| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
2. உதோ³ஸிதஸிக்கா²பத³வண்ணனா
2. Udositasikkhāpadavaṇṇanā
‘‘அத்த²தகதி²னஸ்ஸ பஞ்ச மாஸே ப³த்³த⁴ஸீமாயங் யத்த² கத்த²சி சீவரங் நிக்கி²பித்வா பக்கமந்தஸ்ஸ அனாபத்தீ’’தி அட்ட²கதா²யங் வுத்தங். ‘‘அப³த்³த⁴ஸீமாயபி வட்டதீ’’தி இத³ங் அப³த்³த⁴ஸீமாயங் கதி²னத்தா²ரஞ்ச ஆரஞ்ஞகஸிக்கா²பத³ஞ்ச ஸாதே⁴தீதி லிகி²தங். இதா³னி –
‘‘Atthatakathinassa pañca māse baddhasīmāyaṃ yattha katthaci cīvaraṃ nikkhipitvā pakkamantassa anāpattī’’ti aṭṭhakathāyaṃ vuttaṃ. ‘‘Abaddhasīmāyapi vaṭṭatī’’ti idaṃ abaddhasīmāyaṃ kathinatthārañca āraññakasikkhāpadañca sādhetīti likhitaṃ. Idāni –
‘‘சி²ன்னங் து⁴தங்க³ங் ஸாஸங்க-ஸம்மதோ ஸந்தருத்தரங்;
‘‘Chinnaṃ dhutaṅgaṃ sāsaṅka-sammato santaruttaraṃ;
அசீவரஸ்ஸானாபத்தி, பச்சுத்³தா⁴ராதி³ஸித்³தி⁴தோ’’தி. (வஜிர॰ டீ॰ பாராஜிக 479) –
Acīvarassānāpatti, paccuddhārādisiddhito’’ti. (vajira. ṭī. pārājika 479) –
இத³ங் பகிண்ணகங் வேதி³தப்³ப³ங்.
Idaṃ pakiṇṇakaṃ veditabbaṃ.
தத்ராயங் சோத³னாபுப்³ப³ங்க³மவினிச்ச²யோ – கேசி ‘‘தி³கு³ணங் ஸங்கா⁴டி’’ந்தி (மஹாவ॰ 348) வசனதோ ‘‘ஏகச்சிகா ஸங்கா⁴டி நாதி⁴ட்டா²தப்³பா³. ஸசே அதி⁴ட்டா²தி, ந ருஹதீ’’தி வத்வா உபஸம்பதா³பெக்கா²னம்பி தி³கு³ணங்யேவ ஸங்கா⁴டிங் த³த்வா உபஸம்பாதெ³ந்தி, தே இமினா ஸுத்தலேஸேன ஸஞ்ஞாபேதப்³பா³. ப⁴க³வதா ஹி ‘‘சி²ன்னகங் ஸங்கா⁴டிங், சி²ன்னகங் உத்தராஸங்க³ங், சி²ன்னகங் அந்தரவாஸக’’ந்தி பட²மங் அனுஞ்ஞாதங். ததோ ‘‘அஞ்ஞதரஸ்ஸ பி⁴க்கு²னோ திசீவரே கரியமானே ஸப்³ப³ங் சி²ன்னகங் நப்பஹோதி. த்³வே சி²ன்னகானி ஏகங் அசி²ன்னகங் நப்பஹோதி, த்³வே அசி²ன்னகானி ஏகங் சி²ன்னகங் நப்பஹோதீ’’தி இமஸ்மிங் வத்து²ஸ்மிங் ‘‘அனுஜானாமி, பி⁴க்க²வே, அன்வாதி⁴கம்பி ஆரோபேது’’ந்தி (மஹாவ॰ 360) அனுஞ்ஞாதங், தஸ்மா ஏகச்சிகாபி ஸங்கா⁴டி வட்டதீதி ஸித்³த⁴ங். யா சி²ஜ்ஜமானாபி நப்பஹோதி, தஸ்ஸா குதோ தி³கு³ணதாதி? அட்ட²கதா²யம்பிஸ்ஸ வுத்தங் ‘‘அன்வாதி⁴கம்பி ஆரோபேதுந்தி ஆக³ந்துகபத்தம்பி தா³துங், இத³ங் பன அப்பஹோனகே ஆரோபேதப்³ப³ங். ஸசே பஹோதி, ஆக³ந்துகபத்தங் ந வட்டதி, சி²ந்தி³தப்³ப³மேவா’’தி (மஹாவ॰ அட்ட²॰ 360). கதி²னங் பன சி²ன்னகமேவ வட்டதி, ஆவேணிகலக்க²ணத்தா, ‘‘சி²ன்னகங் தி³கு³ணங் நப்பஹோதீ’’தி வசனாபா⁴வதோ சாதி ஸன்னிட்டா²னமெத்த² க³ந்தப்³ப³ந்தி.
