| Library / Tipiṭaka / д̇ибидага • Tipiṭaka / махаавибхан̇г̇а-адтагат̇аа • Mahāvibhaṅga-aṭṭhakathā |
2. уд̣̇осид̇асигкаабад̣̇аван̣н̣анаа
2. Udositasikkhāpadavaṇṇanā
471. д̇зна самаязна б̣уд̣̇д̇хо бхаг̇аваад̇и уд̣̇осид̇асигкаабад̣̇ам̣. д̇ад̇т̇а санд̇аруд̇д̇арзнаад̇и анд̇аранд̇и анд̇араваасаго вужжад̇и, уд̇д̇аранд̇и уд̇д̇араасан̇г̇о, саха анд̇арзна уд̇д̇арам̣ санд̇аруд̇д̇арам̣, д̇зна санд̇аруд̇д̇арзна, саха анд̇араваасагзна уд̇д̇араасан̇г̇знаад̇и ад̇т̇о. ган̣н̣агид̇аанийд̇и сзд̣̇зна пудтогаасзсу сан̃ж̇аад̇агаал̣асзд̇аман̣д̣алаани. ад̣̇д̣̇аса ко ааяасмаа аананд̣̇о сзнаасанажааригам̣ аахин̣д̣анд̇од̇и т̇зро гира бхаг̇авад̇и д̣̇иваа бадисаллаанад̇т̇ааяа г̇анд̇хагудим̣ бавидтз д̇ам̣ огаасам̣ лабхид̇ваа д̣̇уннигкид̇д̇аани д̣̇аарубхан̣д̣амад̇д̇игаабхан̣д̣аани бадисаамзнд̇о асаммадтадтаанам̣ саммаж̇ж̇анд̇о г̇илаанзхи бхигкуухи сад̣̇д̇хим̣ бадисант̇аарам̣ гаронд̇о д̇зсам̣ бхигкуунам̣ сзнаасанадтаанам̣ самбад̇д̇о ад̣̇д̣̇аса. д̇зна вуд̇д̇ам̣ – ‘‘ад̣̇д̣̇аса ко ааяасмаа аананд̣̇о сзнаасанажааригам̣ аахин̣д̣анд̇о’’д̇и.
471.Tenasamayena buddho bhagavāti udositasikkhāpadaṃ. Tattha santaruttarenāti antaranti antaravāsako vuccati, uttaranti uttarāsaṅgo, saha antarena uttaraṃ santaruttaraṃ, tena santaruttarena, saha antaravāsakena uttarāsaṅgenāti attho. Kaṇṇakitānīti sedena phuṭṭhokāsesu sañjātakāḷasetamaṇḍalāni. Addasa kho āyasmā ānando senāsanacārikaṃ āhiṇḍantoti thero kira bhagavati divā paṭisallānatthāya gandhakuṭiṃ paviṭṭhe taṃ okāsaṃ labhitvā dunnikkhittāni dārubhaṇḍamattikābhaṇḍāni paṭisāmento asammaṭṭhaṭṭhānaṃ sammajjanto gilānehi bhikkhūhi saddhiṃ paṭisanthāraṃ karonto tesaṃ bhikkhūnaṃ senāsanaṭṭhānaṃ sampatto addasa. Tena vuttaṃ – ‘‘addasa kho āyasmā ānando senāsanacārikaṃ āhiṇḍanto’’ti.
473. авиббаваасасаммуд̇им̣ д̣̇аад̇унд̇и авиббаваасз саммуд̇и авиббаваасасаммуд̇и, авиббаваасааяа ваа саммуд̇и авиббаваасасаммуд̇и. го банзд̇т̇а аанисам̣со? язна жийварзна виббавасад̇и, д̇ам̣ ниссаг̇г̇ияам̣ на ход̇и, аабад̇д̇ин̃жа наабаж̇ж̇ад̇и. гид̇д̇агам̣ гаалам̣? махаасумад̇т̇зро д̇аава ааха – ‘‘яаава рог̇о на вуубасамад̇и, вуубасанд̇з бана рог̇з сийгхам̣ жийварадтаанам̣ ааг̇анд̇аб̣б̣а’’нд̇и . махаабад̣̇умад̇т̇зро ааха – ‘‘сийгхам̣ ааг̇ажчад̇о рог̇о бадигуббзяяа, д̇асмаа сан̣игам̣ ааг̇анд̇аб̣б̣ам̣. яад̇о бадтааяа хи сад̇т̇ам̣ ваа бариязсад̇и, ‘г̇ажчаамий’д̇и аабхог̇ам̣ ваа гарод̇и, д̇ад̇о бадтааяа ваддад̇и. ‘на д̣̇аани г̇амиссаамий’д̇и звам̣ бана д̇хуранигкзбам̣ гаронд̇зна бажжуд̣̇д̇харид̇аб̣б̣ам̣, ад̇ирзгажийварадтаанз тассад̇ий’’д̇и. сажз банасса рог̇о бадигуббад̇и, гим̣ гаад̇аб̣б̣анд̇и? пуссад̣̇звад̇т̇зро д̇аава ааха – ‘‘сажз соязва рог̇о бадигуббад̇и, саа зва саммуд̇и, буна саммуд̇ид̣̇аанагижжам̣ над̇т̇и. ат̇ан̃н̃о губбад̇и, буна д̣̇аад̇аб̣б̣аа саммуд̇ий’’д̇и. убад̇иссад̇т̇зро ааха – ‘‘со ваа рог̇о ход̇у, ан̃н̃о ваа буна саммуд̇ид̣̇аанагижжам̣ над̇т̇ий’’д̇и.
