| Library / Tipiṭaka / ਤਿਪਿਟਕ • Tipiṭaka / ਉਦਾਨ-ਅਟ੍ਠਕਥਾ • Udāna-aṭṭhakathā |
੨. ਉਦ੍ਧਤਸੁਤ੍ਤવਣ੍ਣਨਾ
2. Uddhatasuttavaṇṇanā
੩੨. ਦੁਤਿਯੇ ਕੁਸਿਨਾਰਾਯਨ੍ਤਿ ਕੁਸਿਨਾਰਾਯਂ ਨਾਮ ਮਲ੍ਲਰਾਜੂਨਂ ਨਗਰੇ। ਉਪવਤ੍ਤਨੇ ਮਲ੍ਲਾਨਂ ਸਾਲવਨੇਤਿ ਯਥਾ ਹਿ ਅਨੁਰਾਧਪੁਰਸ੍ਸ ਥੂਪਾਰਾਮੋ, ਏવਂ ਕੁਸਿਨਾਰਾਯ ਉਯ੍ਯਾਨਂ ਦਕ੍ਖਿਣਪਚ੍ਛਿਮਦਿਸਾਯ ਹੋਤਿ। ਯਥਾ ਥੂਪਾਰਾਮਤੋ ਦਕ੍ਖਿਣਦ੍વਾਰੇਨ ਨਗਰਪવਿਸਨਮਗ੍ਗੋ ਪਾਚੀਨਮੁਖੋ ਗਨ੍ਤ੍વਾ ਉਤ੍ਤਰੇਨ ਨਿવਤ੍ਤਤਿ, ਏવਂ ਉਯ੍ਯਾਨਤੋ ਸਾਲਪਨ੍ਤਿ ਪਾਚੀਨਮੁਖਾ ਗਨ੍ਤ੍વਾ ਉਤ੍ਤਰੇਨ ਨਿવਤ੍ਤਾ, ਤਸ੍ਮਾ ‘‘ਉਪવਤ੍ਤਨ’’ਨ੍ਤਿ વੁਚ੍ਚਤਿ। ਤਸ੍ਮਿਂ ਉਪવਤ੍ਤਨੇ ਮਲ੍ਲਰਾਜੂਨਂ ਸਾਲવਨੇ। ਅਰਞ੍ਞਕੁਟਿਕਾਯਨ੍ਤਿ ਸਾਲਪਨ੍ਤਿਯਾ ਅવਿਦੂਰੇ ਰੁਕ੍ਖਗਚ੍ਛਸਞ੍ਛਨ੍ਨਟ੍ਠਾਨੇ ਕਤਾ ਕੁਟਿਕਾ, ਤਂ ਸਨ੍ਧਾਯ વੁਤ੍ਤਂ ‘‘ਅਰਞ੍ਞਕੁਟਿਕਾਯਂ વਿਹਰਤੀ’’ਤਿ। ਤੇ ਪਨ ਭਿਕ੍ਖੂ ਪਟਿਸਙ੍ਖਾਨવਿਰਹਿਤਾ ਓਸ੍ਸਟ੍ਠવੀਰਿਯਾ ਪਮਤ੍ਤવਿਹਾਰਿਨੋ, ਤੇਨ વੁਤ੍ਤਂ ‘‘ਉਦ੍ਧਤਾ’’ਤਿਆਦਿ।
32. Dutiye kusinārāyanti kusinārāyaṃ nāma mallarājūnaṃ nagare. Upavattane mallānaṃ sālavaneti yathā hi anurādhapurassa thūpārāmo, evaṃ kusinārāya uyyānaṃ dakkhiṇapacchimadisāya hoti. Yathā thūpārāmato dakkhiṇadvārena nagarapavisanamaggo pācīnamukho gantvā uttarena nivattati, evaṃ uyyānato sālapanti pācīnamukhā gantvā uttarena nivattā, tasmā ‘‘upavattana’’nti vuccati. Tasmiṃ upavattane mallarājūnaṃ sālavane. Araññakuṭikāyanti sālapantiyā avidūre rukkhagacchasañchannaṭṭhāne katā kuṭikā, taṃ sandhāya vuttaṃ ‘‘araññakuṭikāyaṃ viharatī’’ti. Te pana bhikkhū paṭisaṅkhānavirahitā ossaṭṭhavīriyā pamattavihārino, tena vuttaṃ ‘‘uddhatā’’tiādi.
