| Library / Tipiṭaka / திபிடக • Tipiṭaka / நெத்திப்பகரண-அட்ட²கதா² • Nettippakaraṇa-aṭṭhakathā |
2. உத்³தே³ஸவாரவண்ணனா
2. Uddesavāravaṇṇanā
1. ஏவங் ஸங்க³ஹவாரேன ஸங்கே²பதோ த³ஸ்ஸிதே ஹாராத³யோ இதா³னி விபா⁴கே³ன த³ஸ்ஸேதுங் ‘‘தத்த² கதமே ஸோளஸ ஹாரா’’திஆதி³தே³ஸனா ஆரத்³தா⁴. தத்த² தத்தா²தி யங் வுத்தங் – ‘‘ஸோளஸஹாரா நெத்தீ’’தி, தஸ்மிங் வசனே, திஸ்ஸங் வா கா³தா²யங், யானி ஹாரனயமூலபதா³னி உத்³த⁴டானி, தேஸூதி அத்தோ². கதமேதி புச்சா²வசனங். புச்சா² ச நாமேஸா பஞ்சவிதா⁴ அதி³ட்ட²ஜோதனாபுச்சா² தி³ட்ட²ஸங்ஸந்த³னாபுச்சா² விமதிச்சே²த³னாபுச்சா² அனுமதிபுச்சா² கதே²துகம்யதாபுச்சா²தி. தாஸு அயங் கதே²துகம்யதாபுச்சா². ஸோளஸாதி க³ணனவஸேன பரிச்சே²தோ³. தேன நேஸங் ந ததோ உத்³த⁴ங் அதோ⁴ சாதி ஏதபரமதங் த³ஸ்ஸேதி. ஸா சேதபரமதா பரதோ ஆவி ப⁴விஸ்ஸதி. ஹாராதி க³ணனவஸேன பரிச்சி²ன்னானங் ஸாமஞ்ஞதோ த³ஸ்ஸனங். தே³ஸனா விசயோதிஆதி³ ஸரூபத³ஸ்ஸனங்.
1. Evaṃ saṅgahavārena saṅkhepato dassite hārādayo idāni vibhāgena dassetuṃ ‘‘tattha katame soḷasa hārā’’tiādidesanā āraddhā. Tattha tatthāti yaṃ vuttaṃ – ‘‘soḷasahārā nettī’’ti, tasmiṃ vacane, tissaṃ vā gāthāyaṃ, yāni hāranayamūlapadāni uddhaṭāni, tesūti attho. Katameti pucchāvacanaṃ. Pucchā ca nāmesā pañcavidhā adiṭṭhajotanāpucchā diṭṭhasaṃsandanāpucchā vimaticchedanāpucchā anumatipucchā kathetukamyatāpucchāti. Tāsu ayaṃ kathetukamyatāpucchā. Soḷasāti gaṇanavasena paricchedo. Tena nesaṃ na tato uddhaṃ adho cāti etaparamataṃ dasseti. Sā cetaparamatā parato āvi bhavissati. Hārāti gaṇanavasena paricchinnānaṃ sāmaññato dassanaṃ. Desanā vicayotiādi sarūpadassanaṃ.
