| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
ឧទ្ទេសភត្តកថាវណ្ណនា
Uddesabhattakathāvaṇṇanā
ភោជនសាលាយាតិ ភត្តុទ្ទេសដ្ឋានំ សន្ធាយ វុត្តំ។ ឯកវឡញ្ជន្តិ ឯកទ្វារេន វឡញ្ជិតព្ពំ។ នានានិវេសនេសូតិ នានាកុលស្ស នានូបចារេសុ និវេសនេសុ។
Bhojanasālāyāti bhattuddesaṭṭhānaṃ sandhāya vuttaṃ. Ekavaḷañjanti ekadvārena vaḷañjitabbaṃ. Nānānivesanesūti nānākulassa nānūpacāresu nivesanesu.
និសិន្នស្សបិ និទ្ទាយន្តស្សបីតិ អនាទរេ សាមិវចនំ, វុឌ្ឍតរេ និទ្ទាយន្តេ នវកស្ស គាហិតំ សុគ្គហិតន្តិ អត្ថោ។
Nisinnassapi niddāyantassapīti anādare sāmivacanaṃ, vuḍḍhatare niddāyante navakassa gāhitaṃ suggahitanti attho.
វិស្សដ្ឋទូតោតិ យថារុចិ វត្តុំ លភនតោ និរាសង្កទូតោ។ បុច្ឆាសភាគេនាតិ បុច្ឆាវចនបដិភាគេន។ ‘‘ឯកា កូដដ្ឋិតិកា នាមា’’តិ វុត្តមេវត្ថំ វិភាវេតុំ ‘‘រញ្ញោ វា ហី’’តិអាទិ វុត្តំ។
Vissaṭṭhadūtoti yathāruci vattuṃ labhanato nirāsaṅkadūto. Pucchāsabhāgenāti pucchāvacanapaṭibhāgena. ‘‘Ekā kūṭaṭṭhitikā nāmā’’ti vuttamevatthaṃ vibhāvetuṃ ‘‘rañño vā hī’’tiādi vuttaṃ.
សព្ពំ បត្តស្សាមិកស្ស ហោតីតិ ចីវរាទិកម្បិ សព្ពំ បត្តស្សាមិកស្សេវ ហោតិ, មយា ភត្តមេវ សន្ធាយ វុត្តំ, ន ចីវរាទិន្តិ វត្វា គហេតុំ ន វដ្ដតីតិ អត្ថោ។
Sabbaṃ pattassāmikassa hotīti cīvarādikampi sabbaṃ pattassāmikasseva hoti, mayā bhattameva sandhāya vuttaṃ, na cīvarādinti vatvā gahetuṃ na vaṭṭatīti attho.
អកតភាគោនាមាតិ អាគន្តុកភាគោ នាម, អទិន្នបុព្ពភាគោតិ អត្ថោ។
Akatabhāgonāmāti āgantukabhāgo nāma, adinnapubbabhāgoti attho.
កិំ អាហរីយតីតិ អវត្វាតិ ‘‘កតរភត្តំ វា តយា អាហរីយតី’’តិ ទាយកំ អបុច្ឆិត្វា។ បកតិដ្ឋិតិកាយាតិ ឧទ្ទេសភត្តដ្ឋិតិកាយ។
Kiṃ āharīyatīti avatvāti ‘‘katarabhattaṃ vā tayā āharīyatī’’ti dāyakaṃ apucchitvā. Pakatiṭṭhitikāyāti uddesabhattaṭṭhitikāya.
ឧទ្ទេសភត្តកថាវណ្ណនា និដ្ឋិតា។
Uddesabhattakathāvaṇṇanā niṭṭhitā.
