇ахзд̇вааязва вад̣дхид̇од̇и.
Eko ticīvaraparivāro satagghanako piṇḍapāto avassikassa bhikkhuno patto, vihāre ca ‘‘evarūpo piṇḍapāto avassikassa patto’’ti likhitvā ṭhapesuṃ. Atha saṭṭhivassaccayena añño tathārūpo piṇḍapāto uppanno, ayaṃ kiṃ avassikaṭṭhitikāya gāhetabbo, udāhu saṭṭhivassikaṭṭhitikāyāti. Saṭṭhivassikaṭṭhitikāyāti vuttaṃ, ayañhi bhikkhu ṭhitikaṃ gahetvāyeva vaḍḍhitoti.
зго уд̣̇д̣̇зсабхад̇д̇ам̣ бхун̃ж̇ид̇ваа сааман̣зро ж̇аад̇о, буна д̇ам̣ бхад̇д̇ам̣ сааман̣зрадтид̇игааяа бад̇д̇ам̣ г̇ан̣хид̇ум̣ лабхад̇и. аяам̣ гира анд̇араабхадтаго наама. яо бана барибун̣н̣авассо сааман̣зро ‘‘свз уд̣̇д̣̇зсабхад̇д̇ам̣ лабхиссад̇ий’’д̇и аж̇ж̇зва убасамбаж̇ж̇ад̇и, ад̇игганд̇аа д̇асса тид̇игаа. згасса бхигкуно уд̣̇д̣̇зсабхад̇д̇ам̣ бад̇д̇ам̣, бад̇д̇о жасса на д̇ужчо ход̇и, со ан̃н̃асса самийбз нисиннасса бад̇д̇ам̣ д̣̇аабзд̇и, д̇ан̃жз т̇зяяааяа харанд̇и, г̇ийваа ход̇и . сажз бана со бхигку ‘‘маяхам̣ бад̇д̇ам̣ д̣̇аммий’’д̇и саяамзва д̣̇зд̇и, асса г̇ийваа на ход̇и. ат̇ааби д̇зна бхад̇д̇зна анад̇т̇иго худ̇ваа ‘‘алам̣ маяхам̣, д̇авзд̇ам̣ бхад̇д̇ам̣ д̣̇амми, бад̇д̇ам̣ бзсзд̇ваа аахараабзхий’’д̇и ан̃н̃ам̣ вад̣̇ад̇и, яам̣ д̇ад̇о аахарийяад̇и саб̣б̣ам̣ бад̇д̇асаамигасса ход̇и. бад̇д̇ан̃жз т̇зяяааяа харанд̇и, сухадо; бхад̇д̇асса д̣̇иннад̇д̇аа г̇ийваа на ход̇и.
Eko uddesabhattaṃ bhuñjitvā sāmaṇero jāto, puna taṃ bhattaṃ sāmaṇeraṭṭhitikāya pattaṃ gaṇhituṃ labhati. Ayaṃ kira antarābhaṭṭhako nāma. Yo pana paripuṇṇavasso sāmaṇero ‘‘sve uddesabhattaṃ labhissatī’’ti ajjeva upasampajjati, atikkantā tassa ṭhitikā. Ekassa bhikkhuno uddesabhattaṃ pattaṃ, patto cassa na tuccho hoti, so aññassa samīpe nisinnassa pattaṃ dāpeti, tañce theyyāya haranti, gīvā hoti . Sace pana so bhikkhu ‘‘mayhaṃ pattaṃ dammī’’ti sayameva deti, assa gīvā na hoti. Athāpi tena bhattena anatthiko hutvā ‘‘alaṃ mayhaṃ, tavetaṃ bhattaṃ dammi, pattaṃ pesetvā āharāpehī’’ti aññaṃ vadati, yaṃ tato āharīyati sabbaṃ pattasāmikassa hoti. Pattañce theyyāya haranti, suhaṭo; bhattassa dinnattā gīvā na hoti.
