| Library / Tipiṭaka / තිපිටක • Tipiṭaka / මහාවිභඞ්‌ග • Mahāvibhaṅga |
2. උදොසිතසික්‌ඛාපදං
2. Udositasikkhāpadaṃ
471. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන භික්‌ඛූ භික්‌ඛූනං හත්‌ථෙ චීවරං නික්‌ඛිපිත්‌වා සන්‌තරුත්‌තරෙන ජනපදචාරිකං පක්‌කමන්‌ති. තානි චීවරානි චිරං නික්‌ඛිත්‌තානි කණ්‌ණකිතානි හොන්‌ති. තානි භික්‌ඛූ ඔතාපෙන්‌ති. අද්‌දසා ඛො ආයස්‌මා ආනන්‌දො සෙනාසනචාරිකං ආහිණ්‌ඩන්‌තො තෙ භික්‌ඛූ තානි චීවරානි ඔතාපෙන්‌තෙ. දිස්‌වාන යෙන තෙ භික්‌ඛූ තෙනුපසඞ්‌කමි; උපසඞ්‌කමිත්‌වා තෙ භික්‌ඛූ එතදවොච – ‘‘කස්‌සිමානි, ආවුසො, චීවරානි කණ්‌ණකිතානී’’ති? අථ ඛො තෙ භික්‌ඛූ ආයස්‌මතො ආනන්‌දස්‌ස එතමත්‌ථං ආරොචෙසුං. ආයස්‌මා ආනන්‌දො උජ්‌ඣායති ඛිය්‍යති විපාචෙති – ‘‘කථඤ්‌හි නාම භික්‌ඛූ භික්‌ඛූනං හත්‌ථෙ චීවරං නික්‌ඛිපිත්‌වා සන්‌තරුත්‌තරෙන ජනපදචාරිකං පක්‌කමිස්‌සන්‌තී’’ති! අථ ඛො ආයස්‌මා ආනන්‌දො තෙ භික්‌ඛූ අනෙකපරියායෙන විගරහිත්‌වා භගවතො එතමත්‌ථං ආරොචෙසි…පෙ.… ‘‘සච්‌චං කිර, භික්‌ඛවෙ, භික්‌ඛූ භික්‌ඛූනං හත්‌ථෙ චීවරං නික්‌ඛිපිත්‌වා සන්‌තරුත්‌තරෙන ජනපදචාරිකං පක්‌කමන්‌තී’’ති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම තෙ, භික්‌ඛවෙ, මොඝපුරිසා භික්‌ඛූනං හත්‌ථෙ චීවරං නික්‌ඛිපිත්‌වා සන්‌තරුත්‌තරෙන ජනපදචාරිකං පක්‌කමිස්‌සන්‌ති ! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, ඉමං සික්‌ඛාපදං උද්‌දිසෙය්‍යාථ –
471. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhū bhikkhūnaṃ hatthe cīvaraṃ nikkhipitvā santaruttarena janapadacārikaṃ pakkamanti. Tāni cīvarāni ciraṃ nikkhittāni kaṇṇakitāni honti. Tāni bhikkhū otāpenti. Addasā kho āyasmā ānando senāsanacārikaṃ āhiṇḍanto te bhikkhū tāni cīvarāni otāpente. Disvāna yena te bhikkhū tenupasaṅkami; upasaṅkamitvā te bhikkhū etadavoca – ‘‘kassimāni, āvuso, cīvarāni kaṇṇakitānī’’ti? Atha kho te bhikkhū āyasmato ānandassa etamatthaṃ ārocesuṃ. Āyasmā ānando ujjhāyati khiyyati vipāceti – ‘‘kathañhi nāma bhikkhū bhikkhūnaṃ hatthe cīvaraṃ nikkhipitvā santaruttarena janapadacārikaṃ pakkamissantī’’ti! Atha kho āyasmā ānando te bhikkhū anekapariyāyena vigarahitvā bhagavato etamatthaṃ ārocesi…pe… ‘‘saccaṃ kira, bhikkhave, bhikkhū bhikkhūnaṃ hatthe cīvaraṃ nikkhipitvā santaruttarena janapadacārikaṃ pakkamantī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā bhikkhūnaṃ hatthe cīvaraṃ nikkhipitvā santaruttarena janapadacārikaṃ pakkamissanti ! Netaṃ, bhikkhave, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
472. ‘‘නිට්‌ඨිතචීවරස්‌මිං භික්‌ඛුනා උබ්‌භතස්‌මිං කථිනෙ එකරත්‌තම්‌පි චෙ භික්‌ඛු තිචීවරෙන විප්‌පවසෙය්‍ය, නිස්‌සග්‌ගියං පාචිත්‌තිය’’න්‌ති.
472.‘‘Niṭṭhitacīvarasmiṃ bhikkhunā ubbhatasmiṃ kathine ekarattampi ce bhikkhu ticīvarena vippavaseyya, nissaggiyaṃ pācittiya’’nti.
එවඤ්‌චිදං භගවතා භික්‌ඛූනං සික්‌ඛාපදං පඤ්‌ඤත්‌තං හොති.
