| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
2. உதோ³ஸிதஸிக்கா²பத³வண்ணனா
2. Udositasikkhāpadavaṇṇanā
471-473. து³தியே அதா²னந்த³த்தே²ரோ கத²ங் ஓகாஸங் படிலப⁴தி, கிங் கரொந்தோ ச ஆஹிண்ட³தீதி ஆஹ ‘‘தே²ரோ கிரா’’திஆதி³. அவிப்பவாஸேதி நிமித்தத்தே² பு⁴ம்மங், அவிப்பவாஸத்த²ந்தி அத்தோ², விப்பவாஸபச்சயா யா ஆபத்தி, தத³பா⁴வத்த²ந்தி வுத்தங் ஹோதி.
471-473. Dutiye athānandatthero kathaṃ okāsaṃ paṭilabhati, kiṃ karonto ca āhiṇḍatīti āha ‘‘thero kirā’’tiādi. Avippavāseti nimittatthe bhummaṃ, avippavāsatthanti attho, vippavāsapaccayā yā āpatti, tadabhāvatthanti vuttaṃ hoti.
475-476. ஏவங் சி²ன்னபலிபோ³தோ⁴தி ஏவங் இமேஹி சீவரனிட்டா²னகதி²னுப்³பா⁴ரேஹி சி²ன்னபலிபோ³தோ⁴. அதி⁴ட்டி²தேஸூதி திசீவராதி⁴ட்டா²னநயேன அதி⁴ட்டி²தேஸு. திசீவரேன விப்பவுத்தோ² ஹோதீதி ‘‘ருக்கோ² சி²ன்னோ, படோ த³ட்³டோ⁴’’திஆதீ³ஸு விய அவயவேபி ஸமுதா³யவோஹாரோ லப்³ப⁴தீதி வுத்தங்.
475-476.Evaṃ chinnapalibodhoti evaṃ imehi cīvaraniṭṭhānakathinubbhārehi chinnapalibodho. Adhiṭṭhitesūti ticīvarādhiṭṭhānanayena adhiṭṭhitesu. Ticīvarena vippavuttho hotīti ‘‘rukkho chinno, paṭo daḍḍho’’tiādīsu viya avayavepi samudāyavohāro labbhatīti vuttaṃ.
477-478. பரிகா²ய வா பரிக்கி²த்தோதி இமினா ச ஸமந்தா நதீ³தளாகாதி³உத³கேன பரிக்கி²த்தோபி பரிக்கி²த்தோயேவாதி த³ஸ்ஸேதி. எத்தாவதாதி ‘‘பரிக்கி²த்தோ’’தி இமினா வசனேன. ஆகாஸே அருணங் உட்டா²பேதீதி க⁴ரஸ்ஸ உபரி ஆகாஸே அட்³ட⁴தெய்யரதனப்பமாணங் அதிக்கமித்வா அருணங் உட்டா²பேதி. க⁴ரங் நிவேஸனுதோ³ஸிதாதி³லக்க²ணமேவ, ந பன பாடியேக்கங் க⁴ரங் நாம அத்தீ²தி ஆஹ ‘‘எத்த² சா’’திஆதி³.
477-478.Parikhāyavā parikkhittoti iminā ca samantā nadītaḷākādiudakena parikkhittopi parikkhittoyevāti dasseti. Ettāvatāti ‘‘parikkhitto’’ti iminā vacanena. Ākāse aruṇaṃ uṭṭhāpetīti gharassa upari ākāse aḍḍhateyyaratanappamāṇaṃ atikkamitvā aruṇaṃ uṭṭhāpeti. Gharaṃ nivesanudositādilakkhaṇameva, na pana pāṭiyekkaṃ gharaṃ nāma atthīti āha ‘‘ettha cā’’tiādi.
