| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
2. உதோ³ஸிதஸிக்கா²பத³ங்
2. Udositasikkhāpadaṃ
471. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கூ² பி⁴க்கூ²னங் ஹத்தே² சீவரங் நிக்கி²பித்வா ஸந்தருத்தரேன ஜனபத³சாரிகங் பக்கமந்தி. தானி சீவரானி சிரங் நிக்கி²த்தானி கண்ணகிதானி ஹொந்தி. தானி பி⁴க்கூ² ஓதாபெந்தி. அத்³த³ஸா கோ² ஆயஸ்மா ஆனந்தோ³ ஸேனாஸனசாரிகங் ஆஹிண்ட³ந்தோ தே பி⁴க்கூ² தானி சீவரானி ஓதாபெந்தே. தி³ஸ்வான யேன தே பி⁴க்கூ² தேனுபஸங்கமி; உபஸங்கமித்வா தே பி⁴க்கூ² ஏதத³வோச – ‘‘கஸ்ஸிமானி, ஆவுஸோ, சீவரானி கண்ணகிதானீ’’தி? அத² கோ² தே பி⁴க்கூ² ஆயஸ்மதோ ஆனந்த³ஸ்ஸ ஏதமத்த²ங் ஆரோசேஸுங். ஆயஸ்மா ஆனந்தோ³ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம பி⁴க்கூ² பி⁴க்கூ²னங் ஹத்தே² சீவரங் நிக்கி²பித்வா ஸந்தருத்தரேன ஜனபத³சாரிகங் பக்கமிஸ்ஸந்தீ’’தி! அத² கோ² ஆயஸ்மா ஆனந்தோ³ தே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸி…பே॰… ‘‘ஸச்சங் கிர, பி⁴க்க²வே, பி⁴க்கூ² பி⁴க்கூ²னங் ஹத்தே² சீவரங் நிக்கி²பித்வா ஸந்தருத்தரேன ஜனபத³சாரிகங் பக்கமந்தீ’’தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம தே, பி⁴க்க²வே, மோக⁴புரிஸா பி⁴க்கூ²னங் ஹத்தே² சீவரங் நிக்கி²பித்வா ஸந்தருத்தரேன ஜனபத³சாரிகங் பக்கமிஸ்ஸந்தி ! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
471. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhū bhikkhūnaṃ hatthe cīvaraṃ nikkhipitvā santaruttarena janapadacārikaṃ pakkamanti. Tāni cīvarāni ciraṃ nikkhittāni kaṇṇakitāni honti. Tāni bhikkhū otāpenti. Addasā kho āyasmā ānando senāsanacārikaṃ āhiṇḍanto te bhikkhū tāni cīvarāni otāpente. Disvāna yena te bhikkhū tenupasaṅkami; upasaṅkamitvā te bhikkhū etadavoca – ‘‘kassimāni, āvuso, cīvarāni kaṇṇakitānī’’ti? Atha kho te bhikkhū āyasmato ānandassa etamatthaṃ ārocesuṃ. Āyasmā ānando ujjhāyati khiyyati vipāceti – ‘‘kathañhi nāma bhikkhū bhikkhūnaṃ hatthe cīvaraṃ nikkhipitvā santaruttarena janapadacārikaṃ pakkamissantī’’ti! Atha kho āyasmā ānando te bhikkhū anekapariyāyena vigarahitvā bhagavato etamatthaṃ ārocesi…pe… ‘‘saccaṃ kira, bhikkhave, bhikkhū bhikkhūnaṃ hatthe cīvaraṃ nikkhipitvā santaruttarena janapadacārikaṃ pakkamantī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā bhikkhūnaṃ hatthe cīvaraṃ nikkhipitvā santaruttarena janapadacārikaṃ pakkamissanti ! Netaṃ, bhikkhave, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
472. ‘‘நிட்டி²தசீவரஸ்மிங் பி⁴க்கு²னா உப்³ப⁴தஸ்மிங் கதி²னே ஏகரத்தம்பி சே பி⁴க்கு² திசீவரேன விப்பவஸெய்ய, நிஸ்ஸக்³கி³யங் பாசித்திய’’ந்தி.
472.‘‘Niṭṭhitacīvarasmiṃ bhikkhunā ubbhatasmiṃ kathine ekarattampi ce bhikkhu ticīvarena vippavaseyya, nissaggiyaṃ pācittiya’’nti.
ஏவஞ்சித³ங் ப⁴க³வதா பி⁴க்கூ²னங் ஸிக்கா²பத³ங் பஞ்ஞத்தங் ஹோதி.