Tatrāyaṃ codanāpubbaṅgamavinicchayo – keci ‘‘diguṇaṃ saṅghāṭi’’nti (mahāva. 348) vacanato ‘‘ekaccikā saṅghāṭi nādhiṭṭhātabbā. Sace adhiṭṭhāti, na ruhatī’’ti vatvā upasampadāpekkhānampi diguṇaṃyeva saṅghāṭiṃ datvā upasampādenti, te iminā suttalesena saññāpetabbā. Bhagavatā hi ‘‘chinnakaṃ saṅghāṭiṃ, chinnakaṃ uttarāsaṅgaṃ, chinnakaṃ antaravāsaka’’nti paṭhamaṃ anuññātaṃ. Tato ‘‘aññatarassa bhikkhuno ticīvare kariyamāne sabbaṃ chinnakaṃ nappahoti. Dve chinnakāni ekaṃ achinnakaṃ nappahoti, dve achinnakāni ekaṃ chinnakaṃ nappahotī’’ti imasmiṃ vatthusmiṃ ‘‘anujānāmi, bhikkhave, anvādhikampi āropetu’’nti (mahāva. 360) anuññātaṃ, tasmā ekaccikāpi saṅghāṭi vaṭṭatīti siddhaṃ. Yā chijjamānāpi nappahoti, tassā kuto diguṇatāti? Aṭṭhakathāyampissa vuttaṃ ‘‘anvādhikampi āropetunti āgantukapattampi dātuṃ, idaṃ pana appahonake āropetabbaṃ. Sace pahoti, āgantukapattaṃ na vaṭṭati, chinditabbamevā’’ti (mahāva. aṭṭha. 360). Kathinaṃ pana chinnakameva vaṭṭati, āveṇikalakkhaṇattā, ‘‘chinnakaṃ diguṇaṃ nappahotī’’ti vacanābhāvato cāti sanniṭṭhānamettha gantabbanti.
து⁴தங்க³ந்தி அனுபஸம்பன்னானங் தேசீவரிகது⁴தங்கா³பா⁴வதோ திசீவரேனேவ தேசீவரிகோதி, தேஸங் அதி⁴ட்டா²னாபா⁴வதோ ‘‘அதி⁴ட்டி²தேனேவா’’தி வத்தப்³ப³ங் ஹோதூதி சே? ந, து⁴தங்க³பே⁴தே³ன விரோத⁴ப்பஸங்க³தோ. சதுத்த²சீவரஸாதி³யனேன ஹி து⁴தங்க³பே⁴தோ³, ந திசீவரவிப்பவாஸேன, நாபி அதிரேகசீவரஸாதி³யனேன, நாபி அதிரேகசீவரதா⁴ரணேன. யஸ்மா பன பி⁴க்கூ²னங் ஏவ ப⁴க³வதா அதி⁴ட்டா²னவஸேன நவ சீவரானி அனுஞ்ஞாதானி, ஜாதிவஸேன ச வுத்தானி, ந ஏவங் அனுபஸம்பன்னானங், தஸ்மா நேஸங் சீவரனியமாபா⁴வா ந தங் து⁴தங்க³ங் அனுஞ்ஞாதங் க³ஹட்டா²னங் விய. தஸ்மா தஸ்ஸ ஸமாதா³னவிதா⁴னே அவசனதோ ச ஸன்னிட்டா²னமெத்த² க³ந்தப்³ப³ந்தி.
Dhutaṅganti anupasampannānaṃ tecīvarikadhutaṅgābhāvato ticīvareneva tecīvarikoti, tesaṃ adhiṭṭhānābhāvato ‘‘adhiṭṭhitenevā’’ti vattabbaṃ hotūti ce? Na, dhutaṅgabhedena virodhappasaṅgato. Catutthacīvarasādiyanena hi dhutaṅgabhedo, na ticīvaravippavāsena, nāpi atirekacīvarasādiyanena, nāpi atirekacīvaradhāraṇena. Yasmā pana bhikkhūnaṃ eva bhagavatā adhiṭṭhānavasena nava cīvarāni anuññātāni, jātivasena ca vuttāni, na evaṃ anupasampannānaṃ, tasmā nesaṃ cīvaraniyamābhāvā na taṃ dhutaṅgaṃ anuññātaṃ gahaṭṭhānaṃ viya. Tasmā tassa samādānavidhāne avacanato ca sanniṭṭhānamettha gantabbanti.