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
473. තෙන ඛො පන සමයෙන අඤ්‌ඤතරො භික්‌ඛු කොසම්‌බියං ගිලානො හොති. ඤාතකා තස්‌ස භික්‌ඛුනො සන්‌තිකෙ දූතං පාහෙසුං – ‘‘ආගච්‌ඡතු භදන්‌තො, මයං, උපට්‌ඨහිස්‌සාමා’’ති. භික්‌ඛූපි එවමාහංසු – ‘‘ගච්‌ඡාවුසො , ඤාතකා තං උපට්‌ඨහිස්‌සන්‌තී’’ති. සො එවමාහ – ‘‘භගවතාවුසො, සික්‌ඛාපදං පඤ්‌ඤත්‌තං – ‘න තිචීවරෙන විප්‌පවසිතබ්‌බ’න්‌ති. අහඤ්‌චම්‌හි ගිලානො. න සක්‌කොමි තිචීවරං ආදාය පක්‌කමිතුං. නාහං ගමිස්‌සාමී’’ති . භගවතො එතමත්‌ථං ආරොචෙසුං. අථ ඛො භගවා එතස්‌මිං නිදානෙ එතස්‌මිං පකරණෙ ධම්‌මිං කථං කත්‌වා භික්‌ඛූ ආමන්‌තෙසි – ‘‘අනුජානාමි, භික්‌ඛවෙ, ගිලානස්‌ස භික්‌ඛුනො තිචීවරෙන අවිප්‌පවාසසම්‌මුතිං දාතුං. එවඤ්‌ච පන, භික්‌ඛවෙ, දාතබ්‌බා. තෙන ගිලානෙන භික්‌ඛුනා සඞ්‌ඝං උපසඞ්‌කමිත්‌වා එකංසං උත්‌තරාසඞ්‌ගං කරිත්‌වා වුඩ්‌ඪානං භික්‌ඛූනං පාදෙ වන්‌දිත්‌වා උක්‌කුටිකං නිසීදිත්‌වා අඤ්‌ජලිං පග්‌ගහෙත්‌වා එවමස්‌ස වචනීයො – ‘අහං, භන්‌තෙ, ගිලානො. න සක්‌කොමි තිචීවරං ආදාය පක්‌කමිතුං. සොහං, භන්‌තෙ, සඞ්‌ඝං තිචීවරෙන අවිප්‌පවාසසම්‌මුතිං යාචාමී’ති. දුතියම්‌පි යාචිතබ්‌බා. තතියම්‌පි යාචිතබ්‌බා. බ්‍යත්‌තෙන භික්‌ඛුනා පටිබලෙන සඞ්‌ඝො ඤාපෙතබ්‌බො –
473. Tena kho pana samayena aññataro bhikkhu kosambiyaṃ gilāno hoti. Ñātakā tassa bhikkhuno santike dūtaṃ pāhesuṃ – ‘‘āgacchatu bhadanto, mayaṃ, upaṭṭhahissāmā’’ti. Bhikkhūpi evamāhaṃsu – ‘‘gacchāvuso , ñātakā taṃ upaṭṭhahissantī’’ti. So evamāha – ‘‘bhagavatāvuso, sikkhāpadaṃ paññattaṃ – ‘na ticīvarena vippavasitabba’nti. Ahañcamhi gilāno. Na sakkomi ticīvaraṃ ādāya pakkamituṃ. Nāhaṃ gamissāmī’’ti . Bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, gilānassa bhikkhuno ticīvarena avippavāsasammutiṃ dātuṃ. Evañca pana, bhikkhave, dātabbā. Tena gilānena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘ahaṃ, bhante, gilāno. Na sakkomi ticīvaraṃ ādāya pakkamituṃ. Sohaṃ, bhante, saṅghaṃ ticīvarena avippavāsasammutiṃ yācāmī’ti. Dutiyampi yācitabbā. Tatiyampi yācitabbā. Byattena bhikkhunā paṭibalena saṅgho ñāpetabbo –
474. ‘‘සුණාතු මෙ, භන්‌තෙ, සඞ්‌ඝො. අයං ඉත්‌ථන්‌නාමො භික්‌ඛු ගිලානො. න සක්‌කොති තිචීවරං ආදාය පක්‌කමිතුං. සො සඞ්‌ඝං තිචීවරෙන අවිප්‌පවාසසම්‌මුතිං යාචති. යදි සඞ්‌ඝස්‌ස පත්‌තකල්‌ලං, සඞ්‌ඝො ඉත්‌ථන්‌නාමස්‌ස භික්‌ඛුනො තිචීවරෙන අවිප්‌පවාසසම්‌මුතිං දදෙය්‍ය. එසා ඤත්‌ති.
474. ‘‘Suṇātu me, bhante, saṅgho. Ayaṃ itthannāmo bhikkhu gilāno. Na sakkoti ticīvaraṃ ādāya pakkamituṃ. So saṅghaṃ ticīvarena avippavāsasammutiṃ yācati. Yadi saṅghassa pattakallaṃ, saṅgho itthannāmassa bhikkhuno ticīvarena avippavāsasammutiṃ dadeyya. Esā ñatti.
‘‘සුණාතු මෙ, භන්‌තෙ, සඞ්‌ඝො. අයං ඉත්‌ථන්‌නාමො භික්‌ඛු ගිලානො. න සක්‌කොති තිචීවරං ආදාය පක්‌කමිතුං. සො සඞ්‌ඝං තිචීවරෙන අවිප්‌පවාසසම්‌මුතිං යාචති. සඞ්‌ඝො ඉත්‌ථන්‌නාමස්‌ස භික්‌ඛුනො තිචීවරෙන අවිප්‌පවාසසම්‌මුතිං දෙති. යස්‌සායස්‌මතො ඛමති ඉත්‌ථන්‌නාමස්‌ස භික්‌ඛුනො තිචීවරෙන අවිප්‌පවාසසම්‌මුතියා දානං, සො තුණ්‌හස්‌ස; යස්‌ස නක්‌ඛමති, සො භාසෙය්‍ය.