473.Avippavāsasammutiṃ dātunti avippavāse sammuti avippavāsasammuti, avippavāsāya vā sammuti avippavāsasammuti. Ko panettha ānisaṃso? Yena cīvarena vippavasati, taṃ nissaggiyaṃ na hoti, āpattiñca nāpajjati. Kittakaṃ kālaṃ? Mahāsumatthero tāva āha – ‘‘yāva rogo na vūpasamati, vūpasante pana roge sīghaṃ cīvaraṭṭhānaṃ āgantabba’’nti . Mahāpadumatthero āha – ‘‘sīghaṃ āgacchato rogo paṭikuppeyya, tasmā saṇikaṃ āgantabbaṃ. Yato paṭṭhāya hi satthaṃ vā pariyesati, ‘gacchāmī’ti ābhogaṃ vā karoti, tato paṭṭhāya vaṭṭati. ‘Na dāni gamissāmī’ti evaṃ pana dhuranikkhepaṃ karontena paccuddharitabbaṃ, atirekacīvaraṭṭhāne ṭhassatī’’ti. Sace panassa rogo paṭikuppati, kiṃ kātabbanti? Phussadevatthero tāva āha – ‘‘sace soyeva rogo paṭikuppati, sā eva sammuti, puna sammutidānakiccaṃ natthi. Athañño kuppati, puna dātabbā sammutī’’ti. Upatissatthero āha – ‘‘so vā rogo hotu, añño vā puna sammutidānakiccaṃ natthī’’ti.
475-6. нидтид̇ажийварасмим̣ бхигкунаад̇и ид̇ха бана буримасигкаабад̣̇з вияа ад̇т̇ам̣ аг̇г̇ахзд̇ваа нидтид̇з жийварасмим̣ бхигкунод̇и звам̣ саамивасзна гаран̣аважанасса ад̇т̇о взд̣̇ид̇аб̣б̣о. гаран̣авасзна хи бхигкунаа ид̣̇ам̣ наама гаад̇аб̣б̣анд̇и над̇т̇и. саамивасзна бана бхигкуно жийварасмим̣ нидтид̇з гат̇инз жа уб̣бхад̇з звам̣ чиннабалиб̣од̇хо згарад̇д̇амби жз бхигку д̇ижийварзна виббавасзяяаад̇и звам̣ ад̇т̇о яуж̇ж̇ад̇и. д̇ад̇т̇а д̇ижийварзнаад̇и ад̇хидтид̇зсу д̇ийсу жийварзсу язна гзнажи. згзна виббавуд̇т̇оби хи д̇ижийварзна виббавуд̇т̇о ход̇и, бадисид̣̇д̇хабарияаабаннзна виббавуд̇т̇ад̇д̇аа. д̇знзвасса бад̣̇абхааж̇анз ‘‘сан̇гхаадияаа ваа’’д̇иаад̣̇и вуд̇д̇ам̣. виббавасзяяаад̇и виббаяуд̇д̇о васзяяа.
475-6.Niṭṭhitacīvarasmiṃ bhikkhunāti idha pana purimasikkhāpade viya atthaṃ aggahetvā niṭṭhite cīvarasmiṃ bhikkhunoti evaṃ sāmivasena karaṇavacanassa attho veditabbo. Karaṇavasena hi bhikkhunā idaṃ nāma kātabbanti natthi. Sāmivasena pana bhikkhuno cīvarasmiṃ niṭṭhite kathine ca ubbhate evaṃ chinnapalibodho ekarattampi ce bhikkhu ticīvarena vippavaseyyāti evaṃ attho yujjati. Tattha ticīvarenāti adhiṭṭhitesu tīsu cīvaresu yena kenaci. Ekena vippavutthopi hi ticīvarena vippavuttho hoti, paṭisiddhapariyāpannena vippavutthattā. Tenevassa padabhājane ‘‘saṅghāṭiyā vā’’tiādi vuttaṃ. Vippavaseyyāti vippayutto vaseyya.
477-8. г̇аамо згуубажаарод̇иаад̣̇и авиббаваасалагкан̣ававад̇т̇аабанад̇т̇ам̣ вуд̇д̇ам̣. д̇ад̇о барам̣ яат̇ааггамзна д̇аанзва баннараса маад̇игаабад̣̇аани вид̇т̇аарзнд̇о ‘‘г̇аамо згуубажааро наамаа’’д̇иаад̣̇имааха. д̇ад̇т̇а згагуласса г̇аамод̇и згасса ран̃н̃о ваа бхож̇агасса ваа г̇аамо. баригкид̇д̇од̇и язна гзнажи баагаарзна ваа вад̇ияаа ваа баригкааяа ваа баригкид̇д̇о. зд̇д̇аавад̇аа згагулаг̇аамасса згуубажаарад̇аа д̣̇ассид̇аа. анд̇ог̇аамз вад̇т̇аб̣б̣анд̇и зваруубз г̇аамз жийварам̣ нигкибид̇ваа г̇аамаб̣бханд̇арз яат̇ааружид̇з таанз арун̣ам̣ удтаабзд̇ум̣ ваддад̇и. абаригкид̇д̇од̇и иминаа д̇ассзва г̇аамасса наануубажаарад̇аа д̣̇ассид̇аа. зваруубз г̇аамз яасмим̣ гхарз жийварам̣ нигкид̇д̇ам̣, д̇ад̇т̇а вад̇т̇аб̣б̣ам̣. хад̇т̇абаасаа ваа на виж̇ахид̇аб̣б̣анд̇и ат̇а ваа д̇ам̣ гхарам̣ саманд̇ад̇о хад̇т̇абаасаа на виж̇ахид̇аб̣б̣ам̣, ад̣дхад̇зяяарад̇анаббамаан̣аббад̣̇зсаа уд̣̇д̇хам̣ на виж̇ахид̇аб̣б̣анд̇и вуд̇д̇ам̣ ход̇и. ад̣дхад̇зяяарад̇анаб̣бханд̇арз бана вад̇т̇ум̣ ваддад̇и. д̇ам̣ бамаан̣ам̣ ад̇иггамид̇ваа сажзби ид̣̇д̇химаа бхигкуу аагаасз арун̣ам̣ удтаабзд̇и, ниссаг̇г̇ияамзва ход̇и. зд̇т̇а жа яасмим̣ гхарзд̇и гхарабарижчзд̣̇о ‘‘згагуласса нивзсанам̣ ход̇ий’’д̇иаад̣̇инаа (баараа. 480) лагкан̣зна взд̣̇ид̇аб̣б̣о.
