| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৮. উদ্দেসৰিভঙ্গসুত্তৰণ্ণনা
8. Uddesavibhaṅgasuttavaṇṇanā
৩১৩. এৰং মে সুতন্তি উদ্দেসৰিভঙ্গসুত্তং। তত্থ উদ্দেসৰিভঙ্গন্তি উদ্দেসঞ্চ ৰিভঙ্গঞ্চ, মাতিকঞ্চ ৰিভজনঞ্চাতি অত্থো। উপপরিক্খেয্যাতি তুলেয্য তীরেয্য পরিগ্গণ্হেয্য পরিচ্ছিন্দেয্য। বহিদ্ধাতি বহিদ্ধাআরম্মণেসু। অৰিক্খিত্তং অৰিসটন্তি নিকন্তিৰসেন আরম্মণে তিট্ঠমানং ৰিক্খিত্তং ৰিসটং নাম হোতি, তং পটিসেধেন্তো এৰমাহ। অজ্ঝত্তং অসণ্ঠিতন্তি গোচরজ্ঝত্তে নিকন্তিৰসেন অসণ্ঠিতং। অনুপাদায ন পরিতস্সেয্যাতি অনুপাদিযিত্ৰা অগ্গহেত্ৰা তং ৰিঞ্ঞাণং ন পরিতস্সেয্য। যথা ৰিঞ্ঞাণং বহিদ্ধা অৰিক্খিত্তং অৰিসটং, অজ্ঝত্তং অসণ্ঠিতং অনুপাদায ন পরিতস্সেয্য, এৰং ভিক্খু উপপরিক্খেয্যাতি ৰুত্তং হোতি। জাতিজরামরণদুক্খসমুদযসম্ভৰোতি জাতিজরামরণস্স চেৰ অৰসেসস্স চ দুক্খস্স নিব্বত্তি ন হোতীতি অত্থো।
313.Evaṃme sutanti uddesavibhaṅgasuttaṃ. Tattha uddesavibhaṅganti uddesañca vibhaṅgañca, mātikañca vibhajanañcāti attho. Upaparikkheyyāti tuleyya tīreyya pariggaṇheyya paricchindeyya. Bahiddhāti bahiddhāārammaṇesu. Avikkhittaṃ avisaṭanti nikantivasena ārammaṇe tiṭṭhamānaṃ vikkhittaṃ visaṭaṃ nāma hoti, taṃ paṭisedhento evamāha. Ajjhattaṃ asaṇṭhitanti gocarajjhatte nikantivasena asaṇṭhitaṃ. Anupādāya na paritasseyyāti anupādiyitvā aggahetvā taṃ viññāṇaṃ na paritasseyya. Yathā viññāṇaṃ bahiddhā avikkhittaṃ avisaṭaṃ, ajjhattaṃ asaṇṭhitaṃ anupādāya na paritasseyya, evaṃ bhikkhu upaparikkheyyāti vuttaṃ hoti. Jātijarāmaraṇadukkhasamudayasambhavoti jātijarāmaraṇassa ceva avasesassa ca dukkhassa nibbatti na hotīti attho.
৩১৬. রূপনিমিত্তানুসারীতি রূপনিমিত্তং অনুস্সরতি অনুধাৰতীতি রূপনিমিত্তানুসারী।
316.Rūpanimittānusārīti rūpanimittaṃ anussarati anudhāvatīti rūpanimittānusārī.
৩১৮. এৰং খো, আৰুসো, অজ্ঝত্তং অসণ্ঠিতন্তি নিকন্তিৰসেন অসণ্ঠিতং। নিকন্তিৰসেন হি অতিট্ঠমানং হানভাগিযং ন হোতি, ৰিসেসভাগিযমেৰ হোতি।
318.Evaṃ kho, āvuso, ajjhattaṃ asaṇṭhitanti nikantivasena asaṇṭhitaṃ. Nikantivasena hi atiṭṭhamānaṃ hānabhāgiyaṃ na hoti, visesabhāgiyameva hoti.