ਤਤ੍ਥ ਉਦ੍ਧਚ੍ਚਬਹੁਲਤ੍ਤਾ ਅવੂਪਸਨ੍ਤਚਿਤ੍ਤਤਾਯ ਉਦ੍ਧਤਾ। ਤੁਚ੍ਛਭਾવੇਨ ਮਾਨੋ ਨਲ਼ੋ વਿਯਾਤਿ ਨਲ਼ੋ, ਮਾਨਸਙ੍ਖਾਤੋ ਉਗ੍ਗਤੋ ਨਲ਼ੋ ਏਤੇਸਨ੍ਤਿ ਉਨ੍ਨਲ਼ਾ, ਉਗ੍ਗਤਤੁਚ੍ਛਮਾਨਾਤਿ ਅਤ੍ਥੋ। ਪਤ੍ਤਚੀવਰਮਣ੍ਡਨਾਦਿਚਾਪਲ੍ਲੇਨ ਸਮਨ੍ਨਾਗਤਤ੍ਤਾ ਬਹੁਕਤਾਯ વਾ ਚਪਲਾ। ਫਰੁਸવਾਚਤਾਯ ਮੁਖੇਨ ਖਰਾਤਿ ਮੁਖਰਾ। ਤਿਰਚ੍ਛਾਨਕਥਾਬਹੁਲਤਾਯ વਿਕਿਣ੍ਣਾ ਬ੍ਯਾਕੁਲਾ વਾਚਾ ਏਤੇਸਨ੍ਤਿ વਿਕਿਣ੍ਣવਾਚਾ। ਮੁਟ੍ਠਾ ਨਟ੍ਠਾ ਸਤਿ ਏਤੇਸਨ੍ਤਿ ਮੁਟ੍ਠਸ੍ਸਤਿਨੋ, ਸਤਿવਿਰਹਿਤਾ ਪਮਾਦવਿਹਾਰਿਨੋਤਿ ਅਤ੍ਥੋ। ਸਬ੍ਬੇਨ ਸਬ੍ਬਂ ਸਮ੍ਪਜਞ੍ਞਾਭਾવਤੋ ਅਸਮ੍ਪਜਾਨਾ। ਗਦ੍ਦੂਹਨਮਤ੍ਤਮ੍ਪਿ ਕਾਲਂ ਚਿਤ੍ਤਸਮਾਧਾਨਸ੍ਸ ਅਭਾવਤੋ ਨ ਸਮਾਹਿਤਾਤਿ ਅਸਮਾਹਿਤਾ। ਲੋਲਸਭਾવਤ੍ਤਾ ਭਨ੍ਤਮਿਗਸਪ੍ਪਟਿਭਾਗਤਾਯ વਿਬ੍ਭਨ੍ਤਚਿਤ੍ਤਾ। ਮਨਚ੍ਛਟ੍ਠਾਨਂ ਇਨ੍ਦ੍ਰਿਯਾਨਂ ਅਸਂવਰਣਤੋ ਅਸਞ੍ਞਤਿਨ੍ਦ੍ਰਿਯਤਾਯ ਪਾਕਤਿਨ੍ਦ੍ਰਿਯਾ।
Tattha uddhaccabahulattā avūpasantacittatāya uddhatā. Tucchabhāvena māno naḷo viyāti naḷo, mānasaṅkhāto uggato naḷo etesanti unnaḷā, uggatatucchamānāti attho. Pattacīvaramaṇḍanādicāpallena samannāgatattā bahukatāya vā capalā. Pharusavācatāya mukhena kharāti mukharā. Tiracchānakathābahulatāya vikiṇṇā byākulā vācā etesanti vikiṇṇavācā. Muṭṭhā naṭṭhā sati etesanti muṭṭhassatino, sativirahitā pamādavihārinoti attho. Sabbena sabbaṃ sampajaññābhāvato asampajānā. Gaddūhanamattampi kālaṃ cittasamādhānassa abhāvato na samāhitāti asamāhitā. Lolasabhāvattā bhantamigasappaṭibhāgatāya vibbhantacittā. Manacchaṭṭhānaṃ indriyānaṃ asaṃvaraṇato asaññatindriyatāya pākatindriyā.