‘‘Suṇātu me, bhante, saṅgho. Ayaṃ itthannāmo bhikkhu gilāno. Na sakkoti ticīvaraṃ ādāya pakkamituṃ. So saṅghaṃ ticīvarena avippavāsasammutiṃ yācati. Saṅgho itthannāmassa bhikkhuno ticīvarena avippavāsasammutiṃ deti. Yassāyasmato khamati itthannāmassa bhikkhuno ticīvarena avippavāsasammutiyā dānaṃ, so tuṇhassa; yassa nakkhamati, so bhāseyya.
‘‘දින්‌නා සඞ්‌ඝෙන ඉත්‌ථන්‌නාමස්‌ස භික්‌ඛුනො තිචීවරෙන අවිප්‌පවාසසම්‌මුති. ඛමති සඞ්‌ඝස්‌ස, තස්‌මා තුණ්‌හී, එවමෙතං ධාරයාමී’’ති.
‘‘Dinnā saṅghena itthannāmassa bhikkhuno ticīvarena avippavāsasammuti. Khamati saṅghassa, tasmā tuṇhī, evametaṃ dhārayāmī’’ti.
එවඤ්‌ච පන, භික්‌ඛවෙ, ඉමං සික්‌ඛාපදං උද්‌දිසෙය්‍යාථ –
Evañca pana, bhikkhave, imaṃ sikkhāpadaṃ uddiseyyātha –
475. ‘‘නිට්‌ඨිතචීවරස්‌මිං භික්‌ඛුනා උබ්‌භතස්‌මිං කථිනෙ එකරත්‌තම්‌පි චෙ භික්‌ඛු තිචීවරෙන විප්‌පවසෙය්‍ය, අඤ්‌ඤත්‍ර භික්‌ඛුසම්‌මුතියා, නිස්‌සග්‌ගියං පාචිත්‌තිය’’න්‌ති.
475.‘‘Niṭṭhitacīvarasmiṃ bhikkhunā ubbhatasmiṃ kathine ekarattampi ce bhikkhu ticīvarena vippavaseyya, aññatra bhikkhusammutiyā, nissaggiyaṃ pācittiya’’nti.
476. ‘‘නිට්‌ඨිතචීවරස්‌මින්‌ති භික්‌ඛුනො චීවරං කතං වා හොති නට්‌ඨං වා විනට්‌ඨං වා දඩ්‌ඪං වා චීවරාසා වා උපච්‌ඡින්‌නා.
476.‘‘Niṭṭhitacīvarasminti bhikkhuno cīvaraṃ kataṃ vā hoti naṭṭhaṃ vā vinaṭṭhaṃ vā daḍḍhaṃ vā cīvarāsā vā upacchinnā.
උබ්‌භතස්‌මිං කථිනෙති අට්‌ඨන්‌නං මාතිකානං අඤ්‌ඤතරාය මාතිකාය උබ්‌භතං හොති, සඞ්‌ඝෙන වා අන්‌තරා උබ්‌භතං හොති.
Ubbhatasmiṃkathineti aṭṭhannaṃ mātikānaṃ aññatarāya mātikāya ubbhataṃ hoti, saṅghena vā antarā ubbhataṃ hoti.
එකරත්‌තම්‌පි චෙ භික්‌ඛු තිචීවරෙන විප්‌පවසෙය්‍යාති සඞ්‌ඝාටියා වා උත්‌තරාසඞ්‌ගෙන වා අන්‌තරවාසකෙන වා.
Ekarattampi ce bhikkhu ticīvarena vippavaseyyāti saṅghāṭiyā vā uttarāsaṅgena vā antaravāsakena vā.
අඤ්‌ඤත්‍ර භික්‌ඛුසම්‌මුතියාති ඨපෙත්‌වා භික්‌ඛුසම්‌මුතිං.
Aññatra bhikkhusammutiyāti ṭhapetvā bhikkhusammutiṃ.
නිස්‌සග්‌ගියං හොතීති සහ අරුණුග්‌ගමනා 1 නිස්‌සග්‌ගියං හොති. නිස්‌සජ්‌ජිතබ්‌බං සඞ්‌ඝස්‌ස වා ගණස්‌ස වා පුග්‌ගලස්‌ස වා. එවඤ්‌ච පන, භික්‌ඛවෙ, නිස්‌සජ්‌ජිතබ්‌බං…පෙ.… ඉදං මෙ, භන්‌තෙ , චීවරං රත්‌තිවිප්‌පවුත්‌ථං 2 අඤ්‌ඤත්‍ර භික්‌ඛුසම්‌මුතියා නිස්‌සග්‌ගියං, ඉමාහං සඞ්‌ඝස්‌ස නිස්‌සජ්‌ජාමීති…පෙ.… දදෙය්‍යාති…පෙ.… දදෙය්‍යුන්‌ති…පෙ.… ආයස්‌මතො දම්‌මීති.
