| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
2. உதோ³ஸிதஸிக்கா²பத³வண்ணனா
2. Udositasikkhāpadavaṇṇanā
473. து³தியே அவிப்பவாஸேதி அவிப்பவாஸே நிப்பா²தே³தப்³பே³, விப்பவாஸதோ³ஸாபா⁴வே ஸாதே⁴தப்³பே³ கத்தப்³பா³ ஸம்முதீதி அத்தோ².
473. Dutiye avippavāseti avippavāse nipphādetabbe, vippavāsadosābhāve sādhetabbe kattabbā sammutīti attho.
475. படிஸித்³த⁴பரியாபன்னேனாதி விப்பவஸிதுங் படிஸித்³தே⁴ஸு தீஸு சீவரேஸு அந்தோக³தே⁴ன, ஏகேன ச அவயவே ஸமுதா³யோபசாரங் த³ஸ்ஸேதி.
475.Paṭisiddhapariyāpannenāti vippavasituṃ paṭisiddhesu tīsu cīvaresu antogadhena, ekena ca avayave samudāyopacāraṃ dasseti.
478-9. எத்தாவதாதி ‘‘பரிக்கி²த்தோ’’தி இமினா. ‘‘ஸபா⁴யேதி லிங்க³ப்³யத்தயேன ஸபா⁴ வுத்தா’’தி வத்வா புன ஸயம்பி ‘‘ஸபா⁴யே’’தி இமினா வோஹரந்தோ ஸபா⁴-ஸத்³த³ஸ்ஸ பரியாயோ ஸபா⁴ய-ஸத்³தோ³ நபுங்ஸகலிங்க³யுத்தோ அத்தீ²தி த³ஸ்ஸேதி. ‘‘ஸபா⁴யந்தி லிங்க³ப்³யத்தயேன ஸபா⁴ வுத்தா’’தி வா பாடோ². லிங்க³ப்³யத்தயேன ஸபா⁴தி ச லிங்க³ந்தரயுத்தோ ஸபா⁴ஸத்³த³பரியாயோ ஸபா⁴யஸத்³தோ³தி அத்தோ².
478-9.Ettāvatāti ‘‘parikkhitto’’ti iminā. ‘‘Sabhāyeti liṅgabyattayena sabhā vuttā’’ti vatvā puna sayampi ‘‘sabhāye’’ti iminā voharanto sabhā-saddassa pariyāyo sabhāya-saddo napuṃsakaliṅgayutto atthīti dasseti. ‘‘Sabhāyanti liṅgabyattayena sabhā vuttā’’ti vā pāṭho. Liṅgabyattayena sabhāti ca liṅgantarayutto sabhāsaddapariyāyo sabhāyasaddoti attho.
ஸபா⁴யங் க³ச்ச²தீதி ஸப⁴ங் க³ச்ச²தி. வஸிதப்³ப³ங் நத்தீ²தி சீவரஹத்த²பாஸேயேவ வஸிதப்³ப³ங் நத்தீ²தி அத்தோ². தஸ்ஸாதி வீதி²யா. ஸபா⁴யஸ்ஸ ச த்³வாரஸ்ஸ ச ஹத்த²பாஸா ந விஜஹிதப்³ப³ந்தி எத்த² ஸபா⁴யத்³வாரானமந்தரே வீதி² கே³ஹாபி க³ஹிதா ஏவ ஹொந்தி ஆதி³பரியோஸானானங் க³ஹிதத்தா. எத்த² ச த்³வாரவீதி²க⁴ரேஸு வஸந்தேன கா³மப்பவேஸனஸஹஸெய்யாதி³தோ³ஸங் பரிஹரித்வா ஸுபடிச்ச²ன்னதாதி³யுத்தேனேவ ப⁴விதப்³ப³ங் , ஸபா⁴ பன யதி³ ஸப்³பே³ஸங் வஸனத்தா²ய ஸாலாஸதி³ஸா கதா, அந்தராராமே விய யதா²ஸுக²ங் வஸிதுங் வட்டதீதி வேதி³தப்³ப³ங். பரிக்கி²த்ததாய