தத்த² கேனட்டே²ன ஹாரா? ஹரீயந்தி ஏதேஹி, எத்த² வா ஸுத்தகெ³ய்யாதி³விஸயா அஞ்ஞாணஸங்ஸயவிபல்லாஸாதி ஹாரா, ஹரந்தி வா ஸயங் தானி, ஹரணமத்தமேவ வாதி ஹாரா ப²லூபசாரேன. அத² வா ஹரீயந்தி வோஹரீயந்தி த⁴ம்மஸங்வண்ணகத⁴ம்மபடிக்³கா³ஹகேஹி த⁴ம்மஸ்ஸ தா³னக்³க³ஹணவஸேனாதி ஹாரா. அத² வா ஹாரா வியாதி ஹாரா. யதா² ஹி அனேகரதனாவலிஸமூஹோ ஹாரஸங்கா²தோ அத்தனோ அவயவபூ⁴தரதனஸம்ப²ஸ்ஸேஹி ஸமுப்பஜ்ஜனீயமானஹிலாத³ஸுகோ² ஹுத்வா தது³பபோ⁴கீ³ஜனஸரீரஸந்தாபங் நிதா³க⁴பரிளாஹுபஜனிதங் வூபஸமேதி, ஏவமேதேபி நானாவித⁴பரமத்த²ரதனப்பப³ந்தா⁴ ஸங்வண்ணனாவிஸேஸா அத்தனோ அவயவபூ⁴தபரமத்த²ரதனாதி⁴க³மேன ஸமுப்பாதி³யமானநிப்³பு³திஸுகா² த⁴ம்மபடிக்³கா³ஹகஜனஹத³யபரிதாபங் காமராகா³தி³கிலேஸஹேதுகங் வூபஸமெந்தீதி. அத² வா ஹாரயந்தி அஞ்ஞாணாதீ³னங் ஹாரங் அபக³மங் கரொந்தி ஆசிக்க²ந்தீதி வா ஹாரா. அத² வா ஸோதுஜனசித்தஸ்ஸ ஹரணதோ ரமணதோ ச ஹாரா நிருத்தினயேன, யதா² – ‘‘ப⁴வேஸு வந்தக³மனோ ப⁴க³வா’’தி (விஸுத்³தி⁴॰ 1.144; பாரா॰ அட்ட²॰ 1.1 வேரஞ்ஜகண்ட³வண்ணனா). அயங் தாவ ஹாரானங் ஸாதா⁴ரணதோ அத்தோ².
Tattha kenaṭṭhena hārā? Harīyanti etehi, ettha vā suttageyyādivisayā aññāṇasaṃsayavipallāsāti hārā, haranti vā sayaṃ tāni, haraṇamattameva vāti hārā phalūpacārena. Atha vā harīyanti voharīyanti dhammasaṃvaṇṇakadhammapaṭiggāhakehi dhammassa dānaggahaṇavasenāti hārā. Atha vā hārā viyāti hārā. Yathā hi anekaratanāvalisamūho hārasaṅkhāto attano avayavabhūtaratanasamphassehi samuppajjanīyamānahilādasukho hutvā tadupabhogījanasarīrasantāpaṃ nidāghapariḷāhupajanitaṃ vūpasameti, evametepi nānāvidhaparamattharatanappabandhā saṃvaṇṇanāvisesā attano avayavabhūtaparamattharatanādhigamena samuppādiyamānanibbutisukhā dhammapaṭiggāhakajanahadayaparitāpaṃ kāmarāgādikilesahetukaṃ vūpasamentīti. Atha vā hārayanti aññāṇādīnaṃ hāraṃ apagamaṃ karonti ācikkhantīti vā hārā. Atha vā sotujanacittassa haraṇato ramaṇato ca hārā niruttinayena, yathā – ‘‘bhavesu vantagamano bhagavā’’ti (visuddhi. 1.144; pārā. aṭṭha. 1.1 verañjakaṇḍavaṇṇanā). Ayaṃ tāva hārānaṃ sādhāraṇato attho.
அஸாதா⁴ரணதோ பன தே³ஸீயதி ஸங்வண்ணீயதி ஏதாய ஸுத்தத்தோ²தி தே³ஸனா, தே³ஸனாஸஹசரணதோ வா தே³ஸனா. நனு ச அஞ்ஞேபி ஹாரா தே³ஸனாஸங்கா²தஸ்ஸ ஸுத்தஸ்ஸ அத்த²ஸங்வண்ணனதோ தே³ஸனாஸஹசாரினோவாதி? ஸச்சமேதங், அயங் பன ஹாரோ யேபு⁴ய்யேன யதா²ருதவஸேனேவ விஞ்ஞாயமானோ தே³ஸனாய ஸஹ சரதீதி வத்தப்³ப³தங் அரஹதி, ந ததா² பரே. ந ஹி அஸ்ஸாதா³தீ³னவனிஸ்ஸரணாதி³ஸந்த³ஸ்ஸனரஹிதா ஸுத்ததே³ஸனா அத்தி². அஸ்ஸாதா³தி³ஸந்த³ஸ்ஸனவிபா⁴வனலக்க²ணோ சாயங் ஹாரோதி.
