| Library / Tipiṭaka / ติปิฎก • Tipiṭaka / วชิรพุทฺธิ-ฎีกา • Vajirabuddhi-ṭīkā |
สงฺฆภตฺตาทิอนุชานนกถาวณฺณนา
Saṅghabhattādianujānanakathāvaṇṇanā
อุเทฺทสภตฺตกถาวณฺณนา
Uddesabhattakathāvaṇṇanā
๓๒๕. ยา ภตฺตุเทฺทสฎฺฐานภูตาย โภชนสาลาย ปกติฐิติกาฯ ทินฺนํ ปนาติ ยถา โส ทายโก เทติ, ตํ ทเสฺสโนฺต ‘‘สงฺฆโต ภเนฺต’’ติอาทิมาหฯ เอกวฬญฺชนฺติ เอกทฺวาเรน วฬญฺชิตพฺพํ ฯ ติจีวรปริวารนฺติ เอตฺถ ‘‘อุทกมตฺตลาภี วิย อโญฺญปิ อุเทฺทสภตฺตํ อลภิตฺวา วตฺถาทิมเนกปฺปการํ ลภติ เจ, ตเสฺสว ต’’นฺติ ลิขิตํฯ ‘‘อุเทฺทสปเตฺต เทถา’ติ วตฺวา คเหตฺวา อาคตภาเวน สงฺฆสฺส ปริจฺจตฺตํ น โหติเยว ตเสฺสว หเตฺถ คตตฺตา, ตสฺมา เตหิ วุตฺตกฺกเมน สเพฺพหิ ภาเชตฺวา ภุญฺชิตพฺพ’’นฺติ วุตฺตํฯ ปฎิปาฎิปตฺตํ วา ฐิติกาย ฐิตปตฺตํ วาฯ ‘‘กูฎฎฺฐิติกา นาม อคฺคเหตพฺพานมฺปิ คาหิตตฺตา’’ติ ลิขิตํ, ‘‘ปณีตภตฺตฎฺฐิติกญฺจ อชานิตฺวา มิเสฺสตฺวา คาหิเตปิ เอวเมว ปฎิปชฺชิตพฺพ’’นฺติ จ ลิขิตํฯ ตเญฺจ เถยฺยาย หรนฺติ ปตฺตหารกา, อาณาปกสฺส คีวา โหติฯ อติกฺกนฺตมฺปิ ฐิติกํ ฐเปตฺวาติ เอตฺถ ‘‘ตํทิวสเมว เจ ภิกฺขา ลพฺภติ, อปรทิวสโต ปฎฺฐาย น ลพฺภติ กิรา’’ติ ลิขิตํฯ ปจฺฉา ‘‘สโพฺพ สโงฺฆ ปริภุญฺชตู’’ติ อวุเตฺตปิ ภาเชตฺวา ปริภุญฺชิตพฺพํฯ ‘‘เอตฺตเก ภิกฺขู สงฺฆโต อุทฺทิสิตฺวา เทถา’ติ อวตฺวา ‘เอตฺตกานํ ภิกฺขูนํ ภตฺตํ คณฺหถา’ติ ทินฺนํ สงฺฆิกนิมนฺตนํ นามา’’ติ ลิขิตํฯ
325.Yā bhattuddesaṭṭhānabhūtāya bhojanasālāya pakatiṭhitikā. Dinnaṃ panāti yathā so dāyako deti, taṃ dassento ‘‘saṅghato bhante’’tiādimāha. Ekavaḷañjanti ekadvārena vaḷañjitabbaṃ . Ticīvaraparivāranti ettha ‘‘udakamattalābhī viya aññopi uddesabhattaṃ alabhitvā vatthādimanekappakāraṃ labhati ce, tasseva ta’’nti likhitaṃ. ‘‘Uddesapatte dethā’ti vatvā gahetvā āgatabhāvena saṅghassa pariccattaṃ na hotiyeva tasseva hatthe gatattā, tasmā tehi vuttakkamena sabbehi bhājetvā bhuñjitabba’’nti vuttaṃ. Paṭipāṭipattaṃ vā ṭhitikāya ṭhitapattaṃ vā. ‘‘Kūṭaṭṭhitikā nāma aggahetabbānampi gāhitattā’’ti likhitaṃ, ‘‘paṇītabhattaṭṭhitikañca ajānitvā missetvā gāhitepi evameva paṭipajjitabba’’nti ca likhitaṃ. Tañce theyyāya haranti pattahārakā, āṇāpakassa gīvā hoti. Atikkantampi ṭhitikaṃ ṭhapetvāti ettha ‘‘taṃdivasameva ce bhikkhā labbhati, aparadivasato paṭṭhāya na labbhati kirā’’ti likhitaṃ. Pacchā ‘‘sabbo saṅgho paribhuñjatū’’ti avuttepi bhājetvā paribhuñjitabbaṃ. ‘‘Ettake bhikkhū saṅghato uddisitvā dethā’ti avatvā ‘ettakānaṃ bhikkhūnaṃ bhattaṃ gaṇhathā’ti dinnaṃ saṅghikanimantanaṃ nāmā’’ti likhitaṃ.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / จูฬวคฺคปาฬิ • Cūḷavaggapāḷi / สงฺฆภตฺตาทิอนุชานนํ • Saṅghabhattādianujānanaṃ
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / จูฬวคฺค-อฎฺฐกถา • Cūḷavagga-aṭṭhakathā / สงฺฆภตฺตาทิอนุชานนกถา • Saṅghabhattādianujānanakathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / สงฺฆภตฺตาทิอนุชานนกถาวณฺณนา • Saṅghabhattādianujānanakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / สงฺฆภตฺตาทิอนุชานนกถาวณฺณนา • Saṅghabhattādianujānanakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / สงฺฆภตฺตาทิอนุชานนกถา • Saṅghabhattādianujānanakathā
