| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
2. உதோ³ஸிதஸிக்கா²பத³வண்ணனா
2. Udositasikkhāpadavaṇṇanā
471. ஸந்தருத்தரேன ஜனபத³சாரிகங் பக்கமந்தி. கஸ்மா? கிஞ்சாபி ‘‘ந, பி⁴க்க²வே, ஸந்தருத்தரேன கா³மோ பவிஸிதப்³போ³, யோ பவிஸெய்ய, ஆபத்தி து³க்கடஸ்ஸா’’தி (மஹாவ॰ 362) பட²மங் வுத்தங். பச்சா² பன ‘‘பஞ்சிமே, பி⁴க்க²வே, பச்சயா ஸங்கா⁴டியா நிக்கே²பாய, உத்தராஸங்க³ஸ்ஸ, அந்தரவாஸகஸ்ஸ நிக்கே²பாய கி³லானோ வா ஹோதி, வஸ்ஸிகஸங்கேதங் வா, நதீ³பாரங் க³ந்துங் வா, அக்³க³ளகு³த்திவிஹாரோ வா, அத்த²தகதி²னங் வா ஹோதீ’’தி வுத்தத்தா, அட்ட²கதா²யம்பிஸ்ஸ ‘‘பஞ்சஸு பேதேஸு அக்³க³ளகு³த்தி ஏவ பமாணங். கு³த்தே ஏவ ஹி விஹாரே நிக்கி²பித்வா ப³ஹி க³ந்துங் வட்டதி, நாகு³த்தே’’தி வுத்தத்தா அபஞ்ஞத்தேபி கதி²னே ‘‘தே பி⁴க்கூ² அக்³க³ளகு³த்திவிஹாரே ட²பேதா²’’தி வத்வா ஸபா⁴கா³னங் ஹத்தே² சீவரங் நிக்கி²பித்வா ஸந்தருத்தரேன கா³மப்பவேஸே லத்³த⁴கப்பியா ஜனபத³சாரிகங் பக்காமிங்ஸூதி வேதி³தப்³ப³ங்.
471. Santaruttarena janapadacārikaṃ pakkamanti. Kasmā? Kiñcāpi ‘‘na, bhikkhave, santaruttarena gāmo pavisitabbo, yo paviseyya, āpatti dukkaṭassā’’ti (mahāva. 362) paṭhamaṃ vuttaṃ. Pacchā pana ‘‘pañcime, bhikkhave, paccayā saṅghāṭiyā nikkhepāya, uttarāsaṅgassa, antaravāsakassa nikkhepāya gilāno vā hoti, vassikasaṅketaṃ vā, nadīpāraṃ gantuṃ vā, aggaḷaguttivihāro vā, atthatakathinaṃ vā hotī’’ti vuttattā, aṭṭhakathāyampissa ‘‘pañcasu petesu aggaḷagutti eva pamāṇaṃ. Gutte eva hi vihāre nikkhipitvā bahi gantuṃ vaṭṭati, nāgutte’’ti vuttattā apaññattepi kathine ‘‘te bhikkhū aggaḷaguttivihāre ṭhapethā’’ti vatvā sabhāgānaṃ hatthe cīvaraṃ nikkhipitvā santaruttarena gāmappavese laddhakappiyā janapadacārikaṃ pakkāmiṃsūti veditabbaṃ.
473. அவிப்பவாஸஸம்முதிந்தி அவிப்பவாஸத்த²ங், விப்பவாஸபச்சயா யா ஆபத்தி, தத³பா⁴வத்த²ங் வா ஸம்முதிங் தா³துந்தி அத்தோ². ததோ பட்டா²ய வட்டதி. கித்தகங் காலங் வட்டதீதி? மாஸங் வா அதிரேகங் வா யாவ க³மனே ஸஉஸ்ஸாஹோ, தாவ வட்டதி. தேன வுத்தங் ‘‘து⁴ரனிக்கே²பங் கரொந்தேன பச்சுத்³த⁴ரிதப்³ப³’’ந்தி. புன ஸம்முதிதா³னகிச்சங் நத்தீ²தி ஸசே த்³வாத³ஸன்னங் வஸ்ஸானங் அச்சயேன அஞ்ஞோ ரோகோ³ ஹோதி, வட்டதி, உபஸம்பத³கம்மங் விய யாவஜீவங் ஏகாஸம்முதி வட்டதீதி ச.
473.Avippavāsasammutinti avippavāsatthaṃ, vippavāsapaccayā yā āpatti, tadabhāvatthaṃ vā sammutiṃ dātunti attho. Tato paṭṭhāya vaṭṭati. Kittakaṃ kālaṃ vaṭṭatīti? Māsaṃ vā atirekaṃ vā yāva gamane saussāho, tāva vaṭṭati. Tena vuttaṃ ‘‘dhuranikkhepaṃ karontena paccuddharitabba’’nti. Puna sammutidānakiccaṃ natthīti sace dvādasannaṃ vassānaṃ accayena añño rogo hoti, vaṭṭati, upasampadakammaṃ viya yāvajīvaṃ ekāsammuti vaṭṭatīti ca.
