| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
8. உத்³தே³ஸவிப⁴ங்க³ஸுத்தவண்ணனா
8. Uddesavibhaṅgasuttavaṇṇanā
313. தே³ஸேதப்³ப³ஸ்ஸ அத்த²ஸ்ஸ உத்³தி³ஸனங் உத்³தே³ஸோ, விப⁴ஜனங் விப⁴ங்கோ³தி ஆஹ – ‘‘மாதிகஞ்ச விப⁴ஜனஞ்சா’’தி துலெய்யாதிஆதீ³னி சத்தாரிபி பதா³னி பஞ்ஞாவேவசனானி. அத² வா துலெய்யாதி துலனபூ⁴தாய பஞ்ஞாய தஸ்ஸ த⁴ம்மஸ்ஸ பக்³க³ஹாதி³விதி⁴னா பரிதுலெய்ய. தீரெய்யாதி தீரணபூ⁴தாய பஞ்ஞாய தத்த² ஞாணகிரியாஸமாபனவஸேன தீரெய்ய. பரிக்³க³ண்ஹெய்யாதி ததா²ஸமாபன்னோ ஆனிஸங்ஸே அஸ்ஸாத³ஆதீ³னவே ச விசினெய்ய. பரிச்சி²ந்தெ³ய்யாதி பரிச்சி²ந்த³பூ⁴தேன ஞாணேன அத்த²ங் பரிச்சி²ந்தி³த்வா ஜானெய்ய. ஆரம்மணேஸூதி ரூபாதி³புது²த்தாரம்மணேஸு. நிகந்திவஸேனாதி நிகாமனவஸேன அபெக்கா²வஸேன. திட்ட²மானந்தி பவத்தமானங். கோ³சரஜ்ஜ²த்தேதி ஜா²னாரம்மணபூ⁴தே. தஞ்ஹி பா⁴வனாசித்தேனாபி⁴பு⁴ய்ய அவிஸ்ஸஜ்ஜித்வா க³ய்ஹமானங் அஜ்ஜ²த்தங் விய ஹோதீதி ‘‘கோ³சரஜ்ஜ²த்த’’ந்தி வுச்சதி. பா⁴வனங் ஆரத்³த⁴ஸ்ஸ பி⁴க்கு²னோ யதி³ பா⁴வனாரம்மணே நிகந்தி உப்பஜ்ஜெய்ய, தாய நிகந்தியா உபரி பா⁴வனங் விஸ்ஸஜ்ஜெத்வா சித்தஸங்கோசவஸேன ஸண்டி²தங் நாம, தத³பா⁴வேன அஸண்டி²தங் நாம ஹோதீதி, ‘‘அஜ்ஜ²த்தங் அஸண்டி²த’’ந்தி வுத்தந்தி த³ஸ்ஸெந்தோ, ‘‘கோ³சரஜ்ஜ²த்தே நிகந்திவஸேன அஸண்டி²த’’ந்தி ஆஹ. ததா² ஹி வக்க²தி – ‘‘நிகந்திவஸேன ஹி அதிட்ட²மானங் ஹானபா⁴கி³யங் ந ஹோதி, விஸேஸபா⁴கி³யமேவ ஹோதீ’’தி. அக்³க³ஹெத்வாதி ரூபாதீ³ஸு கிஞ்சி தண்ஹாதி³க்³கா³ஹவஸேன அக்³க³ஹெத்வா. ததா² அக்³க³ஹணேனேவ ஹி தண்ஹாபரிதாஸாதி³வஸேன ந பரிதஸ்ஸெய்ய. அவஸேஸஸ்ஸ ச து³க்க²ஸ்ஸாதி ஸோகாதி³து³க்க²ஸ்ஸ. அவஸேஸஸ்ஸ ச து³க்க²ஸ்ஸாதி வா ஜாதிஜராமரணஸீஸேன விபாகது³க்க²ஸ்ஸ க³ஹிதத்தா கிலேஸது³க்க²ஸ்ஸ சேவ ஸங்ஸாரது³க்க²ஸ்ஸ சாதி அத்தோ².