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
473. தேன கோ² பன ஸமயேன அஞ்ஞதரோ பி⁴க்கு² கோஸம்பி³யங் கி³லானோ ஹோதி. ஞாதகா தஸ்ஸ பி⁴க்கு²னோ ஸந்திகே தூ³தங் பாஹேஸுங் – ‘‘ஆக³ச்ச²து ப⁴த³ந்தோ, மயங், உபட்ட²ஹிஸ்ஸாமா’’தி. பி⁴க்கூ²பி ஏவமாஹங்ஸு – ‘‘க³ச்சா²வுஸோ , ஞாதகா தங் உபட்ட²ஹிஸ்ஸந்தீ’’தி. ஸோ ஏவமாஹ – ‘‘ப⁴க³வதாவுஸோ, ஸிக்கா²பத³ங் பஞ்ஞத்தங் – ‘ந திசீவரேன விப்பவஸிதப்³ப³’ந்தி. அஹஞ்சம்ஹி கி³லானோ. ந ஸக்கோமி திசீவரங் ஆதா³ய பக்கமிதுங். நாஹங் க³மிஸ்ஸாமீ’’தி . ப⁴க³வதோ ஏதமத்த²ங் ஆரோசேஸுங். அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, கி³லானஸ்ஸ பி⁴க்கு²னோ திசீவரேன அவிப்பவாஸஸம்முதிங் தா³துங். ஏவஞ்ச பன, பி⁴க்க²வே, தா³தப்³பா³. தேன கி³லானேன பி⁴க்கு²னா ஸங்க⁴ங் உபஸங்கமித்வா ஏகங்ஸங் உத்தராஸங்க³ங் கரித்வா வுட்³டா⁴னங் பி⁴க்கூ²னங் பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘அஹங், ப⁴ந்தே, கி³லானோ. ந ஸக்கோமி திசீவரங் ஆதா³ய பக்கமிதுங். ஸோஹங், ப⁴ந்தே, ஸங்க⁴ங் திசீவரேன அவிப்பவாஸஸம்முதிங் யாசாமீ’தி. து³தியம்பி யாசிதப்³பா³. ததியம்பி யாசிதப்³பா³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
473. Tena kho pana samayena aññataro bhikkhu kosambiyaṃ gilāno hoti. Ñātakā tassa bhikkhuno santike dūtaṃ pāhesuṃ – ‘‘āgacchatu bhadanto, mayaṃ, upaṭṭhahissāmā’’ti. Bhikkhūpi evamāhaṃsu – ‘‘gacchāvuso , ñātakā taṃ upaṭṭhahissantī’’ti. So evamāha – ‘‘bhagavatāvuso, sikkhāpadaṃ paññattaṃ – ‘na ticīvarena vippavasitabba’nti. Ahañcamhi gilāno. Na sakkomi ticīvaraṃ ādāya pakkamituṃ. Nāhaṃ gamissāmī’’ti . Bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, gilānassa bhikkhuno ticīvarena avippavāsasammutiṃ dātuṃ. Evañca pana, bhikkhave, dātabbā. Tena gilānena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘ahaṃ, bhante, gilāno. Na sakkomi ticīvaraṃ ādāya pakkamituṃ. Sohaṃ, bhante, saṅghaṃ ticīvarena avippavāsasammutiṃ yācāmī’ti. Dutiyampi yācitabbā. Tatiyampi yācitabbā. Byattena bhikkhunā paṭibalena saṅgho ñāpetabbo –
474. ‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ பி⁴க்கு² கி³லானோ. ந ஸக்கோதி திசீவரங் ஆதா³ய பக்கமிதுங். ஸோ ஸங்க⁴ங் திசீவரேன அவிப்பவாஸஸம்முதிங் யாசதி. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமஸ்ஸ பி⁴க்கு²னோ திசீவரேன அவிப்பவாஸஸம்முதிங் த³தெ³ய்ய. ஏஸா ஞத்தி.
474. ‘‘Suṇātu me, bhante, saṅgho. Ayaṃ itthannāmo bhikkhu gilāno. Na sakkoti ticīvaraṃ ādāya pakkamituṃ. So saṅghaṃ ticīvarena avippavāsasammutiṃ yācati. Yadi saṅghassa pattakallaṃ, saṅgho itthannāmassa bhikkhuno ticīvarena avippavāsasammutiṃ dadeyya. Esā ñatti.
‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ பி⁴க்கு² கி³லானோ. ந ஸக்கோதி திசீவரங் ஆதா³ய பக்கமிதுங். ஸோ ஸங்க⁴ங் திசீவரேன அவிப்பவாஸஸம்முதிங் யாசதி. ஸங்கோ⁴ இத்த²ன்னாமஸ்ஸ பி⁴க்கு²னோ திசீவரேன அவிப்பவாஸஸம்முதிங் தே³தி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ திசீவரேன அவிப்பவாஸஸம்முதியா தா³னங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Ayaṃ itthannāmo bhikkhu gilāno. Na sakkoti ticīvaraṃ ādāya pakkamituṃ. So saṅghaṃ ticīvarena avippavāsasammutiṃ yācati. Saṅgho itthannāmassa bhikkhuno ticīvarena avippavāsasammutiṃ deti. Yassāyasmato khamati itthannāmassa bhikkhuno ticīvarena avippavāsasammutiyā dānaṃ, so tuṇhassa; yassa nakkhamati, so bhāseyya.
‘‘தி³ன்னா ஸங்கே⁴ன இத்த²ன்னாமஸ்ஸ பி⁴க்கு²னோ திசீவரேன அவிப்பவாஸஸம்முதி. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Dinnā saṅghena itthannāmassa bhikkhuno ticīvarena avippavāsasammuti. Khamati saṅghassa, tasmā tuṇhī, evametaṃ dhārayāmī’’ti.
ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
Evañca pana, bhikkhave, imaṃ sikkhāpadaṃ uddiseyyātha –
475. ‘‘நிட்டி²தசீவரஸ்மிங் பி⁴க்கு²னா உப்³ப⁴தஸ்மிங் கதி²னே ஏகரத்தம்பி சே பி⁴க்கு² திசீவரேன விப்பவஸெய்ய, அஞ்ஞத்ர பி⁴க்கு²ஸம்முதியா, நிஸ்ஸக்³கி³யங் பாசித்திய’’ந்தி.
475.‘‘Niṭṭhitacīvarasmiṃ bhikkhunā ubbhatasmiṃ kathine ekarattampi ce bhikkhu ticīvarena vippavaseyya, aññatra bhikkhusammutiyā, nissaggiyaṃ pācittiya’’nti.
476. ‘‘நிட்டி²தசீவரஸ்மிந்தி பி⁴க்கு²னோ சீவரங் கதங் வா ஹோதி நட்ட²ங் வா வினட்ட²ங் வா த³ட்³ட⁴ங் வா சீவராஸா வா உபச்சி²ன்னா.
476.‘‘Niṭṭhitacīvarasminti bhikkhuno cīvaraṃ kataṃ vā hoti naṭṭhaṃ vā vinaṭṭhaṃ vā daḍḍhaṃ vā cīvarāsā vā upacchinnā.
உப்³ப⁴தஸ்மிங் கதி²னேதி அட்ட²ன்னங் மாதிகானங் அஞ்ஞதராய மாதிகாய உப்³ப⁴தங் ஹோதி, ஸங்கே⁴ன வா அந்தரா உப்³ப⁴தங் ஹோதி.
Ubbhatasmiṃkathineti aṭṭhannaṃ mātikānaṃ aññatarāya mātikāya ubbhataṃ hoti, saṅghena vā antarā ubbhataṃ hoti.
ஏகரத்தம்பி சே பி⁴க்கு² திசீவரேன விப்பவஸெய்யாதி ஸங்கா⁴டியா வா உத்தராஸங்கே³ன வா அந்தரவாஸகேன வா.
Ekarattampi ce bhikkhu ticīvarena vippavaseyyāti saṅghāṭiyā vā uttarāsaṅgena vā antaravāsakena vā.
அஞ்ஞத்ர பி⁴க்கு²ஸம்முதியாதி ட²பெத்வா பி⁴க்கு²ஸம்முதிங்.
Aññatra bhikkhusammutiyāti ṭhapetvā bhikkhusammutiṃ.
நிஸ்ஸக்³கி³யங் ஹோதீதி ஸஹ அருணுக்³க³மனா 1 நிஸ்ஸக்³கி³யங் ஹோதி. நிஸ்ஸஜ்ஜிதப்³ப³ங் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ங்…பே॰… இத³ங் மே, ப⁴ந்தே , சீவரங் ரத்திவிப்பவுத்த²ங் 2 அஞ்ஞத்ர பி⁴க்கு²ஸம்முதியா நிஸ்ஸக்³கி³யங், இமாஹங் ஸங்க⁴ஸ்ஸ நிஸ்ஸஜ்ஜாமீதி…பே॰… த³தெ³ய்யாதி…பே॰… த³தெ³ய்யுந்தி…பே॰… ஆயஸ்மதோ த³ம்மீதி.
Nissaggiyaṃ hotīti saha aruṇuggamanā 3 nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante , cīvaraṃ rattivippavutthaṃ 4 aññatra bhikkhusammutiyā nissaggiyaṃ, imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
477. கா³மோ ஏகூபசாரோ நானூபசாரோ. நிவேஸனங் ஏகூபசாரங் நானூபசாரங். உதோ³ஸிதோ ஏகூபசாரோ நானூபசாரோ. அட்டோ ஏகூபசாரோ நானூபசாரோ. மாளோ ஏகூபசாரோ நானூபசாரோ. பாஸாதோ³ ஏகூபசாரோ நானூபசாரோ. ஹம்மியங் ஏகூபசாரங் நானூபசாரங். நாவா ஏகூபசாரா நானூபசாரா. ஸத்தோ² ஏகூபசாரோ நானூபசாரோ. கெ²த்தங் ஏகூபசாரங் நானூபசாரங். த⁴ஞ்ஞகரணங் ஏகூபசாரங் நானூபசாரங். ஆராமோ ஏகூபசாரோ நானூபசாரோ. விஹாரோ ஏகூபசாரோ நானூபசாரோ. ருக்க²மூலங் ஏகூபசாரங் நானூபசாரங். அஜ்ஜோ²காஸோ ஏகூபசாரோ நானூபசாரோ.
