| Library / Tipiṭaka / തിപിടക • Tipiṭaka / നേത്തിപ്പകരണപാളി • Nettippakaraṇapāḷi |
൨. ഉദ്ദേസവാരോ
2. Uddesavāro
൧. തത്ഥ കതമേ സോളസ ഹാരാ? ദേസനാ വിചയോ യുത്തി പദട്ഠാനോ ലക്ഖണോ ചതുബ്യൂഹോ ആവട്ടോ വിഭത്തി പരിവത്തനോ വേവചനോ പഞ്ഞത്തി ഓതരണോ സോധനോ അധിട്ഠാനോ പരിക്ഖാരോ സമാരോപനോ ഇതി.
1. Tattha katame soḷasa hārā? Desanā vicayo yutti padaṭṭhāno lakkhaṇo catubyūho āvaṭṭo vibhatti parivattano vevacano paññatti otaraṇo sodhano adhiṭṭhāno parikkhāro samāropano iti.
തസ്സാനുഗീതി
Tassānugīti
ദേസനാ വിചയോ യുത്തി, പദട്ഠാനോ ച ലക്ഖണോ;
Desanā vicayo yutti, padaṭṭhāno ca lakkhaṇo;
ചതുബ്യൂഹോ ച ആവട്ടോ, വിഭത്തി പരിവത്തനോ.
Catubyūho ca āvaṭṭo, vibhatti parivattano.
വേവചനോ ച പഞ്ഞത്തി, ഓതരണോ ച സോധനോ;
Vevacano ca paññatti, otaraṇo ca sodhano;
ഏതേ സോളസ ഹാരാ, പകിത്തിതാ അത്ഥതോ അസംകിണ്ണാ;
Ete soḷasa hārā, pakittitā atthato asaṃkiṇṇā;
ഏതേസഞ്ചേവ ഭവതി, വിത്ഥാരതയാ നയവിഭത്തീതി.
Etesañceva bhavati, vitthāratayā nayavibhattīti.
൨. തത്ഥ കതമേ പഞ്ച നയാ? നന്ദിയാവട്ടോ തിപുക്ഖലോ സീഹവിക്കീളിതോ ദിസാലോചനോ അങ്കുസോ ഇതി.
2. Tattha katame pañca nayā? Nandiyāvaṭṭo tipukkhalo sīhavikkīḷito disālocano aṅkuso iti.
തസ്സാനുഗീതി
Tassānugīti
പഠമോ നന്ദിയാവട്ടോ, ദുതിയോ ച തിപുക്ഖലോ;
Paṭhamo nandiyāvaṭṭo, dutiyo ca tipukkhalo;
ദിസാലോചനമാഹംസു , ചതുത്ഥം നയമുത്തമം;
Disālocanamāhaṃsu , catutthaṃ nayamuttamaṃ;
പഞ്ചമോ അങ്കുസോ നാമ, സബ്ബേ പഞ്ച നയാ ഗതാതി.
Pañcamo aṅkuso nāma, sabbe pañca nayā gatāti.
൩. തത്ഥ കതമാനി അട്ഠാരസ മൂലപദാനി? നവ പദാനി കുസലാനി നവ പദാനി അകുസലാനി. തത്ഥ കതമാനി നവ പദാനി അകുസലാനി, തണ്ഹാ അവിജ്ജാ ലോഭോ ദോസോ മോഹോ സുഭസഞ്ഞാ സുഖസഞ്ഞാ നിച്ചസഞ്ഞാ അത്തസഞ്ഞാതി, ഇമാനി നവ പദാനി അകുസലാനി, യത്ഥ സബ്ബോ അകുസലപക്ഖോ സങ്ഗഹം സമോസരണം ഗച്ഛതി.
3. Tattha katamāni aṭṭhārasa mūlapadāni? Nava padāni kusalāni nava padāni akusalāni. Tattha katamāni nava padāni akusalāni, taṇhā avijjā lobho doso moho subhasaññā sukhasaññā niccasaññā attasaññāti, imāni nava padāni akusalāni, yattha sabbo akusalapakkho saṅgahaṃ samosaraṇaṃ gacchati.
തത്ഥ കതമാനി നവ പദാനി കുസലാനി? സമഥോ വിപസ്സനാ അലോഭോ അദോസോ അമോഹോ അസുഭസഞ്ഞാ ദുക്ഖസഞ്ഞാ അനിച്ചസഞ്ഞാ അനത്തസഞ്ഞാതി, ഇമാനി നവ പദാനി കുസലാനി, യത്ഥ സബ്ബോ കുസലപക്ഖോ സങ്ഗഹം സമോസരണം ഗച്ഛതി.
Tattha katamāni nava padāni kusalāni? Samatho vipassanā alobho adoso amoho asubhasaññā dukkhasaññā aniccasaññā anattasaññāti, imāni nava padāni kusalāni, yattha sabbo kusalapakkho saṅgahaṃ samosaraṇaṃ gacchati.
തത്രിദം ഉദ്ദാനം
Tatridaṃ uddānaṃ
തണ്ഹാ ച അവിജ്ജാപി ച, ലോഭോ ദോസോ തഥേവ മോഹോ ച;
Taṇhā ca avijjāpi ca, lobho doso tatheva moho ca;
ചതുരോ ച വിപല്ലാസാ, കിലേസഭൂമീ നവ പദാനി.
Caturo ca vipallāsā, kilesabhūmī nava padāni.
സമഥോ ച വിപസ്സനാ ച, കുസലാനി ച യാനി തീണി മൂലാനി;
Samatho ca vipassanā ca, kusalāni ca yāni tīṇi mūlāni;
ചതുരോ സതിപട്ഠാനാ, ഇന്ദ്രിയഭൂമീ നവ പദാനി.
Caturo satipaṭṭhānā, indriyabhūmī nava padāni.
നവഹി ച പദേഹി കുസലാ, നവഹി ച യുജ്ജന്തി അകുസലപക്ഖാ;
Navahi ca padehi kusalā, navahi ca yujjanti akusalapakkhā;
ഏതേ ഖോ മൂലപദാ, ഭവന്തി അട്ഠാരസ പദാനീതി.
Ete kho mūlapadā, bhavanti aṭṭhārasa padānīti.
ഉദ്ദേസവാരോ.
Uddesavāro.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / ഖുദ്ദകനികായ (അട്ഠകഥാ) • Khuddakanikāya (aṭṭhakathā) / നേത്തിപ്പകരണ-അട്ഠകഥാ • Nettippakaraṇa-aṭṭhakathā / ൨. ഉദ്ദേസവാരവണ്ണനാ • 2. Uddesavāravaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / ഖുദ്ദകനികായ (ടീകാ) • Khuddakanikāya (ṭīkā) / നേത്തിപ്പകരണ-ടീകാ • Nettippakaraṇa-ṭīkā / ൨. ഉദ്ദേസവാരവണ്ണനാ • 2. Uddesavāravaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / ഖുദ്ദകനികായ (ടീകാ) • Khuddakanikāya (ṭīkā) / നേത്തിവിഭാവിനീ • Nettivibhāvinī / ൨. ഉദ്ദേസവാരഅത്ഥവിഭാവനാ • 2. Uddesavāraatthavibhāvanā
