| Library / Tipiṭaka / တိပိဋက • Tipiṭaka / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā |
၂. ဥဒောသိတသိက္ခာပဒဝဏ္ဏနာ
2. Udositasikkhāpadavaṇṇanā
၄၇၁. တေန သမယေန ဗုဒ္ဓော ဘဂဝာတိ ဥဒောသိတသိက္ခာပဒံ။ တတ္ထ သန္တရုတ္တရေနာတိ အန္တရန္တိ အန္တရဝာသကော ဝုစ္စတိ, ဥတ္တရန္တိ ဥတ္တရာသင္ဂော, သဟ အန္တရေန ဥတ္တရံ သန္တရုတ္တရံ, တေန သန္တရုတ္တရေန, သဟ အန္တရဝာသကေန ဥတ္တရာသင္ဂေနာတိ အတ္ထော။ ကဏ္ဏကိတာနီတိ သေဒေန ဖုဋ္ဌောကာသေသု သဉ္ဇာတကာဠသေတမဏ္ဍလာနိ။ အဒ္ဒသ ခော အာယသ္မာ အာနန္ဒော သေနာသနစာရိကံ အာဟိဏ္ဍန္တောတိ ထေရော ကိရ ဘဂဝတိ ဒိဝာ ပဋိသလ္လာနတ္ထာယ ဂန္ဓကုဋိံ ပဝိဋ္ဌေ တံ ဩကာသံ လဘိတ္ဝာ ဒုန္နိက္ခိတ္တာနိ ဒာရုဘဏ္ဍမတ္တိကာဘဏ္ဍာနိ ပဋိသာမေန္တော အသမ္မဋ္ဌဋ္ဌာနံ သမ္မဇ္ဇန္တော ဂိလာနေဟိ ဘိက္ခူဟိ သဒ္ဓိံ ပဋိသန္ထာရံ ကရောန္တော တေသံ ဘိက္ခူနံ သေနာသနဋ္ဌာနံ သမ္ပတ္တော အဒ္ဒသ။ တေန ဝုတ္တံ – ‘‘အဒ္ဒသ ခော အာယသ္မာ အာနန္ဒော သေနာသနစာရိကံ အာဟိဏ္ဍန္တော’’တိ။
471.Tenasamayena buddho bhagavāti udositasikkhāpadaṃ. Tattha santaruttarenāti antaranti antaravāsako vuccati, uttaranti uttarāsaṅgo, saha antarena uttaraṃ santaruttaraṃ, tena santaruttarena, saha antaravāsakena uttarāsaṅgenāti attho. Kaṇṇakitānīti sedena phuṭṭhokāsesu sañjātakāḷasetamaṇḍalāni. Addasa kho āyasmā ānando senāsanacārikaṃ āhiṇḍantoti thero kira bhagavati divā paṭisallānatthāya gandhakuṭiṃ paviṭṭhe taṃ okāsaṃ labhitvā dunnikkhittāni dārubhaṇḍamattikābhaṇḍāni paṭisāmento asammaṭṭhaṭṭhānaṃ sammajjanto gilānehi bhikkhūhi saddhiṃ paṭisanthāraṃ karonto tesaṃ bhikkhūnaṃ senāsanaṭṭhānaṃ sampatto addasa. Tena vuttaṃ – ‘‘addasa kho āyasmā ānando senāsanacārikaṃ āhiṇḍanto’’ti.
၄၇၃. အဝိပ္ပဝာသသမ္မုတိံ ဒာတုန္တိ အဝိပ္ပဝာသေ သမ္မုတိ အဝိပ္ပဝာသသမ္မုတိ, အဝိပ္ပဝာသာယ ဝာ သမ္မုတိ အဝိပ္ပဝာသသမ္မုတိ။ ကော ပနေတ္ထ အာနိသံသော? ယေန စီဝရေန ဝိပ္ပဝသတိ, တံ နိသ္သဂ္ဂိယံ န ဟောတိ, အာပတ္တိဉ္စ နာပဇ္ဇတိ။ ကိတ္တကံ ကာလံ? မဟာသုမတ္ထေရော တာဝ အာဟ – ‘‘ယာဝ ရောဂော န ဝူပသမတိ, ဝူပသန္တေ ပန ရောဂေ သီဃံ စီဝရဋ္ဌာနံ အာဂန္တဗ္ဗ’’န္တိ ။ မဟာပဒုမတ္ထေရော အာဟ – ‘‘သီဃံ အာဂစ္ဆတော ရောဂော ပဋိကုပ္ပေယ္ယ, တသ္မာ သဏိကံ အာဂန္တဗ္ဗံ။ ယတော ပဋ္ဌာယ ဟိ သတ္ထံ ဝာ ပရိယေသတိ, ‘ဂစ္ဆာမီ’တိ အာဘောဂံ ဝာ ကရောတိ, တတော ပဋ္ဌာယ ဝဋ္ဋတိ။ ‘န ဒာနိ ဂမိသ္သာမီ’တိ ဧဝံ ပန ဓုရနိက္ခေပံ ကရောန္တေန ပစ္စုဒ္ဓရိတဗ္ဗံ, အတိရေကစီဝရဋ္ဌာနေ ဌသ္သတီ’’တိ။ သစေ ပနသ္သ ရောဂော ပဋိကုပ္ပတိ, ကိံ ကာတဗ္ဗန္တိ? ဖုသ္သဒေဝတ္ထေရော တာဝ အာဟ – ‘‘သစေ သောယေဝ ရောဂော ပဋိကုပ္ပတိ, သာ ဧဝ သမ္မုတိ, ပုန သမ္မုတိဒာနကိစ္စံ နတ္ထိ။ အထညော ကုပ္ပတိ, ပုန ဒာတဗ္ဗာ သမ္မုတီ’’တိ။ ဥပတိသ္သတ္ထေရော အာဟ – ‘‘သော ဝာ ရောဂော ဟောတု, အညော ဝာ ပုန သမ္မုတိဒာနကိစ္စံ နတ္ထီ’’တိ။
473.Avippavāsasammutiṃ dātunti avippavāse sammuti avippavāsasammuti, avippavāsāya vā sammuti avippavāsasammuti. Ko panettha ānisaṃso? Yena cīvarena vippavasati, taṃ nissaggiyaṃ na hoti, āpattiñca nāpajjati. Kittakaṃ kālaṃ? Mahāsumatthero tāva āha – ‘‘yāva rogo na vūpasamati, vūpasante pana roge sīghaṃ cīvaraṭṭhānaṃ āgantabba’’nti . Mahāpadumatthero āha – ‘‘sīghaṃ āgacchato rogo paṭikuppeyya, tasmā saṇikaṃ āgantabbaṃ. Yato paṭṭhāya hi satthaṃ vā pariyesati, ‘gacchāmī’ti ābhogaṃ vā karoti, tato paṭṭhāya vaṭṭati. ‘Na dāni gamissāmī’ti evaṃ pana dhuranikkhepaṃ karontena paccuddharitabbaṃ, atirekacīvaraṭṭhāne ṭhassatī’’ti. Sace panassa rogo paṭikuppati, kiṃ kātabbanti? Phussadevatthero tāva āha – ‘‘sace soyeva rogo paṭikuppati, sā eva sammuti, puna sammutidānakiccaṃ natthi. Athañño kuppati, puna dātabbā sammutī’’ti. Upatissatthero āha – ‘‘so vā rogo hotu, añño vā puna sammutidānakiccaṃ natthī’’ti.
