| Library / Tipiṭaka / திபிடக • Tipiṭaka / நெத்திப்பகரண-டீகா • Nettippakaraṇa-ṭīkā |
2. உத்³தே³ஸவாரவண்ணனா
2. Uddesavāravaṇṇanā
1. விபா⁴கே³னாதி ஸரூபவிபா⁴கே³ன. அதி³ட்ட²ங் ஜோதீயதி ஏதாயாதி அதி³ட்ட²ஜோதனா. தி³ட்ட²ங் ஸங்ஸந்தீ³யதி ஏதாயாதி தி³ட்ட²ஸங்ஸந்த³னா, ஸங்ஸந்த³னங் செத்த² ஸாகச்சா²வஸேன வினிச்ச²யகரணங். விமதி சி²ஜ்ஜதி ஏதாயாதி விமதிச்சே²த³னா. அனுமதியா புச்சா² அனுமதிபுச்சா². ‘‘தங் கிங் மஞ்ஞதா²’’தி ஹி கா தும்ஹாகங் அனுமதீதி அனுமதி புச்சி²தா. கதே²துகம்யதாதி கதே²துகம்யதாய.
1.Vibhāgenāti sarūpavibhāgena. Adiṭṭhaṃ jotīyati etāyāti adiṭṭhajotanā. Diṭṭhaṃ saṃsandīyati etāyāti diṭṭhasaṃsandanā, saṃsandanaṃ cettha sākacchāvasena vinicchayakaraṇaṃ. Vimati chijjati etāyāti vimaticchedanā. Anumatiyā pucchā anumatipucchā. ‘‘Taṃ kiṃ maññathā’’ti hi kā tumhākaṃ anumatīti anumati pucchitā. Kathetukamyatāti kathetukamyatāya.
‘‘ஹரீயந்தி ஏதேஹீ’’திஆதி³னா கரணாதி⁴கரணகத்துபா⁴வகம்மஸாத⁴னானங் வஸேன ஹார-ஸத்³த³ஸ்ஸ அத்த²ங் வத்வா ஸதி³ஸகப்பனாவஸேன த³ஸ்ஸேதுங் ‘‘ஹாரா வியா’’திஆதி³ வுத்தங். புன க³ந்த²கரணாதி³அத்தே²ன க³ந்தா²தி³ஸத்³தா³னங் விய ஹாரகரணாதி³அத்தே²ன ஹாரஸத்³த³ஸித்³தி⁴ங் த³ஸ்ஸேதுங் ‘‘ஹாரயந்தீ’’திஆதி³மாஹ. ‘‘ஹரணதோ, ரமணதோ சா’’தி இமினா மனோஹரா மனோரமா சேதே ஸங்வண்ணனாவிஸேஸாதி த³ஸ்ஸேதி.
‘‘Harīyanti etehī’’tiādinā karaṇādhikaraṇakattubhāvakammasādhanānaṃ vasena hāra-saddassa atthaṃ vatvā sadisakappanāvasena dassetuṃ ‘‘hārā viyā’’tiādi vuttaṃ. Puna ganthakaraṇādiatthena ganthādisaddānaṃ viya hārakaraṇādiatthena hārasaddasiddhiṃ dassetuṃ ‘‘hārayantī’’tiādimāha. ‘‘Haraṇato, ramaṇato cā’’ti iminā manoharā manoramā cete saṃvaṇṇanāvisesāti dasseti.
உபபத்திஸாத⁴னயுத்தீதி லக்க²ணஹேது. வுத்தனயேனாதி ‘‘நனு ச அஞ்ஞேபி ஹாரா யுத்திஸஹிதா ஏவா’’திஆதி³னா தே³ஸனாஹாரே வுத்தனயானுஸாரேன.
Upapattisādhanayuttīti lakkhaṇahetu. Vuttanayenāti ‘‘nanu ca aññepi hārā yuttisahitā evā’’tiādinā desanāhāre vuttanayānusārena.
சதுன்னங் ப்³யூஹோ எத்தா²தி பி⁴ன்னாதி⁴கரணானம்பி பதா³னங் அஞ்ஞபத³த்த²ஸமாஸோ லப்³ப⁴தி ‘‘உரஸிலோமோ’’திஆதீ³னங் (தீ³॰ நி॰ டீ॰ 3.54, 303) வியாதி வுத்தங்.
