| Library / Tipiṭaka / ཏིཔིཊཀ • Tipiṭaka / མཧཱཝིབྷངྒ • Mahāvibhaṅga |
༢. ཨུདོསིཏསིཀྑཱཔདཾ
2. Udositasikkhāpadaṃ
༤༧༡. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན བྷིཀྑཱུ བྷིཀྑཱུནཾ ཧཏྠེ ཙཱིཝརཾ ནིཀྑིཔིཏྭཱ སནྟརུཏྟརེན ཛནཔདཙཱརིཀཾ པཀྐམནྟི། ཏཱནི ཙཱིཝརཱནི ཙིརཾ ནིཀྑིཏྟཱནི ཀཎྞཀིཏཱནི ཧོནྟི། ཏཱནི བྷིཀྑཱུ ཨོཏཱཔེནྟི། ཨདྡསཱ ཁོ ཨཱཡསྨཱ ཨཱནནྡོ སེནཱསནཙཱརིཀཾ ཨཱཧིཎྜནྟོ ཏེ བྷིཀྑཱུ ཏཱནི ཙཱིཝརཱནི ཨོཏཱཔེནྟེ། དིསྭཱན ཡེན ཏེ བྷིཀྑཱུ ཏེནུཔསངྐམི; ཨུཔསངྐམིཏྭཱ ཏེ བྷིཀྑཱུ ཨེཏདཝོཙ – ‘‘ཀསྶིམཱནི, ཨཱཝུསོ, ཙཱིཝརཱནི ཀཎྞཀིཏཱནཱི’’ཏི? ཨཐ ཁོ ཏེ བྷིཀྑཱུ ཨཱཡསྨཏོ ཨཱནནྡསྶ ཨེཏམཏྠཾ ཨཱརོཙེསུཾ། ཨཱཡསྨཱ ཨཱནནྡོ ཨུཛ྄ཛྷཱཡཏི ཁིཡྻཏི ཝིཔཱཙེཏི – ‘‘ཀཐཉྷི ནཱམ བྷིཀྑཱུ བྷིཀྑཱུནཾ ཧཏྠེ ཙཱིཝརཾ ནིཀྑིཔིཏྭཱ སནྟརུཏྟརེན ཛནཔདཙཱརིཀཾ པཀྐམིསྶནྟཱི’’ཏི! ཨཐ ཁོ ཨཱཡསྨཱ ཨཱནནྡོ ཏེ བྷིཀྑཱུ ཨནེཀཔརིཡཱཡེན ཝིགརཧིཏྭཱ བྷགཝཏོ ཨེཏམཏྠཾ ཨཱརོཙེསི…པེ॰… ‘‘སཙྩཾ ཀིར, བྷིཀྑཝེ, བྷིཀྑཱུ བྷིཀྑཱུནཾ ཧཏྠེ ཙཱིཝརཾ ནིཀྑིཔིཏྭཱ སནྟརུཏྟརེན ཛནཔདཙཱརིཀཾ པཀྐམནྟཱི’’ཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏེ, བྷིཀྑཝེ, མོགྷཔུརིསཱ བྷིཀྑཱུནཾ ཧཏྠེ ཙཱིཝརཾ ནིཀྑིཔིཏྭཱ སནྟརུཏྟརེན ཛནཔདཙཱརིཀཾ པཀྐམིསྶནྟི ! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
471. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhū bhikkhūnaṃ hatthe cīvaraṃ nikkhipitvā santaruttarena janapadacārikaṃ pakkamanti. Tāni cīvarāni ciraṃ nikkhittāni kaṇṇakitāni honti. Tāni bhikkhū otāpenti. Addasā kho āyasmā ānando senāsanacārikaṃ āhiṇḍanto te bhikkhū tāni cīvarāni otāpente. Disvāna yena te bhikkhū tenupasaṅkami; upasaṅkamitvā te bhikkhū etadavoca – ‘‘kassimāni, āvuso, cīvarāni kaṇṇakitānī’’ti? Atha kho te bhikkhū āyasmato ānandassa etamatthaṃ ārocesuṃ. Āyasmā ānando ujjhāyati khiyyati vipāceti – ‘‘kathañhi nāma bhikkhū bhikkhūnaṃ hatthe cīvaraṃ nikkhipitvā santaruttarena janapadacārikaṃ pakkamissantī’’ti! Atha kho āyasmā ānando te bhikkhū anekapariyāyena vigarahitvā bhagavato etamatthaṃ ārocesi…pe… ‘‘saccaṃ kira, bhikkhave, bhikkhū bhikkhūnaṃ hatthe cīvaraṃ nikkhipitvā santaruttarena janapadacārikaṃ pakkamantī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā bhikkhūnaṃ hatthe cīvaraṃ nikkhipitvā santaruttarena janapadacārikaṃ pakkamissanti ! Netaṃ, bhikkhave, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༤༧༢. ‘‘ནིཊྛིཏཙཱིཝརསྨིཾ བྷིཀྑུནཱ ཨུབྦྷཏསྨིཾ ཀཐིནེ ཨེཀརཏྟམྤི ཙེ བྷིཀྑུ ཏིཙཱིཝརེན ཝིཔྤཝསེཡྻ, ནིསྶགྒིཡཾ པཱཙིཏྟིཡ’’ནྟི།
472.‘‘Niṭṭhitacīvarasmiṃ bhikkhunā ubbhatasmiṃ kathine ekarattampi ce bhikkhu ticīvarena vippavaseyya, nissaggiyaṃ pācittiya’’nti.