၄၇၅-၆. နိဋ္ဌိတစီဝရသ္မိံ ဘိက္ခုနာတိ ဣဓ ပန ပုရိမသိက္ခာပဒေ ဝိယ အတ္ထံ အဂ္ဂဟေတ္ဝာ နိဋ္ဌိတေ စီဝရသ္မိံ ဘိက္ခုနောတိ ဧဝံ သာမိဝသေန ကရဏဝစနသ္သ အတ္ထော ဝေဒိတဗ္ဗော။ ကရဏဝသေန ဟိ ဘိက္ခုနာ ဣဒံ နာမ ကာတဗ္ဗန္တိ နတ္ထိ။ သာမိဝသေန ပန ဘိက္ခုနော စီဝရသ္မိံ နိဋ္ဌိတေ ကထိနေ စ ဥဗ္ဘတေ ဧဝံ ဆိန္နပလိဗောဓော ဧကရတ္တမ္ပိ စေ ဘိက္ခု တိစီဝရေန ဝိပ္ပဝသေယ္ယာတိ ဧဝံ အတ္ထော ယုဇ္ဇတိ။ တတ္ထ တိစီဝရေနာတိ အဓိဋ္ဌိတေသု တီသု စီဝရေသု ယေန ကေနစိ။ ဧကေန ဝိပ္ပဝုတ္ထောပိ ဟိ တိစီဝရေန ဝိပ္ပဝုတ္ထော ဟောတိ, ပဋိသိဒ္ဓပရိယာပန္နေန ဝိပ္ပဝုတ္ထတ္တာ။ တေနေဝသ္သ ပဒဘာဇနေ ‘‘သင္ဃာဋိယာ ဝာ’’တိအာဒိ ဝုတ္တံ။ ဝိပ္ပဝသေယ္ယာတိ ဝိပ္ပယုတ္တော ဝသေယ္ယ။
475-6.Niṭṭhitacīvarasmiṃ bhikkhunāti idha pana purimasikkhāpade viya atthaṃ aggahetvā niṭṭhite cīvarasmiṃ bhikkhunoti evaṃ sāmivasena karaṇavacanassa attho veditabbo. Karaṇavasena hi bhikkhunā idaṃ nāma kātabbanti natthi. Sāmivasena pana bhikkhuno cīvarasmiṃ niṭṭhite kathine ca ubbhate evaṃ chinnapalibodho ekarattampi ce bhikkhu ticīvarena vippavaseyyāti evaṃ attho yujjati. Tattha ticīvarenāti adhiṭṭhitesu tīsu cīvaresu yena kenaci. Ekena vippavutthopi hi ticīvarena vippavuttho hoti, paṭisiddhapariyāpannena vippavutthattā. Tenevassa padabhājane ‘‘saṅghāṭiyā vā’’tiādi vuttaṃ. Vippavaseyyāti vippayutto vaseyya.
၄၇၇-၈. ဂာမော ဧကူပစာရောတိအာဒိ အဝိပ္ပဝာသလက္ခဏဝဝတ္ထာပနတ္ထံ ဝုတ္တံ။ တတော ပရံ ယထာက္ကမေန တာနေဝ ပန္နရသ မာတိကာပဒာနိ ဝိတ္ထာရေန္တော ‘‘ဂာမော ဧကူပစာရော နာမာ’’တိအာဒိမာဟ။ တတ္ထ ဧကကုလသ္သ ဂာမောတိ ဧကသ္သ ရညော ဝာ ဘောဇကသ္သ ဝာ ဂာမော။ ပရိက္ခိတ္တောတိ ယေန ကေနစိ ပာကာရေန ဝာ ဝတိယာ ဝာ ပရိက္ခာယ ဝာ ပရိက္ခိတ္တော။ ဧတ္တာဝတာ ဧကကုလဂာမသ္သ ဧကူပစာရတာ ဒသ္သိတာ။ အန္တောဂာမေ ဝတ္ထဗ္ဗန္တိ ဧဝရူပေ ဂာမေ စီဝရံ နိက္ခိပိတ္ဝာ ဂာမဗ္ဘန္တရေ ယထာရုစိတေ ဌာနေ အရုဏံ ဥဋ္ဌာပေတုံ ဝဋ္ဋတိ။ အပရိက္ခိတ္တောတိ ဣမိနာ တသ္သေဝ ဂာမသ္သ နာနူပစာရတာ ဒသ္သိတာ။ ဧဝရူပေ ဂာမေ ယသ္မိံ ဃရေ စီဝရံ နိက္ခိတ္တံ, တတ္ထ ဝတ္ထဗ္ဗံ။ ဟတ္ထပာသာ ဝာ န ဝိဇဟိတဗ္ဗန္တိ အထ ဝာ တံ ဃရံ သမန္တတော ဟတ္ထပာသာ န ဝိဇဟိတဗ္ဗံ, အဍ္ဎတေယ္ယရတနပ္ပမာဏပ္ပဒေသာ ဥဒ္ဓံ န ဝိဇဟိတဗ္ဗန္တိ ဝုတ္တံ ဟောတိ။ အဍ္ဎတေယ္ယရတနဗ္ဘန္တရေ ပန ဝတ္ထုံ ဝဋ္ဋတိ။ တံ ပမာဏံ အတိက္ကမိတ္ဝာ သစေပိ ဣဒ္ဓိမာ ဘိက္ခူ အာကာသေ အရုဏံ ဥဋ္ဌာပေတိ, နိသ္သဂ္ဂိယမေဝ ဟောတိ။ ဧတ္ထ စ ယသ္မိံ ဃရေတိ ဃရပရိစ္ဆေဒော ‘‘ဧကကုလသ္သ နိဝေသနံ ဟောတီ’’တိအာဒိနာ (ပာရာ. ၄၈၀) လက္ခဏေန ဝေဒိတဗ္ဗော။
477-8.Gāmo ekūpacārotiādi avippavāsalakkhaṇavavatthāpanatthaṃ vuttaṃ. Tato paraṃ yathākkamena tāneva pannarasa mātikāpadāni vitthārento ‘‘gāmo ekūpacāro nāmā’’tiādimāha. Tattha ekakulassa gāmoti ekassa rañño vā bhojakassa vā gāmo. Parikkhittoti yena kenaci pākārena vā vatiyā vā parikkhāya vā parikkhitto. Ettāvatā ekakulagāmassa ekūpacāratā dassitā. Antogāme vatthabbanti evarūpe gāme cīvaraṃ nikkhipitvā gāmabbhantare yathārucite ṭhāne aruṇaṃ uṭṭhāpetuṃ vaṭṭati. Aparikkhittoti iminā tasseva gāmassa nānūpacāratā dassitā. Evarūpe gāme yasmiṃ ghare cīvaraṃ nikkhittaṃ, tattha vatthabbaṃ. Hatthapāsā vā na vijahitabbanti atha vā taṃ gharaṃ samantato hatthapāsā na vijahitabbaṃ, aḍḍhateyyaratanappamāṇappadesā uddhaṃ na vijahitabbanti vuttaṃ hoti. Aḍḍhateyyaratanabbhantare pana vatthuṃ vaṭṭati. Taṃ pamāṇaṃ atikkamitvā sacepi iddhimā bhikkhū ākāse aruṇaṃ uṭṭhāpeti, nissaggiyameva hoti. Ettha ca yasmiṃ ghareti gharaparicchedo ‘‘ekakulassa nivesanaṃ hotī’’tiādinā (pārā. 480) lakkhaṇena veditabbo.
