| Library / Tipiṭaka / তিপিটক • Tipiṭaka / নেত্তিপ্পকরণপাল়ি • Nettippakaraṇapāḷi |
২. উদ্দেসৰারো
2. Uddesavāro
১. তত্থ কতমে সোল়স হারা? দেসনা ৰিচযো যুত্তি পদট্ঠানো লক্খণো চতুব্যূহো আৰট্টো ৰিভত্তি পরিৰত্তনো ৰেৰচনো পঞ্ঞত্তি ওতরণো সোধনো অধিট্ঠানো পরিক্খারো সমারোপনো ইতি।
1. Tattha katame soḷasa hārā? Desanā vicayo yutti padaṭṭhāno lakkhaṇo catubyūho āvaṭṭo vibhatti parivattano vevacano paññatti otaraṇo sodhano adhiṭṭhāno parikkhāro samāropano iti.
তস্সানুগীতি
Tassānugīti
দেসনা ৰিচযো যুত্তি, পদট্ঠানো চ লক্খণো।
Desanā vicayo yutti, padaṭṭhāno ca lakkhaṇo;
চতুব্যূহো চ আৰট্টো, ৰিভত্তি পরিৰত্তনো॥
Catubyūho ca āvaṭṭo, vibhatti parivattano.
ৰেৰচনো চ পঞ্ঞত্তি, ওতরণো চ সোধনো।
Vevacano ca paññatti, otaraṇo ca sodhano;
এতে সোল়স হারা, পকিত্তিতা অত্থতো অসংকিণ্ণা।
Ete soḷasa hārā, pakittitā atthato asaṃkiṇṇā;
এতেসঞ্চেৰ ভৰতি, ৰিত্থারতযা নযৰিভত্তীতি॥
Etesañceva bhavati, vitthāratayā nayavibhattīti.
২. তত্থ কতমে পঞ্চ নযা? নন্দিযাৰট্টো তিপুক্খলো সীহৰিক্কীল়িতো দিসালোচনো অঙ্কুসো ইতি।
2. Tattha katame pañca nayā? Nandiyāvaṭṭo tipukkhalo sīhavikkīḷito disālocano aṅkuso iti.
তস্সানুগীতি
Tassānugīti
পঠমো নন্দিযাৰট্টো, দুতিযো চ তিপুক্খলো।
Paṭhamo nandiyāvaṭṭo, dutiyo ca tipukkhalo;
দিসালোচনমাহংসু , চতুত্থং নযমুত্তমং।
Disālocanamāhaṃsu , catutthaṃ nayamuttamaṃ;
পঞ্চমো অঙ্কুসো নাম, সব্বে পঞ্চ নযা গতাতি॥
Pañcamo aṅkuso nāma, sabbe pañca nayā gatāti.
৩. তত্থ কতমানি অট্ঠারস মূলপদানি? নৰ পদানি কুসলানি নৰ পদানি অকুসলানি। তত্থ কতমানি নৰ পদানি অকুসলানি, তণ্হা অৰিজ্জা লোভো দোসো মোহো সুভসঞ্ঞা সুখসঞ্ঞা নিচ্চসঞ্ঞা অত্তসঞ্ঞাতি, ইমানি নৰ পদানি অকুসলানি, যত্থ সব্বো অকুসলপক্খো সঙ্গহং সমোসরণং গচ্ছতি।
3. Tattha katamāni aṭṭhārasa mūlapadāni? Nava padāni kusalāni nava padāni akusalāni. Tattha katamāni nava padāni akusalāni, taṇhā avijjā lobho doso moho subhasaññā sukhasaññā niccasaññā attasaññāti, imāni nava padāni akusalāni, yattha sabbo akusalapakkho saṅgahaṃ samosaraṇaṃ gacchati.
তত্থ কতমানি নৰ পদানি কুসলানি? সমথো ৰিপস্সনা অলোভো অদোসো অমোহো অসুভসঞ্ঞা দুক্খসঞ্ঞা অনিচ্চসঞ্ঞা অনত্তসঞ্ঞাতি, ইমানি নৰ পদানি কুসলানি, যত্থ সব্বো কুসলপক্খো সঙ্গহং সমোসরণং গচ্ছতি।
Tattha katamāni nava padāni kusalāni? Samatho vipassanā alobho adoso amoho asubhasaññā dukkhasaññā aniccasaññā anattasaññāti, imāni nava padāni kusalāni, yattha sabbo kusalapakkho saṅgahaṃ samosaraṇaṃ gacchati.
তত্রিদং উদ্দানং
Tatridaṃ uddānaṃ
তণ্হা চ অৰিজ্জাপি চ, লোভো দোসো তথেৰ মোহো চ।
Taṇhā ca avijjāpi ca, lobho doso tatheva moho ca;
চতুরো চ ৰিপল্লাসা, কিলেসভূমী নৰ পদানি॥
Caturo ca vipallāsā, kilesabhūmī nava padāni.
সমথো চ ৰিপস্সনা চ, কুসলানি চ যানি তীণি মূলানি।
Samatho ca vipassanā ca, kusalāni ca yāni tīṇi mūlāni;
চতুরো সতিপট্ঠানা, ইন্দ্রিযভূমী নৰ পদানি॥
Caturo satipaṭṭhānā, indriyabhūmī nava padāni.
নৰহি চ পদেহি কুসলা, নৰহি চ যুজ্জন্তি অকুসলপক্খা।
Navahi ca padehi kusalā, navahi ca yujjanti akusalapakkhā;
এতে খো মূলপদা, ভৰন্তি অট্ঠারস পদানীতি॥
Ete kho mūlapadā, bhavanti aṭṭhārasa padānīti.
উদ্দেসৰারো।
Uddesavāro.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / ২. উদ্দেসৰারৰণ্ণনা • 2. Uddesavāravaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিপ্পকরণ-টীকা • Nettippakaraṇa-ṭīkā / ২. উদ্দেসৰারৰণ্ণনা • 2. Uddesavāravaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিৰিভাৰিনী • Nettivibhāvinī / ২. উদ্দেসৰারঅত্থৰিভাৰনা • 2. Uddesavāraatthavibhāvanā