313. Desetabbassa atthassa uddisanaṃ uddeso, vibhajanaṃ vibhaṅgoti āha – ‘‘mātikañca vibhajanañcā’’ti tuleyyātiādīni cattāripi padāni paññāvevacanāni. Atha vā tuleyyāti tulanabhūtāya paññāya tassa dhammassa paggahādividhinā parituleyya. Tīreyyāti tīraṇabhūtāya paññāya tattha ñāṇakiriyāsamāpanavasena tīreyya. Pariggaṇheyyāti tathāsamāpanno ānisaṃse assādaādīnave ca vicineyya. Paricchindeyyāti paricchindabhūtena ñāṇena atthaṃ paricchinditvā jāneyya. Ārammaṇesūti rūpādiputhuttārammaṇesu. Nikantivasenāti nikāmanavasena apekkhāvasena. Tiṭṭhamānanti pavattamānaṃ. Gocarajjhatteti jhānārammaṇabhūte. Tañhi bhāvanācittenābhibhuyya avissajjitvā gayhamānaṃ ajjhattaṃ viya hotīti ‘‘gocarajjhatta’’nti vuccati. Bhāvanaṃ āraddhassa bhikkhuno yadi bhāvanārammaṇe nikanti uppajjeyya, tāya nikantiyā upari bhāvanaṃ vissajjetvā cittasaṃkocavasena saṇṭhitaṃ nāma, tadabhāvena asaṇṭhitaṃ nāma hotīti, ‘‘ajjhattaṃ asaṇṭhita’’nti vuttanti dassento, ‘‘gocarajjhatte nikantivasena asaṇṭhita’’nti āha. Tathā hi vakkhati – ‘‘nikantivasena hi atiṭṭhamānaṃ hānabhāgiyaṃ na hoti, visesabhāgiyameva hotī’’ti. Aggahetvāti rūpādīsu kiñci taṇhādiggāhavasena aggahetvā. Tathā aggahaṇeneva hi taṇhāparitāsādivasena na paritasseyya. Avasesassa ca dukkhassāti sokādidukkhassa. Avasesassa ca dukkhassāti vā jātijarāmaraṇasīsena vipākadukkhassa gahitattā kilesadukkhassa ceva saṃsāradukkhassa cāti attho.
316. ரூபமேவ கிலேஸுப்பத்தியா காரணபா⁴வதோ ரூபனிமித்தங். ராகா³தி³வஸேன தங் அனுதா⁴வதீதி ரூபனிமித்தானுஸாரீ.
316. Rūpameva kilesuppattiyā kāraṇabhāvato rūpanimittaṃ. Rāgādivasena taṃ anudhāvatīti rūpanimittānusārī.
318. நிகந்திவஸேன அஸண்டி²தந்தி அபெக்கா²வஸேன ஸண்டி²தங் நிகந்திங் பஹாய பவத்தமானங் உபரி விஸேஸாவஹதோதி. தேனாஹ ‘‘நிகந்திவஸேன ஹீ’’திஆதி³.
318.Nikantivasena asaṇṭhitanti apekkhāvasena saṇṭhitaṃ nikantiṃ pahāya pavattamānaṃ upari visesāvahatoti. Tenāha ‘‘nikantivasena hī’’tiādi.
