| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
2. உதோ³ஸிதஸிக்கா²பத³வண்ணனா
2. Udositasikkhāpadavaṇṇanā
471. தேன ஸமயேன பு³த்³தோ⁴ ப⁴க³வாதி உதோ³ஸிதஸிக்கா²பத³ங். தத்த² ஸந்தருத்தரேனாதி அந்தரந்தி அந்தரவாஸகோ வுச்சதி, உத்தரந்தி உத்தராஸங்கோ³, ஸஹ அந்தரேன உத்தரங் ஸந்தருத்தரங், தேன ஸந்தருத்தரேன, ஸஹ அந்தரவாஸகேன உத்தராஸங்கே³னாதி அத்தோ². கண்ணகிதானீதி ஸேதே³ன பு²ட்டோ²காஸேஸு ஸஞ்ஜாதகாளஸேதமண்ட³லானி. அத்³த³ஸ கோ² ஆயஸ்மா ஆனந்தோ³ ஸேனாஸனசாரிகங் ஆஹிண்ட³ந்தோதி தே²ரோ கிர ப⁴க³வதி தி³வா படிஸல்லானத்தா²ய க³ந்த⁴குடிங் பவிட்டே² தங் ஓகாஸங் லபி⁴த்வா து³ன்னிக்கி²த்தானி தா³ருப⁴ண்ட³மத்திகாப⁴ண்டா³னி படிஸாமெந்தோ அஸம்மட்ட²ட்டா²னங் ஸம்மஜ்ஜந்தோ கி³லானேஹி பி⁴க்கூ²ஹி ஸத்³தி⁴ங் படிஸந்தா²ரங் கரொந்தோ தேஸங் பி⁴க்கூ²னங் ஸேனாஸனட்டா²னங் ஸம்பத்தோ அத்³த³ஸ. தேன வுத்தங் – ‘‘அத்³த³ஸ கோ² ஆயஸ்மா ஆனந்தோ³ ஸேனாஸனசாரிகங் ஆஹிண்ட³ந்தோ’’தி.
471.Tenasamayena buddho bhagavāti udositasikkhāpadaṃ. Tattha santaruttarenāti antaranti antaravāsako vuccati, uttaranti uttarāsaṅgo, saha antarena uttaraṃ santaruttaraṃ, tena santaruttarena, saha antaravāsakena uttarāsaṅgenāti attho. Kaṇṇakitānīti sedena phuṭṭhokāsesu sañjātakāḷasetamaṇḍalāni. Addasa kho āyasmā ānando senāsanacārikaṃ āhiṇḍantoti thero kira bhagavati divā paṭisallānatthāya gandhakuṭiṃ paviṭṭhe taṃ okāsaṃ labhitvā dunnikkhittāni dārubhaṇḍamattikābhaṇḍāni paṭisāmento asammaṭṭhaṭṭhānaṃ sammajjanto gilānehi bhikkhūhi saddhiṃ paṭisanthāraṃ karonto tesaṃ bhikkhūnaṃ senāsanaṭṭhānaṃ sampatto addasa. Tena vuttaṃ – ‘‘addasa kho āyasmā ānando senāsanacārikaṃ āhiṇḍanto’’ti.
473. அவிப்பவாஸஸம்முதிங் தா³துந்தி அவிப்பவாஸே ஸம்முதி அவிப்பவாஸஸம்முதி, அவிப்பவாஸாய வா ஸம்முதி அவிப்பவாஸஸம்முதி. கோ பனெத்த² ஆனிஸங்ஸோ? யேன சீவரேன விப்பவஸதி, தங் நிஸ்ஸக்³கி³யங் ந ஹோதி, ஆபத்திஞ்ச நாபஜ்ஜதி. கித்தகங் காலங்? மஹாஸுமத்தே²ரோ தாவ ஆஹ – ‘‘யாவ ரோகோ³ ந வூபஸமதி, வூபஸந்தே பன ரோகே³ ஸீக⁴ங் சீவரட்டா²னங் ஆக³ந்தப்³ப³’’ந்தி . மஹாபது³மத்தே²ரோ ஆஹ – ‘‘ஸீக⁴ங் ஆக³ச்ச²தோ ரோகோ³ படிகுப்பெய்ய, தஸ்மா ஸணிகங் ஆக³ந்தப்³ப³ங். யதோ பட்டா²ய ஹி ஸத்த²ங் வா பரியேஸதி, ‘க³ச்சா²மீ’தி ஆபோ⁴க³ங் வா கரோதி, ததோ பட்டா²ய வட்டதி. ‘ந தா³னி க³மிஸ்ஸாமீ’தி ஏவங் பன து⁴ரனிக்கே²பங் கரொந்தேன பச்சுத்³த⁴ரிதப்³ப³ங், அதிரேகசீவரட்டா²னே ட²ஸ்ஸதீ’’தி. ஸசே பனஸ்ஸ ரோகோ³ படிகுப்பதி, கிங் காதப்³ப³ந்தி? பு²ஸ்ஸதே³வத்தே²ரோ தாவ ஆஹ – ‘‘ஸசே ஸோயேவ ரோகோ³ படிகுப்பதி, ஸா ஏவ ஸம்முதி, புன ஸம்முதிதா³னகிச்சங் நத்தி². அத²ஞ்ஞோ குப்பதி, புன தா³தப்³பா³ ஸம்முதீ’’தி. உபதிஸ்ஸத்தே²ரோ ஆஹ – ‘‘ஸோ வா ரோகோ³ ஹோது, அஞ்ஞோ வா புன ஸம்முதிதா³னகிச்சங் நத்தீ²’’தி.
473.Avippavāsasammutiṃ dātunti avippavāse sammuti avippavāsasammuti, avippavāsāya vā sammuti avippavāsasammuti. Ko panettha ānisaṃso? Yena cīvarena vippavasati, taṃ nissaggiyaṃ na hoti, āpattiñca nāpajjati. Kittakaṃ kālaṃ? Mahāsumatthero tāva āha – ‘‘yāva rogo na vūpasamati, vūpasante pana roge sīghaṃ cīvaraṭṭhānaṃ āgantabba’’nti . Mahāpadumatthero āha – ‘‘sīghaṃ āgacchato rogo paṭikuppeyya, tasmā saṇikaṃ āgantabbaṃ. Yato paṭṭhāya hi satthaṃ vā pariyesati, ‘gacchāmī’ti ābhogaṃ vā karoti, tato paṭṭhāya vaṭṭati. ‘Na dāni gamissāmī’ti evaṃ pana dhuranikkhepaṃ karontena paccuddharitabbaṃ, atirekacīvaraṭṭhāne ṭhassatī’’ti. Sace panassa rogo paṭikuppati, kiṃ kātabbanti? Phussadevatthero tāva āha – ‘‘sace soyeva rogo paṭikuppati, sā eva sammuti, puna sammutidānakiccaṃ natthi. Athañño kuppati, puna dātabbā sammutī’’ti. Upatissatthero āha – ‘‘so vā rogo hotu, añño vā puna sammutidānakiccaṃ natthī’’ti.
