| Library / Tipiṭaka / तिपिटक • Tipiṭaka / विमतिविनोदनी-टीका • Vimativinodanī-ṭīkā |
उद्देसभत्तकथावण्णना
Uddesabhattakathāvaṇṇanā
भोजनसालायाति भत्तुद्देसट्ठानं सन्धाय वुत्तं। एकवळञ्जन्ति एकद्वारेन वळञ्जितब्बं। नानानिवेसनेसूति नानाकुलस्स नानूपचारेसु निवेसनेसु।
Bhojanasālāyāti bhattuddesaṭṭhānaṃ sandhāya vuttaṃ. Ekavaḷañjanti ekadvārena vaḷañjitabbaṃ. Nānānivesanesūti nānākulassa nānūpacāresu nivesanesu.
निसिन्नस्सपि निद्दायन्तस्सपीति अनादरे सामिवचनं, वुड्ढतरे निद्दायन्ते नवकस्स गाहितं सुग्गहितन्ति अत्थो।
Nisinnassapi niddāyantassapīti anādare sāmivacanaṃ, vuḍḍhatare niddāyante navakassa gāhitaṃ suggahitanti attho.
विस्सट्ठदूतोति यथारुचि वत्तुं लभनतो निरासङ्कदूतो। पुच्छासभागेनाति पुच्छावचनपटिभागेन। ‘‘एका कूटट्ठितिका नामा’’ति वुत्तमेवत्थं विभावेतुं ‘‘रञ्ञो वा ही’’तिआदि वुत्तं।
Vissaṭṭhadūtoti yathāruci vattuṃ labhanato nirāsaṅkadūto. Pucchāsabhāgenāti pucchāvacanapaṭibhāgena. ‘‘Ekā kūṭaṭṭhitikā nāmā’’ti vuttamevatthaṃ vibhāvetuṃ ‘‘rañño vā hī’’tiādi vuttaṃ.
सब्बं पत्तस्सामिकस्स होतीति चीवरादिकम्पि सब्बं पत्तस्सामिकस्सेव होति, मया भत्तमेव सन्धाय वुत्तं, न चीवरादिन्ति वत्वा गहेतुं न वट्टतीति अत्थो।
Sabbaṃ pattassāmikassa hotīti cīvarādikampi sabbaṃ pattassāmikasseva hoti, mayā bhattameva sandhāya vuttaṃ, na cīvarādinti vatvā gahetuṃ na vaṭṭatīti attho.
अकतभागोनामाति आगन्तुकभागो नाम, अदिन्नपुब्बभागोति अत्थो।
Akatabhāgonāmāti āgantukabhāgo nāma, adinnapubbabhāgoti attho.
किं आहरीयतीति अवत्वाति ‘‘कतरभत्तं वा तया आहरीयती’’ति दायकं अपुच्छित्वा। पकतिट्ठितिकायाति उद्देसभत्तट्ठितिकाय।
Kiṃ āharīyatīti avatvāti ‘‘katarabhattaṃ vā tayā āharīyatī’’ti dāyakaṃ apucchitvā. Pakatiṭṭhitikāyāti uddesabhattaṭṭhitikāya.
उद्देसभत्तकथावण्णना निट्ठिता।
Uddesabhattakathāvaṇṇanā niṭṭhitā.