вихаарз д̣̇аса бхигкуу хонд̇и, д̇зсу нава бин̣д̣абаад̇игаа, зго саад̣̇ияанаго. ‘‘д̣̇аса уд̣̇д̣̇зсабад̇д̇з д̣̇зт̇аа’’д̇и вуд̇д̇з бин̣д̣абаад̇игаа г̇ахзд̇ум̣ на ижчанд̇и. ид̇аро бхигку ‘‘саб̣б̣аани маяхам̣ баабун̣анд̇ий’’д̇и г̇ан̣хаад̇и, тид̇игаа на ход̇и. згзгам̣ жз баабзд̇ваа г̇ан̣хаад̇и, тид̇игаа д̇идтад̇и. звам̣ г̇аахзд̇ваа д̣̇асахиби бад̇д̇зхи аахараабзд̇ваа ‘‘бханд̇з, маяхам̣ сан̇г̇ахам̣ гарот̇аа’’д̇и нава бад̇д̇з бин̣д̣абаад̇игаанам̣ д̣̇зд̇и, бхигкуд̣̇ад̇д̇ияам̣ наамзд̇ам̣, г̇ан̣хид̇ум̣ ваддад̇и.
Vihāre dasa bhikkhū honti, tesu nava piṇḍapātikā, eko sādiyanako. ‘‘Dasa uddesapatte dethā’’ti vutte piṇḍapātikā gahetuṃ na icchanti. Itaro bhikkhu ‘‘sabbāni mayhaṃ pāpuṇantī’’ti gaṇhāti, ṭhitikā na hoti. Ekekaṃ ce pāpetvā gaṇhāti, ṭhitikā tiṭṭhati. Evaṃ gāhetvā dasahipi pattehi āharāpetvā ‘‘bhante, mayhaṃ saṅgahaṃ karothā’’ti nava patte piṇḍapātikānaṃ deti, bhikkhudattiyaṃ nāmetaṃ, gaṇhituṃ vaṭṭati.
сажз со убаасаго ‘‘бханд̇з, гхарам̣ ааг̇анд̇аб̣б̣а’’нд̇и вад̣̇ад̇и, со жа бхигку д̇з бхигкуу ‘‘зт̇а, бханд̇з, маяхам̣ сахааяаа хот̇аа’’д̇и д̇асса гхарам̣ г̇ажчад̇и. яам̣ д̇ад̇т̇а лабхад̇и, саб̣б̣ам̣ д̇ассзва ход̇и. ид̇арз д̇зна д̣̇иннам̣ лабханд̇и. ат̇а нзсам̣ гхарзязва нисийд̣̇аабзд̇ваа д̣̇агкин̣од̣̇агам̣ д̣̇ад̇ваа яааг̇укаж̇ж̇агаад̣̇ийни д̣̇знд̇и, ‘‘бханд̇з, яам̣ мануссаа д̣̇знд̇и, д̇ам̣ г̇ан̣хат̇аа’’д̇и д̇асса бхигкуно важанзнзва ид̇арзсам̣ ваддад̇и. бхуд̇д̇аавийнам̣ бад̇д̇з буурзд̇ваа г̇ан̣хид̇ваа г̇аманад̇т̇ааяа д̣̇знд̇и, саб̣б̣ам̣ д̇ассзва бхигкуно ход̇и, д̇зна д̣̇иннам̣ ид̇арзсам̣ ваддад̇и.
Sace so upāsako ‘‘bhante, gharaṃ āgantabba’’nti vadati, so ca bhikkhu te bhikkhū ‘‘etha, bhante, mayhaṃ sahāyā hothā’’ti tassa gharaṃ gacchati. Yaṃ tattha labhati, sabbaṃ tasseva hoti. Itare tena dinnaṃ labhanti. Atha nesaṃ ghareyeva nisīdāpetvā dakkhiṇodakaṃ datvā yāgukhajjakādīni denti, ‘‘bhante, yaṃ manussā denti, taṃ gaṇhathā’’ti tassa bhikkhuno vacaneneva itaresaṃ vaṭṭati. Bhuttāvīnaṃ patte pūretvā gaṇhitvā gamanatthāya denti, sabbaṃ tasseva bhikkhuno hoti, tena dinnaṃ itaresaṃ vaṭṭati.