‘‘கதங் வா ஹோதீ’’திஆதி³ இமஸ்மிங் ஸிக்கா²பதே³ ந வத்தப்³ப³ங், கஸ்மா? கரணபலிபோ³தே⁴ உபச்சி²ன்னேபி அனதி⁴ட்டி²தசீவரதோ விப்பவாஸபச்சயா ஆபத்தியா அஸம்ப⁴வதோ, தஸ்மா ‘‘நிட்டி²தசீவரஸ்மிந்தி பி⁴க்கு²னோ சீவரங் அதி⁴ட்டி²தங் ஹோதீ’’தி எத்தகமேவ வத்தப்³ப³ந்தி சே? ந, ததா³யத்தத்தா . அதி⁴ட்டா²னஞ்ஹி கரணபலிபோ³த⁴ஸ்ஸ நிட்டா²பனாயத்தங், தஸ்மா ‘‘கதங் வாதிஆதி³ வுத்த’’ந்தி ச வுத்தங். தத்த² கதந்தி புப்³பே³ வுத்தமேவ.
‘‘Kataṃ vā hotī’’tiādi imasmiṃ sikkhāpade na vattabbaṃ, kasmā? Karaṇapalibodhe upacchinnepi anadhiṭṭhitacīvarato vippavāsapaccayā āpattiyā asambhavato, tasmā ‘‘niṭṭhitacīvarasminti bhikkhuno cīvaraṃ adhiṭṭhitaṃ hotī’’ti ettakameva vattabbanti ce? Na, tadāyattattā . Adhiṭṭhānañhi karaṇapalibodhassa niṭṭhāpanāyattaṃ, tasmā ‘‘kataṃ vātiādi vutta’’nti ca vuttaṃ. Tattha katanti pubbe vuttameva.
477-8. அவிப்பவாஸலக்க²ணவவத்தா²பனத்த²ந்தி எத்த² ‘‘அந்தோகா³மே சீவரங் நிக்கி²பித்வா அந்தோகா³மே வத்த²ப்³ப³’’ந்திஆதி³வசனதோ அவிப்பவாஸலக்க²ணங் வவத்தா²பிதங், தப்³பி³பரீதனயேன விப்பவாஸலக்க²ணங் வேதி³தப்³ப³ங். கா³மோ ஏகூபசாரோதிஆதி³ம்ஹி பன ட²பெத்வா ஸத்த²ங், ருக்க²மூலங், அஜ்ஜோ²காஸஞ்ச ஸேஸேஸு பரிக்கே²பாபரிக்கே²பவஸேன ஏகூபசாரனானூபசாரதா வேதி³தப்³பா³. யஸ்மா பன ஸத்த²ங் து³வித⁴ங் நிவிட்ட²ங், அனிவிட்ட²ஞ்ச, தேஸு அனிவிட்ட²ங் ஏககுலஸ்ஸ வா நானாகுலஸ்ஸ வா அபரிக்கி²த்தமேவ ஹோதி, நிவிட்ட²ங் ஸியா பரிக்கி²த்தங், ஸியா அபரிக்கி²த்தங், தஸ்மா தத்த² பரிக்கே²பாதி³வஸேன அத³ஸ்ஸெத்வா அப்³ப⁴ந்தரவஸேன வுத்தோ. ததா² அப்³போ⁴காஸே. ருக்க²மூலே சா²யாவஸேன. அஞ்ஞதா² ‘‘ஸத்தோ² ஏகூபசாரோ நானூபசாரோ’’திஆதி³ உத்³தே³ஸவிரோதோ⁴ ஸியா விப⁴ங்கே³ அத³ஸ்ஸிதத்தா, தஸ்மா ஸத்த²ஸ்ஸ புரதோ ச பச்ச²தோ ச ஸத்தப்³ப⁴ந்தரா, பஸ்ஸதோ ச ஏகப்³ப⁴ந்தரந்தி அயமேகூபசாரோ, ததோ பரங் நானூபசாரோ. ததா² ருக்க²மூலஸ்ஸ யத்த² மஜ்ஜ²ன்ஹிகே காலே சா²யா ப²ரதி, அயங் ஏகூபசாரோ. இதரோ நானூபசாரோ. கஸ்மா? தத்த² ஹி பரிக்கே²போ அப்பமாணங். சா²யாவ பமாணங். அஜ்ஜோ²காஸஸ்ஸ பாளியங் வுத்தோவ. ‘‘ஸத்தா²தீ³னங் ஏககுலஸந்தகவஸேன ஏகூபசாரதா’’தி லிகி²தங், தஸ்மா நிவேஸனே, உதோ³ஸிதே ச வுத்தபரிச்சே²தோ³வ அட்டாதீ³ஸூதி கத்வா ஸங்கி²த்தங். ததோ பரங் கெ²த்தத⁴ஞ்ஞகரணஆராமவிஹாரேஸு பன பரிக்கி²த்தாபரிக்கி²த்த-பத³ங் புன உத்³த⁴டங் ஸத்த²விப⁴ங்கே³ன அதி⁴காரஸ்ஸ பச்சி²ன்னத்தா. ‘‘நானாக³ப்³பா⁴’’திஆதி³வசனங் பன அஸம்ப⁴வதோ கெ²த்தத⁴ஞ்ஞகரணஆராமேஸு ந உத்³த⁴டங். விஹாரே ஸம்ப⁴வந்தம்பி தத்த² பச்சி²ன்னத்தா ந உத்³த⁴டங். குலங் வுச்சதி ஸாமிகோ, தஸ்மா ‘‘ஏககுலஸ்ஸ நானாகுலஸ்ஸா’’தி இமினா கா³மாதீ³னங் சுத்³த³ஸன்னங் சீவரனிக்கே²பட்டா²னானங் ஸாதா⁴ரணாஸாதா⁴ரணபா⁴வங் தீ³பேதி. அஜ்ஜோ²காஸஸ்ஸ பன அஸம்ப⁴வதோ ந வுத்தங். யஸ்மா பனெத்த² ஏககுலஸ்ஸ, நானாகுலஸ்ஸ ச அபரிக்கி²த்தேஸு கா³மாதீ³ஸு பரிஹாரவிஸேஸோ கிஞ்சாபி நத்தி², பரிக்கி²த்தேஸு பன அத்தி², தஸ்மா ஏகனானாகுலக்³க³ஹணங், ஏகனானூபசாரக்³க³ஹணஞ்ச ஸாத்த²கந்தி வேதி³தப்³ப³ங். தத்த²பி அயங் விஸேஸோ – ஸத்தே², ருக்க²மூலே ச குலபே⁴த³தோவ பே⁴தோ³, நோபசாரபே⁴த³தோ. அஜ்ஜோ²காஸே உபசாரபே⁴த³தோ ச, ஸோ பன பாளியங் ந த³ஸ்ஸிதோதி. ‘‘தங் பமாணங் அதிக்கமித்வாதி வசனதோ ஆகாஸேபி அட்³ட⁴தெய்யரதனப்பமாணே தோ³ஸோ நத்தீ²’’தி வத³ந்தி.
