| Library / Tipiṭaka / တိပိဋက • Tipiṭaka / သာရတ္ထဒီပနီ-ဋီကာ • Sāratthadīpanī-ṭīkā |
၂. ဥဒောသိတသိက္ခာပဒဝဏ္ဏနာ
2. Udositasikkhāpadavaṇṇanā
၄၇၁-၄၇၃. ဒုတိယေ အထာနန္ဒတ္ထေရော ကထံ ဩကာသံ ပဋိလဘတိ, ကိံ ကရောန္တော စ အာဟိဏ္ဍတီတိ အာဟ ‘‘ထေရော ကိရာ’’တိအာဒိ။ အဝိပ္ပဝာသေတိ နိမိတ္တတ္ထေ ဘုမ္မံ, အဝိပ္ပဝာသတ္ထန္တိ အတ္ထော, ဝိပ္ပဝာသပစ္စယာ ယာ အာပတ္တိ, တဒဘာဝတ္ထန္တိ ဝုတ္တံ ဟောတိ။
471-473. Dutiye athānandatthero kathaṃ okāsaṃ paṭilabhati, kiṃ karonto ca āhiṇḍatīti āha ‘‘thero kirā’’tiādi. Avippavāseti nimittatthe bhummaṃ, avippavāsatthanti attho, vippavāsapaccayā yā āpatti, tadabhāvatthanti vuttaṃ hoti.
၄၇၅-၄၇၆. ဧဝံ ဆိန္နပလိဗောဓောတိ ဧဝံ ဣမေဟိ စီဝရနိဋ္ဌာနကထိနုဗ္ဘာရေဟိ ဆိန္နပလိဗောဓော။ အဓိဋ္ဌိတေသူတိ တိစီဝရာဓိဋ္ဌာနနယေန အဓိဋ္ဌိတေသု။ တိစီဝရေန ဝိပ္ပဝုတ္ထော ဟောတီတိ ‘‘ရုက္ခော ဆိန္နော, ပဋော ဒဍ္ဎော’’တိအာဒီသု ဝိယ အဝယဝေပိ သမုဒာယဝောဟာရော လဗ္ဘတီတိ ဝုတ္တံ။
475-476.Evaṃ chinnapalibodhoti evaṃ imehi cīvaraniṭṭhānakathinubbhārehi chinnapalibodho. Adhiṭṭhitesūti ticīvarādhiṭṭhānanayena adhiṭṭhitesu. Ticīvarena vippavuttho hotīti ‘‘rukkho chinno, paṭo daḍḍho’’tiādīsu viya avayavepi samudāyavohāro labbhatīti vuttaṃ.
၄၇၇-၄၇၈. ပရိခာယ ဝာ ပရိက္ခိတ္တောတိ ဣမိနာ စ သမန္တာ နဒီတဠာကာဒိဥဒကေန ပရိက္ခိတ္တောပိ ပရိက္ခိတ္တောယေဝာတိ ဒသ္သေတိ။ ဧတ္တာဝတာတိ ‘‘ပရိက္ခိတ္တော’’တိ ဣမိနာ ဝစနေန။ အာကာသေ အရုဏံ ဥဋ္ဌာပေတီတိ ဃရသ္သ ဥပရိ အာကာသေ အဍ္ဎတေယ္ယရတနပ္ပမာဏံ အတိက္ကမိတ္ဝာ အရုဏံ ဥဋ္ဌာပေတိ။ ဃရံ နိဝေသနုဒောသိတာဒိလက္ခဏမေဝ, န ပန ပာဋိယေက္ကံ ဃရံ နာမ အတ္ထီတိ အာဟ ‘‘ဧတ္ထ စာ’’တိအာဒိ။
477-478.Parikhāyavā parikkhittoti iminā ca samantā nadītaḷākādiudakena parikkhittopi parikkhittoyevāti dasseti. Ettāvatāti ‘‘parikkhitto’’ti iminā vacanena. Ākāse aruṇaṃ uṭṭhāpetīti gharassa upari ākāse aḍḍhateyyaratanappamāṇaṃ atikkamitvā aruṇaṃ uṭṭhāpeti. Gharaṃ nivesanudositādilakkhaṇameva, na pana pāṭiyekkaṃ gharaṃ nāma atthīti āha ‘‘ettha cā’’tiādi.
