| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၅. ဝိမောက္ခကထာ
5. Vimokkhakathā
၁. ဥဒ္ဒေသော
1. Uddeso
၂၀၉. ပုရိမနိဒာနံ ။ ‘‘တယောမေ , ဘိက္ခဝေ, ဝိမောက္ခာ။ ကတမေ တယော? သုညတော ဝိမောက္ခော, အနိမိတ္တော ဝိမောက္ခော, အပ္ပဏိဟိတော ဝိမောက္ခော – ဣမေ ခော, ဘိက္ခဝေ, တယော ဝိမောက္ခာ။
209. Purimanidānaṃ . ‘‘Tayome , bhikkhave, vimokkhā. Katame tayo? Suññato vimokkho, animitto vimokkho, appaṇihito vimokkho – ime kho, bhikkhave, tayo vimokkhā.
‘‘အပိ စ, အဋ္ဌသဋ္ဌိ ဝိမောက္ခာ – သုညတော ဝိမောက္ခော, အနိမိတ္တော ဝိမောက္ခော, အပ္ပဏိဟိတော ဝိမောက္ခော; အဇ္ဈတ္တဝုဋ္ဌာနော ဝိမောက္ခော, ဗဟိဒ္ဓာဝုဋ္ဌာနော ဝိမောက္ခော, ဒုဘတော ဝုဋ္ဌာနော ဝိမောက္ခော; အဇ္ဈတ္တဝုဋ္ဌာနာ စတ္တာရော ဝိမောက္ခာ, ဗဟိဒ္ဓာဝုဋ္ဌာနာ စတ္တာရော ဝိမောက္ခာ, ဒုဘတော ဝုဋ္ဌာနာ စတ္တာရော ဝိမောက္ခာ; အဇ္ဈတ္တဝုဋ္ဌာနာနံ အနုလောမာ စတ္တာရော ဝိမောက္ခာ, ဗဟိဒ္ဓာဝုဋ္ဌာနာနံ အနုလောမာ စတ္တာရော ဝိမောက္ခာ, ဒုဘတော ဝုဋ္ဌာနာနံ အနုလောမာ စတ္တာရော ဝိမောက္ခာ; အဇ္ဈတ္တဝုဋ္ဌာနပဋိပ္ပသ္သဒ္ဓီ 1 စတ္တာရော ဝိမောက္ခာ, ဗဟိဒ္ဓာဝုဋ္ဌာနပဋိပ္ပသ္သဒ္ဓီ စတ္တာရော ဝိမောက္ခာ, ဒုဘတော ဝုဋ္ဌာနပဋိပ္ပသ္သဒ္ဓီ စတ္တာရော ဝိမောက္ခာ; ရူပီ ရူပာနိ ပသ္သတီတိ ဝိမောက္ခော, အဇ္ဈတ္တံ အရူပသညီ ဗဟိဒ္ဓာ ရူပာနိ ပသ္သတီတိ ဝိမောက္ခော, သုဘံ တေဝ အဓိမုတ္တော ဟောတီတိ ဝိမောက္ခော; အာကာသာနဉ္စာယတနသမာပတ္တိ ဝိမောက္ခော, ဝိညာဏဉ္စာယတနသမာပတ္တိ ဝိမောက္ခော, အာကိဉ္စညာယတနသမာပတ္တိ ဝိမောက္ခော; နေဝသညာနာသညာယတနသမာပတ္တိ ဝိမောက္ခော, သညာဝေဒယိတနိရောဓသမာပတ္တိ ဝိမောက္ခော; သမယဝိမောက္ခော, အသမယဝိမောက္ခော; သာမယိကော ဝိမောက္ခော, အသာမယိကော ဝိမောက္ခော; ကုပ္ပော ဝိမောက္ခော, အကုပ္ပော ဝိမောက္ခော; လောကိယော ဝိမောက္ခော, လောကုတ္တရော ဝိမောက္ခော; သာသဝော ဝိမောက္ခော, အနာသဝော ဝိမောက္ခော; သာမိသော ဝိမောက္ခော, နိရာမိသော ဝိမောက္ခော; နိရာမိသာနိရာမိသတရော ဝိမောက္ခော, ပဏိဟိတော ဝိမောက္ခော, အပ္ပဏိဟိတော ဝိမောက္ခော, ပဏိဟိတပ္ပဋိပ္ပသ္သဒ္ဓိ ဝိမောက္ခော; သညုတ္တော ဝိမောက္ခော, ဝိသညုတ္တော ဝိမောက္ခော; ဧကတ္တဝိမောက္ခော, နာနတ္တဝိမောက္ခော , သညာဝိမောက္ခော, ဉာဏဝိမောက္ခော; သီတိသိယာဝိမောက္ခော 2, ဈာနဝိမောက္ခော, အနုပာဒာစိတ္တသ္သ ဝိမောက္ခော’’။
‘‘Api ca, aṭṭhasaṭṭhi vimokkhā – suññato vimokkho, animitto vimokkho, appaṇihito vimokkho; ajjhattavuṭṭhāno vimokkho, bahiddhāvuṭṭhāno vimokkho, dubhato vuṭṭhāno vimokkho; ajjhattavuṭṭhānā cattāro vimokkhā, bahiddhāvuṭṭhānā cattāro vimokkhā, dubhato vuṭṭhānā cattāro vimokkhā; ajjhattavuṭṭhānānaṃ anulomā cattāro vimokkhā, bahiddhāvuṭṭhānānaṃ anulomā cattāro vimokkhā, dubhato vuṭṭhānānaṃ anulomā cattāro vimokkhā; ajjhattavuṭṭhānapaṭippassaddhī 3 cattāro vimokkhā, bahiddhāvuṭṭhānapaṭippassaddhī cattāro vimokkhā, dubhato vuṭṭhānapaṭippassaddhī cattāro vimokkhā; rūpī rūpāni passatīti vimokkho, ajjhattaṃ arūpasaññī bahiddhā rūpāni passatīti vimokkho, subhaṃ teva adhimutto hotīti vimokkho; ākāsānañcāyatanasamāpatti vimokkho, viññāṇañcāyatanasamāpatti vimokkho, ākiñcaññāyatanasamāpatti vimokkho; nevasaññānāsaññāyatanasamāpatti vimokkho, saññāvedayitanirodhasamāpatti vimokkho; samayavimokkho, asamayavimokkho; sāmayiko vimokkho, asāmayiko vimokkho; kuppo vimokkho, akuppo vimokkho; lokiyo vimokkho, lokuttaro vimokkho; sāsavo vimokkho, anāsavo vimokkho; sāmiso vimokkho, nirāmiso vimokkho; nirāmisānirāmisataro vimokkho, paṇihito vimokkho, appaṇihito vimokkho, paṇihitappaṭippassaddhi vimokkho; saññutto vimokkho, visaññutto vimokkho; ekattavimokkho, nānattavimokkho , saññāvimokkho, ñāṇavimokkho; sītisiyāvimokkho 4, jhānavimokkho, anupādācittassa vimokkho’’.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၁. ဝိမောက္ခုဒ္ဒေသဝဏ္ဏနာ • 1. Vimokkhuddesavaṇṇanā