477-8.Avippavāsalakkhaṇavavatthāpanatthanti ettha ‘‘antogāme cīvaraṃ nikkhipitvā antogāme vatthabba’’ntiādivacanato avippavāsalakkhaṇaṃ vavatthāpitaṃ, tabbiparītanayena vippavāsalakkhaṇaṃ veditabbaṃ. Gāmo ekūpacārotiādimhi pana ṭhapetvā satthaṃ, rukkhamūlaṃ, ajjhokāsañca sesesu parikkhepāparikkhepavasena ekūpacāranānūpacāratā veditabbā. Yasmā pana satthaṃ duvidhaṃ niviṭṭhaṃ, aniviṭṭhañca, tesu aniviṭṭhaṃ ekakulassa vā nānākulassa vā aparikkhittameva hoti, niviṭṭhaṃ siyā parikkhittaṃ, siyā aparikkhittaṃ, tasmā tattha parikkhepādivasena adassetvā abbhantaravasena vutto. Tathā abbhokāse. Rukkhamūle chāyāvasena. Aññathā ‘‘sattho ekūpacāro nānūpacāro’’tiādi uddesavirodho siyā vibhaṅge adassitattā, tasmā satthassa purato ca pacchato ca sattabbhantarā, passato ca ekabbhantaranti ayamekūpacāro, tato paraṃ nānūpacāro. Tathā rukkhamūlassa yattha majjhanhike kāle chāyā pharati, ayaṃ ekūpacāro. Itaro nānūpacāro. Kasmā? Tattha hi parikkhepo appamāṇaṃ. Chāyāva pamāṇaṃ. Ajjhokāsassa pāḷiyaṃ vuttova. ‘‘Satthādīnaṃ ekakulasantakavasena ekūpacāratā’’ti likhitaṃ, tasmā nivesane, udosite ca vuttaparicchedova aṭṭādīsūti katvā saṃkhittaṃ. Tato paraṃ khettadhaññakaraṇaārāmavihāresu pana parikkhittāparikkhitta-padaṃ puna uddhaṭaṃ satthavibhaṅgena adhikārassa pacchinnattā. ‘‘Nānāgabbhā’’tiādivacanaṃ pana asambhavato khettadhaññakaraṇaārāmesu na uddhaṭaṃ. Vihāre sambhavantampi tattha pacchinnattā na uddhaṭaṃ. Kulaṃ vuccati sāmiko, tasmā ‘‘ekakulassa nānākulassā’’ti iminā gāmādīnaṃ cuddasannaṃ cīvaranikkhepaṭṭhānānaṃ sādhāraṇāsādhāraṇabhāvaṃ dīpeti. Ajjhokāsassa pana asambhavato na vuttaṃ. Yasmā panettha ekakulassa, nānākulassa ca aparikkhittesu gāmādīsu parihāraviseso kiñcāpi natthi, parikkhittesu pana atthi, tasmā ekanānākulaggahaṇaṃ, ekanānūpacāraggahaṇañca sātthakanti veditabbaṃ. Tatthapi ayaṃ viseso – satthe, rukkhamūle ca kulabhedatova bhedo, nopacārabhedato. Ajjhokāse upacārabhedato ca, so pana pāḷiyaṃ na dassitoti. ‘‘Taṃ pamāṇaṃ atikkamitvāti vacanato ākāsepi aḍḍhateyyaratanappamāṇe doso natthī’’ti vadanti.