၄၇၉. ပာဠိယံ ဝုတ္တနယေန ‘‘သဘာယေ’’တိ အဝတ္ဝာ ‘‘သဘာယ’’န္တိ ပစ္စတ္တဝစနံ သဘာယ-သဒ္ဒသ္သ နပုံသကလိင္ဂတာဝိဘာဝနတ္ထံ ဝုတ္တံ။ သဘာ-သဒ္ဒပရိယာယောပိ ဟိ သဘာယ-သဒ္ဒော နပုံသကလိင္ဂယုတ္တော ဣဓ ဝုတ္တောတိ ဣမမတ္ထံ ဒသ္သေန္တော ‘‘လိင္ဂဗ္ယတ္တယေန သဘာ ဝုတ္တာ’’တိ အာဟ။ စီဝရဟတ္ထပာသေ ဝသိတဗ္ဗံ နတ္ထီတိ စီဝရဟတ္ထပာသေယေဝ ဝသိတဗ္ဗန္တိ နတ္ထိ။ ယံ တသ္သာ။ပေ.။ န ဝိဇဟိတဗ္ဗန္တိ ဧတ္ထ တသ္သာ ဝီထိယာ သမ္မုခဋ္ဌာနေ သဘာယဒ္ဝာရာနံ ဂဟဏေနေဝ တတ္ထ သဗ္ဗာနိပိ ဂေဟာနိ သာ စ အန္တရဝီထိ ဂဟိတာယေဝ ဟောတိ။ အတိဟရိတ္ဝာ ဃရေ နိက္ခိပတီတိ တံ ဝီထိံ မုဉ္စိတ္ဝာ ဌိတေ အညသ္မိံ ဃရေ နိက္ခိပတိ။ ပုရတော ဝာ ပစ္ဆတော ဝာ ဟတ္ထပာသေတိ ဃရသ္သ ဟတ္ထပာသံ သန္ဓာယ ဝဒတိ။
479. Pāḷiyaṃ vuttanayena ‘‘sabhāye’’ti avatvā ‘‘sabhāya’’nti paccattavacanaṃ sabhāya-saddassa napuṃsakaliṅgatāvibhāvanatthaṃ vuttaṃ. Sabhā-saddapariyāyopi hi sabhāya-saddo napuṃsakaliṅgayutto idha vuttoti imamatthaṃ dassento ‘‘liṅgabyattayena sabhā vuttā’’ti āha. Cīvarahatthapāse vasitabbaṃ natthīti cīvarahatthapāseyeva vasitabbanti natthi. Yaṃ tassā…pe… na vijahitabbanti ettha tassā vīthiyā sammukhaṭṭhāne sabhāyadvārānaṃ gahaṇeneva tattha sabbānipi gehāni sā ca antaravīthi gahitāyeva hoti. Atiharitvā ghare nikkhipatīti taṃ vīthiṃ muñcitvā ṭhite aññasmiṃ ghare nikkhipati. Purato vā pacchato vā hatthapāseti gharassa hatthapāsaṃ sandhāya vadati.