477-8.Gāmo ekūpacārotiādi avippavāsalakkhaṇavavatthāpanatthaṃ vuttaṃ. Tato paraṃ yathākkamena tāneva pannarasa mātikāpadāni vitthārento ‘‘gāmo ekūpacāro nāmā’’tiādimāha. Tattha ekakulassa gāmoti ekassa rañño vā bhojakassa vā gāmo. Parikkhittoti yena kenaci pākārena vā vatiyā vā parikkhāya vā parikkhitto. Ettāvatā ekakulagāmassa ekūpacāratā dassitā. Antogāme vatthabbanti evarūpe gāme cīvaraṃ nikkhipitvā gāmabbhantare yathārucite ṭhāne aruṇaṃ uṭṭhāpetuṃ vaṭṭati. Aparikkhittoti iminā tasseva gāmassa nānūpacāratā dassitā. Evarūpe gāme yasmiṃ ghare cīvaraṃ nikkhittaṃ, tattha vatthabbaṃ. Hatthapāsā vā na vijahitabbanti atha vā taṃ gharaṃ samantato hatthapāsā na vijahitabbaṃ, aḍḍhateyyaratanappamāṇappadesā uddhaṃ na vijahitabbanti vuttaṃ hoti. Aḍḍhateyyaratanabbhantare pana vatthuṃ vaṭṭati. Taṃ pamāṇaṃ atikkamitvā sacepi iddhimā bhikkhū ākāse aruṇaṃ uṭṭhāpeti, nissaggiyameva hoti. Ettha ca yasmiṃ ghareti gharaparicchedo ‘‘ekakulassa nivesanaṃ hotī’’tiādinā (pārā. 480) lakkhaṇena veditabbo.
479. наанаагуласса г̇аамод̇и наанаарааж̇уунам̣ ваа бхож̇агаанам̣ ваа г̇аамо, взсаалигусинаараад̣̇исад̣̇исо. баригкид̇д̇од̇и иминаа наанаагулаг̇аамасса згуубажаарад̇аа д̣̇ассид̇аа. сабхааяз ваа д̣̇ваарамуулз ваад̇и зд̇т̇а сабхааяанд̇и лин̇г̇аб̣яад̇д̇аязна сабхаа вуд̇д̇аа. д̣̇ваарамуулзд̇и наг̇арад̣̇ваарасса самийбз. ид̣̇ам̣ вуд̇д̇ам̣ ход̇и – зваруубз г̇аамз яасмим̣ гхарз жийварам̣ нигкид̇д̇ам̣, д̇ад̇т̇а ваа вад̇т̇аб̣б̣ам̣. д̇ад̇т̇а сад̣̇д̣̇асан̇гхадданзна ваа ж̇анасамб̣аад̇хзна ваа васид̇ум̣ асаггонд̇зна сабхааяз ваа вад̇т̇аб̣б̣ам̣ наг̇арад̣̇ваарамуулз ваа. д̇ад̇раби васид̇ум̣ асаггонд̇зна яад̇т̇а гад̇т̇ажи паасугадтаанз васид̇ваа анд̇оарун̣з ааг̇амма д̇зсам̣язва сабхааяад̣̇ваарамуулаанам̣ хад̇т̇абаасаа ваа на виж̇ахид̇аб̣б̣ам̣. гхарасса бана жийварасса ваа хад̇т̇абаасз вад̇д̇аб̣б̣амзва над̇т̇и.
479.Nānākulassagāmoti nānārājūnaṃ vā bhojakānaṃ vā gāmo, vesālikusinārādisadiso. Parikkhittoti iminā nānākulagāmassa ekūpacāratā dassitā. Sabhāye vā dvāramūle vāti ettha sabhāyanti liṅgabyattayena sabhā vuttā. Dvāramūleti nagaradvārassa samīpe. Idaṃ vuttaṃ hoti – evarūpe gāme yasmiṃ ghare cīvaraṃ nikkhittaṃ, tattha vā vatthabbaṃ. Tattha saddasaṅghaṭṭanena vā janasambādhena vā vasituṃ asakkontena sabhāye vā vatthabbaṃ nagaradvāramūle vā. Tatrapi vasituṃ asakkontena yattha katthaci phāsukaṭṭhāne vasitvā antoaruṇe āgamma tesaṃyeva sabhāyadvāramūlānaṃ hatthapāsā vā na vijahitabbaṃ. Gharassa pana cīvarassa vā hatthapāse vattabbameva natthi.
сабхааяам̣ г̇ажчанд̇зна хад̇т̇абаасз жийварам̣ нигкибид̇ваад̇и сажз гхарз адтабзд̇ваа сабхааяз табзссаамийд̇и сабхааяам̣ г̇ажчад̇и, д̇зна сабхааяам̣ г̇ажчанд̇зна хад̇т̇абаасзд̇и хад̇т̇ам̣ басаарзд̇ваа ‘‘ханд̣̇имам̣ жийварам̣ табзмий’’д̇и звам̣ нигкзбасукз хад̇т̇абаасаг̇ад̇з гисмин̃жи аабан̣з жийварам̣ нигкибид̇ваа буриманаязнзва сабхааяз ваа вад̇т̇аб̣б̣ам̣ д̣̇ваарамуулз ваа, хад̇т̇абаасаа ваа на виж̇ахид̇аб̣б̣ам̣.
Sabhāyaṃ gacchantena hatthapāse cīvaraṃ nikkhipitvāti sace ghare aṭṭhapetvā sabhāye ṭhapessāmīti sabhāyaṃ gacchati, tena sabhāyaṃ gacchantena hatthapāseti hatthaṃ pasāretvā ‘‘handimaṃ cīvaraṃ ṭhapemī’’ti evaṃ nikkhepasukhe hatthapāsagate kismiñci āpaṇe cīvaraṃ nikkhipitvā purimanayeneva sabhāye vā vatthabbaṃ dvāramūle vā, hatthapāsā vā na vijahitabbaṃ.