၄၇၉. နာနာကုလသ္သ ဂာမောတိ နာနာရာဇူနံ ဝာ ဘောဇကာနံ ဝာ ဂာမော, ဝေသာလိကုသိနာရာဒိသဒိသော။ ပရိက္ခိတ္တောတိ ဣမိနာ နာနာကုလဂာမသ္သ ဧကူပစာရတာ ဒသ္သိတာ။ သဘာယေ ဝာ ဒ္ဝာရမူလေ ဝာတိ ဧတ္ထ သဘာယန္တိ လိင္ဂဗ္ယတ္တယေန သဘာ ဝုတ္တာ။ ဒ္ဝာရမူလေတိ နဂရဒ္ဝာရသ္သ သမီပေ။ ဣဒံ ဝုတ္တံ ဟောတိ – ဧဝရူပေ ဂာမေ ယသ္မိံ ဃရေ စီဝရံ နိက္ခိတ္တံ, တတ္ထ ဝာ ဝတ္ထဗ္ဗံ။ တတ္ထ သဒ္ဒသင္ဃဋ္ဋနေန ဝာ ဇနသမ္ဗာဓေန ဝာ ဝသိတုံ အသက္ကောန္တေန သဘာယေ ဝာ ဝတ္ထဗ္ဗံ နဂရဒ္ဝာရမူလေ ဝာ။ တတ္ရပိ ဝသိတုံ အသက္ကောန္တေန ယတ္ထ ကတ္ထစိ ဖာသုကဋ္ဌာနေ ဝသိတ္ဝာ အန္တောအရုဏေ အာဂမ္မ တေသံယေဝ သဘာယဒ္ဝာရမူလာနံ ဟတ္ထပာသာ ဝာ န ဝိဇဟိတဗ္ဗံ။ ဃရသ္သ ပန စီဝရသ္သ ဝာ ဟတ္ထပာသေ ဝတ္တဗ္ဗမေဝ နတ္ထိ။
479.Nānākulassagāmoti nānārājūnaṃ vā bhojakānaṃ vā gāmo, vesālikusinārādisadiso. Parikkhittoti iminā nānākulagāmassa ekūpacāratā dassitā. Sabhāye vā dvāramūle vāti ettha sabhāyanti liṅgabyattayena sabhā vuttā. Dvāramūleti nagaradvārassa samīpe. Idaṃ vuttaṃ hoti – evarūpe gāme yasmiṃ ghare cīvaraṃ nikkhittaṃ, tattha vā vatthabbaṃ. Tattha saddasaṅghaṭṭanena vā janasambādhena vā vasituṃ asakkontena sabhāye vā vatthabbaṃ nagaradvāramūle vā. Tatrapi vasituṃ asakkontena yattha katthaci phāsukaṭṭhāne vasitvā antoaruṇe āgamma tesaṃyeva sabhāyadvāramūlānaṃ hatthapāsā vā na vijahitabbaṃ. Gharassa pana cīvarassa vā hatthapāse vattabbameva natthi.
သဘာယံ ဂစ္ဆန္တေန ဟတ္ထပာသေ စီဝရံ နိက္ခိပိတ္ဝာတိ သစေ ဃရေ အဋ္ဌပေတ္ဝာ သဘာယေ ဌပေသ္သာမီတိ သဘာယံ ဂစ္ဆတိ, တေန သဘာယံ ဂစ္ဆန္တေန ဟတ္ထပာသေတိ ဟတ္ထံ ပသာရေတ္ဝာ ‘‘ဟန္ဒိမံ စီဝရံ ဌပေမီ’’တိ ဧဝံ နိက္ခေပသုခေ ဟတ္ထပာသဂတေ ကိသ္မိဉ္စိ အာပဏေ စီဝရံ နိက္ခိပိတ္ဝာ ပုရိမနယေနေဝ သဘာယေ ဝာ ဝတ္ထဗ္ဗံ ဒ္ဝာရမူလေ ဝာ, ဟတ္ထပာသာ ဝာ န ဝိဇဟိတဗ္ဗံ။
Sabhāyaṃ gacchantena hatthapāse cīvaraṃ nikkhipitvāti sace ghare aṭṭhapetvā sabhāye ṭhapessāmīti sabhāyaṃ gacchati, tena sabhāyaṃ gacchantena hatthapāseti hatthaṃ pasāretvā ‘‘handimaṃ cīvaraṃ ṭhapemī’’ti evaṃ nikkhepasukhe hatthapāsagate kismiñci āpaṇe cīvaraṃ nikkhipitvā purimanayeneva sabhāye vā vatthabbaṃ dvāramūle vā, hatthapāsā vā na vijahitabbaṃ.
