| Library / Tipiṭaka / ติปิฎก • Tipiṭaka / วิมติวิโนทนี-ฎีกา • Vimativinodanī-ṭīkā |
อุเทฺทสภตฺตกถาวณฺณนา
Uddesabhattakathāvaṇṇanā
โภชนสาลายาติ ภตฺตุเทฺทสฎฺฐานํ สนฺธาย วุตฺตํฯ เอกวฬญฺชนฺติ เอกทฺวาเรน วฬญฺชิตพฺพํฯ นานานิเวสเนสูติ นานากุลสฺส นานูปจาเรสุ นิเวสเนสุฯ
Bhojanasālāyāti bhattuddesaṭṭhānaṃ sandhāya vuttaṃ. Ekavaḷañjanti ekadvārena vaḷañjitabbaṃ. Nānānivesanesūti nānākulassa nānūpacāresu nivesanesu.
นิสินฺนสฺสปิ นิทฺทายนฺตสฺสปีติ อนาทเร สามิวจนํ, วุฑฺฒตเร นิทฺทายเนฺต นวกสฺส คาหิตํ สุคฺคหิตนฺติ อโตฺถฯ
Nisinnassapi niddāyantassapīti anādare sāmivacanaṃ, vuḍḍhatare niddāyante navakassa gāhitaṃ suggahitanti attho.
วิสฺสฎฺฐทูโตติ ยถารุจิ วตฺตุํ ลภนโต นิราสงฺกทูโตฯ ปุจฺฉาสภาเคนาติ ปุจฺฉาวจนปฎิภาเคนฯ ‘‘เอกา กูฎฎฺฐิติกา นามา’’ติ วุตฺตเมวตฺถํ วิภาเวตุํ ‘‘รโญฺญ วา หี’’ติอาทิ วุตฺตํฯ
Vissaṭṭhadūtoti yathāruci vattuṃ labhanato nirāsaṅkadūto. Pucchāsabhāgenāti pucchāvacanapaṭibhāgena. ‘‘Ekā kūṭaṭṭhitikā nāmā’’ti vuttamevatthaṃ vibhāvetuṃ ‘‘rañño vā hī’’tiādi vuttaṃ.
สพฺพํ ปตฺตสฺสามิกสฺส โหตีติ จีวราทิกมฺปิ สพฺพํ ปตฺตสฺสามิกเสฺสว โหติ, มยา ภตฺตเมว สนฺธาย วุตฺตํ, น จีวราทินฺติ วตฺวา คเหตุํ น วฎฺฎตีติ อโตฺถฯ
Sabbaṃ pattassāmikassa hotīti cīvarādikampi sabbaṃ pattassāmikasseva hoti, mayā bhattameva sandhāya vuttaṃ, na cīvarādinti vatvā gahetuṃ na vaṭṭatīti attho.
อกตภาโคนามาติ อาคนฺตุกภาโค นาม, อทินฺนปุพฺพภาโคติ อโตฺถฯ
Akatabhāgonāmāti āgantukabhāgo nāma, adinnapubbabhāgoti attho.
กิํ อาหรียตีติ อวตฺวาติ ‘‘กตรภตฺตํ วา ตยา อาหรียตี’’ติ ทายกํ อปุจฺฉิตฺวาฯ ปกติฎฺฐิติกายาติ อุเทฺทสภตฺตฎฺฐิติกายฯ
Kiṃ āharīyatīti avatvāti ‘‘katarabhattaṃ vā tayā āharīyatī’’ti dāyakaṃ apucchitvā. Pakatiṭṭhitikāyāti uddesabhattaṭṭhitikāya.
อุเทฺทสภตฺตกถาวณฺณนา นิฎฺฐิตาฯ
Uddesabhattakathāvaṇṇanā niṭṭhitā.