ਏਤਮਤ੍ਥਂ વਿਦਿਤ੍વਾਤਿ ਏਤਂ ਤੇਸਂ ਭਿਕ੍ਖੂਨਂ ਉਦ੍ਧਚ੍ਚਾਦਿવਸੇਨ ਪਮਾਦવਿਹਾਰਂ ਜਾਨਿਤ੍વਾ। ਇਮਂ ਉਦਾਨਨ੍ਤਿ ਇਮਂ ਪਮਾਦવਿਹਾਰੇ ਅਪ੍ਪਮਾਦવਿਹਾਰੇ ਚ ਯਥਾਕ੍ਕਮਂ ਆਦੀਨવਾਨਿਸਂਸવਿਭਾવਨਂ ਉਦਾਨਂ ਉਦਾਨੇਸਿ।
Etamatthaṃviditvāti etaṃ tesaṃ bhikkhūnaṃ uddhaccādivasena pamādavihāraṃ jānitvā. Imaṃ udānanti imaṃ pamādavihāre appamādavihāre ca yathākkamaṃ ādīnavānisaṃsavibhāvanaṃ udānaṃ udānesi.
ਤਤ੍ਥ ਅਰਕ੍ਖਿਤੇਨਾਤਿ ਸਤਿਆਰਕ੍ਖਾਭਾવੇਨ ਅਗੁਤ੍ਤੇਨ। ਕਾਯੇਨਾਤਿ ਛવਿਞ੍ਞਾਣਕਾਯੇਨ ਚਕ੍ਖੁવਿਞ੍ਞਾਣੇਨ ਹਿ ਰੂਪਂ ਦਿਸ੍વਾ ਤਤ੍ਥ ਨਿਮਿਤ੍ਤਾਨੁਬ੍ਯਞ੍ਜਨਗ੍ਗਹਣવਸੇਨ ਅਭਿਜ੍ਝਾਦਿਪવਤ੍ਤਿਤੋ વਿਞ੍ਞਾਣਦ੍વਾਰਸ੍ਸ ਸਤਿਯਾ ਅਰਕ੍ਖਿਤਭਾવਤੋ। ਸੋਤવਿਞ੍ਞਾਣਾਦੀਸੁਪਿ ਏਸੇવ ਨਯੋ। ਏવਂ ਛવਿਞ੍ਞਾਣਕਾਯਸ੍ਸ ਅਰਕ੍ਖਿਤਭਾવਂ ਸਨ੍ਧਾਯਾਹ ‘‘ਅਰਕ੍ਖਿਤੇਨ ਕਾਯੇਨਾ’’ਤਿ। ਕੇਚਿ ਪਨ ‘‘ਕਾਯੇਨਾ’’ਤਿ ਅਤ੍ਥਂ વਦਨ੍ਤਿ, ਤੇਸਮ੍ਪਿ વੁਤ੍ਤਨਯੇਨੇવ ਅਤ੍ਥਯੋਜਨਾਯ ਸਤਿ ਯੁਜ੍ਜੇਯ੍ਯ। ਅਪਰੇ ਪਨ ‘‘ਅਰਕ੍ਖਿਤੇਨ ਚਿਤ੍ਤੇਨਾ’’ਤਿ ਪਠਨ੍ਤਿ, ਤੇਸਮ੍ਪਿ વੁਤ੍ਤਨਯੋ ਏવ ਅਤ੍ਥੋ। ਮਿਚ੍ਛਾਦਿਟ੍ਠਿਹਤੇਨਾਤਿ ਸਸ੍ਸਤਾਦਿਮਿਚ੍ਛਾਭਿਨਿવੇਸਦੂਸਿਤੇਨ। ਥਿਨਮਿਦ੍ਧਾਭਿਭੂਤੇਨਾਤਿ ਚਿਤ੍ਤਸ੍ਸ ਅਕਲ੍ਯਤਾਲਕ੍ਖਣੇਨ ਥਿਨੇਨ ਕਾਯਸ੍ਸ ਅਕਲ੍ਯਤਾਲਕ੍ਖਣੇਨ ਮਿਦ੍ਧੇਨ ਚ ਅਜ੍ਝੋਤ੍ਥਟੇਨ, ਤੇਨ ਕਾਯੇਨ ਚਿਤ੍ਤੇਨਾਤਿ વਾ ਸਮ੍ਬਨ੍ਧੋ। વਸਂ ਮਾਰਸ੍ਸ ਗਚ੍ਛਤੀਤਿ ਕਿਲੇਸਮਾਰਾਦਿਕਸ੍ਸ ਸਬ੍ਬਸ੍ਸਪਿ ਮਾਰਸ੍ਸ વਸਂ ਯਥਾਕਾਮਕਰਣੀਯਤਂ ਉਪਗਚ੍ਛਤਿ, ਤੇਸਂ વਿਸਯਂ ਨਾਤਿਕ੍ਕਮਤੀਤਿ ਅਤ੍ਥੋ।