တတ္ရာယံ ဝိနိစ္ဆယော – ဖုသ္သဒေဝတ္ထေရော တာဝ အာဟ – ‘‘စီဝရဟတ္ထပာသေ ဝသိတဗ္ဗံ နတ္ထိ, ယတ္ထ ကတ္ထစိ ဝီထိဟတ္ထပာသေပိ သဘာယဟတ္ထပာသေပိ ဒ္ဝာရဟတ္ထပာသေပိ ဝသိတုံ ဝဋ္ဋတီ’’တိ။ ဥပတိသ္သတ္ထေရော ပနာဟ – ‘‘နဂရသ္သ ဗဟူနိပိ ဒ္ဝာရာနိ ဟောန္တိ ဗဟူနိပိ သဘာယာနိ, တသ္မာ သဗ္ဗတ္ထ န ဝဋ္ဋတိ။ ယသ္သာ ပန ဝီထိယာ စီဝရံ ဌပိတံ ယံ တသ္သာ သမ္မုခဋ္ဌာနေ သဘာယဉ္စ ဒ္ဝာရဉ္စ တသ္သ သဘာယသ္သ စ ဒ္ဝာရသ္သ စ ဟတ္ထပာသာ န ဝိဇဟိတဗ္ဗံ။ ဧဝဉ္ဟိ သတိ သက္ကာ စီဝရသ္သ ပဝတ္တိ ဇာနိတု’’န္တိ။ သဘာယံ ပန ဂစ္ဆန္တေန ယသ္သ အာပဏိကသ္သ ဟတ္ထေ နိက္ခိတ္တံ, သစေ သော တံ စီဝရံ အတိဟရိတ္ဝာ ဃရေ နိက္ခိပတိ, ဝီထိဟတ္ထပာသော န ရက္ခတိ, ဃရသ္သ ဟတ္ထပာသေ ဝတ္ထဗ္ဗံ။ သစေ မဟန္တံ ဃရံ ဟောတိ, ဒ္ဝေ ဝီထိယော ဖရိတ္ဝာ ဌိတံ ပုရတော ဝာ ပစ္ဆတော ဝာ ဟတ္ထပာသေယေဝ အရုဏံ ဥဋ္ဌာပေတဗ္ဗံ။ သဘာယေ နိက္ခိပိတ္ဝာ ပန သဘာယေ ဝာ တသ္သ သမ္မုခေ နဂရဒ္ဝာရမူလေ ဝာ တေသံယေဝ ဟတ္ထပာသေ ဝာ အရုဏံ ဥဋ္ဌာပေတဗ္ဗံ။
Tatrāyaṃ vinicchayo – phussadevatthero tāva āha – ‘‘cīvarahatthapāse vasitabbaṃ natthi, yattha katthaci vīthihatthapāsepi sabhāyahatthapāsepi dvārahatthapāsepi vasituṃ vaṭṭatī’’ti. Upatissatthero panāha – ‘‘nagarassa bahūnipi dvārāni honti bahūnipi sabhāyāni, tasmā sabbattha na vaṭṭati. Yassā pana vīthiyā cīvaraṃ ṭhapitaṃ yaṃ tassā sammukhaṭṭhāne sabhāyañca dvārañca tassa sabhāyassa ca dvārassa ca hatthapāsā na vijahitabbaṃ. Evañhi sati sakkā cīvarassa pavatti jānitu’’nti. Sabhāyaṃ pana gacchantena yassa āpaṇikassa hatthe nikkhittaṃ, sace so taṃ cīvaraṃ atiharitvā ghare nikkhipati, vīthihatthapāso na rakkhati, gharassa hatthapāse vatthabbaṃ. Sace mahantaṃ gharaṃ hoti, dve vīthiyo pharitvā ṭhitaṃ purato vā pacchato vā hatthapāseyeva aruṇaṃ uṭṭhāpetabbaṃ. Sabhāye nikkhipitvā pana sabhāye vā tassa sammukhe nagaradvāramūle vā tesaṃyeva hatthapāse vā aruṇaṃ uṭṭhāpetabbaṃ.
အပရိက္ခိတ္တောတိဣမိနာ တသ္သေဝ ဂာမသ္သ နာနူပစာရတာ ဒသ္သိတာ။ ဧတေနေဝုပာယေန သဗ္ဗတ္ထ ဧကူပစာရတာ စ နာနူပစာရတာ စ ဝေဒိတဗ္ဗာ။ ပာဠိယံ ပန ‘‘ဂာမော ဧကူပစာရော နာမာ’’တိ ဧဝံ အာဒိမ္ဟိ ‘‘အဇ္ဈောကာသော ဧကူပစာရော နာမာ’’တိ ဧဝံ အန္တေ စ ဧကမေဝ မာတိကာပဒံ ဥဒ္ဓရိတ္ဝာ ပဒဘာဇနံ ဝိတ္ထာရိတံ။ တသ္မာ တသ္သေဝ ပဒသ္သာနုသာရေန သဗ္ဗတ္ထ ပရိက္ခေပာဒိဝသေန ဧကူပစာရတာ စ နာနူပစာရတာ စ ဝေဒိတဗ္ဗာ။
Aparikkhittotiiminā tasseva gāmassa nānūpacāratā dassitā. Etenevupāyena sabbattha ekūpacāratā ca nānūpacāratā ca veditabbā. Pāḷiyaṃ pana ‘‘gāmo ekūpacāro nāmā’’ti evaṃ ādimhi ‘‘ajjhokāso ekūpacāro nāmā’’ti evaṃ ante ca ekameva mātikāpadaṃ uddharitvā padabhājanaṃ vitthāritaṃ. Tasmā tasseva padassānusārena sabbattha parikkhepādivasena ekūpacāratā ca nānūpacāratā ca veditabbā.
၄၈၀-၁. နိဝေသနာဒီသု ဩဝရကာတိ ဂဗ္ဘာနံယေဝေတံ ပရိယာယဝစနံ။ ဟတ္ထပာသာ ဝာတိ ဂဗ္ဘသ္သ ဟတ္ထပာသာ။ ဒ္ဝာရမူလေ ဝာတိ သဗ္ဗေသံ သာဓာရဏေ ဃရဒ္ဝာရမူလေ။ ဟတ္ထပာသာ ဝာတိ ဂဗ္ဘသ္သ ဝာ ဃရဒ္ဝာရမူလသ္သ ဝာ ဟတ္ထပာသာ။
480-1.Nivesanādīsuovarakāti gabbhānaṃyevetaṃ pariyāyavacanaṃ. Hatthapāsā vāti gabbhassa hatthapāsā. Dvāramūle vāti sabbesaṃ sādhāraṇe gharadvāramūle. Hatthapāsā vāti gabbhassa vā gharadvāramūlassa vā hatthapāsā.
၄၈၂-၇. ဥဒောသိတောတိ ယာနာဒီနံ ဘဏ္ဍာနံ သာလာ။ ဣတော ပဋ္ဌာယ စ နိဝေသနေ ဝုတ္တနယေနေဝ ဝိနိစ္ဆယော ဝေဒိတဗ္ဗော။ အဋ္ဋောတိ ပဋိရာဇာဒိပဋိဗာဟနတ္ထံ ဣဋ္ဌကာဟိ ကတော ဗဟလဘိတ္တိကော စတုပဉ္စဘူမိကော ပတိသ္သယဝိသေသော။ မာဠောတိ ဧကကူဋသင္ဂဟိတော စတုရသ္သပာသာဒော။ ပာသာဒောတိ ဒီဃပာသာဒော။ ဟမ္မိယန္တိ မုဏ္ဍစ္ဆဒနပာသာဒော။
482-7.Udositoti yānādīnaṃ bhaṇḍānaṃ sālā. Ito paṭṭhāya ca nivesane vuttanayeneva vinicchayo veditabbo. Aṭṭoti paṭirājādipaṭibāhanatthaṃ iṭṭhakāhi kato bahalabhittiko catupañcabhūmiko patissayaviseso. Māḷoti ekakūṭasaṅgahito caturassapāsādo. Pāsādoti dīghapāsādo. Hammiyanti muṇḍacchadanapāsādo.