475-6. நிட்டி²தசீவரஸ்மிங் பி⁴க்கு²னாதி இத⁴ பன புரிமஸிக்கா²பதே³ விய அத்த²ங் அக்³க³ஹெத்வா நிட்டி²தே சீவரஸ்மிங் பி⁴க்கு²னோதி ஏவங் ஸாமிவஸேன கரணவசனஸ்ஸ அத்தோ² வேதி³தப்³போ³. கரணவஸேன ஹி பி⁴க்கு²னா இத³ங் நாம காதப்³ப³ந்தி நத்தி². ஸாமிவஸேன பன பி⁴க்கு²னோ சீவரஸ்மிங் நிட்டி²தே கதி²னே ச உப்³ப⁴தே ஏவங் சி²ன்னபலிபோ³தோ⁴ ஏகரத்தம்பி சே பி⁴க்கு² திசீவரேன விப்பவஸெய்யாதி ஏவங் அத்தோ² யுஜ்ஜதி. தத்த² திசீவரேனாதி அதி⁴ட்டி²தேஸு தீஸு சீவரேஸு யேன கேனசி. ஏகேன விப்பவுத்தோ²பி ஹி திசீவரேன விப்பவுத்தோ² ஹோதி, படிஸித்³த⁴பரியாபன்னேன விப்பவுத்த²த்தா. தேனேவஸ்ஸ பத³பா⁴ஜனே ‘‘ஸங்கா⁴டியா வா’’திஆதி³ வுத்தங். விப்பவஸெய்யாதி விப்பயுத்தோ வஸெய்ய.
475-6.Niṭṭhitacīvarasmiṃ bhikkhunāti idha pana purimasikkhāpade viya atthaṃ aggahetvā niṭṭhite cīvarasmiṃ bhikkhunoti evaṃ sāmivasena karaṇavacanassa attho veditabbo. Karaṇavasena hi bhikkhunā idaṃ nāma kātabbanti natthi. Sāmivasena pana bhikkhuno cīvarasmiṃ niṭṭhite kathine ca ubbhate evaṃ chinnapalibodho ekarattampi ce bhikkhu ticīvarena vippavaseyyāti evaṃ attho yujjati. Tattha ticīvarenāti adhiṭṭhitesu tīsu cīvaresu yena kenaci. Ekena vippavutthopi hi ticīvarena vippavuttho hoti, paṭisiddhapariyāpannena vippavutthattā. Tenevassa padabhājane ‘‘saṅghāṭiyā vā’’tiādi vuttaṃ. Vippavaseyyāti vippayutto vaseyya.
477-8. கா³மோ ஏகூபசாரோதிஆதி³ அவிப்பவாஸலக்க²ணவவத்தா²பனத்த²ங் வுத்தங். ததோ பரங் யதா²க்கமேன தானேவ பன்னரஸ மாதிகாபதா³னி வித்தா²ரெந்தோ ‘‘கா³மோ ஏகூபசாரோ நாமா’’திஆதி³மாஹ. தத்த² ஏககுலஸ்ஸ கா³மோதி ஏகஸ்ஸ ரஞ்ஞோ வா போ⁴ஜகஸ்ஸ வா கா³மோ. பரிக்கி²த்தோதி யேன கேனசி பாகாரேன வா வதியா வா பரிக்கா²ய வா பரிக்கி²த்தோ. எத்தாவதா ஏககுலகா³மஸ்ஸ ஏகூபசாரதா த³ஸ்ஸிதா. அந்தோகா³மே வத்த²ப்³ப³ந்தி ஏவரூபே கா³மே சீவரங் நிக்கி²பித்வா கா³மப்³ப⁴ந்தரே யதா²ருசிதே டா²னே அருணங் உட்டா²பேதுங் வட்டதி. அபரிக்கி²த்தோதி இமினா தஸ்ஸேவ கா³மஸ்ஸ நானூபசாரதா த³ஸ்ஸிதா. ஏவரூபே கா³மே யஸ்மிங் க⁴ரே சீவரங் நிக்கி²த்தங், தத்த² வத்த²ப்³ப³ங். ஹத்த²பாஸா வா ந விஜஹிதப்³ப³ந்தி அத² வா தங் க⁴ரங் ஸமந்ததோ ஹத்த²பாஸா ந விஜஹிதப்³ப³ங், அட்³ட⁴தெய்யரதனப்பமாணப்பதே³ஸா உத்³த⁴ங் ந விஜஹிதப்³ப³ந்தி வுத்தங் ஹோதி. அட்³ட⁴தெய்யரதனப்³ப⁴ந்தரே பன வத்து²ங் வட்டதி. தங் பமாணங் அதிக்கமித்வா ஸசேபி இத்³தி⁴மா பி⁴க்கூ² ஆகாஸே அருணங் உட்டா²பேதி, நிஸ்ஸக்³கி³யமேவ ஹோதி. எத்த² ச யஸ்மிங் க⁴ரேதி க⁴ரபரிச்சே²தோ³ ‘‘ஏககுலஸ்ஸ நிவேஸனங் ஹோதீ’’திஆதி³னா (பாரா॰ 480) லக்க²ணேன வேதி³தப்³போ³.