Tattha arakkhitenāti satiārakkhābhāvena aguttena. Kāyenāti chaviññāṇakāyena cakkhuviññāṇena hi rūpaṃ disvā tattha nimittānubyañjanaggahaṇavasena abhijjhādipavattito viññāṇadvārassa satiyā arakkhitabhāvato. Sotaviññāṇādīsupi eseva nayo. Evaṃ chaviññāṇakāyassa arakkhitabhāvaṃ sandhāyāha ‘‘arakkhitena kāyenā’’ti. Keci pana ‘‘kāyenā’’ti atthaṃ vadanti, tesampi vuttanayeneva atthayojanāya sati yujjeyya. Apare pana ‘‘arakkhitena cittenā’’ti paṭhanti, tesampi vuttanayo eva attho. Micchādiṭṭhihatenāti sassatādimicchābhinivesadūsitena. Thinamiddhābhibhūtenāti cittassa akalyatālakkhaṇena thinena kāyassa akalyatālakkhaṇena middhena ca ajjhotthaṭena, tena kāyena cittenāti vā sambandho. Vasaṃ mārassa gacchatīti kilesamārādikassa sabbassapi mārassa vasaṃ yathākāmakaraṇīyataṃ upagacchati, tesaṃ visayaṃ nātikkamatīti attho.