၄၈၉. သတ္တဗ္ဘန္တရာတိဧတ္ထ ဧကံ အဗ္ဘန္တရံ အဋ္ဌဝီသတိဟတ္ထံ ဟောတိ။ သစေ သတ္ထော ဂစ္ဆန္တော ဂာမံ ဝာ နဒိံ ဝာ ပရိယာဒိယိတ္ဝာ တိဋ္ဌတိ အန္တောပဝိဋ္ဌေန သဒ္ဓိံ ဧကာဗဒ္ဓော ဟုတ္ဝာ ဩရဉ္စ ပာရဉ္စ ဖရိတ္ဝာ ဌိတော ဟောတိ, သတ္ထပရိဟာရောဝ လဗ္ဘတိ။ အထ ဂာမေ ဝာ နဒိယာ ဝာ ပရိယာပန္နော ဟောတိ အန္တောပဝိဋ္ဌော , ဂာမပရိဟာရော စေဝ နဒီပရိဟာရော စ လဗ္ဘတိ။ သစေ ဝိဟာရသီမံ အတိက္ကမိတ္ဝာ တိဋ္ဌတိ, အန္တောသီမာယ စ စီဝရံ ဟောတိ, ဝိဟာရံ ဂန္တ္ဝာ ဝသိတဗ္ဗံ။ သစေ ဗဟိသီမာယ စီဝရံ ဟောတိ သတ္ထသမီပေယေဝ ဝသိတဗ္ဗံ။ သစေ ဂစ္ဆန္တော သကဋေ ဝာ ဘဂ္ဂေ ဂောဏေ ဝာ နဋ္ဌေ အန္တရာ ဆိဇ္ဇတိ, ယသ္မိံ ကောဋ္ဌာသေ စီဝရံ တတ္ထ ဝသိတဗ္ဗံ။
489.Sattabbhantarātiettha ekaṃ abbhantaraṃ aṭṭhavīsatihatthaṃ hoti. Sace sattho gacchanto gāmaṃ vā nadiṃ vā pariyādiyitvā tiṭṭhati antopaviṭṭhena saddhiṃ ekābaddho hutvā orañca pārañca pharitvā ṭhito hoti, satthaparihārova labbhati. Atha gāme vā nadiyā vā pariyāpanno hoti antopaviṭṭho , gāmaparihāro ceva nadīparihāro ca labbhati. Sace vihārasīmaṃ atikkamitvā tiṭṭhati, antosīmāya ca cīvaraṃ hoti, vihāraṃ gantvā vasitabbaṃ. Sace bahisīmāya cīvaraṃ hoti satthasamīpeyeva vasitabbaṃ. Sace gacchanto sakaṭe vā bhagge goṇe vā naṭṭhe antarā chijjati, yasmiṃ koṭṭhāse cīvaraṃ tattha vasitabbaṃ.
၄၉၀. ဧကကုလသ္သ ခေတ္တေ ဟတ္ထပာသော နာမ စီဝရဟတ္ထပာသောယေဝ, နာနာကုလသ္သ ခေတ္တေ ဟတ္ထပာသော နာမ ခေတ္တဒ္ဝာရသ္သ ဟတ္ထပာသော။ အပရိက္ခိတ္တေ စီဝရသ္သေဝ ဟတ္ထပာသော။
490. Ekakulassa khette hatthapāso nāma cīvarahatthapāsoyeva, nānākulassa khette hatthapāso nāma khettadvārassa hatthapāso. Aparikkhitte cīvarasseva hatthapāso.
၄၉၁-၄. ဓညကရဏန္တိ ခလံ ဝုစ္စတိ။ အာရာမောတိ ပုပ္ဖာရာမော ဝာ ဖလာရာမော ဝာ။ ဒ္ဝီသုပိ ခေတ္တေ ဝုတ္တသဒိသောဝ ဝိနိစ္ဆယော။ ဝိဟာရော နိဝေသနသဒိသော။ ရုက္ခမူလေ အန္တောဆာယာယန္တိ ဆာယာယ ဖုဋ္ဌောကာသသ္သ အန္တော ဧဝ။ ဝိရဠသာခသ္သ ပန ရုက္ခသ္သ အာတပေန ဖုဋ္ဌောကာသေ ဌပိတံ နိသ္သဂ္ဂိယမေဝ ဟောတိ, တသ္မာ တာဒိသသ္သ သာခာစ္ဆာယာယ ဝာ ခန္ဓစ္ဆာယာယ ဝာ ဌပေတဗ္ဗံ။ သစေ သာခာယ ဝာ ဝိဋပေ ဝာ ဌပေတိ, ဥပရိ အညသာခာစ္ဆာယာယ ဖုဋ္ဌောကာသေယေဝ ဌပေတဗ္ဗံ။ ခုဇ္ဇရုက္ခသ္သ ဆာယာ ဒူရံ ဂစ္ဆတိ, ဆာယာယ ဂတဋ္ဌာနေ ဌပေတုံ ဝဋ္ဋတိယေဝ။ ဣဓာပိ ဟတ္ထပာသော စီဝရဟတ္ထပာသောယေဝ။
491-4.Dhaññakaraṇanti khalaṃ vuccati. Ārāmoti pupphārāmo vā phalārāmo vā. Dvīsupi khette vuttasadisova vinicchayo. Vihāro nivesanasadiso. Rukkhamūle antochāyāyanti chāyāya phuṭṭhokāsassa anto eva. Viraḷasākhassa pana rukkhassa ātapena phuṭṭhokāse ṭhapitaṃ nissaggiyameva hoti, tasmā tādisassa sākhācchāyāya vā khandhacchāyāya vā ṭhapetabbaṃ. Sace sākhāya vā viṭape vā ṭhapeti, upari aññasākhācchāyāya phuṭṭhokāseyeva ṭhapetabbaṃ. Khujjarukkhassa chāyā dūraṃ gacchati, chāyāya gataṭṭhāne ṭhapetuṃ vaṭṭatiyeva. Idhāpi hatthapāso cīvarahatthapāsoyeva.