ཨེཝཉྩིདཾ བྷགཝཏཱ བྷིཀྑཱུནཾ སིཀྑཱཔདཾ པཉྙཏྟཾ ཧོཏི།
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
༤༧༣. ཏེན ཁོ པན སམཡེན ཨཉྙཏརོ བྷིཀྑུ ཀོསམྦིཡཾ གིལཱནོ ཧོཏི། ཉཱཏཀཱ ཏསྶ བྷིཀྑུནོ སནྟིཀེ དཱུཏཾ པཱཧེསུཾ – ‘‘ཨཱགཙྪཏུ བྷདནྟོ, མཡཾ, ཨུཔཊྛཧིསྶཱམཱ’’ཏི། བྷིཀྑཱུཔི ཨེཝམཱཧཾསུ – ‘‘གཙྪཱཝུསོ , ཉཱཏཀཱ ཏཾ ཨུཔཊྛཧིསྶནྟཱི’’ཏི། སོ ཨེཝམཱཧ – ‘‘བྷགཝཏཱཝུསོ, སིཀྑཱཔདཾ པཉྙཏྟཾ – ‘ན ཏིཙཱིཝརེན ཝིཔྤཝསིཏབྦ’ནྟི། ཨཧཉྩམྷི གིལཱནོ། ན སཀྐོམི ཏིཙཱིཝརཾ ཨཱདཱཡ པཀྐམིཏུཾ། ནཱཧཾ གམིསྶཱམཱི’’ཏི ། བྷགཝཏོ ཨེཏམཏྠཾ ཨཱརོཙེསུཾ། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨནུཛཱནཱམི, བྷིཀྑཝེ, གིལཱནསྶ བྷིཀྑུནོ ཏིཙཱིཝརེན ཨཝིཔྤཝཱསསམྨུཏིཾ དཱཏུཾ། ཨེཝཉྩ པན, བྷིཀྑཝེ, དཱཏབྦཱ། ཏེན གིལཱནེན བྷིཀྑུནཱ སངྒྷཾ ཨུཔསངྐམིཏྭཱ ཨེཀཾསཾ ཨུཏྟརཱསངྒཾ ཀརིཏྭཱ ཝུཌྜྷཱནཾ བྷིཀྑཱུནཾ པཱདེ ཝནྡིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ཨེཝམསྶ ཝཙནཱིཡོ – ‘ཨཧཾ, བྷནྟེ, གིལཱནོ། ན སཀྐོམི ཏིཙཱིཝརཾ ཨཱདཱཡ པཀྐམིཏུཾ། སོཧཾ, བྷནྟེ, སངྒྷཾ ཏིཙཱིཝརེན ཨཝིཔྤཝཱསསམྨུཏིཾ ཡཱཙཱམཱི’ཏི། དུཏིཡམྤི ཡཱཙིཏབྦཱ། ཏཏིཡམྤི ཡཱཙིཏབྦཱ། བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ –
473. Tena kho pana samayena aññataro bhikkhu kosambiyaṃ gilāno hoti. Ñātakā tassa bhikkhuno santike dūtaṃ pāhesuṃ – ‘‘āgacchatu bhadanto, mayaṃ, upaṭṭhahissāmā’’ti. Bhikkhūpi evamāhaṃsu – ‘‘gacchāvuso , ñātakā taṃ upaṭṭhahissantī’’ti. So evamāha – ‘‘bhagavatāvuso, sikkhāpadaṃ paññattaṃ – ‘na ticīvarena vippavasitabba’nti. Ahañcamhi gilāno. Na sakkomi ticīvaraṃ ādāya pakkamituṃ. Nāhaṃ gamissāmī’’ti . Bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, gilānassa bhikkhuno ticīvarena avippavāsasammutiṃ dātuṃ. Evañca pana, bhikkhave, dātabbā. Tena gilānena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘ahaṃ, bhante, gilāno. Na sakkomi ticīvaraṃ ādāya pakkamituṃ. Sohaṃ, bhante, saṅghaṃ ticīvarena avippavāsasammutiṃ yācāmī’ti. Dutiyampi yācitabbā. Tatiyampi yācitabbā. Byattena bhikkhunā paṭibalena saṅgho ñāpetabbo –
༤༧༤. ‘‘སུཎཱཏུ མེ, བྷནྟེ, སངྒྷོ། ཨཡཾ ཨིཏྠནྣཱམོ བྷིཀྑུ གིལཱནོ། ན སཀྐོཏི ཏིཙཱིཝརཾ ཨཱདཱཡ པཀྐམིཏུཾ། སོ སངྒྷཾ ཏིཙཱིཝརེན ཨཝིཔྤཝཱསསམྨུཏིཾ ཡཱཙཏི། ཡདི སངྒྷསྶ པཏྟཀལླཾ, སངྒྷོ ཨིཏྠནྣཱམསྶ བྷིཀྑུནོ ཏིཙཱིཝརེན ཨཝིཔྤཝཱསསམྨུཏིཾ དདེཡྻ། ཨེསཱ ཉཏྟི།
474. ‘‘Suṇātu me, bhante, saṅgho. Ayaṃ itthannāmo bhikkhu gilāno. Na sakkoti ticīvaraṃ ādāya pakkamituṃ. So saṅghaṃ ticīvarena avippavāsasammutiṃ yācati. Yadi saṅghassa pattakallaṃ, saṅgho itthannāmassa bhikkhuno ticīvarena avippavāsasammutiṃ dadeyya. Esā ñatti.
‘‘སུཎཱཏུ མེ, བྷནྟེ, སངྒྷོ། ཨཡཾ ཨིཏྠནྣཱམོ བྷིཀྑུ གིལཱནོ། ན སཀྐོཏི ཏིཙཱིཝརཾ ཨཱདཱཡ པཀྐམིཏུཾ། སོ སངྒྷཾ ཏིཙཱིཝརེན ཨཝིཔྤཝཱསསམྨུཏིཾ ཡཱཙཏི། སངྒྷོ ཨིཏྠནྣཱམསྶ བྷིཀྑུནོ ཏིཙཱིཝརེན ཨཝིཔྤཝཱསསམྨུཏིཾ དེཏི། ཡསྶཱཡསྨཏོ ཁམཏི ཨིཏྠནྣཱམསྶ བྷིཀྑུནོ ཏིཙཱིཝརེན ཨཝིཔྤཝཱསསམྨུཏིཡཱ དཱནཾ, སོ ཏུཎྷསྶ; ཡསྶ ནཀྑམཏི, སོ བྷཱསེཡྻ།
‘‘Suṇātu me, bhante, saṅgho. Ayaṃ itthannāmo bhikkhu gilāno. Na sakkoti ticīvaraṃ ādāya pakkamituṃ. So saṅghaṃ ticīvarena avippavāsasammutiṃ yācati. Saṅgho itthannāmassa bhikkhuno ticīvarena avippavāsasammutiṃ deti. Yassāyasmato khamati itthannāmassa bhikkhuno ticīvarena avippavāsasammutiyā dānaṃ, so tuṇhassa; yassa nakkhamati, so bhāseyya.