477. Gāmo ekūpacāro nānūpacāro. Nivesanaṃ ekūpacāraṃ nānūpacāraṃ. Udosito ekūpacāro nānūpacāro. Aṭṭo ekūpacāro nānūpacāro. Māḷo ekūpacāro nānūpacāro. Pāsādo ekūpacāro nānūpacāro. Hammiyaṃ ekūpacāraṃ nānūpacāraṃ. Nāvā ekūpacārā nānūpacārā. Sattho ekūpacāro nānūpacāro. Khettaṃ ekūpacāraṃ nānūpacāraṃ. Dhaññakaraṇaṃ ekūpacāraṃ nānūpacāraṃ. Ārāmo ekūpacāro nānūpacāro. Vihāro ekūpacāro nānūpacāro. Rukkhamūlaṃ ekūpacāraṃ nānūpacāraṃ. Ajjhokāso ekūpacāro nānūpacāro.
478. கா³மோ ஏகூபசாரோ நாம ஏககுலஸ்ஸ கா³மோ ஹோதி பரிக்கி²த்தோ ச . அந்தோகா³மே சீவரங் நிக்கி²பித்வா அந்தோகா³மே வத்த²ப்³ப³ங். அபரிக்கி²த்தோ ஹோதி, யஸ்மிங் க⁴ரே சீவரங் நிக்கி²த்தங் ஹோதி தஸ்மிங் க⁴ரே வத்த²ப்³ப³ங், ஹத்த²பாஸா வா ந விஜஹிதப்³ப³ங்.
478.Gāmo ekūpacāro nāma ekakulassa gāmo hoti parikkhitto ca . Antogāme cīvaraṃ nikkhipitvā antogāme vatthabbaṃ. Aparikkhitto hoti, yasmiṃ ghare cīvaraṃ nikkhittaṃ hoti tasmiṃ ghare vatthabbaṃ, hatthapāsā vā na vijahitabbaṃ.
479. நானாகுலஸ்ஸ கா³மோ ஹோதி பரிக்கி²த்தோ ச. யஸ்மிங் க⁴ரே சீவரங் நிக்கி²த்தங் ஹோதி தஸ்மிங் க⁴ரே வத்த²ப்³ப³ங் ஸபா⁴யே வா த்³வாரமூலே வா, ஹத்த²பாஸா வா ந விஜஹிதப்³ப³ங். ஸபா⁴யங் க³ச்ச²ந்தேன ஹத்த²பாஸே சீவரங் நிக்கி²பித்வா ஸபா⁴யே வா வத்த²ப்³ப³ங் த்³வாரமூலே வா, ஹத்த²பாஸா வா ந விஜஹிதப்³ப³ங். ஸபா⁴யே சீவரங் நிக்கி²பித்வா ஸபா⁴யே வா வத்த²ப்³ப³ங் த்³வாரமூலே வா, ஹத்த²பாஸா வா ந விஜஹிதப்³ப³ங். அபரிக்கி²த்தோ ஹோதி, யஸ்மிங் க⁴ரே சீவரங் நிக்கி²த்தங் ஹோதி தஸ்மிங் க⁴ரே வத்த²ப்³ப³ங், ஹத்த²பாஸா வா ந விஜஹிதப்³ப³ங்.
479. Nānākulassa gāmo hoti parikkhitto ca. Yasmiṃ ghare cīvaraṃ nikkhittaṃ hoti tasmiṃ ghare vatthabbaṃ sabhāye vā dvāramūle vā, hatthapāsā vā na vijahitabbaṃ. Sabhāyaṃ gacchantena hatthapāse cīvaraṃ nikkhipitvā sabhāye vā vatthabbaṃ dvāramūle vā, hatthapāsā vā na vijahitabbaṃ. Sabhāye cīvaraṃ nikkhipitvā sabhāye vā vatthabbaṃ dvāramūle vā, hatthapāsā vā na vijahitabbaṃ. Aparikkhitto hoti, yasmiṃ ghare cīvaraṃ nikkhittaṃ hoti tasmiṃ ghare vatthabbaṃ, hatthapāsā vā na vijahitabbaṃ.
480. ஏககுலஸ்ஸ நிவேஸனங் ஹோதி பரிக்கி²த்தஞ்ச, நானாக³ப்³பா⁴ நானாஓவரகா. அந்தோனிவேஸனே சீவரங் நிக்கி²பித்வா அந்தோனிவேஸனே வத்த²ப்³ப³ங். அபரிக்கி²த்தங் ஹோதி, யஸ்மிங் க³ப்³பே⁴ சீவரங் நிக்கி²த்தங் ஹோதி தஸ்மிங் க³ப்³பே⁴ வத்த²ப்³ப³ங், ஹத்த²பாஸா வா ந விஜஹிதப்³ப³ங்.
480. Ekakulassa nivesanaṃ hoti parikkhittañca, nānāgabbhā nānāovarakā. Antonivesane cīvaraṃ nikkhipitvā antonivesane vatthabbaṃ. Aparikkhittaṃ hoti, yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ, hatthapāsā vā na vijahitabbaṃ.