477-8.Gāmo ekūpacārotiādi avippavāsalakkhaṇavavatthāpanatthaṃ vuttaṃ. Tato paraṃ yathākkamena tāneva pannarasa mātikāpadāni vitthārento ‘‘gāmo ekūpacāro nāmā’’tiādimāha. Tattha ekakulassa gāmoti ekassa rañño vā bhojakassa vā gāmo. Parikkhittoti yena kenaci pākārena vā vatiyā vā parikkhāya vā parikkhitto. Ettāvatā ekakulagāmassa ekūpacāratā dassitā. Antogāme vatthabbanti evarūpe gāme cīvaraṃ nikkhipitvā gāmabbhantare yathārucite ṭhāne aruṇaṃ uṭṭhāpetuṃ vaṭṭati. Aparikkhittoti iminā tasseva gāmassa nānūpacāratā dassitā. Evarūpe gāme yasmiṃ ghare cīvaraṃ nikkhittaṃ, tattha vatthabbaṃ. Hatthapāsā vā na vijahitabbanti atha vā taṃ gharaṃ samantato hatthapāsā na vijahitabbaṃ, aḍḍhateyyaratanappamāṇappadesā uddhaṃ na vijahitabbanti vuttaṃ hoti. Aḍḍhateyyaratanabbhantare pana vatthuṃ vaṭṭati. Taṃ pamāṇaṃ atikkamitvā sacepi iddhimā bhikkhū ākāse aruṇaṃ uṭṭhāpeti, nissaggiyameva hoti. Ettha ca yasmiṃ ghareti gharaparicchedo ‘‘ekakulassa nivesanaṃ hotī’’tiādinā (pārā. 480) lakkhaṇena veditabbo.
479. நானாகுலஸ்ஸ கா³மோதி நானாராஜூனங் வா போ⁴ஜகானங் வா கா³மோ, வேஸாலிகுஸினாராதி³ஸதி³ஸோ. பரிக்கி²த்தோதி இமினா நானாகுலகா³மஸ்ஸ ஏகூபசாரதா த³ஸ்ஸிதா. ஸபா⁴யே வா த்³வாரமூலே வாதி எத்த² ஸபா⁴யந்தி லிங்க³ப்³யத்தயேன ஸபா⁴ வுத்தா. த்³வாரமூலேதி நக³ரத்³வாரஸ்ஸ ஸமீபே. இத³ங் வுத்தங் ஹோதி – ஏவரூபே கா³மே யஸ்மிங் க⁴ரே சீவரங் நிக்கி²த்தங், தத்த² வா வத்த²ப்³ப³ங். தத்த² ஸத்³த³ஸங்க⁴ட்டனேன வா ஜனஸம்பா³தே⁴ன வா வஸிதுங் அஸக்கொந்தேன ஸபா⁴யே வா வத்த²ப்³ப³ங் நக³ரத்³வாரமூலே வா. தத்ரபி வஸிதுங் அஸக்கொந்தேன யத்த² கத்த²சி பா²ஸுகட்டா²னே வஸித்வா அந்தோஅருணே ஆக³ம்ம தேஸங்யேவ ஸபா⁴யத்³வாரமூலானங் ஹத்த²பாஸா வா ந விஜஹிதப்³ப³ங். க⁴ரஸ்ஸ பன சீவரஸ்ஸ வா ஹத்த²பாஸே வத்தப்³ப³மேவ நத்தி².
479.Nānākulassagāmoti nānārājūnaṃ vā bhojakānaṃ vā gāmo, vesālikusinārādisadiso. Parikkhittoti iminā nānākulagāmassa ekūpacāratā dassitā. Sabhāye vā dvāramūle vāti ettha sabhāyanti liṅgabyattayena sabhā vuttā. Dvāramūleti nagaradvārassa samīpe. Idaṃ vuttaṃ hoti – evarūpe gāme yasmiṃ ghare cīvaraṃ nikkhittaṃ, tattha vā vatthabbaṃ. Tattha saddasaṅghaṭṭanena vā janasambādhena vā vasituṃ asakkontena sabhāye vā vatthabbaṃ nagaradvāramūle vā. Tatrapi vasituṃ asakkontena yattha katthaci phāsukaṭṭhāne vasitvā antoaruṇe āgamma tesaṃyeva sabhāyadvāramūlānaṃ hatthapāsā vā na vijahitabbaṃ. Gharassa pana cīvarassa vā hatthapāse vattabbameva natthi.
ஸபா⁴யங் க³ச்ச²ந்தேன ஹத்த²பாஸே சீவரங் நிக்கி²பித்வாதி ஸசே க⁴ரே அட்ட²பெத்வா ஸபா⁴யே ட²பெஸ்ஸாமீதி ஸபா⁴யங் க³ச்ச²தி, தேன ஸபா⁴யங் க³ச்ச²ந்தேன ஹத்த²பாஸேதி ஹத்த²ங் பஸாரெத்வா ‘‘ஹந்தி³மங் சீவரங் ட²பேமீ’’தி ஏவங் நிக்கே²பஸுகே² ஹத்த²பாஸக³தே கிஸ்மிஞ்சி ஆபணே சீவரங் நிக்கி²பித்வா புரிமனயேனேவ ஸபா⁴யே வா வத்த²ப்³ப³ங் த்³வாரமூலே வா, ஹத்த²பாஸா வா ந விஜஹிதப்³ப³ங்.
Sabhāyaṃ gacchantena hatthapāse cīvaraṃ nikkhipitvāti sace ghare aṭṭhapetvā sabhāye ṭhapessāmīti sabhāyaṃ gacchati, tena sabhāyaṃ gacchantena hatthapāseti hatthaṃ pasāretvā ‘‘handimaṃ cīvaraṃ ṭhapemī’’ti evaṃ nikkhepasukhe hatthapāsagate kismiñci āpaṇe cīvaraṃ nikkhipitvā purimanayeneva sabhāye vā vatthabbaṃ dvāramūle vā, hatthapāsā vā na vijahitabbaṃ.
