| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
উদ্দেসভত্তকথাৰণ্ণনা
Uddesabhattakathāvaṇṇanā
ভোজনসালাযাতি ভত্তুদ্দেসট্ঠানং সন্ধায ৰুত্তং। একৰল়ঞ্জন্তি একদ্ৰারেন ৰল়ঞ্জিতব্বং। নানানিৰেসনেসূতি নানাকুলস্স নানূপচারেসু নিৰেসনেসু।
Bhojanasālāyāti bhattuddesaṭṭhānaṃ sandhāya vuttaṃ. Ekavaḷañjanti ekadvārena vaḷañjitabbaṃ. Nānānivesanesūti nānākulassa nānūpacāresu nivesanesu.
নিসিন্নস্সপি নিদ্দাযন্তস্সপীতি অনাদরে সামিৰচনং, ৰুড্ঢতরে নিদ্দাযন্তে নৰকস্স গাহিতং সুগ্গহিতন্তি অত্থো।
Nisinnassapi niddāyantassapīti anādare sāmivacanaṃ, vuḍḍhatare niddāyante navakassa gāhitaṃ suggahitanti attho.
ৰিস্সট্ঠদূতোতি যথারুচি ৰত্তুং লভনতো নিরাসঙ্কদূতো। পুচ্ছাসভাগেনাতি পুচ্ছাৰচনপটিভাগেন। ‘‘একা কূটট্ঠিতিকা নামা’’তি ৰুত্তমেৰত্থং ৰিভাৰেতুং ‘‘রঞ্ঞো ৰা হী’’তিআদি ৰুত্তং।
Vissaṭṭhadūtoti yathāruci vattuṃ labhanato nirāsaṅkadūto. Pucchāsabhāgenāti pucchāvacanapaṭibhāgena. ‘‘Ekā kūṭaṭṭhitikā nāmā’’ti vuttamevatthaṃ vibhāvetuṃ ‘‘rañño vā hī’’tiādi vuttaṃ.
সব্বং পত্তস্সামিকস্স হোতীতি চীৰরাদিকম্পি সব্বং পত্তস্সামিকস্সেৰ হোতি, মযা ভত্তমেৰ সন্ধায ৰুত্তং, ন চীৰরাদিন্তি ৰত্ৰা গহেতুং ন ৰট্টতীতি অত্থো।
Sabbaṃ pattassāmikassa hotīti cīvarādikampi sabbaṃ pattassāmikasseva hoti, mayā bhattameva sandhāya vuttaṃ, na cīvarādinti vatvā gahetuṃ na vaṭṭatīti attho.
অকতভাগোনামাতি আগন্তুকভাগো নাম, অদিন্নপুব্বভাগোতি অত্থো।
Akatabhāgonāmāti āgantukabhāgo nāma, adinnapubbabhāgoti attho.
কিং আহরীযতীতি অৰত্ৰাতি ‘‘কতরভত্তং ৰা তযা আহরীযতী’’তি দাযকং অপুচ্ছিত্ৰা। পকতিট্ঠিতিকাযাতি উদ্দেসভত্তট্ঠিতিকায।
Kiṃ āharīyatīti avatvāti ‘‘katarabhattaṃ vā tayā āharīyatī’’ti dāyakaṃ apucchitvā. Pakatiṭṭhitikāyāti uddesabhattaṭṭhitikāya.
উদ্দেসভত্তকথাৰণ্ণনা নিট্ঠিতা।
Uddesabhattakathāvaṇṇanā niṭṭhitā.