အဂာမကေ အရညေတိ အဂာမကံ နာမ အရညံ ဝိဉ္ဈာဋဝီအာဒီသု ဝာ သမုဒ္ဒမဇ္ဈေ ဝာ မစ္ဆဗန္ဓာနံ အဂမနပထေ ဒီပကေသု လဗ္ဘတိ။ သမန္တာ သတ္တဗ္ဘန္တရာတိ မဇ္ဈေ ဌိတသ္သ သမတ္တာ သဗ္ဗဒိသာသု သတ္တဗ္ဘန္တရာ, ဝိနိဗ္ဗေဓေန စုဒ္ဒသ ဟောန္တိ။ မဇ္ဈေ နိသိန္နော ပုရတ္ထိမာယ ဝာ ပစ္ဆိမာယ ဝာ ဒိသာယ ပရိယန္တေ ဌပိတစီဝရံ ရက္ခတိ။ သစေ ပန အရုဏုဂ္ဂမနသမယေ ကေသဂ္ဂမတ္တမ္ပိ ပုရတ္ထိမံ ဒိသံ ဂစ္ဆတိ, ပစ္ဆိမာယ ဒိသာယ စီဝရံ နိသ္သဂ္ဂိယံ ဟောတိ။ ဧသ နယော ဣတရသ္မိံ။ ဥပောသထကာလေ ပန ပရိသပရိယန္တေ နိသိန္နဘိက္ခုတော ပဋ္ဌာယ သတ္တဗ္ဘန္တရသီမာ သောဓေတဗ္ဗာ။ ယတ္တကံ ဘိက္ခုသင္ဃော ဝဍ္ဎတိ, သီမာပိ တတ္တကံ ဝဍ္ဎတိ။
Agāmake araññeti agāmakaṃ nāma araññaṃ viñjhāṭavīādīsu vā samuddamajjhe vā macchabandhānaṃ agamanapathe dīpakesu labbhati. Samantā sattabbhantarāti majjhe ṭhitassa samattā sabbadisāsu sattabbhantarā, vinibbedhena cuddasa honti. Majjhe nisinno puratthimāya vā pacchimāya vā disāya pariyante ṭhapitacīvaraṃ rakkhati. Sace pana aruṇuggamanasamaye kesaggamattampi puratthimaṃ disaṃ gacchati, pacchimāya disāya cīvaraṃ nissaggiyaṃ hoti. Esa nayo itarasmiṃ. Uposathakāle pana parisapariyante nisinnabhikkhuto paṭṭhāya sattabbhantarasīmā sodhetabbā. Yattakaṃ bhikkhusaṅgho vaḍḍhati, sīmāpi tattakaṃ vaḍḍhati.
၄၉၅. အနိသ္သဇ္ဇိတ္ဝာ ပရိဘုဉ္ဇတိ အာပတ္တိ ဒုက္ကဋသ္သာတိ ဧတ္ထ သစေ ပဓာနိကော ဘိက္ခု သဗ္ဗရတ္တိံ ပဓာနမနုယုဉ္ဇိတ္ဝာ ပစ္စုသသမယေ ‘‘န္ဟာယိသ္သာမီ’’တိ တီဏိပိ စီဝရာနိ တီရေ ဌပေတ္ဝာ နဒိံ ဩတရတိ, န္ဟာယန္တသ္သေဝ စသ္သ အရုဏံ ဥဋ္ဌဟတိ, ကိံ ကာတဗ္ဗံ။ သော ဟိ ယဒိ ဥတ္တရိတ္ဝာ စီဝရံ နိဝာသေတိ, နိသ္သဂ္ဂိယစီဝရံ အနိသ္သဇ္ဇိတ္ဝာ ပရိဘုဉ္ဇနပစ္စယာ ဒုက္ကဋံ အာပဇ္ဇတိ။ အထ နဂ္ဂော ဂစ္ဆတိ, ဧဝမ္ပိ ဒုက္ကဋံ အာပဇ္ဇတီတိ? န အာပဇ္ဇတိ။ သော ဟိ ယာဝ အညံ ဘိက္ခုံ ဒိသ္ဝာ ဝိနယကမ္မံ န ကရောတိ, တာဝ တေသံ စီဝရာနံ အပရိဘောဂာရဟတ္တာ နဋ္ဌစီဝရဋ္ဌာနေ ဌိတော ဟောတိ။ နဋ္ဌစီဝရသ္သ စ အကပ္ပိယံ နာမ နတ္ထိ။ တသ္မာ ဧကံ နိဝာသေတ္ဝာ ဒ္ဝေ ဟတ္ထေန ဂဟေတ္ဝာ ဝိဟာရံ ဂန္တ္ဝာ ဝိနယကမ္မံ ကာတဗ္ဗံ။ သစေ ဒူရေ ဝိဟာရော ဟောတိ, အန္တရာမဂ္ဂေ မနုသ္သာ သဉ္စရန္တိ။ ဧကံ နိဝာသေတ္ဝာ ဧကံ ပာရုပိတ္ဝာ ဧကံ အံသကူဋေ ဌပေတ္ဝာ ဂန္တဗ္ဗံ။ သစေ ဝိဟာရေ သဘာဂဘိက္ခူ န ပသ္သတိ, ဘိက္ခာစာရံ ဂတာ ဟောန္တိ, သင္ဃာဋိံ ဗဟိဂာမေ ဌပေတ္ဝာ သန္တရုတ္တရေန အာသနသာလံ ဂန္တ္ဝာ ဝိနယကမ္မံ ကာတဗ္ဗံ။ သစေ ဗဟိဂာမေ စောရဘယံ ဟောတိ, ပာရုပိတ္ဝာ ဂန္တဗ္ဗံ။ သစေ အာသနသာလာ သမ္ဗာဓာ ဟောတိ ဇနာကိဏ္ဏာ, န သက္ကာ ဧကမန္တေ စီဝရံ အပနေတ္ဝာ ဝိနယကမ္မံ ကာတုံ, ဧကံ ဘိက္ခုံ အာဒာယ ဗဟိဂာမံ ဂန္တ္ဝာ ဝိနယကမ္မံ ကတ္ဝာ စီဝရာနိ ပရိဘုဉ္ဇိတဗ္ဗာနိ။
495.Anissajjitvā paribhuñjati āpatti dukkaṭassāti ettha sace padhāniko bhikkhu sabbarattiṃ padhānamanuyuñjitvā paccusasamaye ‘‘nhāyissāmī’’ti tīṇipi cīvarāni tīre ṭhapetvā nadiṃ otarati, nhāyantasseva cassa aruṇaṃ uṭṭhahati, kiṃ kātabbaṃ. So hi yadi uttaritvā cīvaraṃ nivāseti, nissaggiyacīvaraṃ anissajjitvā paribhuñjanapaccayā dukkaṭaṃ āpajjati. Atha naggo gacchati, evampi dukkaṭaṃ āpajjatīti? Na āpajjati. So hi yāva aññaṃ bhikkhuṃ disvā vinayakammaṃ na karoti, tāva tesaṃ cīvarānaṃ aparibhogārahattā naṭṭhacīvaraṭṭhāne ṭhito hoti. Naṭṭhacīvarassa ca akappiyaṃ nāma natthi. Tasmā ekaṃ nivāsetvā dve hatthena gahetvā vihāraṃ gantvā vinayakammaṃ kātabbaṃ. Sace dūre vihāro hoti, antarāmagge manussā sañcaranti. Ekaṃ nivāsetvā ekaṃ pārupitvā ekaṃ aṃsakūṭe ṭhapetvā gantabbaṃ. Sace vihāre sabhāgabhikkhū na passati, bhikkhācāraṃ gatā honti, saṅghāṭiṃ bahigāme ṭhapetvā santaruttarena āsanasālaṃ gantvā vinayakammaṃ kātabbaṃ. Sace bahigāme corabhayaṃ hoti, pārupitvā gantabbaṃ. Sace āsanasālā sambādhā hoti janākiṇṇā, na sakkā ekamante cīvaraṃ apanetvā vinayakammaṃ kātuṃ, ekaṃ bhikkhuṃ ādāya bahigāmaṃ gantvā vinayakammaṃ katvā cīvarāni paribhuñjitabbāni.