‘‘དིནྣཱ སངྒྷེན ཨིཏྠནྣཱམསྶ བྷིཀྑུནོ ཏིཙཱིཝརེན ཨཝིཔྤཝཱསསམྨུཏི། ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི།
‘‘Dinnā saṅghena itthannāmassa bhikkhuno ticīvarena avippavāsasammuti. Khamati saṅghassa, tasmā tuṇhī, evametaṃ dhārayāmī’’ti.
ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
Evañca pana, bhikkhave, imaṃ sikkhāpadaṃ uddiseyyātha –
༤༧༥. ‘‘ནིཊྛིཏཙཱིཝརསྨིཾ བྷིཀྑུནཱ ཨུབྦྷཏསྨིཾ ཀཐིནེ ཨེཀརཏྟམྤི ཙེ བྷིཀྑུ ཏིཙཱིཝརེན ཝིཔྤཝསེཡྻ, ཨཉྙཏྲ བྷིཀྑུསམྨུཏིཡཱ, ནིསྶགྒིཡཾ པཱཙིཏྟིཡ’’ནྟི།
475.‘‘Niṭṭhitacīvarasmiṃ bhikkhunā ubbhatasmiṃ kathine ekarattampi ce bhikkhu ticīvarena vippavaseyya, aññatra bhikkhusammutiyā, nissaggiyaṃ pācittiya’’nti.
༤༧༦. ‘‘ནིཊྛིཏཙཱིཝརསྨིནྟི བྷིཀྑུནོ ཙཱིཝརཾ ཀཏཾ ཝཱ ཧོཏི ནཊྛཾ ཝཱ ཝིནཊྛཾ ཝཱ དཌྜྷཾ ཝཱ ཙཱིཝརཱསཱ ཝཱ ཨུཔཙྪིནྣཱ།
476.‘‘Niṭṭhitacīvarasminti bhikkhuno cīvaraṃ kataṃ vā hoti naṭṭhaṃ vā vinaṭṭhaṃ vā daḍḍhaṃ vā cīvarāsā vā upacchinnā.
ཨུབྦྷཏསྨིཾ ཀཐིནེཏི ཨཊྛནྣཾ མཱཏིཀཱནཾ ཨཉྙཏརཱཡ མཱཏིཀཱཡ ཨུབྦྷཏཾ ཧོཏི, སངྒྷེན ཝཱ ཨནྟརཱ ཨུབྦྷཏཾ ཧོཏི།
Ubbhatasmiṃkathineti aṭṭhannaṃ mātikānaṃ aññatarāya mātikāya ubbhataṃ hoti, saṅghena vā antarā ubbhataṃ hoti.
ཨེཀརཏྟམྤི ཙེ བྷིཀྑུ ཏིཙཱིཝརེན ཝིཔྤཝསེཡྻཱཏི སངྒྷཱཊིཡཱ ཝཱ ཨུཏྟརཱསངྒེན ཝཱ ཨནྟརཝཱསཀེན ཝཱ།
Ekarattampi ce bhikkhu ticīvarena vippavaseyyāti saṅghāṭiyā vā uttarāsaṅgena vā antaravāsakena vā.
ཨཉྙཏྲ བྷིཀྑུསམྨུཏིཡཱཏི ཋཔེཏྭཱ བྷིཀྑུསམྨུཏིཾ།
Aññatra bhikkhusammutiyāti ṭhapetvā bhikkhusammutiṃ.
ནིསྶགྒིཡཾ ཧོཏཱིཏི སཧ ཨརུཎུགྒམནཱ 1 ནིསྶགྒིཡཾ ཧོཏི། ནིསྶཛྫིཏབྦཾ སངྒྷསྶ ཝཱ གཎསྶ ཝཱ པུགྒལསྶ ཝཱ། ཨེཝཉྩ པན, བྷིཀྑཝེ, ནིསྶཛྫིཏབྦཾ…པེ॰… ཨིདཾ མེ, བྷནྟེ , ཙཱིཝརཾ རཏྟིཝིཔྤཝུཏྠཾ 2 ཨཉྙཏྲ བྷིཀྑུསམྨུཏིཡཱ ནིསྶགྒིཡཾ, ཨིམཱཧཾ སངྒྷསྶ ནིསྶཛྫཱམཱིཏི…པེ॰… དདེཡྻཱཏི…པེ॰… དདེཡྻུནྟི…པེ॰… ཨཱཡསྨཏོ དམྨཱིཏི།
Nissaggiyaṃ hotīti saha aruṇuggamanā 3 nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante , cīvaraṃ rattivippavutthaṃ 4 aññatra bhikkhusammutiyā nissaggiyaṃ, imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