д̇ад̇рааяам̣ винижчаяо – пуссад̣̇звад̇т̇зро д̇аава ааха – ‘‘жийварахад̇т̇абаасз васид̇аб̣б̣ам̣ над̇т̇и, яад̇т̇а гад̇т̇ажи вийт̇ихад̇т̇абаасзби сабхааяахад̇т̇абаасзби д̣̇ваарахад̇т̇абаасзби васид̇ум̣ ваддад̇ий’’д̇и. убад̇иссад̇т̇зро банааха – ‘‘наг̇арасса б̣ахууниби д̣̇ваараани хонд̇и б̣ахууниби сабхааяаани, д̇асмаа саб̣б̣ад̇т̇а на ваддад̇и. яассаа бана вийт̇ияаа жийварам̣ табид̇ам̣ яам̣ д̇ассаа саммукадтаанз сабхааяан̃жа д̣̇вааран̃жа д̇асса сабхааяасса жа д̣̇ваарасса жа хад̇т̇абаасаа на виж̇ахид̇аб̣б̣ам̣. зван̃хи сад̇и саггаа жийварасса бавад̇д̇и ж̇аанид̇у’’нд̇и. сабхааяам̣ бана г̇ажчанд̇зна яасса аабан̣игасса хад̇т̇з нигкид̇д̇ам̣, сажз со д̇ам̣ жийварам̣ ад̇ихарид̇ваа гхарз нигкибад̇и, вийт̇ихад̇т̇абаасо на рагкад̇и, гхарасса хад̇т̇абаасз вад̇т̇аб̣б̣ам̣. сажз маханд̇ам̣ гхарам̣ ход̇и, д̣̇вз вийт̇ияо парид̇ваа тид̇ам̣ бурад̇о ваа бажчад̇о ваа хад̇т̇абаасзязва арун̣ам̣ удтаабзд̇аб̣б̣ам̣. сабхааяз нигкибид̇ваа бана сабхааяз ваа д̇асса саммукз наг̇арад̣̇ваарамуулз ваа д̇зсам̣язва хад̇т̇абаасз ваа арун̣ам̣ удтаабзд̇аб̣б̣ам̣.
Tatrāyaṃ vinicchayo – phussadevatthero tāva āha – ‘‘cīvarahatthapāse vasitabbaṃ natthi, yattha katthaci vīthihatthapāsepi sabhāyahatthapāsepi dvārahatthapāsepi vasituṃ vaṭṭatī’’ti. Upatissatthero panāha – ‘‘nagarassa bahūnipi dvārāni honti bahūnipi sabhāyāni, tasmā sabbattha na vaṭṭati. Yassā pana vīthiyā cīvaraṃ ṭhapitaṃ yaṃ tassā sammukhaṭṭhāne sabhāyañca dvārañca tassa sabhāyassa ca dvārassa ca hatthapāsā na vijahitabbaṃ. Evañhi sati sakkā cīvarassa pavatti jānitu’’nti. Sabhāyaṃ pana gacchantena yassa āpaṇikassa hatthe nikkhittaṃ, sace so taṃ cīvaraṃ atiharitvā ghare nikkhipati, vīthihatthapāso na rakkhati, gharassa hatthapāse vatthabbaṃ. Sace mahantaṃ gharaṃ hoti, dve vīthiyo pharitvā ṭhitaṃ purato vā pacchato vā hatthapāseyeva aruṇaṃ uṭṭhāpetabbaṃ. Sabhāye nikkhipitvā pana sabhāye vā tassa sammukhe nagaradvāramūle vā tesaṃyeva hatthapāse vā aruṇaṃ uṭṭhāpetabbaṃ.
абаригкид̇д̇од̇ииминаа д̇ассзва г̇аамасса наануубажаарад̇аа д̣̇ассид̇аа. зд̇знзвубааязна саб̣б̣ад̇т̇а згуубажаарад̇аа жа наануубажаарад̇аа жа взд̣̇ид̇аб̣б̣аа. баал̣ияам̣ бана ‘‘г̇аамо згуубажааро наамаа’’д̇и звам̣ аад̣̇имхи ‘‘аж̇жхогаасо згуубажааро наамаа’’д̇и звам̣ анд̇з жа згамзва маад̇игаабад̣̇ам̣ уд̣̇д̇харид̇ваа бад̣̇абхааж̇анам̣ вид̇т̇аарид̇ам̣. д̇асмаа д̇ассзва бад̣̇ассаанусаарзна саб̣б̣ад̇т̇а баригкзбаад̣̇ивасзна згуубажаарад̇аа жа наануубажаарад̇аа жа взд̣̇ид̇аб̣б̣аа.
Aparikkhittotiiminā tasseva gāmassa nānūpacāratā dassitā. Etenevupāyena sabbattha ekūpacāratā ca nānūpacāratā ca veditabbā. Pāḷiyaṃ pana ‘‘gāmo ekūpacāro nāmā’’ti evaṃ ādimhi ‘‘ajjhokāso ekūpacāro nāmā’’ti evaṃ ante ca ekameva mātikāpadaṃ uddharitvā padabhājanaṃ vitthāritaṃ. Tasmā tasseva padassānusārena sabbattha parikkhepādivasena ekūpacāratā ca nānūpacāratā ca veditabbā.
480-1. нивзсанаад̣̇ийсу оварагаад̇и г̇аб̣бхаанам̣язвзд̇ам̣ барияааяаважанам̣. хад̇т̇абаасаа ваад̇и г̇аб̣бхасса хад̇т̇абаасаа. д̣̇ваарамуулз ваад̇и саб̣б̣зсам̣ саад̇хааран̣з гхарад̣̇ваарамуулз. хад̇т̇абаасаа ваад̇и г̇аб̣бхасса ваа гхарад̣̇ваарамууласса ваа хад̇т̇абаасаа.
480-1.Nivesanādīsuovarakāti gabbhānaṃyevetaṃ pariyāyavacanaṃ. Hatthapāsā vāti gabbhassa hatthapāsā. Dvāramūle vāti sabbesaṃ sādhāraṇe gharadvāramūle. Hatthapāsā vāti gabbhassa vā gharadvāramūlassa vā hatthapāsā.
482-7. уд̣̇осид̇од̇и яаанаад̣̇ийнам̣ бхан̣д̣аанам̣ саалаа. ид̇о бадтааяа жа нивзсанз вуд̇д̇анаязнзва винижчаяо взд̣̇ид̇аб̣б̣о. аддод̇и бадирааж̇аад̣̇ибадиб̣ааханад̇т̇ам̣ идтагаахи гад̇о б̣ахалабхид̇д̇иго жад̇убан̃жабхуумиго бад̇иссаяависзсо. маал̣од̇и згагуудасан̇г̇ахид̇о жад̇урассабаасаад̣̇о. баасаад̣̇од̇и д̣̇ийгхабаасаад̣̇о. хаммияанд̇и мун̣д̣ажчад̣̇анабаасаад̣̇о.