ச ஏகூபசாரதங், அபரிக்கி²த்ததாய நானூபசாரதஞ்ச நிவேஸனாதீ³ஸுபி அதிதி³ஸந்தோ ஆஹ ‘‘ஏதேனேவூபாயேனா’’திஆதி³. நிவேஸனாதீ³னி ப³ஹிகா³மதோ ஸன்னிவிட்டா²னி க³ஹிதானி அந்தோகா³மே டி²தானங் கா³மக்³க³ஹணேனேவ க³ஹிதத்தா. ஸப்³ப³த்தா²தி கா³மனிக³மனிவேஸனாதீ³ஸு பன்னரஸஸு. பரிக்கே²பாதீ³தி ஆதி³-ஸத்³தே³ன அபரிக்கே²பஸ்ஸேவ க³ஹணங், ந ஏககுலாதீ³னம்பி தேஸங் ஏகூபசாரதானானூபசாரதானிமித்ததாபா⁴வா. எத்த² ச ஸத்த²ஸ்ஸ கதிபாஹங் கத்த²சி நிவிட்ட²ஸ்ஸேவ பரிக்கே²போ ஹோதி, ந க³ச்ச²ந்தஸ்ஸ.
Sabhāyaṃ gacchatīti sabhaṃ gacchati. Vasitabbaṃ natthīti cīvarahatthapāseyeva vasitabbaṃ natthīti attho. Tassāti vīthiyā. Sabhāyassa ca dvārassa ca hatthapāsā na vijahitabbanti ettha sabhāyadvārānamantare vīthi gehāpi gahitā eva honti ādipariyosānānaṃ gahitattā. Ettha ca dvāravīthigharesu vasantena gāmappavesanasahaseyyādidosaṃ pariharitvā supaṭicchannatādiyutteneva bhavitabbaṃ , sabhā pana yadi sabbesaṃ vasanatthāya sālāsadisā katā, antarārāme viya yathāsukhaṃ vasituṃ vaṭṭatīti veditabbaṃ. Parikkhittatāya ca ekūpacārataṃ, aparikkhittatāya nānūpacāratañca nivesanādīsupi atidisanto āha ‘‘etenevūpāyenā’’tiādi. Nivesanādīni bahigāmato sanniviṭṭhāni gahitāni antogāme ṭhitānaṃ gāmaggahaṇeneva gahitattā. Sabbatthāti gāmanigamanivesanādīsu pannarasasu. Parikkhepādīti ādi-saddena aparikkhepasseva gahaṇaṃ, na ekakulādīnampi tesaṃ ekūpacāratānānūpacāratānimittatābhāvā. Ettha ca satthassa katipāhaṃ katthaci niviṭṭhasseva parikkhepo hoti, na gacchantassa.
482-7. கா³மதோ ப³ஹி இஸ்ஸரானங் ஸமுத்³த³தீராதீ³ஸு கதப⁴ண்ட³ஸாலா உதோ³ஸிதோதி ஆஹ ‘‘யானாதீ³ன’’ந்திஆதி³. முண்ட³ச்ச²த³னபாஸாதோ³தி நாதிஉச்சோ சந்தி³கங்க³ணயுத்தோ ஸிக²ரகூடமாலாதி³விரஹிதோ பாஸாதோ³.
482-7. Gāmato bahi issarānaṃ samuddatīrādīsu katabhaṇḍasālā udositoti āha ‘‘yānādīna’’ntiādi. Muṇḍacchadanapāsādoti nātiucco candikaṅgaṇayutto sikharakūṭamālādivirahito pāsādo.