༤༧༧. གཱམོ ཨེཀཱུཔཙཱརོ ནཱནཱུཔཙཱརོ། ནིཝེསནཾ ཨེཀཱུཔཙཱརཾ ནཱནཱུཔཙཱརཾ། ཨུདོསིཏོ ཨེཀཱུཔཙཱརོ ནཱནཱུཔཙཱརོ། ཨཊྚོ ཨེཀཱུཔཙཱརོ ནཱནཱུཔཙཱརོ། མཱལོ༹ ཨེཀཱུཔཙཱརོ ནཱནཱུཔཙཱརོ། པཱསཱདོ ཨེཀཱུཔཙཱརོ ནཱནཱུཔཙཱརོ། ཧམྨིཡཾ ཨེཀཱུཔཙཱརཾ ནཱནཱུཔཙཱརཾ། ནཱཝཱ ཨེཀཱུཔཙཱརཱ ནཱནཱུཔཙཱརཱ། སཏྠོ ཨེཀཱུཔཙཱརོ ནཱནཱུཔཙཱརོ། ཁེཏྟཾ ཨེཀཱུཔཙཱརཾ ནཱནཱུཔཙཱརཾ། དྷཉྙཀརཎཾ ཨེཀཱུཔཙཱརཾ ནཱནཱུཔཙཱརཾ། ཨཱརཱམོ ཨེཀཱུཔཙཱརོ ནཱནཱུཔཙཱརོ། ཝིཧཱརོ ཨེཀཱུཔཙཱརོ ནཱནཱུཔཙཱརོ། རུཀྑམཱུལཾ ཨེཀཱུཔཙཱརཾ ནཱནཱུཔཙཱརཾ། ཨཛ྄ཛྷོཀཱསོ ཨེཀཱུཔཙཱརོ ནཱནཱུཔཙཱརོ།
477. Gāmo ekūpacāro nānūpacāro. Nivesanaṃ ekūpacāraṃ nānūpacāraṃ. Udosito ekūpacāro nānūpacāro. Aṭṭo ekūpacāro nānūpacāro. Māḷo ekūpacāro nānūpacāro. Pāsādo ekūpacāro nānūpacāro. Hammiyaṃ ekūpacāraṃ nānūpacāraṃ. Nāvā ekūpacārā nānūpacārā. Sattho ekūpacāro nānūpacāro. Khettaṃ ekūpacāraṃ nānūpacāraṃ. Dhaññakaraṇaṃ ekūpacāraṃ nānūpacāraṃ. Ārāmo ekūpacāro nānūpacāro. Vihāro ekūpacāro nānūpacāro. Rukkhamūlaṃ ekūpacāraṃ nānūpacāraṃ. Ajjhokāso ekūpacāro nānūpacāro.
༤༧༨. གཱམོ ཨེཀཱུཔཙཱརོ ནཱམ ཨེཀཀུལསྶ གཱམོ ཧོཏི པརིཀྑིཏྟོ ཙ ། ཨནྟོགཱམེ ཙཱིཝརཾ ནིཀྑིཔིཏྭཱ ཨནྟོགཱམེ ཝཏྠབྦཾ། ཨཔརིཀྑིཏྟོ ཧོཏི, ཡསྨིཾ གྷརེ ཙཱིཝརཾ ནིཀྑིཏྟཾ ཧོཏི ཏསྨིཾ གྷརེ ཝཏྠབྦཾ, ཧཏྠཔཱསཱ ཝཱ ན ཝིཛཧིཏབྦཾ།
478.Gāmo ekūpacāro nāma ekakulassa gāmo hoti parikkhitto ca . Antogāme cīvaraṃ nikkhipitvā antogāme vatthabbaṃ. Aparikkhitto hoti, yasmiṃ ghare cīvaraṃ nikkhittaṃ hoti tasmiṃ ghare vatthabbaṃ, hatthapāsā vā na vijahitabbaṃ.
༤༧༩. ནཱནཱཀུལསྶ གཱམོ ཧོཏི པརིཀྑིཏྟོ ཙ། ཡསྨིཾ གྷརེ ཙཱིཝརཾ ནིཀྑིཏྟཾ ཧོཏི ཏསྨིཾ གྷརེ ཝཏྠབྦཾ སབྷཱཡེ ཝཱ དྭཱརམཱུལེ ཝཱ, ཧཏྠཔཱསཱ ཝཱ ན ཝིཛཧིཏབྦཾ། སབྷཱཡཾ གཙྪནྟེན ཧཏྠཔཱསེ ཙཱིཝརཾ ནིཀྑིཔིཏྭཱ སབྷཱཡེ ཝཱ ཝཏྠབྦཾ དྭཱརམཱུལེ ཝཱ, ཧཏྠཔཱསཱ ཝཱ ན ཝིཛཧིཏབྦཾ། སབྷཱཡེ ཙཱིཝརཾ ནིཀྑིཔིཏྭཱ སབྷཱཡེ ཝཱ ཝཏྠབྦཾ དྭཱརམཱུལེ ཝཱ, ཧཏྠཔཱསཱ ཝཱ ན ཝིཛཧིཏབྦཾ། ཨཔརིཀྑིཏྟོ ཧོཏི, ཡསྨིཾ གྷརེ ཙཱིཝརཾ ནིཀྑིཏྟཾ ཧོཏི ཏསྨིཾ གྷརེ ཝཏྠབྦཾ, ཧཏྠཔཱསཱ ཝཱ ན ཝིཛཧིཏབྦཾ།
479. Nānākulassa gāmo hoti parikkhitto ca. Yasmiṃ ghare cīvaraṃ nikkhittaṃ hoti tasmiṃ ghare vatthabbaṃ sabhāye vā dvāramūle vā, hatthapāsā vā na vijahitabbaṃ. Sabhāyaṃ gacchantena hatthapāse cīvaraṃ nikkhipitvā sabhāye vā vatthabbaṃ dvāramūle vā, hatthapāsā vā na vijahitabbaṃ. Sabhāye cīvaraṃ nikkhipitvā sabhāye vā vatthabbaṃ dvāramūle vā, hatthapāsā vā na vijahitabbaṃ. Aparikkhitto hoti, yasmiṃ ghare cīvaraṃ nikkhittaṃ hoti tasmiṃ ghare vatthabbaṃ, hatthapāsā vā na vijahitabbaṃ.