தத்ராயங் வினிச்ச²யோ – பு²ஸ்ஸதே³வத்தே²ரோ தாவ ஆஹ – ‘‘சீவரஹத்த²பாஸே வஸிதப்³ப³ங் நத்தி², யத்த² கத்த²சி வீதி²ஹத்த²பாஸேபி ஸபா⁴யஹத்த²பாஸேபி த்³வாரஹத்த²பாஸேபி வஸிதுங் வட்டதீ’’தி. உபதிஸ்ஸத்தே²ரோ பனாஹ – ‘‘நக³ரஸ்ஸ ப³ஹூனிபி த்³வாரானி ஹொந்தி ப³ஹூனிபி ஸபா⁴யானி, தஸ்மா ஸப்³ப³த்த² ந வட்டதி. யஸ்ஸா பன வீதி²யா சீவரங் ட²பிதங் யங் தஸ்ஸா ஸம்முக²ட்டா²னே ஸபா⁴யஞ்ச த்³வாரஞ்ச தஸ்ஸ ஸபா⁴யஸ்ஸ ச த்³வாரஸ்ஸ ச ஹத்த²பாஸா ந விஜஹிதப்³ப³ங். ஏவஞ்ஹி ஸதி ஸக்கா சீவரஸ்ஸ பவத்தி ஜானிது’’ந்தி. ஸபா⁴யங் பன க³ச்ச²ந்தேன யஸ்ஸ ஆபணிகஸ்ஸ ஹத்தே² நிக்கி²த்தங், ஸசே ஸோ தங் சீவரங் அதிஹரித்வா க⁴ரே நிக்கி²பதி, வீதி²ஹத்த²பாஸோ ந ரக்க²தி, க⁴ரஸ்ஸ ஹத்த²பாஸே வத்த²ப்³ப³ங். ஸசே மஹந்தங் க⁴ரங் ஹோதி, த்³வே வீதி²யோ ப²ரித்வா டி²தங் புரதோ வா பச்ச²தோ வா ஹத்த²பாஸேயேவ அருணங் உட்டா²பேதப்³ப³ங். ஸபா⁴யே நிக்கி²பித்வா பன ஸபா⁴யே வா தஸ்ஸ ஸம்முகே² நக³ரத்³வாரமூலே வா தேஸங்யேவ ஹத்த²பாஸே வா அருணங் உட்டா²பேதப்³ப³ங்.
Tatrāyaṃ vinicchayo – phussadevatthero tāva āha – ‘‘cīvarahatthapāse vasitabbaṃ natthi, yattha katthaci vīthihatthapāsepi sabhāyahatthapāsepi dvārahatthapāsepi vasituṃ vaṭṭatī’’ti. Upatissatthero panāha – ‘‘nagarassa bahūnipi dvārāni honti bahūnipi sabhāyāni, tasmā sabbattha na vaṭṭati. Yassā pana vīthiyā cīvaraṃ ṭhapitaṃ yaṃ tassā sammukhaṭṭhāne sabhāyañca dvārañca tassa sabhāyassa ca dvārassa ca hatthapāsā na vijahitabbaṃ. Evañhi sati sakkā cīvarassa pavatti jānitu’’nti. Sabhāyaṃ pana gacchantena yassa āpaṇikassa hatthe nikkhittaṃ, sace so taṃ cīvaraṃ atiharitvā ghare nikkhipati, vīthihatthapāso na rakkhati, gharassa hatthapāse vatthabbaṃ. Sace mahantaṃ gharaṃ hoti, dve vīthiyo pharitvā ṭhitaṃ purato vā pacchato vā hatthapāseyeva aruṇaṃ uṭṭhāpetabbaṃ. Sabhāye nikkhipitvā pana sabhāye vā tassa sammukhe nagaradvāramūle vā tesaṃyeva hatthapāse vā aruṇaṃ uṭṭhāpetabbaṃ.
அபரிக்கி²த்தோதிஇமினா தஸ்ஸேவ கா³மஸ்ஸ நானூபசாரதா த³ஸ்ஸிதா. ஏதேனேவுபாயேன ஸப்³ப³த்த² ஏகூபசாரதா ச நானூபசாரதா ச வேதி³தப்³பா³. பாளியங் பன ‘‘கா³மோ ஏகூபசாரோ நாமா’’தி ஏவங் ஆதி³ம்ஹி ‘‘அஜ்ஜோ²காஸோ ஏகூபசாரோ நாமா’’தி ஏவங் அந்தே ச ஏகமேவ மாதிகாபத³ங் உத்³த⁴ரித்வா பத³பா⁴ஜனங் வித்தா²ரிதங். தஸ்மா தஸ்ஸேவ பத³ஸ்ஸானுஸாரேன ஸப்³ப³த்த² பரிக்கே²பாதி³வஸேன ஏகூபசாரதா ச நானூபசாரதா ச வேதி³தப்³பா³.
Aparikkhittotiiminā tasseva gāmassa nānūpacāratā dassitā. Etenevupāyena sabbattha ekūpacāratā ca nānūpacāratā ca veditabbā. Pāḷiyaṃ pana ‘‘gāmo ekūpacāro nāmā’’ti evaṃ ādimhi ‘‘ajjhokāso ekūpacāro nāmā’’ti evaṃ ante ca ekameva mātikāpadaṃ uddharitvā padabhājanaṃ vitthāritaṃ. Tasmā tasseva padassānusārena sabbattha parikkhepādivasena ekūpacāratā ca nānūpacāratā ca veditabbā.
480-1. நிவேஸனாதீ³ஸு ஓவரகாதி க³ப்³பா⁴னங்யேவேதங் பரியாயவசனங். ஹத்த²பாஸா வாதி க³ப்³ப⁴ஸ்ஸ ஹத்த²பாஸா. த்³வாரமூலே வாதி ஸப்³பே³ஸங் ஸாதா⁴ரணே க⁴ரத்³வாரமூலே. ஹத்த²பாஸா வாதி க³ப்³ப⁴ஸ்ஸ வா க⁴ரத்³வாரமூலஸ்ஸ வா ஹத்த²பாஸா.
480-1.Nivesanādīsuovarakāti gabbhānaṃyevetaṃ pariyāyavacanaṃ. Hatthapāsā vāti gabbhassa hatthapāsā. Dvāramūle vāti sabbesaṃ sādhāraṇe gharadvāramūle. Hatthapāsā vāti gabbhassa vā gharadvāramūlassa vā hatthapāsā.
482-7. உதோ³ஸிதோதி யானாதீ³னங் ப⁴ண்டா³னங் ஸாலா. இதோ பட்டா²ய ச நிவேஸனே வுத்தனயேனேவ வினிச்ச²யோ வேதி³தப்³போ³. அட்டோதி படிராஜாதி³படிபா³ஹனத்த²ங் இட்ட²காஹி கதோ ப³ஹலபி⁴த்திகோ சதுபஞ்சபூ⁴மிகோ பதிஸ்ஸயவிஸேஸோ. மாளோதி ஏககூடஸங்க³ஹிதோ சதுரஸ்ஸபாஸாதோ³. பாஸாதோ³தி தீ³க⁴பாஸாதோ³. ஹம்மியந்தி முண்ட³ச்ச²த³னபாஸாதோ³.