Asādhāraṇato pana desīyati saṃvaṇṇīyati etāya suttatthoti desanā, desanāsahacaraṇato vā desanā. Nanu ca aññepi hārā desanāsaṅkhātassa suttassa atthasaṃvaṇṇanato desanāsahacārinovāti? Saccametaṃ, ayaṃ pana hāro yebhuyyena yathārutavaseneva viññāyamāno desanāya saha caratīti vattabbataṃ arahati, na tathā pare. Na hi assādādīnavanissaraṇādisandassanarahitā suttadesanā atthi. Assādādisandassanavibhāvanalakkhaṇo cāyaṃ hāroti.
விசியந்தி ஏதேன, எத்த² வா பத³பஞ்ஹாத³யோ, விசிதி ஏவ வா தேஸந்தி விசயோ. பாளியங் பன விசினதீதி விசயோதி அயமத்தோ² த³ஸ்ஸிதோ.
Viciyanti etena, ettha vā padapañhādayo, viciti eva vā tesanti vicayo. Pāḷiyaṃ pana vicinatīti vicayoti ayamattho dassito.
யுத்தீதி உபபத்திஸாத⁴னயுத்தி, இத⁴ பன யுத்திவிசாரணா யுத்தி உத்தரபத³லோபேன ‘‘ரூபப⁴வோ ரூப’’ந்தி யதா², யுத்திஸஹசரணதோ வா. இதா⁴பி தே³ஸனாஹாரே வுத்தனயேன அத்தோ² வித்தா²ரேதப்³போ³.
Yuttīti upapattisādhanayutti, idha pana yuttivicāraṇā yutti uttarapadalopena ‘‘rūpabhavo rūpa’’nti yathā, yuttisahacaraṇato vā. Idhāpi desanāhāre vuttanayena attho vitthāretabbo.
பத³ட்டா²னந்தி ஆஸன்னகாரணங், இதா⁴பி பத³ட்டா²னவிசாரணாதிஆதி³ வுத்தனயேனேவ வேதி³தப்³ப³ங்.
Padaṭṭhānanti āsannakāraṇaṃ, idhāpi padaṭṭhānavicāraṇātiādi vuttanayeneva veditabbaṃ.
லக்கீ²யந்தி ஏதேன, எத்த² வா ஏகலக்க²ணா த⁴ம்மா அவுத்தாபி ஏகவசனேனாதி லக்க²ணங்.
Lakkhīyanti etena, ettha vā ekalakkhaṇā dhammā avuttāpi ekavacanenāti lakkhaṇaṃ.
வியூஹீயந்தி விபா⁴கே³ன பிண்டீ³யந்தி ஏதேன, எத்த² வாதி ப்³யூஹோ. நிப்³ப³சனாதீ³னங் ஸுத்தே த³ஸ்ஸியமானானங் சதுன்னங் ப்³யூஹோதி சதுப்³யூஹோ, சதுன்னங் வா ப்³யூஹோ எத்தா²தி சதுப்³யூஹோ.
Viyūhīyanti vibhāgena piṇḍīyanti etena, ettha vāti byūho. Nibbacanādīnaṃ sutte dassiyamānānaṃ catunnaṃ byūhoti catubyūho, catunnaṃ vā byūho etthāti catubyūho.
ஆவட்டீயந்தி ஏதேன, எத்த² வா ஸபா⁴கா³ விஸபா⁴கா³ ச த⁴ம்மா, தேஸங் வா ஆவட்டனந்தி ஆவட்டோ.
Āvaṭṭīyanti etena, ettha vā sabhāgā visabhāgā ca dhammā, tesaṃ vā āvaṭṭananti āvaṭṭo.
விப⁴ஜீயந்தி ஏதேன, எத்த² வா ஸாதா⁴ரணாஸாதா⁴ரணானங் ஸங்கிலேஸவோதா³னத⁴ம்மானங் பூ⁴மியோதி விப⁴த்தி, விப⁴ஜனங் வா ஏதேஸங் பூ⁴மியாதி விப⁴த்தி.
Vibhajīyanti etena, ettha vā sādhāraṇāsādhāraṇānaṃ saṃkilesavodānadhammānaṃ bhūmiyoti vibhatti, vibhajanaṃ vā etesaṃ bhūmiyāti vibhatti.
படிபக்க²வஸேன பரிவத்தீயந்தி இமினா, எத்த² வா ஸுத்தே வுத்தத⁴ம்மா, பரிவத்தனங் வா தேஸந்தி பரிவத்தனோ.