320. அக்³க³ஹெத்வா அபரிதஸ்ஸனாதி பஞ்சுபாதா³னக்க²ந்தே⁴, ‘‘ஏதங் மமா’’திஆதி³னா தண்ஹாதி³க்³கா³ஹவஸேன உபாதி³யித்வா தண்ஹாபரிதாஸாதி³வஸேன பரிதஸ்ஸனா, வுத்தவிபரியாயேன அக்³க³ஹெத்வா அபரிதஸ்ஸனா வேதி³தப்³பா³. கத²ங் பனேஸா அனுபாதா³பரிதஸ்ஸனா ஹோதீதி மஹாதே²ரஸ்ஸ அதி⁴ப்பாயங் விவரிதுங் சோத³னங் ஸமுட்ட²பேதி? உபாதா³தப்³ப³ஸ்ஸ அபா⁴வதோதி தஸ்ஸ அனுபாதா³பரிதஸ்ஸனாபா⁴வே காரணவசனங். யதி³ ஹீதிஆதி³ தஸ்ஸ ஸமத்த²னங். உபாதா³பரிதஸ்ஸனாவ அஸ்ஸ ததா² உபாதா³தப்³ப³ஸ்ஸ ததே²வ உபாதி³ன்னத்தா. ஏவந்தி நிச்சாதி³ஆகாரேன. உபாதி³ன்னாபீதி க³ஹிதபராமட்டா²பி. அனுபாதி³ன்னாவ ஹொந்தி அயோனிஸோ க³ஹிதத்தா, விஞ்ஞூஸு நிஸ்ஸாய ஜானிதப்³ப³த்தா ச. தி³ட்டி²வஸேனாதி மிச்சா²தி³ட்டி²யா க³ஹணாகாரவஸேன, தஸ்ஸ பன அயதா²பூ⁴தகா³ஹிதாய பரமத்த²தோ ச அபா⁴வதோ. அத்த²தோதி பரமத்த²தோ. அனுபாதா³பரிதஸ்ஸனாயேவ நாம ஹோதி உபாதா³தப்³பா³காரஸ்ஸ அபா⁴வேன தங் அனுபாதி³யித்வா ஏவ பரிதஸ்ஸனாதி கத்வா.
320.Aggahetvā aparitassanāti pañcupādānakkhandhe, ‘‘etaṃ mamā’’tiādinā taṇhādiggāhavasena upādiyitvā taṇhāparitāsādivasena paritassanā, vuttavipariyāyena aggahetvā aparitassanā veditabbā. Kathaṃ panesā anupādāparitassanā hotīti mahātherassa adhippāyaṃ vivarituṃ codanaṃ samuṭṭhapeti? Upādātabbassa abhāvatoti tassa anupādāparitassanābhāve kāraṇavacanaṃ. Yadi hītiādi tassa samatthanaṃ. Upādāparitassanāva assa tathā upādātabbassa tatheva upādinnattā. Evanti niccādiākārena. Upādinnāpīti gahitaparāmaṭṭhāpi. Anupādinnāva honti ayoniso gahitattā, viññūsu nissāya jānitabbattā ca. Diṭṭhivasenāti micchādiṭṭhiyā gahaṇākāravasena, tassa pana ayathābhūtagāhitāya paramatthato ca abhāvato. Atthatoti paramatthato. Anupādāparitassanāyeva nāma hoti upādātabbākārassa abhāvena taṃ anupādiyitvā eva paritassanāti katvā.
பரிவத்ததீதி ந ததே³வ ரூபங் அஞ்ஞதா² பவத்தங் பரிவத்ததி, அத² கோ² பகதிஜஹனேன ஸபா⁴வவிக³மேன நஸ்ஸதி பி⁴ஜ்ஜதி. விபரிணதந்தி அஞ்ஞத²த்தங் க³தங் வினட்ட²ங். கம்மவிஞ்ஞாணந்தி அபி⁴ஸங்கா²ரவிஞ்ஞாணங். ‘‘ரூபங் அத்தா’’திஆதி³ மிச்சா²கா³ஹவஸேன விஞ்ஞாணஸ்ஸ ரூபபே⁴தே³ன வுத்தஸ்ஸ பே⁴தா³னுபரிவத்தி ஹோதி. விபரிணாமங் அனுக³ந்த்வா விபரிவத்தனதங் ஆரப்³ப⁴ பவத்தங் விபரிணாமானுபரிவத்தங்; ததோ ஸமுப்பன்னா பரிதஸ்ஸனா விபரிணாமானுபரிவத்தஜா பரிதஸ்ஸனாதி த³ஸ்ஸெந்தோ ஆஹ – ‘‘விபரிணாமஸ்ஸ…பே॰… பரிதஸ்ஸனா’’தி. அகுஸலத⁴ம்மஸமுப்பாதா³ சாதி, ‘‘யங் அஹு வத மே, தங் வத மே நத்தீ²’’திஆதி³னா பவத்தா அகுஸலசித்துப்பாத³த⁴ம்மா. கே²பெத்வாதி பவத்திதுங் அப்பதா³னவஸேன அனுப்பத்தினிமித்ததாய கே²பெத்வா. ப⁴யதாஸேனாதி பா⁴யனவஸேனபி சித்துத்ராஸேன. தண்ஹாதாஸேனாதி தஸ்ஸனேன. ஸவிகா⁴தோதி சித்தவிகா⁴தனவிகா⁴தேன ஸவிகா⁴தோ. ததோ ஏவ சேதோது³க்கே²ன ஸது³க்கோ². மணிகரண்ட³கஸஞ்ஞாயாதி ரித்தகரண்ட³ங்யேவ மணிபரிபுண்ணகரண்டோ³தி உப்பன்னஸஞ்ஞாய. அக்³க³ஹெத்வா பரிதஸ்ஸனாதி க³ஹேதப்³ப³ஸ்ஸ அபா⁴வேன க³ஹணம்பி அவிஜ்ஜமானபக்கி²யமேவாதி அக்³க³ஹெத்வா பரிதஸ்ஸனா நாம ஹோதி.