481. நானாகுலஸ்ஸ நிவேஸனங் ஹோதி பரிக்கி²த்தஞ்ச, நானாக³ப்³பா⁴ நானாஓவரகா. யஸ்மிங் க³ப்³பே⁴ சீவரங் நிக்கி²த்தங் ஹோதி தஸ்மிங் க³ப்³பே⁴ வத்த²ப்³ப³ங் த்³வாரமூலே வா, ஹத்த²பாஸா வா ந விஜஹிதப்³ப³ங் . அபரிக்கி²த்தங் ஹோதி, யஸ்மிங் க³ப்³பே⁴ சீவரங் நிக்கி²த்தங் ஹோதி தஸ்மிங் க³ப்³பே⁴ வத்த²ப்³ப³ங், ஹத்த²பாஸா வா ந விஜஹிதப்³ப³ங்.
481. Nānākulassa nivesanaṃ hoti parikkhittañca, nānāgabbhā nānāovarakā. Yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ . Aparikkhittaṃ hoti, yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ, hatthapāsā vā na vijahitabbaṃ.
482. ஏககுலஸ்ஸ உதோ³ஸிதோ ஹோதி பரிக்கி²த்தோ ச, நானாக³ப்³பா⁴ நானாஓவரகா . அந்தோஉதோ³ஸிதே சீவரங் நிக்கி²பித்வா அந்தோஉதோ³ஸிதே வத்த²ப்³ப³ங். அபரிக்கி²த்தோ ஹோதி, யஸ்மிங் க³ப்³பே⁴ சீவரங் நிக்கி²த்தங் ஹோதி தஸ்மிங் க³ப்³பே⁴ வத்த²ப்³ப³ங், ஹத்த²பாஸா வா ந விஜஹிதப்³ப³ங்.
482. Ekakulassa udosito hoti parikkhitto ca, nānāgabbhā nānāovarakā . Antoudosite cīvaraṃ nikkhipitvā antoudosite vatthabbaṃ. Aparikkhitto hoti, yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ, hatthapāsā vā na vijahitabbaṃ.
483. நானாகுலஸ்ஸ உதோ³ஸிதோ ஹோதி பரிக்கி²த்தோ ச, நானாக³ப்³பா⁴ நானாஓவரகா. யஸ்மிங் க³ப்³பே⁴ சீவரங் நிக்கி²த்தங் ஹோதி தஸ்மிங் க³ப்³பே⁴ வத்த²ப்³ப³ங் த்³வாரமூலே வா, ஹத்த²பாஸா வா ந விஜஹிதப்³ப³ங். அபரிக்கி²த்தோ ஹோதி, யஸ்மிங் க³ப்³பே⁴ சீவரங் நிக்கி²த்தங் ஹோதி தஸ்மிங் க³ப்³பே⁴ வத்த²ப்³ப³ங், ஹத்த²பாஸா வா ந விஜஹிதப்³ப³ங்.
483. Nānākulassa udosito hoti parikkhitto ca, nānāgabbhā nānāovarakā. Yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ. Aparikkhitto hoti, yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ, hatthapāsā vā na vijahitabbaṃ.
484. ஏககுலஸ்ஸ அட்டோ ஹோதி, அந்தோஅட்டே சீவரங் நிக்கி²பித்வா அந்தோஅட்டே வத்த²ப்³ப³ங். நானாகுலஸ்ஸ அட்டோ ஹோதி, நானாக³ப்³பா⁴ நானாஓவரகா. யஸ்மிங் க³ப்³பே⁴ சீவரங் நிக்கி²த்தங் ஹோதி தஸ்மிங் க³ப்³பே⁴ வத்த²ப்³ப³ங் த்³வாரமூலே வா, ஹத்த²பாஸா வா ந விஜஹிதப்³ப³ங்.
484. Ekakulassa aṭṭo hoti, antoaṭṭe cīvaraṃ nikkhipitvā antoaṭṭe vatthabbaṃ. Nānākulassa aṭṭo hoti, nānāgabbhā nānāovarakā. Yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ.
485. ஏககுலஸ்ஸ மாளோ ஹோதி, அந்தோமாளே சீவரங் நிக்கி²பித்வா அந்தோமாளே வத்த²ப்³ப³ங். நானாகுலஸ்ஸ மாளோ ஹோதி நானாக³ப்³பா⁴ நானாஓவரகா, யஸ்மிங் க³ப்³பே⁴ சீவரங் நிக்கி²த்தங் ஹோதி தஸ்மிங் க³ப்³பே⁴ வத்த²ப்³ப³ங் த்³வாரமூலே வா, ஹத்த²பாஸா வா ந விஜஹிதப்³ப³ங்.
485. Ekakulassa māḷo hoti, antomāḷe cīvaraṃ nikkhipitvā antomāḷe vatthabbaṃ. Nānākulassa māḷo hoti nānāgabbhā nānāovarakā, yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ.
486. ஏககுலஸ்ஸ பாஸாதோ³ ஹோதி, அந்தோபாஸாதே³ சீவரங் நிக்கி²பித்வா அந்தோபாஸாதே³ வத்த²ப்³ப³ங். நானாகுலஸ்ஸ பாஸாதோ³ ஹோதி, நானாக³ப்³பா⁴ நானாஓவரகா. யஸ்மிங் க³ப்³பே⁴ சீவரங் நிக்கி²த்தங் ஹோதி தஸ்மிங் க³ப்³பே⁴ வத்த²ப்³ப³ங் த்³வாரமூலே வா, ஹத்த²பாஸா வா ந விஜஹிதப்³ப³ங்.