နိဝေသနာဒီသု ပရိက္ခိတ္တတာယ ဧကူပစာရတာ, အပရိက္ခိတ္တတာယ နာနူပစာရတာ စ ဝေဒိတဗ္ဗာတိ ဒသ္သေန္တော ‘‘ဧတေနေဝုပာယေနာ’’တိအာဒိမာဟ။ နိဝေသနာဒီနိ ဂာမတော ဗဟိ သန္နိဝိဋ္ဌာနိ ဂဟိတာနီတိ ဝေဒိတဗ္ဗံ။ အန္တောဂာမေ ဌိတာနဉ္ဟိ ဂာမဂ္ဂဟဏေန ဂဟိတတ္တာ ဂာမပရိဟာရောယေဝာတိ။ သဗ္ဗတ္ထာပီတိ ဂာမာဒီသု အဇ္ဈောကာသပရိယန္တေသု ပန္နရသသု။ ပရိက္ခေပာဒိဝသေနာတိ ဧတ္ထ အာဒိ-သဒ္ဒေန အပရိက္ခေပသ္သေဝ ဂဟဏံ ဝေဒိတဗ္ဗံ, န ဧကကုလာဒီနမ္ပိ။
Nivesanādīsu parikkhittatāya ekūpacāratā, aparikkhittatāya nānūpacāratā ca veditabbāti dassento ‘‘etenevupāyenā’’tiādimāha. Nivesanādīni gāmato bahi sanniviṭṭhāni gahitānīti veditabbaṃ. Antogāme ṭhitānañhi gāmaggahaṇena gahitattā gāmaparihāroyevāti. Sabbatthāpīti gāmādīsu ajjhokāsapariyantesu pannarasasu. Parikkhepādivasenāti ettha ādi-saddena aparikkhepasseva gahaṇaṃ veditabbaṃ, na ekakulādīnampi.
၄၈၀-၄၈၇. ဩဝရကော နာမ ဂဗ္ဘသ္သ အဗ္ဘန္တရေ အညော ဂဗ္ဘောတိပိ ဝဒန္တိ။ မုဏ္ဍစ္ဆဒနပာသာဒောတိ စန္ဒိကင္ဂဏယုတ္တော ပာသာဒော။
480-487.Ovarako nāma gabbhassa abbhantare añño gabbhotipi vadanti. Muṇḍacchadanapāsādoti candikaṅgaṇayutto pāsādo.
၄၈၉. သတ္ထောတိ ဇင္ဃသတ္ထော သကဋသတ္ထော ဝာ။ ပရိယာဒိယိတ္ဝာတိ ဝိနိဝိဇ္ဈိတ္ဝာ။ ဝုတ္တမေဝတ္ထံ ဝိဘာဝေတိ ‘‘အန္တောပဝိဋ္ဌေန။ပေ.။ ဌိတော ဟောတီ’’တိ။ တတ္ထ အန္တောပဝိဋ္ဌေနာတိ ဂာမသ္သ နဒိယာ ဝာ အန္တောပဝိဋ္ဌေန။ နဒီပရိဟာရော စ လဗ္ဘတီတိ ဧတ္ထ ‘‘ဝိသုံ နဒီပရိဟာရသ္သ အဝုတ္တတ္တာ ဂာမာဒီဟိ အညတ္ထ ဝိယ စီဝရဟတ္ထပာသောယေဝ နဒီပရိဟာရော’’တိ တီသုပိ ဂဏ္ဌိပဒေသု ဝုတ္တံ။ ဝိဟာရသီမန္တိ အဝိပ္ပဝာသသီမံ သန္ဓာယာဟ။ ဝိဟာရံ ဂန္တ္ဝာ ဝသိတဗ္ဗန္တိ အန္တောသီမာယ ယတ္ထ ကတ္ထစိ ဝသိတဗ္ဗံ။ သတ္ထသမီပေယေဝာတိ ဣဒံ ယထာဝုတ္တအဗ္ဘန္တရပရိစ္ဆေဒဝသေန ဝုတ္တံ။ ပာဠိယံ နာနာကုလသ္သ သတ္ထော ဟောတိ, သတ္ထေ စီဝရံ နိက္ခိပိတ္ဝာ ဟတ္ထပာသာ န ဝိဇဟိတဗ္ဗန္တိ ဧတ္ထ ဟတ္ထပာသော နာမ သတ္ထသ္သ ဟတ္ထပာသောတိ ဝေဒိတဗ္ဗံ။
489.Satthoti jaṅghasattho sakaṭasattho vā. Pariyādiyitvāti vinivijjhitvā. Vuttamevatthaṃ vibhāveti ‘‘antopaviṭṭhena…pe… ṭhito hotī’’ti. Tattha antopaviṭṭhenāti gāmassa nadiyā vā antopaviṭṭhena. Nadīparihāro ca labbhatīti ettha ‘‘visuṃ nadīparihārassa avuttattā gāmādīhi aññattha viya cīvarahatthapāsoyeva nadīparihāro’’ti tīsupi gaṇṭhipadesu vuttaṃ. Vihārasīmanti avippavāsasīmaṃ sandhāyāha. Vihāraṃ gantvā vasitabbanti antosīmāya yattha katthaci vasitabbaṃ. Satthasamīpeyevāti idaṃ yathāvuttaabbhantaraparicchedavasena vuttaṃ. Pāḷiyaṃ nānākulassasattho hoti, satthe cīvaraṃ nikkhipitvā hatthapāsā na vijahitabbanti ettha hatthapāso nāma satthassa hatthapāsoti veditabbaṃ.