479. ‘‘ஸபா⁴’’தி இத்தி²லிங்க³ங். ‘‘ஸபா⁴ய’’ந்தி நபுங்ஸகலிங்க³ங், தேன வுத்தங் ‘‘லிங்க³ப்³யத்தனயேனா’’தி. நபுங்ஸகலிங்க³த³ஸ்ஸனத்த²ங் கிர ‘‘ஸபா⁴ய’’ந்தி பச்சத்தவஸேன நித்³தி³ட்ட²ங், தஸ்ஸ அனுபயோக³த்தா ‘‘த்³வாரமூல’’ந்திபி. அத்தனோ நிக்கி²த்தட்டா²னே அனிக்கி²த்தத்தா வீதி²ஹத்த²பாஸோ ந ரக்க²தி, யஸ்மிங் க⁴ரே சீவரங் நிக்கி²த்தங் ஹோதி, தஸ்மிங் க⁴ரே வத்த²ப்³ப³ங். ‘‘ஸபா⁴யே வா வத்த²ப்³ப³ங் த்³வாரமூலே வா, ஹத்த²பாஸா வா ந விஜஹிதப்³ப³’’ந்தி ஹி வுத்தங். ‘‘ஹத்த²பாஸேயேவ அருணங் உட்ட²பேதப்³ப³’’ந்தி நியமிதத்தா ஜானிதுங் ந ஸக்காதி சே? அந்தோக⁴ரே ந ஸக்கா, ததா² ததா² வுத்தத்தா, தஸ்மா ‘‘யுத்தி பமாண’’ந்தி வுத்தங். அயமத்தோ² அட்ட²கதா²யம்பி பகாஸிதோ, புனபி கு²த்³த³ககா³மே ஸப்³ப³ஸாதா⁴ரணகா³மத்³வாரவஸேன. ஸசே தஸ்ஸ த்³வாரத்³வயங் ஹோதி, மஜ்ஜே² ச க⁴ரஸபா⁴யங், யத்தி²ச்ச²தி, தத்த² வஸிதப்³ப³’’ந்தி.
479. ‘‘Sabhā’’ti itthiliṅgaṃ. ‘‘Sabhāya’’nti napuṃsakaliṅgaṃ, tena vuttaṃ ‘‘liṅgabyattanayenā’’ti. Napuṃsakaliṅgadassanatthaṃ kira ‘‘sabhāya’’nti paccattavasena niddiṭṭhaṃ, tassa anupayogattā ‘‘dvāramūla’’ntipi. Attano nikkhittaṭṭhāne anikkhittattā vīthihatthapāso na rakkhati, yasmiṃ ghare cīvaraṃ nikkhittaṃ hoti, tasmiṃ ghare vatthabbaṃ. ‘‘Sabhāye vā vatthabbaṃ dvāramūle vā, hatthapāsā vā na vijahitabba’’nti hi vuttaṃ. ‘‘Hatthapāseyeva aruṇaṃ uṭṭhapetabba’’nti niyamitattā jānituṃ na sakkāti ce? Antoghare na sakkā, tathā tathā vuttattā, tasmā ‘‘yutti pamāṇa’’nti vuttaṃ. Ayamattho aṭṭhakathāyampi pakāsito, punapi khuddakagāme sabbasādhāraṇagāmadvāravasena. Sace tassa dvāradvayaṃ hoti, majjhe ca gharasabhāyaṃ, yatthicchati, tattha vasitabba’’nti.
480-1. யானி நிவேஸனாதீ³னி கா³மஸங்க்²யங் ந க³ச்ச²ந்தி, தானி நிவேஸனாதீ³னீதி அதி⁴ப்பேதானி. அஜ்ஜோ²காஸே அபரிஸங்கிதம்பி சீவரங் அதிரேகஸத்தப்³ப⁴ந்தரே நிக்கி²த்தங் நிஸ்ஸக்³கி³யங் ஹோதி, எத்த² அந்தோஸீமதா ந ரக்க²தி, ஸத்தே² பன ரக்க²தி. ‘‘நதீ³பரிஹாரோ ச லப்³ப⁴தீ’’தி வசனதோ உத³குக்கே²பஸீமாயங் பரிஹாரோ லப்³ப⁴தீதி ஸித்³த⁴ங். ஸாமந்தவிஹாரோ சே ஏகஸீமோ, சீவரங் ந நிஸ்ஸக்³கி³யங்.
480-1. Yāni nivesanādīni gāmasaṅkhyaṃ na gacchanti, tāni nivesanādīnīti adhippetāni. Ajjhokāse aparisaṅkitampi cīvaraṃ atirekasattabbhantare nikkhittaṃ nissaggiyaṃ hoti, ettha antosīmatā na rakkhati, satthe pana rakkhati. ‘‘Nadīparihāro ca labbhatī’’ti vacanato udakukkhepasīmāyaṃ parihāro labbhatīti siddhaṃ. Sāmantavihāro ce ekasīmo, cīvaraṃ na nissaggiyaṃ.