༤༨༠. ཨེཀཀུལསྶ ནིཝེསནཾ ཧོཏི པརིཀྑིཏྟཉྩ, ནཱནཱགབྦྷཱ ནཱནཱཨོཝརཀཱ། ཨནྟོནིཝེསནེ ཙཱིཝརཾ ནིཀྑིཔིཏྭཱ ཨནྟོནིཝེསནེ ཝཏྠབྦཾ། ཨཔརིཀྑིཏྟཾ ཧོཏི, ཡསྨིཾ གབྦྷེ ཙཱིཝརཾ ནིཀྑིཏྟཾ ཧོཏི ཏསྨིཾ གབྦྷེ ཝཏྠབྦཾ, ཧཏྠཔཱསཱ ཝཱ ན ཝིཛཧིཏབྦཾ།
480. Ekakulassa nivesanaṃ hoti parikkhittañca, nānāgabbhā nānāovarakā. Antonivesane cīvaraṃ nikkhipitvā antonivesane vatthabbaṃ. Aparikkhittaṃ hoti, yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ, hatthapāsā vā na vijahitabbaṃ.
༤༨༡. ནཱནཱཀུལསྶ ནིཝེསནཾ ཧོཏི པརིཀྑིཏྟཉྩ, ནཱནཱགབྦྷཱ ནཱནཱཨོཝརཀཱ། ཡསྨིཾ གབྦྷེ ཙཱིཝརཾ ནིཀྑིཏྟཾ ཧོཏི ཏསྨིཾ གབྦྷེ ཝཏྠབྦཾ དྭཱརམཱུལེ ཝཱ, ཧཏྠཔཱསཱ ཝཱ ན ཝིཛཧིཏབྦཾ ། ཨཔརིཀྑིཏྟཾ ཧོཏི, ཡསྨིཾ གབྦྷེ ཙཱིཝརཾ ནིཀྑིཏྟཾ ཧོཏི ཏསྨིཾ གབྦྷེ ཝཏྠབྦཾ, ཧཏྠཔཱསཱ ཝཱ ན ཝིཛཧིཏབྦཾ།
481. Nānākulassa nivesanaṃ hoti parikkhittañca, nānāgabbhā nānāovarakā. Yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ . Aparikkhittaṃ hoti, yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ, hatthapāsā vā na vijahitabbaṃ.
༤༨༢. ཨེཀཀུལསྶ ཨུདོསིཏོ ཧོཏི པརིཀྑིཏྟོ ཙ, ནཱནཱགབྦྷཱ ནཱནཱཨོཝརཀཱ ། ཨནྟོཨུདོསིཏེ ཙཱིཝརཾ ནིཀྑིཔིཏྭཱ ཨནྟོཨུདོསིཏེ ཝཏྠབྦཾ། ཨཔརིཀྑིཏྟོ ཧོཏི, ཡསྨིཾ གབྦྷེ ཙཱིཝརཾ ནིཀྑིཏྟཾ ཧོཏི ཏསྨིཾ གབྦྷེ ཝཏྠབྦཾ, ཧཏྠཔཱསཱ ཝཱ ན ཝིཛཧིཏབྦཾ།
482. Ekakulassa udosito hoti parikkhitto ca, nānāgabbhā nānāovarakā . Antoudosite cīvaraṃ nikkhipitvā antoudosite vatthabbaṃ. Aparikkhitto hoti, yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ, hatthapāsā vā na vijahitabbaṃ.
༤༨༣. ནཱནཱཀུལསྶ ཨུདོསིཏོ ཧོཏི པརིཀྑིཏྟོ ཙ, ནཱནཱགབྦྷཱ ནཱནཱཨོཝརཀཱ། ཡསྨིཾ གབྦྷེ ཙཱིཝརཾ ནིཀྑིཏྟཾ ཧོཏི ཏསྨིཾ གབྦྷེ ཝཏྠབྦཾ དྭཱརམཱུལེ ཝཱ, ཧཏྠཔཱསཱ ཝཱ ན ཝིཛཧིཏབྦཾ། ཨཔརིཀྑིཏྟོ ཧོཏི, ཡསྨིཾ གབྦྷེ ཙཱིཝརཾ ནིཀྑིཏྟཾ ཧོཏི ཏསྨིཾ གབྦྷེ ཝཏྠབྦཾ, ཧཏྠཔཱསཱ ཝཱ ན ཝིཛཧིཏབྦཾ།
483. Nānākulassa udosito hoti parikkhitto ca, nānāgabbhā nānāovarakā. Yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ. Aparikkhitto hoti, yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ, hatthapāsā vā na vijahitabbaṃ.
༤༨༤. ཨེཀཀུལསྶ ཨཊྚོ ཧོཏི, ཨནྟོཨཊྚེ ཙཱིཝརཾ ནིཀྑིཔིཏྭཱ ཨནྟོཨཊྚེ ཝཏྠབྦཾ། ནཱནཱཀུལསྶ ཨཊྚོ ཧོཏི, ནཱནཱགབྦྷཱ ནཱནཱཨོཝརཀཱ། ཡསྨིཾ གབྦྷེ ཙཱིཝརཾ ནིཀྑིཏྟཾ ཧོཏི ཏསྨིཾ གབྦྷེ ཝཏྠབྦཾ དྭཱརམཱུལེ ཝཱ, ཧཏྠཔཱསཱ ཝཱ ན ཝིཛཧིཏབྦཾ།
484. Ekakulassa aṭṭo hoti, antoaṭṭe cīvaraṃ nikkhipitvā antoaṭṭe vatthabbaṃ. Nānākulassa aṭṭo hoti, nānāgabbhā nānāovarakā. Yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ.
༤༨༥. ཨེཀཀུལསྶ མཱལོ༹ ཧོཏི, ཨནྟོམཱལེ༹ ཙཱིཝརཾ ནིཀྑིཔིཏྭཱ ཨནྟོམཱལེ༹ ཝཏྠབྦཾ། ནཱནཱཀུལསྶ མཱལོ༹ ཧོཏི ནཱནཱགབྦྷཱ ནཱནཱཨོཝརཀཱ, ཡསྨིཾ གབྦྷེ ཙཱིཝརཾ ནིཀྑིཏྟཾ ཧོཏི ཏསྨིཾ གབྦྷེ ཝཏྠབྦཾ དྭཱརམཱུལེ ཝཱ, ཧཏྠཔཱསཱ ཝཱ ན ཝིཛཧིཏབྦཾ།
485. Ekakulassa māḷo hoti, antomāḷe cīvaraṃ nikkhipitvā antomāḷe vatthabbaṃ. Nānākulassa māḷo hoti nānāgabbhā nānāovarakā, yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ.