489. பரியாதி³யித்வாதி அஜ்ஜொ²த்த²ரித்வா. நதீ³பரிஹாரோதி விஸுங்கா³மாதீ³னங் விய நதீ³பரிஹாரஸ்ஸ அவுத்தத்தா சீவரஹத்த²பாஸோ ஏவாதி வத³ந்தி, அஞ்ஞே பன ‘‘இமினா அட்ட²கதா²வசனேன நதீ³பரிஹாரோபி விஸுங் ஸித்³தோ⁴, நதி³யா ஹத்த²பாஸோ ந விஜஹிதப்³போ³’’தி வத³ந்தி. விஹாரஸீமந்தி அவிப்பவாஸஸீமங் ஸந்தா⁴யாஹ. எத்த² ச விஹாரஸ்ஸ நானாகுலஸந்தகபா⁴வேபி அவிப்பவாஸஸீமாபரிச்சே²த³ப்³ப⁴ந்தரே ஸப்³ப³த்த² சீவரஅவிப்பவாஸஸம்ப⁴வதோ தஸ்ஸா பதா⁴னத்தா தத்த² ஸத்த²பரிஹாரோ ந லப்³ப⁴தீதி ‘‘விஹாரங் க³ந்த்வா வஸிதப்³ப³’’ந்தி வுத்தங். ‘‘ஸத்த²ஸமீபே’’தி இத³ங் யதா²வுத்தங் அப்³ப⁴ந்தரபரிச்சே²த³வஸேன வுத்தங். பாளியங் நானாகுலஸ்ஸ ஸத்தோ² ஹோதி, ஸத்தே² சீவரங் நிக்கி²பித்வா ஹத்த²பாஸா ந விஜஹிதப்³ப³ந்தி எத்த² ஸத்த²ஹத்த²பாஸோ க³ஹிதோ.
489.Pariyādiyitvāti ajjhottharitvā. Nadīparihāroti visuṃgāmādīnaṃ viya nadīparihārassa avuttattā cīvarahatthapāso evāti vadanti, aññe pana ‘‘iminā aṭṭhakathāvacanena nadīparihāropi visuṃ siddho, nadiyā hatthapāso na vijahitabbo’’ti vadanti. Vihārasīmanti avippavāsasīmaṃ sandhāyāha. Ettha ca vihārassa nānākulasantakabhāvepi avippavāsasīmāparicchedabbhantare sabbattha cīvaraavippavāsasambhavato tassā padhānattā tattha satthaparihāro na labbhatīti ‘‘vihāraṃ gantvā vasitabba’’nti vuttaṃ. ‘‘Satthasamīpe’’ti idaṃ yathāvuttaṃ abbhantaraparicchedavasena vuttaṃ. Pāḷiyaṃ nānākulassa sattho hoti, satthe cīvaraṃ nikkhipitvā hatthapāsā na vijahitabbanti ettha satthahatthapāso gahito.
490. ஏககுலஸ்ஸ கெ²த்தேதி அபரிக்கி²த்தங் ஸந்தா⁴ய வத³தி.
490.Ekakulassa khetteti aparikkhittaṃ sandhāya vadati.
491-4. விஹாரோ நாம உபசாரஸீமா. தத்த² யஸ்மிங் விஹாரேதி தஸ்ஸ அந்தோபரிவேணாதி³ங் ஸந்தா⁴ய வுத்தங், ஏககுலாதி³ஸந்தகதா செத்த² காராபகானங் வஸேன. சா²யாய பு²ட்டோ²காஸஸ்ஸாதி உஜுகங் அவக்கி²த்தலெட்³டு³பாதப்³ப⁴ந்தரங் ஸந்தா⁴ய வத³தி.
491-4.Vihāro nāma upacārasīmā. Tattha yasmiṃ vihāreti tassa antopariveṇādiṃ sandhāya vuttaṃ, ekakulādisantakatā cettha kārāpakānaṃ vasena. Chāyāya phuṭṭhokāsassāti ujukaṃ avakkhittaleḍḍupātabbhantaraṃ sandhāya vadati.