இதா³னி –
Idāni –
‘‘சி²ன்னங் து⁴தங்க³ங் ஸாஸங்க-ஸம்மதோ ஸந்தருத்தரங்;
‘‘Chinnaṃ dhutaṅgaṃ sāsaṅka-sammato santaruttaraṃ;
அசீவரஸ்ஸானாபத்தி, பச்சுத்³தா⁴ராதி³ஸித்³தி⁴தோ’’தி. –
Acīvarassānāpatti, paccuddhārādisiddhito’’ti. –
இத³ங் பகிண்ணகங், தத்தா²யங் சோத³னாபுப்³ப³ங்க³மோ வினிச்ச²யோ – கேசி ‘‘தி³கு³ணங் ஸங்கா⁴டி’’ந்தி (மஹாவ॰ 348) வசனதோ ‘‘ஏகச்சிகா ஸங்கா⁴டிபி நாதி⁴ட்டா²தப்³பா³. ஸசே அதி⁴ட்டா²தி ந ருஹதீ’’தி வத்வா உபஸம்பதா³பெக்கா²னம்பி தி³கு³ணமேவ ஸங்கா⁴டிங் த³த்வா உபஸம்பாதெ³ந்தி, தே இமினா ஸுத்தலேஸேன ஸஞ்ஞாபேதப்³பா³. ப⁴க³வதா ஹி ‘‘சி²ன்னகங் ஸங்கா⁴டிங் சி²ன்னகங் உத்தராஸங்க³ங் சி²ன்னகங் அந்தரவாஸக’’ந்தி பட²மங் அனுஞ்ஞாதங். ததோ ‘‘அஞ்ஞதரஸ்ஸ பி⁴க்கு²னோ திசீவரே கரியமானே ஸப்³ப³ங் சி²ன்னகங் நப்பஹோதி. த்³வே சி²ன்னகானி ஏகங் அச்சி²ன்னகங் நப்பஹோதி. த்³வே அச்சி²ன்னகானி ஏகங் சி²ன்னகங் நப்பஹோதீ’’தி இமஸ்மிங் வத்து²ஸ்மிங் ‘‘அனுஜானாமி, பி⁴க்க²வே, அன்வாதி⁴கம்பி ஆரோபேது’’ந்தி (மஹாவ॰ 360) அனுஞ்ஞாதங், தஸ்மா ஏகச்சிகாபி ஸங்கா⁴டி வட்டதீதி ஸித்³த⁴ங். யா சி²ஜ்ஜமானா நப்பஹோதி, தஸ்ஸா குதோ தி³கு³ணதாதி. அட்ட²கதா²யம்பிஸ்ஸ வுத்தங் ‘‘அன்வாதி⁴கம்பி ஆரோபேதுந்தி ஆக³ந்துகபத்தம்பி தா³துங். இத³ங் பன அப்பஹோனகே ஆரோபேதப்³ப³ங். ஸசே பஹோதி, ஆக³ந்துகபத்தங் ந வட்டதி, சி²ந்தி³தப்³ப³மேவா’’தி (மஹாவ॰ அட்ட²॰ 360). கதி²னங் பன சி²ன்னகமேவ வட்டதி ஆவேணிகலக்க²ணத்தா , ‘‘சி²ன்னகங் தி³கு³ணங் நப்பஹோதீ’’தி வசனாபா⁴வதோ சாதி ஸன்னிட்டா²னமெத்த² க³ந்தப்³ப³ங்.
Idaṃ pakiṇṇakaṃ, tatthāyaṃ codanāpubbaṅgamo vinicchayo – keci ‘‘diguṇaṃ saṅghāṭi’’nti (mahāva. 348) vacanato ‘‘ekaccikā saṅghāṭipi nādhiṭṭhātabbā. Sace adhiṭṭhāti na ruhatī’’ti vatvā upasampadāpekkhānampi diguṇameva saṅghāṭiṃ datvā upasampādenti, te iminā suttalesena saññāpetabbā. Bhagavatā hi ‘‘chinnakaṃ saṅghāṭiṃ chinnakaṃ uttarāsaṅgaṃ chinnakaṃ antaravāsaka’’nti paṭhamaṃ anuññātaṃ. Tato ‘‘aññatarassa bhikkhuno ticīvare kariyamāne sabbaṃ chinnakaṃ nappahoti. Dve chinnakāni ekaṃ acchinnakaṃ nappahoti. Dve acchinnakāni ekaṃ chinnakaṃ nappahotī’’ti imasmiṃ vatthusmiṃ ‘‘anujānāmi, bhikkhave, anvādhikampi āropetu’’nti (mahāva. 360) anuññātaṃ, tasmā ekaccikāpi saṅghāṭi vaṭṭatīti siddhaṃ. Yā chijjamānā nappahoti, tassā kuto diguṇatāti. Aṭṭhakathāyampissa vuttaṃ ‘‘anvādhikampi āropetunti āgantukapattampi dātuṃ. Idaṃ pana appahonake āropetabbaṃ. Sace pahoti, āgantukapattaṃ na vaṭṭati, chinditabbamevā’’ti (mahāva. aṭṭha. 360). Kathinaṃ pana chinnakameva vaṭṭati āveṇikalakkhaṇattā , ‘‘chinnakaṃ diguṇaṃ nappahotī’’ti vacanābhāvato cāti sanniṭṭhānamettha gantabbaṃ.