༤༨༦. ཨེཀཀུལསྶ པཱསཱདོ ཧོཏི, ཨནྟོཔཱསཱདེ ཙཱིཝརཾ ནིཀྑིཔིཏྭཱ ཨནྟོཔཱསཱདེ ཝཏྠབྦཾ། ནཱནཱཀུལསྶ པཱསཱདོ ཧོཏི, ནཱནཱགབྦྷཱ ནཱནཱཨོཝརཀཱ། ཡསྨིཾ གབྦྷེ ཙཱིཝརཾ ནིཀྑིཏྟཾ ཧོཏི ཏསྨིཾ གབྦྷེ ཝཏྠབྦཾ དྭཱརམཱུལེ ཝཱ, ཧཏྠཔཱསཱ ཝཱ ན ཝིཛཧིཏབྦཾ།
486. Ekakulassa pāsādo hoti, antopāsāde cīvaraṃ nikkhipitvā antopāsāde vatthabbaṃ. Nānākulassa pāsādo hoti, nānāgabbhā nānāovarakā. Yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ.
༤༨༧. ཨེཀཀུལསྶ ཧམྨིཡཾ ཧོཏི། ཨནྟོཧམྨིཡེ ཙཱིཝརཾ ནིཀྑིཔིཏྭཱ ཨནྟོཧམྨིཡེ ཝཏྠབྦཾ། ནཱནཱཀུལསྶ ཧམྨིཡཾ ཧོཏི, ནཱནཱགབྦྷཱ ནཱནཱཨོཝརཀཱ། ཡསྨིཾ གབྦྷེ ཙཱིཝརཾ ནིཀྑིཏྟཾ ཧོཏི ཏསྨིཾ གབྦྷེ ཝཏྠབྦཾ དྭཱརམཱུལེ ཝཱ, ཧཏྠཔཱསཱ ཝཱ ན ཝིཛཧིཏབྦཾ།
487. Ekakulassa hammiyaṃ hoti. Antohammiye cīvaraṃ nikkhipitvā antohammiye vatthabbaṃ. Nānākulassa hammiyaṃ hoti, nānāgabbhā nānāovarakā. Yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ.
༤༨༨. ཨེཀཀུལསྶ ནཱཝཱ ཧོཏི། ཨནྟོནཱཝཱཡ ཙཱིཝརཾ ནིཀྑིཔིཏྭཱ ཨནྟོནཱཝཱཡ ཝཏྠབྦཾ ། ནཱནཱཀུལསྶ ནཱཝཱ ཧོཏི ནཱནཱགབྦྷཱ ནཱནཱཨོཝརཀཱ། ཡསྨིཾ ཨོཝརཀེ ཙཱིཝརཾ ནིཀྑིཏྟཾ ཧོཏི ཏསྨིཾ ཨོཝརཀེ ཝཏྠབྦཾ, ཧཏྠཔཱསཱ ཝཱ ན ཝིཛཧིཏབྦཾ།
488. Ekakulassa nāvā hoti. Antonāvāya cīvaraṃ nikkhipitvā antonāvāya vatthabbaṃ . Nānākulassa nāvā hoti nānāgabbhā nānāovarakā. Yasmiṃ ovarake cīvaraṃ nikkhittaṃ hoti tasmiṃ ovarake vatthabbaṃ, hatthapāsā vā na vijahitabbaṃ.
༤༨༩. ཨེཀཀུལསྶ སཏྠོ ཧོཏི། སཏྠེ ཙཱིཝརཾ ནིཀྑིཔིཏྭཱ པུརཏོ ཝཱ པཙྪཏོ ཝཱ སཏྟབྦྷནྟརཱ ན ཝིཛཧིཏབྦཱ, པསྶཏོ ཨབྦྷནྟརཾ ན ཝིཛཧིཏབྦཾ། ནཱནཱཀུལསྶ སཏྠོ ཧོཏི, སཏྠེ ཙཱིཝརཾ ནིཀྑིཔིཏྭཱ ཧཏྠཔཱསཱ ན ཝིཛཧིཏབྦཾ།
489. Ekakulassa sattho hoti. Satthe cīvaraṃ nikkhipitvā purato vā pacchato vā sattabbhantarā na vijahitabbā, passato abbhantaraṃ na vijahitabbaṃ. Nānākulassa sattho hoti, satthe cīvaraṃ nikkhipitvā hatthapāsā na vijahitabbaṃ.
༤༩༠. ཨེཀཀུལསྶ ཁེཏྟཾ ཧོཏི པརིཀྑིཏྟཉྩ། ཨནྟོཁེཏྟེ ཙཱིཝརཾ ནིཀྑིཔིཏྭཱ ཨནྟོཁེཏྟེ ཝཏྠབྦཾ། ཨཔརིཀྑིཏྟཾ ཧོཏི, ཧཏྠཔཱསཱ ན ཝིཛཧིཏབྦཾ། ནཱནཱཀུལསྶ ཁེཏྟཾ ཧོཏི པརིཀྑིཏྟཉྩ། ཨནྟོཁེཏྟེ ཙཱིཝརཾ ནིཀྑིཔིཏྭཱ དྭཱརམཱུལེ ཝཱ ཝཏྠབྦཾ, ཧཏྠཔཱསཱ ཝཱ ན ཝིཛཧིཏབྦཾ། ཨཔརིཀྑིཏྟཾ ཧོཏི, ཧཏྠཔཱསཱ ན ཝིཛཧིཏབྦཾ།
490. Ekakulassa khettaṃ hoti parikkhittañca. Antokhette cīvaraṃ nikkhipitvā antokhette vatthabbaṃ. Aparikkhittaṃ hoti, hatthapāsā na vijahitabbaṃ. Nānākulassa khettaṃ hoti parikkhittañca. Antokhette cīvaraṃ nikkhipitvā dvāramūle vā vatthabbaṃ, hatthapāsā vā na vijahitabbaṃ. Aparikkhittaṃ hoti, hatthapāsā na vijahitabbaṃ.