486. Ekakulassa pāsādo hoti, antopāsāde cīvaraṃ nikkhipitvā antopāsāde vatthabbaṃ. Nānākulassa pāsādo hoti, nānāgabbhā nānāovarakā. Yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ.
487. ஏககுலஸ்ஸ ஹம்மியங் ஹோதி. அந்தோஹம்மியே சீவரங் நிக்கி²பித்வா அந்தோஹம்மியே வத்த²ப்³ப³ங். நானாகுலஸ்ஸ ஹம்மியங் ஹோதி, நானாக³ப்³பா⁴ நானாஓவரகா. யஸ்மிங் க³ப்³பே⁴ சீவரங் நிக்கி²த்தங் ஹோதி தஸ்மிங் க³ப்³பே⁴ வத்த²ப்³ப³ங் த்³வாரமூலே வா, ஹத்த²பாஸா வா ந விஜஹிதப்³ப³ங்.
487. Ekakulassa hammiyaṃ hoti. Antohammiye cīvaraṃ nikkhipitvā antohammiye vatthabbaṃ. Nānākulassa hammiyaṃ hoti, nānāgabbhā nānāovarakā. Yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ.
488. ஏககுலஸ்ஸ நாவா ஹோதி. அந்தோனாவாய சீவரங் நிக்கி²பித்வா அந்தோனாவாய வத்த²ப்³ப³ங் . நானாகுலஸ்ஸ நாவா ஹோதி நானாக³ப்³பா⁴ நானாஓவரகா. யஸ்மிங் ஓவரகே சீவரங் நிக்கி²த்தங் ஹோதி தஸ்மிங் ஓவரகே வத்த²ப்³ப³ங், ஹத்த²பாஸா வா ந விஜஹிதப்³ப³ங்.
488. Ekakulassa nāvā hoti. Antonāvāya cīvaraṃ nikkhipitvā antonāvāya vatthabbaṃ . Nānākulassa nāvā hoti nānāgabbhā nānāovarakā. Yasmiṃ ovarake cīvaraṃ nikkhittaṃ hoti tasmiṃ ovarake vatthabbaṃ, hatthapāsā vā na vijahitabbaṃ.
489. ஏககுலஸ்ஸ ஸத்தோ² ஹோதி. ஸத்தே² சீவரங் நிக்கி²பித்வா புரதோ வா பச்ச²தோ வா ஸத்தப்³ப⁴ந்தரா ந விஜஹிதப்³பா³, பஸ்ஸதோ அப்³ப⁴ந்தரங் ந விஜஹிதப்³ப³ங். நானாகுலஸ்ஸ ஸத்தோ² ஹோதி, ஸத்தே² சீவரங் நிக்கி²பித்வா ஹத்த²பாஸா ந விஜஹிதப்³ப³ங்.
489. Ekakulassa sattho hoti. Satthe cīvaraṃ nikkhipitvā purato vā pacchato vā sattabbhantarā na vijahitabbā, passato abbhantaraṃ na vijahitabbaṃ. Nānākulassa sattho hoti, satthe cīvaraṃ nikkhipitvā hatthapāsā na vijahitabbaṃ.
490. ஏககுலஸ்ஸ கெ²த்தங் ஹோதி பரிக்கி²த்தஞ்ச. அந்தோகெ²த்தே சீவரங் நிக்கி²பித்வா அந்தோகெ²த்தே வத்த²ப்³ப³ங். அபரிக்கி²த்தங் ஹோதி, ஹத்த²பாஸா ந விஜஹிதப்³ப³ங். நானாகுலஸ்ஸ கெ²த்தங் ஹோதி பரிக்கி²த்தஞ்ச. அந்தோகெ²த்தே சீவரங் நிக்கி²பித்வா த்³வாரமூலே வா வத்த²ப்³ப³ங், ஹத்த²பாஸா வா ந விஜஹிதப்³ப³ங். அபரிக்கி²த்தங் ஹோதி, ஹத்த²பாஸா ந விஜஹிதப்³ப³ங்.
490. Ekakulassa khettaṃ hoti parikkhittañca. Antokhette cīvaraṃ nikkhipitvā antokhette vatthabbaṃ. Aparikkhittaṃ hoti, hatthapāsā na vijahitabbaṃ. Nānākulassa khettaṃ hoti parikkhittañca. Antokhette cīvaraṃ nikkhipitvā dvāramūle vā vatthabbaṃ, hatthapāsā vā na vijahitabbaṃ. Aparikkhittaṃ hoti, hatthapāsā na vijahitabbaṃ.
491. ஏககுலஸ்ஸ த⁴ஞ்ஞகரணங் ஹோதி பரிக்கி²த்தஞ்ச. அந்தோத⁴ஞ்ஞகரணே சீவரங் நிக்கி²பித்வா அந்தோத⁴ஞ்ஞகரணே வத்த²ப்³ப³ங். அபரிக்கி²த்தங் ஹோதி, ஹத்த²பாஸா ந விஜஹிதப்³ப³ங். நானாகுலஸ்ஸ த⁴ஞ்ஞகரணங் ஹோதி பரிக்கி²த்தஞ்ச. அந்தோத⁴ஞ்ஞகரணே சீவரங் நிக்கி²பித்வா த்³வாரமூலே வா வத்த²ப்³ப³ங், ஹத்த²பாஸா வா ந விஜஹிதப்³ப³ங். அபரிக்கி²த்தங் ஹோதி, ஹத்த²பாஸா ந விஜஹிதப்³ப³ங்.