Paṭipakkhavasena parivattīyanti iminā, ettha vā sutte vuttadhammā, parivattanaṃ vā tesanti parivattano.
விவித⁴ங் வசனங் ஏகஸ்ஸேவத்த²ஸ்ஸ வாசகமெத்தா²தி விவசனங், விவசனமேவ வேவசனங், விவித⁴ங் வுச்சதி ஏதேன அத்தோ²தி வா விவசனங். ஸேஸங் வுத்தனயமேவ.
Vividhaṃ vacanaṃ ekassevatthassa vācakametthāti vivacanaṃ, vivacanameva vevacanaṃ, vividhaṃ vuccati etena atthoti vā vivacanaṃ. Sesaṃ vuttanayameva.
பகாரேஹி பபே⁴த³தோ வா ஞாபீயந்தி இமினா, எத்த² வா அத்தா²தி பஞ்ஞத்தி.
Pakārehi pabhedato vā ñāpīyanti iminā, ettha vā atthāti paññatti.
ஓதாரீயந்தி அனுப்பவேஸீயந்தி ஏதேன, எத்த² வா ஸுத்தாக³தா த⁴ம்மா படிச்சஸமுப்பாதா³தீ³ஸூதி ஓதரணோ.
Otārīyanti anuppavesīyanti etena, ettha vā suttāgatā dhammā paṭiccasamuppādādīsūti otaraṇo.
ஸோதீ⁴யந்தி ஸமாதீ⁴யந்தி ஏதேன, எத்த² வா ஸுத்தே பத³பத³த்த²பஞ்ஹாரம்பா⁴தி ஸோத⁴னோ.
Sodhīyanti samādhīyanti etena, ettha vā sutte padapadatthapañhārambhāti sodhano.
அதி⁴ட்டீ²யந்தி அனுபவத்தீயந்தி ஏதேன, எத்த² வா ஸாமஞ்ஞவிஸேஸபூ⁴தா த⁴ம்மா வினா விகப்பேனாதி அதி⁴ட்டா²னோ.
Adhiṭṭhīyanti anupavattīyanti etena, ettha vā sāmaññavisesabhūtā dhammā vinā vikappenāti adhiṭṭhāno.
பரிகரோதி அபி⁴ஸங்க²ரோதி ப²லந்தி பரிக்கா²ரோ, ஹேது பச்சயோ ச, பரிக்கா²ரங் ஆசிக்க²தீதி பரிக்கா²ரோ, ஹாரோ, பரிக்கா²ரவிஸயத்தா பரிக்கா²ரஸஹசரணதோ வா பரிக்கா²ரோ.
Parikaroti abhisaṅkharoti phalanti parikkhāro, hetu paccayo ca, parikkhāraṃ ācikkhatīti parikkhāro, hāro, parikkhāravisayattā parikkhārasahacaraṇato vā parikkhāro.
ஸமாரோபீயந்தி ஏதேன, எத்த² வா பத³ட்டா²னாதி³முகே²ன த⁴ம்மாதி ஸமாரோபனோ. ஸப்³ப³த்த² ச பா⁴வஸாத⁴னவஸேனாபி அத்தோ² ஸம்ப⁴வதீதி தஸ்ஸாபி வஸேன யோஜேதப்³ப³ங்.
Samāropīyanti etena, ettha vā padaṭṭhānādimukhena dhammāti samāropano. Sabbattha ca bhāvasādhanavasenāpi attho sambhavatīti tassāpi vasena yojetabbaṃ.
தஸ்ஸாதி யதா²வுத்தஸ்ஸ ஹாருத்³தே³ஸஸ்ஸ. அனுகீ³தீதி வுத்தஸ்ஸேவத்த²ஸ்ஸ ஸுக²க்³க³ஹணத்த²ங் அனுபச்சா² கா³யனகா³தா², தாஸு ஓஸானகா³தா²ய அத்த²தோ அஸங்கிண்ணாதி பத³த்தே²ன ஸங்கரரஹிதா, தேன யதி³பி கேசி ஹாரா அஞ்ஞமஞ்ஞங் அவிஸிட்டா² விய தி³ஸ்ஸந்தி, ததா²பி தேஸங் அத்த²தோ ஸங்கரோ நத்தீ²தி த³ஸ்ஸேதி. ஸோ ச நேஸங் அஸங்கரோ லக்க²ணனித்³தே³ஸே ஸுபாகடோ ஹோதி. ஏதேஸஞ்சேவாதி ஏதேஸங் ஸோளஸன்னங் ஹாரானங். யதா² அஸங்கரோ, ததா² சேவ ப⁴வதி. கிங் ப⁴வதி? வித்தா²ரதயா வித்தா²ரேன. நயவிப⁴த்தி நயேன உபாயேன ஞாயேன விபா⁴கோ³. ஏதேன தங் ஏவ அஸங்கிண்ணதங் விபா⁴வேதி. கேசி ‘‘வித்தா²ரனயா’’தி பட²ந்தி, தங் ந ஸுந்த³ரங், அயஞ்ச கா³தா² கேஸுசி பொத்த²கேஸு நத்தி².