Nissaggiyaṃ hotīti saha aruṇuggamanā 3 nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante , cīvaraṃ rattivippavutthaṃ 4 aññatra bhikkhusammutiyā nissaggiyaṃ, imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
477. ගාමො එකූපචාරො නානූපචාරො. නිවෙසනං එකූපචාරං නානූපචාරං. උදොසිතො එකූපචාරො නානූපචාරො. අට්‌ටො එකූපචාරො නානූපචාරො. මාළො එකූපචාරො නානූපචාරො. පාසාදො එකූපචාරො නානූපචාරො. හම්‌මියං එකූපචාරං නානූපචාරං. නාවා එකූපචාරා නානූපචාරා. සත්‌ථො එකූපචාරො නානූපචාරො. ඛෙත්‌තං එකූපචාරං නානූපචාරං. ධඤ්‌ඤකරණං එකූපචාරං නානූපචාරං. ආරාමො එකූපචාරො නානූපචාරො. විහාරො එකූපචාරො නානූපචාරො. රුක්‌ඛමූලං එකූපචාරං නානූපචාරං. අජ්‌ඣොකාසො එකූපචාරො නානූපචාරො.
477. Gāmo ekūpacāro nānūpacāro. Nivesanaṃ ekūpacāraṃ nānūpacāraṃ. Udosito ekūpacāro nānūpacāro. Aṭṭo ekūpacāro nānūpacāro. Māḷo ekūpacāro nānūpacāro. Pāsādo ekūpacāro nānūpacāro. Hammiyaṃ ekūpacāraṃ nānūpacāraṃ. Nāvā ekūpacārā nānūpacārā. Sattho ekūpacāro nānūpacāro. Khettaṃ ekūpacāraṃ nānūpacāraṃ. Dhaññakaraṇaṃ ekūpacāraṃ nānūpacāraṃ. Ārāmo ekūpacāro nānūpacāro. Vihāro ekūpacāro nānūpacāro. Rukkhamūlaṃ ekūpacāraṃ nānūpacāraṃ. Ajjhokāso ekūpacāro nānūpacāro.
478. ගාමො එකූපචාරො නාම එකකුලස්‌ස ගාමො හොති පරික්‌ඛිත්‌තො ච . අන්‌තොගාමෙ චීවරං නික්‌ඛිපිත්‌වා අන්‌තොගාමෙ වත්‌ථබ්‌බං. අපරික්‌ඛිත්‌තො හොති, යස්‌මිං ඝරෙ චීවරං නික්‌ඛිත්‌තං හොති තස්‌මිං ඝරෙ වත්‌ථබ්‌බං, හත්‌ථපාසා වා න විජහිතබ්‌බං.
478.Gāmo ekūpacāro nāma ekakulassa gāmo hoti parikkhitto ca . Antogāme cīvaraṃ nikkhipitvā antogāme vatthabbaṃ. Aparikkhitto hoti, yasmiṃ ghare cīvaraṃ nikkhittaṃ hoti tasmiṃ ghare vatthabbaṃ, hatthapāsā vā na vijahitabbaṃ.
479. නානාකුලස්‌ස ගාමො හොති පරික්‌ඛිත්‌තො ච. යස්‌මිං ඝරෙ චීවරං නික්‌ඛිත්‌තං හොති තස්‌මිං ඝරෙ වත්‌ථබ්‌බං සභායෙ වා ද්‌වාරමූලෙ වා, හත්‌ථපාසා වා න විජහිතබ්‌බං. සභායං ගච්‌ඡන්‌තෙන හත්‌ථපාසෙ චීවරං නික්‌ඛිපිත්‌වා සභායෙ වා වත්‌ථබ්‌බං ද්‌වාරමූලෙ වා, හත්‌ථපාසා වා න විජහිතබ්‌බං. සභායෙ චීවරං නික්‌ඛිපිත්‌වා සභායෙ වා වත්‌ථබ්‌බං ද්‌වාරමූලෙ වා, හත්‌ථපාසා වා න විජහිතබ්‌බං. අපරික්‌ඛිත්‌තො හොති, යස්‌මිං ඝරෙ චීවරං නික්‌ඛිත්‌තං හොති තස්‌මිං ඝරෙ වත්‌ථබ්‌බං, හත්‌ථපාසා වා න විජහිතබ්‌බං.
479. Nānākulassa gāmo hoti parikkhitto ca. Yasmiṃ ghare cīvaraṃ nikkhittaṃ hoti tasmiṃ ghare vatthabbaṃ sabhāye vā dvāramūle vā, hatthapāsā vā na vijahitabbaṃ. Sabhāyaṃ gacchantena hatthapāse cīvaraṃ nikkhipitvā sabhāye vā vatthabbaṃ dvāramūle vā, hatthapāsā vā na vijahitabbaṃ. Sabhāye cīvaraṃ nikkhipitvā sabhāye vā vatthabbaṃ dvāramūle vā, hatthapāsā vā na vijahitabbaṃ. Aparikkhitto hoti, yasmiṃ ghare cīvaraṃ nikkhittaṃ hoti tasmiṃ ghare vatthabbaṃ, hatthapāsā vā na vijahitabbaṃ.