து⁴தங்க³ந்தி அனுபஸம்பன்னானங் தேசீவரிகது⁴தங்கா³பா⁴வதோ திசீவரேனேவ தேசீவரிகோதி. தேஸங் அதி⁴ட்டா²னாபா⁴வதோ ‘‘அதி⁴ட்டி²தேனேவா’’தி வத்தப்³ப³ங் ஹோதூதி சே? ந, து⁴தங்க³பே⁴தே³ன விரோத⁴ப்பஸங்க³தோ. சதுத்த²சீவரஸாதி³யனேன ஹி து⁴தங்க³பே⁴தோ³, ந திசீவரவிப்பவாஸேன, நாபி அதிரேகசீவரஸாதி³யனேன, நாபி அதிரேகசீவரதா⁴ரணேன. யஸ்மா பன பி⁴க்கூ²னங்யேவ ப⁴க³வதா அதி⁴ட்டா²னவஸேன நவ சீவரானி அனுஞ்ஞாதானி, ஜாதிவஸேன ச வுத்தானி, ந ஏவங் அனுபஸம்பன்னானங். தஸ்மா தேஸங் சீவரனியமாபா⁴வா ந தங் து⁴தங்க³ங் அனுஞ்ஞாதங் க³ஹட்டா²னங் விய, தஸ்மா தஸ்ஸ ஸமாதா³னவிதா⁴னே அவசனதோ ச ஸன்னிட்டா²னமெத்த² க³ந்தப்³ப³ங்.
Dhutaṅganti anupasampannānaṃ tecīvarikadhutaṅgābhāvato ticīvareneva tecīvarikoti. Tesaṃ adhiṭṭhānābhāvato ‘‘adhiṭṭhitenevā’’ti vattabbaṃ hotūti ce? Na, dhutaṅgabhedena virodhappasaṅgato. Catutthacīvarasādiyanena hi dhutaṅgabhedo, na ticīvaravippavāsena, nāpi atirekacīvarasādiyanena, nāpi atirekacīvaradhāraṇena. Yasmā pana bhikkhūnaṃyeva bhagavatā adhiṭṭhānavasena nava cīvarāni anuññātāni, jātivasena ca vuttāni, na evaṃ anupasampannānaṃ. Tasmā tesaṃ cīvaraniyamābhāvā na taṃ dhutaṅgaṃ anuññātaṃ gahaṭṭhānaṃ viya, tasmā tassa samādānavidhāne avacanato ca sanniṭṭhānamettha gantabbaṃ.
ஸாஸங்கஸம்மதோதி கங்கா²விதரணியங் ஸாஸங்கஸிக்கா²பதே³ விஸுங் அங்கா³னி ந வுத்தானி, ‘‘ஸேஸமெத்த² சீவரவக்³க³ஸ்ஸ து³தியஸிக்கா²பதே³ வுத்தனயேன வேதி³தப்³ப³’’ந்தி (கங்கா²॰ அட்ட²॰ ஸாஸங்கஸிக்கா²பத³வண்ணனா) வுத்தங், ந ச பனேதங் வுத்தங். தத்த² ரத்திவிப்பவாஸோ சதுத்த²ங் அங்க³ங், இத⁴ சா²ரத்தவிப்பவாஸோ, அயமெத்த² விஸேஸோதி, தஸ்மா அங்க³ஸாமஞ்ஞதோ, ஸம்முதிஸாமஞ்ஞதோ ச ஸாஸங்கஸிக்கா²பத³மேவ வத³ந்தி. இத³ங் நிப்பதே³ஸங், தங் ஸப்பதே³ஸங் மாஸபரமத்தா. தத்த² ப³ஹிகா³மேபி கா³மஸீமங் ஓக்கமித்வா வஸித்வா பக்கமந்தஸ்ஸ அனாபத்தி, இத⁴ ந ததா², இத⁴ அனந்தரே அனந்தரே அருணுக்³க³மனே நிஸ்ஸக்³கி³யங், தத்த² ஸத்தமேதி அயங் இமேஸங் த்³வின்னங் விஸேஸோ. அங்கா³னி பன சீவரனிக்கே²பங்க³ஸம்பத்திதோ விபரியாயேன, இத⁴ வுத்தனயேன ச ஸித்³த⁴த்தா ந வுத்தானி. தானி காமங் ந வுத்தானி, ததா²பி சதுத்த²மங்க³ங் விஸேஸிதப்³ப³ங், ந பன விஸேஸிதங். கிங்காரணா? இத⁴ வுத்தனிஸ்ஸஜ்ஜனக்கமேன நிஸ்ஸஜ்ஜெத்வா ஆபத்திதே³ஸனதோ, தத்தா²பன்னாபத்திவிமொக்க²தீ³பனத்த²ங். ஸங்வச்ச²ரவிப்பவுத்த²ம்பி ரத்திவிப்பவுத்த²மேவ, பகே³வ சா²ரத்தங் விப்பவுத்த²ங். ஏவங் ஸந்தேபி தத்த² யதா²வுத்தஅங்க³ஸம்பத்தியா ஸதி தத்த² வுத்தனயேனேவ நிஸ்ஸஜ்ஜிதப்³ப³ங். ஹேமந்தே வா கி³ம்ஹே வா நிஸ்ஸஜ்ஜதி சே? இத⁴ வுத்தனயேனாபி நிஸ்ஸஜ்ஜிதுங் வட்டதீதி ஞாபனத்த²ங் சதுத்த²ங் அங்க³ங் ந விஸேஸிதந்தி நோ தக்கோதி ஆசரியோ. மாஸாதிக்கந்தம்பி சீவரங் ‘‘த³ஸாஹாதிக்கந்த’’ந்தி வத்வா நிஸ்ஸட்ட²மேவ. த்³வயேன ஊனமாஸங் ஹுத்வா ‘‘த³ஸாஹாதிக்கந்த’’ந்தி வத்வா மாஸாதிக்கந்தந்தி ஏகே. ததா²பி ஸசே பச்சாஸாசீவரங் ஹோதி, நிஸ்ஸக்³கி³யங் ‘‘த³ஸாஹாதிக்கந்த’’ந்தி வத்வா, மூலசீவரங் பன ‘‘மாஸாதிக்கந்த’’ந்தி வத்வா நிஸ்ஸஜ்ஜிதப்³ப³ங்.