၄၉၀. ဧကကုလသ္သ ခေတ္တေတိ အပရိက္ခိတ္တံ သန္ဓာယ ဝဒတိ။ ယသ္မာ ‘‘နာနာကုလသ္သ ပရိက္ခိတ္တေ ခေတ္တေ စီဝရံ နိက္ခိပိတ္ဝာ ခေတ္တဒ္ဝာရမူလေ ဝာ တသ္သ ဟတ္ထပာသေ ဝာ ဝတ္ထဗ္ဗ’’န္တိ ဝုတ္တံ, တသ္မာ ဒ္ဝာရမူလတော အညတ္ထ အန္တောခေတ္တေပိ ဝသန္တေန စီဝရံ ဟတ္ထပာသေ ကတ္ဝာယေဝ ဝသိတဗ္ဗံ။
490.Ekakulassa khetteti aparikkhittaṃ sandhāya vadati. Yasmā ‘‘nānākulassa parikkhitte khette cīvaraṃ nikkhipitvā khettadvāramūle vā tassa hatthapāse vā vatthabba’’nti vuttaṃ, tasmā dvāramūlato aññattha antokhettepi vasantena cīvaraṃ hatthapāse katvāyeva vasitabbaṃ.
၄၉၁-၄၉၄. ‘‘ဝိဟာရော နာမ သပရိက္ခိတ္တော ဝာ အပရိက္ခိတ္တော ဝာ သကလော အာဝာသော’’တိ ဝဒန္တိ။ ယသ္မိံ ဝိဟာရေတိ ဧတ္ထ ပန ဧကံ ဂေဟမေဝ ဝုတ္တံ။ ဧကကုလနာနာကုလသန္တကတာ စေတ္ထ ကာရာပကာနံ ဝသေန ဝေဒိတဗ္ဗာ။ ဆာယာယ ဖုဋ္ဌောကာသသ္သ အန္တော ဧဝာတိ ယဒာ မဟာဝီထိယံ ဥဇုကမေဝ ဂစ္ဆန္တံ သူရိယမဏ္ဍလံ မဇ္ဈန္ဟိကံ ပာပုဏာတိ, တဒာ ယံ ဩကာသံ ဆာယာ ဖရတိ, တံ သန္ဓာယ ဝုတ္တံ။ အဂမနပထေတိ ယံ တဒဟေဝ ဂန္တ္ဝာ ပုန အာဂန္တုံ သက္ကာ န ဟောတိ, တာဒိသံ သန္ဓာယ ဝုတ္တံ။
491-494.‘‘Vihāro nāma saparikkhitto vā aparikkhitto vā sakalo āvāso’’ti vadanti. Yasmiṃ vihāreti ettha pana ekaṃ gehameva vuttaṃ. Ekakulanānākulasantakatā cettha kārāpakānaṃ vasena veditabbā. Chāyāya phuṭṭhokāsassa anto evāti yadā mahāvīthiyaṃ ujukameva gacchantaṃ sūriyamaṇḍalaṃ majjhanhikaṃ pāpuṇāti, tadā yaṃ okāsaṃ chāyā pharati, taṃ sandhāya vuttaṃ. Agamanapatheti yaṃ tadaheva gantvā puna āgantuṃ sakkā na hoti, tādisaṃ sandhāya vuttaṃ.