ਇਮਾਯ ਹਿ ਗਾਥਾਯ ਭਗવਾ ਯੇ ਸਤਿਆਰਕ੍ਖਾਭਾવੇਨ ਸਬ੍ਬਸੋ ਅਰਕ੍ਖਿਤਚਿਤ੍ਤਾ, ਯੋਨਿਸੋਮਨਸਿਕਾਰਸ੍ਸ ਹੇਤੁਭੂਤਾਯ ਪਞ੍ਞਾਯ ਅਭਾવਤੋ ਅਯੋਨਿਸੋ ਉਮ੍ਮੁਜ੍ਜਨੇਨ ਨਿਚ੍ਚਨ੍ਤਿਆਦਿਨਾ વਿਪਰਿਯੇਸਗਾਹਿਨੋ, ਤਤੋ ਏવ ਕੁਸਲਕਿਰਿਯਾਯ વੀਰਿਯਾਰਮ੍ਭਾਭਾવਤੋ ਕੋਸਜ੍ਜਾਭਿਭੂਤਾ ਸਂਸਾਰવਟ੍ਟਤੋ ਸੀਸਂ ਨ ਉਕ੍ਖਿਪਿਸ੍ਸਨ੍ਤੀਤਿ ਤੇਸਂ ਭਿਕ੍ਖੂਨਂ ਪਮਾਦવਿਹਾਰਗਰਹਾਮੁਖੇਨ વਟ੍ਟਂ ਦਸ੍ਸੇਤ੍વਾ ਇਦਾਨਿ વਿવਟ੍ਟਂ ਦਸ੍ਸੇਤੁਂ, ‘‘ਤਸ੍ਮਾ ਰਕ੍ਖਿਤਚਿਤ੍ਤਸ੍ਸਾ’’ਤਿ ਦੁਤਿਯਗਾਥਮਾਹ।
Imāya hi gāthāya bhagavā ye satiārakkhābhāvena sabbaso arakkhitacittā, yonisomanasikārassa hetubhūtāya paññāya abhāvato ayoniso ummujjanena niccantiādinā vipariyesagāhino, tato eva kusalakiriyāya vīriyārambhābhāvato kosajjābhibhūtā saṃsāravaṭṭato sīsaṃ na ukkhipissantīti tesaṃ bhikkhūnaṃ pamādavihāragarahāmukhena vaṭṭaṃ dassetvā idāni vivaṭṭaṃ dassetuṃ, ‘‘tasmā rakkhitacittassā’’ti dutiyagāthamāha.
ਤਤ੍ਥ ਤਸ੍ਮਾ ਰਕ੍ਖਿਤਚਿਤ੍ਤਸ੍ਸਾਤਿ ਯਸ੍ਮਾ ਅਰਕ੍ਖਿਤਚਿਤ੍ਤੋ ਮਾਰਸ੍ਸ ਯਥਾਕਾਮਕਰਣੀਯੋ ਹੁਤ੍વਾ ਸਂਸਾਰੇਯੇવ ਹੋਤਿ, ਤਸ੍ਮਾ ਸਤਿਸਂવਰੇਨ ਮਨਚ੍ਛਟ੍ਠਾਨਂ ਇਨ੍ਦ੍ਰਿਯਾਨਂ ਰਕ੍ਖਣੇਨ ਪਿਦਹਨੇਨ ਰਕ੍ਖਿਤਚਿਤ੍ਤੋ ਅਸ੍ਸ। ਚਿਤ੍ਤੇ ਹਿ ਰਕ੍ਖਿਤੇ ਚਕ੍ਖਾਦਿਇਨ੍ਦ੍ਰਿਯਾਨਿ ਰਕ੍ਖਿਤਾਨੇવ ਹੋਨ੍ਤੀਤਿ। ਸਮ੍ਮਾਸਙ੍ਕਪ੍ਪਗੋਚਰੋਤਿ ਯਸ੍ਮਾ ਮਿਚ੍ਛਾਸਙ੍ਕਪ੍ਪਗੋਚਰੋ ਤਥਾ ਤਥਾ ਅਯੋਨਿਸੋ વਿਤਕ੍ਕੇਤ੍વਾ ਨਾਨਾવਿਧਾਨਿ ਮਿਚ੍ਛਾਦਸ੍ਸਨਾਨਿ ਗਣ੍ਹਨ੍ਤੋ ਮਿਚ੍ਛਾਦਿਟ੍ਠਿਹਤੇਨ ਚਿਤ੍ਤੇਨ ਮਾਰਸ੍ਸ ਯਥਾਕਾਮਕਰਣੀਯੋ ਹੋਤਿ, ਤਸ੍ਮਾ ਯੋਨਿਸੋਮਨਸਿਕਾਰੇਨ ਕਮ੍ਮਂ ਕਰੋਨ੍ਤੋ ਨੇਕ੍ਖਮ੍ਮਸਙ੍ਕਪ੍ਪਾਦਿਸਮ੍ਮਾਸਙ੍ਕਪ੍ਪਗੋਚਰੋ ਅਸ੍ਸ, ਝਾਨਾਦਿਸਮ੍ਪਯੁਤ੍ਤਂ ਸਮ੍ਮਾਸਙ੍ਕਪ੍ਪਮੇવ ਅਤ੍ਤਨੋ ਚਿਤ੍ਤਸ੍ਸ ਪવਤ੍ਤਿਟ੍ਠਾਨਂ ਕਰੇਯ੍ਯ। ਸਮ੍ਮਾਦਿਟ੍ਠਿਪੁਰੇਕ੍ਖਾਰੋਤਿ ਸਮ੍ਮਾਸਙ੍ਕਪ੍ਪਗੋਚਰਤਾਯ વਿਧੂਤਮਿਚ੍ਛਾਦਸ੍ਸਨੋ ਪੁਰੇਤਰਂਯੇવ ਕਮ੍ਮਸ੍ਸਕਤਾਲਕ੍ਖਣਂ, ਤਤੋ ਯਥਾਭੂਤਞਾਣਲਕ੍ਖਣਞ੍ਚ ਸਮ੍ਮਾਦਿਟ੍ਠਿਂ ਪੁਰਤੋ ਕਤ੍વਾ ਪੁਬ੍ਬੇ વੁਤ੍ਤਨਯੇਨੇવ ਸੀਲਸਮਾਧੀਸੁ ਯੁਤ੍ਤੋ ਪਯੁਤ੍ਤੋ વਿਪਸ੍ਸਨਂ ਆਰਭਿਤ੍વਾ ਸਙ੍ਖਾਰੇ ਸਮ੍ਮਸਨ੍ਤੋ ਞਤ੍વਾਨ ਉਦਯਬ੍ਬਯਂ ਪਞ੍ਚਸੁ ਉਪਾਦਾਨਕ੍ਖਨ੍ਧੇਸੁ ਸਮਪਞ੍ਞਾਸਾਯ ਆਕਾਰੇਹਿ ਉਪ੍ਪਾਦਨਿਰੋਧਂ વવਤ੍ਥਪੇਤ੍વਾ ਉਦਯਬ੍ਬਯਞਾਣਮਧਿਗਨ੍ਤ੍વਾ ਤਤੋ ਪਰਂ ਭਙ੍ਗਾਨੁਪਸ੍ਸਨਾਦਿવਸੇਨ વਿਪਸ੍ਸਨਂ ਉਸ੍ਸੁਕ੍ਕਾਪੇਤ੍વਾ ਅਨੁਕ੍ਕਮੇਨ ਅਰਿਯਮਗ੍ਗਂ ਗਣ੍ਹਨ੍ਤੋ ਅਗ੍ਗਮਗ੍ਗੇਨ, ਥਿਨਮਿਦ੍ਧਾਭਿਭੂ ਭਿਕ੍ਖੁ ਸਬ੍ਬਾ ਦੁਗ੍ਗਤਿਯੋ ਜਹੇਤਿ, ਏવਂ ਸੋ ਹੇਟ੍ਠਿਮਮਗ੍ਗવਜ੍ਝਾਨਂ ਕਿਲੇਸਾਨਂ ਪਠਮਮੇવ ਪਹੀਨਤ੍ਤਾ ਦਿਟ੍ਠਿવਿਪ੍ਪਯੁਤ੍ਤਲੋਭਸਹਗਤਚਿਤ੍ਤੁਪ੍ਪਾਦੇਸੁ ਉਪ੍ਪਜ੍ਜਨਕਥਿਨਮਿਦ੍ਧਾਨਂ ਅਧਿਗਤੇਨ ਅਰਹਤ੍ਤਮਗ੍ਗੇਨ ਸਮੁਚ੍ਛਿਨ੍ਦਨਤੋ ਤਦੇਕਟ੍ਠਾਨਂ ਮਾਨਾਦੀਨਮ੍ਪਿ ਪਹੀਨਤ੍ਤਾ ਸਬ੍ਬਸੋ ਭਿਨ੍ਨਕਿਲੇਸੋ ਖੀਣਾਸવੋ ਭਿਕ੍ਖੁ ਤਿવਿਧਦੁਕ੍ਖਤਾਯੋਗੇਨ ਦੁਗ੍ਗਤਿਸਙ੍ਖਾਤਾ ਸਬ੍ਬਾਪਿ ਗਤਿਯੋ ਉਚ੍ਛਿਨ੍ਨਭવਮੂਲਤ੍ਤਾ ਜਹੇ, ਪਜਹੇਯ੍ਯ। ਤਾਸਂ ਪਰਭਾਗੇ ਨਿਬ੍ਬਾਨੇ ਪਤਿਟ੍ਠੇਯ੍ਯਾਤਿ ਅਤ੍ਥੋ।
Tattha tasmā rakkhitacittassāti yasmā arakkhitacitto mārassa yathākāmakaraṇīyo hutvā saṃsāreyeva hoti, tasmā satisaṃvarena manacchaṭṭhānaṃ indriyānaṃ rakkhaṇena pidahanena rakkhitacitto assa. Citte hi rakkhite cakkhādiindriyāni rakkhitāneva hontīti. Sammāsaṅkappagocaroti yasmā micchāsaṅkappagocaro tathā tathā ayoniso vitakketvā nānāvidhāni micchādassanāni gaṇhanto micchādiṭṭhihatena cittena mārassa