480. එකකුලස්‌ස නිවෙසනං හොති පරික්‌ඛිත්‌තඤ්‌ච, නානාගබ්‌භා නානාඔවරකා. අන්‌තොනිවෙසනෙ චීවරං නික්‌ඛිපිත්‌වා අන්‌තොනිවෙසනෙ වත්‌ථබ්‌බං. අපරික්‌ඛිත්‌තං හොති, යස්‌මිං ගබ්‌භෙ චීවරං නික්‌ඛිත්‌තං හොති තස්‌මිං ගබ්‌භෙ වත්‌ථබ්‌බං, හත්‌ථපාසා වා න විජහිතබ්‌බං.
480. Ekakulassa nivesanaṃ hoti parikkhittañca, nānāgabbhā nānāovarakā. Antonivesane cīvaraṃ nikkhipitvā antonivesane vatthabbaṃ. Aparikkhittaṃ hoti, yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ, hatthapāsā vā na vijahitabbaṃ.
481. නානාකුලස්‌ස නිවෙසනං හොති පරික්‌ඛිත්‌තඤ්‌ච, නානාගබ්‌භා නානාඔවරකා. යස්‌මිං ගබ්‌භෙ චීවරං නික්‌ඛිත්‌තං හොති තස්‌මිං ගබ්‌භෙ වත්‌ථබ්‌බං ද්‌වාරමූලෙ වා, හත්‌ථපාසා වා න විජහිතබ්‌බං . අපරික්‌ඛිත්‌තං හොති, යස්‌මිං ගබ්‌භෙ චීවරං නික්‌ඛිත්‌තං හොති තස්‌මිං ගබ්‌භෙ වත්‌ථබ්‌බං, හත්‌ථපාසා වා න විජහිතබ්‌බං.
481. Nānākulassa nivesanaṃ hoti parikkhittañca, nānāgabbhā nānāovarakā. Yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ . Aparikkhittaṃ hoti, yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ, hatthapāsā vā na vijahitabbaṃ.
482. එකකුලස්‌ස උදොසිතො හොති පරික්‌ඛිත්‌තො ච, නානාගබ්‌භා නානාඔවරකා . අන්‌තොඋදොසිතෙ චීවරං නික්‌ඛිපිත්‌වා අන්‌තොඋදොසිතෙ වත්‌ථබ්‌බං. අපරික්‌ඛිත්‌තො හොති, යස්‌මිං ගබ්‌භෙ චීවරං නික්‌ඛිත්‌තං හොති තස්‌මිං ගබ්‌භෙ වත්‌ථබ්‌බං, හත්‌ථපාසා වා න විජහිතබ්‌බං.
482. Ekakulassa udosito hoti parikkhitto ca, nānāgabbhā nānāovarakā . Antoudosite cīvaraṃ nikkhipitvā antoudosite vatthabbaṃ. Aparikkhitto hoti, yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ, hatthapāsā vā na vijahitabbaṃ.
483. නානාකුලස්‌ස උදොසිතො හොති පරික්‌ඛිත්‌තො ච, නානාගබ්‌භා නානාඔවරකා. යස්‌මිං ගබ්‌භෙ චීවරං නික්‌ඛිත්‌තං හොති තස්‌මිං ගබ්‌භෙ වත්‌ථබ්‌බං ද්‌වාරමූලෙ වා, හත්‌ථපාසා වා න විජහිතබ්‌බං. අපරික්‌ඛිත්‌තො හොති, යස්‌මිං ගබ්‌භෙ චීවරං නික්‌ඛිත්‌තං හොති තස්‌මිං ගබ්‌භෙ වත්‌ථබ්‌බං, හත්‌ථපාසා වා න විජහිතබ්‌බං.
483. Nānākulassa udosito hoti parikkhitto ca, nānāgabbhā nānāovarakā. Yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ. Aparikkhitto hoti, yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ, hatthapāsā vā na vijahitabbaṃ.
484. එකකුලස්‌ස අට්‌ටො හොති, අන්‌තොඅට්‌ටෙ චීවරං නික්‌ඛිපිත්‌වා අන්‌තොඅට්‌ටෙ වත්‌ථබ්‌බං. නානාකුලස්‌ස අට්‌ටො හොති, නානාගබ්‌භා නානාඔවරකා. යස්‌මිං ගබ්‌භෙ චීවරං නික්‌ඛිත්‌තං හොති තස්‌මිං ගබ්‌භෙ වත්‌ථබ්‌බං ද්‌වාරමූලෙ වා, හත්‌ථපාසා වා න විජහිතබ්‌බං.
484. Ekakulassa aṭṭo hoti, antoaṭṭe cīvaraṃ nikkhipitvā antoaṭṭe vatthabbaṃ. Nānākulassa aṭṭo hoti, nānāgabbhā nānāovarakā. Yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ.
485. එකකුලස්‌ස මාළො හොති, අන්‌තොමාළෙ චීවරං නික්‌ඛිපිත්‌වා අන්‌තොමාළෙ වත්‌ථබ්‌බං. නානාකුලස්‌ස මාළො හොති නානාගබ්‌භා නානාඔවරකා, යස්‌මිං ගබ්‌භෙ චීවරං නික්‌ඛිත්‌තං හොති තස්‌මිං ගබ්‌භෙ වත්‌ථබ්‌බං ද්‌වාරමූලෙ වා, හත්‌ථපාසා වා න විජහිතබ්‌බං.
485. Ekakulassa māḷo hoti, antomāḷe cīvaraṃ nikkhipitvā antomāḷe vatthabbaṃ. Nānākulassa māḷo hoti nānāgabbhā nānāovarakā, yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ.
486. එකකුලස්‌ස පාසාදො හොති, අන්‌තොපාසාදෙ චීවරං නික්‌ඛිපිත්‌වා අන්‌තොපාසාදෙ වත්‌ථබ්‌බං. නානාකුලස්‌ස පාසාදො හොති, නානාගබ්‌භා නානාඔවරකා. යස්‌මිං ගබ්‌භෙ චීවරං නික්‌ඛිත්‌තං හොති තස්‌මිං ගබ්‌භෙ වත්‌ථබ්‌බං ද්‌වාරමූලෙ වා, හත්‌ථපාසා වා න විජහිතබ්‌බං.
486. Ekakulassa pāsādo hoti, antopāsāde cīvaraṃ nikkhipitvā antopāsāde vatthabbaṃ. Nānākulassa pāsādo hoti, nānāgabbhā nānāovarakā. Yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ.
487. එකකුලස්‌ස හම්‌මියං හොති. අන්‌තොහම්‌මියෙ චීවරං නික්‌ඛිපිත්‌වා අන්‌තොහම්‌මියෙ වත්‌ථබ්‌බං. නානාකුලස්‌ස හම්‌මියං හොති, නානාගබ්‌භා නානාඔවරකා. යස්‌මිං ගබ්‌භෙ චීවරං නික්‌ඛිත්‌තං හොති තස්‌මිං ගබ්‌භෙ වත්‌ථබ්‌බං ද්‌වාරමූලෙ වා, හත්‌ථපාසා වා න විජහිතබ්‌බං.
487. Ekakulassa hammiyaṃ hoti. Antohammiye cīvaraṃ nikkhipitvā antohammiye vatthabbaṃ. Nānākulassa hammiyaṃ hoti, nānāgabbhā nānāovarakā. Yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ.
488. එකකුලස්‌ස නාවා හොති. අන්‌තොනාවාය චීවරං නික්‌ඛිපිත්‌වා අන්‌තොනාවාය වත්‌ථබ්‌බං . නානාකුලස්‌ස නාවා හොති නානාගබ්‌භා නානාඔවරකා. යස්‌මිං ඔවරකෙ චීවරං නික්‌ඛිත්‌තං හොති තස්‌මිං ඔවරකෙ වත්‌ථබ්‌බං, හත්‌ථපාසා වා න විජහිතබ්‌බං.
488. Ekakulassa nāvā hoti. Antonāvāya cīvaraṃ nikkhipitvā antonāvāya vatthabbaṃ . Nānākulassa nāvā hoti nānāgabbhā nānāovarakā. Yasmiṃ ovarake cīvaraṃ nikkhittaṃ hoti tasmiṃ ovarake vatthabbaṃ, hatthapāsā vā na vijahitabbaṃ.
489. එකකුලස්‌ස සත්‌ථො හොති. සත්‌ථෙ චීවරං නික්‌ඛිපිත්‌වා පුරතො වා පච්‌ඡතො වා සත්‌තබ්‌භන්‌තරා න විජහිතබ්‌බා, පස්‌සතො අබ්‌භන්‌තරං න විජහිතබ්‌බං. නානාකුලස්‌ස සත්‌ථො හොති, සත්‌ථෙ චීවරං නික්‌ඛිපිත්‌වා හත්‌ථපාසා න විජහිතබ්‌බං.
489. Ekakulassa sattho hoti. Satthe cīvaraṃ nikkhipitvā purato vā pacchato vā sattabbhantarā na vijahitabbā, passato abbhantaraṃ na vijahitabbaṃ. Nānākulassa sattho hoti, satthe cīvaraṃ nikkhipitvā hatthapāsā na vijahitabbaṃ.
490. එකකුලස්‌ස ඛෙත්‌තං හොති පරික්‌ඛිත්‌තඤ්‌ච. අන්‌තොඛෙත්‌තෙ චීවරං නික්‌ඛිපිත්‌වා අන්‌තොඛෙත්‌තෙ වත්‌ථබ්‌බං. අපරික්‌ඛිත්‌තං හොති, හත්‌ථපාසා න විජහිතබ්‌බං. නානාකුලස්‌ස ඛෙත්‌තං හොති පරික්‌ඛිත්‌තඤ්‌ච. අන්‌තොඛෙත්‌තෙ චීවරං නික්‌ඛිපිත්‌වා ද්‌වාරමූලෙ වා වත්‌ථබ්‌බං, හත්‌ථපාසා වා න විජහිතබ්‌බං. අපරික්‌ඛිත්‌තං හොති, හත්‌ථපාසා න විජහිතබ්‌බං.
490. Ekakulassa khettaṃ hoti parikkhittañca. Antokhette cīvaraṃ nikkhipitvā antokhette vatthabbaṃ. Aparikkhittaṃ hoti, hatthapāsā na vijahitabbaṃ. Nānākulassa khettaṃ hoti parikkhittañca. Antokhette cīvaraṃ nikkhipitvā dvāramūle vā vatthabbaṃ, hatthapāsā vā na vijahitabbaṃ. Aparikkhittaṃ hoti, hatthapāsā na vijahitabbaṃ.