Tassāti yathāvuttassa hāruddesassa. Anugītīti vuttassevatthassa sukhaggahaṇatthaṃ anupacchā gāyanagāthā, tāsu osānagāthāya atthato asaṃkiṇṇāti padatthena saṅkararahitā, tena yadipi keci hārā aññamaññaṃ avisiṭṭhā viya dissanti, tathāpi tesaṃ atthato saṅkaro natthīti dasseti. So ca nesaṃ asaṅkaro lakkhaṇaniddese supākaṭo hoti. Etesañcevāti etesaṃ soḷasannaṃ hārānaṃ. Yathā asaṅkaro, tathā ceva bhavati. Kiṃ bhavati? Vitthāratayā vitthārena. Nayavibhatti nayena upāyena ñāyena vibhāgo. Etena taṃ eva asaṅkiṇṇataṃ vibhāveti. Keci ‘‘vitthāranayā’’ti paṭhanti, taṃ na sundaraṃ, ayañca gāthā kesuci potthakesu natthi.
2. ஏவங் ஹாரே உத்³தி³ஸித்வா இதா³னி நயே உத்³தி³ஸிதுங் ‘‘தத்த² கதமே’’திஆதி³ வுத்தங். தத்த² நயந்தி ஸங்கிலேஸே வோதா³னானி ச விபா⁴க³தோ ஞாபெந்தீதி நயா, நீயந்தி வா தானி ஏதேஹி , எத்த² வாதி நயா, நயனமத்தமேவ வாதி நயா, நீயந்தி வா ஸயங் த⁴ம்மகதி²கேஹி உபனீயந்தி ஸுத்தஸ்ஸ அத்த²பவிசயத்த²ந்தி நயா. அத² வா நயா வியாதி நயா. யதா² ஹி ஏகத்தாத³யோ நயா ஸம்மா படிவிஜ்ஜி²யமானா பச்சயபச்சயுப்பன்னத⁴ம்மானங் யதா²க்கமங் ஸம்ப³ந்த⁴விபா⁴க³ப்³யாபாரவிரஹானுரூபப²லபா⁴வத³ஸ்ஸனேன அஸங்கரதோ ஸம்முதிஸச்சபரமத்த²ஸச்சானங் ஸபா⁴வங் பவேத³யந்தா பரமத்த²ஸச்சப்படிவேதா⁴ய ஸங்வத்தந்தி, ஏவமேதேபி கண்ஹஸுக்கஸப்படிபா⁴க³த⁴ம்மவிபா⁴க³த³ஸ்ஸனேன அவிபரீதஸுத்தத்தா²வபோ³தா⁴ய அபி⁴ஸம்பு⁴ணந்தா வேனெய்யானங் சதுஸச்சப்படிவேதா⁴ய ஸங்வத்தந்தி. அத² வா பரியத்திஅத்த²ஸ்ஸ நயனதோ ஸங்கிலேஸதோ யமனதோ ச நயா நிருத்தினயேன.