அக³மனபதே²தி தத³ஹேவ க³ந்த்வா நிவத்தேதுங் ந ஸக்குணெய்யகே ஸமுத்³த³மஜ்ஜே² யே தீ³பகா, தேஸூதி யோஜனா. இதரஸ்மிந்தி புரத்தி²மதி³ஸாய சீவரே. ‘‘உபோஸத²காலே…பே॰… வட்³ட⁴தீ’’தி இமினா சீவரவிப்பவாஸஸத்தப்³ப⁴ந்தரதோ ஸமானஸங்வாஸாய ஸத்தப்³ப⁴ந்தரஸீமாய அச்சந்தவிஸதி³ஸதங் த³ஸ்ஸேதி . ததா² ஹி ப³ஹூஸு பி⁴க்கூ²ஸு ஏகதோ நிஸீதி³த்வா ஸமந்தா ஸத்தப்³ப⁴ந்தரபரிச்சே²தே³ஸு யதா²ஸகங் சீவரங் ட²பெத்வா பரிஹரந்தேஸு ஏகேகஸ்ஸ பி⁴க்கு²னோ நிஸின்னோகாஸதோ பட்டா²ய பச்சேகங் ஸத்தப்³ப⁴ந்தரஸ்ஸ பரிச்சே²தோ³ அஞ்ஞமஞ்ஞவிஸதி³ஸோ அனேகவிதோ⁴ ஹோதி, ந ஏகோ பரிஸபரியந்ததோ பட்டா²ய அனிமிதப்³ப³த்தா. தேனேவ தத்த² பரிஸவஸேன வுட்³டி⁴, ஹானி வா ந ஹோதி, ந ஏவங் ஸத்தப்³ப⁴ந்தரஸீமாய. ஸா ஹி யோஜனிகாயபி பரிஸபரியந்ததோவ பட்டா²ய ஸமந்தா ஸத்தப்³ப⁴ந்தரபஅச்சி²ன்னா ஏகாவ ஹோதி. தேனேவ ஸா பரிஸவஸேன வட்³ட⁴தி, ஹாயதி ச, தஸ்மா அஞ்ஞாவ ஸத்தப்³ப⁴ந்தரஸீமா அஞ்ஞோ ஸத்தப்³ப⁴ந்தரதோ பரிச்சி²ன்னோ சீவரவிப்பவாஸபரிஹாரோ அப்³போ⁴காஸோதி வேதி³தப்³ப³ங். யஞ்செத்த² வத்தப்³ப³ங், தங் க²ந்த⁴கே ஸீமாகதா²யமேவ (மஹாவ॰ 143) வக்கா²ம.
Agamanapatheti tadaheva gantvā nivattetuṃ na sakkuṇeyyake samuddamajjhe ye dīpakā, tesūti yojanā. Itarasminti puratthimadisāya cīvare. ‘‘Uposathakāle…pe… vaḍḍhatī’’ti iminā cīvaravippavāsasattabbhantarato samānasaṃvāsāya sattabbhantarasīmāya accantavisadisataṃ dasseti . Tathā hi bahūsu bhikkhūsu ekato nisīditvā samantā sattabbhantaraparicchedesu yathāsakaṃ cīvaraṃ ṭhapetvā pariharantesu ekekassa bhikkhuno nisinnokāsato paṭṭhāya paccekaṃ sattabbhantarassa paricchedo aññamaññavisadiso anekavidho hoti, na eko parisapariyantato paṭṭhāya animitabbattā. Teneva tattha parisavasena vuḍḍhi, hāni vā na hoti, na evaṃ sattabbhantarasīmāya. Sā hi yojanikāyapi parisapariyantatova paṭṭhāya samantā sattabbhantarapaacchinnā ekāva hoti. Teneva sā parisavasena vaḍḍhati, hāyati ca, tasmā aññāva sattabbhantarasīmā añño sattabbhantarato paricchinno cīvaravippavāsaparihāro abbhokāsoti veditabbaṃ. Yañcettha vattabbaṃ, taṃ khandhake sīmākathāyameva (mahāva. 143) vakkhāma.