491. Ekakulassa dhaññakaraṇaṃ hoti parikkhittañca. Antodhaññakaraṇe cīvaraṃ nikkhipitvā antodhaññakaraṇe vatthabbaṃ. Aparikkhittaṃ hoti, hatthapāsā na vijahitabbaṃ. Nānākulassa dhaññakaraṇaṃ hoti parikkhittañca. Antodhaññakaraṇe cīvaraṃ nikkhipitvā dvāramūle vā vatthabbaṃ, hatthapāsā vā na vijahitabbaṃ. Aparikkhittaṃ hoti, hatthapāsā na vijahitabbaṃ.
492. ஏககுலஸ்ஸ ஆராமோ ஹோதி பரிக்கி²த்தோ ச. அந்தோஆராமே சீவரங் நிக்கி²பித்வா அந்தோஆராமே வத்த²ப்³ப³ங். அபரிக்கி²த்தோ ஹோதி, ஹத்த²பாஸா ந விஜஹிதப்³ப³ங். நானாகுலஸ்ஸ ஆராமோ ஹோதி பரிக்கி²த்தோ ச. அந்தோஆராமே சீவரங் நிக்கி²பித்வா த்³வாரமூலே வா வத்த²ப்³ப³ங், ஹத்த²பாஸா வா ந விஜஹிதப்³ப³ங். அபரிக்கி²த்தோ ஹோதி, ஹத்த²பாஸா ந விஜஹிதப்³ப³ங்.
492. Ekakulassa ārāmo hoti parikkhitto ca. Antoārāme cīvaraṃ nikkhipitvā antoārāme vatthabbaṃ. Aparikkhitto hoti, hatthapāsā na vijahitabbaṃ. Nānākulassa ārāmo hoti parikkhitto ca. Antoārāme cīvaraṃ nikkhipitvā dvāramūle vā vatthabbaṃ, hatthapāsā vā na vijahitabbaṃ. Aparikkhitto hoti, hatthapāsā na vijahitabbaṃ.
493. ஏககுலஸ்ஸ விஹாரோ ஹோதி பரிக்கி²த்தோ ச. அந்தோவிஹாரே சீவரங் நிக்கி²பித்வா அந்தோவிஹாரே வத்த²ப்³ப³ங். அபரிக்கி²த்தோ ஹோதி, யஸ்மிங் விஹாரே சீவரங் நிக்கி²த்தங் ஹோதி தஸ்மிங் விஹாரே வத்த²ப்³ப³ங், ஹத்த²பாஸா வா ந விஜஹிதப்³ப³ங். நானாகுலஸ்ஸ விஹாரோ ஹோதி பரிக்கி²த்தோ ச. யஸ்மிங் விஹாரே சீவரங் நிக்கி²த்தங் ஹோதி தஸ்மிங் விஹாரே வத்த²ப்³ப³ங் த்³வாரமூலே வா, ஹத்த²பாஸா வா ந விஜஹிதப்³ப³ங். அபரிக்கி²த்தோ ஹோதி , யஸ்மிங் விஹாரே சீவரங் நிக்கி²த்தங் ஹோதி தஸ்மிங் விஹாரே வத்த²ப்³ப³ங், ஹத்த²பாஸா வா ந விஜஹிதப்³ப³ங்.
493. Ekakulassa vihāro hoti parikkhitto ca. Antovihāre cīvaraṃ nikkhipitvā antovihāre vatthabbaṃ. Aparikkhitto hoti, yasmiṃ vihāre cīvaraṃ nikkhittaṃ hoti tasmiṃ vihāre vatthabbaṃ, hatthapāsā vā na vijahitabbaṃ. Nānākulassa vihāro hoti parikkhitto ca. Yasmiṃ vihāre cīvaraṃ nikkhittaṃ hoti tasmiṃ vihāre vatthabbaṃ dvāramūle vā, hatthapāsā vā na vijahitabbaṃ. Aparikkhitto hoti , yasmiṃ vihāre cīvaraṃ nikkhittaṃ hoti tasmiṃ vihāre vatthabbaṃ, hatthapāsā vā na vijahitabbaṃ.
494. ஏககுலஸ்ஸ ருக்க²மூலங் ஹோதி, யங் மஜ்ஜ²ன்ஹிகே காலே ஸமந்தா சா²யா ப²ரதி, அந்தோசா²யாய சீவரங் நிக்கி²பித்வா அந்தோசா²யாய வத்த²ப்³ப³ங். நானாகுலஸ்ஸ ருக்க²மூலங் ஹோதி, ஹத்த²பாஸா ந விஜஹிதப்³ப³ங்.