Catunnaṃ byūho etthāti bhinnādhikaraṇānampi padānaṃ aññapadatthasamāso labbhati ‘‘urasilomo’’tiādīnaṃ (dī. ni. ṭī. 3.54, 303) viyāti vuttaṃ.
ஸேஸந்தி ‘‘விவசனமேவ வேவசன’’ந்தி ஏவமாதி³.
Sesanti ‘‘vivacanameva vevacana’’nti evamādi.
அனுப்பவேஸீயந்தீதி அவகா³ஹீயந்தி. ஸமாதீ⁴யந்தீதி பரிஹரீயந்தி. வினா விகப்பேனாதி ஜாதி ஸாமஞ்ஞங், பே⁴தோ³ ஸாமஞ்ஞங், ஸம்ப³ந்தோ⁴ ஸாமஞ்ஞந்திஆதி³னா பத³த்த²ந்தரபா⁴வவிகப்பனமந்தரேன.
Anuppavesīyantīti avagāhīyanti. Samādhīyantīti pariharīyanti. Vinā vikappenāti jāti sāmaññaṃ, bhedo sāmaññaṃ, sambandho sāmaññantiādinā padatthantarabhāvavikappanamantarena.
பத³ட்டா²னாதி³முகே²னாதி பத³ட்டா²னவேவசனபா⁴வனாபஹானமுகே²ன. கேசீதி பத³ட்டா²னபரிக்கா²ரஆவட்டபரிவத்தனபஞ்ஞத்திஓதரணே ஸந்தா⁴ய வத³தி.
Padaṭṭhānādimukhenāti padaṭṭhānavevacanabhāvanāpahānamukhena. Kecīti padaṭṭhānaparikkhāraāvaṭṭaparivattanapaññattiotaraṇe sandhāya vadati.
2. ஸம்ப³ந்தோ⁴தி ஹேதுப²லபா⁴வயோகோ³. ததா²பூ⁴தானஞ்ஹி த⁴ம்மானங் ஏகஸந்தானஸித்³த⁴தா ஏகத்தனயோ. விபா⁴கோ³ ஸதிபி நேஸங் ஹேதுப²லபா⁴வே விப⁴த்தஸபா⁴வதா. அஞ்ஞோ ஏவ ஹி ஹேது, அஞ்ஞங் ப²லந்தி. ப்³யாபாரவிரஹோ நிரீஹதா. ந ஹி ஹேதுப²லானங் ஏவங் ஹோதி ‘‘அஹங் இமங் நிப்³ப³த்தேமி, இமினாஹங் நிப்³ப³த்தோ’’தி. அனுரூபப²லதா பச்சயுப்பன்னானங் பச்சயானுகூலதா. ஸமூஹாதி³ங் உபாதா³ய லோகஸங்கேதஸித்³தா⁴ வோஹாரமத்ததா ஸம்முதிஸபா⁴வோ. பத²வீப²ஸ்ஸாதீ³னங் கக்க²ளபு²ஸனாதி³லக்க²ணங் பரமத்த²ஸபா⁴வோ. அயஞ்ஹெத்த² ஸங்கே²போ – யஸ்மிங் பி⁴ன்னே, இதராபோஹே வா சித்தேன கதேன ததா² பு³த்³தி⁴, இத³ங் ஸம்முதிஸச்சங் யதா² க⁴டே, ஸஸம்பா⁴ரஜலே ச, தப்³பி³பரியாயேன பரமத்த²ஸச்சந்தி. பரமத்த²ஸச்சப்படிவேதா⁴யாதி நிப்³பா³னாதி⁴க³மாய.
2.Sambandhoti hetuphalabhāvayogo. Tathābhūtānañhi dhammānaṃ ekasantānasiddhatā ekattanayo. Vibhāgo satipi nesaṃ hetuphalabhāve vibhattasabhāvatā. Añño eva hi hetu, aññaṃ phalanti. Byāpāraviraho nirīhatā. Na hi hetuphalānaṃ evaṃ hoti ‘‘ahaṃ imaṃ nibbattemi, imināhaṃ nibbatto’’ti. Anurūpaphalatā paccayuppannānaṃ paccayānukūlatā. Samūhādiṃ upādāya lokasaṅketasiddhā vohāramattatā sammutisabhāvo. Pathavīphassādīnaṃ kakkhaḷaphusanādilakkhaṇaṃ paramatthasabhāvo. Ayañhettha saṅkhepo – yasmiṃ bhinne, itarāpohe vā cittena katena tathā buddhi, idaṃ sammutisaccaṃ yathā ghaṭe, sasambhārajale ca, tabbipariyāyena paramatthasaccanti. Paramatthasaccappaṭivedhāyāti nibbānādhigamāya.