479. பாளியங் வுத்தனயேன ‘‘ஸபா⁴யே’’தி அவத்வா ‘‘ஸபா⁴ய’’ந்தி பச்சத்தவசனங் ஸபா⁴ய-ஸத்³த³ஸ்ஸ நபுங்ஸகலிங்க³தாவிபா⁴வனத்த²ங் வுத்தங். ஸபா⁴-ஸத்³த³பரியாயோபி ஹி ஸபா⁴ய-ஸத்³தோ³ நபுங்ஸகலிங்க³யுத்தோ இத⁴ வுத்தோதி இமமத்த²ங் த³ஸ்ஸெந்தோ ‘‘லிங்க³ப்³யத்தயேன ஸபா⁴ வுத்தா’’தி ஆஹ. சீவரஹத்த²பாஸே வஸிதப்³ப³ங் நத்தீ²தி சீவரஹத்த²பாஸேயேவ வஸிதப்³ப³ந்தி நத்தி². யங் தஸ்ஸா…பே॰… ந விஜஹிதப்³ப³ந்தி எத்த² தஸ்ஸா வீதி²யா ஸம்முக²ட்டா²னே ஸபா⁴யத்³வாரானங் க³ஹணேனேவ தத்த² ஸப்³பா³னிபி கே³ஹானி ஸா ச அந்தரவீதி² க³ஹிதாயேவ ஹோதி. அதிஹரித்வா க⁴ரே நிக்கி²பதீதி தங் வீதி²ங் முஞ்சித்வா டி²தே அஞ்ஞஸ்மிங் க⁴ரே நிக்கி²பதி. புரதோ வா பச்ச²தோ வா ஹத்த²பாஸேதி க⁴ரஸ்ஸ ஹத்த²பாஸங் ஸந்தா⁴ய வத³தி.
479. Pāḷiyaṃ vuttanayena ‘‘sabhāye’’ti avatvā ‘‘sabhāya’’nti paccattavacanaṃ sabhāya-saddassa napuṃsakaliṅgatāvibhāvanatthaṃ vuttaṃ. Sabhā-saddapariyāyopi hi sabhāya-saddo napuṃsakaliṅgayutto idha vuttoti imamatthaṃ dassento ‘‘liṅgabyattayena sabhā vuttā’’ti āha. Cīvarahatthapāse vasitabbaṃ natthīti cīvarahatthapāseyeva vasitabbanti natthi. Yaṃ tassā…pe… na vijahitabbanti ettha tassā vīthiyā sammukhaṭṭhāne sabhāyadvārānaṃ gahaṇeneva tattha sabbānipi gehāni sā ca antaravīthi gahitāyeva hoti. Atiharitvā ghare nikkhipatīti taṃ vīthiṃ muñcitvā ṭhite aññasmiṃ ghare nikkhipati. Purato vā pacchato vā hatthapāseti gharassa hatthapāsaṃ sandhāya vadati.
நிவேஸனாதீ³ஸு பரிக்கி²த்ததாய ஏகூபசாரதா, அபரிக்கி²த்ததாய நானூபசாரதா ச வேதி³தப்³பா³தி த³ஸ்ஸெந்தோ ‘‘ஏதேனேவுபாயேனா’’திஆதி³மாஹ. நிவேஸனாதீ³னி கா³மதோ ப³ஹி ஸன்னிவிட்டா²னி க³ஹிதானீதி வேதி³தப்³ப³ங். அந்தோகா³மே டி²தானஞ்ஹி கா³மக்³க³ஹணேன க³ஹிதத்தா கா³மபரிஹாரோயேவாதி. ஸப்³ப³த்தா²பீதி கா³மாதீ³ஸு அஜ்ஜோ²காஸபரியந்தேஸு பன்னரஸஸு. பரிக்கே²பாதி³வஸேனாதி எத்த² ஆதி³-ஸத்³தே³ன அபரிக்கே²பஸ்ஸேவ க³ஹணங் வேதி³தப்³ப³ங், ந ஏககுலாதீ³னம்பி.
Nivesanādīsu parikkhittatāya ekūpacāratā, aparikkhittatāya nānūpacāratā ca veditabbāti dassento ‘‘etenevupāyenā’’tiādimāha. Nivesanādīni gāmato bahi sanniviṭṭhāni gahitānīti veditabbaṃ. Antogāme ṭhitānañhi gāmaggahaṇena gahitattā gāmaparihāroyevāti. Sabbatthāpīti gāmādīsu ajjhokāsapariyantesu pannarasasu. Parikkhepādivasenāti ettha ādi-saddena aparikkhepasseva gahaṇaṃ veditabbaṃ, na ekakulādīnampi.
