| Library / Tipiṭaka / ತಿಪಿಟಕ • Tipiṭaka / ವಿಮತಿವಿನೋದನೀ-ಟೀಕಾ • Vimativinodanī-ṭīkā |
ಉದ್ದೇಸಭತ್ತಕಥಾವಣ್ಣನಾ
Uddesabhattakathāvaṇṇanā
ಭೋಜನಸಾಲಾಯಾತಿ ಭತ್ತುದ್ದೇಸಟ್ಠಾನಂ ಸನ್ಧಾಯ ವುತ್ತಂ। ಏಕವಳಞ್ಜನ್ತಿ ಏಕದ್ವಾರೇನ ವಳಞ್ಜಿತಬ್ಬಂ। ನಾನಾನಿವೇಸನೇಸೂತಿ ನಾನಾಕುಲಸ್ಸ ನಾನೂಪಚಾರೇಸು ನಿವೇಸನೇಸು।
Bhojanasālāyāti bhattuddesaṭṭhānaṃ sandhāya vuttaṃ. Ekavaḷañjanti ekadvārena vaḷañjitabbaṃ. Nānānivesanesūti nānākulassa nānūpacāresu nivesanesu.
ನಿಸಿನ್ನಸ್ಸಪಿ ನಿದ್ದಾಯನ್ತಸ್ಸಪೀತಿ ಅನಾದರೇ ಸಾಮಿವಚನಂ, ವುಡ್ಢತರೇ ನಿದ್ದಾಯನ್ತೇ ನವಕಸ್ಸ ಗಾಹಿತಂ ಸುಗ್ಗಹಿತನ್ತಿ ಅತ್ಥೋ।
Nisinnassapi niddāyantassapīti anādare sāmivacanaṃ, vuḍḍhatare niddāyante navakassa gāhitaṃ suggahitanti attho.
ವಿಸ್ಸಟ್ಠದೂತೋತಿ ಯಥಾರುಚಿ ವತ್ತುಂ ಲಭನತೋ ನಿರಾಸಙ್ಕದೂತೋ। ಪುಚ್ಛಾಸಭಾಗೇನಾತಿ ಪುಚ್ಛಾವಚನಪಟಿಭಾಗೇನ। ‘‘ಏಕಾ ಕೂಟಟ್ಠಿತಿಕಾ ನಾಮಾ’’ತಿ ವುತ್ತಮೇವತ್ಥಂ ವಿಭಾವೇತುಂ ‘‘ರಞ್ಞೋ ವಾ ಹೀ’’ತಿಆದಿ ವುತ್ತಂ।
Vissaṭṭhadūtoti yathāruci vattuṃ labhanato nirāsaṅkadūto. Pucchāsabhāgenāti pucchāvacanapaṭibhāgena. ‘‘Ekā kūṭaṭṭhitikā nāmā’’ti vuttamevatthaṃ vibhāvetuṃ ‘‘rañño vā hī’’tiādi vuttaṃ.
ಸಬ್ಬಂ ಪತ್ತಸ್ಸಾಮಿಕಸ್ಸ ಹೋತೀತಿ ಚೀವರಾದಿಕಮ್ಪಿ ಸಬ್ಬಂ ಪತ್ತಸ್ಸಾಮಿಕಸ್ಸೇವ ಹೋತಿ, ಮಯಾ ಭತ್ತಮೇವ ಸನ್ಧಾಯ ವುತ್ತಂ, ನ ಚೀವರಾದಿನ್ತಿ ವತ್ವಾ ಗಹೇತುಂ ನ ವಟ್ಟತೀತಿ ಅತ್ಥೋ।
Sabbaṃ pattassāmikassa hotīti cīvarādikampi sabbaṃ pattassāmikasseva hoti, mayā bhattameva sandhāya vuttaṃ, na cīvarādinti vatvā gahetuṃ na vaṭṭatīti attho.
ಅಕತಭಾಗೋನಾಮಾತಿ ಆಗನ್ತುಕಭಾಗೋ ನಾಮ, ಅದಿನ್ನಪುಬ್ಬಭಾಗೋತಿ ಅತ್ಥೋ।
Akatabhāgonāmāti āgantukabhāgo nāma, adinnapubbabhāgoti attho.
ಕಿಂ ಆಹರೀಯತೀತಿ ಅವತ್ವಾತಿ ‘‘ಕತರಭತ್ತಂ ವಾ ತಯಾ ಆಹರೀಯತೀ’’ತಿ ದಾಯಕಂ ಅಪುಚ್ಛಿತ್ವಾ। ಪಕತಿಟ್ಠಿತಿಕಾಯಾತಿ ಉದ್ದೇಸಭತ್ತಟ್ಠಿತಿಕಾಯ।
Kiṃ āharīyatīti avatvāti ‘‘katarabhattaṃ vā tayā āharīyatī’’ti dāyakaṃ apucchitvā. Pakatiṭṭhitikāyāti uddesabhattaṭṭhitikāya.
ಉದ್ದೇಸಭತ್ತಕಥಾವಣ್ಣನಾ ನಿಟ್ಠಿತಾ।
Uddesabhattakathāvaṇṇanā niṭṭhitā.