yathākāmakaraṇīyo hoti, tasmā yonisomanasikārena kammaṃ karonto nekkhammasaṅkappādisammāsaṅkappagocaro assa, jhānādisampayuttaṃ sammāsaṅkappameva attano cittassa pavattiṭṭhānaṃ kareyya. Sammādiṭṭhipurekkhāroti sammāsaṅkappagocaratāya vidhūtamicchādassano puretaraṃyeva kammassakatālakkhaṇaṃ, tato yathābhūtañāṇalakkhaṇañca sammādiṭṭhiṃ purato katvā pubbe vuttanayeneva sīlasamādhīsu yutto payutto vipassanaṃ ārabhitvā saṅkhāre sammasanto ñatvāna udayabbayaṃ pañcasu upādānakkhandhesu samapaññāsāya ākārehi uppādanirodhaṃ vavatthapetvā udayabbayañāṇamadhigantvā tato paraṃ bhaṅgānupassanādivasena vipassanaṃ ussukkāpetvā anukkamena ariyamaggaṃ gaṇhanto aggamaggena, thinamiddhābhibhū bhikkhu sabbā duggatiyo jaheti, evaṃ so heṭṭhimamaggavajjhānaṃ kilesānaṃ paṭhamameva pahīnattā diṭṭhivippayuttalobhasahagatacittuppādesu uppajjanakathinamiddhānaṃ adhigatena arahattamaggena samucchindanato tadekaṭṭhānaṃ mānādīnampi pahīnattā sabbaso bhinnakileso khīṇāsavo bhikkhu tividhadukkhatāyogena duggatisaṅkhātā sabbāpi gatiyo ucchinnabhavamūlattā jahe, pajaheyya. Tāsaṃ parabhāge nibbāne patiṭṭheyyāti attho.
ਦੁਤਿਯਸੁਤ੍ਤવਣ੍ਣਨਾ ਨਿਟ੍ਠਿਤਾ।
Dutiyasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਉਦਾਨਪਾਲ਼ਿ • Udānapāḷi / ੨. ਉਦ੍ਧਤਸੁਤ੍ਤਂ • 2. Uddhatasuttaṃ