491. එකකුලස්‌ස ධඤ්‌ඤකරණං හොති පරික්‌ඛිත්‌තඤ්‌ච. අන්‌තොධඤ්‌ඤකරණෙ චීවරං නික්‌ඛිපිත්‌වා අන්‌තොධඤ්‌ඤකරණෙ වත්‌ථබ්‌බං. අපරික්‌ඛිත්‌තං හොති, හත්‌ථපාසා න විජහිතබ්‌බං. නානාකුලස්‌ස ධඤ්‌ඤකරණං හොති පරික්‌ඛිත්‌තඤ්‌ච. අන්‌තොධඤ්‌ඤකරණෙ චීවරං නික්‌ඛිපිත්‌වා ද්‌වාරමූලෙ වා වත්‌ථබ්‌බං, හත්‌ථපාසා වා න විජහිතබ්‌බං. අපරික්‌ඛිත්‌තං හොති, හත්‌ථපාසා න විජහිතබ්‌බං.
491. Ekakulassa dhaññakaraṇaṃ hoti parikkhittañca. Antodhaññakaraṇe cīvaraṃ nikkhipitvā antodhaññakaraṇe vatthabbaṃ. Aparikkhittaṃ hoti, hatthapāsā na vijahitabbaṃ. Nānākulassa dhaññakaraṇaṃ hoti parikkhittañca. Antodhaññakaraṇe cīvaraṃ nikkhipitvā dvāramūle vā vatthabbaṃ, hatthapāsā vā na vijahitabbaṃ. Aparikkhittaṃ hoti, hatthapāsā na vijahitabbaṃ.
492. එකකුලස්‌ස ආරාමො හොති පරික්‌ඛිත්‌තො ච. අන්‌තොආරාමෙ චීවරං නික්‌ඛිපිත්‌වා අන්‌තොආරාමෙ වත්‌ථබ්‌බං. අපරික්‌ඛිත්‌තො හොති, හත්‌ථපාසා න විජහිතබ්‌බං. නානාකුලස්‌ස ආරාමො හොති පරික්‌ඛිත්‌තො ච. අන්‌තොආරාමෙ චීවරං නික්‌ඛිපිත්‌වා ද්‌වාරමූලෙ වා වත්‌ථබ්‌බං, හත්‌ථපාසා වා න විජහිතබ්‌බං. අපරික්‌ඛිත්‌තො හොති, හත්‌ථපාසා න විජහිතබ්‌බං.
492. Ekakulassa ārāmo hoti parikkhitto ca. Antoārāme cīvaraṃ nikkhipitvā antoārāme vatthabbaṃ. Aparikkhitto hoti, hatthapāsā na vijahitabbaṃ. Nānākulassa ārāmo hoti parikkhitto ca. Antoārāme cīvaraṃ nikkhipitvā dvāramūle vā vatthabbaṃ, hatthapāsā vā na vijahitabbaṃ. Aparikkhitto hoti, hatthapāsā na vijahitabbaṃ.
493. එකකුලස්‌ස විහාරො හොති පරික්‌ඛිත්‌තො ච. අන්‌තොවිහාරෙ චීවරං නික්‌ඛිපිත්‌වා අන්‌තොවිහාරෙ වත්‌ථබ්‌බං. අපරික්‌ඛිත්‌තො හොති, යස්‌මිං විහාරෙ චීවරං නික්‌ඛිත්‌තං හොති තස්‌මිං විහාරෙ වත්‌ථබ්‌බං, හත්‌ථපාසා වා න විජහිතබ්‌බං. නානාකුලස්‌ස විහාරො හොති පරික්‌ඛිත්‌තො ච. යස්‌මිං විහාරෙ චීවරං නික්‌ඛිත්‌තං හොති තස්‌මිං විහාරෙ වත්‌ථබ්‌බං ද්‌වාරමූලෙ වා, හත්‌ථපාසා වා න විජහිතබ්‌බං. අපරික්‌ඛිත්‌තො හොති , යස්‌මිං විහාරෙ චීවරං නික්‌ඛිත්‌තං හොති තස්‌මිං විහාරෙ වත්‌ථබ්‌බං, හත්‌ථපාසා වා න විජහිතබ්‌බං.
493. Ekakulassa vihāro hoti parikkhitto ca. Antovihāre cīvaraṃ nikkhipitvā antovihāre vatthabbaṃ. Aparikkhitto hoti, yasmiṃ vihāre cīvaraṃ nikkhittaṃ hoti tasmiṃ vihāre vatthabbaṃ, hatthapāsā vā na vijahitabbaṃ. Nānākulassa vihāro hoti parikkhitto ca. Yasmiṃ vihāre cīvaraṃ nikkhittaṃ hoti tasmiṃ vihāre vatthabbaṃ dvāramūle vā, hatthapāsā vā na vijahitabbaṃ. Aparikkhitto hoti , yasmiṃ vihāre cīvaraṃ nikkhittaṃ hoti tasmiṃ vihāre vatthabbaṃ, hatthapāsā vā na vijahitabbaṃ.
494. එකකුලස්‌ස රුක්‌ඛමූලං හොති, යං මජ්‌ඣන්‌හිකෙ කාලෙ සමන්‌තා ඡායා ඵරති, අන්‌තොඡායාය චීවරං නික්‌ඛිපිත්‌වා අන්‌තොඡායාය වත්‌ථබ්‌බං. නානාකුලස්‌ස රුක්‌ඛමූලං හොති, හත්‌ථපාසා න විජහිතබ්‌බං.