495. நதி³ங் ஓதரதீதி ஹத்த²பாஸங் முஞ்சித்வா ஓதரதி. ப³ஹிகா³மே ட²பெத்வாதி அபாருபிதப்³ப³தாய வுத்தங். வினயகம்மங் காதப்³ப³ந்தி உத்தராஸங்கே³ ச ப³ஹிகா³மே ட²பிதஸங்கா⁴டியஞ்ச பட²மங் வினயகம்மங் கத்வா பச்சா² உத்தராஸங்க³ங் நிவாஸெத்வா அந்தரவாஸகே காதப்³ப³ங். எத்த² ச ப³ஹிகா³மே ட²பிதஸ்ஸாபி வினயகம்மவசனதோ பரம்முகா²பி டி²தங் விஸ்ஸஜ்ஜிதுங், நிஸ்ஸட்ட²ங் தா³துஞ்ச வட்டதீதி வேதி³தப்³ப³ங். த³ஹரானங் க³மனே ஸஉஸ்ஸாஹத்தா ‘‘நிஸ்ஸயோ பன ந படிப்பஸ்ஸம்ப⁴தீ’’தி வுத்தங். முஹுத்தங்…பே॰… படிப்பஸ்ஸம்ப⁴தீதி ஸஉஸ்ஸாஹத்தே க³மனஸ்ஸ உபச்சி²ன்னத்தா வுத்தங். தேஸங் பன புராருணாவ உட்ட²ஹித்வா ஸஉஸ்ஸாஹேன க³ச்ச²ந்தானங் அருணே அந்தரா உட்டி²தேபி ந படிப்பஸ்ஸம்ப⁴தி ‘‘யாவ அருணுக்³க³மனா ஸயந்தீ’’தி வுத்தத்தா. தேனேவ ‘‘கா³மங் பவிஸித்வா…பே॰… ந படிப்பஸ்ஸம்ப⁴தீ’’தி வுத்தங். அஞ்ஞமஞ்ஞஸ்ஸ வசனங் அக்³க³ஹெத்வாதிஆதி³ம்ஹி ஸஉஸ்ஸாஹத்தா க³மனக்க²ணே படிப்பஸ்ஸத்³தி⁴ ந வுத்தா. தே⁴னுப⁴யேனாதி தருணவச்ச²கா³வீனங் அபி⁴தா⁴வித்வா ஸிங்கே³ன பஹரணப⁴யேன. நிஸ்ஸயோ ச படிப்பஸ்ஸம்ப⁴தீதி எத்த² தே⁴னுப⁴யாதீ³ஹி டி²தானங் யாவ ப⁴யவூபஸமா டா²தப்³ப³தோ ‘‘அந்தோஅருணேயேவ க³மிஸ்ஸாமீ’’தி நியமேதுங் அஸக்குணெய்யத்தா வுத்தங். யத்த² பன ஏவங் நியமேதுங் ஸக்கா, தத்த² அந்தராருணே உக்³க³தேபி நிஸ்ஸயோ ந படிப்பஸ்ஸம்ப⁴தி பே⁴ஸஜ்ஜத்தா²ய கா³மப்பவிட்ட²த³ஹரானங் விய. அந்தோஸீமாயங் கா³மந்தி அவிப்பவாஸஸீமாஸம்முதிதோ பச்சா² பதிட்டா²பிதகா³மங் ஸந்தா⁴ய வத³தி கா³மஞ்ச கா³மூபசாரஞ்ச ட²பெத்வா ஸம்மன்னிதப்³ப³தோ. பவிட்டா²னந்தி ஆசரியந்தேவாஸிகானங் விஸுங் விஸுங் க³தானங் அவிப்பவாஸஸீமத்தா நேவ சீவரானி நிஸ்ஸக்³கி³யானி ஹொந்தி, ஸஉஸ்ஸாஹதாய நிஸ்ஸயோ ந படிப்பஸ்ஸம்ப⁴தி. அந்தராமக்³கே³தி த⁴ம்மங் ஸுத்வா ஆக³ச்ச²ந்தானங் அந்தராமக்³கே³.