৩২০. অনুপাদা পরিতস্সনাতি সত্থারা খন্ধিযৰগ্গে ‘‘উপাদাপরিতস্সনঞ্চ ৰো, ভিক্খৰে, দেসেস্সামি অনুপাদাঅপরিতস্সনঞ্চা’’তি (সং॰ নি॰ ৩.৭) এৰং গহেত্ৰা পরিতস্সনা, অগ্গহেত্ৰাৰ অপরিতস্সনা চ কথিতা, তং মহাথেরো উপাদাপরিতস্সনমেৰ অনুপাদাপরিতস্সনন্তি কত্ৰা দস্সেন্তো এৰমাহ। কথং পনেসা অনুপাদাপরিতস্সনা হোতীতি। উপাদাতব্বস্স অভাৰতো। যদি হি কোচি সঙ্খারো নিচ্চো ৰা ধুৰো ৰা অত্তা ৰা অত্তনিযো ৰাতি গহেতব্বযুত্তকো অভৰিস্স, অযং পরিতস্সনা উপাদাপরিতস্সনাৰ অস্স। যস্মা পন এৰং উপাদাতব্বো সঙ্খারো নাম নত্থি, তস্মা রূপং অত্তাতিআদিনা নযেন রূপাদযো উপাদিন্নাপি অনুপাদিন্নাৰ হোন্তি। এৰমেসা দিট্ঠিৰসেন উপাদাপরিতস্সনাপি সমানা অত্থতো অনুপাদাপরিতস্সনাযেৰ নাম হোতীতি ৰেদিতব্বা।
320.Anupādā paritassanāti satthārā khandhiyavagge ‘‘upādāparitassanañca vo, bhikkhave, desessāmi anupādāaparitassanañcā’’ti (saṃ. ni. 3.7) evaṃ gahetvā paritassanā, aggahetvāva aparitassanā ca kathitā, taṃ mahāthero upādāparitassanameva anupādāparitassananti katvā dassento evamāha. Kathaṃ panesā anupādāparitassanā hotīti. Upādātabbassa abhāvato. Yadi hi koci saṅkhāro nicco vā dhuvo vā attā vā attaniyo vāti gahetabbayuttako abhavissa, ayaṃ paritassanā upādāparitassanāva assa. Yasmā pana evaṃ upādātabbo saṅkhāro nāma natthi, tasmā rūpaṃ attātiādinā nayena rūpādayo upādinnāpi anupādinnāva honti. Evamesā diṭṭhivasena upādāparitassanāpi samānā atthato anupādāparitassanāyeva nāma hotīti veditabbā.
অঞ্ঞথা হোতীতি পরিৰত্ততি পকতিজহনেন নস্সতি, রূপৰিপরিণামানুপরিৰত্তীতি ‘‘মম রূপং ৰিপরিণত’’ন্তি ৰা, ‘‘যং অহু, তং ৰত মে নত্থী’’তি ৰা আদিনা (ম॰ নি॰ ১.২৪২) নযেন কম্মৰিঞ্ঞাণং রূপস্স ভেদানুপরিৰত্তি হোতি। ৰিপরিণামানুপরিৰত্তজাতি ৰিপরিণামস্স অনুপরিৰত্তনতো ৰিপরিণামারম্মণচিত্ততো জাতা। পরিতস্সনা ধম্মসমুপ্পাদাতি তণ্হাপরিতস্সনা চ অকুসলধম্মসমুপ্পাদা চ। চিত্তং পরিযাদায তিট্ঠন্তীতি কুসলচিত্তং পরিযাদিযিত্ৰা গহেত্ৰা খেপেত্ৰা তিট্ঠন্তি। উত্তাসৰাতি ভযতাসেনপি সউত্তাসো তণ্হাতাসেনপি সউত্তাসো। ৰিঘাতৰাতি সৰিঘাতো সদুক্খো। অপেক্খৰাতি সালযো সসিনেহো। এৰং খো, আৰুসো, অনুপাদা পরিতস্সনা হোতীতি এৰং মণিকরণ্ডকসঞ্ঞায তুচ্ছকরণ্ডকং গহেত্ৰা তস্মিং নট্ঠে পচ্ছা ৰিঘাতং আপজ্জন্তস্স ৰিয পচ্ছা অগ্গহেত্ৰা পরিতস্সনা হোতি।
Aññathā hotīti parivattati pakatijahanena nassati, rūpavipariṇāmānuparivattīti ‘‘mama rūpaṃ vipariṇata’’nti vā, ‘‘yaṃ ahu, taṃ vata me natthī’’ti vā ādinā (ma. ni. 1.242) nayena kammaviññāṇaṃ rūpassa bhedānuparivatti hoti. Vipariṇāmānuparivattajāti vipariṇāmassa anuparivattanato vipariṇāmārammaṇacittato jātā. Paritassanā dhammasamuppādāti taṇhāparitassanā ca akusaladhammasamuppādā ca. Cittaṃ pariyādāya tiṭṭhantīti kusalacittaṃ pariyādiyitvā gahetvā khepetvā tiṭṭhanti. Uttāsavāti bhayatāsenapi sauttāso taṇhātāsenapi sauttāso. Vighātavāti savighāto sadukkho. Apekkhavāti sālayo sasineho. Evaṃ kho, āvuso, anupādā paritassanā hotīti evaṃ maṇikaraṇḍakasaññāya tucchakaraṇḍakaṃ gahetvā tasmiṃ naṭṭhe pacchā vighātaṃ āpajjantassa viya pacchā aggahetvā paritassanā hoti.
৩২১. ন চ রূপৰিপরিণামানুপরিৰত্তীতি খীণাসৰস্স কম্মৰিঞ্ঞাণমেৰ নত্থি, তস্মা রূপভেদানুপরিৰত্তি ন হোতি। সেসং সব্বত্থ উত্তানমেৰাতি।
321.Naca rūpavipariṇāmānuparivattīti khīṇāsavassa kammaviññāṇameva natthi, tasmā rūpabhedānuparivatti na hoti. Sesaṃ sabbattha uttānamevāti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
উদ্দেসৰিভঙ্গসুত্তৰণ্ণনা নিট্ঠিতা।
Uddesavibhaṅgasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৮. উদ্দেসৰিভঙ্গসুত্তং • 8. Uddesavibhaṅgasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৮. উদ্দেসৰিভঙ্গসুত্তৰণ্ণনা • 8. Uddesavibhaṅgasuttavaṇṇanā
