| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
ဥဒ္ဒေသဘတ္တကထာဝဏ္ဏနာ
Uddesabhattakathāvaṇṇanā
ဘောဇနသာလာယာတိ ဘတ္တုဒ္ဒေသဋ္ဌာနံ သန္ဓာယ ဝုတ္တံ။ ဧကဝဠဉ္ဇန္တိ ဧကဒ္ဝာရေန ဝဠဉ္ဇိတဗ္ဗံ။ နာနာနိဝေသနေသူတိ နာနာကုလသ္သ နာနူပစာရေသု နိဝေသနေသု။
Bhojanasālāyāti bhattuddesaṭṭhānaṃ sandhāya vuttaṃ. Ekavaḷañjanti ekadvārena vaḷañjitabbaṃ. Nānānivesanesūti nānākulassa nānūpacāresu nivesanesu.
နိသိန္နသ္သပိ နိဒ္ဒာယန္တသ္သပီတိ အနာဒရေ သာမိဝစနံ, ဝုဍ္ဎတရေ နိဒ္ဒာယန္တေ နဝကသ္သ ဂာဟိတံ သုဂ္ဂဟိတန္တိ အတ္ထော။
Nisinnassapi niddāyantassapīti anādare sāmivacanaṃ, vuḍḍhatare niddāyante navakassa gāhitaṃ suggahitanti attho.
ဝိသ္သဋ္ဌဒူတောတိ ယထာရုစိ ဝတ္တုံ လဘနတော နိရာသင္ကဒူတော။ ပုစ္ဆာသဘာဂေနာတိ ပုစ္ဆာဝစနပဋိဘာဂေန။ ‘‘ဧကာ ကူဋဋ္ဌိတိကာ နာမာ’’တိ ဝုတ္တမေဝတ္ထံ ဝိဘာဝေတုံ ‘‘ရညော ဝာ ဟီ’’တိအာဒိ ဝုတ္တံ။
Vissaṭṭhadūtoti yathāruci vattuṃ labhanato nirāsaṅkadūto. Pucchāsabhāgenāti pucchāvacanapaṭibhāgena. ‘‘Ekā kūṭaṭṭhitikā nāmā’’ti vuttamevatthaṃ vibhāvetuṃ ‘‘rañño vā hī’’tiādi vuttaṃ.
သဗ္ဗံ ပတ္တသ္သာမိကသ္သ ဟောတီတိ စီဝရာဒိကမ္ပိ သဗ္ဗံ ပတ္တသ္သာမိကသ္သေဝ ဟောတိ, မယာ ဘတ္တမေဝ သန္ဓာယ ဝုတ္တံ, န စီဝရာဒိန္တိ ဝတ္ဝာ ဂဟေတုံ န ဝဋ္ဋတီတိ အတ္ထော။
Sabbaṃ pattassāmikassa hotīti cīvarādikampi sabbaṃ pattassāmikasseva hoti, mayā bhattameva sandhāya vuttaṃ, na cīvarādinti vatvā gahetuṃ na vaṭṭatīti attho.
အကတဘာဂောနာမာတိ အာဂန္တုကဘာဂော နာမ, အဒိန္နပုဗ္ဗဘာဂောတိ အတ္ထော။
Akatabhāgonāmāti āgantukabhāgo nāma, adinnapubbabhāgoti attho.
ကိံ အာဟရီယတီတိ အဝတ္ဝာတိ ‘‘ကတရဘတ္တံ ဝာ တယာ အာဟရီယတီ’’တိ ဒာယကံ အပုစ္ဆိတ္ဝာ။ ပကတိဋ္ဌိတိကာယာတိ ဥဒ္ဒေသဘတ္တဋ္ဌိတိကာယ။
Kiṃ āharīyatīti avatvāti ‘‘katarabhattaṃ vā tayā āharīyatī’’ti dāyakaṃ apucchitvā. Pakatiṭṭhitikāyāti uddesabhattaṭṭhitikāya.
ဥဒ္ဒေသဘတ္တကထာဝဏ္ဏနာ နိဋ္ဌိတာ။
Uddesabhattakathāvaṇṇanā niṭṭhitā.