494. Ekakulassa rukkhamūlaṃ hoti, yaṃ majjhanhike kāle samantā chāyā pharati, antochāyāya cīvaraṃ nikkhipitvā antochāyāya vatthabbaṃ. Nānākulassa rukkhamūlaṃ hoti, hatthapāsā na vijahitabbaṃ.
අජ්‌ඣොකාසො එකූපචාරො නාම අගාමකෙ අරඤ්‌ඤෙ සමන්‌තා සත්‌තබ්‌භන්‌තරා එකූපචාරො, තතො පරං නානූපචාරො.
Ajjhokāso ekūpacāro nāma agāmake araññe samantā sattabbhantarā ekūpacāro, tato paraṃ nānūpacāro.
495. විප්‌පවුත්‌ථෙ විප්‌පවුත්‌ථසඤ්‌ඤී අඤ්‌ඤත්‍ර භික්‌ඛුසම්‌මුතියා, නිස්‌සග්‌ගියං පාචිත්‌තියං. විප්‌පවුත්‌ථෙ වෙමතිකො, අඤ්‌ඤත්‍ර භික්‌ඛුසම්‌මුතියා, නිස්‌සග්‌ගියං පාචිත්‌තියං. විප්‌පවුත්‌ථෙ අවිප්‌පවුත්‌ථසඤ්‌ඤී, අඤ්‌ඤත්‍ර භික්‌ඛුසම්‌මුතියා, නිස්‌සග්‌ගියං පාචිත්‌තියං. අප්‌පච්‌චුද්‌ධටෙ පච්‌චුද්‌ධටසඤ්‌ඤී…පෙ.… අවිස්‌සජ්‌ජිතෙ විස්‌සජ්‌ජිතසඤ්‌ඤී… අනට්‌ඨෙ නට්‌ඨසඤ්‌ඤී… අවිනට්‌ඨෙ විනට්‌ඨසඤ්‌ඤී… අදඩ්‌ඪෙ දඩ්‌ඪසඤ්‌ඤී…පෙ.… අවිලුත්‌තෙ විලුත්‌තසඤ්‌ඤී, අඤ්‌ඤත්‍ර භික්‌ඛුසම්‌මුතියා, නිස්‌සග්‌ගියං පාචිත්‌තියං.
495. Vippavutthe vippavutthasaññī aññatra bhikkhusammutiyā, nissaggiyaṃ pācittiyaṃ. Vippavutthe vematiko, aññatra bhikkhusammutiyā, nissaggiyaṃ pācittiyaṃ. Vippavutthe avippavutthasaññī, aññatra bhikkhusammutiyā, nissaggiyaṃ pācittiyaṃ. Appaccuddhaṭe paccuddhaṭasaññī…pe… avissajjite vissajjitasaññī… anaṭṭhe naṭṭhasaññī… avinaṭṭhe vinaṭṭhasaññī… adaḍḍhe daḍḍhasaññī…pe… avilutte viluttasaññī, aññatra bhikkhusammutiyā, nissaggiyaṃ pācittiyaṃ.
නිස්‌සග්‌ගියං චීවරං අනිස්‌සජ්‌ජිත්‌වා පරිභුඤ්‌ජති, ආපත්‌ති දුක්‌කටස්‌ස . අවිප්‌පවුත්‌ථෙ විප්‌පවුත්‌ථසඤ්‌ඤී, ආපත්‌ති දුක්‌කටස්‌ස. අවිප්‌පවුත්‌ථෙ වෙමතිකො, ආපත්‌ති දුක්‌කටස්‌ස. අවිප්‌පවුත්‌ථෙ අවිප්‌පවුත්‌ථසඤ්‌ඤී, අනාපත්‌ති.
Nissaggiyaṃ cīvaraṃ anissajjitvā paribhuñjati, āpatti dukkaṭassa . Avippavutthe vippavutthasaññī, āpatti dukkaṭassa. Avippavutthe vematiko, āpatti dukkaṭassa. Avippavutthe avippavutthasaññī, anāpatti.
496. අනාපත්‌ති අන්‌තොඅරුණෙ පච්‌චුද්‌ධරති, විස්‌සජ්‌ජෙති, නස්‌සති, විනස්‌සති, ඩය්‌හති, අච්‌ඡින්‌දිත්‌වා ගණ්‌හන්‌ති, විස්‌සාසං ගණ්‌හන්‌ති, භික්‌ඛුසම්‌මුතියා, උම්‌මත්‌තකස්‌ස, ආදිකම්‌මිකස්‌සාති.
496. Anāpatti antoaruṇe paccuddharati, vissajjeti, nassati, vinassati, ḍayhati, acchinditvā gaṇhanti, vissāsaṃ gaṇhanti, bhikkhusammutiyā, ummattakassa, ādikammikassāti.
උදොසිතසික්‌ඛාපදං නිට්‌ඨිතං දුතියං.
Udositasikkhāpadaṃ niṭṭhitaṃ dutiyaṃ.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 2. උදොසිතසික්‌ඛාපදවණ්‌ණනා • 2. Udositasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 2. උදොසිතසික්‌ඛාපදවණ්‌ණනා • 2. Udositasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 2. උදොසිතසික්‌ඛාපදවණ්‌ණනා • 2. Udositasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 2. උදොසිතසික්‌ඛාපදවණ්‌ණනා • 2. Udositasikkhāpadavaṇṇanā