яад̣̇и бана д̇з вихаарзязва д̇зна бхигкунаа ‘‘бханд̇з, маяхам̣ бхигкам̣ г̇ан̣хат̇а, мануссаанан̃жа важанам̣ гаад̇ум̣ ваддад̇ий’’д̇и вуд̇д̇аа г̇ажчанд̇и, яам̣ д̇ад̇т̇а бхун̃ж̇анд̇и жзва нийхаранд̇и жа, саб̣б̣ам̣ д̇ам̣ д̇ассзва санд̇агам̣. ат̇ааби ‘‘маяхам̣ бхигкам̣ г̇ан̣хат̇аа’’д̇и авуд̇д̇аа ‘‘мануссаанам̣ важанам̣ гаад̇ум̣ ваддад̇ий’’д̇и г̇ажчанд̇и, д̇ад̇ра жз згасса мад̇хурзна сарзна анумод̣̇анам̣ гаронд̇асса суд̇ваа т̇зраанан̃жа убасамз басийд̣̇ид̇ваа б̣ахум̣ саман̣абаригкаарам̣ д̣̇знд̇и, аяам̣ т̇зрзсу басаад̣̇зна уббанно ‘‘агад̇абхааг̇о’’ наама, д̇асмаа саб̣б̣зсам̣ баабун̣аад̇и.
Yadi pana te vihāreyeva tena bhikkhunā ‘‘bhante, mayhaṃ bhikkhaṃ gaṇhatha, manussānañca vacanaṃ kātuṃ vaṭṭatī’’ti vuttā gacchanti, yaṃ tattha bhuñjanti ceva nīharanti ca, sabbaṃ taṃ tasseva santakaṃ. Athāpi ‘‘mayhaṃ bhikkhaṃ gaṇhathā’’ti avuttā ‘‘manussānaṃ vacanaṃ kātuṃ vaṭṭatī’’ti gacchanti, tatra ce ekassa madhurena sarena anumodanaṃ karontassa sutvā therānañca upasame pasīditvā bahuṃ samaṇaparikkhāraṃ denti, ayaṃ theresu pasādena uppanno ‘‘akatabhāgo’’ nāma, tasmā sabbesaṃ pāpuṇāti.
зго сан̇гхад̇о уд̣̇д̣̇исаабзд̇ваа тид̇игааяа г̇аахид̇ам̣ бад̇д̇ам̣ харид̇ваа бан̣ийд̇асса каад̣̇анийяабхож̇анийяасса буурзд̇ваа аахарид̇ваа ‘‘имам̣, бханд̇з, саб̣б̣о сан̇гхо барибхун̃ж̇ад̇уу’’д̇и д̣̇зд̇и, саб̣б̣зхи бхааж̇зд̇ваа барибхун̃ж̇ид̇аб̣б̣ам̣. бад̇д̇асаамигасса бана ад̇игганд̇амби тид̇игам̣ табзд̇ваа ан̃н̃ам̣ уд̣̇д̣̇зсабхад̇д̇ам̣ д̣̇аад̇аб̣б̣ам̣. ат̇а ‘‘батамам̣язва саб̣б̣ам̣ сан̇гхигам̣ бад̇д̇ам̣ д̣̇зт̇аа’’д̇и вад̣̇ад̇и, згасса лаж̇ж̇ибхигкуно санд̇аго бад̇д̇о д̣̇аад̇аб̣б̣о. аахарид̇ваа жа ‘‘саб̣б̣о сан̇гхо барибхун̃ж̇ад̇уу’’д̇и вуд̇д̇з бхааж̇зд̇ваа барибхун̃ж̇ид̇аб̣б̣ам̣.