482-7.Udositoti yānādīnaṃ bhaṇḍānaṃ sālā. Ito paṭṭhāya ca nivesane vuttanayeneva vinicchayo veditabbo. Aṭṭoti paṭirājādipaṭibāhanatthaṃ iṭṭhakāhi kato bahalabhittiko catupañcabhūmiko patissayaviseso. Māḷoti ekakūṭasaṅgahito caturassapāsādo. Pāsādoti dīghapāsādo. Hammiyanti muṇḍacchadanapāsādo.
489. сад̇д̇аб̣бханд̇араад̇изд̇т̇а згам̣ аб̣бханд̇арам̣ адтавийсад̇ихад̇т̇ам̣ ход̇и. сажз сад̇т̇о г̇ажчанд̇о г̇аамам̣ ваа над̣̇им̣ ваа барияаад̣̇ияид̇ваа д̇идтад̇и анд̇обавидтзна сад̣̇д̇хим̣ згааб̣ад̣̇д̇хо худ̇ваа оран̃жа бааран̃жа парид̇ваа тид̇о ход̇и, сад̇т̇абарихаарова лаб̣бхад̇и. ат̇а г̇аамз ваа над̣̇ияаа ваа барияаабанно ход̇и анд̇обавидто , г̇аамабарихааро жзва над̣̇ийбарихааро жа лаб̣бхад̇и. сажз вихаарасиймам̣ ад̇иггамид̇ваа д̇идтад̇и, анд̇осиймааяа жа жийварам̣ ход̇и, вихаарам̣ г̇анд̇ваа васид̇аб̣б̣ам̣. сажз б̣ахисиймааяа жийварам̣ ход̇и сад̇т̇асамийбзязва васид̇аб̣б̣ам̣. сажз г̇ажчанд̇о сагадз ваа бхаг̇г̇з г̇он̣з ваа надтз анд̇араа чиж̇ж̇ад̇и, яасмим̣ годтаасз жийварам̣ д̇ад̇т̇а васид̇аб̣б̣ам̣.
489.Sattabbhantarātiettha ekaṃ abbhantaraṃ aṭṭhavīsatihatthaṃ hoti. Sace sattho gacchanto gāmaṃ vā nadiṃ vā pariyādiyitvā tiṭṭhati antopaviṭṭhena saddhiṃ ekābaddho hutvā orañca pārañca pharitvā ṭhito hoti, satthaparihārova labbhati. Atha gāme vā nadiyā vā pariyāpanno hoti antopaviṭṭho , gāmaparihāro ceva nadīparihāro ca labbhati. Sace vihārasīmaṃ atikkamitvā tiṭṭhati, antosīmāya ca cīvaraṃ hoti, vihāraṃ gantvā vasitabbaṃ. Sace bahisīmāya cīvaraṃ hoti satthasamīpeyeva vasitabbaṃ. Sace gacchanto sakaṭe vā bhagge goṇe vā naṭṭhe antarā chijjati, yasmiṃ koṭṭhāse cīvaraṃ tattha vasitabbaṃ.
490. згагуласса кзд̇д̇з хад̇т̇абаасо наама жийварахад̇т̇абаасоязва, наанаагуласса кзд̇д̇з хад̇т̇абаасо наама кзд̇д̇ад̣̇ваарасса хад̇т̇абаасо. абаригкид̇д̇з жийварассзва хад̇т̇абаасо.
490. Ekakulassa khette hatthapāso nāma cīvarahatthapāsoyeva, nānākulassa khette hatthapāso nāma khettadvārassa hatthapāso. Aparikkhitte cīvarasseva hatthapāso.
491-4. д̇хан̃н̃агаран̣анд̇и калам̣ вужжад̇и. аараамод̇и бубпаараамо ваа палаараамо ваа. д̣̇вийсуби кзд̇д̇з вуд̇д̇асад̣̇исова винижчаяо. вихааро нивзсанасад̣̇исо. ругкамуулз анд̇очааяааяанд̇и чааяааяа пудтогаасасса анд̇о зва. вирал̣асаакасса бана ругкасса аад̇абзна пудтогаасз табид̇ам̣ ниссаг̇г̇ияамзва ход̇и, д̇асмаа д̇аад̣̇исасса саакаажчааяааяа ваа канд̇хажчааяааяа ваа табзд̇аб̣б̣ам̣. сажз саакааяа ваа видабз ваа табзд̇и, убари ан̃н̃асаакаажчааяааяа пудтогаасзязва табзд̇аб̣б̣ам̣. куж̇ж̇аругкасса чааяаа д̣̇уурам̣ г̇ажчад̇и, чааяааяа г̇ад̇адтаанз табзд̇ум̣ ваддад̇иязва. ид̇хааби хад̇т̇абаасо жийварахад̇т̇абаасоязва.
491-4.Dhaññakaraṇanti khalaṃ vuccati. Ārāmoti pupphārāmo vā phalārāmo vā. Dvīsupi khette vuttasadisova vinicchayo. Vihāro nivesanasadiso. Rukkhamūle antochāyāyanti chāyāya phuṭṭhokāsassa anto eva. Viraḷasākhassa pana rukkhassa ātapena phuṭṭhokāse ṭhapitaṃ nissaggiyameva hoti, tasmā tādisassa sākhācchāyāya vā khandhacchāyāya vā ṭhapetabbaṃ. Sace sākhāya vā viṭape vā ṭhapeti, upari aññasākhācchāyāya phuṭṭhokāseyeva ṭhapetabbaṃ. Khujjarukkhassa chāyā dūraṃ gacchati, chāyāya gataṭṭhāne ṭhapetuṃ vaṭṭatiyeva. Idhāpi hatthapāso cīvarahatthapāsoyeva.