480-487. ஓவரகோ நாம க³ப்³ப⁴ஸ்ஸ அப்³ப⁴ந்தரே அஞ்ஞோ க³ப்³போ⁴திபி வத³ந்தி. முண்ட³ச்ச²த³னபாஸாதோ³தி சந்தி³கங்க³ணயுத்தோ பாஸாதோ³.
480-487.Ovarako nāma gabbhassa abbhantare añño gabbhotipi vadanti. Muṇḍacchadanapāsādoti candikaṅgaṇayutto pāsādo.
489. ஸத்தோ²தி ஜங்க⁴ஸத்தோ² ஸகடஸத்தோ² வா. பரியாதி³யித்வாதி வினிவிஜ்ஜி²த்வா. வுத்தமேவத்த²ங் விபா⁴வேதி ‘‘அந்தோபவிட்டே²ன…பே॰… டி²தோ ஹோதீ’’தி. தத்த² அந்தோபவிட்டே²னாதி கா³மஸ்ஸ நதி³யா வா அந்தோபவிட்டே²ன. நதீ³பரிஹாரோ ச லப்³ப⁴தீதி எத்த² ‘‘விஸுங் நதீ³பரிஹாரஸ்ஸ அவுத்தத்தா கா³மாதீ³ஹி அஞ்ஞத்த² விய சீவரஹத்த²பாஸோயேவ நதீ³பரிஹாரோ’’தி தீஸுபி க³ண்டி²பதே³ஸு வுத்தங். விஹாரஸீமந்தி அவிப்பவாஸஸீமங் ஸந்தா⁴யாஹ. விஹாரங் க³ந்த்வா வஸிதப்³ப³ந்தி அந்தோஸீமாய யத்த² கத்த²சி வஸிதப்³ப³ங். ஸத்த²ஸமீபேயேவாதி இத³ங் யதா²வுத்தஅப்³ப⁴ந்தரபரிச்சே²த³வஸேன வுத்தங். பாளியங் நானாகுலஸ்ஸ ஸத்தோ² ஹோதி, ஸத்தே² சீவரங் நிக்கி²பித்வா ஹத்த²பாஸா ந விஜஹிதப்³ப³ந்தி எத்த² ஹத்த²பாஸோ நாம ஸத்த²ஸ்ஸ ஹத்த²பாஸோதி வேதி³தப்³ப³ங்.
489.Satthoti jaṅghasattho sakaṭasattho vā. Pariyādiyitvāti vinivijjhitvā. Vuttamevatthaṃ vibhāveti ‘‘antopaviṭṭhena…pe… ṭhito hotī’’ti. Tattha antopaviṭṭhenāti gāmassa nadiyā vā antopaviṭṭhena. Nadīparihāro ca labbhatīti ettha ‘‘visuṃ nadīparihārassa avuttattā gāmādīhi aññattha viya cīvarahatthapāsoyeva nadīparihāro’’ti tīsupi gaṇṭhipadesu vuttaṃ. Vihārasīmanti avippavāsasīmaṃ sandhāyāha. Vihāraṃ gantvā vasitabbanti antosīmāya yattha katthaci vasitabbaṃ. Satthasamīpeyevāti idaṃ yathāvuttaabbhantaraparicchedavasena vuttaṃ. Pāḷiyaṃ nānākulassasattho hoti, satthe cīvaraṃ nikkhipitvā hatthapāsā na vijahitabbanti ettha hatthapāso nāma satthassa hatthapāsoti veditabbaṃ.
490. ஏககுலஸ்ஸ கெ²த்தேதி அபரிக்கி²த்தங் ஸந்தா⁴ய வத³தி. யஸ்மா ‘‘நானாகுலஸ்ஸ பரிக்கி²த்தே கெ²த்தே சீவரங் நிக்கி²பித்வா கெ²த்தத்³வாரமூலே வா தஸ்ஸ ஹத்த²பாஸே வா வத்த²ப்³ப³’’ந்தி வுத்தங், தஸ்மா த்³வாரமூலதோ அஞ்ஞத்த² அந்தோகெ²த்தேபி வஸந்தேன சீவரங் ஹத்த²பாஸே கத்வாயேவ வஸிதப்³ப³ங்.