Eko saṅghato uddisāpetvā ṭhitikāya gāhitaṃ pattaṃ haritvā paṇītassa khādanīyabhojanīyassa pūretvā āharitvā ‘‘imaṃ, bhante, sabbo saṅgho paribhuñjatū’’ti deti, sabbehi bhājetvā paribhuñjitabbaṃ. Pattasāmikassa pana atikkantampi ṭhitikaṃ ṭhapetvā aññaṃ uddesabhattaṃ dātabbaṃ. Atha ‘‘paṭhamaṃyeva sabbaṃ saṅghikaṃ pattaṃ dethā’’ti vadati, ekassa lajjibhikkhuno santako patto dātabbo. Āharitvā ca ‘‘sabbo saṅgho paribhuñjatū’’ti vutte bhājetvā paribhuñjitabbaṃ.
зго баад̇ияаа бхад̇д̇ам̣ аахарид̇ваа ‘‘сан̇гхуд̣̇д̣̇зсам̣ д̣̇аммий’’д̇и вад̣̇ад̇и, згзгам̣ аалобам̣ ад̣̇ад̇ваа тид̇игааяа згасса яаабанамад̇д̇ам̣ гад̇ваа д̣̇аад̇аб̣б̣ам̣. ат̇а со бхад̇д̇ам̣ аахарид̇ваа гин̃жи вад̇д̇ум̣ аж̇аананд̇о д̇ун̣хийбхууд̇о ажчад̇и, ‘‘гасса д̇з аанийд̇ам̣, гасса д̣̇аад̇угаамосий’’д̇и на вад̇д̇аб̣б̣ам̣. бужчаасабхааг̇зна хи ‘‘д̇умхаагам̣ аанийд̇ам̣, д̇умхаагам̣ д̣̇аад̇угаамомхий’’д̇и вад̣̇зяяа, д̇ад̇о д̇ам̣ бхигкум̣ ан̃н̃з бхигкуу ж̇иг̇ужчанд̇аа г̇ийвам̣ баривад̇д̇зд̇ваа ологзд̇аб̣б̣амби на ман̃н̃зяяум̣. сажз бана ‘‘гухим̣ яааси, гим̣ гаронд̇о аахин̣д̣асий’’д̇и вуд̇д̇з ‘‘уд̣̇д̣̇зсабхад̇д̇ам̣ г̇ахзд̇ваа ааг̇ад̇омхий’’д̇и вад̣̇ад̇и, згзна лаж̇ж̇ибхигкунаа тид̇игааяа г̇аахзд̇аб̣б̣ам̣. сажз аабхад̇ам̣ б̣аху ход̇и, саб̣б̣зсам̣ баход̇и, тид̇игаагижжам̣ над̇т̇и, т̇зраасанад̇о бадтааяа бад̇д̇ам̣ буурзд̇ваа д̣̇аад̇аб̣б̣ам̣.
Eko pātiyā bhattaṃ āharitvā ‘‘saṅghuddesaṃ dammī’’ti vadati, ekekaṃ ālopaṃ adatvā ṭhitikāya ekassa yāpanamattaṃ katvā dātabbaṃ. Atha so bhattaṃ āharitvā kiñci vattuṃ ajānanto tuṇhībhūto acchati, ‘‘kassa te ānītaṃ, kassa dātukāmosī’’ti na vattabbaṃ. Pucchāsabhāgena hi ‘‘tumhākaṃ ānītaṃ, tumhākaṃ dātukāmomhī’’ti vadeyya, tato taṃ bhikkhuṃ aññe bhikkhū jigucchantā gīvaṃ parivattetvā oloketabbampi na maññeyyuṃ. Sace pana ‘‘kuhiṃ yāsi, kiṃ karonto āhiṇḍasī’’ti vutte ‘‘uddesabhattaṃ gahetvā āgatomhī’’ti vadati, ekena lajjibhikkhunā ṭhitikāya gāhetabbaṃ. Sace ābhataṃ bahu hoti, sabbesaṃ pahoti, ṭhitikākiccaṃ natthi, therāsanato paṭṭhāya pattaṃ pūretvā dātabbaṃ.