၄၉၅. နဒိံ ဩတရတီတိ ဟတ္ထပာသံ မုဉ္စိတ္ဝာ ဩတရတိ။ န အာပဇ္ဇတီတိ ပရိဘောဂပစ္စယာ ဒုက္ကဋံ နာပဇ္ဇတိ။ တေနာဟ ‘‘သော ဟီ’’တိအာဒိ။ အပရိဘောဂာရဟတ္တာတိ ဣမိနာဝ နိသ္သဂ္ဂိယစီဝရံ အနိသ္သဇ္ဇေတ္ဝာ ပရိဘုဉ္ဇန္တသ္သ ဒုက္ကဋံ အစိတ္တကန္တိ သိဒ္ဓံ။ ဧကံ ပာရုပိတ္ဝာ ဧကံ အံသကူဋေ ဌပေတ္ဝာ ဂန္တဗ္ဗန္တိ ဣဒံ ဗဟူနံ သဉ္စာရဋ္ဌာနေ ဧဝံ အကတ္ဝာ ဂမနံ န သာရုပ္ပန္တိ ကတ္ဝာ ဝုတ္တံ။ ဗဟိဂာမေ ဌပေတ္ဝာ။ပေ.။ ဝိနယကမ္မံ ကာတဗ္ဗန္တိ ဝုတ္တတ္တာ အဓိဋ္ဌာနေ ဝိယ ပရမ္မုခာ ဌိတမ္ပိ နိသ္သဂ္ဂိယံ စီဝရံ နိသ္သဇ္ဇိတုံ နိသ္သဋ္ဌစီဝရဉ္စ ဒာတုံ ဝဋ္ဋတီတိ ဝေဒိတဗ္ဗံ။
495.Nadiṃ otaratīti hatthapāsaṃ muñcitvā otarati. Na āpajjatīti paribhogapaccayā dukkaṭaṃ nāpajjati. Tenāha ‘‘so hī’’tiādi. Aparibhogārahattāti imināva nissaggiyacīvaraṃ anissajjetvā paribhuñjantassa dukkaṭaṃ acittakanti siddhaṃ. Ekaṃ pārupitvā ekaṃ aṃsakūṭe ṭhapetvā gantabbanti idaṃ bahūnaṃ sañcāraṭṭhāne evaṃ akatvā gamanaṃ na sāruppanti katvā vuttaṃ. Bahigāme ṭhapetvā…pe… vinayakammaṃ kātabbanti vuttattā adhiṭṭhāne viya parammukhā ṭhitampi nissaggiyaṃ cīvaraṃ nissajjituṃ nissaṭṭhacīvarañca dātuṃ vaṭṭatīti veditabbaṃ.