Sāsaṅkasammatoti kaṅkhāvitaraṇiyaṃ sāsaṅkasikkhāpade visuṃ aṅgāni na vuttāni, ‘‘sesamettha cīvaravaggassa dutiyasikkhāpade vuttanayena veditabba’’nti (kaṅkhā. aṭṭha. sāsaṅkasikkhāpadavaṇṇanā) vuttaṃ, na ca panetaṃ vuttaṃ. Tattha rattivippavāso catutthaṃ aṅgaṃ, idha chārattavippavāso, ayamettha visesoti, tasmā aṅgasāmaññato, sammutisāmaññato ca sāsaṅkasikkhāpadameva vadanti. Idaṃ nippadesaṃ, taṃ sappadesaṃ māsaparamattā. Tattha bahigāmepi gāmasīmaṃ okkamitvā vasitvā pakkamantassa anāpatti, idha na tathā, idha anantare anantare aruṇuggamane nissaggiyaṃ, tattha sattameti ayaṃ imesaṃ dvinnaṃ viseso. Aṅgāni pana cīvaranikkhepaṅgasampattito vipariyāyena, idha vuttanayena ca siddhattā na vuttāni. Tāni kāmaṃ na vuttāni, tathāpi catutthamaṅgaṃ visesitabbaṃ, na pana visesitaṃ. Kiṃkāraṇā? Idha vuttanissajjanakkamena nissajjetvā āpattidesanato, tatthāpannāpattivimokkhadīpanatthaṃ. Saṃvaccharavippavutthampi rattivippavutthameva, pageva chārattaṃ vippavutthaṃ. Evaṃ santepi tattha yathāvuttaaṅgasampattiyā sati tattha vuttanayeneva nissajjitabbaṃ. Hemante vā gimhe vā nissajjati ce? Idha vuttanayenāpi nissajjituṃ vaṭṭatīti ñāpanatthaṃ catutthaṃ aṅgaṃ na visesitanti no takkoti ācariyo. Māsātikkantampi cīvaraṃ ‘‘dasāhātikkanta’’nti vatvā nissaṭṭhameva. Dvayena ūnamāsaṃ hutvā ‘‘dasāhātikkanta’’nti vatvā māsātikkantanti eke. Tathāpi sace paccāsācīvaraṃ hoti, nissaggiyaṃ ‘‘dasāhātikkanta’’nti vatvā, mūlacīvaraṃ pana ‘‘māsātikkanta’’nti vatvā nissajjitabbaṃ.
‘‘ஸந்தருத்தர’’ந்தி வா ‘‘ஸங்கா⁴டி’’ந்தி வா ‘‘சீவர’’ந்தி வா கிங் திசீவரங், உதா³ஹு அஞ்ஞம்பீதி . கிஞ்செத்த² – யதி³ திசீவரமேவ படிஸித்³த⁴ங், பரியாபன்னவஸேன அச்சி²ன்னசீவரச்சி²ந்த³னதோ⁴வாபனவிஞ்ஞத்திஆதி³விரோதோ⁴. அத² அஞ்ஞம்பி, ‘‘நிட்டி²தசீவரஸ்மி’’ந்தி ஏவமாதி³னா விரோதோ⁴தி? வுச்சதே – ந நியமதோ வேதி³தப்³ப³ங் யதா²ஸம்ப⁴வங் க³ஹேதப்³ப³தோ. ததா² ஹி ‘‘சீவரங் நிக்கி²பித்வா ஸந்தருத்தரேன ஜனபத³சாரிகங் பக்கமந்தீ’’தி (பாரா॰ 471) ஏவமாதீ³ஸு திசீவரமேவ. ‘‘ந, பி⁴க்க²வே, ஸந்தருத்தரேன கா³மோ பவிஸிதப்³போ³, ஸந்தருத்தரபரமங் ததோ சீவரங் ஸாதி⁴தப்³ப³’’ந்தி ஏவமாதீ³ஸு யங்கிஞ்சி, ததா² ஸகு³ணங் கத்வா ஸங்கா⁴டியோ தா³தப்³பா³, நிவாஸனங் தா³தப்³ப³ங், ஸங்கா⁴டி தா³தப்³பா³, ஹந்த³ தே, ஆவுஸோ, ஸங்கா⁴டி, தே³ஹி மே படந்திஆதீ³ஸு. வுத்தஞ்ஹேதங் ‘‘ஸப்³ப³ஞ்ஹி சீவரங் ஸங்க⁴டிதட்டே²ன ‘ஸங்கா⁴டீ’தி வுச்சதீ’’தி. ததா² ‘‘நிட்டி²தசீவரஸ்மி’’ந்தி எத்தா²பீதி ஏகே. அந்தோஸமயே ஹி யாவத³த்த²ங் சீவரங் அனுஞ்ஞாதங், தங் ஸப்³ப³ங் கரியமானங் கதா³ நிட்டா²னங் க³ச்சி²ஸ்ஸதி, தஸ்மா திசீவரமேவாதி