| Library / Tipiṭaka / തിപിടക • Tipiṭaka / വിമതിവിനോദനീ-ടീകാ • Vimativinodanī-ṭīkā |
ഉദ്ദേസഭത്തകഥാവണ്ണനാ
Uddesabhattakathāvaṇṇanā
ഭോജനസാലായാതി ഭത്തുദ്ദേസട്ഠാനം സന്ധായ വുത്തം. ഏകവളഞ്ജന്തി ഏകദ്വാരേന വളഞ്ജിതബ്ബം. നാനാനിവേസനേസൂതി നാനാകുലസ്സ നാനൂപചാരേസു നിവേസനേസു.
Bhojanasālāyāti bhattuddesaṭṭhānaṃ sandhāya vuttaṃ. Ekavaḷañjanti ekadvārena vaḷañjitabbaṃ. Nānānivesanesūti nānākulassa nānūpacāresu nivesanesu.
നിസിന്നസ്സപി നിദ്ദായന്തസ്സപീതി അനാദരേ സാമിവചനം, വുഡ്ഢതരേ നിദ്ദായന്തേ നവകസ്സ ഗാഹിതം സുഗ്ഗഹിതന്തി അത്ഥോ.
Nisinnassapi niddāyantassapīti anādare sāmivacanaṃ, vuḍḍhatare niddāyante navakassa gāhitaṃ suggahitanti attho.
വിസ്സട്ഠദൂതോതി യഥാരുചി വത്തും ലഭനതോ നിരാസങ്കദൂതോ. പുച്ഛാസഭാഗേനാതി പുച്ഛാവചനപടിഭാഗേന. ‘‘ഏകാ കൂടട്ഠിതികാ നാമാ’’തി വുത്തമേവത്ഥം വിഭാവേതും ‘‘രഞ്ഞോ വാ ഹീ’’തിആദി വുത്തം.
Vissaṭṭhadūtoti yathāruci vattuṃ labhanato nirāsaṅkadūto. Pucchāsabhāgenāti pucchāvacanapaṭibhāgena. ‘‘Ekā kūṭaṭṭhitikā nāmā’’ti vuttamevatthaṃ vibhāvetuṃ ‘‘rañño vā hī’’tiādi vuttaṃ.
സബ്ബം പത്തസ്സാമികസ്സ ഹോതീതി ചീവരാദികമ്പി സബ്ബം പത്തസ്സാമികസ്സേവ ഹോതി, മയാ ഭത്തമേവ സന്ധായ വുത്തം, ന ചീവരാദിന്തി വത്വാ ഗഹേതും ന വട്ടതീതി അത്ഥോ.
Sabbaṃ pattassāmikassa hotīti cīvarādikampi sabbaṃ pattassāmikasseva hoti, mayā bhattameva sandhāya vuttaṃ, na cīvarādinti vatvā gahetuṃ na vaṭṭatīti attho.
അകതഭാഗോനാമാതി ആഗന്തുകഭാഗോ നാമ, അദിന്നപുബ്ബഭാഗോതി അത്ഥോ.
Akatabhāgonāmāti āgantukabhāgo nāma, adinnapubbabhāgoti attho.
കിം ആഹരീയതീതി അവത്വാതി ‘‘കതരഭത്തം വാ തയാ ആഹരീയതീ’’തി ദായകം അപുച്ഛിത്വാ. പകതിട്ഠിതികായാതി ഉദ്ദേസഭത്തട്ഠിതികായ.
Kiṃ āharīyatīti avatvāti ‘‘katarabhattaṃ vā tayā āharīyatī’’ti dāyakaṃ apucchitvā. Pakatiṭṭhitikāyāti uddesabhattaṭṭhitikāya.
ഉദ്ദേസഭത്തകഥാവണ്ണനാ നിട്ഠിതാ.
Uddesabhattakathāvaṇṇanā niṭṭhitā.