ஸாஸங்கஸம்மதோதி கங்கா²விதரணியங் (கங்கா²॰ அட்ட²॰ ஸாஸங்கஸிக்கா²பத³வண்ணனா) ஸாஸங்கஸிக்கா²பதே³ விஸுங் அங்கா³னி ந வுத்தானி, ‘‘ஸேஸமெத்த² சீவரவக்³க³ஸ்ஸ து³தியஸிக்கா²பதே³ வுத்தனயேனேவ வேதி³தப்³ப³’’ந்தி வுத்தங், ந ச பனேதங் வுத்தங். தத்த² ரத்திவிப்பவாஸோ சதுத்த²மங்க³ங், இத⁴ சா²ரத்தவிப்பவாஸோ, அயமெத்த² விஸேஸோதி. தஸ்மா அங்க³ஸாமஞ்ஞதோ ச ஸம்முதிஸாமஞ்ஞதோ ச ஸாஸங்கஸிக்கா²பத³மேவித³ந்தி இத³ங் நிப்பதே³ஸங், தங் ஸப்பதே³ஸங் மாஸபரமத்தா. தத்த² ப³ஹிகா³மேபி கா³மஸீமங் ஓக்கமித்வா வஸித்வா பக்கமந்தஸ்ஸ அனாபத்தி, இத⁴ ந ததா². இத⁴ அனந்தரே அனந்தரே அருணுக்³க³மனே நிஸ்ஸக்³கி³யங், தத்த² ஸத்தமேதி அயங் இமேஸங் த்³வின்னங் விஸேஸோ. அங்கா³னி பன சீவரனிக்கே²பனங்க³ஸம்பத்திதோ விபரியாயேன, இத⁴ வுத்தனயேன ச ஸித்³த⁴த்தா ந வுத்தானி. தானி காமங் ந வுத்தானி, ததா²பி சதுத்த²மங்க³ங் விஸேஸிதப்³ப³ங், ந பன விஸேஸிதங். கிங் காரணங்? இத⁴ வுத்தனிஸ்ஸஜ்ஜனக்கமேன நிஸ்ஸஜ்ஜித்வா ஆபத்திதே³ஸனதோ, தத்தா²பன்னாபத்திவிமொக்க²தீ³பனத்த²ங். ஸங்வச்ச²ரவிப்பவுத்த²ம்பி ரத்திவிப்பவுத்த²மேவ, பகே³வ சா²ரத்தவிப்பவுத்த²ங். ஏவங் ஸந்தேபி தத்த² யதா²வுத்தஅங்க³ஸம்பத்தியா ஸதி தத்த² வுத்தனயேனேவ நிஸ்ஸஜ்ஜிதப்³ப³ங். ஹேமந்தே, கி³ம்ஹே வா நிஸ்ஸஜ்ஜதி சே? இத⁴ வுத்தனயேனாபி நிஸ்ஸஜ்ஜிதுங் வட்டதீதி ஞாபனத்த²ங் சதுத்த²மங்க³ங் ந விஸேஸிதந்தி நோ தக்கோதி ஆசரியோ. மாஸாதிக்கந்தங், த³ஸாஹாதிக்கந்தம்பி சீவரங் ‘‘த³ஸாஹாதிக்கந்த’’ந்தி வத்வா நிஸ்ஸட்ட²மேவ, ந ஊனமாஸங் ஹுத்வா ‘‘த³ஸாஹாதிக்கந்த’’ந்தி வத்வா, மாஸாதிக்கந்த’’ந்தி வத்வாதி ஏகே. ததா²பி ஸசே பச்சாஸாசீவரங் ஹோதி, நிஸ்ஸக்³கி³யங். ‘‘த³ஸாஹாதிக்கந்த’’ந்தி வத்வா மூலசீவரங் பன ‘‘மாஸாதிக்கந்த’’ந்தி வத்வா நிஸ்ஸஜ்ஜிதப்³ப³ங்.