ஏகே. அசீவரஸ்ஸானாபத்தி பச்சுத்³தா⁴ராதி³ஸித்³தி⁴தோதி கிங் வுத்தங் ஹோதி? உதோ³ஸிதஸிக்கா²பத³ஸ்ஸ நிப்பயோஜனபா⁴வப்பஸங்க³தோ திசீவரவிப்பவாஸே தேசீவரஸ்ஸ ஆபத்தீதி ஏகே. தத்தே²தங் வுச்சதி ந ஹோதி ஆபத்தி பச்சுத்³தா⁴ராதி³ஸித்³தி⁴தோ. ‘‘அனாபத்தி அந்தோஅருணே பச்சுத்³த⁴ரதி, விஸ்ஸஜ்ஜேதீ’’தி ஹி வுத்தங். அஞ்ஞதா² பச்சுத்³த⁴ரந்தஸ்ஸ, அந்தோஅருணே விஸ்ஸஜ்ஜெந்தஸ்ஸ ச யாவ அஞ்ஞோ நாதி⁴ட்டா²தி, தாவ ஆபத்திங் ஆபஜ்ஜதி யதா²வுத்தனயேன. அஞ்ஞதா² ஸத்தப்³ப⁴ந்தரேன விப்பவாஸஸ்ஸாதி விப்பவாஸதோ யதா²ருதங்யேவ ஸதி விப்பவாஸே விப்பவாஸதோ அவிப்பவாஸே ஸதி அவிப்பவாஸதோதி.
‘‘Santaruttara’’nti vā ‘‘saṅghāṭi’’nti vā ‘‘cīvara’’nti vā kiṃ ticīvaraṃ, udāhu aññampīti . Kiñcettha – yadi ticīvarameva paṭisiddhaṃ, pariyāpannavasena acchinnacīvaracchindanadhovāpanaviññattiādivirodho. Atha aññampi, ‘‘niṭṭhitacīvarasmi’’nti evamādinā virodhoti? Vuccate – na niyamato veditabbaṃ yathāsambhavaṃ gahetabbato. Tathā hi ‘‘cīvaraṃ nikkhipitvā santaruttarena janapadacārikaṃ pakkamantī’’ti (pārā. 471) evamādīsu ticīvarameva. ‘‘Na, bhikkhave, santaruttarena gāmo pavisitabbo, santaruttaraparamaṃ tato cīvaraṃ sādhitabba’’nti evamādīsu yaṃkiñci, tathā saguṇaṃ katvā saṅghāṭiyo dātabbā, nivāsanaṃ dātabbaṃ, saṅghāṭi dātabbā, handa te, āvuso, saṅghāṭi, dehi me paṭantiādīsu. Vuttañhetaṃ ‘‘sabbañhi cīvaraṃ saṅghaṭitaṭṭhena ‘saṅghāṭī’ti vuccatī’’ti. Tathā ‘‘niṭṭhitacīvarasmi’’nti etthāpīti eke. Antosamaye hi yāvadatthaṃ cīvaraṃ anuññātaṃ, taṃ sabbaṃ kariyamānaṃ kadā niṭṭhānaṃ gacchissati, tasmā ticīvaramevāti eke. Acīvarassānāpatti paccuddhārādisiddhitoti kiṃ vuttaṃ hoti? Udositasikkhāpadassa nippayojanabhāvappasaṅgato ticīvaravippavāse tecīvarassa āpattīti eke. Tatthetaṃ vuccati na hoti āpatti paccuddhārādisiddhito. ‘‘Anāpatti antoaruṇe paccuddharati, vissajjetī’’ti hi vuttaṃ. Aññathā paccuddharantassa, antoaruṇe vissajjentassa ca yāva añño nādhiṭṭhāti, tāva āpattiṃ āpajjati yathāvuttanayena. Aññathā sattabbhantarena vippavāsassāti vippavāsato yathārutaṃyeva sati vippavāse vippavāsato avippavāse sati avippavāsatoti.
உதோ³ஸிதஸிக்கா²பத³வண்ணனா நிட்டி²தா.
Udositasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. உதோ³ஸிதஸிக்கா²பத³ங் • 2. Udositasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. உதோ³ஸிதஸிக்கா²பத³வண்ணனா • 2. Udositasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. உதோ³ஸிதஸிக்கா²பத³வண்ணனா • 2. Udositasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. உதோ³ஸிதஸிக்கா²பத³வண்ணனா • 2. Udositasikkhāpadavaṇṇanā