அந்தோதி அப்³ப⁴ந்தரோ. பதா⁴னாவயவேனாதி மூலபா⁴வேன. ‘‘நந்தீ³ து³க்க²ஸ்ஸ மூல’’ந்திஆதீ³ஸு (ம॰ நி॰ 1.13) தண்ஹா ‘‘நந்தீ³’’தி வுத்தா. ‘‘ஸங்கா³மே ச நந்தி³ங் சரதீ’’திஆதீ³ஸு பமோதோ³தி ஆஹ ‘‘தண்ஹாய, பமோத³ஸ்ஸ வா’’தி.
Antoti abbhantaro. Padhānāvayavenāti mūlabhāvena. ‘‘Nandī dukkhassa mūla’’ntiādīsu (ma. ni. 1.13) taṇhā ‘‘nandī’’ti vuttā. ‘‘Saṅgāme ca nandiṃ caratī’’tiādīsu pamodoti āha ‘‘taṇhāya, pamodassa vā’’ti.
3. ஜாதிபே⁴த³தோதி குஸலா, அகுஸலாதி இமஸ்மா விஸேஸா. யுஜ்ஜந்தீதி எத்த² ஹேதுஅத்தோ² அந்தோனீதோ வேதி³தப்³போ³தி ஆஹ ‘‘யோஜீயந்தீ’’தி. கேஹி யோஜீயந்தி? ஸங்வண்ணனகேஹீதி அதி⁴ப்பாயோ. யுஜ்ஜந்தீதி வா யுத்தா ஹொந்தி, தேஹி ஸமானயோக³க்க²மா தக்³க³ஹணேனேவ க³ஹிதா ஹொந்தீதி அத்தோ² ததே³கட்ட²பா⁴வதோ. இமஸ்மிங் அத்தே² ‘‘நவஹி பதே³ஹீ’’தி ஸஹயோகே³ கரணவசனங், புரிமஸ்மிங் கரணே. ‘‘ஏதே கோ²’’தி ச பாடோ². தத்த² கோ²-ஸத்³த³ஸ்ஸ பத³பூரணதா, அவதா⁴ரணத்த²தா வா வேதி³தப்³பா³. ஏதே ஏவாதி ஏதே தண்ஹாத³யோ ஏவ, ந இதோ அஞ்ஞேதி அத்தோ². அட்டா²ரஸேவ ந ததோ உத்³த⁴ங், அதோ⁴ வாதி. புரிமஸ்மிங் பக்கே² மூலபத³ந்தராபா⁴வோ, து³தியஸ்மிங் தேஸங் அனூனாதி⁴கதா தீ³பிதா ஹோதி.
3.Jātibhedatoti kusalā, akusalāti imasmā visesā. Yujjantīti ettha hetuattho antonīto veditabboti āha ‘‘yojīyantī’’ti. Kehi yojīyanti? Saṃvaṇṇanakehīti adhippāyo. Yujjantīti vā yuttā honti, tehi samānayogakkhamā taggahaṇeneva gahitā hontīti attho tadekaṭṭhabhāvato. Imasmiṃ atthe ‘‘navahi padehī’’ti sahayoge karaṇavacanaṃ, purimasmiṃ karaṇe. ‘‘Ete kho’’ti ca pāṭho. Tattha kho-saddassa padapūraṇatā, avadhāraṇatthatā vā veditabbā. Ete evāti ete taṇhādayo eva, na ito aññeti attho. Aṭṭhāraseva na tato uddhaṃ, adho vāti. Purimasmiṃ pakkhe mūlapadantarābhāvo, dutiyasmiṃ tesaṃ anūnādhikatā dīpitā hoti.
உத்³தே³ஸவாரவண்ணனா நிட்டி²தா.
Uddesavāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 2. உத்³தே³ஸவாரோ • 2. Uddesavāro
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 2. உத்³தே³ஸவாரவண்ணனா • 2. Uddesavāravaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 2. உத்³தே³ஸவாரஅத்த²விபா⁴வனா • 2. Uddesavāraatthavibhāvanā