490.Ekakulassa khetteti aparikkhittaṃ sandhāya vadati. Yasmā ‘‘nānākulassa parikkhitte khette cīvaraṃ nikkhipitvā khettadvāramūle vā tassa hatthapāse vā vatthabba’’nti vuttaṃ, tasmā dvāramūlato aññattha antokhettepi vasantena cīvaraṃ hatthapāse katvāyeva vasitabbaṃ.
491-494. ‘‘விஹாரோ நாம ஸபரிக்கி²த்தோ வா அபரிக்கி²த்தோ வா ஸகலோ ஆவாஸோ’’தி வத³ந்தி. யஸ்மிங் விஹாரேதி எத்த² பன ஏகங் கே³ஹமேவ வுத்தங். ஏககுலனானாகுலஸந்தகதா செத்த² காராபகானங் வஸேன வேதி³தப்³பா³. சா²யாய பு²ட்டோ²காஸஸ்ஸ அந்தோ ஏவாதி யதா³ மஹாவீதி²யங் உஜுகமேவ க³ச்ச²ந்தங் ஸூரியமண்ட³லங் மஜ்ஜ²ன்ஹிகங் பாபுணாதி, ததா³ யங் ஓகாஸங் சா²யா ப²ரதி, தங் ஸந்தா⁴ய வுத்தங். அக³மனபதே²தி யங் தத³ஹேவ க³ந்த்வா புன ஆக³ந்துங் ஸக்கா ந ஹோதி, தாதி³ஸங் ஸந்தா⁴ய வுத்தங்.
491-494.‘‘Vihāro nāma saparikkhitto vā aparikkhitto vā sakalo āvāso’’ti vadanti. Yasmiṃ vihāreti ettha pana ekaṃ gehameva vuttaṃ. Ekakulanānākulasantakatā cettha kārāpakānaṃ vasena veditabbā. Chāyāya phuṭṭhokāsassa anto evāti yadā mahāvīthiyaṃ ujukameva gacchantaṃ sūriyamaṇḍalaṃ majjhanhikaṃ pāpuṇāti, tadā yaṃ okāsaṃ chāyā pharati, taṃ sandhāya vuttaṃ. Agamanapatheti yaṃ tadaheva gantvā puna āgantuṃ sakkā na hoti, tādisaṃ sandhāya vuttaṃ.
495. நதி³ங் ஓதரதீதி ஹத்த²பாஸங் முஞ்சித்வா ஓதரதி. ந ஆபஜ்ஜதீதி பரிபோ⁴க³பச்சயா து³க்கடங் நாபஜ்ஜதி. தேனாஹ ‘‘ஸோ ஹீ’’திஆதி³. அபரிபோ⁴கா³ரஹத்தாதி இமினாவ நிஸ்ஸக்³கி³யசீவரங் அனிஸ்ஸஜ்ஜெத்வா பரிபு⁴ஞ்ஜந்தஸ்ஸ து³க்கடங் அசித்தகந்தி ஸித்³த⁴ங். ஏகங் பாருபித்வா ஏகங் அங்ஸகூடே ட²பெத்வா க³ந்தப்³ப³ந்தி இத³ங் ப³ஹூனங் ஸஞ்சாரட்டா²னே ஏவங் அகத்வா க³மனங் ந ஸாருப்பந்தி கத்வா வுத்தங். ப³ஹிகா³மே ட²பெத்வா…பே॰… வினயகம்மங் காதப்³ப³ந்தி வுத்தத்தா அதி⁴ட்டா²னே விய பரம்முகா² டி²தம்பி நிஸ்ஸக்³கி³யங் சீவரங் நிஸ்ஸஜ்ஜிதுங் நிஸ்ஸட்ட²சீவரஞ்ச தா³துங் வட்டதீதி வேதி³தப்³ப³ங்.
495.Nadiṃ otaratīti hatthapāsaṃ muñcitvā otarati. Na āpajjatīti paribhogapaccayā dukkaṭaṃ nāpajjati. Tenāha ‘‘so hī’’tiādi. Aparibhogārahattāti imināva nissaggiyacīvaraṃ anissajjetvā paribhuñjantassa dukkaṭaṃ acittakanti siddhaṃ. Ekaṃ pārupitvā ekaṃ aṃsakūṭe ṭhapetvā gantabbanti idaṃ bahūnaṃ sañcāraṭṭhāne evaṃ akatvā gamanaṃ na sāruppanti katvā vuttaṃ. Bahigāme ṭhapetvā…pe… vinayakammaṃ kātabbanti vuttattā adhiṭṭhāne viya parammukhā ṭhitampi nissaggiyaṃ cīvaraṃ nissajjituṃ nissaṭṭhacīvarañca dātuṃ vaṭṭatīti veditabbaṃ.