Sāsaṅkasammatoti kaṅkhāvitaraṇiyaṃ (kaṅkhā. aṭṭha. sāsaṅkasikkhāpadavaṇṇanā) sāsaṅkasikkhāpade visuṃ aṅgāni na vuttāni, ‘‘sesamettha cīvaravaggassa dutiyasikkhāpade vuttanayeneva veditabba’’nti vuttaṃ, na ca panetaṃ vuttaṃ. Tattha rattivippavāso catutthamaṅgaṃ, idha chārattavippavāso, ayamettha visesoti. Tasmā aṅgasāmaññato ca sammutisāmaññato ca sāsaṅkasikkhāpadamevidanti idaṃ nippadesaṃ, taṃ sappadesaṃ māsaparamattā. Tattha bahigāmepi gāmasīmaṃ okkamitvā vasitvā pakkamantassa anāpatti, idha na tathā. Idha anantare anantare aruṇuggamane nissaggiyaṃ, tattha sattameti ayaṃ imesaṃ dvinnaṃ viseso. Aṅgāni pana cīvaranikkhepanaṅgasampattito vipariyāyena, idha vuttanayena ca siddhattā na vuttāni. Tāni kāmaṃ na vuttāni, tathāpi catutthamaṅgaṃ visesitabbaṃ, na pana visesitaṃ. Kiṃ kāraṇaṃ? Idha vuttanissajjanakkamena nissajjitvā āpattidesanato, tatthāpannāpattivimokkhadīpanatthaṃ. Saṃvaccharavippavutthampi rattivippavutthameva, pageva chārattavippavutthaṃ. Evaṃ santepi tattha yathāvuttaaṅgasampattiyā sati tattha vuttanayeneva nissajjitabbaṃ. Hemante, gimhe vā nissajjati ce? Idha vuttanayenāpi nissajjituṃ vaṭṭatīti ñāpanatthaṃ catutthamaṅgaṃ na visesitanti no takkoti ācariyo. Māsātikkantaṃ, dasāhātikkantampi cīvaraṃ ‘‘dasāhātikkanta’’nti vatvā nissaṭṭhameva, na ūnamāsaṃ hutvā ‘‘dasāhātikkanta’’nti vatvā, māsātikkanta’’nti vatvāti eke. Tathāpi sace paccāsācīvaraṃ hoti, nissaggiyaṃ. ‘‘Dasāhātikkanta’’nti vatvā mūlacīvaraṃ pana ‘‘māsātikkanta’’nti vatvā nissajjitabbaṃ.
‘‘ஸந்தருத்தர’’ந்தி வா ‘‘ஸங்கா⁴டி’’ந்தி வா ‘‘சீவர’’ந்தி வா கிங் திசீவரங், உதா³ஹு அஞ்ஞம்பீதி? கிஞ்செத்த² – யதி³ திசீவரமேவ படிஸித்³த⁴ங், பரியாபன்னவஸேன அச்சி²ன்னசீவரஅஅச²ந்த³னதோ⁴வாபனவிஞ்ஞத்திஆதி³விரோதோ⁴. அத² அஞ்ஞம்பி ‘‘நிட்டி²தசீவரஸ்மி’’ந்தி ஏவமாதி³னா விரோதோ⁴தி? வுச்சதே – ந நியமதோ வேதி³தப்³ப³ங் யதா²ஸம்ப⁴வங் க³ஹேதப்³ப³தோ. ததா² ஹி ‘‘சீவரங் நிக்கி²பித்வா ஸந்தருத்தரேன ஜனபத³சாரிகங் பக்கமந்தீ’’தி (பாரா॰ 471) ஏவமாதீ³ஸு திசீவரமேவ, ‘‘ந, பி⁴க்க²வே, ஸந்தருத்தரேன கா³மோ பவிஸிதப்³போ³ (மஹாவ॰ 362), ஸந்தருத்தரபரமங் ததோ சீவரங் ஸாதி³தப்³ப³’’ந்தி (பாரா॰ 523-524) ஏவமாதீ³ஸு யங் கிஞ்சி, ததா² ‘‘ஸகு³ணங் கத்வா ஸங்கா⁴டியோ தா³தப்³பா³, நிவாஸனங் தா³தப்³ப³ங், ஸங்கா⁴டி தா³தப்³பா³, ஹந்த³ தே, ஆவுஸோ , ஸங்கா⁴டி, தே³ஹி மே பட’’ந்தி ஏவமாதீ³ஸு. வுத்தஞ்ஹேதங் ‘‘ஸப்³ப³ஞ்ஹி சீவரங் ஸங்க⁴டிதட்டே²ன ‘ஸங்கா⁴டீ’தி வுச்சதீ’’தி (பாசி॰ அட்ட²॰ 898). ததா² ‘‘நிட்டி²தசீவரஸ்மி’’ந்தி எத்தா²பீதி ஏகே. அந்தோஸமயே யாவத³த்த²ங் சீவரங் அனுஞ்ஞாதங், தங் ஸப்³ப³ங் கரியமானங் கதா³ நிட்டா²னங் க³ச்சி²ஸ்ஸதி, தஸ்மா திசீவரமேவாதி ஏகே.