482-7.Udositoti yānādīnaṃ bhaṇḍānaṃ sālā. Ito paṭṭhāya ca nivesane vuttanayeneva vinicchayo veditabbo. Aṭṭoti paṭirājādipaṭibāhanatthaṃ iṭṭhakāhi kato bahalabhittiko catupañcabhūmiko patissayaviseso. Māḷoti ekakūṭasaṅgahito caturassapāsādo. Pāsādoti dīghapāsādo. Hammiyanti muṇḍacchadanapāsādo.
489. ஸத்தப்³ப⁴ந்தராதிஎத்த² ஏகங் அப்³ப⁴ந்தரங் அட்ட²வீஸதிஹத்த²ங் ஹோதி. ஸசே ஸத்தோ² க³ச்ச²ந்தோ கா³மங் வா நதி³ங் வா பரியாதி³யித்வா திட்ட²தி அந்தோபவிட்டே²ன ஸத்³தி⁴ங் ஏகாப³த்³தோ⁴ ஹுத்வா ஓரஞ்ச பாரஞ்ச ப²ரித்வா டி²தோ ஹோதி, ஸத்த²பரிஹாரோவ லப்³ப⁴தி. அத² கா³மே வா நதி³யா வா பரியாபன்னோ ஹோதி அந்தோபவிட்டோ² , கா³மபரிஹாரோ சேவ நதீ³பரிஹாரோ ச லப்³ப⁴தி. ஸசே விஹாரஸீமங் அதிக்கமித்வா திட்ட²தி, அந்தோஸீமாய ச சீவரங் ஹோதி, விஹாரங் க³ந்த்வா வஸிதப்³ப³ங். ஸசே ப³ஹிஸீமாய சீவரங் ஹோதி ஸத்த²ஸமீபேயேவ வஸிதப்³ப³ங். ஸசே க³ச்ச²ந்தோ ஸகடே வா ப⁴க்³கே³ கோ³ணே வா நட்டே² அந்தரா சி²ஜ்ஜதி, யஸ்மிங் கொட்டா²ஸே சீவரங் தத்த² வஸிதப்³ப³ங்.
489.Sattabbhantarātiettha ekaṃ abbhantaraṃ aṭṭhavīsatihatthaṃ hoti. Sace sattho gacchanto gāmaṃ vā nadiṃ vā pariyādiyitvā tiṭṭhati antopaviṭṭhena saddhiṃ ekābaddho hutvā orañca pārañca pharitvā ṭhito hoti, satthaparihārova labbhati. Atha gāme vā nadiyā vā pariyāpanno hoti antopaviṭṭho , gāmaparihāro ceva nadīparihāro ca labbhati. Sace vihārasīmaṃ atikkamitvā tiṭṭhati, antosīmāya ca cīvaraṃ hoti, vihāraṃ gantvā vasitabbaṃ. Sace bahisīmāya cīvaraṃ hoti satthasamīpeyeva vasitabbaṃ. Sace gacchanto sakaṭe vā bhagge goṇe vā naṭṭhe antarā chijjati, yasmiṃ koṭṭhāse cīvaraṃ tattha vasitabbaṃ.
490. ஏககுலஸ்ஸ கெ²த்தே ஹத்த²பாஸோ நாம சீவரஹத்த²பாஸோயேவ, நானாகுலஸ்ஸ கெ²த்தே ஹத்த²பாஸோ நாம கெ²த்தத்³வாரஸ்ஸ ஹத்த²பாஸோ. அபரிக்கி²த்தே சீவரஸ்ஸேவ ஹத்த²பாஸோ.
490. Ekakulassa khette hatthapāso nāma cīvarahatthapāsoyeva, nānākulassa khette hatthapāso nāma khettadvārassa hatthapāso. Aparikkhitte cīvarasseva hatthapāso.
491-4. த⁴ஞ்ஞகரணந்தி க²லங் வுச்சதி. ஆராமோதி புப்பா²ராமோ வா ப²லாராமோ வா. த்³வீஸுபி கெ²த்தே வுத்தஸதி³ஸோவ வினிச்ச²யோ. விஹாரோ நிவேஸனஸதி³ஸோ. ருக்க²மூலே அந்தோசா²யாயந்தி சா²யாய பு²ட்டோ²காஸஸ்ஸ அந்தோ ஏவ. விரளஸாக²ஸ்ஸ பன ருக்க²ஸ்ஸ ஆதபேன பு²ட்டோ²காஸே ட²பிதங் நிஸ்ஸக்³கி³யமேவ ஹோதி, தஸ்மா தாதி³ஸஸ்ஸ ஸாகா²ச்சா²யாய வா க²ந்த⁴ச்சா²யாய வா ட²பேதப்³ப³ங். ஸசே ஸாகா²ய வா விடபே வா ட²பேதி, உபரி அஞ்ஞஸாகா²ச்சா²யாய பு²ட்டோ²காஸேயேவ ட²பேதப்³ப³ங். கு²ஜ்ஜருக்க²ஸ்ஸ சா²யா தூ³ரங் க³ச்ச²தி, சா²யாய க³தட்டா²னே ட²பேதுங் வட்டதியேவ. இதா⁴பி ஹத்த²பாஸோ சீவரஹத்த²பாஸோயேவ.
491-4.Dhaññakaraṇanti khalaṃ vuccati. Ārāmoti pupphārāmo vā phalārāmo vā. Dvīsupi khette vuttasadisova vinicchayo. Vihāro nivesanasadiso. Rukkhamūle antochāyāyanti chāyāya phuṭṭhokāsassa anto eva. Viraḷasākhassa pana rukkhassa ātapena phuṭṭhokāse ṭhapitaṃ nissaggiyameva hoti, tasmā tādisassa sākhācchāyāya vā khandhacchāyāya vā ṭhapetabbaṃ. Sace sākhāya vā viṭape vā ṭhapeti, upari aññasākhācchāyāya phuṭṭhokāseyeva ṭhapetabbaṃ. Khujjarukkhassa chāyā dūraṃ gacchati, chāyāya gataṭṭhāne ṭhapetuṃ vaṭṭatiyeva. Idhāpi hatthapāso cīvarahatthapāsoyeva.