க³மனே ஸஉஸ்ஸாஹத்தா ‘‘நிஸ்ஸயோ பன ந படிப்பஸ்ஸம்ப⁴தீ’’தி வுத்தங். முஹுத்தங் ஸயித்வா…பே॰… நிஸ்ஸயோ ச படிப்பஸ்ஸம்ப⁴தீதி எத்த² ‘‘உஸ்ஸாஹே அபரிச்சத்தேபி க³மனஸ்ஸ உபச்சி²ன்னத்தா புன உட்டா²ய ஸஉஸ்ஸாஹங் க³ச்ச²ந்தானம்பி அந்தரா அருணே உட்டி²தே நிஸ்ஸயோ படிப்பஸ்ஸம்ப⁴தியேவா’’தி வத³ந்தி. பரதோ முஹுத்தங் ட²த்வாதி எத்தா²பி ஏஸேவ நயோ. அஞ்ஞமஞ்ஞஸ்ஸ வசனங் அக்³க³ஹெத்வா க³தாதி எத்த² ஸசே ஏவங் க³ச்ச²ந்தா ‘‘புராருணா அஞ்ஞமஞ்ஞங் பஸ்ஸிஸ்ஸாமா’’தி உஸ்ஸாஹங் வினாவ க³தா ஹொந்தி, அருணுக்³க³மனே நிஸ்ஸயபடிப்பஸ்ஸத்³தி⁴ ந வத்தப்³பா³ பட²மதரங்யேவ படிப்பஸ்ஸம்ப⁴னதோ. அத² ‘‘புராருணா பஸ்ஸிஸ்ஸாமா’’தி ஸஉஸ்ஸாஹாவ க³ச்ச²ந்தி, நிஸ்ஸயபடிப்பஸ்ஸத்³தி⁴யேவ ந வத்தப்³பா³. ஏவஞ்ச ஸதி ‘‘ஸஹ அருணுக்³க³மனா நிஸ்ஸயோ படிப்பஸ்ஸம்ப⁴தீ’’தி கஸ்மா வுத்தங்? வுச்சதே – ஸஉஸ்ஸஹத்தா பட²மதரங் படிப்பஸ்ஸத்³தி⁴ ந வுத்தா. ஸதிபி ச உஸ்ஸாஹபா⁴வே ஏகதோ க³மனஸ்ஸ உபச்சி²ன்னத்தா ‘‘முஹுத்தங் ட²த்வா’’தி எத்த² விய ஸஹ அருணுக்³க³மனா படிப்பஸ்ஸத்³தி⁴யேவ வுத்தா.
Gamane saussāhattā ‘‘nissayo pana na paṭippassambhatī’’ti vuttaṃ. Muhuttaṃ sayitvā…pe… nissayo ca paṭippassambhatīti ettha ‘‘ussāhe apariccattepi gamanassa upacchinnattā puna uṭṭhāya saussāhaṃ gacchantānampi antarā aruṇe uṭṭhite nissayo paṭippassambhatiyevā’’ti vadanti. Parato muhuttaṃ ṭhatvāti etthāpi eseva nayo. Aññamaññassa vacanaṃ aggahetvā gatāti ettha sace evaṃ gacchantā ‘‘purāruṇā aññamaññaṃ passissāmā’’ti ussāhaṃ vināva gatā honti, aruṇuggamane nissayapaṭippassaddhi na vattabbā paṭhamataraṃyeva paṭippassambhanato. Atha ‘‘purāruṇā passissāmā’’ti saussāhāva gacchanti, nissayapaṭippassaddhiyeva na vattabbā. Evañca sati ‘‘saha aruṇuggamanā nissayo paṭippassambhatī’’ti kasmā vuttaṃ? Vuccate – saussahattā paṭhamataraṃ paṭippassaddhi na vuttā. Satipi ca ussāhabhāve ekato gamanassa upacchinnattā ‘‘muhuttaṃ ṭhatvā’’ti ettha viya saha aruṇuggamanā paṭippassaddhiyeva vuttā.