Parivattatīti na tadeva rūpaṃ aññathā pavattaṃ parivattati, atha kho pakatijahanena sabhāvavigamena nassati bhijjati. Vipariṇatanti aññathattaṃ gataṃ vinaṭṭhaṃ. Kammaviññāṇanti abhisaṅkhāraviññāṇaṃ. ‘‘Rūpaṃ attā’’tiādi micchāgāhavasena viññāṇassa rūpabhedena vuttassa bhedānuparivatti hoti. Vipariṇāmaṃ anugantvā viparivattanataṃ ārabbha pavattaṃ vipariṇāmānuparivattaṃ; tato samuppannā paritassanā vipariṇāmānuparivattajā paritassanāti dassento āha – ‘‘vipariṇāmassa…pe… paritassanā’’ti. Akusaladhammasamuppādā cāti, ‘‘yaṃ ahu vata me, taṃ vata me natthī’’tiādinā pavattā akusalacittuppādadhammā. Khepetvāti pavattituṃ appadānavasena anuppattinimittatāya khepetvā. Bhayatāsenāti bhāyanavasenapi cittutrāsena. Taṇhātāsenāti tassanena. Savighātoti cittavighātanavighātena savighāto. Tato eva cetodukkhena sadukkho. Maṇikaraṇḍakasaññāyāti rittakaraṇḍaṃyeva maṇiparipuṇṇakaraṇḍoti uppannasaññāya. Aggahetvā paritassanāti gahetabbassa abhāvena gahaṇampi avijjamānapakkhiyamevāti aggahetvā paritassanā nāma hoti.
321. கம்மவிஞ்ஞாணமேவ நத்தி² ஸதி கம்மவிஞ்ஞாணே ரூபபே⁴தா³னுபரிவத்தி ஸியாதி கம்மவிஞ்ஞாணாபா⁴வத³ஸ்ஸனமுகே²ன கீ²ணாஸவஸ்ஸ ஸப்³ப³ஸோ கிலேஸாபா⁴வங் த³ஸ்ஸேதி. ஸேஸங் ஸுவிஞ்ஞெய்யமேவ.
321.Kammaviññāṇameva natthi sati kammaviññāṇe rūpabhedānuparivatti siyāti kammaviññāṇābhāvadassanamukhena khīṇāsavassa sabbaso kilesābhāvaṃ dasseti. Sesaṃ suviññeyyameva.
உத்³தே³ஸவிப⁴ங்க³ஸுத்தவண்ணனாய லீனத்த²ப்பகாஸனா ஸமத்தா.
Uddesavibhaṅgasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 8. உத்³தே³ஸவிப⁴ங்க³ஸுத்தங் • 8. Uddesavibhaṅgasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 8. உத்³தே³ஸவிப⁴ங்க³ஸுத்தவண்ணனா • 8. Uddesavibhaṅgasuttavaṇṇanā