2. Evaṃ hāre uddisitvā idāni naye uddisituṃ ‘‘tattha katame’’tiādi vuttaṃ. Tattha nayanti saṃkilese vodānāni ca vibhāgato ñāpentīti nayā, nīyanti vā tāni etehi , ettha vāti nayā, nayanamattameva vāti nayā, nīyanti vā sayaṃ dhammakathikehi upanīyanti suttassa atthapavicayatthanti nayā. Atha vā nayā viyāti nayā. Yathā hi ekattādayo nayā sammā paṭivijjhiyamānā paccayapaccayuppannadhammānaṃ yathākkamaṃ sambandhavibhāgabyāpāravirahānurūpaphalabhāvadassanena asaṅkarato sammutisaccaparamatthasaccānaṃ sabhāvaṃ pavedayantā paramatthasaccappaṭivedhāya saṃvattanti, evametepi kaṇhasukkasappaṭibhāgadhammavibhāgadassanena aviparītasuttatthāvabodhāya abhisambhuṇantā veneyyānaṃ catusaccappaṭivedhāya saṃvattanti. Atha vā pariyattiatthassa nayanato saṃkilesato yamanato ca nayā niruttinayena.
நந்தி³யாவட்டோதிஆதீ³ஸு நந்தி³யாவட்டஸ்ஸ விய ஆவட்டோ ஏதஸ்ஸாதி நந்தி³யாவட்டோ, யதா² ஹி நந்தி³யாவட்டோ அந்தோடி²தேன பதா⁴னாவயவேன ப³ஹித்³தா⁴ ஆவட்டதி, ஏவமயம்பி நயோதி அத்தோ². அத² வா நந்தி³யா தண்ஹாய பமோத³ஸ்ஸ வா ஆவட்டோ எத்தா²தி நந்தி³யாவட்டோ. தீஹி அவயவேஹி லோபா⁴தீ³ஹி ஸங்கிலேஸபக்கே² அலோபா⁴தீ³ஹி ச வோதா³னபக்கே² புக்க²லோ ஸோப⁴னோதி திபுக்க²லோ. அஸந்தாஸனஜவபரக்கமாதி³விஸேஸயோகே³ன ஸீஹோ ப⁴க³வா, தஸ்ஸ விக்கீளிதங் தே³ஸனாவசீகம்மபூ⁴தோ விஹாரோதி கத்வா விபல்லாஸதப்படிபக்க²பரிதீ³பனதோ ஸீஹஸ்ஸ விக்கீளிதங் எத்தா²தி ஸீஹவிக்கீளிதோ, நயோ. ப³லவிஸேஸயோக³தீ³பனதோ வா ஸீஹவிக்கீளிதஸதி³ஸத்தா நயோ ஸீஹவிக்கீளிதோ. ப³லவிஸேஸோ செத்த² ஸத்³தா⁴தி³ப³லங், த³ஸப³லானி ஏவ வா. அத்த²னயத்தயதி³ஸாபா⁴வேன குஸலாதி³த⁴ம்மானங் ஆலோசனங் தி³ஸாலோசனங். ததா² ஆலோசிதானங் தேஸங் த⁴ம்மானங் அத்த²னயத்தயயோஜனே ஸமானயனதோ அங்குஸோ விய அங்குஸோ. கா³தா²ஸு லஞ்ஜேதி பகாஸேதி ஸுத்தத்த²ந்தி லஞ்ஜகோ, நயோ ச ஸோ லஞ்ஜகோ சாதி நயலஞ்ஜகோ. க³தாதி ஞாதா, மதாதி அத்தோ². ஸோ ஏவ வா பாடோ². ஸேஸங் வுத்தனயேன வேதி³தப்³ப³ங்.
Nandiyāvaṭṭotiādīsu nandiyāvaṭṭassa viya āvaṭṭo etassāti nandiyāvaṭṭo, yathā hi nandiyāvaṭṭo antoṭhitena padhānāvayavena bahiddhā āvaṭṭati, evamayampi nayoti attho. Atha vā nandiyā taṇhāya pamodassa vā āvaṭṭo etthāti nandiyāvaṭṭo. Tīhi avayavehi lobhādīhi saṃkilesapakkhe alobhādīhi ca vodānapakkhe pukkhalo sobhanoti tipukkhalo. Asantāsanajavaparakkamādivisesayogena sīho bhagavā, tassa vikkīḷitaṃ desanāvacīkammabhūto vihāroti katvā vipallāsatappaṭipakkhaparidīpanato sīhassa vikkīḷitaṃ etthāti sīhavikkīḷito, nayo. Balavisesayogadīpanato vā sīhavikkīḷitasadisattā nayo sīhavikkīḷito. Balaviseso cettha saddhādibalaṃ, dasabalāni eva vā. Atthanayattayadisābhāvena kusalādidhammānaṃ ālocanaṃ disālocanaṃ. Tathā ālocitānaṃ tesaṃ dhammānaṃ atthanayattayayojane samānayanato aṅkuso viya aṅkuso. Gāthāsu lañjeti pakāseti suttatthanti lañjako, nayo ca so lañjako cāti nayalañjako. Gatāti ñātā, matāti attho. So eva vā pāṭho. Sesaṃ vuttanayena veditabbaṃ.