ဂမနေ သဥသ္သာဟတ္တာ ‘‘နိသ္သယော ပန န ပဋိပ္ပသ္သမ္ဘတီ’’တိ ဝုတ္တံ။ မုဟုတ္တံ သယိတ္ဝာ။ပေ.။ နိသ္သယော စ ပဋိပ္ပသ္သမ္ဘတီတိ ဧတ္ထ ‘‘ဥသ္သာဟေ အပရိစ္စတ္တေပိ ဂမနသ္သ ဥပစ္ဆိန္နတ္တာ ပုန ဥဋ္ဌာယ သဥသ္သာဟံ ဂစ္ဆန္တာနမ္ပိ အန္တရာ အရုဏေ ဥဋ္ဌိတေ နိသ္သယော ပဋိပ္ပသ္သမ္ဘတိယေဝာ’’တိ ဝဒန္တိ။ ပရတော မုဟုတ္တံ ဌတ္ဝာတိ ဧတ္ထာပိ ဧသေဝ နယော။ အညမညသ္သ ဝစနံ အဂ္ဂဟေတ္ဝာ ဂတာတိ ဧတ္ထ သစေ ဧဝံ ဂစ္ဆန္တာ ‘‘ပုရာရုဏာ အညမညံ ပသ္သိသ္သာမာ’’တိ ဥသ္သာဟံ ဝိနာဝ ဂတာ ဟောန္တိ, အရုဏုဂ္ဂမနေ နိသ္သယပဋိပ္ပသ္သဒ္ဓိ န ဝတ္တဗ္ဗာ ပဌမတရံယေဝ ပဋိပ္ပသ္သမ္ဘနတော။ အထ ‘‘ပုရာရုဏာ ပသ္သိသ္သာမာ’’တိ သဥသ္သာဟာဝ ဂစ္ဆန္တိ, နိသ္သယပဋိပ္ပသ္သဒ္ဓိယေဝ န ဝတ္တဗ္ဗာ။ ဧဝဉ္စ သတိ ‘‘သဟ အရုဏုဂ္ဂမနာ နိသ္သယော ပဋိပ္ပသ္သမ္ဘတီ’’တိ ကသ္မာ ဝုတ္တံ? ဝုစ္စတေ – သဥသ္သဟတ္တာ ပဌမတရံ ပဋိပ္ပသ္သဒ္ဓိ န ဝုတ္တာ။ သတိပိ စ ဥသ္သာဟဘာဝေ ဧကတော ဂမနသ္သ ဥပစ္ဆိန္နတ္တာ ‘‘မုဟုတ္တံ ဌတ္ဝာ’’တိ ဧတ္ထ ဝိယ သဟ အရုဏုဂ္ဂမနာ ပဋိပ္ပသ္သဒ္ဓိယေဝ ဝုတ္တာ။
Gamane saussāhattā ‘‘nissayo pana na paṭippassambhatī’’ti vuttaṃ. Muhuttaṃ sayitvā…pe… nissayo ca paṭippassambhatīti ettha ‘‘ussāhe apariccattepi gamanassa upacchinnattā puna uṭṭhāya saussāhaṃ gacchantānampi antarā aruṇe uṭṭhite nissayo paṭippassambhatiyevā’’ti vadanti. Parato muhuttaṃ ṭhatvāti etthāpi eseva nayo. Aññamaññassa vacanaṃ aggahetvā gatāti ettha sace evaṃ gacchantā ‘‘purāruṇā aññamaññaṃ passissāmā’’ti ussāhaṃ vināva gatā honti, aruṇuggamane nissayapaṭippassaddhi na vattabbā paṭhamataraṃyeva paṭippassambhanato. Atha ‘‘purāruṇā passissāmā’’ti saussāhāva gacchanti, nissayapaṭippassaddhiyeva na vattabbā. Evañca sati ‘‘saha aruṇuggamanā nissayo paṭippassambhatī’’ti kasmā vuttaṃ? Vuccate – saussahattā paṭhamataraṃ paṭippassaddhi na vuttā. Satipi ca ussāhabhāve ekato gamanassa upacchinnattā ‘‘muhuttaṃ ṭhatvā’’ti ettha viya saha aruṇuggamanā paṭippassaddhiyeva vuttā.