аг̇аамагз аран̃н̃зд̇и аг̇аамагам̣ наама аран̃н̃ам̣ вин̃жхаадавийаад̣̇ийсу ваа самуд̣̇д̣̇амаж̇жхз ваа мажчаб̣анд̇хаанам̣ аг̇аманабат̇з д̣̇ийбагзсу лаб̣бхад̇и. саманд̇аа сад̇д̇аб̣бханд̇араад̇и маж̇жхз тид̇асса самад̇д̇аа саб̣б̣ад̣̇исаасу сад̇д̇аб̣бханд̇араа, виниб̣б̣зд̇хзна жуд̣̇д̣̇аса хонд̇и. маж̇жхз нисинно бурад̇т̇имааяа ваа бажчимааяа ваа д̣̇исааяа барияанд̇з табид̇ажийварам̣ рагкад̇и. сажз бана арун̣уг̇г̇аманасамаяз гзсаг̇г̇амад̇д̇амби бурад̇т̇имам̣ д̣̇исам̣ г̇ажчад̇и, бажчимааяа д̣̇исааяа жийварам̣ ниссаг̇г̇ияам̣ ход̇и. зса наяо ид̇арасмим̣. убосат̇агаалз бана барисабарияанд̇з нисиннабхигкуд̇о бадтааяа сад̇д̇аб̣бханд̇арасиймаа сод̇хзд̇аб̣б̣аа. яад̇д̇агам̣ бхигкусан̇гхо вад̣дхад̇и, сиймааби д̇ад̇д̇агам̣ вад̣дхад̇и.
Agāmake araññeti agāmakaṃ nāma araññaṃ viñjhāṭavīādīsu vā samuddamajjhe vā macchabandhānaṃ agamanapathe dīpakesu labbhati. Samantā sattabbhantarāti majjhe ṭhitassa samattā sabbadisāsu sattabbhantarā, vinibbedhena cuddasa honti. Majjhe nisinno puratthimāya vā pacchimāya vā disāya pariyante ṭhapitacīvaraṃ rakkhati. Sace pana aruṇuggamanasamaye kesaggamattampi puratthimaṃ disaṃ gacchati, pacchimāya disāya cīvaraṃ nissaggiyaṃ hoti. Esa nayo itarasmiṃ. Uposathakāle pana parisapariyante nisinnabhikkhuto paṭṭhāya sattabbhantarasīmā sodhetabbā. Yattakaṃ bhikkhusaṅgho vaḍḍhati, sīmāpi tattakaṃ vaḍḍhati.
495. аниссаж̇ж̇ид̇ваа барибхун̃ж̇ад̇и аабад̇д̇и д̣̇уггадассаад̇и зд̇т̇а сажз бад̇хааниго бхигку саб̣б̣арад̇д̇им̣ бад̇хаанамануяун̃ж̇ид̇ваа бажжусасамаяз ‘‘нхааяиссаамий’’д̇и д̇ийн̣иби жийвараани д̇ийрз табзд̇ваа над̣̇им̣ од̇арад̇и, нхааяанд̇ассзва жасса арун̣ам̣ удтахад̇и, гим̣ гаад̇аб̣б̣ам̣. со хи яад̣̇и уд̇д̇арид̇ваа жийварам̣ ниваасзд̇и, ниссаг̇г̇ияажийварам̣ аниссаж̇ж̇ид̇ваа барибхун̃ж̇анабажжаяаа д̣̇уггадам̣ аабаж̇ж̇ад̇и. ат̇а наг̇г̇о г̇ажчад̇и, звамби д̣̇уггадам̣ аабаж̇ж̇ад̇ийд̇и? на аабаж̇ж̇ад̇и. со хи яаава ан̃н̃ам̣ бхигкум̣ д̣̇исваа винаяагаммам̣ на гарод̇и, д̇аава д̇зсам̣ жийвараанам̣ абарибхог̇аарахад̇д̇аа надтажийварадтаанз тид̇о ход̇и. надтажийварасса жа агаббияам̣ наама над̇т̇и. д̇асмаа згам̣ ниваасзд̇ваа д̣̇вз хад̇т̇зна г̇ахзд̇ваа вихаарам̣ г̇анд̇ваа винаяагаммам̣ гаад̇аб̣б̣ам̣. сажз д̣̇уурз вихааро ход̇и, анд̇араамаг̇г̇з мануссаа сан̃жаранд̇и. згам̣ ниваасзд̇ваа згам̣ баарубид̇ваа згам̣ ам̣сагуудз табзд̇ваа г̇анд̇аб̣б̣ам̣. сажз вихаарз сабхааг̇абхигкуу на бассад̇и, бхигкаажаарам̣ г̇ад̇аа хонд̇и, сан̇гхаадим̣ б̣ахиг̇аамз табзд̇ваа санд̇аруд̇д̇арзна аасанасаалам̣ г̇анд̇ваа винаяагаммам̣ гаад̇аб̣б̣ам̣. сажз б̣ахиг̇аамз жорабхаяам̣ ход̇и, баарубид̇ваа г̇анд̇аб̣б̣ам̣. сажз аасанасаалаа самб̣аад̇хаа ход̇и ж̇анаагин̣н̣аа, на саггаа згаманд̇з жийварам̣ абанзд̇ваа винаяагаммам̣ гаад̇ум̣, згам̣ бхигкум̣ аад̣̇ааяа б̣ахиг̇аамам̣ г̇анд̇ваа винаяагаммам̣ гад̇ваа жийвараани барибхун̃ж̇ид̇аб̣б̣аани.