3. ஏவங் நயேபி உத்³தி³ஸித்வா இதா³னி மூலபதா³னி உத்³தி³ஸிதுங் ‘‘தத்த² கதமானீ’’திஆதி³ ஆரத்³த⁴ங். தத்த² மூலானி ச தானி நயானங் பட்டா²னபா⁴கா³னஞ்ச பதிட்டா²பா⁴வதோ பதா³னி ச அதி⁴க³மூபாயபா⁴வதோ கொட்டா²ஸபா⁴வதோ சாதி மூலபதா³னி. கோஸல்லஸம்பூ⁴தட்டே²ன, குச்சி²தானங் வா பாபத⁴ம்மானங் ஸலனதோ வித்³த⁴ங்ஸனதோ, குஸானங் வா ராகா³தீ³னங் லவனதோ, குஸா விய வா லவனதோ, குஸேன வா ஞாணேன லாதப்³ப³தோ பவத்தேதப்³ப³தோ குஸலானி, தப்படிபக்க²தோ அகுஸலானீதி பத³த்தோ² வேதி³தப்³போ³.
3. Evaṃ nayepi uddisitvā idāni mūlapadāni uddisituṃ ‘‘tattha katamānī’’tiādi āraddhaṃ. Tattha mūlāni ca tāni nayānaṃ paṭṭhānabhāgānañca patiṭṭhābhāvato padāni ca adhigamūpāyabhāvato koṭṭhāsabhāvato cāti mūlapadāni. Kosallasambhūtaṭṭhena, kucchitānaṃ vā pāpadhammānaṃ salanato viddhaṃsanato, kusānaṃ vā rāgādīnaṃ lavanato, kusā viya vā lavanato, kusena vā ñāṇena lātabbato pavattetabbato kusalāni, tappaṭipakkhato akusalānīti padattho veditabbo.
ஏவங் க³ணனபரிச்சே²த³தோ ஜாதிபே⁴த³தோ ச மூலபதா³னி த³ஸ்ஸெத்வா இதா³னி ஸரூபதோ த³ஸ்ஸெந்தோ ஸங்கிலேஸபக்க²ங்யேவ பட²மங் உத்³தி³ஸதி ‘‘தண்ஹா’’திஆதி³னா. தத்த² தஸதி பரிதஸதீதி தண்ஹா. அவிந்தி³யங் விந்த³தி, விந்தி³யங் ந விந்த³தீதி அவிஜ்ஜா, விஜ்ஜாபடிபக்கா²தி வா அவிஜ்ஜா. லுப்³ப⁴ந்தி தேன, ஸயங் வா லுப்³ப⁴தி, லுப்³ப⁴னமத்தமேவ வா ஸோதி லோபோ⁴. தோ³ஸமோஹேஸுபி ஏஸேவ நயோ. அஸுபே⁴ ‘‘ஸுப⁴’’ந்தி பவத்தா ஸஞ்ஞா ஸுப⁴ஸஞ்ஞா. ஸுக²ஸஞ்ஞாதீ³ஸுபி இமினாவ நயேன அத்தோ² வேதி³தப்³போ³. ஸங்க³ஹந்தி க³ணனங். ஸமோஸரணந்தி ஸமோரோபனங்.
Evaṃ gaṇanaparicchedato jātibhedato ca mūlapadāni dassetvā idāni sarūpato dassento saṃkilesapakkhaṃyeva paṭhamaṃ uddisati ‘‘taṇhā’’tiādinā. Tattha tasati paritasatīti taṇhā. Avindiyaṃ vindati, vindiyaṃ na vindatīti avijjā, vijjāpaṭipakkhāti vā avijjā. Lubbhanti tena, sayaṃ vā lubbhati, lubbhanamattameva vā soti lobho. Dosamohesupi eseva nayo. Asubhe ‘‘subha’’nti pavattā saññā subhasaññā. Sukhasaññādīsupi imināva nayena attho veditabbo. Saṅgahanti gaṇanaṃ. Samosaraṇanti samoropanaṃ.