༤༩༡. ཨེཀཀུལསྶ དྷཉྙཀརཎཾ ཧོཏི པརིཀྑིཏྟཉྩ། ཨནྟོདྷཉྙཀརཎེ ཙཱིཝརཾ ནིཀྑིཔིཏྭཱ ཨནྟོདྷཉྙཀརཎེ ཝཏྠབྦཾ། ཨཔརིཀྑིཏྟཾ ཧོཏི, ཧཏྠཔཱསཱ ན ཝིཛཧིཏབྦཾ། ནཱནཱཀུལསྶ དྷཉྙཀརཎཾ ཧོཏི པརིཀྑིཏྟཉྩ། ཨནྟོདྷཉྙཀརཎེ ཙཱིཝརཾ ནིཀྑིཔིཏྭཱ དྭཱརམཱུལེ ཝཱ ཝཏྠབྦཾ, ཧཏྠཔཱསཱ ཝཱ ན ཝིཛཧིཏབྦཾ། ཨཔརིཀྑིཏྟཾ ཧོཏི, ཧཏྠཔཱསཱ ན ཝིཛཧིཏབྦཾ།
491. Ekakulassa dhaññakaraṇaṃ hoti parikkhittañca. Antodhaññakaraṇe cīvaraṃ nikkhipitvā antodhaññakaraṇe vatthabbaṃ. Aparikkhittaṃ hoti, hatthapāsā na vijahitabbaṃ. Nānākulassa dhaññakaraṇaṃ hoti parikkhittañca. Antodhaññakaraṇe cīvaraṃ nikkhipitvā dvāramūle vā vatthabbaṃ, hatthapāsā vā na vijahitabbaṃ. Aparikkhittaṃ hoti, hatthapāsā na vijahitabbaṃ.
༤༩༢. ཨེཀཀུལསྶ ཨཱརཱམོ ཧོཏི པརིཀྑིཏྟོ ཙ། ཨནྟོཨཱརཱམེ ཙཱིཝརཾ ནིཀྑིཔིཏྭཱ ཨནྟོཨཱརཱམེ ཝཏྠབྦཾ། ཨཔརིཀྑིཏྟོ ཧོཏི, ཧཏྠཔཱསཱ ན ཝིཛཧིཏབྦཾ། ནཱནཱཀུལསྶ ཨཱརཱམོ ཧོཏི པརིཀྑིཏྟོ ཙ། ཨནྟོཨཱརཱམེ ཙཱིཝརཾ ནིཀྑིཔིཏྭཱ དྭཱརམཱུལེ ཝཱ ཝཏྠབྦཾ, ཧཏྠཔཱསཱ ཝཱ ན ཝིཛཧིཏབྦཾ། ཨཔརིཀྑིཏྟོ ཧོཏི, ཧཏྠཔཱསཱ ན ཝིཛཧིཏབྦཾ།
492. Ekakulassa ārāmo hoti parikkhitto ca. Antoārāme cīvaraṃ nikkhipitvā antoārāme vatthabbaṃ. Aparikkhitto hoti, hatthapāsā na vijahitabbaṃ. Nānākulassa ārāmo hoti parikkhitto ca. Antoārāme cīvaraṃ nikkhipitvā dvāramūle vā vatthabbaṃ, hatthapāsā vā na vijahitabbaṃ. Aparikkhitto hoti, hatthapāsā na vijahitabbaṃ.
༤༩༣. ཨེཀཀུལསྶ ཝིཧཱརོ ཧོཏི པརིཀྑིཏྟོ ཙ། ཨནྟོཝིཧཱརེ ཙཱིཝརཾ ནིཀྑིཔིཏྭཱ ཨནྟོཝིཧཱརེ ཝཏྠབྦཾ། ཨཔརིཀྑིཏྟོ ཧོཏི, ཡསྨིཾ ཝིཧཱརེ ཙཱིཝརཾ ནིཀྑིཏྟཾ ཧོཏི ཏསྨིཾ ཝིཧཱརེ ཝཏྠབྦཾ, ཧཏྠཔཱསཱ ཝཱ ན ཝིཛཧིཏབྦཾ། ནཱནཱཀུལསྶ ཝིཧཱརོ ཧོཏི པརིཀྑིཏྟོ ཙ། ཡསྨིཾ ཝིཧཱརེ ཙཱིཝརཾ ནིཀྑིཏྟཾ ཧོཏི ཏསྨིཾ ཝིཧཱརེ ཝཏྠབྦཾ དྭཱརམཱུལེ ཝཱ, ཧཏྠཔཱསཱ ཝཱ ན ཝིཛཧིཏབྦཾ། ཨཔརིཀྑིཏྟོ ཧོཏི , ཡསྨིཾ ཝིཧཱརེ ཙཱིཝརཾ ནིཀྑིཏྟཾ ཧོཏི ཏསྨིཾ ཝིཧཱརེ ཝཏྠབྦཾ, ཧཏྠཔཱསཱ ཝཱ ན ཝིཛཧིཏབྦཾ།
493. Ekakulassa vihāro hoti parikkhitto ca. Antovihāre cīvaraṃ nikkhipitvā antovihāre vatthabbaṃ. Aparikkhitto hoti, yasmiṃ vihāre cīvaraṃ nikkhittaṃ hoti tasmiṃ vihāre vatthabbaṃ, hatthapāsā vā na vijahitabbaṃ. Nānākulassa vihāro hoti parikkhitto ca. Yasmiṃ vihāre cīvaraṃ nikkhittaṃ hoti tasmiṃ vihāre vatthabbaṃ dvāramūle vā, hatthapāsā vā na vijahitabbaṃ. Aparikkhitto hoti , yasmiṃ vihāre cīvaraṃ nikkhittaṃ hoti tasmiṃ vihāre vatthabbaṃ, hatthapāsā vā na vijahitabbaṃ.