495.Anissajjitvā paribhuñjati āpatti dukkaṭassāti ettha sace padhāniko bhikkhu sabbarattiṃ padhānamanuyuñjitvā paccusasamaye ‘‘nhāyissāmī’’ti tīṇipi cīvarāni tīre ṭhapetvā nadiṃ otarati, nhāyantasseva cassa aruṇaṃ uṭṭhahati, kiṃ kātabbaṃ. So hi yadi uttaritvā cīvaraṃ nivāseti, nissaggiyacīvaraṃ anissajjitvā paribhuñjanapaccayā dukkaṭaṃ āpajjati. Atha naggo gacchati, evampi dukkaṭaṃ āpajjatīti? Na āpajjati. So hi yāva aññaṃ bhikkhuṃ disvā vinayakammaṃ na karoti, tāva tesaṃ cīvarānaṃ aparibhogārahattā naṭṭhacīvaraṭṭhāne ṭhito hoti. Naṭṭhacīvarassa ca akappiyaṃ nāma natthi. Tasmā ekaṃ nivāsetvā dve hatthena gahetvā vihāraṃ gantvā vinayakammaṃ kātabbaṃ. Sace dūre vihāro hoti, antarāmagge manussā sañcaranti. Ekaṃ nivāsetvā ekaṃ pārupitvā ekaṃ aṃsakūṭe ṭhapetvā gantabbaṃ. Sace vihāre sabhāgabhikkhū na passati, bhikkhācāraṃ gatā honti, saṅghāṭiṃ bahigāme ṭhapetvā santaruttarena āsanasālaṃ gantvā vinayakammaṃ kātabbaṃ. Sace bahigāme corabhayaṃ hoti, pārupitvā gantabbaṃ. Sace āsanasālā sambādhā hoti janākiṇṇā, na sakkā ekamante cīvaraṃ apanetvā vinayakammaṃ kātuṃ, ekaṃ bhikkhuṃ ādāya bahigāmaṃ gantvā vinayakammaṃ katvā cīvarāni paribhuñjitabbāni.
сажз бхигкуу д̣̇ахараанам̣ хад̇т̇з бад̇д̇ажийварам̣ д̣̇ад̇ваа маг̇г̇ам̣ г̇ажчанд̇аа бажчимз яаамз саяид̇угаамаа хонд̇и, ад̇д̇ано ад̇д̇ано жийварам̣ хад̇т̇абаасз гад̇ваава саяид̇аб̣б̣ам̣. сажз г̇ажчанд̇аанам̣язва асамбад̇д̇зсу д̣̇ахарзсу арун̣ам̣ уг̇г̇ажчад̇и, жийварам̣ ниссаг̇г̇ияам̣ ход̇и, ниссаяо бана на бадиббассамбхад̇и, д̣̇ахараанамби бурад̇о г̇ажчанд̇аанам̣ т̇зрзсу асамбад̇д̇зсу зсзва наяо. маг̇г̇ам̣ вираж̇жхид̇ваа аран̃н̃з ан̃н̃аман̃н̃ам̣ абассанд̇зсуби зсзва наяо. сажз бана д̣̇ахараа ‘‘маяам̣, бханд̇з, мухуд̇д̇ам̣ саяид̇ваа асугасмим̣ наама огаасз д̇умхз самбаабун̣иссаамаа’’д̇и вад̇ваа яаава арун̣уг̇г̇аманаа саяанд̇и, жийваран̃жа ниссаг̇г̇ияам̣ ход̇и, ниссаяо жа бадиббассамбхад̇и, д̣̇ахарз уяяож̇зд̇ваа т̇зрзсу саяанд̇зсуби зсзва наяо. д̣̇взд̇хаабат̇ам̣ д̣̇исваа т̇зраа ‘‘аяам̣ маг̇г̇о’’ д̣̇ахараа ‘‘аяам̣ маг̇г̇о’’д̇и вад̇ваа ан̃н̃аман̃н̃асса важанам̣ аг̇г̇ахзд̇ваа г̇ад̇аа, саха арун̣уг̇г̇аманаа жийвараани жа ниссаг̇г̇ияаани хонд̇и , ниссаяо жа бадиббассамбхад̇и. сажз д̣̇ахараа маг̇г̇ад̇о оггамма ‘‘анд̇оарун̣зязва нивад̇д̇иссаамаа’’д̇и бхзсаж̇ж̇ад̇т̇ааяа г̇аамам̣ бависид̇ваа ааг̇ажчанд̇и. асамбад̇д̇аанам̣язва жа д̇зсам̣ арун̣о уг̇г̇ажчад̇и, жийвараани ниссаг̇г̇ияаани хонд̇и, ниссаяо бана на бадиббассамбхад̇и. сажз бана д̇хзнубхаязна ваа сунакабхаязна ваа ‘‘мухуд̇д̇ам̣ тад̇ваа г̇амиссаамаа’’д̇и тад̇ваа ваа нисийд̣̇ид̇ваа ваа г̇ажчанд̇и, анд̇араа арун̣з уг̇г̇ад̇з жийвараани ниссаг̇г̇ияаани хонд̇и, ниссаяо жа бадиббассамбхад̇и. сажз ‘‘анд̇оарун̣зязва ааг̇амиссаамаа’’д̇и анд̇осиймааяам̣ г̇аамам̣ бавидтаанам̣ анд̇араа арун̣о уг̇г̇ажчад̇и, нзва жийвараани ниссаг̇г̇ияаани хонд̇и, на ниссаяо бадиббассамбхад̇и. сажз бана ‘‘вибхааяад̇у д̇ааваа’’д̇и нисийд̣̇анд̇и, арун̣з уг̇г̇ад̇зби на жийвараани ниссаг̇г̇ияаани хонд̇и, ниссаяо бана бадиббассамбхад̇и. язби ‘‘анд̇оарун̣зязва ааг̇амиссаамаа’’д̇и сааманд̇авихаарам̣ д̇хаммасаванад̇т̇ааяа сауссаахаа г̇ажчанд̇и, анд̇араамаг̇г̇зязва жа нзсам̣ арун̣о уг̇г̇ажчад̇и, жийвараани ниссаг̇г̇ияаани хонд̇и, ниссаяо бана на бадиббассамбхад̇и. сажз д̇хаммаг̇ааравзна ‘‘яаава барияосаанам̣ суд̇ваава г̇амиссаамаа’’д̇и нисийд̣̇анд̇и, саха арун̣ассуг̇г̇аманаа жийварааниби ниссаг̇г̇ияаани хонд̇и, ниссаяоби бадиббассамбхад̇и. т̇зрзна д̣̇ахарам̣ жийварад̇хованад̇т̇ааяа г̇аамагам̣ бзсзнд̇зна ад̇д̇ано жийварам̣ бажжуд̣̇д̇харид̇ваава д̣̇аад̇аб̣б̣ам̣. д̣̇ахарассааби жийварам̣ бажжуд̣̇д̇хараабзд̇ваа табзд̇аб̣б̣ам̣. сажз ассад̇ияаа г̇ажчад̇и, ад̇д̇ано жийварам̣ бажжуд̣̇д̇харид̇ваа д̣̇ахарасса жийварам̣ виссаасзна г̇ахзд̇ваа табзд̇аб̣б̣ам̣. сажз т̇зро нассарад̇и, д̣̇ахаро зва сарад̇и, д̣̇ахарзна ад̇д̇ано жийварам̣ бажжуд̣̇д̇харид̇ваа т̇зрасса жийварам̣ виссаасзна г̇ахзд̇ваа г̇анд̇ваа вад̇д̇аб̣б̣о ‘‘бханд̇з, д̇умхаагам̣ жийварам̣ ад̇хидтахид̇ваа барибхун̃ж̇ат̇аа’’д̇и ад̇д̇аноби жийварам̣ ад̇хидтаад̇аб̣б̣ам̣. звам̣ згасса сад̇ияааби аабад̇д̇имогко ход̇ийд̇и. сзсам̣ уд̇д̇аанад̇т̇амзва .