அகா³மகே அரஞ்ஞேதி அகா³மகங் நாம அரஞ்ஞங் விஞ்ஜா²டவீஆதீ³ஸு வா ஸமுத்³த³மஜ்ஜே² வா மச்ச²ப³ந்தா⁴னங் அக³மனபதே² தீ³பகேஸு லப்³ப⁴தி. ஸமந்தா ஸத்தப்³ப⁴ந்தராதி மஜ்ஜே² டி²தஸ்ஸ ஸமத்தா ஸப்³ப³தி³ஸாஸு ஸத்தப்³ப⁴ந்தரா, வினிப்³பே³தே⁴ன சுத்³த³ஸ ஹொந்தி. மஜ்ஜே² நிஸின்னோ புரத்தி²மாய வா பச்சி²மாய வா தி³ஸாய பரியந்தே ட²பிதசீவரங் ரக்க²தி. ஸசே பன அருணுக்³க³மனஸமயே கேஸக்³க³மத்தம்பி புரத்தி²மங் தி³ஸங் க³ச்ச²தி, பச்சி²மாய தி³ஸாய சீவரங் நிஸ்ஸக்³கி³யங் ஹோதி. ஏஸ நயோ இதரஸ்மிங். உபோஸத²காலே பன பரிஸபரியந்தே நிஸின்னபி⁴க்கு²தோ பட்டா²ய ஸத்தப்³ப⁴ந்தரஸீமா ஸோதே⁴தப்³பா³. யத்தகங் பி⁴க்கு²ஸங்கோ⁴ வட்³ட⁴தி, ஸீமாபி தத்தகங் வட்³ட⁴தி.
Agāmake araññeti agāmakaṃ nāma araññaṃ viñjhāṭavīādīsu vā samuddamajjhe vā macchabandhānaṃ agamanapathe dīpakesu labbhati. Samantā sattabbhantarāti majjhe ṭhitassa samattā sabbadisāsu sattabbhantarā, vinibbedhena cuddasa honti. Majjhe nisinno puratthimāya vā pacchimāya vā disāya pariyante ṭhapitacīvaraṃ rakkhati. Sace pana aruṇuggamanasamaye kesaggamattampi puratthimaṃ disaṃ gacchati, pacchimāya disāya cīvaraṃ nissaggiyaṃ hoti. Esa nayo itarasmiṃ. Uposathakāle pana parisapariyante nisinnabhikkhuto paṭṭhāya sattabbhantarasīmā sodhetabbā. Yattakaṃ bhikkhusaṅgho vaḍḍhati, sīmāpi tattakaṃ vaḍḍhati.
495. அனிஸ்ஸஜ்ஜித்வா பரிபு⁴ஞ்ஜதி ஆபத்தி து³க்கடஸ்ஸாதி எத்த² ஸசே பதா⁴னிகோ பி⁴க்கு² ஸப்³ப³ரத்திங் பதா⁴னமனுயுஞ்ஜித்வா பச்சுஸஸமயே ‘‘ந்ஹாயிஸ்ஸாமீ’’தி தீணிபி சீவரானி தீரே ட²பெத்வா நதி³ங் ஓதரதி, ந்ஹாயந்தஸ்ஸேவ சஸ்ஸ அருணங் உட்ட²ஹதி, கிங் காதப்³ப³ங். ஸோ ஹி யதி³ உத்தரித்வா சீவரங் நிவாஸேதி, நிஸ்ஸக்³கி³யசீவரங் அனிஸ்ஸஜ்ஜித்வா பரிபு⁴ஞ்ஜனபச்சயா து³க்கடங் ஆபஜ்ஜதி. அத² நக்³கோ³ க³ச்ச²தி, ஏவம்பி து³க்கடங் ஆபஜ்ஜதீதி? ந ஆபஜ்ஜதி. ஸோ ஹி யாவ அஞ்ஞங் பி⁴க்கு²ங் தி³ஸ்வா வினயகம்மங் ந கரோதி, தாவ தேஸங் சீவரானங் அபரிபோ⁴கா³ரஹத்தா நட்ட²சீவரட்டா²னே டி²தோ ஹோதி. நட்ட²சீவரஸ்ஸ ச அகப்பியங் நாம நத்தி². தஸ்மா ஏகங் நிவாஸெத்வா த்³வே ஹத்தே²ன க³ஹெத்வா விஹாரங் க³ந்த்வா வினயகம்மங் காதப்³ப³ங். ஸசே தூ³ரே விஹாரோ ஹோதி, அந்தராமக்³கே³ மனுஸ்ஸா ஸஞ்சரந்தி. ஏகங் நிவாஸெத்வா ஏகங் பாருபித்வா ஏகங் அங்ஸகூடே ட²பெத்வா க³ந்தப்³ப³ங். ஸசே விஹாரே ஸபா⁴க³பி⁴க்கூ² ந பஸ்ஸதி, பி⁴க்கா²சாரங் க³தா ஹொந்தி, ஸங்கா⁴டிங் ப³ஹிகா³மே ட²பெத்வா ஸந்தருத்தரேன ஆஸனஸாலங் க³ந்த்வா வினயகம்மங் காதப்³ப³ங். ஸசே ப³ஹிகா³மே சோரப⁴யங் ஹோதி, பாருபித்வா க³ந்தப்³ப³ங். ஸசே ஆஸனஸாலா ஸம்பா³தா⁴ ஹோதி ஜனாகிண்ணா, ந ஸக்கா ஏகமந்தே சீவரங் அபனெத்வா வினயகம்மங் காதுங், ஏகங் பி⁴க்கு²ங் ஆதா³ய ப³ஹிகா³மங் க³ந்த்வா வினயகம்மங் கத்வா சீவரானி பரிபு⁴ஞ்ஜிதப்³பா³னி.