༤༩༤. ཨེཀཀུལསྶ རུཀྑམཱུལཾ ཧོཏི, ཡཾ མཛ྄ཛྷནྷིཀེ ཀཱལེ སམནྟཱ ཚཱཡཱ ཕརཏི, ཨནྟོཚཱཡཱཡ ཙཱིཝརཾ ནིཀྑིཔིཏྭཱ ཨནྟོཚཱཡཱཡ ཝཏྠབྦཾ། ནཱནཱཀུལསྶ རུཀྑམཱུལཾ ཧོཏི, ཧཏྠཔཱསཱ ན ཝིཛཧིཏབྦཾ།
494. Ekakulassa rukkhamūlaṃ hoti, yaṃ majjhanhike kāle samantā chāyā pharati, antochāyāya cīvaraṃ nikkhipitvā antochāyāya vatthabbaṃ. Nānākulassa rukkhamūlaṃ hoti, hatthapāsā na vijahitabbaṃ.
ཨཛ྄ཛྷོཀཱསོ ཨེཀཱུཔཙཱརོ ནཱམ ཨགཱམཀེ ཨརཉྙེ སམནྟཱ སཏྟབྦྷནྟརཱ ཨེཀཱུཔཙཱརོ, ཏཏོ པརཾ ནཱནཱུཔཙཱརོ།
Ajjhokāso ekūpacāro nāma agāmake araññe samantā sattabbhantarā ekūpacāro, tato paraṃ nānūpacāro.
༤༩༥. ཝིཔྤཝུཏྠེ ཝིཔྤཝུཏྠསཉྙཱི ཨཉྙཏྲ བྷིཀྑུསམྨུཏིཡཱ, ནིསྶགྒིཡཾ པཱཙིཏྟིཡཾ། ཝིཔྤཝུཏྠེ ཝེམཏིཀོ, ཨཉྙཏྲ བྷིཀྑུསམྨུཏིཡཱ, ནིསྶགྒིཡཾ པཱཙིཏྟིཡཾ། ཝིཔྤཝུཏྠེ ཨཝིཔྤཝུཏྠསཉྙཱི, ཨཉྙཏྲ བྷིཀྑུསམྨུཏིཡཱ, ནིསྶགྒིཡཾ པཱཙིཏྟིཡཾ། ཨཔྤཙྩུདྡྷཊེ པཙྩུདྡྷཊསཉྙཱི…པེ॰… ཨཝིསྶཛྫིཏེ ཝིསྶཛྫིཏསཉྙཱི… ཨནཊྛེ ནཊྛསཉྙཱི… ཨཝིནཊྛེ ཝིནཊྛསཉྙཱི… ཨདཌྜྷེ དཌྜྷསཉྙཱི…པེ॰… ཨཝིལུཏྟེ ཝིལུཏྟསཉྙཱི, ཨཉྙཏྲ བྷིཀྑུསམྨུཏིཡཱ, ནིསྶགྒིཡཾ པཱཙིཏྟིཡཾ།
495. Vippavutthe vippavutthasaññī aññatra bhikkhusammutiyā, nissaggiyaṃ pācittiyaṃ. Vippavutthe vematiko, aññatra bhikkhusammutiyā, nissaggiyaṃ pācittiyaṃ. Vippavutthe avippavutthasaññī, aññatra bhikkhusammutiyā, nissaggiyaṃ pācittiyaṃ. Appaccuddhaṭe paccuddhaṭasaññī…pe… avissajjite vissajjitasaññī… anaṭṭhe naṭṭhasaññī… avinaṭṭhe vinaṭṭhasaññī… adaḍḍhe daḍḍhasaññī…pe… avilutte viluttasaññī, aññatra bhikkhusammutiyā, nissaggiyaṃ pācittiyaṃ.
ནིསྶགྒིཡཾ ཙཱིཝརཾ ཨནིསྶཛྫིཏྭཱ པརིབྷུཉྫཏི, ཨཱཔཏྟི དུཀྐཊསྶ ། ཨཝིཔྤཝུཏྠེ ཝིཔྤཝུཏྠསཉྙཱི, ཨཱཔཏྟི དུཀྐཊསྶ། ཨཝིཔྤཝུཏྠེ ཝེམཏིཀོ, ཨཱཔཏྟི དུཀྐཊསྶ། ཨཝིཔྤཝུཏྠེ ཨཝིཔྤཝུཏྠསཉྙཱི, ཨནཱཔཏྟི།
Nissaggiyaṃ cīvaraṃ anissajjitvā paribhuñjati, āpatti dukkaṭassa . Avippavutthe vippavutthasaññī, āpatti dukkaṭassa. Avippavutthe vematiko, āpatti dukkaṭassa. Avippavutthe avippavutthasaññī, anāpatti.
༤༩༦. ཨནཱཔཏྟི ཨནྟོཨརུཎེ པཙྩུདྡྷརཏི, ཝིསྶཛྫེཏི, ནསྶཏི, ཝིནསྶཏི, ཌཡ྄ཧཏི, ཨཙྪིནྡིཏྭཱ གཎྷནྟི, ཝིསྶཱསཾ གཎྷནྟི, བྷིཀྑུསམྨུཏིཡཱ, ཨུམྨཏྟཀསྶ, ཨཱདིཀམྨིཀསྶཱཏི།
496. Anāpatti antoaruṇe paccuddharati, vissajjeti, nassati, vinassati, ḍayhati, acchinditvā gaṇhanti, vissāsaṃ gaṇhanti, bhikkhusammutiyā, ummattakassa, ādikammikassāti.
ཨུདོསིཏསིཀྑཱཔདཾ ནིཊྛིཏཾ དུཏིཡཾ།
Udositasikkhāpadaṃ niṭṭhitaṃ dutiyaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༢. ཨུདོསིཏསིཀྑཱཔདཝཎྞནཱ • 2. Udositasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༢. ཨུདོསིཏསིཀྑཱཔདཝཎྞནཱ • 2. Udositasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༢. ཨུདོསིཏསིཀྑཱཔདཝཎྞནཱ • 2. Udositasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༢. ཨུདོསིཏསིཀྑཱཔདཝཎྞནཱ • 2. Udositasikkhāpadavaṇṇanā