အန္တောသီမာယံ ဂာမန္တိ အဝိပ္ပဝာသသီမာသမ္မုတိယာ ပစ္ဆာ ပတိဋ္ဌာပိတဂာမံ သန္ဓာယ ဝဒတိ ဂာမံ အန္တော ကတ္ဝာ အဝိပ္ပဝာသသီမာသမ္မုတိယာ အဘာဝတော။ နေဝ စီဝရာနိ နိသ္သဂ္ဂိယာနိ ဟောန္တီတိ အဝိပ္ပဝာသသီမာဘာဝတော ဝုတ္တံ, န နိသ္သယော ပဋိပ္ပသ္သမ္ဘတီတိ သဥသ္သာဟဘာဝတော။ အန္တရာမဂ္ဂေယေဝ စ နေသံ အရုဏံ ဥဂ္ဂစ္ဆတီတိ ဓမ္မံ သုတ္ဝာ အာဂစ္ဆန္တာနံ အရုဏံ ဥဂ္ဂစ္ဆတိ။ အသ္သတိယာ ဂစ္ဆတီတိ အသ္သတိယာ အတ္တနော စီဝရံ အပစ္စုဒ္ဓရိတ္ဝာ ထေရသ္သ စီဝရံ အပစ္စုဒ္ဓရာပေတ္ဝာ ဂစ္ဆတိ။ ဧဝံ ဂတေ တသ္မိံ ပစ္ဆာ ထေရေန သရိတ္ဝာ ပဋိပဇ္ဇိတဗ္ဗဝိဓိံ ဒသ္သေတိ ‘‘အတ္တနော စီဝရံ ပစ္စုဒ္ဓရိတ္ဝာ ဒဟရသ္သ စီဝရံ ဝိသ္သာသေန ဂဟေတ္ဝာ ဌပေတဗ္ဗ’’န္တိ။ ဂန္တ္ဝာ ဝတ္တဗ္ဗောတိ အာဂတကိစ္စံ နိဋ္ဌပေတ္ဝာ ဝိဟာရံ ဂတေန ပဋိပဇ္ဇိတဗ္ဗဝိဓိံ ဒသ္သေတိ။ အနဓိဋ္ဌိတစီဝရတာ, အနတ္ထတကထိနတာ, အလဒ္ဓသမ္မုတိတာ, ရတ္တိဝိပ္ပဝာသောတိ ဣမာနေတ္ထ စတ္တာရိ အင္ဂာနိ။
Antosīmāyaṃ gāmanti avippavāsasīmāsammutiyā pacchā patiṭṭhāpitagāmaṃ sandhāya vadati gāmaṃ anto katvā avippavāsasīmāsammutiyā abhāvato. Neva cīvarāni nissaggiyāni hontīti avippavāsasīmābhāvato vuttaṃ, na nissayo paṭippassambhatīti saussāhabhāvato. Antarāmaggeyeva ca nesaṃ aruṇaṃ uggacchatīti dhammaṃ sutvā āgacchantānaṃ aruṇaṃ uggacchati. Assatiyā gacchatīti assatiyā attano cīvaraṃ apaccuddharitvā therassa cīvaraṃ apaccuddharāpetvā gacchati. Evaṃ gate tasmiṃ pacchā therena saritvā paṭipajjitabbavidhiṃ dasseti ‘‘attano cīvaraṃ paccuddharitvā daharassa cīvaraṃ vissāsena gahetvā ṭhapetabba’’nti. Gantvā vattabboti āgatakiccaṃ niṭṭhapetvā vihāraṃ gatena paṭipajjitabbavidhiṃ dasseti. Anadhiṭṭhitacīvaratā, anatthatakathinatā, aladdhasammutitā, rattivippavāsoti imānettha cattāri aṅgāni.
ဥဒောသိတသိက္ခာပဒဝဏ္ဏနာ နိဋ္ဌိတာ။
Udositasikkhāpadavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၂. ဥဒောသိတသိက္ခာပဒံ • 2. Udositasikkhāpadaṃ
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၂. ဥဒောသိတသိက္ခာပဒဝဏ္ဏနာ • 2. Udositasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၂. ဥဒောသိတသိက္ခာပဒဝဏ္ဏနာ • 2. Udositasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၂. ဥဒောသိတသိက္ခာပဒဝဏ္ဏနာ • 2. Udositasikkhāpadavaṇṇanā