သစေ ဘိက္ခူ ဒဟရာနံ ဟတ္ထေ ပတ္တစီဝရံ ဒတ္ဝာ မဂ္ဂံ ဂစ္ဆန္တာ ပစ္ဆိမေ ယာမေ သယိတုကာမာ ဟောန္တိ, အတ္တနော အတ္တနော စီဝရံ ဟတ္ထပာသေ ကတ္ဝာဝ သယိတဗ္ဗံ။ သစေ ဂစ္ဆန္တာနံယေဝ အသမ္ပတ္တေသု ဒဟရေသု အရုဏံ ဥဂ္ဂစ္ဆတိ, စီဝရံ နိသ္သဂ္ဂိယံ ဟောတိ, နိသ္သယော ပန န ပဋိပ္ပသ္သမ္ဘတိ, ဒဟရာနမ္ပိ ပုရတော ဂစ္ဆန္တာနံ ထေရေသု အသမ္ပတ္တေသု ဧသေဝ နယော။ မဂ္ဂံ ဝိရဇ္ဈိတ္ဝာ အရညေ အညမညံ အပသ္သန္တေသုပိ ဧသေဝ နယော။ သစေ ပန ဒဟရာ ‘‘မယံ, ဘန္တေ, မုဟုတ္တံ သယိတ္ဝာ အသုကသ္မိံ နာမ ဩကာသေ တုမ္ဟေ သမ္ပာပုဏိသ္သာမာ’’တိ ဝတ္ဝာ ယာဝ အရုဏုဂ္ဂမနာ သယန္တိ, စီဝရဉ္စ နိသ္သဂ္ဂိယံ ဟောတိ, နိသ္သယော စ ပဋိပ္ပသ္သမ္ဘတိ, ဒဟရေ ဥယ္ယောဇေတ္ဝာ ထေရေသု သယန္တေသုပိ ဧသေဝ နယော။ ဒ္ဝေဓာပထံ ဒိသ္ဝာ ထေရာ ‘‘အယံ မဂ္ဂော’’ ဒဟရာ ‘‘အယံ မဂ္ဂော’’တိ ဝတ္ဝာ အညမညသ္သ ဝစနံ အဂ္ဂဟေတ္ဝာ ဂတာ, သဟ အရုဏုဂ္ဂမနာ စီဝရာနိ စ နိသ္သဂ္ဂိယာနိ ဟောန္တိ , နိသ္သယော စ ပဋိပ္ပသ္သမ္ဘတိ။ သစေ ဒဟရာ မဂ္ဂတော ဩက္ကမ္မ ‘‘အန္တောအရုဏေယေဝ နိဝတ္တိသ္သာမာ’’တိ ဘေသဇ္ဇတ္ထာယ ဂာမံ ပဝိသိတ္ဝာ အာဂစ္ဆန္တိ။ အသမ္ပတ္တာနံယေဝ စ တေသံ အရုဏော ဥဂ္ဂစ္ဆတိ, စီဝရာနိ နိသ္သဂ္ဂိယာနိ ဟောန္တိ, နိသ္သယော ပန န ပဋိပ္ပသ္သမ္ဘတိ။ သစေ ပန ဓေနုဘယေန ဝာ သုနခဘယေန ဝာ ‘‘မုဟုတ္တံ ဌတ္ဝာ ဂမိသ္သာမာ’’တိ ဌတ္ဝာ ဝာ နိသီဒိတ္ဝာ ဝာ ဂစ္ဆန္တိ, အန္တရာ အရုဏေ ဥဂ္ဂတေ စီဝရာနိ နိသ္သဂ္ဂိယာနိ ဟောန္တိ, နိသ္သယော စ ပဋိပ္ပသ္သမ္ဘတိ။ သစေ ‘‘အန္တောအရုဏေယေဝ အာဂမိသ္သာမာ’’တိ အန္တောသီမာယံ ဂာမံ ပဝိဋ္ဌာနံ အန္တရာ အရုဏော ဥဂ္ဂစ္ဆတိ, နေဝ စီဝရာနိ နိသ္သဂ္ဂိယာနိ ဟောန္တိ, န နိသ္သယော ပဋိပ္ပသ္သမ္ဘတိ။ သစေ ပန ‘‘ဝိဘာယတု တာဝာ’’တိ နိသီဒန္တိ, အရုဏေ ဥဂ္ဂတေပိ န စီဝရာနိ နိသ္သဂ္ဂိယာနိ ဟောန္တိ, နိသ္သယော ပန ပဋိပ္ပသ္သမ္ဘတိ။ ယေပိ ‘‘အန္တောအရုဏေယေဝ အာဂမိသ္သာမာ’’တိ သာမန္တဝိဟာရံ ဓမ္မသဝနတ္ထာယ သဥသ္သာဟာ ဂစ္ဆန္တိ, အန္တရာမဂ္ဂေယေဝ စ နေသံ အရုဏော ဥဂ္ဂစ္ဆတိ, စီဝရာနိ နိသ္သဂ္ဂိယာနိ ဟောန္တိ, နိသ္သယော ပန န ပဋိပ္ပသ္သမ္ဘတိ။ သစေ ဓမ္မဂာရဝေန ‘‘ယာဝ ပရိယောသာနံ သုတ္ဝာဝ ဂမိသ္သာမာ’’တိ နိသီဒန္တိ, သဟ အရုဏသ္သုဂ္ဂမနာ စီဝရာနိပိ နိသ္သဂ္ဂိယာနိ ဟောန္တိ, နိသ္သယောပိ ပဋိပ္ပသ္သမ္ဘတိ။ ထေရေန ဒဟရံ စီဝရဓောဝနတ္ထာယ ဂာမကံ ပေသေန္တေန အတ္တနော စီဝရံ ပစ္စုဒ္ဓရိတ္ဝာဝ ဒာတဗ္ဗံ။ ဒဟရသ္သာပိ စီဝရံ ပစ္စုဒ္ဓရာပေတ္ဝာ ဌပေတဗ္ဗံ။ သစေ အသ္သတိယာ ဂစ္ဆတိ, အတ္တနော စီဝရံ ပစ္စုဒ္ဓရိတ္ဝာ ဒဟရသ္သ စီဝရံ ဝိသ္သာသေန ဂဟေတ္ဝာ ဌပေတဗ္ဗံ။ သစေ ထေရော နသ္သရတိ, ဒဟရော ဧဝ သရတိ, ဒဟရေန အတ္တနော စီဝရံ ပစ္စုဒ္ဓရိတ္ဝာ ထေရသ္သ စီဝရံ ဝိသ္သာသေန ဂဟေတ္ဝာ ဂန္တ္ဝာ ဝတ္တဗ္ဗော ‘‘ဘန္တေ, တုမ္ဟာကံ စီဝရံ အဓိဋ္ဌဟိတ္ဝာ ပရိဘုဉ္ဇထာ’’တိ အတ္တနောပိ စီဝရံ အဓိဋ္ဌာတဗ္ဗံ။ ဧဝံ ဧကသ္သ သတိယာပိ အာပတ္တိမောက္ခော ဟောတီတိ။ သေသံ ဥတ္တာနတ္ထမေဝ ။
Sace bhikkhū daharānaṃ hatthe pattacīvaraṃ datvā maggaṃ gacchantā pacchime yāme sayitukāmā honti, attano attano cīvaraṃ hatthapāse katvāva sayitabbaṃ. Sace gacchantānaṃyeva asampattesu daharesu aruṇaṃ uggacchati, cīvaraṃ nissaggiyaṃ hoti, nissayo pana na paṭippassambhati, daharānampi purato gacchantānaṃ theresu asampattesu eseva nayo. Maggaṃ virajjhitvā araññe aññamaññaṃ apassantesupi eseva nayo. Sace pana daharā ‘‘mayaṃ, bhante, muhuttaṃ sayitvā