‘‘сан̇гхуд̣̇д̣̇зсабад̇д̇ам̣ д̣̇зт̇аа’’д̇и вуд̇д̇з ‘‘гим̣ аахариссасий’’д̇и авад̇ваа багад̇идтид̇игааяа зва г̇аахзд̇аб̣б̣ам̣. яо бана бааяаасо ваа расабин̣д̣абаад̇о ваа нижжам̣ лаб̣бхад̇и; зваруубаанам̣ бан̣ийд̇абхож̇анаанам̣ аавзн̣игаа тид̇игаа гаад̇аб̣б̣аа, д̇ат̇аа сабариваарааяа яааг̇уяаа махаг̇гхаанам̣ палаанам̣ бан̣ийд̇аанан̃жа каж̇ж̇агаанам̣. багад̇ибхад̇д̇аяааг̇упалакаж̇ж̇агаанам̣ бана згаава тид̇игаа гаад̇аб̣б̣аа. ‘‘саббим̣ аахариссаамий’’д̇и вуд̇д̇з саб̣б̣асаббийнам̣ згаава тид̇игаа ваддад̇и, д̇ат̇аа саб̣б̣ад̇злаанам̣. ‘‘мад̇хум̣ аахариссаамий’’д̇и вуд̇д̇з бана мад̇хуно згаава тид̇игаа ваддад̇и, д̇ат̇аа паан̣ид̇асса ладтимад̇хугаад̣̇ийнан̃жа бхзсаж̇ж̇аанам̣. сажз бана г̇анд̇хамаалам̣ сан̇гхуд̣̇д̣̇зсам̣ д̣̇знд̇и, бин̣д̣абаад̇игасса ваддад̇и, на ваддад̇ийд̇и. аамисассзва бадигкид̇д̇ад̇д̇аа ваддад̇и, сан̇гхам̣ уд̣̇д̣̇исса д̣̇иннад̇д̇аа бана на г̇ахзд̇аб̣б̣анд̇и вад̣̇анд̇и.
‘‘Saṅghuddesapattaṃ dethā’’ti vutte ‘‘kiṃ āharissasī’’ti avatvā pakatiṭṭhitikāya eva gāhetabbaṃ. Yo pana pāyāso vā rasapiṇḍapāto vā niccaṃ labbhati; evarūpānaṃ paṇītabhojanānaṃ āveṇikā ṭhitikā kātabbā, tathā saparivārāya yāguyā mahagghānaṃ phalānaṃ paṇītānañca khajjakānaṃ. Pakatibhattayāguphalakhajjakānaṃ pana ekāva ṭhitikā kātabbā. ‘‘Sappiṃ āharissāmī’’ti vutte sabbasappīnaṃ ekāva ṭhitikā vaṭṭati, tathā sabbatelānaṃ. ‘‘Madhuṃ āharissāmī’’ti vutte pana madhuno ekāva ṭhitikā vaṭṭati, tathā phāṇitassa laṭṭhimadhukādīnañca bhesajjānaṃ. Sace pana gandhamālaṃ saṅghuddesaṃ denti, piṇḍapātikassa vaṭṭati, na vaṭṭatīti. Āmisasseva paṭikkhittattā vaṭṭati, saṅghaṃ uddissa dinnattā pana na gahetabbanti vadanti.
уд̣̇д̣̇зсабхад̇д̇агат̇аа нидтид̇аа.
Uddesabhattakathā niṭṭhitā.