494. Ekakulassa rukkhamūlaṃ hoti, yaṃ majjhanhike kāle samantā chāyā pharati, antochāyāya cīvaraṃ nikkhipitvā antochāyāya vatthabbaṃ. Nānākulassa rukkhamūlaṃ hoti, hatthapāsā na vijahitabbaṃ.
அஜ்ஜோ²காஸோ ஏகூபசாரோ நாம அகா³மகே அரஞ்ஞே ஸமந்தா ஸத்தப்³ப⁴ந்தரா ஏகூபசாரோ, ததோ பரங் நானூபசாரோ.
Ajjhokāso ekūpacāro nāma agāmake araññe samantā sattabbhantarā ekūpacāro, tato paraṃ nānūpacāro.
495. விப்பவுத்தே² விப்பவுத்த²ஸஞ்ஞீ அஞ்ஞத்ர பி⁴க்கு²ஸம்முதியா, நிஸ்ஸக்³கி³யங் பாசித்தியங். விப்பவுத்தே² வேமதிகோ, அஞ்ஞத்ர பி⁴க்கு²ஸம்முதியா, நிஸ்ஸக்³கி³யங் பாசித்தியங். விப்பவுத்தே² அவிப்பவுத்த²ஸஞ்ஞீ, அஞ்ஞத்ர பி⁴க்கு²ஸம்முதியா, நிஸ்ஸக்³கி³யங் பாசித்தியங். அப்பச்சுத்³த⁴டே பச்சுத்³த⁴டஸஞ்ஞீ…பே॰… அவிஸ்ஸஜ்ஜிதே விஸ்ஸஜ்ஜிதஸஞ்ஞீ… அனட்டே² நட்ட²ஸஞ்ஞீ… அவினட்டே² வினட்ட²ஸஞ்ஞீ… அத³ட்³டே⁴ த³ட்³ட⁴ஸஞ்ஞீ…பே॰… அவிலுத்தே விலுத்தஸஞ்ஞீ, அஞ்ஞத்ர பி⁴க்கு²ஸம்முதியா, நிஸ்ஸக்³கி³யங் பாசித்தியங்.
495. Vippavutthe vippavutthasaññī aññatra bhikkhusammutiyā, nissaggiyaṃ pācittiyaṃ. Vippavutthe vematiko, aññatra bhikkhusammutiyā, nissaggiyaṃ pācittiyaṃ. Vippavutthe avippavutthasaññī, aññatra bhikkhusammutiyā, nissaggiyaṃ pācittiyaṃ. Appaccuddhaṭe paccuddhaṭasaññī…pe… avissajjite vissajjitasaññī… anaṭṭhe naṭṭhasaññī… avinaṭṭhe vinaṭṭhasaññī… adaḍḍhe daḍḍhasaññī…pe… avilutte viluttasaññī, aññatra bhikkhusammutiyā, nissaggiyaṃ pācittiyaṃ.
நிஸ்ஸக்³கி³யங் சீவரங் அனிஸ்ஸஜ்ஜித்வா பரிபு⁴ஞ்ஜதி, ஆபத்தி து³க்கடஸ்ஸ . அவிப்பவுத்தே² விப்பவுத்த²ஸஞ்ஞீ, ஆபத்தி து³க்கடஸ்ஸ. அவிப்பவுத்தே² வேமதிகோ, ஆபத்தி து³க்கடஸ்ஸ. அவிப்பவுத்தே² அவிப்பவுத்த²ஸஞ்ஞீ, அனாபத்தி.
Nissaggiyaṃ cīvaraṃ anissajjitvā paribhuñjati, āpatti dukkaṭassa . Avippavutthe vippavutthasaññī, āpatti dukkaṭassa. Avippavutthe vematiko, āpatti dukkaṭassa. Avippavutthe avippavutthasaññī, anāpatti.
496. அனாபத்தி அந்தோஅருணே பச்சுத்³த⁴ரதி, விஸ்ஸஜ்ஜேதி, நஸ்ஸதி, வினஸ்ஸதி, ட³ய்ஹதி, அச்சி²ந்தி³த்வா க³ண்ஹந்தி, விஸ்ஸாஸங் க³ண்ஹந்தி, பி⁴க்கு²ஸம்முதியா, உம்மத்தகஸ்ஸ, ஆதி³கம்மிகஸ்ஸாதி.
496. Anāpatti antoaruṇe paccuddharati, vissajjeti, nassati, vinassati, ḍayhati, acchinditvā gaṇhanti, vissāsaṃ gaṇhanti, bhikkhusammutiyā, ummattakassa, ādikammikassāti.
உதோ³ஸிதஸிக்கா²பத³ங் நிட்டி²தங் து³தியங்.
Udositasikkhāpadaṃ niṭṭhitaṃ dutiyaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. உதோ³ஸிதஸிக்கா²பத³வண்ணனா • 2. Udositasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. உதோ³ஸிதஸிக்கா²பத³வண்ணனா • 2. Udositasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. உதோ³ஸிதஸிக்கா²பத³வண்ணனா • 2. Udositasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. உதோ³ஸிதஸிக்கா²பத³வண்ணனா • 2. Udositasikkhāpadavaṇṇanā