495.Anissajjitvā paribhuñjati āpatti dukkaṭassāti ettha sace padhāniko bhikkhu sabbarattiṃ padhānamanuyuñjitvā paccusasamaye ‘‘nhāyissāmī’’ti tīṇipi cīvarāni tīre ṭhapetvā nadiṃ otarati, nhāyantasseva cassa aruṇaṃ uṭṭhahati, kiṃ kātabbaṃ. So hi yadi uttaritvā cīvaraṃ nivāseti, nissaggiyacīvaraṃ anissajjitvā paribhuñjanapaccayā dukkaṭaṃ āpajjati. Atha naggo gacchati, evampi dukkaṭaṃ āpajjatīti? Na āpajjati. So hi yāva aññaṃ bhikkhuṃ disvā vinayakammaṃ na karoti, tāva tesaṃ cīvarānaṃ aparibhogārahattā naṭṭhacīvaraṭṭhāne ṭhito hoti. Naṭṭhacīvarassa ca akappiyaṃ nāma natthi. Tasmā ekaṃ nivāsetvā dve hatthena gahetvā vihāraṃ gantvā vinayakammaṃ kātabbaṃ. Sace dūre vihāro hoti, antarāmagge manussā sañcaranti. Ekaṃ nivāsetvā ekaṃ pārupitvā ekaṃ aṃsakūṭe ṭhapetvā gantabbaṃ. Sace vihāre sabhāgabhikkhū na passati, bhikkhācāraṃ gatā honti, saṅghāṭiṃ bahigāme ṭhapetvā santaruttarena āsanasālaṃ gantvā vinayakammaṃ kātabbaṃ. Sace bahigāme corabhayaṃ hoti, pārupitvā gantabbaṃ. Sace āsanasālā sambādhā hoti janākiṇṇā, na sakkā ekamante cīvaraṃ apanetvā vinayakammaṃ kātuṃ, ekaṃ bhikkhuṃ ādāya bahigāmaṃ gantvā vinayakammaṃ katvā cīvarāni paribhuñjitabbāni.
ஸசே பி⁴க்கூ² த³ஹரானங் ஹத்தே² பத்தசீவரங் த³த்வா மக்³க³ங் க³ச்ச²ந்தா பச்சி²மே யாமே ஸயிதுகாமா ஹொந்தி, அத்தனோ அத்தனோ சீவரங் ஹத்த²பாஸே கத்வாவ ஸயிதப்³ப³ங். ஸசே க³ச்ச²ந்தானங்யேவ அஸம்பத்தேஸு த³ஹரேஸு அருணங் உக்³க³ச்ச²தி, சீவரங் நிஸ்ஸக்³கி³யங் ஹோதி, நிஸ்ஸயோ பன ந படிப்பஸ்ஸம்ப⁴தி, த³ஹரானம்பி புரதோ க³ச்ச²ந்தானங் தே²ரேஸு அஸம்பத்தேஸு ஏஸேவ நயோ. மக்³க³ங் விரஜ்ஜி²த்வா அரஞ்ஞே அஞ்ஞமஞ்ஞங் அபஸ்ஸந்தேஸுபி ஏஸேவ நயோ. ஸசே பன த³ஹரா ‘‘மயங், ப⁴ந்தே, முஹுத்தங் ஸயித்வா அஸுகஸ்மிங் நாம ஓகாஸே தும்ஹே ஸம்பாபுணிஸ்ஸாமா’’தி வத்வா யாவ அருணுக்³க³மனா ஸயந்தி, சீவரஞ்ச நிஸ்ஸக்³கி³யங் ஹோதி, நிஸ்ஸயோ ச படிப்பஸ்ஸம்ப⁴தி, த³ஹரே உய்யோஜெத்வா தே²ரேஸு ஸயந்தேஸுபி ஏஸேவ நயோ. த்³வேதா⁴பத²ங் தி³ஸ்வா தே²ரா ‘‘அயங் மக்³கோ³’’ த³ஹரா ‘‘அயங் மக்³கோ³’’தி வத்வா அஞ்ஞமஞ்ஞஸ்ஸ வசனங் அக்³க³ஹெத்வா க³தா, ஸஹ அருணுக்³க³மனா சீவரானி ச நிஸ்ஸக்³கி³யானி ஹொந்தி , நிஸ்ஸயோ ச படிப்பஸ்ஸம்ப⁴தி. ஸசே த³ஹரா மக்³க³தோ ஓக்கம்ம ‘‘அந்தோஅருணேயேவ நிவத்திஸ்ஸாமா’’தி பே⁴ஸஜ்ஜத்தா²ய கா³மங் பவிஸித்வா ஆக³ச்ச²ந்தி. அஸம்பத்தானங்யேவ ச தேஸங் அருணோ உக்³க³ச்ச²தி, சீவரானி நிஸ்ஸக்³கி³யானி ஹொந்தி, நிஸ்ஸயோ பன ந படிப்பஸ்ஸம்ப⁴தி. ஸசே பன தே⁴னுப⁴யேன வா ஸுனக²ப⁴யேன வா ‘‘முஹுத்தங் ட²த்வா க³மிஸ்ஸாமா’’தி ட²த்வா வா நிஸீதி³த்வா வா க³ச்ச²ந்தி, அந்தரா அருணே உக்³க³தே சீவரானி நிஸ்ஸக்³கி³யானி ஹொந்தி, நிஸ்ஸயோ ச படிப்பஸ்ஸம்ப⁴தி. ஸசே ‘‘அந்தோஅருணேயேவ ஆக³மிஸ்ஸாமா’’தி அந்தோஸீமாயங் கா³மங் பவிட்டா²னங் அந்தரா அருணோ உக்³க³ச்ச²தி, நேவ சீவரானி நிஸ்ஸக்³கி³யானி ஹொந்தி, ந நிஸ்ஸயோ படிப்பஸ்ஸம்ப⁴தி. ஸசே பன ‘‘விபா⁴யது தாவா’’தி நிஸீத³ந்தி, அருணே உக்³க³தேபி ந சீவரானி நிஸ்ஸக்³கி³யானி ஹொந்தி, நிஸ்ஸயோ பன படிப்பஸ்ஸம்ப⁴தி. யேபி ‘‘அந்தோஅருணேயேவ ஆக³மிஸ்ஸாமா’’தி ஸாமந்தவிஹாரங் த⁴ம்மஸவனத்தா²ய ஸஉஸ்ஸாஹா க³ச்ச²ந்தி, அந்தராமக்³கே³யேவ ச நேஸங் அருணோ உக்³க³ச்ச²தி, சீவரானி நிஸ்ஸக்³கி³யானி ஹொந்தி, நிஸ்ஸயோ பன ந படிப்பஸ்ஸம்ப⁴தி. ஸசே த⁴ம்மகா³ரவேன ‘‘யாவ பரியோஸானங் ஸுத்வாவ க³மிஸ்ஸாமா’’தி நிஸீத³ந்தி, ஸஹ அருணஸ்ஸுக்³க³மனா சீவரானிபி நிஸ்ஸக்³கி³யானி ஹொந்தி, நிஸ்ஸயோபி படிப்பஸ்ஸம்ப⁴தி. தே²ரேன த³ஹரங் சீவரதோ⁴வனத்தா²ய கா³மகங் பேஸெந்தேன அத்தனோ சீவரங் பச்சுத்³த⁴ரித்வாவ தா³தப்³ப³ங். த³ஹரஸ்ஸாபி சீவரங் பச்சுத்³த⁴ராபெத்வா ட²பேதப்³ப³ங். ஸசே அஸ்ஸதியா க³ச்ச²தி, அத்தனோ சீவரங் பச்சுத்³த⁴ரித்வா த³ஹரஸ்ஸ சீவரங் விஸ்ஸாஸேன க³ஹெத்வா ட²பேதப்³ப³ங். ஸசே தே²ரோ நஸ்ஸரதி, த³ஹரோ ஏவ ஸரதி, த³ஹரேன அத்தனோ சீவரங் பச்சுத்³த⁴ரித்வா தே²ரஸ்ஸ சீவரங் விஸ்ஸாஸேன க³ஹெத்வா க³ந்த்வா வத்தப்³போ³ ‘‘ப⁴ந்தே, தும்ஹாகங் சீவரங் அதி⁴ட்ட²ஹித்வா பரிபு⁴ஞ்ஜதா²’’தி அத்தனோபி சீவரங் அதி⁴ட்டா²தப்³ப³ங். ஏவங் ஏகஸ்ஸ ஸதியாபி ஆபத்திமொக்கோ² ஹோதீதி. ஸேஸங் உத்தானத்த²மேவ .