அந்தோஸீமாயங் கா³மந்தி அவிப்பவாஸஸீமாஸம்முதியா பச்சா² பதிட்டா²பிதகா³மங் ஸந்தா⁴ய வத³தி கா³மங் அந்தோ கத்வா அவிப்பவாஸஸீமாஸம்முதியா அபா⁴வதோ. நேவ சீவரானி நிஸ்ஸக்³கி³யானி ஹொந்தீதி அவிப்பவாஸஸீமாபா⁴வதோ வுத்தங், ந நிஸ்ஸயோ படிப்பஸ்ஸம்ப⁴தீதி ஸஉஸ்ஸாஹபா⁴வதோ. அந்தராமக்³கே³யேவ ச நேஸங் அருணங் உக்³க³ச்ச²தீதி த⁴ம்மங் ஸுத்வா ஆக³ச்ச²ந்தானங் அருணங் உக்³க³ச்ச²தி. அஸ்ஸதியா க³ச்ச²தீதி அஸ்ஸதியா அத்தனோ சீவரங் அபச்சுத்³த⁴ரித்வா தே²ரஸ்ஸ சீவரங் அபச்சுத்³த⁴ராபெத்வா க³ச்ச²தி. ஏவங் க³தே தஸ்மிங் பச்சா² தே²ரேன ஸரித்வா படிபஜ்ஜிதப்³ப³விதி⁴ங் த³ஸ்ஸேதி ‘‘அத்தனோ சீவரங் பச்சுத்³த⁴ரித்வா த³ஹரஸ்ஸ சீவரங் விஸ்ஸாஸேன க³ஹெத்வா ட²பேதப்³ப³’’ந்தி. க³ந்த்வா வத்தப்³போ³தி ஆக³தகிச்சங் நிட்ட²பெத்வா விஹாரங் க³தேன படிபஜ்ஜிதப்³ப³விதி⁴ங் த³ஸ்ஸேதி. அனதி⁴ட்டி²தசீவரதா, அனத்த²தகதி²னதா, அலத்³த⁴ஸம்முதிதா, ரத்திவிப்பவாஸோதி இமானெத்த² சத்தாரி அங்கா³னி.
Antosīmāyaṃ gāmanti avippavāsasīmāsammutiyā pacchā patiṭṭhāpitagāmaṃ sandhāya vadati gāmaṃ anto katvā avippavāsasīmāsammutiyā abhāvato. Neva cīvarāni nissaggiyāni hontīti avippavāsasīmābhāvato vuttaṃ, na nissayo paṭippassambhatīti saussāhabhāvato. Antarāmaggeyeva ca nesaṃ aruṇaṃ uggacchatīti dhammaṃ sutvā āgacchantānaṃ aruṇaṃ uggacchati. Assatiyā gacchatīti assatiyā attano cīvaraṃ apaccuddharitvā therassa cīvaraṃ apaccuddharāpetvā gacchati. Evaṃ gate tasmiṃ pacchā therena saritvā paṭipajjitabbavidhiṃ dasseti ‘‘attano cīvaraṃ paccuddharitvā daharassa cīvaraṃ vissāsena gahetvā ṭhapetabba’’nti. Gantvā vattabboti āgatakiccaṃ niṭṭhapetvā vihāraṃ gatena paṭipajjitabbavidhiṃ dasseti. Anadhiṭṭhitacīvaratā, anatthatakathinatā, aladdhasammutitā, rattivippavāsoti imānettha cattāri aṅgāni.
உதோ³ஸிதஸிக்கா²பத³வண்ணனா நிட்டி²தா.
Udositasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. உதோ³ஸிதஸிக்கா²பத³ங் • 2. Udositasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. உதோ³ஸிதஸிக்கா²பத³வண்ணனா • 2. Udositasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. உதோ³ஸிதஸிக்கா²பத³வண்ணனா • 2. Udositasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. உதோ³ஸிதஸிக்கா²பத³வண்ணனா • 2. Udositasikkhāpadavaṇṇanā