பச்சனீகத⁴ம்மே ஸமேதீதி ஸமதோ². அனிச்சாதீ³ஹி விவிதே⁴ஹி ஆகாரேஹி பஸ்ஸதீதி விபஸ்ஸனா. அலோபா⁴த³யோ லோபா⁴தி³படிபக்க²தோ வேதி³தப்³பா³. அஸுபே⁴ ‘‘அஸுப⁴’’ந்தி பவத்தா ஸஞ்ஞா அஸுப⁴ஸஞ்ஞா, காயானுபஸ்ஸனாஸதிபட்டா²னங். ஸஞ்ஞாஸீஸேன ஹி தே³ஸனா. து³க்க²ஸஞ்ஞாதீ³ஸுபி ஏஸேவ நயோ.
Paccanīkadhamme sametīti samatho. Aniccādīhi vividhehi ākārehi passatīti vipassanā. Alobhādayo lobhādipaṭipakkhato veditabbā. Asubhe ‘‘asubha’’nti pavattā saññā asubhasaññā, kāyānupassanāsatipaṭṭhānaṃ. Saññāsīsena hi desanā. Dukkhasaññādīsupi eseva nayo.
இத³ங் உத்³தா³னந்தி இத³ங் வுத்தஸ்ஸேவ அத்த²ஸ்ஸ விப்பகிண்ணபா⁴வேன நஸ்ஸிதுங் அத³த்வா உத்³த⁴ங் தா³னங் ரக்க²ணங் உத்³தா³னங், ஸங்க³ஹவசனந்தி அத்தோ². ‘‘சத்தாரோ விபல்லாஸா’’திபி பாடோ². கிலேஸபூ⁴மீதி ஸங்கிலேஸபூ⁴மி ஸப்³பே³ஸங் அகுஸலத⁴ம்மானங் ஸமோஸரணட்டா²னத்தா. குஸலானங் யானி தீணி மூலானி. ‘‘குஸலானீ’’திபி பட²ந்தி. ஸதிபட்டா²னாதி அஸுப⁴ஸஞ்ஞாத³யோ ஸந்தா⁴யாஹ. இந்த்³ரியபூ⁴மீதி ஸத்³தா⁴தீ³னங் விமுத்திபரிபாசனிந்த்³ரியானங் ஸமோஸரணட்டா²னத்தா வுத்தங். யுஜ்ஜந்தீதி யோஜீயந்தி. கோ²தி பத³பூரணே, அவதா⁴ரணத்தே² வா நிபாதோ. தேன ஏதே ஏவாதி த³ஸ்ஸேதி. அட்டா²ரஸேவாதி வா. மூலபதா³தி மூலபதா³னி, லிங்க³விபல்லாஸோ வா.
Idaṃ uddānanti idaṃ vuttasseva atthassa vippakiṇṇabhāvena nassituṃ adatvā uddhaṃ dānaṃ rakkhaṇaṃ uddānaṃ, saṅgahavacananti attho. ‘‘Cattāro vipallāsā’’tipi pāṭho. Kilesabhūmīti saṃkilesabhūmi sabbesaṃ akusaladhammānaṃ samosaraṇaṭṭhānattā. Kusalānaṃ yāni tīṇi mūlāni. ‘‘Kusalānī’’tipi paṭhanti. Satipaṭṭhānāti asubhasaññādayo sandhāyāha. Indriyabhūmīti saddhādīnaṃ vimuttiparipācanindriyānaṃ samosaraṇaṭṭhānattā vuttaṃ. Yujjantīti yojīyanti. Khoti padapūraṇe, avadhāraṇatthe vā nipāto. Tena ete evāti dasseti. Aṭṭhārasevāti vā. Mūlapadāti mūlapadāni, liṅgavipallāso vā.
உத்³தே³ஸவாரவண்ணனா நிட்டி²தா.
Uddesavāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 2. உத்³தே³ஸவாரோ • 2. Uddesavāro
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திப்பகரண-டீகா • Nettippakaraṇa-ṭīkā / 2. உத்³தே³ஸவாரவண்ணனா • 2. Uddesavāravaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 2. உத்³தே³ஸவாரஅத்த²விபா⁴வனா • 2. Uddesavāraatthavibhāvanā