‘‘Santaruttara’’nti vā ‘‘saṅghāṭi’’nti vā ‘‘cīvara’’nti vā kiṃ ticīvaraṃ, udāhu aññampīti? Kiñcettha – yadi ticīvarameva paṭisiddhaṃ, pariyāpannavasena acchinnacīvaraaachandanadhovāpanaviññattiādivirodho. Atha aññampi ‘‘niṭṭhitacīvarasmi’’nti evamādinā virodhoti? Vuccate – na niyamato veditabbaṃ yathāsambhavaṃ gahetabbato. Tathā hi ‘‘cīvaraṃ nikkhipitvā santaruttarena janapadacārikaṃ pakkamantī’’ti (pārā. 471) evamādīsu ticīvarameva, ‘‘na, bhikkhave, santaruttarena gāmo pavisitabbo (mahāva. 362), santaruttaraparamaṃ tato cīvaraṃ sāditabba’’nti (pārā. 523-524) evamādīsu yaṃ kiñci, tathā ‘‘saguṇaṃ katvā saṅghāṭiyo dātabbā, nivāsanaṃ dātabbaṃ, saṅghāṭi dātabbā, handa te, āvuso , saṅghāṭi, dehi me paṭa’’nti evamādīsu. Vuttañhetaṃ ‘‘sabbañhi cīvaraṃ saṅghaṭitaṭṭhena ‘saṅghāṭī’ti vuccatī’’ti (pāci. aṭṭha. 898). Tathā ‘‘niṭṭhitacīvarasmi’’nti etthāpīti eke. Antosamaye yāvadatthaṃ cīvaraṃ anuññātaṃ, taṃ sabbaṃ kariyamānaṃ kadā niṭṭhānaṃ gacchissati, tasmā ticīvaramevāti eke.
அசீவரஸ்ஸானாபத்தி பச்சுத்³தா⁴ராதி³ஸித்³தி⁴தோதி கிங் வுத்தங் ஹோதி – உதோ³ஸிதஸிக்கா²பத³ஸ்ஸ நிப்பயோஜனபா⁴வப்பஸங்க³தோ திசீவரவிப்பவாஸே தேசீவரஸ்ஸ ஆபத்தீதி ஏகே. தத்தே²தங் வுச்சதி ந ஹோதி ஆபத்தி பச்சுத்³தா⁴ராதி³ஸித்³தி⁴தோ. ‘‘அனாபத்தி அந்தோஅருணே பச்சுத்³த⁴ரதி விஸ்ஸஜ்ஜேதீ’’தி (பாரா॰ 496) ஹி வுத்தங். அஞ்ஞதா² பச்சுத்³த⁴ரந்தஸ்ஸ, அந்தோஅருணே விஸ்ஸஜ்ஜெந்தஸ்ஸ ச யாவ அஞ்ஞோ நாதி⁴ட்டா²தி, தாவ ஆபத்திங் ஆபஜ்ஜதி யதா²வுத்தனயேனேவ. அஞ்ஞதா² ஸத்தப்³ப⁴ந்தரேன விப்பவாஸஸ்ஸாதி விப்பவாஸதோ யதா²ருதங்யேவ ஸதி விப்பவாஸே விப்பவாஸதோ, அவிப்பவாஸே ஸதி அவிப்பவாஸதோதி.
Acīvarassānāpattipaccuddhārādisiddhitoti kiṃ vuttaṃ hoti – udositasikkhāpadassa nippayojanabhāvappasaṅgato ticīvaravippavāse tecīvarassa āpattīti eke. Tatthetaṃ vuccati na hoti āpatti paccuddhārādisiddhito. ‘‘Anāpatti antoaruṇe paccuddharati vissajjetī’’ti (pārā. 496) hi vuttaṃ. Aññathā paccuddharantassa, antoaruṇe vissajjentassa ca yāva añño nādhiṭṭhāti, tāva āpattiṃ āpajjati yathāvuttanayeneva. Aññathā sattabbhantarena vippavāsassāti vippavāsato yathārutaṃyeva sati vippavāse vippavāsato, avippavāse sati avippavāsatoti.
உதோ³ஸிதஸிக்கா²பத³வண்ணனா நிட்டி²தா.
Udositasikkhāpadavaṇṇanā niṭṭhitā.