asukasmiṃ nāma okāse tumhe sampāpuṇissāmā’’ti vatvā yāva aruṇuggamanā sayanti, cīvarañca nissaggiyaṃ hoti, nissayo ca paṭippassambhati, dahare uyyojetvā theresu sayantesupi eseva nayo. Dvedhāpathaṃ disvā therā ‘‘ayaṃ maggo’’ daharā ‘‘ayaṃ maggo’’ti vatvā aññamaññassa vacanaṃ aggahetvā gatā, saha aruṇuggamanā cīvarāni ca nissaggiyāni honti , nissayo ca paṭippassambhati. Sace daharā maggato okkamma ‘‘antoaruṇeyeva nivattissāmā’’ti bhesajjatthāya gāmaṃ pavisitvā āgacchanti. Asampattānaṃyeva ca tesaṃ aruṇo uggacchati, cīvarāni nissaggiyāni honti, nissayo pana na paṭippassambhati. Sace pana dhenubhayena vā sunakhabhayena vā ‘‘muhuttaṃ ṭhatvā gamissāmā’’ti ṭhatvā vā nisīditvā vā gacchanti, antarā aruṇe uggate cīvarāni nissaggiyāni honti, nissayo ca paṭippassambhati. Sace ‘‘antoaruṇeyeva āgamissāmā’’ti antosīmāyaṃ gāmaṃ paviṭṭhānaṃ antarā aruṇo uggacchati, neva cīvarāni nissaggiyāni honti, na nissayo paṭippassambhati. Sace pana ‘‘vibhāyatu tāvā’’ti nisīdanti, aruṇe uggatepi na cīvarāni nissaggiyāni honti, nissayo pana paṭippassambhati. Yepi ‘‘antoaruṇeyeva āgamissāmā’’ti sāmantavihāraṃ dhammasavanatthāya saussāhā gacchanti, antarāmaggeyeva ca nesaṃ aruṇo uggacchati, cīvarāni nissaggiyāni honti, nissayo pana na paṭippassambhati. Sace dhammagāravena ‘‘yāva pariyosānaṃ sutvāva gamissāmā’’ti nisīdanti, saha aruṇassuggamanā cīvarānipi nissaggiyāni honti, nissayopi paṭippassambhati. Therena daharaṃ cīvaradhovanatthāya gāmakaṃ pesentena attano cīvaraṃ paccuddharitvāva dātabbaṃ. Daharassāpi cīvaraṃ paccuddharāpetvā ṭhapetabbaṃ. Sace assatiyā gacchati, attano cīvaraṃ paccuddharitvā daharassa cīvaraṃ vissāsena gahetvā ṭhapetabbaṃ. Sace thero nassarati, daharo eva sarati, daharena attano cīvaraṃ paccuddharitvā therassa cīvaraṃ vissāsena gahetvā gantvā vattabbo ‘‘bhante, tumhākaṃ cīvaraṃ adhiṭṭhahitvā paribhuñjathā’’ti attanopi cīvaraṃ adhiṭṭhātabbaṃ. Evaṃ ekassa satiyāpi āpattimokkho hotīti. Sesaṃ uttānatthameva .
သမုဋ္ဌာနာဒီသု ပဌမကထိနသိက္ခာပဒေ အနဓိဋ္ဌာနံ အဝိကပ္ပနဉ္စ အကိရိယံ, ဣဓ အပစ္စုဒ္ဓရဏံ အယမေဝ ဝိသေသော။ သေသံ သဗ္ဗတ္ထ ဝုတ္တနယမေဝာတိ။
Samuṭṭhānādīsu paṭhamakathinasikkhāpade anadhiṭṭhānaṃ avikappanañca akiriyaṃ, idha apaccuddharaṇaṃ ayameva viseso. Sesaṃ sabbattha vuttanayamevāti.
ဥဒောသိတသိက္ခာပဒဝဏ္ဏနာ နိဋ္ဌိတာ။
Udositasikkhāpadavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၂. ဥဒောသိတသိက္ခာပဒံ • 2. Udositasikkhāpadaṃ
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၂. ဥဒောသိတသိက္ခာပဒဝဏ္ဏနာ • 2. Udositasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၂. ဥဒောသိတသိက္ခာပဒဝဏ္ဏနာ • 2. Udositasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၂. ဥဒောသိတသိက္ခာပဒဝဏ္ဏနာ • 2. Udositasikkhāpadavaṇṇanā