Sace bhikkhū daharānaṃ hatthe pattacīvaraṃ datvā maggaṃ gacchantā pacchime yāme sayitukāmā honti, attano attano cīvaraṃ hatthapāse katvāva sayitabbaṃ. Sace gacchantānaṃyeva asampattesu daharesu aruṇaṃ uggacchati, cīvaraṃ nissaggiyaṃ hoti, nissayo pana na paṭippassambhati, daharānampi purato gacchantānaṃ theresu asampattesu eseva nayo. Maggaṃ virajjhitvā araññe aññamaññaṃ apassantesupi eseva nayo. Sace pana daharā ‘‘mayaṃ, bhante, muhuttaṃ sayitvā asukasmiṃ nāma okāse tumhe sampāpuṇissāmā’’ti vatvā yāva aruṇuggamanā sayanti, cīvarañca nissaggiyaṃ hoti, nissayo ca paṭippassambhati, dahare uyyojetvā theresu sayantesupi eseva nayo. Dvedhāpathaṃ disvā therā ‘‘ayaṃ maggo’’ daharā ‘‘ayaṃ maggo’’ti vatvā aññamaññassa vacanaṃ aggahetvā gatā, saha aruṇuggamanā cīvarāni ca nissaggiyāni honti , nissayo ca paṭippassambhati. Sace daharā maggato okkamma ‘‘antoaruṇeyeva nivattissāmā’’ti bhesajjatthāya gāmaṃ pavisitvā āgacchanti. Asampattānaṃyeva ca tesaṃ aruṇo uggacchati, cīvarāni nissaggiyāni honti, nissayo pana na paṭippassambhati. Sace pana dhenubhayena vā sunakhabhayena vā ‘‘muhuttaṃ ṭhatvā gamissāmā’’ti ṭhatvā vā nisīditvā vā gacchanti, antarā aruṇe uggate cīvarāni nissaggiyāni honti, nissayo ca paṭippassambhati. Sace ‘‘antoaruṇeyeva āgamissāmā’’ti antosīmāyaṃ gāmaṃ paviṭṭhānaṃ antarā aruṇo uggacchati, neva cīvarāni nissaggiyāni honti, na nissayo paṭippassambhati. Sace pana ‘‘vibhāyatu tāvā’’ti nisīdanti, aruṇe uggatepi na cīvarāni nissaggiyāni honti, nissayo pana paṭippassambhati. Yepi ‘‘antoaruṇeyeva āgamissāmā’’ti sāmantavihāraṃ dhammasavanatthāya saussāhā gacchanti, antarāmaggeyeva ca nesaṃ aruṇo uggacchati, cīvarāni nissaggiyāni honti, nissayo pana na paṭippassambhati. Sace dhammagāravena ‘‘yāva pariyosānaṃ sutvāva gamissāmā’’ti nisīdanti, saha aruṇassuggamanā cīvarānipi nissaggiyāni honti, nissayopi paṭippassambhati. Therena daharaṃ cīvaradhovanatthāya gāmakaṃ pesentena attano cīvaraṃ paccuddharitvāva dātabbaṃ. Daharassāpi cīvaraṃ paccuddharāpetvā ṭhapetabbaṃ. Sace assatiyā gacchati, attano cīvaraṃ paccuddharitvā daharassa cīvaraṃ vissāsena gahetvā ṭhapetabbaṃ. Sace thero nassarati, daharo eva sarati, daharena attano cīvaraṃ paccuddharitvā therassa cīvaraṃ vissāsena gahetvā gantvā vattabbo ‘‘bhante, tumhākaṃ cīvaraṃ adhiṭṭhahitvā paribhuñjathā’’ti attanopi cīvaraṃ adhiṭṭhātabbaṃ. Evaṃ ekassa satiyāpi āpattimokkho hotīti. Sesaṃ uttānatthameva .
самудтаанаад̣̇ийсу батамагат̇инасигкаабад̣̇з анад̇хидтаанам̣ авигаббанан̃жа агирияам̣, ид̇ха абажжуд̣̇д̇харан̣ам̣ аяамзва висзсо. сзсам̣ саб̣б̣ад̇т̇а вуд̇д̇анаяамзваад̇и.
Samuṭṭhānādīsu paṭhamakathinasikkhāpade anadhiṭṭhānaṃ avikappanañca akiriyaṃ, idha apaccuddharaṇaṃ ayameva viseso. Sesaṃ sabbattha vuttanayamevāti.
уд̣̇осид̇асигкаабад̣̇аван̣н̣анаа нидтид̇аа.
Udositasikkhāpadavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 2. уд̣̇осид̇асигкаабад̣̇ам̣ • 2. Udositasikkhāpadaṃ
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / 2. уд̣̇осид̇асигкаабад̣̇аван̣н̣анаа • 2. Udositasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 2. уд̣̇осид̇асигкаабад̣̇аван̣н̣анаа • 2. Udositasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / 2. уд̣̇осид̇асигкаабад̣̇аван̣н̣анаа • 2. Udositasikkhāpadavaṇṇanā