Sace bhikkhū daharānaṃ hatthe pattacīvaraṃ datvā maggaṃ gacchantā pacchime yāme sayitukāmā honti, attano attano cīvaraṃ hatthapāse katvāva sayitabbaṃ. Sace gacchantānaṃyeva asampattesu daharesu aruṇaṃ uggacchati, cīvaraṃ nissaggiyaṃ hoti, nissayo pana na paṭippassambhati, daharānampi purato gacchantānaṃ theresu asampattesu eseva nayo. Maggaṃ virajjhitvā araññe aññamaññaṃ apassantesupi eseva nayo. Sace pana daharā ‘‘mayaṃ, bhante, muhuttaṃ sayitvā asukasmiṃ nāma okāse tumhe sampāpuṇissāmā’’ti vatvā yāva aruṇuggamanā sayanti, cīvarañca nissaggiyaṃ hoti, nissayo ca paṭippassambhati, dahare uyyojetvā theresu sayantesupi eseva nayo. Dvedhāpathaṃ disvā therā ‘‘ayaṃ maggo’’ daharā ‘‘ayaṃ maggo’’ti vatvā aññamaññassa vacanaṃ aggahetvā gatā, saha aruṇuggamanā cīvarāni ca nissaggiyāni honti , nissayo ca paṭippassambhati. Sace daharā maggato okkamma ‘‘antoaruṇeyeva nivattissāmā’’ti bhesajjatthāya gāmaṃ pavisitvā āgacchanti. Asampattānaṃyeva ca tesaṃ aruṇo uggacchati, cīvarāni nissaggiyāni honti, nissayo pana na paṭippassambhati. Sace pana dhenubhayena vā sunakhabhayena vā ‘‘muhuttaṃ ṭhatvā gamissāmā’’ti ṭhatvā vā nisīditvā vā gacchanti, antarā aruṇe uggate cīvarāni nissaggiyāni honti, nissayo ca paṭippassambhati. Sace ‘‘antoaruṇeyeva āgamissāmā’’ti antosīmāyaṃ gāmaṃ paviṭṭhānaṃ antarā aruṇo uggacchati, neva cīvarāni nissaggiyāni honti, na nissayo paṭippassambhati. Sace pana ‘‘vibhāyatu tāvā’’ti nisīdanti, aruṇe uggatepi na cīvarāni nissaggiyāni honti, nissayo pana paṭippassambhati. Yepi ‘‘antoaruṇeyeva āgamissāmā’’ti sāmantavihāraṃ dhammasavanatthāya saussāhā gacchanti, antarāmaggeyeva ca nesaṃ aruṇo uggacchati, cīvarāni nissaggiyāni honti, nissayo pana na paṭippassambhati. Sace dhammagāravena ‘‘yāva pariyosānaṃ sutvāva gamissāmā’’ti nisīdanti, saha aruṇassuggamanā cīvarānipi nissaggiyāni honti, nissayopi paṭippassambhati. Therena daharaṃ cīvaradhovanatthāya gāmakaṃ pesentena attano cīvaraṃ paccuddharitvāva dātabbaṃ. Daharassāpi cīvaraṃ paccuddharāpetvā ṭhapetabbaṃ. Sace assatiyā gacchati, attano cīvaraṃ paccuddharitvā daharassa cīvaraṃ vissāsena gahetvā ṭhapetabbaṃ. Sace thero nassarati, daharo eva sarati, daharena attano cīvaraṃ paccuddharitvā therassa cīvaraṃ vissāsena gahetvā gantvā vattabbo ‘‘bhante, tumhākaṃ cīvaraṃ adhiṭṭhahitvā paribhuñjathā’’ti attanopi cīvaraṃ adhiṭṭhātabbaṃ. Evaṃ ekassa satiyāpi āpattimokkho hotīti. Sesaṃ uttānatthameva .
ஸமுட்டா²னாதீ³ஸு பட²மகதி²னஸிக்கா²பதே³ அனதி⁴ட்டா²னங் அவிகப்பனஞ்ச அகிரியங், இத⁴ அபச்சுத்³த⁴ரணங் அயமேவ விஸேஸோ. ஸேஸங் ஸப்³ப³த்த² வுத்தனயமேவாதி.
Samuṭṭhānādīsu paṭhamakathinasikkhāpade anadhiṭṭhānaṃ avikappanañca akiriyaṃ, idha apaccuddharaṇaṃ ayameva viseso. Sesaṃ sabbattha vuttanayamevāti.
உதோ³ஸிதஸிக்கா²பத³வண்ணனா நிட்டி²தா.
Udositasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. உதோ³ஸிதஸிக்கா²பத³ங் • 2. Udositasikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. உதோ³ஸிதஸிக்கா²பத³வண்ணனா • 2. Udositasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. உதோ³ஸிதஸிக்கா²பத³வண்ணனா • 2. Udositasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. உதோ³ஸிதஸிக்கா²பத³வண்ணனா • 2. Udositasikkhāpadavaṇṇanā