495.Nadiṃotaratīti hatthapāsaṃ muñcitvā otarati. Bahigāme ṭhapetvāti apārupitabbatāya vuttaṃ. Vinayakammaṃ kātabbanti uttarāsaṅge ca bahigāme ṭhapitasaṅghāṭiyañca paṭhamaṃ vinayakammaṃ katvā pacchā uttarāsaṅgaṃ nivāsetvā antaravāsake kātabbaṃ. Ettha ca bahigāme ṭhapitassāpi vinayakammavacanato parammukhāpi ṭhitaṃ vissajjituṃ, nissaṭṭhaṃ dātuñca vaṭṭatīti veditabbaṃ. Daharānaṃ gamane saussāhattā ‘‘nissayo pana na paṭippassambhatī’’ti vuttaṃ. Muhuttaṃ…pe… paṭippassambhatīti saussāhatte gamanassa upacchinnattā vuttaṃ. Tesaṃ pana purāruṇāva uṭṭhahitvā saussāhena gacchantānaṃ aruṇe antarā uṭṭhitepi na paṭippassambhati ‘‘yāva aruṇuggamanā sayantī’’ti vuttattā. Teneva ‘‘gāmaṃ pavisitvā…pe… na paṭippassambhatī’’ti vuttaṃ. Aññamaññassa vacanaṃ aggahetvātiādimhi saussāhattā gamanakkhaṇe paṭippassaddhi na vuttā. Dhenubhayenāti taruṇavacchagāvīnaṃ abhidhāvitvā siṅgena paharaṇabhayena. Nissayo ca paṭippassambhatīti ettha dhenubhayādīhi ṭhitānaṃ yāva bhayavūpasamā ṭhātabbato ‘‘antoaruṇeyeva gamissāmī’’ti niyametuṃ asakkuṇeyyattā vuttaṃ. Yattha pana evaṃ niyametuṃ sakkā, tattha antarāruṇe uggatepi nissayo na paṭippassambhati bhesajjatthāya gāmappaviṭṭhadaharānaṃ viya. Antosīmāyaṃ gāmanti avippavāsasīmāsammutito pacchā patiṭṭhāpitagāmaṃ sandhāya vadati gāmañca gāmūpacārañca ṭhapetvā sammannitabbato. Paviṭṭhānanti ācariyantevāsikānaṃ visuṃ visuṃ gatānaṃ avippavāsasīmattā neva cīvarāni nissaggiyāni honti, saussāhatāya nissayo na paṭippassambhati. Antarāmaggeti dhammaṃ sutvā āgacchantānaṃ antarāmagge.
‘‘இத⁴ அபச்சுத்³த⁴ரண’’ந்தி இமினா அதி⁴ட்டா²னவிகப்பனானி விய பச்சுத்³த⁴ரணம்பி காயேன வா வாசாய வா கத்தப்³ப³ந்தி த³ஸ்ஸேதி. காயவாசாஹி கத்தப்³ப³ஸ்ஸ அகரணதோதி இத³ங் காயவாசாஸமுட்டா²னங் வுத்தங். அதி⁴ட்டி²ததிசீவரதா, அனத்த²தகதி²னதா, அலத்³த⁴ஸம்முதிதா, ரத்திவிப்பவாஸோதி இமானெத்த² சத்தாரி அங்கா³னி.
‘‘Idha apaccuddharaṇa’’nti iminā adhiṭṭhānavikappanāni viya paccuddharaṇampi kāyena vā vācāya vā kattabbanti dasseti. Kāyavācāhi kattabbassa akaraṇatoti idaṃ kāyavācāsamuṭṭhānaṃ vuttaṃ. Adhiṭṭhitaticīvaratā, anatthatakathinatā, aladdhasammutitā, rattivippavāsoti imānettha cattāri aṅgāni.
உதோ³ஸிதஸிக்கா²பத³வண்ணனா நிட்டி²தா.
Udositasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. உதோ³ஸிதஸிக்கா²பத³ங் • 2. Udositasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. உதோ³ஸிதஸிக்கா²பத³வண்ணனா • 2. Udositasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. உதோ³ஸிதஸிக்கா²பத³வண்ணனா • 2. Udositasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. உதோ³ஸிதஸிக்கா²பத³வண்ணனா • 2. Udositasikkhāpadavaṇṇanā
